|
الجزء الخامس
الفصل الثاني =-=-=-=-=-= نش من مكانه معصب .. ومشى صوب الباب ورد صد صوب سلطان.. : بس يا.. سلطان: شوف يا جاسم.. لا تخلي غيرتك تدمر مستقبل اختك.. الحمد لله الأمور هانت وانتهى الموضوع باللي فيه.. لا تخليه يكبر.. لا تحل المشكلة بمشكلة أكبر منها.. جاسم:بس كيف تباني اناسب انسان كان السبب في تعب امي وتعبي والضيج الي نحن فيه... عمري ما مديت ايدي على خواتي.. ولكن الي صار خلاني اجتل اختي من الضرب.. سلطان: اللي سويته شي طبيعي اي اخو يسويه .. بس بعد حط في بالك ان البنت عمرها 17 سنه.. ياااهل يا جاسم مراهقه.. انا وانت كنا فهالعمر يوم من الأيام.. وتعرف كيف كانت افكارنا.. وكيف الربع يأثرون.. جاسم: بس يا سلطان.. قاطعه سلطان: شوف يا جاسم .. مثل ما انت اخوها.. انا بعد اخوها لا تنسى انها ربت وكبرت في بيتنا.. بخليك اتفكر ورد علي خبر.. واذا اقتنعت ووافقت.. كلمني عشان نفاتح ابوي بالموضوع.. ونش سلطان بيطلع من الميلس.. وتوه كان بيظهر زقره جاسم.. صد.: هلا.. جاسم: بيي وياك نسير عند عمي نفاتحه بالموضوع.. بس على شرط.. سلطان: والي هو؟؟ جاسم: مابنقول لفطوم ان هو فيصل.. بنقول لها إنه مش الريال العود .. سلطان ابتسم.. وطبطب على جتفه.. : بارك الله فيك.. والله يوفقها يارب.. ظهروا سوا من الميلس وركبوا الموتر وساروا عند بوسلطان البيت عشان يكلمونه بالموضوع.. ويشوفون رايه بالموضوع.. .. .. مجد: اااااااااه يا خلوود هالكورس صدق عوار راس.. هلكت من بروجكت للثاني خلود: مب أردى من حالي.. انا الحق على شو ولا شو.. على تحضيرات الزواج ولا الجامعه.. مجد: انتوا حجزتوا الصالة وجي ولا بعدكم؟ خلود: كان مقرر نبدأ.. بس ماشي وقت والظروف ماتسمح حاليا.. مجد: اهااا يالله الله يعين.. خل اخبرج شو صار البارحة.. خلود: شو صار؟ مجد: اااااااااه يا خلود .. كل يوم اكره هالإنسان الي اسمه احمد اكثر عن الي قبله.. ؟ خلود: بل.. ليش بعد؟؟ مجد: سمعي السالفة.. واحكمي بنفسج ويلست تقول لها السالفة وكيف ان احمد سحب تليفونها وهزبها.. خلود: ه.. مجد: جيه تضحكين؟ خلود: ويدي.. حرام؟؟ ولا منقود مجد: لا بس الموضوع مايضحك.. خلود: اضحك على هبالتكم انتوا الإثنين.. تحبون بعض.. اوه سوري اقصد معجبين في بعض وتكابرون.. مجد: لا والله احين انا طلبت رايج فينا؟؟ ولا رايج فالموضوع.. ؟ خلود: شو بعد تراني قلت لج رايي فالموضوع. مجد: عيل احتفظي برايج أحسن.. ويا هالويه انا ماعندي سالفة اقولج الموضوع خلود: ه.. والله اضحكين مجود مجد: مهرجة وانا مادري خلود: مجد نصيحة مني.. لا تسوين شي يدفعج الثمن غالي وتخسرين احمد.. سكتت مجد وسرحت بأفكارها خلود: مجد ماباج تزعلين من كلامي.. بس قلت لج الصراحة.. مجد بإنفعاال: اوووه خلاص اوكي بس لا ترمسين عنه اتنرفز.. انا مب خسرانه شي .. ألف من يتمناني.. خلود: على راحتج حبيبتي.. بس باجر بتيين وبتقولين خلود قالت.. وتفادت مجد كلام خلود وغيرت السالفة وقعدوا يسولفون عن تحضيرات العرس وغيره.. .. . . .. بوسلطان: بس يا جاسم ماتشوف ان فاطمة صغيره على الزواج بعدها؟؟ جاسم سكت حس عمره ماعنده شي يقنع فيه عمه..: والله يابوي (احتراما لأنه هو الي رباه يناديه بأبوي) الزمن تغير والأحسن البنت تعرس بسرعه.. زمن يخوف.. سلطان: صدقه جاسم يا بوي.. وبعدين تراها مب صغيره وايد.. ماشاء الله السنة بتخلص ثانويه وبتدخل الجامعه.. وغدت حرمه ماشاء الله.. بوسلطان: الي تشوفونه.. انتوا عيال هاليوم وتعرفون مصلحة خواتكم اكثر.. بس شو عن الريال؟؟ من ولده؟؟ وشو يشتغل وقعد سلطان يقول كل شي عن فيصل.. وانه ربيعه من يوم ماكان فالمدرسة.. بوسلطان: يعني انت تعرف الريال عدل.. سلطان: هيه نعم اعرفه زين مازين.. وضامننه . بوسلطان: بس المهم راي جاسم بالموضوع.. هو ولي أمرها.. جاسم: حاشى لله بوجودك مالي أمر على خواتي.. ربي يطول بعمرك.. بوسلطان استانس من رمسة جاسم.. وحس فعلا انه ربى ريال ويعتمد عليه يوم انه يوزه خلود: يسلم راسك ياولدي جاسم.. بس هذا مايمنع اني ماسألك عن رايك؟ جاسم: انا من راي سلطان.. بوسلطان: على بركة الله استانس سلطان في داخله ان الموضوع ترتب.. وكل شي بيتم على خير ان شاء الله.. وان فطوم في واحد بيستر عليها .. صح ان البداية غلط كانت وانتهى الموضوع بغلط.. بس ندم فيصل وتوبته لله يكفي هالشي انه يحس ان بنت عمه بتكون بأمان.. ووعلى طول من ظهروا من الميلس اتصل في فيصل وقال له.. الي صدق من الخاطر استانس.. وكلم هله وقالهم ان هل البنت موافقين.. وجاسم من وصل البيت فاتح أمه بالموضوع.. الي استانست.. مهما يكون قلب الأم على عيالها.. بس ماكانت قادرة تسوي شي حزة عناد جاسم.. لكن جاسم ماقال لأمه من فيصل فالحقيقه عشان ماتقول شي لفطوم.. وصعد الدري ودخل غرفه فطوم الي كانت منى ياسه فيها وتذاكر.. جاسم: منى طلعي برع ابا أرمس فطوم شوي.. منى: وليش في اسرار فهالبيت انا ماعرف عنها؟؟ جاسم: منى قلت لج اطلعي تراني مب فايج لهالرمسه.. منى: اف اف الكل معصب فالبيت.. وتوها منى بتظهر.. يودها جاسم من ظهرها وسحبها صوبه.. وباس راسها: فديتج لا تزعلين.. انا ماعصب على آخر العنقود.. منى صدت صوب فطوم ورفعت حياتها: منو قدي.. ويقولون لييييش طالعه شاعره.. ماهو لو مابستوي شاعره انتوا تخلون الوحده تستوي غصب شاعره.. ابتسم لها جاسم وسكر الباب وسار صوب فطوم الي كانت ياسه على سريرها وتلعب بطرف المخدة.. يلس حذالها... وصد حذاله على الكوميدينه شاف برواز فيه صورته مع خواته.. بس وهم صغار.. فهالصورة كان جاسم عمره تقريبا 19 سنة.. لوى بإيده حوالين جتف فطوم.. حس بداخله انه مشتاق لهالشي من زماااااان.. اخته مهما يكون ومهما صار تبقى اخته.. وفطوم من حست بحراره ايد اخوها وحنانه.. ماقدرت تيود عمرها وصاحت لوت براسها على جتفه.. : سامحني جاسم الله يخليك سامحني مالي غيرك فهالدنيا.. جاسم باس راسها : سمعي اذا بتيلسين اتصيحين بظهر.. فطوم نشت اصطلبت في قعدتها وشلت المنديل ومسحت فيه دموعها: خلاص خلاص.. جاسم: جي اباج.. اتشوفين هالصورة.. كم كان عمري فيها؟ فطوم: 19.. جاسم: يعني اكبر من العمر الي انتي فيه احين بسنتين.. صح.. فطوم: هيه.. |
جاسم: تدرين انا فهالعمر شكثر بلاوي سويت.. الله يستر علي بس.. سويت وايد اشيا.. بس ماكان عندي شخص يوجهني ويرشدني ويقول لي هذا غلط وهذا صح.. كنت احس عمري ريال عود من اللحظة الي شلت فيها مسؤوليتكم.. وكنت احس ان محد له الحق انه يحاسبني بأي شكل من الأشكال.. صح ان عمي ماقصر وكان مكان الأبو وزود.. ولكن بعد ماكان يقدر 24 ساعه يفرغ نفسه لي.. يوم كبرت شوي وعقلت.. عرفت ان لي خوات واخاف عليهن اكثر من روحي.. مابا شي يصيبهم.. تركت كل شي.. وتفرغت لكم.. وقلت الوداع للمراهقة.. لغايه اليوم الي كان شرات الصفعه بالنسبة لي.. لكن الحمدلله الله ستر ومضى كل شي على خير..بس اباه يكون درس.. نحن قدرنا عمرج وان عطيناج شوية حرية زايدة.. بس لازم تاخذين بعين الإعتبار مش كله مره تسلم الجرة
فطوم: توووووبه مابعدها توبه ياجاسم.. بس احين صار لي جريب الشهر بكمل واحس اني بموت.. جاسم: ماعليج حصل خير.. ومن باجر تروحين المدرسة فاهمه فطوم وهي فاجة ثمها من الفرحة: صدددددق جاسم: هيه صدق.. ابا اختي تكون متعلمة وتستوي دكتورة.. ولا نسيتي حلمج وانتي صغيره فطوم فرت عمرها في حضن اخوها من الفرحة : والله فديتك .. لك وعد مني ارفع راسك واييب ذيج النسبة الي تشرف العايله كلها.. جاسم: وانا واثق من هالشي.. بس ها.. ترا نحن في شهر 3 احين.. يعني باقي 3 شهور.. شدي حيلج فيهم فطوم: من احين ببدأ جان تبا بعد جاسم: المهم انتي تبين مب انا.. فطوم: خلاص ولا يهمك.. بس المدرسة شو بيسوون على موضوع الغياب؟ جاسم: بسير ارمسهم ماعليج انتي .. اخوج انا افا عليج.. فطوم: فديتك والله.. والدروس الي فاتتني جاسم: بييج مدرس للبيت يفهمج كل شي.. لاتحاتين فطوم نزلت راسها كأن في شي في خاطرها بس مب قادرة اتطلعه.. جاسم: ليش الحلوة ساكته؟ تمت ساكته جاسم: اعرف الي يدور في بالج.. عن عدنان؟ اظني انتهينا من النقاش بهالموضوع فطوم رفعت راسها وهي تنتظر شفقة او انه يقول انه يمزح.. جاسم: الريال ماينعاب بشي.. ليش الإعتراض فطوم فجت عيونها والدموع انترسن فيها وكله ترجي.. جاسم: ياما بنات خذن رياييل اكبر عنهم ومرتاحين.. بين امي وابوي كان قريب ال10 سنين.. فطوم سكتت وحبست الغصه الي فيها ماقدرت تنطق بأي كلمة.. خافت ان تعارض والعلاقة الحلوة الي انبنت بينها وبين اخوها تنهدم مره ثانيه وهي ماتبا هالشي.. وهي منزله راسها: الي تشوفه ياخوي.. جاسم تقرب منها وباس راسها: اباج تكونين واثقه من شي واحد.. اخوج يحبج .. والي يشوف انه اخير لج يسويه.. وعمره مابيضرج.. يلا حبيبتي انا ساير تامريني على شي فطوم: لا سلامتك.. وطلع جاسم وهو قلبه معورنه على اخته بس قابض روحه مايباها تعرف انه فيصل عن تعارض من ظهر جاسم .. فرت عمرها فطوم على الفراش وقعدت تصيح.. آآآه ياربي شو هالغلطة الي سويتها في حياتي وياسه القى ثمنها غالي.. استاهل انا اعرف اني استاهل.. انا الي يبت هالشي لعمري.. ياما فالمدرسة وامي واخوي نفسه حذرونا من عواقب هالأمور بس كنت اعارض نفسي والكل.. اااااه يارب سامحني دشت منى فهالوقت وشافت حالة فطوم هي تعرف بموضوع الريال العود بس ماتدري بالتطورات الي صارت.. سكتت وماحبت تزعج فطوم عن تضايق زود.. جاسم من طلع مافهم هو ليش سوى هالشي.. ليش ماقال لفطوم ان الريال غير واصغر شرات ماكان ناوي يقول لها قبل لا يدخل.. نزل وفهم امه انه ماقال شي لفطوم وانها بترد المدرسة من اليوم الثاني ام جاسم: بس لازم تعرف هي بتاخذ منو مايستوي جي جاسم: اميييه رمستي واضحة.. ماباها تعرف شي.. هي تعرف ان عدنان الي ياينها.. وخلاص خلها بهالشي.. وهي رضت .. ام جاسم: بس.. جاسم يقاطع امه: لا بس ولا شياته.. دخيلج امييه انا راسي عورني.. دخييييييييلج لا تناقشيني فهالموضوع.. ودي تملج اليوم قبل باجر.. ام جاسم : لا حول ولا قوة الا بالله.. يااااارب وفج بنتي.. وهدي سر ولد.. جاسم: كثري من دعواتج ترا احتاج لها والله ام جاسم: من لي غيركم فهالدنيا.. اكيد بدعي لكم دوم .. . . .. فيصل: أميه الله يخليج احين دقي ام فيصل: ياولد اثجل شو هالحركات.. بتصل بها باجر ان شاء الله فيصل: لا احين ريم: امي اتصلي تدرين به ولدج حنان فيصل: انتي جب.. ريم: انا ريم مب جب.. فيصل: اوهوووووو .. اميييه عاد دقي ريم: دقي تراه مابيبات الليل فيصل صد صوب ريم محرج: اقسم بالله ان نشيت من مكاني بييج وبضربج بخليج تندمين ريم: بل شرير.. هذا وبعدك ماعرست.. لو تعرس السجين بمخباك 24 ساعه ام فيصل: لا ولدي مايسويها.. ولدي ريال ذرب.. ريم: عاشوووو مدحوووه المعرس فيصل: ترومين اصلا.. احسن من خطيبج الدعلة ريم: اه لو سمحت.. لا تقول عن خطيبي دعله.. رياااااال ونعم الرياييل فيصل: هيه صح انا اشهد ريم: امييييييه شوفي فيصل شو يقول عن عادل ام فيصل: اوهووو انتوا الواحد لا قعد وياكم مايقدر يركز في شي.. كل واحد يحن من صوب.. عطني رقمهم بتصل وعن الحشره وانتي لمي ثمج قبل لا اييج ريم: اوكي ياحلوج وانتي معصبه فيصل: هاج امي .. ام فيصل: لا حوووول اقولك الرقم اتييب لي التليفون فيصل: اميييييه تراني دقيت من رقمي يلا عاد.. ام فيصل هزت راسها وشلت التليفون.. سمعت صوت وحده: الوووو ام فيصل: الو السلام عليكم منى: وعليكم السلام... منو الحلوة الأمورة الي على الخط .. ام فيصل ضحكت .. حست بها ياهل صدق.. غطت السماعه: انت ناوي تاخذ ياهل شكلك؟؟ عيل انا تقول لي الحلوة الأمورة.. ريم: اتدلع ام ريلها من احين .. بنات اخر زمن يعرفن يتمصلحن فيصل: لوسمحتي عن الغلط على حرمتي.. ريم: توك غلط على بعلي العزيز.. فيصل: بعلج حاله خاصه ام فيصل: هلا بنتي اشحالج؟ منى: انا بخير الحمدلله.. انتي اشحالج؟؟ انتي اكيد خالو شريفة ام فيصل: انا بخير يسرج حالي.. لا غناتي انا ام فيصل.. منى: بس امي ماتعرف وحده بإسم ام فيصل.. غطت السماعه..: هب هينه تعرف ربع امها بعد.. صدق بنات اخر زمن..: انزين امي عطيني امج برمسها منى: شو بتقووووولين لهااااااااا هني بدت ام فيصل اتحرج ماعيبها الوضع..: بنتي عطيني امج ولا ببند منى: انزين انا اسولف لا تزعلين مني.. هاي امي.. مع السلامه ريم: عاشت الوالدة عطتها العين الحمرا من احين.. فيصل: اميه خلج رقيقه ويا مرتي ام جاسم: السلام عليكم.. ام فيصل: وعليج السلام.. هلا ومرحبا.. منو ام فاطمه؟ ام جاسم: هي نعم ام فاطمة وياج.. ام فيصل: ماشاء الله.. اشحالج.. ؟؟ شخبارج عساج طيبه ان شاء الله ام جاسم: طيبه الحمد لله يسرج حالي.. منو وياي؟ ام فيصل: وياج عزّة.. أم فيصل.. ام ربيع ولدج .. الي ناوين نخطب بنتج فاطمه لولدنا.. ام جاسم: هييييييه تذكرت.. يا حي الله اختي عزّة.. اشحالج شخبارج.. عساج بخير ان شاء الله ام فيصل: بخير الحمد لله ربي يعافيج.. منو الي كلمتني توه فاطمه ماشاء الله؟ ام جاسم: لا هاي بنتي الصغيره منى.. لعوزتج هاي.. مسوده الويه دوم هاي سواتها ام فيصل ارتاحت نفسيا..: لا حليلها حبوبه تدش القلب الله يخليها.. ام جاسم: ويخليج يارب.. وقعدوا يرمسون ويتفقون على يوم يزورونهم فيه.. فيصل ماخلا امه ترمس عدل كل شوي يهمس بإذنها.. يوم الخميس هذا الي هو ورا باجر.. ام فيصل: الصراحه يا ام جاسم ولدي وايد مستعيل .. يعني اسمحي لي حتى اني داقة لج هالحزة بس من حنته.. قلت له عيب وهو عيا الا اني ادق احين ويبا لو يستوي بالخميس هذا ام جاسم ضحكت: .. دوم جي الأولاد.. الله يحفظه يارب.. وافا عليكم حياكم الله في أي وقت.. البيت بيتكم.. ام فيصل: خلاص عيل ان شاء الله بالخميس انا وبنتي العودة وفيصل وابوه بنييكم ان شاء الله.. ام جاسم: بإذن الله .. حياكم الله .. بتنورون المكان.. أم فيصل: منور بهله.. وبندت عنها.. وصدت صوب فيصل: ارتحت احين فيصل وهو منسدح على الكنبه يبدل فالقنوات هيه.. ريم: هيه لازم يرتاح والدليل خذ الريموت عني واستولاه.. هات فيصل: انا معرس لازم اتدلعوني مب تهزبوني.. ريم: الحمد لله والشكر.. |
ام فيصل: بس تدري ارتحت لها وايد ماشاء الله عليها حرمه ذربه وطيبه مبين عليها..
فيصل: هيه ادريبها عمتي فديتها.. ام فيصل: اشوف نسيت امك وبديت تتفدى عمتك فيصل: افا والله افااااااا.. انتي امي وتاااااج راسي .. ام فيصل: فديتك والله.. ريم: انزين وشو عن العروس تقولين ياهل.. ام فيصل: لا حليلها ظلمناها.. طلعت اختها الصغيره الي تلعوزني.. ريم: ه اقول انا بعد.. شو يبا فيها دام انها ياهل.. فيصل: كيفي يمكن ابا اربيها ريم: افااااا وانا اختك حبيبتك اولى بالتربيه.. فيصل: طاعو هاي انتو.. العيوز.. ظروسها شوي وبطيح تقول تربيه.. ريم: اصلا القعدة وياكم ماتنفع.. كله تحطون علي انا الفقيره المسكينة.. لازم ارمس ريلي الوحيد الي يدلعني فديته فيصل: عشتو اتدلعه وتتفداه يدامنا مسودة الويه ام فيصل: مايخصك في بنتي فاهم.. كيفها تتفدى ريلها.. ترا حرمتك بعد بتتفداك باجر.. فيصل: ويييييييه الله يسمع منج جان زين لو باجر.. ريم: مستعيل على رزقه فيصل: لا وانتي الصادقة.. مستعيل على فطومتي.. ريم: ه تعالي سمعيه يا فطوووم قام يتفداج من احين وهو مايعرفج اطالعها فيصل بصمت وهو يضحك.. حليلج ماتدرين .. .. .. نوره وفيصل *تذكير: نوره إخت خلود وسلطان* كانو طالعين ويا اهل فيصل سايرين الحديقة يقضون يومهم فيه ومنها تغيير جو.. لأن يومها الجو كان حلو ومعتدل.. كانت اللمة والقعده واااايد حلوة.. كل اخوان فيصل وابوه وامه واليهال ... خالد: اقول فيصل كم باقي على بيتك وتخلص من بنيانه؟ فيصل: والله المقاول يقول بعد شهرين ان شاء الله ولين مانفرشه بياخذ وقت.. عادل: عشو مستعيل ياريال بتودرني فالبيت روحي اسمني بتوله على توته وفروته.. خالد: ومنو هاييل؟ عادل : هالعسولات الي يدامك.. فيصل: يطري بناتي مهره والعنود.. خالد: ه.. حليلهم والله.. نوره: فيصل شوف شوف صورهم انا ناسيه تليفوني. فيصل: اوكي.. ويود فيصل تليفونه وصورهم.. عسل والله .. عادل: يوم اقولك توته وفروته ماصدقتني.. خالد: عاد انا مرتي حامل وقالولها الجنين ولد.. صد فيصل واطالع نوره ونوره ابتسمت له بهدوء كأنها تقول له صبرك وهدي ماعليك منه.. فيصل: بالبركه ان شاء الله.. يتربى في عزك.. خالد: ها ابوي شو رايك بييك حفيد يشيل اسمك. بوفيصل: كل احفادي شايلين اسمي.. الله يخليهم لي ويطول بأعمارهم.. خالد عنده زوجتين ام الولد الي فيه ثلاسيميا. طيبه وحبوبه وايد.. ومايعيبها تصرفات زوجها لكن ماتروم عليه.. اما هاي الي حامل احين .. فيها وغادة... زوجة خالد (حنان) الثانيه: هيه والله يوم قلت لخالد اني حامل بولد تينن تخبل .. تدرين ترا من عرس للحين وهو في خاطره ولد.. والله مارزقه غير بإثنين من بعد 3 بنات.. واحين بييه الولد الثالث... نوره وهي تبتسم لها بكل طيبه: ان شاء الله ربي يسهل عليج وتربين بالسلامه ويتربى الولد في عزج وفي عزه حنان: ان شاااااااااااااء الله يارب .. .. .. . . . في بيت بوعبيد الكل كان متيمع.. اليدة وحور وعبيد ومجد وامها وابوها .. وبوعبيد وام عبيد.. جلثم: هيه ان شاء الله سلطان بيوديني العمره وياه.. عبدالعزيز: افا اميييه تبين تروحين العمره وماتقولين لنا؟ جلثم: لا بس سمعت ان سلطان بيروح قلت اروح وياه .. عبيد: يدووه انا الي سمعته انه بيسير ويا ربعه وانتي بتروحين وياهم؟ جلثم: وليش فيها شي.. تراهن حسبة عيالي عبيد بصوت واطي لحور: الله يعينهم عيل المساكين.. جلثم: اشووو قلت؟ عبيد: ها اقول اصلا لو يحلمون مابيستانسون من دونج.. بوعبيد: الا ياعبدالعزيز بغيت اخذ شورك.. شو رايك نسافر لنا سفرة جماعية فالصيف بعد عرس خلود وجاسم.. مجد: شوووووووووو نسافر.. ياي اكيد موافقين مايبالها كلام يودت اليدة الخيزرانه وخزت فيها مجد: عنبوج من بنت حشمي.. الرمسة يت لأبوج هب لج.. مجد: ماعليه انا وابوي واحد ولا شو رايك؟؟ عبدالعزيز: هاي اخر العنقود مانقدر نقول لها لا.. بس خل اشوف الميزانيه اذا اقدر ان شاء الله بوعبيد: افااا والله ماهقيتها منك ياخوي.. هاي رمسة تنقال واخوك موجود عقد عبدالعزيز حياته كأنه يباا يفهم بوعبيد انه مايحب هالشي.. : خيرك واصل يا بوعبيد.. حور: بس انا حامل اخاف.. عبيد: انتي ماشي سفر قري مكانج.. لطيفة: ياما سافرنا ورحنا وردينا ونحن حوامل ماصابنا شي.. وبعدين بتكونين لوقتها فشهرج السادس تقريبا اذا الله راد.. يعني ماشي خوف ان شاء الله عبيد: لا لا لا انا اخاف خلنا فالبلاد وايد احلى مجد: عيل انا مابا اسافر من دون اختي.. متعودة اذا سافرنا تكون موجودة.. ميثا: عبيد الله يهديك يا ولدي مابيصيبها الا كل خير بلاك متشائم.. وبعدين شرات ماقالت عمتك بتكون فالسادس يعني ماشي بيأثر ان شاء الله.. عبيد: ماعليه بسأل الدكتورة وبنشاورها اذا عطتنا التصريح وقالت انه عادي بنخاويكم.. مجد: بس ويييييين انزين؟؟ بوعبيد: انا فكرت في لبنان .. وفكرت في شمال إيران.. بوسالم ربيعي ودى مرته وعياله السنه الي طافت.. ويقول الجو حلو وبرد ومنطقة حلوة ..حتى انه ياب كذا صورة وشفتها والمنطقة رووعه.. مجد: هيه انا بعد ربيعتي ميثاني سارت تقول وايد حلو.. واستانست بس المشكلة الوحيدة اللغة.. بوعبيد: لا ماعليج من كثر ماتعاملت مع الإيرانيه هني فالبلاد تعلمت منهم شوي.. مجد: خلاص عيل خل نسير شمال ايران.. مابا لبنان سرنا لها الصيف الماضي حور: وانا بعد من راي حور.. بوعبيد: ماسمعنا راي عبدالعزيز.. عبدالعزيز: والله السفر للعيال اكثر مما هو لنا نحن.. فالمكان الي يحبونه بنروح له ان شاء الله.. مجد: يااااااااااي بنسافر.. والمعاريس بيسيرون اروبا عبيد: برايهم معاريس ماينلامون.. كنا شراتهم ترا.. حور ضحكت بحيا جلثم: انا جني طمه هني.. |
الكل صد صوبها وشافها محرجة وعاقدة حياتها .. مجد يتها ضحكة يودت عمرها عن تنفلع بشي.
بوعبيد: افا يا أمي.. انتي الكل بالكل.. وتاج راسنا.. جلثم: اشوفكم تشاورتوا وقررتوا وخلصتوا وانا ولا سويتولي اي اعتبار.. عبدالعزيز: محشومه يا ام عبدالعزيز..والراي الأول والأخير لج.. جلثم: بعد شو.. بعد مابديتو راي مجوود علي. مجد تقربت من يدتها وهي تدعي في قلبها يارب سترك.. : افاااااا واصلا انا اروم اسوي شي بدون شورج.. احساس داخلي فالقلب (لوت عليها) قالي انج موافقه صح.. جلثم وهي تضحك وتيود ايد مجد الي حوالي رقبتها.. : فديت هالإيد انا.. اسولف بغيت اغير الجو.. اسوي سوالف شرات ماتقولون.. الكل ضحك.. وفهاللحظة دخل أحمد كان شكله هلكان وتعبان.. احمد: السلام عليكم.. الكل: وعليكم السلام أحمد: ماشاء الله وانا اقول البيت ليش منور.. أثاري النور كله هني.. (مشى صوب يدته ونشت مجد وسارت عند حور قعدت وهي تتطالعه بطرف عينها.. تقرب احمد من يدته وحب راسها).. لاخليت منج يارب.. جلثم: فدييييييييت ولدي.. شكلك ميهود وتعبان.. أحمد بعد ماباس راس ابوه وامه وعمه.. يلس عند يدته ولوى عليها: شو اقول ولا شو .. اااااااااه خلي الي فالقلب فالقلب.. صد بطرف عينه صوب مجد وهي نزلت راسها مستحيه بس محد لاحظ هالشي جلثم: واعلييييييييييه ولديييي.. يالله بالستر ومنو الي خلاك جي.. قول طلع الي في خاطرك.. أحمد: الي في خاطري كلام كثير ماتكفيه السطور عشان اكتب عليه احساسي.. الكل ضحك على رمسة احمد وشكل يدته الي صدق مندمجة.. ميثا: خل عنك هالرمسه وهالسوالف وسير بدل ثيابك عشان تتعشا.. أحمد: هو تم فيها عشا ولا غدا.. وانا اقدر ابلع اللقمة.. جلثم: ميثوو ويهد شو ياج على الولد خليه فديييييته يقول الي في خاطره.. ماباه يستهم فديت روحه.. أحمد: خلوووووني يا جماعه خلوووني اشكي الحال..آه لو كان للحب قاضي. جلثم: واخزياااااااه ولدي يحب.. ومنو هاي الي ماتستحي مسويه فيك جي.. قولي عنها احين اييها بهالعصا أحمد خز مجد بنظرة سريعه فهاللحظة الي تحركت وخشت عمرها ورا حور ببطء.. والكل يطالع احمد وينتظرونه يرمس.. وعبيد كل شوي يهمس في اذن حور وحور تضحك.. أحمد: اسمعك تراني لا تحش عيب.. جلثم: منو الي يحش فيك.. أحمد: هذا عبيد.. مايستحي.. الا وين مروه انا احس القعدة ناقصه شخص فيها ميثا وهي تحاول ترقع الموضوع عن اليدة تعرف ان مروه سايره تحتفل بيوم زواجها مع ريلها وتحتشر.. : ماشي مشغوله ويا عيالها شوي.. أحمد: هيييييه.. جلثم: ماعليك من حد قولي انت شو الي في خاطرك.. أحمد: الحب عذبني يا جلثم.. عذبني.. يودت العصا وضربته على ريله وهو من كثر ما عوره نقز من مكانه ونش.. : شوي شوي.. هذا وانا متعذب تضربيني.. جلثم: عشان تأدب.. عيل تزقرني بإسمي ياللي ماتستحي.. أحمد: شو اسوي ترا هاي الي معذبتني اسمها جي على اسمج انا شو ذنبي.. الكل ضحك يوم شاف اليدة كيف احمرت.. أحمد وهو يسوي عمره يصيح ومضايج: يعني يكفي هي ماتحس فيه ولا في حبي .. وانتي يايه تكملين علي همي.. ااااااه اروح لمنو ولا منو عشان يفهمني.. عبيد ماقدر يود عمره يلس يضحك من الخاطر: اخبرك تنفع ممثل لمسلسل في رمضان.. أحمد: هو الصراحة يتني عروض وايد بس انا مشغول ما وافقت.. نشت اليدة ورا احمد .. حس احمد من نظرات حور وعبيد ان في شي وراه.. يوم صد الا شاف يدته وراه .. توه بيشرد يته ضربة بالعصا على ظهره.. وشرد صعد الدري: الله يسامحج.. ماحبج خلاص.. جلثم: مانبا حبك خله حق جلثم.. عيل كل ها تمثيل وانا يحليلي مصدقة ان ولدي مستهم ومتضايق.. أحمد تم يضحك وصعد الدري.. وهو كل تفكيره في مجد.. حس انه قدر يفهمها حبه لو بطريقة مب مباشرة.. استانس في داخله.. ومجد تمت سرحانه وهي تتذكر كلام خلود.. بتخسرينه... .. .. .. ومرن هاليومين على خير.. وكل شي بهدوء وروتين.. العلاقة بين خلود وجاسم بدت تتحسن يوم عن يوم.. وهالشي كان مبشر بالخير.. سلطان وابوه كانو متفقين انهم يروحون بيت جاسم بعد صلاة المغرب لأن فيصل وابوه بيوصلون فذاك الوقت عشان يرمسون في موضوع الخطبة ويتفقون على يوم الملجة .. والقص وغيره.. فهالوقت كان سلطان يالس ويا امه فالصاله يسولف وياها.. شيخه: وانت ياسلطان متى الله بيهديك وتعرس.. ودي اشوفك معرس والله.. سلطان: جريب ان شاء الله جريب.. علي: ولييش ماتقولين عني انا.. شيخه: انت تو الناس عليك.. يدامك دراسه تخلصها .. شرات سلطان ماشاء الله خلص واشتغل احين دوره للزواج.. علي: مايخصني انا اذا حبيت وحده لازم اتيوزوني اياها من اخلص الثانويه شيخه: .. مانروم عليك انت .. سلطان: حليله بعده صغير مايعرف الدنيا كيف.. علي: شوووو انا صغير.. انا صف خامس مب صغير.. شيخه: لا تقول عنه صغير ولدي ريال كبير بعد.. شيخه: الا وينه خالد مابيي وياكم؟؟ سلطان: بلا كلمته قال بيظهر من بيته على طول بيسير بيت عمي الله يرحمه.. شيخه: الله يرحمه ان شاء الله.. سكتوا شوي.. ودخلت خلود وهي ترمس تليفون: ه حليلج والله يا زين سوالفج.. خلاص عيل الغاليه بخليج احين لأني بيلس ويا الأهل خلاف بدق لج وبنكمل سوالفنا.. شما: على خير ان شاء الله مع السلامه.. خلود: مع السلامه.. حليلها والله طيبه وايد هالبنت.. شيخه: كنتي ترمسين منو اميييه؟ خلود وهي تتطالع سلطان وتضحك: وحده من رباعتي اسمها شما.. شيخه: حليلها الله يخليها يارب.. سلطان اختبص من سمع طاري شما.. حس ان صدق قلبه ويا هالإنسانه.. وحبها ويتمناها له.. شيخه: انزين ياسلطان من شوي قلت لي ناوي على العرس جريب.. سلطان: ه اميه مستحيل تنسى شي.. خلود: هيه امي يبا يعرس والبنت الصراحه فناااانه شيخة وهي تفتح عيونها: ماشاء الله مخططين ومخلصين عيل.. لا شو رايك جان ملجت عليها بعد.. سلطان يطالع خلود بطرف عينه ويخزها بنظراته... : اراويج شيخه: خلك منها وجابلني.. قولي من بنته؟؟ وكيف شكلها؟؟ ومن وين عرفتها؟؟ سلطان: حبه حبه امييييييه.. وبعدين انا مستحيل اسوي شي من غير شورج.. وقبل لا حتى اقرر اني اباها او لا.. قلت بشوف هل ابوي وانتي بترضون اخذ وحده برع الأهل.. شيخه: شوف لا تظن افكاري وافكار خوالك نفس الشي.. انا وابوك ماعنا هالسوالف زواج أهل ومادري شو.. هذي سوالف أول.. واذا تبا من الأهل فخير وبركة ماعندنا مانع.. واذا من برع ترا نفس الشي.. سلطان: هيه زين ريحتيني.. لأني كنت ابا فطوم بس ياها نصيبها والبنت الله يوفقها.. ومنى صغيره علي وايد.. وهذيل الي من الأهل اعرفهم.. شيخه: افا ومجد بنت اخوي.. سلطان اختبص وخلود تيبست واعتدلت في قعدتها.. : ها لا هاي عندها ولد عم اولابها.. شيخة: خلاص وعن البنت من بنته وشو اسمها ؟ سلطان: الصراحة ماعرف التفاصيل هذي.. بس خلود تعرف.. انا يادوب سامع بهم وشايف البنت شيخه: خبرني عنها قعد سلطان يشرح حالتهم الإجتماعيه من وفاة ابوها.. وكيف ان اعمامها مالهم شغل فيها ولا ينشدون عنها.. شيخه: حسبي الله ونعم الوكيل.. وشو يعني ان امها هنديه.. عيب ولا حرام.. قاطعتها خلود: امييه انا رمست امها .. والله ماحسيت انها هنديه ماشاء الله عليها ترمس شراتنا ويمكن احسن بعد.. وطيبه ماشاء الله عليها.. شيخه: هيه ادري ترا الهنديات الي مال قبل جي يعرفن يرمسن.. شرات يارتنا ام مروان.. تراها هنديه بعد.. لا شكلها يبين انها هنديه ولا رمستها.. وطيبه وحنونه على عيالها ومربتنهم احسن تربيه.. سلطان: هاي سالفتها.. والي عيبني فالموضوع يميي.. ان البنت عمرها مافكرت تسوي شي غلط حتى وهم بهالحاله.. راضيه ومقتنعه... وبعدين هم مب فقارى .. عندهم معاش الشؤون وراتب التقاعد الي ينزل لأبوهم الله يرحمه.. لكن اعتقد مبلغ بسيط وايد مايكفيهم.. وعندهم بيت الحمد لله.. خلود تشارك وياه: وهيه امه تسوي دهن عود كمبودي من الهند اييبونه .. وبخور وعطور.. شيخه: ماشاء الله.. عيل اتكد خير.. لأن هالسوالف اتربح وايد هالأيام.. سلطان: فمادري شو رايج فيها اميه؟ شيخه: خاطري اشوف هالبنت.. احسها طيبه خلود: واااااايد امي تعاملت وياها.. ماشاء الله عليها.. بنت والنعم فيها صدق مؤدبه وخلوقه.. ودارسه بعد.. شيخه: شو ترين؟ اعزميها عندنا وخل نشوفها .. خلود: خلاص ان شاااااء الله في اقرب فرصه.. سلطان: يالله عيل انا بنش اتزهب عشان الحق اوصل بيت عمي.. خلود: الله يوفقج يا فطووووووم .. ويهنيج يااااااارب سلطان وشيخه: يارب آمين علي: اصصصصصصص بدأ سلام دانج.. سلطان: ويقول ابا اعرس من اخلص الثانويه .. علي: كيفي.. ريال شيخه: كيفه كيفه.. لا تفج لسانه دخيلك.. .. .. خلود كانت قايله عن شما لمجد وان سلطان يباها وجي.. وعرفت شوي عن شما وسالفتها واهلها كيف.. وان امها هنديه.. ومن وقتها وهي حاطه في بالها ترسم شما بس طبعا من وحي خيالها حسب تصويرها.. دشت عليها يدتها شافتها ياسه على المكتب وترسم ومندمجه جلثم: شو تسوين؟ مجد: ويه بسم الله .. روعتيني.. جلثم: بسم الله عليج.. شو تسوين؟ مجد: أرسم جلثم: وانتي ماتملين من مجابل هالرسومات؟ مجد: هوايتي هاي يدو شو اسوي بعد.. جلثم: الله يعطيج العافيه.. بس خفي على عيونج مب زين صدت مجد صوب يدتها وهي تبتسم لها: من عيوووووني يا عيوني.. جلثم: انتوا ماناخذ منكم غير الرمسه وياريت لو نروم عليكم.. لا اله إلا الله.. مجد ابتسمت وردت تكمل لمساتها الأخير على الصورة.. وطلعت النتيجة رووووووووعه مجد: ه هو اكيد البنت احلى.. بس يالله هذا الي قدر عليه خيالي.. .. .. __________________ |
أم عمّار (أم شما): شما روحي فتحي الباب انا مشغولة..
شما وهي تمشي صوب الباب: ان شاء الله.. وطلعت من باب الصالة وسارت تفتح باب الحوي.. تشوف منو الي ياهم ومن فتحت الباب انصدمت.. خافت.. حست ان راسها انشل من التفكير والإستيعاب.. هزاع: انتي اييييه .. ماتعرفين ترمسين ولا تسلمين.. شما وهي ترفع حياتها: اعرف بس انت الي ياي وانت الي لازم تسلم الي داخل هو الي يسلم مب الي طالع.. هزاع: اخبرج.. انتي ايه بنت الهنديه يايه اونج تعلميني الأدب.. تهبييييييين الا انتي.. عمّار كان فالميلس الخارجي وسمع حشره.. طلع من الميلس يطالع شو الي صاير.. : منو هذا شما؟؟ هزاع: عم من اعمامك يالخايس.. من سمع عمار هالرمسه ربع بسرعه عشان يسير يضربه.. بس شما بندت باب البيت في ويه هزاع.. وسارت تهدي اخوها.. هزاع تم يزاعج ويحتشر.. هزاع: انتي ايييييييه .. تحسبين عمرج قدها يوم انج تسكرين الباب في ويهي.. جليلة الحيا الي ما تستحي.. اخبرج ايه انتي.. هذا بييييييت عمي فاهمه مب بيتج يا بنت الهنديه عشان تروغيني.. عمّار: شمووو هديني عليه قاهرني.. منو ها.. شما: يزول.. ها ولد عمك.. عمّار: شو يبا؟ شما: هاي حالته يوم يسكر ساعات ايينا البيت ويحتشر.. وعلى حظك انت كنت موجود هالمره وسمعته.. عمّار: ياربي يعني لازم يأذونا .. مايكفيهم الي نحن فيه.. شما: مب محتاجين لهم برايهم.. يزول الا هو .. ينبح لين مايتعب.. عمّار: بس مب حاله هاي ايينا البيت ويسبنا وهو سكران بعد.. شما: هدي اعصابك عمار.. مايسوى عليك تحرق اعصابك جي.. عمّار: بس اذا يانا مره ثانيه ورد سوى هالحركة والله ماسكت عنه ولا تحاولين اتيوديني لأني مابسكت.. شما: ماعليه بس انت سير احين وهد اعصابك وانا بدور لي صرفة وياه.. دش عمار وتمت شما ياسه فالحوي متضايقه.. تذكرت اليوم المشؤوم.. فاللحظة الي شافت فيها هزاع خافت.. انه درى انها كانت هناك عن عفرا اذا فضحتها.. لكنها عقب ارتاحت يوم شافته على عادته سكران ويحتشر ويروح.. أذيه هالإنسان مكره الفريج فيه.. جيران شما كلهم عرفوا بموضوعه وحركاته.. فاضحنهم.. والمشكلة مايرومون عليه.. مره شما تجرأت وسارت عند عمها وكلمته .. هزبها وطردها.. زين ماضربها ولا مد ايده عليها.. ومن يومها قرروا مايسوون شي لأنه مامنه فايدة.. مابيرومون عليه دلوع امه وابوه.. .. .. بعد صلاة المغرب الرياييل والحريم تيمعوا في بيت بوجاسم واتفقوا على كل الأمور.. واصر بو فيصل على ان خير البر عاجله.. وهم عشان مايخربون على فطوم دراستها وتتأخر الملجة.. فقرروا تكون الملجة بسيطة بين العايله فالبيت الإسبوع الي بعده.. استانس جاسم في داخله خصوصا بعد ما قابل فيصل وابوه واخوه الي من ابوه.. حسهم فعلا ناس ماشاء الله عليهم .. أدب واخلاق وتربيه .. وعن سوالف فيصل.. ترا كل الشباب لهم هالسوالف.. وفيصل لولا انه طينته زينه.. لما كان بيصحح غلطته.. لكن خصلته طيبه رغم كل مساوئه وهذا اكثر شي خلا جاسم يوافق عليه طبعا مش كل من يرمس بنت ينوي يخطبها حتى وان صار هناك مشكلة وخطأ شرات ماصار لفطوم.. ولا كل علاقة بهالطريقة تمر على خير.. عادي تستوي جريمة قتل في مثل هالمواقف. ولكن عقلية جاسم وسلطان خلتهم يفكرون بالموضوع كمشكلة لازم ينوجد لها حل منطقي وليس القتل والضرابه لأنها مابتفيد في شي.. يبون البنت تندم على الي سوته وقدروا عمرها وسنها.. والي ساعد اكثر ان فيصل طلع ريال زين وقدر حجم المشكلة الي تسببها... ياما مشاكل صارت ويكون الريال تخلا من البنت وخلاها تعاني من مشاكلها يمكن طووول عمرها.. وهو ولا على باله.. يمكن طلعت من نطاق القصه شوي.. لكن احب اوضح هالنقطة لأنها وايد مهمه.. يمكن وايد بنات يتابعون القصه ويعتقدون ان كل الشباب شرات فيصل.. وينجرفون فالخطأ على امل ان الرجل هذا مثل فيصل.. لا تنسون نقطة.. فيصل شخصيه من الخيال.. يمكن تكون مثاليه جدا.. لكنها بعيدة عن الواقع.. الخيال والحلم شي سلس يصعب تطبيقه على واقع الحياة الخشنة التي نعيشها.. الغلط يبقى غلط.. ولكن يجب تصحيحه.. والصح يكثر منه.. هذا الموقف ارجع اقوله.. لا يمد بأي صلة بالواقع الي نعيش فيه.. يمكن حدوثه لكن اقل من نادر ايضا.. وكل الشكر لكم.. توقعاتكم.. فطوم بتعرف ولا بتظل على عماها ؟؟ حليله أحمد متعذب.. وهو شبه اعترف لمجد.. هل مجد بتلين وبتعترف؟؟ سلطان وحبه لشما.. توقعاتكم لحياتهم المستقبليه؟ يوم الملجة.. فيصل شو بيسوي؟ عبيد وحور... حليييييلهم منسايين فهالأجزاء.. شو تتوقعون لهم؟؟ تحياتي |
الحمدالله على السلامة يا أخت حوراء
القصة مرررررررررررره حلوة بس ياليت تكملينها بسرعة لأني متشوقة ابي اعرف النهاية كيف بتكون... مبدعة دائماً إن شاء الله تحياتي |
اقتباس:
|
الجزء السادس
الفصل الأول =-=-=-=-=-= نزلت فطوم وهي متضايقه من الخاطر.. واول ماصدت تحت شافت ريم.. ابتسمت لها .. ريم: امييه شكلها العروس يت.. صدت ام فيصل صوب الدري وشافتها.. جميله وبريئة ومبين عليها هاديه من مشيتها.. لكن في حزن يسكن عيون هالبنت .. لكن طبعا محد حس بشي.. فاطمه: السلام عليكم.. ام جاسم: حياج يمي فاطمه يسي عند عمتج.. تقربت فاطمه وحبت راس ام فيصل.. وسلمت على ريم وقعدت عند امها.. ام فيصل: ماشاء الله عليها قمر.. ام جاسم: من طيبج... منى: وانا شو خالوو ماقلتي لي؟ ام فيصل: ه انتي الحلا كله منى: هيه جي زين .. الكل ضحك الا فطوم اللي اكتفت بإبتسامه خفيفه والكل فسر هالشي على خجلها.. وماقدرت تتحمل زود.. استئذنت وصعدت غرفتها.. ام جاسم: عاد اعذروها البنت مستحيه.. ام فيصل: لا ماعليج معذورة.. وياحظ ولدي عليها عيل.. ريم: الله يهنيهم يارب.. وتموا يسولوفن لغايه ما الرياييل خلصوا وزقروا ام فيصل وريم عشان يظهرون وردوا البيت.. ودش جاسم البيت.. جاسم: ها امي شافو فطوم؟ ام جاسم: هيه واستانسوا عليها بعد .. منى: حتى انا استانست علي العيوز.. ام جاسم: استحي يا بنت شو هالرمسه.. منى: اوه انا ماقلت شي.. اسوي سوالف.. جاسم: المهم امي شرات ماتفقت وياج مو تنسين.. منى وهي تتليقف: لحظه على شو متفقين من وراي.. جاسم: لحووووووول.. انا ساير امي ويا عمي.. مع السلامه ام جاسم: بحفظ الله.. منى: افففف طنشوني بعد .. .. اليوم الثاني مجد: يلا امي انا سايره تامريني على شي..؟ لطيفه: لا فديتج حطي بالج على روحج ومن تخلصين دقي علي عشان يمرون عليج.. مجد: ان شاء الله.. وطلعت مجد من البيت سايره الصالون.. وكان ابوها الي بيوصلها.. ومروا على خلود وخذوها وساروا سوى الصالون .. خلود: السلام عليكم خالي.. عبدالعزيز: وعليكم السلام.. اشحالج خلود بنيتي؟ خلود: الحمد لله خالي انا بخير.. انت اشحالك؟؟ عبدالعزيز: الحمد لله يسرج الحال.. اقول اي صالون تبون تروحون؟ مجد: هذا الي دوم اروح له.. صالون ال(----).. وبعدها بخمس دقايق وصلوا الصالون.. ونزلوا سوى.. خلود: ه دخيلج بس والله دمعت.. مجد: انتي استأذنتي ومن ريلج وطلعتي؟؟ خلود: هيه.. مجد: اتحرى بعد.. ماعنا حريم يطلعن عن شور رياييلهن خلود ضحكت لها وصدت صوب راعية (صاحبة) الصالون.. : لو سمحتي بشرى موجودة؟ راعية الصالون: هيه بس عندها زباين احين.. شو بدك تعملي؟ خلود: حلاوة .. راعية الصالون: كامل؟ خلود: لا بس --------- راعية الصالون: روحي عند البنات وخذي دورك وانتي ستي شو بدك تعملي؟؟ مجد وهي تبتسم لها: وانا وياها.. نفس الشي.. راعية الصالون: اها خلاص اوكي بس بالأول اعملوا الفاتورة ودفعوا وخلصوا وصعدوا الطابق الثاني عشان يدخلون الغرفه المخصصه.. وكان بين كل سرير والثاني ستاره عشان يكون منفصل بين كل حرمه والثانيه .. مجد: تدرين رسمت شما البارحة.. خلود: اي شما؟ مجد: تستهبلين انتي... شو اي شما؟؟ هذي الي سلطان يباها.. خلود: هييييييه اسميني مخرفه .. ايه انتي شوي شوي.. العاملة: سوري ماما.. مجد: العيوز لا تحرطمين وايد.. خلود: جب انتي.. انزين ابا اشوف الرسمة.. مجد: يوم بتيين بيتنا خلود: دبه مسويه هالشي عشان ايي بيتكم غصب.. مجد: هيه .. اخبرج سمعتي عن سالفة سفرة الصيف لشمال إيران خلود: هيه يختي قالي سلطان مت قهر.. شو ها ماقررتوا الا يوم انا بعرس .. مجد: عاد انتي بتسيرين اوربا منو قدج.. خلود: مابا بس حلاته جي اللمه وياكم مجد: يالله ماعليه اليايات اكثر.. خلود: ان شاء الله.. .. .. أحمد: .. خس الله ابليسك سعووود.. انزين يعني اليوم الكل بيتيمع؟.. سعيد: هيه عاد تعال.. خل عنك الدراسه شوي.. كله ذابح روحك دراسه دراسة.. واليوم الجمعه.. أحمد: خلاص ان شاء الله بس اخلص الي بيدي احين.. وبييكم.. سعيد: ياريال الشغل مابيخلص لو قعدت عليه.. انت تعال احين لين ماتوصل بياخذ عليك ساعة ونص تقريبا.. أحمد: انزين تو الناس.. احين الساعه 7 .. سعيد: وين تو الناس.. تقول الساعه 7 ولين ماتوصل بتستوي الساعه 9 .. ونحن يمعتنا تبدأ من الساعه 8 بعد صلاة العشا.. أحمد: انزين ياخي كل ها شوق لقعداتي .. سعيد: شفت عاد.. أحمد: خلاص ان شاء الله كلها مسافة الدرب وانا عندكم اذا الله راد.. ونش احمد ورتب اغراضه عشان يتلبس ويجهز يروح المزرعه عند ربعه.. .. .. .. ناصر: والله يا سلطان من زمااااان وانا مشتاق للمة هاي.. سلطان: أأأ.. حاسب.. ترا هاللمه غير عن كل مرة.. فيصل: دخيلك يا سلطان.. لا تذكرني بلماتنا القبلية.. مأساة وحياتك.. سلطان: الحمد لله نشينا من غفلتنا.. ناصر : صدق ماقلت لكم شباب.. تدرون ان الشرطة طلبوني.. سلطان وفيصل: ليش؟ ناصر: عشان اشهد في قضية عفرا.. والله لو تشوفون شكلها.. ماتقولون هاي عفرا الي كنا نتعامل وياها.. سلطان: سبحانك يارب.. الله يهديها وهالشي يكون لها درس عشان اتوب لله.. فيصل: بس انا شاك انها بتطلع من الموضوع.. سلطان: وكيف؟ فيصل: في ناس فوق فوق كانت تتعامل وياهم.. وهم يمكن يدخلون.. ناصر: لا لا .. مب لهالدرجة .. ماتوصل الأمور لهالحد.. الحمدلله الدنيا فيها قوانين وبعدها بخير.. سلطان: تدري انا بعد اؤيد كلام فيصل.. لأن في مره صارت لواحد من ربعنا هالسالفه.. يوسف جان تعرفونه؟؟ فيصل: يوسف الفلاني.. سلطان: هيه.. يقولك الريال مره شاف سياره مخالفه .. وقفها عشان يكتب المخالفه وطلعت فيه وحده مايتعدى عمرها ال18 او 19... طلب منها الليسن والملكية.. رفضت تعطيه.. وقالها بيكتب لها مخالفه على مخالفتها للسير.. تعرفون شو قالت؟ ناصر: شو قالت؟ فيصل: هيه تذكرت خبرني السالفه كمل.. عشان يصدق ناصر كلامي.. سلطان: يقول بكل وقاحه ردت عليه وقالت له.. شوف.. انا بشي بسيط مني طلعت هالموتر وكان الموتر بورش كايين.. ومستعده اعيد الشي عشان تنطرد من الدوام.. ناصر فج عيونه مبهت: اشووووووو.. ولا يكون هو خاف وماسوالها شي.. سلطان: الريال يخاف ينطرد من شغله شو تقول انت... المهم سار عند مديره فالدوام وعطاه الدريس (اللبس الخاص بالشرطه او الجيش .. الملابس الرسمية) وقاله السالفه.. مديره سكت وماقدر يرد عليه.. الشي الوحيد الي سواه قاله لا يقدم استقالته ولا شي.. يتحمل هالمواقف فيصل: شفت عاد يوم قلت لك ان في ممكن يكون هناك دعم لعفروو.. سلطان: بس الشي الوحيد الي قاله لي الشرطي وانا اصريت ان هالشي يستوي .. واللي هو يعرضونها للجنة الإصلاح والإرشاد.. يعطونها دروس دينيه يمكن تتغير ونكون بهالطريقه ساعدناها تهتدي ناصر: بس توبتها لازم تكون نصوحة.. انها بالمره ماترد لهالأمور.. فيصل : أكيد.. وفهاللحظة مرت حذالهم شلة بنات.. وحده كانت تتطالع فيصل طول ماكانت تمشي.. وتبتسم له وتسوي له حركات.. وفيصل يصد عنها ومايطالع.. سلطان حس ان فيصل شي بلاه صد وراه وشاف شلة البنات.. وعرفهن... لأن دوم كان قبل يشوفهم على الممزر وفيصل يروح وياهم.. : فيصل لا تخليهن يأثرن فيك. فيصل: افا عليك.. هاييل شياطين الإنس.. ناصر: وفالحين بس يطلعون قرار منع المغازل ويعاقبونا نحن الرياييل.. أول شي خل البنات الي من هالأشكال يتعاقبن عشان الرياييل يحشمن هالبنات. سلطان: شو بتقول.. الله المستعان.. .. .. .. خلود: يالله اتصلي في خالي خل يمر علينا؟.. مجد: اووووووووكي.. شلت التليفون واتصلت على ابوها بس مارد .. ردت دقت له لين مارد.. مجد: الو باباتي خلصت.. يالله شو مابتمر علينا؟؟ عبدالعزيز: والله انا ساير عيمان شوي عندي شغله وبييكم بس بتأخر بتترين ولا تبن اخبر احمد يمر عليكن؟ مجد وهي عاقدة حياتها وتغطي السماعه: يعني لازم احمد الي يمر علينا.. خلود وهي تهز راسها: هي هيه.. هاي فرصتح تسوين الي تفقنا عليه.. مجد وهي تضحك بخبث خلاص اوكي.. مجد: انزين ابوي عطني رقمه عشان ادق له اذا ممكن يعني لأن ماعندي.. عبدالعزيز: افا عليج ولد عمج هذا وحسبة اخوج.. وهذا رقمه.. سجلي.. ******* مجد: يلا مع السلامه عبدالعزيز: مع السلامه.. خلود ومجد راحوا قعدوا على طرف فالصالون وتمت ترمس ويا خلود... أحمد في هالوقت كان توه واصل المزرعه.. نزل من الموتر ومشى صوب الميلس الي يتيمعون فيه ربعه عشان يقعد وياهم.. كان يسمع حشره ودق واغاني وكانت الساعه وقتها 8:15 .. استغرب.. حس ان الموضوع في حفلة غير طبيعيه.. طلع له سعيد ربيعه.. وهو كان توه عند باب الميلس.. ونفس الوقت رن تليفونه.. بس مارد.. سعيد: حي الله أحمد.. يا جماعه راعي الحفلة وصل.. أحمد وهو يضحك ومب فاهم شي.. : اي راعي الحفلة الله يهديك.. .. ورن تليفونه مره ثانيه.. كان توه بيحط ريله داخل وبيدخل.. بس رد عورا وشل التليفون من مخباته ورد... : ألوو.. مجد وهي مستحيه: ألوو.. __________________ |
ودش نفس الوقت فالميلس وماحس الا بثلاث بنات يقربن منه ..
--1--: هلا والله براعي الحفلة... أحمد تم مبهت مصدوم .. ومعصب في نفس الوقت.. وماحس بالخط الي وياه.. تم معلق السماعه في اذنه ودخل التليفون في مخباته.. ومجد كانت تسمع كل شي عن طريق السماعه.. ---2---: ياربي غاااااوي .. تعال ويايه.. ---3---: لا حبيبتي .. الغاوي للغاوي... مجد تمت مبهته وهي تسمع وفاجه ثمها بتصيح لا محاله.. : شو هااا.. ألووو ألووو أحمد من كثر ماكان معصب ومتضايق مايسمع شي... مجد عصبت وبندت الخط .. وحضنت خلود وقعدت تصيح.. .. .. أحمد: وانت ليش ماتقول لي ان هالخياس وياكم فالقعده.. --1--: ايه انت شو تتحرى عمرك.. وعن الغلط.. محد خايس غيرك انزين صد احمد وماحس بعمره الا يصفعها طراق يلصق فيها اليدار.. تمت البنت مصدومه.. والشباب نشوا سحبوه وطلعوه من الميلس.. عبدالرحمن: ياخي ماتبا تيلس ويانا قول بس لا تقعد تسوي مشاكل وتخرب سهرتنا.. أحمد: عز الله السهره عاد.. ميمعين لي حثاله المجتمع ومسمينها قعده.. وليش ماخليتوني ادبها.. هاللي ناقص وحده من هالأشكال تغلط علي.. والله لأدفنها.. عمر: ياخي روووح زين.. نسيت عمرك كنت تيلس ويانا هاليلسات واتييب البنات الي تعرفهن.. أحمد: ذاك كان اول.. وحتى اول.. كانن هن الي يطلبن مني انهن يبن اين.. مب انا الي اسحبهن.. وغير جي.. ماكنت اسوي شي.. اقعد على صوب واسولف وياها.. اما انتوا شوفو حالتكم كيف.. وهذا توكم بأول الليل.. خافو على اهاليكم.. الحمد لله الله هداني وودرت عني هالسوالف.. الدور عليكم سعيد سحب احمد وقعده في موتره: ياخي مانبا مشاكل الله يخليك.. وانت هدي.. انا كنت ادري انك ماتبي تيلس ويانا ولا ماكنت بقولك اتيي.. أحمد: خليتني اودر شغل الكليه عشان اشوف الفسق هذا.. سعيد: ياخي امسحها في ويهي والله ماكنت ادري.. أحمد: اخبرك.. بند الباب .. بند.. خل اروح.. وحرك الموتر وظهر من المزرعه مسرع بيرد البيت.. .. .. خلود: شو الي صار مجد.. مجد وهي تمسح دموعها وتحاول تقوي نفسها: العوي دومه عوي.. ماباه.. ماباه خلاص .. خلود: شو الي صار فهميني.. مجد: كانن عنده بنات .. وحده تتفداه ومادري شو.. وهو مايدري اني انا الي متصله لأنه مايعرف رقمي.. ويوم ارمسه ولا حاس بي.. شكله راد علي بالغلط اصلا.. خلود: لاحول ولا قوة إلا بالله.. الله يهديه.. خلاص انا ماروم ادافع عنه هالمره.. كنت اتحراه تغير.. تقاطعها مجد: بس العوي يتم عوي ... خلود: خلاص هدي وخلينا نرد البيت عن الفضايح هني فالصالون.. مجد: بس منو بيردنا؟؟ خلود: اتصلي في ابوج وقولي له انج بتتريينه لين مايوصل لأن احمد مارد وفعلا نفذت مجد كلام خلود.. ووصل عبدالعزيز بعد نص ساعه وردهم البيت.. .. .. .. أحمد من سرعته الحمد لله الله ستر عليه ووصل البيت بالسلامه خلال ساعه .. ودش البيت وهو معصب ميثا: وين سلامك؟؟ أحمد صد صوب امه وراح لها وباس راسها: اسمحي لي والله .. بس لأني معصب توني مضارب ويا واحد من الربع ومانتبهت ميثا: ليش مضارب؟؟ خير؟ أحمد: سوالف شباب اميه ماقدر ارمس فيها .. ميثا: عراحتك .. بس روح ريح احين عشان تهدأ اعصابك.. أحمد: ان شاء الله.. نش احمد وصعد فوق غرفته ويلس فيها وتم متوتر .. يهز القلم بسرعه وهو يالس على كرسي المكتب.. وفر القلم من كثر ماهو معصب على اليدار.. وفجأة تذكر ان يته مكالمة ورد عليها بس مارمس.. شل تليفونه وفتحه لأنه كان مغلق.. وجيك على المكالمات المستلمه.. وشاف الرقم .. أحمد: منو ها.. أول مره اشوف الرقم .. اتصل على الرقم.. بس محد رد عليه .. مجد: طاع الهرم متصل بعد.. خلود: لا تردين.. مجد: خله يزول .. ماعندي سالفة ارد.. .. تم احمد يتصل كذا مره بس محد يرد عليه.. وبعدها مارد يتصل على الرقم مره ثانيه.. ونش يحاول يذاكر بس حس ان مزاجه متعكر ومب قادر يركز.. فقرر يطلع من الغرفه ويقعد ويا اهله.. وظهر شاف اخته مروه في بيتهم.. سلم عليها ويلس وياها أحمد: ها ريلج وين وداج يوم الزواج.. مروه وهي تتطالعه نص عين: مالك خص عيب بعدك صغير على هالسوالف ابتسم احمد ودز راسها عالخفيف بطرف صبوعه.. وقعد يسولف ويا امه واخته.. أحمد: أخبرج عندج مسجات حلوة في تليفونج؟ مروه: هيه ليش؟ أحمد: شو ليش بعد.. خبله والله.. ابا اطرشهن على تليفوني.. مروه: خذ تليفوني وطرش الي تباه.. وشل احمد تليفون اخته وقعد يتعبث فيه يدور على مسجات وجي.. وفهالوقت رن التليفون وهو في إيده.. بس بهت من شاف الرقم.. وشاف الإسم.. مجد.. تم مصدوم وعطى التليفون لمروه.. مروه: ألووو هلا والله بنت العم مجد: اهلييييين العروس مروه: ه فضحوني ماخلو حد ماقالو له عيل مجد: شفتي كيف.. ه اشحالج؟ مروه: تمام والله انتي اشحالج؟ مجد: والله بخير الحمد لله.. ها خبريني شو يابلج هديه ريلج.. مروه: طقم وحياتج مجد: يه يه منو قدج.. متى ايي دوري متى.. مروه:" ه لاحقة ماعليج.. مجد: فديتج والله.. انزين مروه انا متصله لأن انا وخلود نبا نسوي جي مشروع صغير .. يت فكرة في بالنا منها نكسب ومنها هوايه.. انا احب التصميم والديزاين .. وحتى خلود عندها افكار ماشاء الله .. فقالت لي جنه انتي عندج خلفيه عن هالأمور شو تحتاج .. فحابين نفتح مشروع تصميم شنط وعبي وشيل.. مروه: والله فنان وهالأيام هالأشيا وايد عليها اقبال تدرين. تحسين الناس يبون شي يديد.. مش مكرر .. فيدورون على شغل البيوت.. مجد: انزين بغينا نعرف شو الي نحتاجه عشان هالمشروع وقعدت مروه تشرح لهم شو يسوون وجي .. وقالت انها بتتيمع وياهم في يوم وبيخططون عدل.. احمد في هالوقت كان سرحااان.. معقولة مجد تتصل فيه؟؟ شو كانت تبا؟؟.. اااخ بس لا يكون سمعت صوت البنات.. بتكون فهمت الموضوع غلط.. اخييييييج انا ابا اصحح الوضع وياها وايي شي يخرب شو هالحظ الي عندي.. مروه: خلاص عيل حبيبتي .. سلمي على خالي ومرت خالي.. واهم شي سلام كبير ليدوو.. مجد: يبلغ ان شاء الله بوسي لي اليهال.. مروه: ان شاء الله وبندت مجد عن بنت عمها .. واحمد على طول سحب التليفون وطلع تليفونه عشان يقارن الرقمين.. وشاف انه نفس الرقم.. فر التليفون على مروه وربع فوق لغرفته بسرعه.. مروه: شو بلاه اليوم احسه مب طبيعي؟ ميثا: يقول متضارب ويا ربعه ومتضايق.. مروه: لاحووول هالشباب مخبل والله ميثا: الله يهديهم مروه: آمين يارب. صعد فوق فغرفته مب عارف شو يسوي.. يحس بمخه بينشل من التفكير.. كيف يحل الموضوع.. افففففف الله يغربلك يا سعيد يوم انك سحبتني المزرعه .. شو وداني هناك.. و ومجد ليش كانت متصله انزين ابا اعرف.. اففففففففف والله مقهوووور شو هالحظ.. ولا بعد يوم دقيت ماردت .. اوهووووو عيل عز الله كرهتني احين.. لحوووووووول.. نحاسه مكتوبة في يبهتي من يوم مانولدت.. .. .. .. هزاع: يالله شباب شو تريون يالله عالحوض.. وحده من البنات الي وياهن فالحفلة: افااا ونحن انتم هني.. سالم: لا طبعا.. اتيين ويانا.. فهد: هيه كلكم اتيون طبعا.. يالله.. وكلهم البنات والأولاد دخلوا الحوض يسبحون الا واحد .. اسمه طارق .. عيا ينزل وياهم.. وسار فالغرفه الزجاجيه تم يالس يطالعهم وهم يسبحون ويصورهم فيديو.. هزاع: طارق تعال ياريال تام برع.. طارق: لا ماعليه انا خلوني برع.. فهد: ه خله هو الخسران.. ... __________________ |
خوله: أقول خليفه؟؟
خليفه: هلا عيووووووووون خليفه.. خوله: استحيت خلاص ماروم ارمس.. خليفه: لا والله ترمسي.. يلا عاد.. خوله: انزين.. اقول ممكن تغير القناة وتحط مسلسل كويتي حاطينه في قناة الراي ابا اشوفه.. خليفه: شو تبين فيهم هالمسلسلات البايخة مالتهم.. ماعندهم غير غني.. وعنده شركة .. وضرابه عيال عم.. صدعة راس.. خليني اشوف مصارعه وايد احسن خولة: لا مب كل المسلسلات الكويتيه جي.. خليفه: بلا .. ومستعد اتراهن وياج.. خوله: انزين وانا قابلة الرهان.. خليفه: شوفي لج مني اوديج اي مطعم نتعشى.. لو فقصر الإمارات ولا برج العرب.. مستعد.. لو طلع في مسلسل كويتي ماكان فيه شرات ماقلت لج.. خولة: خلاص اوكي.. وبدت خوله اتبدل فالقنوات.. شفات هالمسلسل.. وقعدوا يطالعون يتريون شي.. http://www.kuwait91.com/Video/lan_am...jeh_arnabi.ram خليفه: سبحان الله نفس موقفي يوم خطبتج.. صدت خوله بنص عين تتطالع خليفه: احلف ان كان جي شكلي؟؟ خليفه: ه اسولف وياج.. وبدلت القناة.. تتطالع لها شي ثاني عشان تكسب التحدي .. : ترا انا للحين كاسبة التحدي.. خليفه: .. لا لا هذا مسلسل جديم انا ارمس عن اليداد.. يعني ماكسبتي شي للحين.. خوله: اوووووكي بنشوف.. وقعدت تبدل وتبدل.. وشافو مسلسل درب الزلق http://www.kuwait91.com/Video/darb_a...-alehramat.ram خليفه: هااااااا شفتي لازم يرمسون عن المشاريع والشغل .. خوله: لا لا لا.. هذا جديم.. خليفه: فزت ولا مافزت. خوله: يلا عاد احين تبا تحرم خوالي والبيبي الي في بطنها من العزيمه.. خليفه: حمووووووووود إلحق على ابوك بيموت.. محمد ولده كان يالس حذاله وجاد في قعدته وشكله طالع قطري بالغترة والعقال.. كان محتشر الا يلبسونه غترة وعقال وكندورة.. اونه ابا استوي شرات بابا.. خوله: الشيخ محمد.. ممكن تعطينا ويه شوي.. صد بعين وحده صوب خولة ورد يطالع تلفزيون .. خليفه: فقدتك.. والله انه طالع على ابوه.. ذرب ورزين.. خل اصورك.. خوله: والله عسل هالولد افدااااااااااه ياربي.. تتوقع الياهل الثاني يطلع احلى منه؟؟ خليفه: اتوقع امه الي بتحلو اكثر واكثر .. ابتسمت خوله ونشت عنه.. : لوتي يعرف يفر راسي.. تراني مانسيت سالفه العشا خليفه: ه ولو انج خسرانه بس مطاعم الدنيا كلها ماتغلا عليج.. .. .. .. خلود قعدت فالغرفه ترمس جاسم خلود: .. تدري... مفتقدة الضحكة وياك وايد.. احس ان صار لنا فترة طويله مارمسنا بعض جي.. جاسم: اااه يا خلود.. مفتقدج فوق ماتصورين.. أحبج أحبج أحبج... خلود: وانا بعد يا جاسم.. بس دخيلك حاول اتهدي نفسك فالمشاكل شوي.. هدي اعصابك شوي.. وخلنا نعيش شرات مانحن كنا دوم.. جاسم: ادري اني مقصر في حقج وايد الفترة الأخيرة.. بس شو اسوي.. مب بيدي والله انه مب بيدي.. بس الحمدلله كل شي انتهى وبالي ارتاح.. خلود: عساه دوم بالك مرتاح.. جاسم: انزين لج مني باجر نظهر نتعشى برع شو رايج؟ خلود: امممم .. يعني تبا تراضيني بهالطريقة؟ جاسم: ممكن تعتبرينها جي.. خلود: ه.. انزين في شي ثاني بغيت ارمسك فيه؟؟ جاسم: خير حبيبتي.. خلود: فطوم منو بيتشرى لها ليوم ملجتها.. جاسم: مرت اخوها طبعا.. ابتسمت خلود مستانسه: فديتك والله .. تحريت بعد نسيتوني.. جاسم: وانا اقدر انسى اصلا.. خلود: الله لا يحرمني منك.. جاسم: بس خل اخبرج شي.. تراني ماقلت لفطوم ان الي خاطبنها فيصل ربيع سلطان.. بعدها تتحرى الريال العود وماباج تقولين لها شي.. خلود وهي مصدومه: ليش يعني؟ جاسم: بس جي .. ابا العوزها شي.. خلود: يا جاسم مايوز البنت تاخذ واحد ماتعرفه.. او تعتقد انه واحد ثاني.. جاسم: ماعليج انتي.. بس المهم ماباها تعرف.. خلود: على امرك سيدي.. .. .. .. ومرت الأيام بطبيعتها بين الكل وماصار اي شي.. كان شي روتيني.. مجد كل يوم تروح الكلية وترجع.. ويزداد غضبها. وتكر زود وزود.. يوم الأحد والثلاث ساروا أمها وابوها بيت عمها حميد (بوعبيد).. لكنها عيت تروح وياهم لأنها ماتبا تجابل أحمد.. وهالشي الي ضايق أحمد زود.. حس فعلا ان هالإنسانه تكن له مشاعر في قلبها ولا ماكانت بتزعل بهالطريقة.. وحاس راسه مشوش.. يفكر وينشغل في دراسته .. ولا يفكر كيف يراضيها.. هاي هي الإنسانة الي حبها وتمناها.. كان متلوم ومب قادر يسوي شي.. قرر يأجل الموضوع فترة لغايه ماتهدأ مجد وتنسى سالفته.. خلود كل يوم كانت تطلع ويا فطوم عشان تجهز لملجتها.. فطوم ماكانت متشجعه ابد.. كل ما يسألون رايها في شي تأيد وبس.. وتسكت.. كأن مالها راي في أي شي.. كانت خلود تغمضها وايد .. وحتى جاسم.. بس مب قادرين يسوون شي يغيرون رايها .. وحالها.. الله يمرر كل شي على خير عليها.. سلطان قرر انه يسافر بالجمعة ويا ناصر وفيصل للعمره.. ومعاهم يدتهم.. لأن اجازته بتخلص .. وفعلا تمت الترتيبات في بيت جاسم عشان الملجة.. والكل متحمس لهاليوم الا فطوم الي كانت ابرد وحده .. لكن كل الي كانت تفكر فيه.. كيف بتكون حياتها.. ولكن في لحظات كانت تفكر انها تأجل كل شي لغايه ماتخلص دراستها .. وتركز تفكيرها بس فالنسبة الحلوة وتحقق حلم اخوها فيها.. ريم: اسميني مستانسه اليوم .. أخيرا بيعرس اخوي مابغى.. فيصل: لا والله.. هالكثر يعني مستعيله تبين الفكة مني.. ريم: الصراحة هيه عشان تنشغل ويا مرتك واتفرغ انا لريلي.. لأن صارلك فتره ماعندك غيري ماعندي وقت اجابل ريلي بسبتك فيصل: مالت عليج من اخت.. يلا بخريني ريم: شوف هاي آخر مره راح ابخرك فيها تدري ليش؟ فيصل: ليش؟؟ ريم: المهمه راح تتولاها فاطمة عني فيصل سكت وتم يتخيل فطوم.. تخيل طولها هي بالنسبه لفيصل اقصر عنه بوايد.. ضحك وابتسم .. حس انه بيضحك على طولها.. بس تذكر براءة ويا الطفولي.. أكيد ضعفت احين.. ماعليه بخليها تمتن وتحلو .. ريم: حووو ارمسك ليش ماترد؟ فيصل: شو تبين؟ ريم: هيييييييييييييه اشعلييييييه المعرس يفكر فالعروس.. لاحق كلها ساعتين ولا ثلاث وبتملج وبتجابلها العمر كله ان شاء الله فيصل: .. هيه وبفتك من شيفتج على الأقل بشوف لي شيفة يديدة.. ريم: ه تتمنى اصلا شيفتي فاهم.. دشت ام فيصل عليهم وتمت تقرا على ولدها وتيبب.. : يعل عيني ماتخلا من شوفتك ان شاء الله.. فيصل وهو يحب راسها: ولا من شوفتج ياتاج راسي.. ام فيصل: يلا امي ماجهزت ترا تأخرنا على العرب ومب حلوة؟؟ فيصل: بلا انا جاهز.. ريم: وانا بعد بس بلبس عباتي.. ريم كانت لابسه فستان وردي ناعم وسوت مكياج فالبيت لأنها ماشاء الله فنانه وتعرف تمكيج.. __________________ |
في بيت جاسم
كانو البنات كلهم متيمعين عند فطوم وكانت الي تمكيجها يايه البيت.. هند الأميري.. مكياجها فنان هالإنسانه .. تفننت في ويه فطوم وطلعت فعلا قمر.. كانت لابسه فستان زهري فاتح.. فيه تطيريز خفيف على الصدر.. طبعا الفستان كان جاهز شارينه من وافي.. سوت لها فير لكل شعرها الطويل.. وخصل نازله على ويا مع سلسلة من نفس تطريز الفستان يدخل في شعرها ويلتف.. وكانت متحنية لغايه كوع ايديها.. طالعه ناعمه واااايد ورقيقه.. ولون الفستان والمكياج ابرز ويا الأنثوي الطفولي.. وبرائتها وخجلها كانو مبينين من البلشر الوردي الي حطته على خدودها.. دخلت مجد وهي تيبب: كلولولولولولووووووووووووش.. خلود: شفتي انا مطمنه عيالي بيظهرون على عمتهم حلوين ابتسمت لهم فطوم بصمت وخجل.. مجد: اقول خلود على فكرة ترا فطوم طالعه احلى عن يوم ملجتج.. خلود: لازم تراني انا عيوز وهاي بعدها في ريعان شبابها البنات ضحكن.. نوره ومروه كانن تحت يساعدن ام جاسم في ترتيب الفواله فالمطبخ ومستانسين لفطوم.. جاسم فالميلس ويا ابوه وعمه وسلطان وخالد وعبدالعزيز وحميد (بوعبيد) وعبيد وأحمد.. عاد الرياييل مايخصهم بشي .. بس يسولفون.. والشغل منصب على الحريم المساكين.. وشوي الا يرن تليفون سلطان .. فيصل واصل عند الباب.. الكل ظهر عشان يستقبل فيصل.. وريم وامها دشن البيت على طول.. وكانن في استقبالهم ام جاسم وام سلطان.. ولطيفه وميثا.. ومروه ونوره .. الحفلة كانت بسيطة جداً.. وماكان فيها دق وايد.. وبمجرد وصول المطوع ملج بهم... وراح.. والكل نش يبارك للمعرس.. ومجد احترشت.. : اقول احين من صدقكم هاي ملجة؟ فطوم وهي منزله راسها وتتنهد وفي قلبها: اي ملجة يا مجد.. هذا يوم موتي.. مجد: اقول خلود ماعندج اشرطة حلوة؟ خلود: مايبت شي.. نوره دخلت عليهم الغرفه: يالله العروس لازم تنزلين.. مجد وهي توقف بويا: لا لا لا.. تريوا.. ماعنا عروس تنزل بدون دق.. هاتي عباتي خلوود.. (فرت خلود العباة على مجد وخذتها).. بسير اخذ شريط من موتر ابويه.. احيد حاطه في سدته شريط.. نوره: بسرعه لأن الحريم تحت يتريون العروس.. رفعت فطوم راسها: ليش منو تحت؟؟ نوره: شوية جيران.. وجنه خاله المعرس وبنات خالته واخته.. ردت نزلت راسها.. : لازم مرته مابتيي منو هالحرمه الي بترضى بزواج ريلها.. نزلت مجد وطلعت من البيت.. وسارت صوب موتر ابوها.. وتمت اتدور فالسدة وحصلت الأشرطة.. وطلعت من الموتر وصكت الباب وهي تمشي بسرعة عشان تروح لهم وعن تتأخر.. كانت منزله راسها تتطالع الأشرطه.. وحست نفسها انها دعمت شي.. اطالعت تحت شافت نعال رجالي وكندورة بيضا.. هييييييييه بعد مره .. ذيج المره كان سلطان وهالمره منوو.. توها بترفع راسها.. ماحست الا بهالشخص يركب الموتر الي حذاله ويصك الباب بسرعه بدون ماتلحق تشوف شكله.. تغطت بالشيلة بسرعه وربعت داخل.. وهي تفكر .. ياربي منو هالإنسان.. أحمد.. لا لا لا لو كان احمد كان بيرمسني.. قبل لا تدخل البيت صدت صوب السياره . بس ماقدرت تشوف شي.. ودخلت.. ومن دخلت نست كل شي.. بسرعه حطت الشريط.. وكان عبارة عن اغاني منوعة.. وصعدت عشان تنزل فطوم وياها.. وشوي الا هم جهزوا فطوم عشان تنزل.. خلود ومجد ونوره ومنى كانن وراها وهي تمشي ببطء على الدري .. وحاسه ان راسها يدور.. مب قادرة تتحمل اكثر من جي.. تنزل بخطوات بطيئه وهي منزله راسها .. الخصلة نازله على خدها.. وهي تقبض مقبض الدري .. ونزلت لغايه ماوصلت الأرض رفعت راسها وصدت صوب المعازيم وابتسمت لهم.. وتمت ام فيصل اتيبب من فرحتها.. وهني البنات ارتبشن.. وبدن يرقصن ومستانسات من الخاطر.. في ميلس الرياييل الأمر كان مختلف شوي.. فيصل عرف من جاسم ان فطوم ماتعرف انه هو الي صار ريلها.. تم محتار كيف بيتصرف.. شو بيكون موقفها؟؟ شو بتقول يوم بتشوفه؟؟ اما الباقي فيسولف ويضحك.. وعالساعه 11:30 الكل روح.. ومابقى فالبيت غير فيصل لأن جاسم طلب منه يتم عشان يشوف فطوم.. بما إنه اليوم الثاني بيسافر.. والبقيه كلهم راحوا.. حتى خواته وامه سارن.. وماتم فالبيت احد غير جاسم وامه ومنى.. جاسم: يلا تعال.. فيصل وهو منزل راسه: جاسم الي سببته لها مب شوي.. كيف بتوايهني؟ جاسم: ماعليك.. انت نش بس.. فيصل تقرب من جاسم .. وحط ايده على جتف جاسم: سامحني ياخوي.. سببت لكم مشاكل وايدة.. جاسم رفع حياته لأنه ماحب يتذكر شي.. بس فيصل ذكره.. تنهد وسكت..: شو رايك تطلع وتروح عند مرتك يكون احسن.. تضايق فيصل.. وحس ان العلاقة بينه وبين جاسم فيها نوع من الحساسية.. تفهم الوضع وسكت.. ونش وطلعوا من الميلس وسار فيصل وياه لعند الميلس وودره وسار عنه.. تم واقف عند الباب خايف انه يدخل.. فطوم كانت قاعدة وهي تحس بظل تحت الباب .. يعني وصل.. نزلت راسها وصدت عن الباب عشان ماتواي.. وكانت ترتجف من الخوف.. ياربي كيف بيكون شكله؟؟ شايب؟؟ اممم .. يعني شعره خف وبدا يصلع.. ضحكت على فكرتها العبيطة وابتسمت .. وغمازتها الي على خدها اليسار بانت.. وفي هاللحظة دخل فيصل ولاحظ الغمازه .. حس بشي غير هالمره.. صح انه شاف فطوم من قبل.. بس هالمره كانت غير.. يمكن لأنها حليلته.. تقرب بخطواته وهي تيبست في مكانها.. حست ان قلبها وقف عن النبض.. مب قادرة تحرك راسها او تبلع ريجها حتى.. حست انها انسانه ميته بلا روح.. تقرب وقعد على الكرسي الي حذالها.. ونزل راسه.. فيصل: سامحيني.. (ماحس الا بدمعه حارة تنزل على خده غصبن عنه).. أرجوج سامحيني.. فطوم تمت فاجة عيونها ماتتحرك.. حست ان هالصوت تعرفه.. لا لا لا اكيد انا احلم.. فيصل تحرك من مكانه ويلس مجابلها وقعد على الأرض مجابلها.. وهي من شافته تبطلت عيونها اكثر.. : سامحيني.. فطوم: انت شو تسوي هني؟ فيصل يبتسم لها بحب: أنا ريلج.. فطوم من سمعت هالكلمة .. حست بالدنيا تدور في راسها نشت وقفت يدامه وهي تغمض عيونها وترد تفتحهم: يعني تبا تفهمني ان انت الي ملج علي؟ فيصل نزل راسه وسكت.. فطوم تقربت منه .. : انت شووووووو من بشر.. ماكفاك الي ياني بسبتك.. ماكفاك.. ولا شفقة بحالي؟؟ انا مب محتاجة شفقة أحد .. اطلع من حياتي مووووووووت.. روح عني مابااااااااك.. دمرتني.. فيصل تم ساكت ونزلت دمعة ثانيه منه وهو حاس بضيق في صدره.. حس ان قلبه ينقبض .. وانه مب قادر يتنفس.. فطوم تقربت منه زود وهي تصيح وتدمع.. ونزلت عنده.. ولمت شعرها الي ورا ظهرها .. وعطته ظهرها: شوووووف هالعلامه الي على جتفي.. هاي بسبتك.. وخوزت الشعر الي على اذنها وراوته ورا اذنها.. وشوف هني .. هذا بسبتك.. وهذا غير الآثار الثانيه.. بس الأثر الي هني (تأشر على قلبها).أعمق من اي اثر ثاني.. فيصل ماقدر يتحمل اكثر من جي.. حس انه بيختنق.. نش يوقف.. بس ماحس بعمره الا هو دايخ على الأرض.. فطوم صرخت.. وبهاللحظة دخل جاسم.. جاسم: شو سويتي؟؟ فطوم وهي تصيح: ما ما .. ما ما.. ماسويت شي.. ربع جاسم وتم يضرب فيصل عوي بس ماينش.. بسرعه اتصل في سلطان وخبره الموضوع.. ووشل جاسم حطه فالموتر ووداه المستشفى. شو تتوقعون يصير في فيصل؟؟ منو الي دعمته مجد؟؟ العلاقة بين مجد وأحمد بدال ماتتحسن سائت.. ؟؟؟ شو بيصير؟؟ كيف بيتصرف أحمد؟؟ ========== __________________ |
الجزء السادس
الفصل الثاني ==== سلطان: ها شو مستوي؟.. خير.. جاسم: مادري فطوم تقول فجأة طاح على الأرض.. واحين هو داخل والدكاترة عنده.. سلطان: حد قاله شي؟ جاسم: مادري انا مالحقت اسأل حد.. شليته ويبته.. سلطان: قلت لأهله شي.. جاسم: لا ماقلت .. قلت خل اطمن عليه بالأول..وبعدين انت بلاك من ييت مستلمني بالأسئلة روحي راسي مفتر دخيلك.. سلطان سكت وسار صوب غرفة العناية بس مسكرة ورد عند جاسم: هو من متى داخل.. صد جاسم صوبه واطالعه بنظره غضب ماقدر سلطان ايود عمره ضحك.. جاسم: متفيج.. وطلع الدكتور فهالوقت وطمنهم ان حالة فيصل عادية.. عباره عن هبوط فالدورة الدمويه لا غير.. وحطوا له مغذي وان شاء الله كل شي بيرد طبيعي فيه.. سلطان: اشوه.. قلت يمكن اختك مجرمه طالعه عليك ذبحت الريال .. جاسم رفع حياته لسلطان واطالعه بنظره وطاف من عنده ودش الغرفه عند فيصل عشان يطمن عليه.. جاسم: سلامات ياريال خليتنا نستهم عليك.. ابتسم له فيصل: انا بخير الحمد لله.. الله يسلمك.. جاسم: شو الي صار؟ فيصل: ماشي تراني ماكلت شي من امس من جي.. سلطان: حي الله .. ها انا اقول هذا يني مافيه شي.. بغى يدلع يدام الحرمة شوي.. ولا يمكن جمالها الفتان جي سوى فيك جاسم ماقدر ايود عمره فهالوقت دح سلطان على ظهره بالقو خلاه يغص ويكح.. تمت تدمع عيونه من كثر مايكح.. سلطان: عنبوها من ايد.. كسرت ظهري.. جاسم: دواك.. من ياي وانت معور راسي.. فيصل: الله يهديكم بس.. جاسم ابا ارمسك في موضوع.. جاسم: مو وقت مواضيع احين.. شوف حالتك بالأول.. يوم تنش وتصحى وقتها يصير خير.. سكت فيصل .. وحس بحزن مكبوت في خاطره مب قادر يطلعه.. سلطان حس ان جاسم مب قادر يتقبل فيصل في حياتهم وهالشي ضايقه.. يدري ان ربيعه غلطان.. لكن هم اخته بعد غلطانه.. وهو حاول يصحح غلطته عن قناعه.. سلطان يعز فيصل من هو صغير وياه وناصر.. ودومهم في كل حياتهم سوى.. كل ذكرياتهم مشتركه.. فيصل شرات اخوه ويمكن اكثر.. ويحز في خاطره يشوف اخوه بهالحالة.. وان كان يدري ان غلطة اخوه ماتغتفر وفهالأمور ماينعرف الأخو من العدو.. تقرب من جاسم وسحبه برع الغرفه عشان يرمسه.. سلطان: شو بلاك على الريال احسك ترمسه وشوي وبتكفخه.. جاسم: سلطان مب متقبل اني اشوف الي سبب لنا المشاكل يدخل وسط بيتنا بكل سهولة.. سلطان: نحن على شو اتفقنا.. جاسم: اتفقنا.. لكن الواقع شي ثاني .. مب قادر اتقبل فيصل في يوم وليله يستوي نسيبي.. انا عاقبت اختي.. لكن هو الي ساس هالمشكلة كلها ما تأدب.. ولا لقى من يعاقبه.. سلطان: يكفي عذاب الضمير الي هو عايشنه.. وبغض النظر عن فيصل.. شفت ابوه واخوه العود الي من ابوه.. وغير اسمع مديح أمي وخلود لأمه واخته.. يعني ناس والنعم فيهم.. ويشرف الواحد يناسب مثل هالعايله.. جاسم: والنعم فيهم ماقلنا شي.. وعذاب الضمير مايكفيني.. الود ودي اشوه وي من الضرب.. سلطان: لنفرض سويت الي في خاطرك وكفخته وضربته وكسرت راسه.. وبعدين؟؟ بس بتبرد الحرّه الي فيك؟ سكت جاسم وحس مب قادر يرد عليه.. فعلا كلام سلطان صح.. بس غيرته على اهله اكبر من اي شعور.. : خل نسير نشوف اذا خلص عشان نرده البيت سلطان هز راسه وفي خاطره: ماشي فايدة واياك عنيد وراسك يابس.. فيصل: اسمحولي لعوزتكم وياي اليوم سلطان: افا عليك انت بس.. اخونا ونسيبنا (وهو يطالع جاسم) مب واحد غريب.. فيصل: تسلم وربي يقدرني ارد هالمعروف.. كم الساعه احين؟ جاسم: 1:15 فيصل: هيه.. (فجأة انتبه للساعه عدل) شووووو 1:15 .. واهلي يدرون بشي؟ جاسم: ماقلنا لهم شي عشان مايحاتون.. فيصل: هيه زين.. سلطان: شو باجر بتيي العمره ولا ماتروم .. احس لو اتم احسن.. فيصل: لا بروح .. انا قايل لازم اسير العمره.. جاسم ركب الموتر قبلهم.. فيصل: ياخي يا سلطان احس جاسم مب مرتاح لي ومب موافق.. سلطان: اي اخو بيسوي شراته. فتره وبتعدي.. بس انت تحمل شوي.. فيصل تنهد: الله المستعان.. سلطان.. انا ظلمت فطوم وايد.. واليوم من شفت اثار الضرب بغيت الأرض تنشق وتبلعني.. كرهت نفسي وايد... ابا اعوضها عن كل شي واعوض جاسم سلطان: كل شي بالصبر بيستوي.. فيصل: كارهتني فطوم صدتني بشكل ماتصوره.. سلطان: تحمل ياريال اي بنت في مكانها جي موقفها فالبداية.. فيصل: هيه تدري ان بسافر باجر وياكم؟ سلطان: انت ماقلت لها فيصل: وانا لحقت ارمس.. سلطان: بخلي الرضيعه ترمسها ماعليك فيصل: هيه دخيلك .. دخيلك اباها تعرف اني ندمان واني تغيرت طبطب سلطان على ظهره وفتح له باب الموتر وركبوا.. وسار سلطان ويا فيصل وصله عند باب بيت جاسم عشان ياخذ موتره .. وكان جاسم واصل قبلهم البيت.. ولا حتى سلم على فيصل.. دخل فيصل حوي البيت عشان يشل موتره حس ان في حد يالس عند مدخل البيت .. صد وشاف فطوم وهي متسانده على العامود.. تقرب منها: فاطمة.. فاطمة من شافته تيبست في مكانها.. تذكرت ان بعدها في ذرة حب لهالإنسان وخصوصا ان احين صار زوجها وملكها.. نشت بلا حاسيه : طمني عليك؟؟ شخبارك احين؟؟ فيصل استانس من الخااااااطر يوم شافها مستهمه عليه وتسأل عنه.. : انا بخير بعد شوفتج.. فطوم ابتسمت بس دموعها تذرف.. : ماتشوف شر.. فيصل: الشر ماييج.. وسكتوا للحظات.. فيصل: ممكن اقولج شي.. فاطمة وهي منزله راسها: قول.. فيصل وهو يحط ايده على راسها.. : سامحيني .. ولج وعد وعهد مني اعوضج عن كل جرح انجرحتيه بسببي.. واكون لج الزوج والعون والأخو.. واخلص لج بحبي.. واللي فات مات.. انا ندمان عليه.. وخذتج لأني مقتنع فيج.. مب شفقه او ندم.. خذتج لأني اكتشفت اني صدق احبج.. (نزل ايده من على راسها).. وباجر مسافر العمره ويا سلطان وناصر ربيعنا.. منها نعتمر ومنها نطلب التوبه من الله.. فاطمة استانست رفعت راسها: صدق.. فيصل وهو يبتسم: هيه صدق.. فاطمة: تروح وترد بالسلامه يارب.. فيصل: فطوم انتي غلطتي هالغلطة والحمد لله كل شي مر على خير.. الي اعرفه عندج اخت اصغر عنج.. حطي عينج عليها لا تغلط غلطتج.. وعمرج لا تقولين لأحد انج كنتي تعرفيني قبل الزواج.. الكل بياخذ فكرة ان الشباب ياخذون الي يرمسونهم.. لكن حالتي وياج تختلف تماما.. ماخذتج لأني ارمسج من قبل.. خذتج لأني مقتنع فيج.. بغض النظر كنت ارمسج او لا.. يكفي انج بنت عم سلطان.. اعز ربعي وخل اقول.. اخوي الي مايابته امي.. ابتسمت فاطمه وهزت راسها.. وفي هالوقت كان جاسم فالميلس وفاتح الجامه شوي ويسمع رمسة فيصل.. وكبر في عينه .. حس ان فعلا فيصل ماخذ اخته عن قناعه مش فقط لتصحيح غلطة.. فيصل: وانصحي اي احد تعرفينه يمشي فهالدرب انه غلط.. والغلط يتم غلط.. والشي الي بدايته غلط ينتهي بغلط وعمره مايستمر.. ترا مش كل شاب فيصل.. جاسم الي هو اخوج يمكن ماكان بيسوي شراتي لو كان في مكاني.. ولا سلطان لأني اعرفه عدل.. يلا حبيبتي تامريني على شي من السعوديه.. فاطمه: ادعي ان الله يوفقنا في حياتنا.. ومايعاقبنا على اللي سويناه قبل.. فيصل وهو يمشي يأشر على عيونه بمعنى من عيوني.. : سلمي على عمتي واستسمحي منها .. فاطمه ان شا ءالله.. ودخلت البيت شافت جاسم في ويا خافت.. جاسم: سار .. فاطمه وهي منزله راسها: هيه .. جاسم: سمعي الكلام الي قاله لج.. وخليه في بالج دوم.. لا تعتبرين نفسج انتصرتي وخذتي الي.. .. سكت.. .. ننسى الي طاف.. انتي خذتي واحد خطبج وبس.. فاطمه تقربت منه وحبت راسه: الله لا يحرمني منك.. ابتسم لها جاسم وهو يطالعها.. يود ذقنها وتم يلف ويا يمين ويسار..: امممم.. طالعه حلوة بعد.. من جي اغمى عليه الريال ضحكت فاطمه وماقدرت تيود عمرها.. جاسم: هيه جي اباج.. ترد الضحكة الي اعرفها على ويه اختي.. وسمعي مب تخلين الزواج يلهيج عن دراستج.. لازم اتيبين النسبة الي وعدتيني فيها فاهمه فاطمه وهي ترفع ايدها وتعطيه التحية العسكرية: حاضر سيدي.. جاسم يشتغل فالشرطة وهالشي ماوضحته من قبل.. جاسم: ه يلا سيري ترا باقي شهرين بس للدراسه واباج تشدين حيلج.. .. .. .. ياربي مب قادر ارقد.. مسيطرة على تفكيري.. كيف انسى هالعيون.. ولا الشعر الي كان منسدل على ويا.. ياوييييييلي صدق كانت حلوة.. تيبست مارمت اسوي شي وانا اشوفها.. اففففففف اسميني غبي.. جان رمست.. قلت شي.. ليش جي.. لا نطقت ولا قلت شي.. انبلع لساني وقتها شو.. احبها يا عالم احبها.. بنت عمي وامووت عليها.. واتمناها لي.. لي انا برووووحي.. اطرش لها مسج.. لا لا لا.. بتاخذ عني فكرة وبتكرهني ادريبها تتريا علي شي.. اطنش.. مب قادر ياخي ماتخوز صورتها من بالي.. يعني شو كان بيستوي لو استغليت ذيج الفرصة واعتذرت.. وقلت لها اني امووووت فيها.. بس ماكنت مستعد للموقف وضايع...اكيد تكرهني هيه احين.. عاد هاي الإنسانه تتريا علي الشي.. معاديتني بكل الطرق.. ليش ياربي.. اباها اباها لي اليوم قبل باجر.. اخ ياسعيد لو اشوفك لنسيك حليب امك.. والله موقف عمري ماتمنيته فحياتي.. ولا ويا مجد.. جان مروه اختي ولا خلووووووود ولا نوره.. ولا اي وحده ثانيه من الأهل كنت بروم اتدبر وياهم وافهمهم بس احين ضايع.. خلود.. هيه خلود.. ليش مارمسها وهي تفهم مجد.. اووووه انا ليش هالكثر فار عمري عليها وهي ولا مفتكره يوم اني كنت صايع ماعيبتها ويوم تغيرت وبديت اتحسن ومب ناقص غير اوقف بويا واقولها احبج ماعيبها.. وبعد هالموقف ماعيبها.. شو تبا.. مغروره وتتحرى اني بعق عمري عليها .. اوكييييي يا مجد.. ودرت كل شي عشانج وماترست عينج.. واحين تخليتي عني.. فر القلم الي بيده ونش يبدل ثيابه عشان يروح عند ربعه.. .. .. .. |
نش سلطان من وقت عشان يتزهب لأن الطياره الساعه 1 الظهر.. من طلع من الغرفه شاف الكل يالس يتريق..
سلطان: صباح الخير.. الكل: صباح النور.. سلطان: خلود صبي لي جاي حليب لغايه مايي.. خلود: بيبرد.. سلطان: مابتأخر بس بتصل في يدوو بشوف اذا جاهزه.. مافيني تأخرنا شيخه: تعال تعال.. يدتك باتت عندنا سلطان: صدق جلثم: هيه صدق .. يعني ماتشوف البيت منور تقرب سلطان وحبها على راسها.. : انتي النور كله افا والله.. انزين يدو مجهزه اغراضج لأن الساعه 11 لازم نكون هناك .. جلثم: عنبو تقول الطيارة ساعه 1 واشعنه نروح من 11 سلطان: ترا لازم قبل موعد الطياره بساعتين ولا ثلاث نكون موجودين جلثم: لا لا لا.. ساعه 11 مب سايره .. سير روحك.. ريولي بيعورني من الوقفه عنبو سلطان: يدوو جي وين سايرين سوق الجمعه.. ترا شي كراسي انتي يلسي وانا بخلص كل شي وخلاف بنسير نركب الطياره جلثم رفعت العصا وضربت فيه سلطان: اسمع الرمسه وخلك ريال عن اخليك تصطلب بالعصا الكل ضحك على سلطان وهو شكله مغيض ومب قادر يسوي شي.. تصاصر مع خلود: الله يعينا هناك بس شيخه: امي خفي على ولدي حرام عليج.. سلطان وهو يقرب من امه وينخش وراها ويبوس راسها: هيه دخيلج شكلها بتذبحني هناك جلثم كانت تشرب جاهي اطالعته بنظرة وردت تكمل كوب الجاهي وقعد سلطان ورن تليفونه فهالوقت.. كان فيصل.. فيصل: مرحب.. ها وين ناش ولا بعدك راقد؟ سلطان:اخافك انت الي راقد .. انا ناش من الصبح فيصل: خلاص عيل نتلاقى فالمطار عالساعه 11 سلطان: رمست ناصر فيصل: هيه وهو متزهب بعد سلطان: على خير.. يالله عيل في امان الله.. وبند الخط وتوه بيشرب من كوب الحليب سمع حشرة .. صد شاف مجد وامها وابوها داخلين.. سلطان: اصبحنا واصبح الملك لله.. الواحد مايروم يشرب هالحليب براحة.. مجد: شو يعني افهم هذا الكلام موجه لي؟؟ سلطان وهو يشرب ويطالعها بنص عين: الي على راسه ريشه يحسس عليها.. جلثم ومجد حطن ايديهم على راسهن.. يتحسسن.. الكل ضحك.. تقربت لطيفه من جلثم ولوت عليها: حليلج اميييه يننوج عيالج.. جلثم: محد مينني غير هذا عين السيح.. سلطان وهو يضحك: لا اذا جي عيل انا راضي ومستانس.. .. الكل اتيمع فالميلس وقعدوا يسولوفون.. خلود: ماعليه عيل اتيين وماتقولين لي؟ مجد: قلت اسوي لج سربرايز.. خلود: ويا ويهج.. أحلى سربرايز بعد.. ومر الوقت وعالساعه 11 طلع سلطان ويا ابوه وعمه وخالد ويدته وفيصل زوج نوره.. صوب المطار والتقوا هناك مع ربعهم فيصل وناصر.. كانت جلثم طول الوقت تمشي ورا سلطان وين مايروح.. سلطان: يدوو يلسي هناك ارتاحي وانا بخلص كل شي وبييج.. جلثم: لا لا .. انتوا مامنكم أمان تروحون عني وتودروني روحي هني.. سلطان: افاااااا.. وهاللحية الي مربنها مب تارسه عينج .. ريال قد كلمتي افا عليج.. جلثم وهي تدزه بطرف عصاتها: اخطف يدامي وبلا هذرة زايدة.. فيصل: نصووور.. اتفكر فاللي انا افكر فيه؟ ناصر:.. وانت اتفكر فاللي انا افكر فيه.. صدوا يطالعون بعض : شكلنا بنتلعوز هناك.. ناصر: حليلها حرمه عوده.. فيصل: احس بتشيب راسنا ناصر:احسن عشان صدق نصطلب هناك.. سلطان: ها شبيبه جاهزين؟ فيصل وناصر: هيه .. جلثم وهي تتطالع ناصر وفيصل: منو هالغاوين؟ سلطان: يدووو.. يدامي عاد.. اغار.. قلت بس انا الي مازر عينج.. جلثم وهي تغمز سلطان: افاااا.. انت فالقلب.. بس عرفني عليهم ناصر وفيصل تموا يضحكون ومرتاحين لها... سلطان: اميه هذا ناصر وهذا فيصل.. وكل واحد فيهم تقرب من اليدة وحب راسها ومن عقب مشوا كلهم ودخلوا صوب البوابه عشان يركبون الطياره لأن الوقت كان متأخر.. .. .. محمد: يعني تخيلي ملاك لابس لبس أصفر.. ومنسدل الشعر على ويا.. والعيون وساع.. والجحال راسم العين رسم.. ااااااااه مب قادر انسى الي شفته دانه: ه يحليلك ياخوي .. اسميك تخبلت.. محمد: انتي الي بنت لو شفتيها كنتي بتتيبسين وتنبهرين بجمالها.. دانه: حمستني ابا اشوفها.. محمد: لا دخيلج لا تشوفينها ولا شي.. انا شفتها وتعبت نفسيتي.. تذكرت كل شي كنت ارسمه.. بس الله يسامح هالعادات الي تحرم الواحد يعيش متهني.. دانه: يعني معقولة فهالزمن بعد هالتطور الي حاصل بعده في ناس يفكرون بهالطريقة.. البنت ماتطلع برع العايله.. محمد: للأسف هيه.. وهذا كان أول سبب خلاني اخسر هالإنسانه.. دانه: يلا عاد خل عنك هالبنت ولا تفكر فيها.. أحين الله رزقك ببنت الحلال ومابقى شي ان شاء الله بتملج .. محمد: صدقج.. وشو عرفني يمكن هالإنسانه اخير لي في حياتي.. والجمال ظاهري .. حلاته يكون جوهري.. الا تعالي.. من كثر مامدحتوا لي جواهر تشوقت اني ارمسها وايلس وياها.. دانه : انسانه في قمة الأخلاق يا محمد.. عاقلة وفاهمه الدنيا.. وتقاربك العمر هذا اهم شي.. وانت يا دكتور تحتاج وحده فاهمه كفايه بأمور الدنيا.. مش بنت 20 سنة توها مفتحة عينها عالدنيا محمد: الله يكتب الي فيها الخير.. دانه: الا ماقلت لي.. يوم شفتها تكلمت وياها؟؟ محمد: نعم؟؟ اتكلم وياها.. وانا لي ويه اصلا.. من شفتها تيمدت.. مارمت.. بسرعه فتحت باب السياره ونقزت فيها وصكيت الباب وعقب نزلت راسي عشان لا تشوفني اذا اطالعت الموتر.. دانه: اتخيل الموقف بس.. اكيد قفطت.. هيه شافتك محمد: لا ماعتقد لأني ركبت الموتر قبل لا ترفع هيه راسها.. دانه: الله يوفقها ويوفقك ياخوي.. محمد: يالله عيل بسير المستشفى عندي مناوبه.. دانه: اووووكووو.. محمد وهو عاقد حياته: شو هاي الأوكو بعد.. دانه : موضه يديدة.. محمد: هيه اوكو اوكووو.. ضحكت دانه عليه وابتسم لها وشل الكوت ماله وطلع.. .. .. .. تمت ترمس فالتليفون وهي تلعب بخصلة شعرها وتضحك.. : ه يلا عاد تأخرتي وايد .. انا من متى اتريا.. احس عمري غريبة هني.. خلود: خل عند تراني فالدرب يايه.. شو غريبة.. بيت عمي جنه بيت عمج.. مجد: اوكي اوكي.. يلا بسرعه بلا هذرة زايدة خلود: تدرين مجوود ساعات احس اسلوبج شرات اسلوب يدو.. مجد: من كثر ما ايلس وياها فالبيت استويت شراتها.. خلود: الظاهر جي.. يلا عيل انا جي عشر دقايق وواصلة اوكيك مجد: اووووووووووكي.. وبندت خلود عن مجد وصدت مجد صوب زجاج المكتبة الي محطوطه فالميلس وقعدت تتطالع عمرها شوي ولو انه ماكان واضح بس كان عاكس صورتها.. ويلست تعدل شعرها وتتدلع.. وتمسح الجحال الي ساح شوي.. ومن عقب مشت صوب الكنبة وشلت عباتها.. وشلت الشيلة يلست ترتب الشيلة على راسها وتحط شعرها المفتوح تحت العباة وشلت تليفونها واغراضها.. ومشت صوب الباب توها بتطلع.. جان تسمع صوت حد ياي صوب الميلس.. خافت وربعت صوب الممر الي فيه الحمام (اكرمكم الله ) ودخلت الحمام .. وعقبها سمعت هدوء.. توقعت اكيد ان احين الميلس فاضي.. توها طلعت راسها من الحمام وتفاجئت بشخص يدامها صرخت .. وحطت ايدها على قلبها.. تجمد احمد من شاف مجد يته ضحكة بس سكت.. ياريال اسكت عن تنط في ويهك وتشوهك روحها تكرهك.. نزل راسه وتم يحرك ريوله على الرخام كأنه يبا يرمس ويقول شي بس متردد.. ومجد واقفه يدامه ومنزله راسها كأنها تترياه يرمس ويوضح مجد في خاطرها ارمس.. قول ان الي سمعته غلطة.. برر.. ارمس.. ارجوووك أحمد يرد في خاطره.. مو قادر انطق... ماعرف اعترف بحبي لج ولا ابرر الي صار.. اااااخ شو بلاني توه لساني شو طوله واحين مستوي خيخه ماروم ارمس تحايست مجد بثمها يوم استوعبت انها واقفه في ميلس رياييل يعني في اي لحظه ممكن ابوها وعمها يدخلون وان شافوها هني واحمد موجود ولا بعد مب متغشيه بيجتلونها.. بسرعه غطت ويا : عن اذنك .. وطلعت وصد احمد صوبها وكفخ عمره على ريله..: اففففففففففف حمار حماااااااااااار .. جان رمست قلت شي.. اخخخ فرصة عمرك يالغبي.. .. خلود: وانتي ليش ماتقولين لي عن هالسالفة امس مجد: مادري انشغلنا البارحة وماوحالي اخبرج.. خلود: يعني مارمس ولا قال شي.. مجد: أبد اقولج موووووول مانطق.. يقهر والله انه يقهر.. خلود: انزين على الأقل جان طرش مسج الكلام الي كان يبا يقوله مجد: اقولج حسيت فيييييييه حسيت يبا يرمس يبا ينطق بس لسانه مربوط .. ه كل ماتذكر شكله كيف يحرك نعاله (اكرمكم الله) على الأرض ومرتبك.. بس مارمس ولا طرش مسج(اطالعت تليفونها) خلود: ماعليه مصيره بيرمس مابيروم يتحمل تطنيشج له.. مجد وهي منزله راسها والدموع منحبسه في عيونها: اخاف اخسره .. تقربت منها خلود ولوت عليها: ماله غناة عنج .. تبقين بنت عمه .. اللي مابيلقى احسن منه.. مجد وهي تمسح الدمعه الي على خدها اليمين.. : انزين عطيني لابتوبج بدش عالمسنجر شوي خلود وهي رافعه حياتها: مجووووود لا يكون .. مجد وهي تضرب خلود على جتفها: دبه شو هالتفكير.. ياهل يدامج انا ياهل.. بسولف ويا رباعتي شو بلاج.. خلود: هيه جي اوكي مجد: عرست مسويه عمرها حرمة البيت.. اقول كلمتي العروس صدق؟ خلود: منو فطوم.. هيه الصبح دقيت لها بس ماردت.. مجد: عندها تليفون؟؟ احيد ماعندها؟ خلود: لا امس جاسم عطاها عشان ترمس ريلها شو بلاج.. مجد: هيه اقول انا بعد.. عيل اكيد للصبح راضعه الخط وياه خلود: هيه اكيد مجد: هيه انزين خلود شو يقولون اول مره يوم يرمسون.. يعني يعني شو خلود: هيه شوفي .. اول مره يوم رمست ويا جاسم كنت وا... انتي ايه تبين اتيريني فالرمسه وتخليني اقول كل شي.. يلا عاد .. مجد وهي تضحك: .. كانت الخطة بتنجح افااااا خلود: ويا ويهج انزين.. بنشوف انتي واحمدوو عقب بتقولين لي الي يدور بينكم مجد: هيييه فالأحلام.. خلود وهي تعطي مجد اللابتوب: عيل جب مجد: حاضر عموو وفتحت المسنجر وقعدت تسولف ويا رباعاتها.. وكانت الساعه بحدود ال11:30 فليل لأن مجد قالت بتبات في بيت خلود والصبح يوصلها عمها (ابو خلود) بعد مايوصل خلود __________________ |
مجد: أفففففف
خلود: شوفيج؟ مجد: حتى هاي الدبه ماخلتني ايلس اونه سيري ارقدي خلود: صدقها ارقدي.. معذبة عمرج مجد: معذبة عمري في شو؟ خلود: يعني تبين تقصين علي اني مب فاهمتنج.. لا حبيبتي فاهمتنج وعدل بعد.. ابتسمت مجد وبندت اللابتوب ونشت عشان تزهب للرقاد .. اليوم الثاني فالوزارة عند حور وعبيد عبيد: حور اليوم بنتغدى برع اوكي فجت حور عيونها وودرت الأوراق الي يدامها: شو الطاري عليك؟ عبيد: ماشي مرتي حبيبتي ابا اختلي فيها عراحتي برع البيت حور وهي تبتسم: شي جميل.. وانا يسعدني اقبل العزيمة.. عبيد: لي الشرف سيدتي.. وشاف واحد دخل عندها المكتب لا احم ولا دستور.. وشكله الريال مش اوكي.. تم يتعلج لبان وقف مجابل حور وحط الأوراق على طاولتها.. ---: لوسمحتي وقعي على الورقه خل اروح مستعيل بهدلتوني من مكتب للثاني عبيد تم واقف يتفرج عليه شو بيسوي.. وحور في خاطرها تدعي ان الله يمرر هالسالفه على خير.. وخذت الورقة وراجعتها: بس اخوي ناقصة الأوراق.. احتاج ورقة موقعه من عند خليفه الفلاني .. ---: لحوووول يعني بعد لازم اراكض.. مشيها هالمره بدون توقيع هذا الي اسمه شو.. نسيت.. حور: اسفه اخوي هاي قوانين ---:افااااا.. (يلس على الكرسي مجابلها وتقرب منها).. يعني اهون عليج اراكض من مكان لمكان.. تعبان والله روفي بحالي.. عيطنا توقيع من ايدج الحلوة وخلصينا حور رفعت حياتها وفرت الأوراق في وي وهي معصبة: لو سمحت وين تتحرى عمرك.. وتبا الأوراق تكتمل روح عند خليفه الفلاني.. وكلام ثاني ماعندي ---: انتي قد هالحركة؟ حور: اطلع برع لو سمحت ---: اوكي انا اراويج.. وتوه بيطلع كان عبيد مجابلنه يبتسم.. ---: خوز انت بعد.. عبيد: لا مابخوز غير يوم ادبك.. --- رفع حياته يطالع عبيد: انت منو؟ عبيد : زوج الحرمه الي كلمتها توه عندك شي.. ارتبك الريال واختبص.. : أ ا. انا ماشي كنت امزح وياها ياخي تعبان وهلكان.. قلت اطلعها من جو الشغل اسويلها اكشن سوالف يعني.. يوده عبيد من رقبته وقربه صوبه.. طاحت الأوراق من ايد الريال وهو يود عقاله والموظفين تيمعوا يطالعون.. وخليفه شاف الموضوع من بعيد ربع صوب عبيد وسحبه: تخبلت .. عبيد: يوم بيرمس بإحترام بنات الناس بنحترمه .. غير جي لازم يتأدب.. يودهم خليفه .. وطلب منهم يروحون المكتب يتفاهم وياهم ويشوف شو الموضوع بهدوء بلا فضايح وحور اقعدت وهي تتنهد واتحس ان الموقف خلاها تحس بآلام في بطنها اكثر نتيجة النفسية.. : الله يعين بس.. مافيه على الضرابه وبعد ربع ساعه طلع الريال من المكتب وطلع عبيد راح عند حور شافها موخيه راسها ومبين عليها تعبانه وحاطه ايدها على بطنها.. تقرب منها بسرعه عبيد: شوفيج؟ حور وهي تتطالع برع عن حد يطالع عبيد وهو واقف حذالها جي بهالطريقه .. : مادري بس حسيت بتعب بسيط.. عبيد: نشي خل نسير المستشفى حور: لا مب لهالدرجة عاد.. عادي كل حمل جي.. عبيد: متى بيظهر ولدي.. حور: وايد مستعيل.. عبيد: هيه وايد.. حور: انزين يمكن بنت.. عبيد: الي ايي من الله حياه الله.. حور: ماباقي وايد.. كلها اقل من 5 شهور ان شاء الله عبيد: ان شاء الله .. متأكده مافيج شي.. حور: لا لا .. سير المكتب عن يشوفنا خليفه ويزعل تدري مكان شغل ومب حلوة جي عبيد: خلاص اوكي.. لا تنسين العزيمه.. حور: ان شاء الله وبعد ربع ساعه وصل لها مسج من عبيد.. (( استانست وايد لتصرفج.. وبجي تخليني متطمن ان حرمتي رياله ماينخاف عليها)) ضحكت حور على كلمة رياله.. (( الله يسامحك سويتني رياله ماعليه.. وانا استانست وايد يوم شفتك خفيت غيرتك )) عبيد (( انا ريال وقد كلمتي)) حور (( الله لا يحرمني منك )) .. .. .. .. فالكلية كانت مجد ياسه فالكلاس ومتضايقه .. مب قادرة تنسى سالفة أحمد.. وهاليوم قام يخف اكلها هذا الحب ومايسوي عاد... دشت عليها هند ربيعتها: مجوووووود.. مجووووود عنود: خليها من الصبح وهي قابضه القلم وترسم على الطاوله هند: السبرفايزر تباها انزين عنود تقربت من مجد وهزتها: مجوووود.. مجد: ويع ان شاء الله زيغتوني.. هند: شو اسويبج عاشقة ماتسمعين سرحانه نشي السبرفايزر تباج مجد: ياربي شو تبا بعد؟ هند: مادري تبا ترمسج عن المعرض شي تباج تسوين للمبنى مجد: شغاله ابوها.. : يلا سرينا وساروا سوى عند السبر فايزر عشان يشوفون شو تبا منهم.. وتقربت عنود من الطاوله عشان تشوف شو الي قاعده ترسمه من ساعه.. وشافت هالرسمه.. وفهمت منها ان هي متضايقه.. معقولة مجد تحب.. لا لا ماعتقد اكيد مشكله فالبيت عندها مضايقتنها ورن تليفون مجد فهالوقت وهي ماكانت موديه التليفون وياها.. اطالعت عنود الرقم .. وكان مكتوب خلود.. ماحبت ترد.. شلت التليفون وسارت صوب غرفه السبرفايزر عشان تعطيها لمجد وهن كانن رادات في نفس الدرب عنود: تليفونج كان يرن مجد: تليفوني انا؟ منو؟ عنود: مكتوب خلود.. مجد: هيه بنت عمتي.. بتصل فيها بشوف شو تبا.. اتصلت مجد في خلود مجد: هلا خلودوو.. خلود: مجووود اليوم بطلع بسير الستي بتيين؟ مجد: لا مالي بارض خلود: مجووووووود حرام عليج الي تسوينه والله مايسوى عليج.. مجد: خلود مقهورة الي سواه مب شوي.. والله مب شوي ماقدر اسامحه.. ليش يوهمني انه ودر وهو من الصوب الثاني يسوي كل شي خلود: ماعليه طنشيه يزول.. انتي اهتمي بروحج بس مجد: احين انتي الي قمتي تقولين يزول.. ماكانت هاي رمستج قبل خلود: بس الي سمعته وياج يخليني اقول جي.. وسمعي غصب بتيين وياي فاهمه.. وبلا رمسة زايدة.. يلا باي.. ضحكت مجد: باي وبندت الخط ودخلت الكلاس عن تتأخر.. .. .. .. فالسعودية جلثم بعد ما خلصت صلاتها شافتهم بعدهم راقدين عصبت بزيادة يكفي انهم مانشوا لصلاة الظهر ولا ودوها الحرم.. طلعت من الغرفه وشافتهم كلهم راقدين فالصالة... الي على الكنبه والي على الأرض يودت عصاها وقعدت تضرب فيها قاع ريل كل واحد فيهم .. أول شي بدت في ناصر كان أقرب واحد.. فز من مكانه ومن شافها زاغ.. وتم يدز فيصل الي كان على الكنبه عشان ينش.. جلثم: عنلاتكم انتوا مو ويه حد يعتمد عليكم.. نشوا .. يالله بالستر .. نشوا اقولكم.. الكل نش .. الي يحج عينه .. والي يحج راسه.. والي يتثاوب.. جلثم: انتوا وبعدين وياكم.. يلا ربعوا صوب الحمام تغسلوا ودوني الحرم.. ناصر: ياخي سلطان ود يدتك الحرم عيب عليك.. يايبنها من البلاد وماتوديها فيصل: هيه والله صدقه نصور.. ودها.. عيب عليك جلثم وهي تضرب فيصل وناصر.. : عنلاتكم.. جي انا بس يدته هو.. يدتكم انتوا بعد.. وكلكم تودوني سوى.. ولا يايين هني عشان تنامون.. وايد عليكم اعتمرتوا امس.. وكل شوي تحنون عراسي نرجع ونرجع الفندق تعبانين.. سلطان: صدق ترا اميييه.. كنا ميهودين من السفر ودرب الباص ذبحنا كسر ظهورنا من جدة لمكة.. ناصر: وبعدين تميتي للفير بعد شو تبين.. ولا خليتينا نتحرك من مكانا.. جلثم وهي تتطالعهم.. وتسوي عمرها زعلانه: احين انا شادة الظهر فعيالي وماتبني اسير اتعبد على اخر عمري.. يرضيكم اموت وانا في خاطري اتم مجابل الكعبة ادعي.. وبعدين لمنو ادعي.. لا ادعي ان الله يزيدني من ماله ولا جماله.. ادعيلكم انتوا عيالي.. من لي غيركم كل واحد فيهم تلوم وتقرب منها وحب راسها.. : حقج علينا.. ناصر: اصلا نحن غلطانين بعد.. يايين من هناك لهني عشان نطلب الله يغفر لنا على سواتنا .. ومضيعين اليوم علينا بالرقاد.. فيصل: صدقه ناصر .. وسامحينا يدوو .. سلطان: خلاص ابشري.. احين نتغسل ونتغدى تحت فالمطعم ولج لنا نروح الحرم ومانرد الا بعد صلاة الفير.. جلثم: نحن كم بنبات هني؟ سلطان: 10 ايام.. جلثم: خلاص.. يسدن .. ناصر: يسدن على شو.. جلثم: ابا كل واحد فيكم يختم القرآن .. هني قبل لا نرد البلاد.. الكل: تم.. استانست اليدة ودشت حجرتها.. ويلسوا الشباب شوي.. فيصل: صدق انت ليش مانشيت؟ سلطان: مادري من التعب الي فيه رقدت بلا حاسيه ناصر: حتى انا.. فيصل: ياخي يدتك عذبتنا بس صح كلامها.. وخصوصا ان نحن قاصدين في ييتنا هاي ان نفتح صفحة يديدة في حياتنا.. لازم نوقف على رمستنا سلطان: خلاص عيل من الحين.. وان واحد فينا غفل الثاني يذكره.. ناصر: على خير.. .. .. __________________ |
كان يالس عالنت ومندمج وهو يشتغل ويرتب .. دش عليه بدر وشافه منهمك..
بدر: طروووق شو تسوي ارتبك طارق وبند اللابتوب..: شو عندك اطلع برع.. بدر يطالعه بخبث: هااا شو تتطالع خشيته عني.. طارق: روح توك صغير على هالسوالف.. بدر وهو يسحب اللابتوب: روح زين.. صغير.. دشيت ال18 ويقولي صغير.. وشاف ان في فيديو.. رد شغله وقعد يطالع.. : اففففففف وين هاييل؟ طارق: فالحوض.. بدر: عنلاتهم حلوات.. طاع هالإثنين وين يتحرون اعمارهم.. طارق: زين اني ماسبحت وياهم عيل.. بدر: طرشه لي بالبلوتوث عتليفوني.. طارق: اوكي.. بس هاا.. مو اطرشه لحد.. مافينا الربع ينفضحون.. بدر: لا ماعليك افاااااا.. وطلع بدر من غرفه طارق وهو مستانس عنده فيديو يديد.. ماعليه يا جسووم وسلوم.. انا اراويكم .. كل يوم يقهروني ويراووني فيديوات يديدة.. عندي شي حصري ماعندهم اياه.. يود اللابتوب ودش النت.. وقعد يدقدق على الكيبورد.. جسوووووووووووم ضد العالم says: اونه.. انت من وين لك.. يحليلك يالياهل.. Dragon says: ماعليه .. انا داش الجات احين وبسوي الدعايه وبطرشه لهم.. جسوووووووووووم ضد العالم says: ه بيضحكون عليك .. أكيد فيديو بايت منتهية صلاحيته.. ولا يمكن فيديو رسوم عدنان ولينا.. خخخخخخ Dragon says: استقبل الفايل وشوف .. .. وبعد 5 دقايق .. جسوووووووووووم ضد العالم says: طلعت مب هين ... من وين لك هذا يالهرم.. Dragon says: عشان ماتقول عني ياهل وماعندي.. جسوووووووووووم ضد العالم says: لا احين مابقول عنك ياهل دام عندك هالفيديوات الزينه... بس اقول انت مب قدها لا تنشرها.. بتنجك بسرعه Dragon says: وليش يعني ؟؟ تتحراني ياهل اخاف جسوووووووووووم ضد العالم says: الصراحة هيه بعدك صغير على هالسوالف.. لا تغامر نخاف عليك Dragon says: تطنز حضرتك.. انا براويك .. ودش عقبها بدر الجات وقعد يسوي دعايه للفيديو الي عنده ويتحدى ربعه انه بينشره.. .. .. .. .. شما: أميييييييييييييييه باركيلي.. ام عمّار: ها شو.. مبروك.. على شو؟ شما وهي تحضن امها وبتطير من الفرحة.. : توها ربيعتي دقت لي وتقول ان حصلت لي شغل في اتصالات أم عمّار وهي مستانسه: ويعل ربي يونسج مثل ماونستي قلب مال أنا.. شما وهي تضحك : أميييييه .. مثل ما ونستي قلبي.. مشكلة العرج لا نط.. أم عمّار تضربها على الخفيف على جتفها: لا تضحكين.. مبروك وايد زين حصلتي شغل واخيرا.. شما: هيه امي واخيرا في راتب شهري بنرتاح شوي.. وين عمّار خل أبشره.. أم عمّار: يذاكر في غرفته.. شما ربعت صوب غرفة عمار ودشت عليه: أخويه حبيبي ابشرك حصلت شغل.. نش عمّار وهو مستانس: احلفي.. مبرووووووووووك. شما: الله يبارك فيك.. عمّار: بس وين؟ شما: ربيعتي تقول خالها يداوم فإتصالات ومنصبه عود شوي وهي كلمته وقال لها خل اتييب اوراقها وتعتبر انها توظفت.. شفت الواسطة شو تسوي.. عمّار: هي والله بس لا تخوفيني.. اخاف الا بسبب الواسطة ماقدر اسافر احقق حلمي واكمل دراستي.. شما: لا ماعليك.. لوقتها يصير خير.. بس شد حيلك بالنسبة.. عمّار: ان شاء الله.. وطلعت شما من غرفة اخوها واتصلت في خلود تبشرها.. خلود: والله صدق فرحت لج.. ألف ألف ألف مبرووووووووك شما وهي تتذكر سلطان في هاللحظة ماتدري ليش.. : الله يبارك فيج.. خلود: يالله باقي فرحة وحده نفرحها لج .. شما: شو هي؟ خلود: اممم.. الزواج.. شما وهي تضحك: ه.. حليلج يا خلود... الله يكتب الي فيه الخير.. خلود: تعالي اليوم اخوي خبرني قبل لا يسافر عن عفرا.. ودوها لجنة الإصلاح .. توعية دينيه يعني.. شما وهي حاسة بضيج شوي.. : هيه.. زين والله .. الله يهديها خلود: شما انسي موضوعها اعتبريها تجربة علمتج الحياة فيها انج تحاسبين مع اي انسان تكلمينه شما: هي والله صدقج.. يالله ماعلينا المهم مابخلي شي يخرب فرحتي بسالفة الشغل.. خلود: باركي لأمج عني.. شما: يبلغ.. يالله عيل اخليج.. وبندت خلود عن شما.. وسارت شما عند امها تساعدها فالمطبخ.. وتسولف وياها.. .. .. مجد: كنتي ترمسين منو؟ خلود: شما.. مجد وهي تفر عليها المخدة.. : ويا ويهج واشعنه ماتزقريني.. (تناديني) خلود: شو عرفني انج تبين ترمسينها؟ مجد: سخيفه.. خلود: ادري.. وصخي (اسكتي) خليني اكمل مذاكرة مجد: دحيحة مستويه خلودوو.. خلود وهي رافعه حياتها وتطالعها بنص عين.. ضحكت مجد وردت حطت راسها على المخدة وتمت تتطالع سقف الغرفة.. وفجأة رن تليفونها.. صدت صوب التليفون بهتت.. خلود: ردي حشرني تليفونج.. عرس مب رنه مجد حست ان لسانها انربط ماعرفت شو تسوي.. : خ.. خ.. خلود.. خلود حست ان الموضوع فيه شي سارت بسرعه صوب التليفون وشافت الإسم أحمد خلود: ردي شفيج. مجد: مابا خله يزول مابا ارمسه.. خلود: كيفج.. ساعه تيبست قلت بيوقف قلبها البنت بتموت شي بيستويبها واخر شي تقول مابرد.. وشوي وصل لها مسج (( ردي قبل لا ايي اطلعج من بيتكم.. او عطيني رقم خلود.. الموضوع ضروري)) وشافو المسج ثنتينهم وهم فاجين ثمهم. خلود: شو السالفه وليش يبا رقمي؟؟ مجد وهي تسوي حركه بجتفها بمعنى ماعرف.. ورن التليفون مره ثانيه .. وكان احمد الي متصل.. خلود: ردي بسرعه.. ردت مجد وتمت ساكته .. أحمد بنبره عصبية : انتي ليش ماتردين؟؟ شو تحرين متصل ابوس ريولج تسامحيني؟ مجد وهي رافعه حياتها: لا والله.. خير شو تبا حشرتني تراك؟؟ أحمد: صخي صخي.. انتي وبنت عمتج ماوراكم غير سواد ويه.. مجد: ايه احترم نفسك وارمس عدل.. أحمد: شوفي كلمة ثانيه الرمسه ويا ابوج مب وياج.. مجد: ارمس ويا ابويه انا ماسويت شي غلط عشان اخاف.. أحمد: أكبر غلط.. تقولين ماسويت شي غلط... ردي علي.. شو اسم الصالون الي تروحون له دوم؟ فجت مجد ثمها وخلود شراتها لأنها كانت تسمع أحمد.. : ها شو دراه.. أحمد وهو يصرخ: مجووووووووووووود ويهد ردي علي لأني واصل حدي.. خبرني اسم الصالون وفكيني من شرج... مجد: بس مب لازم اعرف السالفة بالأول... أحمد: ياربي هالبنت بتجلطني.. شوفي يوم من الأيام سمعت انج انتي ولا خلود طبيتوا هالصالون او رحتوا اي صالون غيره أحش ريولكم حش.. واحمدوا ربكم ان السالفه بس عندي انا... وقولي لخلود تحمد ربها انها ماوصلت لجاسم عادي يذبحها ولا هو مايتحمل الصدمة .. يكفيه المسكين ميهود من فتره مادري شبلاه خلود والدموع في عيونها: شو الي صاير انزين.. أحمد: شو الي صاير.. انتوا وين؟ مجد وهي ترتجف: في بيت عمتي شيخه أحمد: خلاص 10 دقايق وانا عند البيت .. وبتعرفون شو السالفه .. خلود: شو الي صاير بتخبل مجد: صخي انا اكثر عنج .. احس قلبي بيوقف من كثر مايدق.. هو شو يخصه فالصالونات.. خلود: انا مافي غير شي واحد في بالي.. لا يكون مجد: لا دخيلج.. لا تقولين جي.. خلود: اووووووه راسي افتر.. وبعد دقايق اتصل احمد تيمدت مجد في مكانها ولبسن شيلهن ونزلن الثنتين برع عنده.. وكان شكله محمر من كثر مايعصب.. تقربوا من سيارته.. ومن شاف مجد كيف عيونها محمرين من الدموع الي فيهن حس انه مب قادر يرمس .. خلاص مب قادر يشوف هالعيون تدمع.. صد احمد عنهن:.. الله يخليكم خبروني اسم الصالون.. مجد: احمد شو الي صاير؟ أحمد من سمع اسمه على لسانها ماقدر يتحمل زود.. : ها.. ها الي صاير.. شوفو انا برمس بهدوء احين بس انتوا هدن اعماركن.. |
وكل وحده فيهن نزلت راسها وماسكه ايد الثانيه وميته من الخوف.. يبن يسمعن شي خارج عن توقعاتهن..
أحمد: الصالون الي رحتوا فيه طلع اعوذ بالله مب رايم اقول الكلمة.. المهم الصالون مب زين.. وانتن الله يهديكن سايرات تسون شي مايتسوى فالصوالين.. جان يبتن وحده البيت تسويلكن الي تبنه.. والله يغربلهم مصورينكم.. ومجموعه بنات ثانيات.. وانا في شقة ربيعي وصلت وحده فلبينيه ويابت له شريط.. وهو حطه وانا مادري شو الي فالشريط.. وتفاجئت يوم شفتكن .. وعلى طول شليت الشريط وسألت ربيعي عن اللي يابته وخبرني السالفه انه وحده فلبينيه تشتغل في صالون اتييب له عشان يسوي نسخ ويبيعهم وهم يستفيدون.. وهو يستفيد.. وتهازبت وياه وفهمته ان الي فالشريط من هلي.. ودقيت لكن على طول.. خلود من سمعت السالفة اغمى عليها على طول.. ومجد صرخت يودتها.. واحمد دخل البيت شاف الخدامه في وي طلب منها ايي ويشل خلود ويا مجد.. ودخلوها فالبيت.. مجد وهي تصيح: احمد دخيلك ابوي اذا عرف بينجلط.. واسم الصالون ------ أحمد: شوفي بحاول ان ابوج مايعرف شي.. بس برمس عبيد وبنشوف شو نقدر نسوي.. مجد وهي تصيح: الله يخليك احمد أحمد غمضته مجد وهي تترجاه بهالطريقه .. ماتهون عليه لو شو ماصار.. وهو يدري ان مالها ذنب.. والغلط منها يوم تروح لصالون ومايندرى ماتخفيه هالصالونات والغلط انهن يسون شي بهالخصوصيه عندهن.. : بسرعه ركب الموتر وسار صوب بيتهم عشان يرمس عبيد فالموضوع.. ويشوفون شو بيسوون؟؟ بعد الي صار تتوقعون الأمور ترجع طبيعيه بين مجد وأحمد؟؟ وكيف بينحل الموضوع الكبير هذا؟؟ فطوم وفيصل..كيف راح تكون علاقتهم؟؟ عبيد وحور.. هل الحب هو السائد بينهم؟ عيل طلع الي صدم مجد هو الدكتور.. تذكرونه توقعاتكم |
الجزء السابع
الفصل الأول =-=-=-= عبيد: لحظة لحظة.. أحمد انت مركز فالرمسة الي قاعد تقولها؟؟ أحمد: ياخي هاي ثالث مره اعيد لك السالفه .. نش خل نسير نبلغ.. حور وهي تصيح وحالتها حاله وعبيد لاوي بإيده على جتفها.. : بس عاد .. يقولج مانتشر الشريط .. احمد الي شافه بس بينحل الموضوع .. أحمد: هيه يا حور اطمني اول نسخة عندي وخل نلحق نبلغ عشان ناخذ النسخة الأصلية .. الحمد لله ان الشريط وصل لي.. حور: والله هاي كلها من دعوات امي عبيد: امج ولا امي.. ماتفرق احين خليني اقدر اروح بس .. حور: شو تتريا روح الله يخليك فكنا من الفضيحة هاي عبيد: كيف تبيني اروح واشوف حالتج جي.. انتي جي بتخلين الكل يعرف باللي صاير.. ونحن مانبا نزيد الرمسه فالموضوع حور: خلاص سيروا الله يحفظكم.. بس طمنوني الله يخليكم أحمد: جي سايرين حرب نحن.. عبيد خاطره يضحك بس يحس الموضوع موول مايتحمل مصخره .. يود احمد وسحبه وياه برع وركبوا الموتر بسرعه وراحوا صوب المركز الجنائي يبلغونهم عن اللي صاير.. .. .. فالمركز الشرطي: وين الشريط.. أحمد وهو يمد إيده بالشريط: هذو سيدي.. الله يخليك سيدي بسرعه خل نحل الموضوع مايتحمل تأجيل نبا نحصل النسخة الأصلية.. الشرطي: خلاص انتوا وقعوا على البلاغ هني.. واحين بنجهز دورية وبنسير الصالون.. عبيد: بس بوعبدالرحمن (لأنه ربيعه) مب لازم يكونن وياكن شرطيات؟ الشرطي وهو يضحك: بتعلمني شغلي يا عبيد.. عنلاتك .. ضحك عبيد ووقع هو وأحمد على الأوراق وقعدوا يتريون الشرطي يخلص كل الإجرائات اللازمه.. وبعدها بربع ساعه وكانت الساعه وقتها 8:00 فليل .. جهزوا فريق من الشرطة وتوجهوا صوب الصالون.. وفهالوقت رن تليفون احمد كانت مجد الي متصلة.. أحمد: هلا.. مجد وهي تحاول تخفي صوتها المبحوح.. أحمد طمني شو صار وياكم؟ أحمد: كل خير نحن احين سايرين صوب الصالون وان شاء الله خير لا تحاتين.. شخبار خلود؟ مجد: نشت ومن وقتها وهي تصيح.. أحمد: عنبوكم من بنات بتفضحونا.. عبيد: فضحونا وخلصوا... عنبوكم ماشي مكان تسون فيه شغلاتكم الا هالصوالين.. ماقول غير لاحول ولا قوة إلا بالله.. يوم اني امنع حور تحرطمت علي وبوزت.. واحين فهمتوا ليش انا ازاعق واقول صوالين لا لا لا .. مجد: الله يخليك قول لعبيد مو وقته الي فينا كافينا.. أحمد وهو يأشر لعبيد إسكت.. عبيد: هيه الواحد لا قال كلمة الحق سكتوه... انتوا الحريم ماشي يرضيكن.. عفاني الله.. أحمد : لاحوووووول عبيد وبعدين يعني.. مجد تمت تصيح.. : ها ليش جي حاط علي.. انزين انا شو دراني ان الصالون ها جي.. وملايين الحريم يسيرن صالونات .. كيف بنقدر نمنعهم.. أحمد: المسأله مب مسأله ملايين ولا غيرهن.. كلن عليه من اهله.. وانا علي منج لأنج عرضي وشرفي وسمعة هالعايله مرتبطة فيج.. فاهمه عبيد: فهمها خديه ماتفهم تراها.. شرات اختها .. ابتلشت فيها..ه مجد: ها متفيج اخوك والله نحن وين وهو وين يضحك ويسولف.. أحمد: لأن الموضوع دقايق وبينتهي.. من جي ارتحنا.. والي مريحنا اكثر ان الشريط ماوصل غير عندي انا.. بس ناقص النسخة الأصلية وينتهي الموضوع.. مجد: ابا افهم شي واحد بس.. أحمد: خير؟ مجد: انت ربعك كلهم جي لوث؟ صخ احمد وفهم قصد مجد اكيد تنغزه عن سالفة المزرعه.. واحين سالفة الشريط كملت.. : لا مب كلهم لوث.. وهذا عليه هالسوالف ونحن ماندري... واليوم بس الي دريت به.. مجد: عفاني الله.. حد يرابع هالأشكال.. يسترزق من ورا نسخ الأشرطة.. أحمد: يابنت الناس الريال مب مواطن.. وافد كان وياي فالمعهد الي كنت ادرس فيه.. عزمني اليوم عنده الا اشوف الي شفته وبلغت عليه ومسكوه ماخليته في حاله.. واحين سايرين نمسك الصالون.. خلود: انتي ايييييييه ياسه داقة سوالف وياه.. والله متفيجة أحمد كان مستانس وهو يسمع صوت مجد .. حاس نفسه ناسي الموضوع باللي فيه .. وده العلاقة تستمر جي ولا تغير في لحظة.. : انزين انا بخليج لأن وصلنا الصالون مجد: خبرني شو يصير أول بأول.. بندت مجد وتمت سرحانه شوي وهي مبتسمه.. خلود وهي تفرها بالمخدة: والله متفيجة تدرين.. نحن ويييييين وانتي وين.. مجد: هبله انتي هبله .. قالج خلاص انهت المشكلة ليش المناحة بعد.. خلود: توووووبه بعد اطب الصالون.. مجد: هيه والله توبه.. .. نزلت الشرطية ودخلت ومعاها أمر اخلاء الصالون والقبض على الفلبينيه .. من شافتها صاحبة الصالون وهي لابسه الدريس وداشه الصالون خافت.. صاحبة الصالون: خير اختي في شي؟؟ الشرطية: عندي امر بإخلاء الصالون.. ممكن الحريم الي هنا يظهرن من الصالون حالا.. صاحبة الصالون: انتي شو عم بتقولي.. بدك تقطعي رزقنا.. مابتشوفي الزباين مشغولين كيف بدك اياهن يطلعو. الشرطية اطالعتها بنظرة وطنشتها ودخلت صوب غرف التنظيف المخصصه.. ودخلت وكانت الفلبينيه تأدي شغلها مع احدى الزباين.. الفلبينيه: شو هادا مدااااااام .. ماتشوف في كستمر داخل.. الشرطية: اسكتي لا اصمج كف تنسين روحج.. ولو سمحتي اختي لو تظهرين من الغرفه وتكملين شغلج فالبيت لأن هالصالون ماينفعج.. الزبونه: نعم.. شو هالرمسه بعد.. احين ماتبين تتريين فالدور تبين تاخذين دوري.. سيري صالون ثاني جان مستعيله.. الشرطية كانت مطنشة رمسة الحرمه وقاعده تتطالع كل اطراف الغرفة اتدور على الكامرا.. وحصلتها فالمكيف.. لاحظت عدسة الكيمرا من المكيف.. راحت وبندت المكيف وسحبت الكاميرا بقوة وجلعت وايراتها بالقوة.. : عرفتي احين ليش اقولج اظهري الزبونه وهي تمشي صوب الفلبينيه وتيودها من شعرها وتضربها: عنلاتج شو ها بعد الي اشوفه.. يا سواد ويهي.. تصوريني غربلج الله.. يودتها الشرطية وسحبت الفلبينيه منها: شو هاا؟؟ هاا تقولين كستمر بعد هااا الفلبينيه تمت تصيح وخايفه لأنها انكشفت. .. وسحبتها الشرطية وياها وطلعتها من الصالون وطلعت باقي العاملات كلهن وقف على ذمة التحقيق.. وأولهن صاحبة الصالون عشان يعرفن هل لها علاقة بكل هذا.. والزباين طلعن من الصالون مذهولات من الي قاعد يصير.. صالون صارلهن اكثر من 4 سنين بعضهن يتعاملن وياه ويظهر هاي سواتهم.. كانن مصدومات .. وكل وحده توجهت للشرطية تسأل اذا في شريط عنها او لا.. الشرطية: هدن خواتي .. عشان تتعلمن مره ثانيه اشيا بهالخصوصيه لا تسونها فالصوالين لأن مامنهن امان.. خلكن فبيوتكن استر.. وعن الأفلام راح يتم التحقيق ويا العاملة وبنضبط كل الأشرطة ماعليكن.. دام ان الموضوع عندنا تطمنوا. وحده: الله يعطيكم العافيه ويجازيكم ألف خير الشرطية وهي تبتسم لها: افا عليج.. ترا ها واجبنا.. .. عبيد مشى صوب الشرطي: ها بوعبدالرحمن.. شي مطلوب منا.. عبدالرحمن: الموضوع عندنا .. وانتوا اختصرتوا كل شي ويبتوا لنا الدليل القاطع والشرطية شافت الدليل فمكان الجريمة.. فمانبا منكم غير سلامتكم.. وتنصحون اهاليكم لا يوثقون فالصوالين ترا مامنهن امان.. وايد من هالجرايم يتنا عبيد: بس منو يعتبر ياخوي.. عبدالرحمن: مجتمعنا يحتاج توعيه .. والدور عليكم أحمد: يزاكم الله ألف خير على تعبكم .. عبدالرحمن: هذا مب جميل الي سويناه عشان تشكرنا.. بس هذا واجب مهني لا غير.. هالفساد ندوره دواره عشان نحاربه.. ونحد عنه.. يكفي ان ولد عمتك سلطان ماقصر من فتره ودلانا على بيت دلاله والقينا القبض عليها ومازال البحث مستمر.. عبيد وهو عاقد حياته: سلطان؟؟ ليش شو سوى؟ عبدالرحمن: ها ماعندكم خبر عيل.. ماشي بلغنا عن بيت وحده دلاله وقبضنا عليها أحمد يعرف ان سلطان له تعامل مع حريم من هالنوع بس ماعرف انه بلغ عليها ... استانس في قرارة نفسه واكتفى انه يبتسم.. الله يجازيك خير يا سلطان... الحمد لله الله هداك.. وراح عنهم الشرطي وغلقوا الصالون وراح يتم اغلاقه بالشمع الأحمر نهائيا.. هذا هو جزاء كل صالون يكون له مثل هالأمور .. وان كانت راعيه الصالون ماتدري إلا ان سمعة الصالون انتهت... بالتالي الصالون ينتهي.. وبهذا انتهينا من احدى هالصالونات المدمرة فالبلاد.. عقبال الباقي.. وتم القضاء والقبض عليهم والتحقيق واحالة الأمر للمحكمة للحكم عليهم .. .. |
اتصل احمد في مجد..
مجد: ها طمني.. أحمد: قبضوا عليهم.. وراح يتم التحقيق وبيظهرون كل شي وبينغلق الصالون.. مجد: الحمد لله ... ريحت قلبي الله يريح قلبك.. فهالوقت كان عبيد داخل عند حور فالبيت وأحمد يتمشى فالحوي وهو يرمسها.. ابتسم: قلبي.. تدرين عن حاله .. مجد وهي مصدومه من اسلوب احمد وياها: نعم؟ انتبه لنفسه احمد وصخ وابتسم..: ها .. ماشي ماشي.. استحت مجد وصكت التليفون بلا حاسيه.. احمد مالقى عمره الا هو فالشارع من كثر مايمشي وهو ولا حاس.. ضحك على شكله وهو يشوف العيايز الي مجابل بيتهم يطالعنه ويتصاصرن .. افتشل.. احمد: السلام عليكم خالاتي.. (1) : عليكم السلام اميييه.. اشبلاك تمشي ولا حاس بعمرك.. خير امي شي بلاك مستهم؟؟ أحمد ابتسم لهم: ها لا سلامتكم.. (ويأشر على قلبه) (2) : ام عبدالله اشبلاج الله يهديج.. الولد عاشق.. هاييل هم عيال احين كله يفكرون فالحب.. تم احمد يحج براسه ويضحك.. (1): هييييه والله .. ياولدي خل عنك هالسوالف وفكر في مستقبلك.. ترا هالقلب يتعب وبس ماعنده شغله ثانيه ابتسم احمد وسلم ودخل البيت.. وتم يالس فالحوي وهو يفكر ويطالع القمر كان ليلتها مكتمل والجو كان رووووعه صدق.. الرياح هاديه.. فكر يطرش لها مسج على الأقل يمكن تفهمه من كلام الي فالمسج.. قعد يكتب الكلمات بنفسه (طبعا المسج منقول ماعرف من تأليف منو .. بس اونه احمدوو الي كاتبه خخخخ).. وطرشه لمجد .. الجهة الثانية.. مجد فهالوقت بعد ماهدت خلود وارتاحت وتطمنت عليها .. طلبت من ابوها يردها البيت.. رجعت بيتهم وتوها بتدخل البيت سمعت صوت المسج.. فتحت صفحة صندوق الوارد وكان مكتوب إسم أحمد.. خافت تفتح المسج شو بتشوف فيه.. ياترى شو مطرش لي؟؟ شو كاتب.. كانت متردده تفتح المسج وتقراه.. يلست على المنصه وفتحت المسج صكت عيونها ورفعت راسها وردت فتحت عيونها شافت القمر مكتمل يدامها.. ابتسمت.. واطالعت شاشة التليفون وشافت هالمسج منه.. علامك صرت متغلي ولا تسالني (وشحالك) انا اشهد كلمةٍ منك عن احوالي تريحني لحالي كيف تتركني وتبخل عني بسؤالك وش الي اجبرك (خلي) تصد عني وتجرحني رخيصٍ صرت في قلبك ولا اطري على بالك اذا اني دون قصد اخطيت (رجاك القلب) سامحني ! قرت المسج وابتسمت.. فديته ياربي احبه.. وانا اقدر اصلا.. كنت خايفه اخسره لكن احين.. نو نو مستحيل افرط فيه لطيفه: امييه مجد شو مقعدنج برع ارتبكت مجد: ها.. لا ماشي بس الجو حلو والقمر مكتمل.. قلت ايلس برع اتهوى شوي لطيفه: هيه والله.. الا يدتج اتصلت وتسأل عنج.. قلت لها انج في بيت خلود سلمتج عليج وايد وتقول دوم تدعي لج مجد ابتسمت: الله يحفظها يارب.. انزين امي انا بدخل وبصعد غرفتي.. شي تامريني لطيفه: سلامتج اميه.. دشت مجد بسرعه وهي تربع صوب غرفتها.. ودشت وطلعت عباتها وشيلتها .. وفتحت الأبجورة الي حذال السرير وبندت الليت وفتحت شعرها وطاحت على الفراش وفرشت شعرها الطويل حذالها وقعدت تقرا المسج مره وثنتين وثلاث.. ودورت بين المسجات وطرشت له هالمسج دق الجهاز وخاافق القلب له فـــز فــزّة فرح ماهي مثل كــل فـــزه ،، حي الرساااله وحـــــــي منهو لها دز حي الكلااام الزين واللي يـــدزه ،، اهلا هلا بك ياعزيز معزز ومعتـــــــز واللي يعزّك لازمنّــــــك تعــــــزه استانس أحمد واااايد يوم قرى المسج.. حس ان الأمور بينه وبين مجد قامت تستوي طبيعيه.. وانها بدت ترضى عليه.. رد طرش لها هالمسج من خاطره صوتـــــــــك .. أسرني وصرت بجد "احتـــــــاجه" .. في كل لحظه احسّه مايفاااارقني ..؟ أمــــــــــوت .. ((بجرأته)) وأمــــوت ((بإحراجه)) لك صــوت والله ماغيـــره يروقنــي ..؟ وقبل النهايـــــه .. "طلبتــــــــك" بس هالحاجـــــه .. ياليت ,,هالصــوت,, ليله مايفارقني ..!! .. ابتسمت مجد واعتدلت في يلستها وكتبت له هالمسج لاصــار لك شخص تودّه وتغليــــــــه وحالت ظروف الوقت ((بينك .. وبينه)) حاول وحاول قدر الامكان ترضيـــــــه ومن لايخونـــــك لاتحاااول تخونــــــه .. والحب لامــ، مااات وشلووون تحييـه ؟؟ تقدر على الدنيــا .. تفتح عيونه ؟؟ دوك العبث ينهي حياته وانا انهيــه مثل الشجر لامااات يبست غصووووونه ..! . . فهم مجد انها تقصد الموضوع .. اكتفى انه يكتب لها هالمسج (( خلي ثقتج بولد عمج واعرفي ان تربيته لايمكن تسمح له ينزل نفسه للمستوى ذاك.. وان الموضوع فيه سوء تفاهم.. )) .. من قرت المسج اتصلت في خلود .. بس كان مغلق تليفونها لأنها قبل لا ترقد غلقته.. تأففت وحطت التليفون على الكنبة عندها وبندت الأبجورة وقعدت تتطالع النجوم الفسفوريه الي في سقف غرفتها.. وتتذكر أحمد كيف كان خايف عليها ويكلمها بكل حنان عن المشكلة.. ابتسمت وغمضت عينها الا بالتليفون يرن.. فزت .. تتطالع الرقم شافت ان الي متصل احمد.. ردت وتمت ساكته أحمد: راقدة ازعجتج؟ مجد وهي تعتدل وتفتح الأبجورة: ها.. لا لا .. واعيه.. أحمد تم ساكت وهي ساكته.. كأن كل واحد فيهم يتريا الثاني يتكلم.. أحمد: تبيني ابند ابعدت مجد التليفون عنها وضحكت عالخفيف وتتطالع التليفون وهي مغطيه على السماعه: يعني يا أهبل لو اباك تبند بقول ارمس وخلصني.. احبك.. أحمد: الووووووه مجد: هلا هلا وياك أحمد: وين وياي وانا من ساعه ازقرج وماتردين رقدتي؟ مجد:.. ها لا لا.. أحمد: انزين بغيت اقولج لا تفكرين فالموضوع ولا تحاتين لأنه انتهى .. ومحد درى غير حور وعبيد.. مجد: ادري اتصلت وهزبتني لين ماشبعت.. أحمد: تستاهلين دواج عشان ماتروحين مجد: خلااااااااااص توبنا انا وخلود نروح.. أحمد: بغيت اقولج شي ثاني مجد وهي فاجة عيونها وفي خاطرها تقول.. اكيد بيقول انه يموت فيني ويحبني وبيخطبني ومايروم يعيش بدوني وانه يعشقني وانه يتمناني اكون مرته .. اممم بعد شو.. اوووه خل اصبر واسمع أحمد: ترا انا ماشفت الشريط كله .. بس شفت ويهج انتي وخلود وبندت الشريط على طول.. نفسي مارضت اني اشوف شي.. انتو عرضي وشرفي والي يمسكم يمسني.. فلا تستحين وتحريني شفت شي.. محشومه بنت عمي ماعاش من يشوف شي منج وانا راسي يشم الهوا.. والشريط حرقته بنفسي.. مجد مستانسه انه ماشاف .. ولو انها ماكانت عاريه او شي.. مجرد ايديها كانن مكشوفات وشعرها.. بس كان خاطرها تسمع شي ثاني.. : اهاا لا ادريبك ولد عم ينشد الظهر فيك..تراك فالنهايه شرات اخويه الي مايابته امي.. أحمد وهو يبعد السماعه ويغطيها: شرات اخوج في عينج.. هذا الي قدرتي عليه.. مالت عليج انزين مالت علييييييييييييج افففففف مجد: ألوووووه؟ أحمد: وياج مجد: احين انا الي من ساعه ازقرك وانت ساكت أحمد: لا بس كنت افكر في كلمة اخويه.. مجد: هيه ليش ماعيبتك أحمد في خاطره.. لا ماعيبتني ويا هالويه تتغلين انا براويج.. : خلاص اوكي عيل بخليج عندي خط.. مجد وهي منفعله: ها .. خط؟؟ شوف الساعه كم؟؟ ساعه 12:30.. منو الي بيتصل هالوقت.. أحمد: ربيعي.. مجد: ربيعك.. شو يبا منك هالوقت المتأخر.. مفروض يرقد أحمد: مادري يمكن اشتاق لي وحب يسولف وياي.. مجد كانت ميته من الغيض وقتها ومب عارفه شو تسوي ودها تدخل التليفون وتذبحه : اهااا مشتاق لك.. خلاص اوكي عيل مابعطلك عشان ترمس ربيعك (وهي تركز على الكلمة) المشتااااااق لك.. أحمد كان مبتسم وقتها .. تحبني والله انها تحبني .. والدليل رمستها ولا بعد تكابر ويا ويا.. شرات اخويه اونه.. : لا مب مشكلة عادي بدق له عقب مجد وهي تغتاض زود وتنش من مكانها وتسير من قهرها تتعبث بالأغراض فالدرج وتسوي حشرة (إزعاج) .. : لا لا يعني بدق له عقب بتقعد ترمسه للصبح .. ربيعك ها... هيه اوكي لا لا انا ببند لأني ابا ارمس ربييييييعتي مطرشة لي مسج توها تقول مشتاقه لي تبا تسولف وياي أحمد فهم انها تبا تغايضه.. وهو زاد هالشي: وحليلها.. خلاص اوكي انتي رمسي ربيعتج وانا برمس ربيعي.. مجد وهي تعض شفايفها ومقهورة.. أحمد: اقول شو هالحشرة.. مجد: ماشي ادور على شي مادري وين حطيته أحمد: هيه خلاص عيل يلا تصبحين على خير.. مجد بربكة.. : بتبند.. أحمد: ترا ربيعتج تباج وانا ربيعي يباني حرام نتأخر عليهم.. مجد: ها لا عادي ربيعتي عادي باجر فالكلية برمسها أحمد: اها اوكي وتموا ساكتين حوالي الدقيقه .. ومجد كل شوي تسوي حركة بويا وهي تشوف عمرها فالمرايه .. مره تبتسم ومره تحايس بشفايفها ومره تلعب بشعرها ومره تحج راسها.. أحمد: بتمين ساكته مجد: تمللت أحمد: لا بس اشوفج ساكته مجد: لا بس جي أحمد بعفويه ودون إدراك: تغارين علي؟ مجد انصعقت بسؤاله حست ببرودة تسري في كل عروقها .. ابتسمت بخجل وبندت الخط في وي واغلقت التليفون وقعدت تتطالع الشاشه: ماحبك انزين.. يقهر ياربي أحمد كان مستانس بالفعل.. حس بحبها وعفويتها وغيرتها.. الله لا يغير علينا .. احمدك يارب .. صح ان المشكلة الي كنا فيها كانت كبيره .. بس مب اكبر من الحب الي بدا ينولد من بينا .. الحمد لله .. رب ضارّة نافعة.. وحط راسه ورقد وهو مرتاح.. ونفس الشي مجد لأول مره تحس عمرها راقده وهي مرتاحه وبالها مرتاح.. .. .. |
فطوم: دعيت لنا؟
فيصل: وانا من لي غيرج ادعي له.. نحن في حاجة هالدعاء اكثر من اي ناس على هالأرض.. نبا الله يرضى علينا فطوم بصوت مبحوح: خايفه فيصل.. فيصل: خير من شو حبيبي.. فطوم وهي تمسح الدمعه الي نزلت من على عينها: خايفه فالمستقبل الله يعاقبني ببنتي وتستوي شراتي وتحرق قلبي شرات ماحرقت قلب اخوي وامي.. فيصل سكت.. فعلا هالشي غفل عنه .. وهو بعد ياله نفس شعور الخوف.. ماوده هالشي يصير.. رضا على نفسه لكن مستحيل يرضى على عرضه وشرفه وبنته لا سمح الله فالمستقبل.. : لا يا فاطمة.. الله بيقبل توبتنا ان شاء الله والدعاء اهم شي ادعي في كل صلاة تصلينها وانا نفس الشي بسوي.. صح غلطتج كبيرة.. وغلطتي انا اكبر منج .. لكن الله اكبر من هذا كله فطوم: جاسم احسه كارهني فيصل: على الأقل جاسم اخوج لو زعل منج مستحيل يكرهج .. دمج ودمه واحد.. انا شو اقول.. احسه مب طايق يشوف رقعة ويهي ولا يرمسني .. مادري هالحساسيه الي بيني وبينه لين متى بتم.. فطوم: الله يصفي نفسه علينا يارب.. فهالوقت كان جاسم مار من عند غرفة الضيوف الموجودة تحت فالطابق الأرضي.. وسمع همس.. تقرب من الباب وقعد يسمع.. وسمع فطوم وهي ترمس فيصل فطوم: هذا مب اخوي.. هذا ابوي وعمي واخوي وسندي بهالدنيا.. مارضى شي يزعله.. فكيف اكون انا سبب ضيجه وزعله.. فيصل: فطوم حبيبتي هدي عمرج.. سلطان رمسته فهالموضوع.. وقالي ان جاسم اطيب قلب عرفه في حياته وانه يحبج انتي واختج اكثر من نفسه.. مستحيل يكرهج.. هاي فتره تحمليها بسبب غلطتج مثل ما انا اتحمل ثمن غلطتي .. وكل شي بيرد طبيعي فطوم: تباني ارمس جاسم عنك.. فيصل: لا .. انا بإسلوبي بتقرب منه وبخلي النفوس تصفى مابينا فطوم: خايفه ان الحساسيه الي بينكم اتم .. والله مابتحمل اشوف اخوي مايحب ريلي.. اباك تكون اخوه الي مايابته امي.. فيصل: لا تحاتين .. افا يا فطوم توصيني على واجبي فطوم: الله يسهل ويطيب خاطر اخوي علي وعليك.. فيصل : امين يارب.. بخليج احين بس انتي هدي عمرج .. لأني بسير الحرم بس رجعت عشان ارمسج.. فطوم: فديتك والله.. سلم على يدوو وعلى سلطان فيصل: يبلغ ان شاء الله.. مع السلامه فطوم: مع السلامه .. جاسم تأثر من كلام فطوم.. حس ان فعلا هو مصخها في زعله.. اخته تحتاج للعلاقة الحلوة الي بينهم ترجع.. حتى فيصل ريال والنعم فيه بغض النظر عن الي سواه.. تذكر لحظتها شي مهم .. هو انه بعد غلط ولعب على وايد بنات كانن في منتهى الإحترام من أرقى العايلات.. إلا ان طيش الشباب كان مسيطر على تفكيره.. وماحس بعمره الا الباب ينفتح وتظهر فطوم في وي الي تيمدت ونزلت راسها ورصت على التليفون كأنها خايفه انه سمع وبيصرخ عليها.. مامرت ثواني الا وتحس بحضن كانت مفتقدتنه من زمان.. دفوة كانت تحس بها منذ ايام نعومه اظافرها.. دفوة انسان حنون وصدر يسع كل حرمانها من الأبو.. ماحست الا انها تصيح بحرقة كبيرة.. قعد جاسم ويلّس فطوم وياه عالأرض وتساند على اليدار وضمها على صدره.. وقعدت تصيح بحرقة جاسم: احبج وربي احبج .. لاتحسبين في لحظة ان اخوج يكرهج.. لو كنت اكرهج كنت يوزتج الشيبة.. وكنت سويت وايد اشيا.. لكن من حبي وخوفي حميتج .. اباج دوم تكونين الأحسن .. ابا الكل يقتدي فيج.. فطوم: جاسم الله يخليك انسى الي سويته خلنا نفتح صفحة يديدة.. خلك طبيعي ويا فيصل انسى انه كان السبب .. ترا اختك بعد لها دور وكانت سبب جاسم ابتسم لها وحب راسها: ان شاء الله .. هاي بوسه ثانيه على راسج بس هدي انتي وكل الي تبينه بيصير.. فطوم: انت اخوي. .وابوي.. وعمي.. وخالي.. وحبيبي.. وكل غالي.. جاسم: الله لا يخليني منج .. الا يسمعون حشرة من صوب الدري... يصدون صوب الدري يشوفون منى نازله وهي تركض.. اعتدلت فطوم في قعدتها ويلست تمسح دموعها.. منى: هيييييييه زين اني لقيتكم هني.. جاسم: ليش في شي؟ منى: هيه .. قصيدة يديدة بديت اكتبها .. عطوني رايكم في بدايتها.. فطوم: ياربيييييي احين لازم نسمعها وهي تقصد انا بسير ارقد عندي مدرسة باجر منى: اوهوووو انتي دوم جي تحبطين معنوياتي الشعرية... ماعندج حس فني مرهف للأسف.. فطوم: مابا لا مرهف ولا شي.. خلني جي احسن.. منى: ااااااااااه يا قيس بن الملوح.. كأنك لم تسمع شي.. ضحكوا عليها وابتسموا لها.. منى: يلا اسمعوا.. صرت ماتسأل عليّه صرت حتى ماتبيني او عسب ما أظلمك اسكت احسن م الكلام .. صرت ماتسأل ودمعي حايرٍ في وسط عيني قلي بالله ودخيلك صاحي حبك والا نام ؟؟ قلي بالله وطلبتك شاللي صاير ياضنيني ؟؟ هو صحيح انك تحبني والا حبك بس كلام ؟؟ هو صحيح انه غلايه لي في قلبك من سنيني ؟؟ والا صارت هالسنه خلاص هي مسك الختام ؟؟ والا يعني غيروك ؟؟ وغيروا خافق يبيني !! والا قلبي والا حبي صاروا مب قد المقام !! (احم احم .. كلمات الغاليه.. جرناسه ) منى: هااااا شو رايكم؟ فطوم يودت الورقة وسحبتها وقعدت تقرا.. منى: عفان الله حتى وهي تسحب الورقه مافيها رقه في الإحساس .. جاسم: ماشاء الله عليج وايد حلو .. متى كتبتيه.. منى: اليوم .. جاسم تقرب منها ويودها من اذنها: هيه ومودرة الكتب والواجبات ومجابلة هالشعر.. مب قايلج تخلين الشعر للويك اند منى: آي آي آي اذني.. انزين لحظة خل اوضح.. وين الدميقراطيه فهالبيت وين.. أمااااااااااه إلحقيني.. جاسم: أمج راقدة لا تزاعجين.. منى: عاد انا يوم اييني الإلهام الشعري ماقدر امنعه .. وان منعته انفجر.. ولا اقدر اركز فالدراسة.. وبعدين.. قاطعها جاسم: بس بس.. رويتر عطتني تقرير كامل حشى.. فطوم: والله عيبتني الكلمات وااااايد اول مره احس فعلا انج مرهفة الحس.. منى: طاعو هذي.. تقول أول مره.. عيل منو الي كل.. ماقدرت تكمل كلامها لأن جاسم غطا ثمها بإيده وتم يضحك عليها ويا فطوم لأنها مع ذلك كانت تحرطم.. وشلاها لين وصلها غرفتها ودر ثمها: يلا نامي منى: افففففف احباط عالمي.. سامحهم ياقيس بن الملوح عشاني.. فطوم وهي تضربها على راسها من ورا.. : سيري ولي انتي وقيس مالج.. ضحكت وصدت صوب فطوم تثاوبت في ويا: فيه رقاد لا ترمسين ريلج احين رجاء ولا طلعي برع فطوم: اعوذ بالله تثاوبي مناك .. شو ها.. اععععع عليج.. منى: كيفي .. هاي يسمونها حرية شخصيه تابعه للنظام الديمقراطي.. الي سنـ.. فطوم تقاطعها: جب جب.. لوعتي جبدي 100 مره فاليوم اسمع هالإسطوانة.. رقدي وفكيني .. .. .. .. خلود: ه.. يحليلها شيطانه ماشاء الله عليها جاسم: هيه والله .. دومها جي.. بس سوالفها حلوة.. احسها ماليه علينا البيت كله.. خلود: تدري يا جاسم.. دايما كان ودي ان نوره ماتعرس عشان تكون وياي فالبيت .. علاوي صغير وايد وغير جي ولد.. ونوره من خلصت الثانويه عرست.. وسلطان.. دومه ساهي ولاهي.. وخالد .. لا تسأل.. من مشروع للثاني لا يكل ولا يتعب.. جاسم: وجاسم؟؟ خلود: حب الطفولة والله.. كنت متعلقة فيك ليش مادري.. من ايام ماكنا في فرنسا ويا ابوي وانت كنت اتيينا كل صيف.. كنت استانس لمجرد وجودك ويانا.. جاسم: صدق.. يعني انا شي مهم في حياتج؟ خلود: انت كل حياتي.. جاسم: الا تعالي ليش كان مغلق تليفونج كذا مره دقيت.. خلود ارتبكت: ها... ماشي بس ياني رقاد كنت تعبانه وايد .. وخلص الجارج وتبند روحه جاسم: اهااا .. واحين نشيتي متى بترقدين وراج جامعه... خلود: هيه ادري بس قلت لازم ارمس ريلي.. ولا ريلي مل مني ومايبا يرمسني.. جاسم: افاااااا انا امل منج.. انزين تعالي بغيت ارمسج في موضوع.. خلود: خير ان شاء الله جاسم: كل خير.. شو صار بالنسبه للحجوزات عشان اخلص كل شي.. خلود: خلاص فندق ماريوت اوكي موافقه جاسم: يعني باجر الصبح اسير اتوكل على الله.. خلود: هيه توكل على الله.. جاسم: خلاص تم.. وانتي خلصتي زهبتج خلود: والله انا توني بادية.. هالإسبوع الي كنا نتشرا فيه عشان ملجة فطوم.. كنت اتشرى لعمري بعد.. الا تعال على طاري فطوم متى بيكون عرسها؟؟ جاسم: فطوم تقول تبا تكمل سنه فالجامعه عشان تتثبت.. عقب تعرس.. يعني قولي مب هالصيف الي بعده خلود: هيه احسن بتكون كبرت شوي ونضجت اكثر وتقدر على المسؤوليه جاسم: صدقج.. يالله عسى ربي يوفقها ويوفقنا.. خلود: أمين يارب.. جاسم: خلود.. أحبج خلود: لا والله صدق.. ماكنت ادري.. جاسم: ه يالسخيفه .. خلود: وانا امووووووووت فيك.. جاسم: كيف برقد الليله خلود: وانت مغمض ومرتاح؟ جاسم: ها.. نو نو نو.. مستحيل وانتي بعيدة.. ماقدر.. خلود: اونك عاد... طول عمرك رقدت بعيد عني.. جاسم: بس احين غير.. انتي مرتي.. اتريا الصيف على احر من الجمر.. خلود: لا تنسى تحجز على بداية شهر 7 .. او نهايه 6 .. عشان يكون في فرصة لغايه ماتخلص فطوم من امتحاناتها الثانويه .. جاسم: هيه اكيد ان شاء الله.. خلود: انزين اقول .. هاي بنت البلاد لين متى بتخلي الكاميرا علينا.. ابا اقول كلام ماينقال يدام الناس جاسم: لحظة بسحب فيشة الكاميرا شششششششششششششششششششششششششششششششششششششششششششششششششش شش انقطع الإرسال عنهم.. |
في مكه
اليده كانت قاعده في ساحة الحرم وتقرا قرآن (بتقولون كيف حرمه عيوز بعمرها تعرف تقرا.. ماعليكم ترا جلثم عيوز فل ابشن.. على ايام قبل كانت تدرس دروس القرآن من شيخ الفريج الي كان يدرسهم.. من يومها وهي ماتركت القرآن في يوم وعشان جي قرائتها تحسنت يوم عن يوم).. تقرب منها ناصر ويلس حذالها ناصر: يدوو ماتبين اييب لج ماي زمزم.. جلثم خلصت الآيه الي كانت تقراها وصدت صوب ناصر: هيه ياولدي تسوي خير الصراحة.. جلثم: ربي يطول بعمرك.. الا وينهم اخوانك.. ناصر: فيصل سار يتصل فالأهل من الفندق وسلطان سار يسأل واحد من المشايخ هناك عن شي .. جلثم: هيه بارك الله فيكم .. لا تضيعون دقيقه من وقتكم هني.. ناصر: إن شاء الله على أمرج.. ونش ناصر يروح صوب ماي زمزم عشان ياخذ له كوب ماي لجلثم.. وهو يعبي الكوب بالماي.. حد دعمه من ظهره وانصب الماي على الأرض صد وراه شاف وحده.. كانت أعوذ بالله مب منظر وحده يايه الحرم المكي الشريف.. : اعوذ بالله من الشيطان الرجيم صدت صوبه الحرمه كانت أفريقيه توها مسلمة شكلها.. وتمت ترمس بلغتها وتخربط وناصر ولا يفهم لها.. وعبا الكوب ماي وسار عند جلثم.. جلثم: مشكور يما.. ناصر: العفوو.. جلثم: شو بلاها كندورتك حد صاب عليك ماي.. ؟ ناصر: هيه وحده افريقيه الله يهديها دعمتني.. يدوو لو تشوفينها شو لابسه بس.. جلثم: هيه يمي من الصبح ماخليت وحده الا وهزبتها ولا يفهمن لرمستيه .. عنبوهن يايات الحرم وكاشفات ريولهن وشعورهن.. يتحرن اعمارهن فالبيت.. ناصر: ترا مشكلتهم يدخلون الإسلام بس ماشي حد يعلمهم الصح من الغلط.. يتحرون الإسلام بس صلاة وصوم وحج وعمره بس.. جلثم: هيه والله.. انزين امي سير شف اخوانك وين استهميت عليهم ناصر: يدووه الله يهديج تراهم مب يهال.. كل واحد ريال شو طوله وشعرضه.. جلثم: هيييه يا ناصر.. بتستوي ابو وبتحس فيه.. الضنا غالي وبيتم صغير في عيني وان كبر وشيب.. اخاف عليكم من ابسط شي والله تقرب منها ناصر وحب راسها: ربي يطول بعمرج ان شاء الله جلثم وهي تشل عصاها وتضربه: مسود الويه ضيعت علي الوقت وماكملت قرايه ولا انت تقرا.. نش يلا قبل لا اعطيك من الزين.. ناصر وهو يضحك.. على امرج.. ونش وتوه بيروح ياخذ له مصحف شاف فيصل ياي من بعيد.. : ها رمست الأهل.. فيصل ابتسم: الحمد لله.. وينه سلطان؟؟ ناصر: سار يسأل واحد من المشايخ عن حكم شي.. فيصل: هيه.. ويدووه؟؟ ناصر يأشر صوبها وفجأة فجوا ثمهم ويربعون صوبها بسرعه.. ناصر وهو يهز اليده ويحركها .. بس ماشي فايده.. بدت تنزل دموعه غصبن عنه..: توها ترمسني توها.. والله ترمسني.. فيصل حس ان مخه مب قادره يستوعب.. وقف عن التفكير.. قعد يطالع بصمت.. الا سلطان يقرب صوبهم ويشوف الحريم ملتمين فهالمكان والي تصيح وتدعي الرحمن.. وناصر شال جلثم على ايده ويساعده فيصل.. ربع سلطان صوبهم.. سلطان: شو السالفه .. بلاها يدووه؟؟ ناصر بصوت متقطع والدموع مغطيه عيونه: مادريبها.. توني ارمسها وسرت شوي عشان اخذ مصحف وارد عنها الا اصد اشوفها طايحة على الأرض والحريم حواليها.. سلطان: نش نش بسرعه خل نوديها.. وبسرعه بلغوا الشرطه هناك .. ويابو سياره من سيارات الإسعاف المتوفره برع .. وركبوا اليده فالسياره .. ولحقوها.. لأقرب مستشفى .. سلطان ماقدر ايود عمره قعد يصيح.. وفيصل افتر راسه.. مايعرف يهدي نفسه ولا يهديهم هم.. فيصل: يا جماعه الصياح بشو بيفيد.. ادعوا ان الله يقومها بالسلامه بس .. ترحموا عليها.. انقض عليه سلطان: انت اييييه تفاول على يدتي بالموت شو.. فيصل: هدي ياريال.. ياخي الرحمه تنقال للحي والميت.. شفيك انت .. ناصر: اخبركم انتوا وايد متفيجين ترا.. يلا دخلو وصلنا المستشفى.. وبسرعه دخلوا اليده غرفه الإنعاش وقعدوا يتريون الدكاتره برع عشان يطمنونهم.. طلع سلطان المصحف الصغير الي في جيبه وقعد يقرا قرآن.. وناصر راح مسيد المستشفى وقعد يصلي ويدعي.. وفيصل واقف عند باب غرفة الطوارئ وهو يدعي من قلبه.. صح انهم مايعرفونها .. بس يكفي انهم حسوا بإحساس الأم معاها.. كانت تهتم بهم طول هالثلاث ايام الي كانن فيها في مكه ... وشوي يطلع الطبيب.. ربع سلطان صوبه وياه فيصل: ها طمنا دكتور.. الدكتور: والله يا جماعه صابتها سكته خفيفه نتيجة الإرهاق.. وهاي الحاله تصير لكثير من كبار السن الي يجون عندنا فالحرم.. بسبب الزحمه والطواف والتعب .. تصير كثير عنا.. حاطينها تحت العنايه وراح نخليها لمدة 24 ساعه .. فيصل: يعني شو زال الخطر؟ الدكتور: الحمد لله انتوا وصلتوها الوقت المناسب.. وزال الخطر لله الحمد.. وكانت السكته خفيفه.. ما أثرت كثير.. لكن لو كنتوا تأخرتوا كانت بتأثر.. سلطان وهو يتنهد: الحمد لله يارب.. فيصل: بسير ابشر ناصر.. تسلم دكتور وماتقصر الدكتور: افا عليكم انتوا اخوانا وهذا واجبي.. طبطب سلطان على جتف الدكتور: فيك الخير.. الا نقدر ندخل عندها.. الدكتور: تقدرون بس انا افضل ماتدخلون .. لأنها اذا شافتكم راح تتأثر أكيد.. خلوها ترتاح وبعدين.. سلطان: على أمرك دكتور.. ويزاك الله ألف خير.. الدكتور: مأجورة إن شاء الله.. وراح عنهم الدكتور وياهم ناصر.. ناصر: الحمد لله على سلامتها سلطان: الله يسلمك.. ياريال قلبي طاح... هاي امي تدرون يعني شو اميي.. فيصل: وربي الشاهد يا سلطان اني حاس بذات الشي.. ناصر: حتى انا.. سلطان: يالله عيل خل نسير نقعد فالمسيد نصلي وندعي ونقرا قرآن لغايه مايسمحون لنا بشوفتها.. فيصل: يلا سرينا.. وراحوا الثلاثه صوب المسيد الي فالمستشفى وقعدوا فيه.. .. .. .. .. حور: عبيد الله يخليك قول الصدق مانتشر الشريط.. عبيد: يالله عليكم انتوا الحريم اشكثر ترمسون.. وتحرطمون.. ياحرمه قلت لج لا لا لا .. حور: الحمد لله .. وبعدين ليش اتحرج علي.. ماتدري اني حامل واتعب .. عبيد: فدييييتها انا زعلتي.. حور: هيه حتى الياهل الي في بطني يصيح.. عبيد وهو يحط راسه على بطنها: انا اسف بابا ماكان قصدي.. حور وهي تضحك: الله لا يحرمني منك.. عبيد: ولا منج .. شو قالت الدكتوره عن السفر؟ حور: مسموح لي اسافر لأني وقتها بكون في شهري السابع فماشي مشكلة.. عبيد: زين عيل.. لأن بيني وبينج ماكان ودي اضيع الطلعه الجماعيه هاي.. احس اول مره بنتلم.. حور: هيه والله حتى انا نفس الشي.. احس ان زواجنا غير وايد اشيا .. عبيد: واهم شي انج صرتي ملكي.. حور: لا تذكرني كل ماتذكر موقف زواجنا كيف كان اموت من الضحك.. عبيد: .. هيه والله كنت عايش في كابوس وحياتج.. حور: لا مب كابوس.. عبيد وهو يسوي حركه جادة بحياته..: اقول حور شو ها الي على ايدج.. حور تنزل راسها وتتطالع ايدها ويستغل عبيد الموقف ويحب راسها.. لأن دوم حور ماتخليه.. تقوله محشوم من انك تحب راسي انت اكبر عن جي.. حور: سويتها ها.. ماعليه احين صدق صدق زعلانه.. عبيد وهو ينسدح على الفراش ويطالعها: ه عادي المهم سويت الي في خاطري.. حور وهي تضحك له وتنش عنه.. عبيد: وين سايره.. حور: بسير افتح شعري تعبت وانا رافعتنه.. عبيد: هيه احلى عليج.. حور: عيل مابفتحه عبيد: ياربي هالحرمه اشكثر اتحب اتغايضني.. حور: ه عبيد: يعلني ماخلا من هالضحكة يارب .. فالكلية مجد: يختي انا هالإنسانه مادانيها واحين تنحط وياي فالوورك بليسمنت (التدريب العملي الخارجي).. هند: ه .. انا الحمد لله طحت ويا عنود .. احلى من جي ماشي مجد: جب جب .. لا تقهريني .. الله يعيني على ام السعف جواهر.. احس عمري بتضارب وياها طول الوقت.. العنود: انتي ايييه ينيتي.. تبين يحطون لج اف فالتقييم.. مجد: مادري صخي عني.. هند: اقول عنوودوو ماتحلاظين شي.. مجد اليوم نشاطها زايد مجد وهي تشل فايلها وتطلع.. اعوذ بالله حاسدين الميت على موته العنود وهند: نهايه البارت.. توقعاتكم.. أحمد ومجد العلاقة إلى أين؟؟ مجد والتدريب العملي.. شو راح يصير؟؟ جلثم فديتها ياربي.. شو الحال عليها؟؟ فيصل وجاسم وفطوم.. هل راح تكون الأمور مستقره من ناحية جاسم.. ام لازالت الحساسيه موجودة؟ شما.. وينها اختفت.. ماذكرناها.. ؟؟ |
الجزء السابع
الفصل الثاني =-=-=-=-= دش سلطان بهدوء الغرفه عن تنش جلثم وتحس به ويزعجها.. بس شافها واعيه.. سلطان: الحمد لله عالسلامه أميييه (تقرب منها وتوه بيحب راسها جان اتدزه) جلثم: قول الله لا يسلم فيك ولا ضلع ان شاااااء الله.. سلطان وعلامات الإستفهام مب فاهم ليش يدته جي تسوي.. : ويديه .. ليش عاد؟؟ جلثم: فقدت شيفتك قل آمين.. ( يعلني ماشوفك) سلطان: لاحول ولا قوة إلا بالله .. يدوووه إشفيج انا سلطان حفيدج جلثم: اشعنه تشلوني من بقعتي فالحرم واتييبوني هنه.. جان خليتوني اموت .. حد اييه الموت فهالأرض ويرده.. سلطان يته ضحكة يود عمره تقرب منها وقاومها هي تحاول تبعده ولوى عليها: افا يعني هالكثر مليتي من شوفتنا.. لج طولة العمر ان شاء الله.. وترا محد يموت قبل يومه ليش تفاولين على عمرج.. انهون عليج تخلينا نتعذب جلثم: لا والله ماتهونون.. عل العذاب فيه ولا فيكم ياعيالي بس والله مناي اني اموت بهالأرض سلطان: الكل يتمنى هالشي .. بس كل شي بإرادة رب العالمين.. جلثم: والنعم بالله.. الا وينهم اخوانك عنك.. سلطان: برع يتريون اسويلهم درب عشان يدخلون.. جلثم وهي تعدل شيلتها: عطني البرقع البسه.. نش سلطان وياب لها برقعها الي كان محطوط على الدرج الي حذالها لبسته.. وطلع سلطان يزقر ناصر وفيصل عشان يدخلون.. سلطان: تعالو.. ناصر من دخل حس كأنه فعلا هالإنسانه يدته.. كان صدق متضايق على طيحتها.. ربع صوبها وحب راسها: ماتشوفين شر يالغاليه.. جلثم: علني افداك ياربي.. الشر ماييك ياولدي.. فيصل: سلامات يدوو(حب راسها) ماتشوفين شر والله ماتستاهلين.. جلثم: الشر ماييكم.. اخبرك سلطان عن تكون بس خبرت هلك اني فالمستشفى.. سلطان: لا افا عليج امي.. ادريبهم بيحاتون وبيتمون يفكرون .. ماقلت لهم شي.. جلثم: هيه ادريبك ساعات بغام تسوي شي بدون تفكير.. (بغام= لا تفهم) سلطان: الله يسامحج يدو ثرج من اول مادشيت وانتي حاطه علي وانا ساكت وناصر وفيصل من دخلو رحبتيبهم.. جلثم: اندوووكم زعل.. يالتوح خل عنك هالرمسه .. (التوح= الجميل) ناصر: اشعلييييييه مدحوه.. بعد شو تبا اكثر عن جي.. شهادة من اليدة تحطها وسام على صدرك.. ابتسم سلطان.. صدت جلثم صوب فيصل شافته سرحان ويفكر ويطالع من الجامه.. جلثم: ثرها البزيه خذت عقلك يا فيصل.. (البزيه= الدلوعه) انتبه فيصل لجلثم واستحى نزل راسه وابتسم.. ناصر: تراه معرس يديد .. ماوحى له من ملج ويبناه هني بعيد عنها وعن دارها.. جلثم: ايييييييه ثرهم العرب ماخذينك عنا.. وانا حليلي ميهوده هني ولا تفكر فيه.. فيصل: محشومه يدووه.. افا عليج.. جلثم ابتسمت له..: تختال عيني جملة أريامما بين غرس وعاضد الموزوايلا عجيد الريم جدّاملي في الغوى والحسن مفروز (منقول طبعا) صد سلطان صوبها وفج عيونه: أميييييييه من متى وانتي تشعرين جلثم: هييييييييه من ايام المرحوم يدك الله يرحمه.. ومن عقبه ماقمت اعرف اشعر.. ناصر : هييييييه حب الشياب غير بعد جلثم: معلوم حبنا غير يابوي.. عيل شو تحرى شراتكم .. القلب دكان وكل واحد له مكان الكل: ه.. .. .. نشت شما بكل نشاطها لهاليوم لأن من بعد المقابلة الي اجرتها ووافقوا عليها... قالو لها تباشر بالشغل متى مابغت... وهي من الحماس الي فيها ماتريت اليوم الثاني قررت تباشر الشغل..نشت الصبح بكل نشاط تغسلت وتلبست وظهرت من الغرفه.. شافت عمّار اخوها :. صباح الخير.. ماتباني اوصلك؟ عمّار: لا مشكورة اختي.. بسير بتاكسي عن تتأخرين عن دوامج شما: هيه والله متحمسه.. دعواتك ياخوي.. عمّار: ربي يحفظج دوم يارب.. شما: ويحفظك ياخوي.. مر عمار على امه وسلم عليها وظهر من البيت يروح المدرسة.. وشما سارت عند امها خذت لها كوب حليب وشربته وكلت لها شي خفيف وحبت راس امها وطلعت.. وركبت الموتر.. وهي تبا تحرك الموتر تتطالع من الجامه شافت واحد واقف ورا الموتر اعتفس ويا وتعوذت من الشيطان.. لاحول ولا قوة إلا بالله.. اللهم طولك ياروح.. ها شو يايبنه عالصبح .. هاي اشكال تتشاهد اصلا.. نزلت من الموتر وقفت مجابلتنه.. : ممكن اعرف شو تبا ؟ هزاع: ياي اصبح بويهج.. شما وهي رافعه حياتها: نعم.. ماسمعت.. تصبح بويهي.. من متى ماحيدك تحبنا ولا تعبرنا.. هزاع: لازم احبكم عشان اصبح عليكم.. والله ومغتره بعمرج يا بنت الهندية.. شما: شوف ياولد عمي.. لا تييب طاري امي على لسانك لو سمحت هزاع رافع حياته يطالعها من تحت النظاره الشمسية: انزين وبعدين شو بتسوين؟؟ شما: مابسوي شي بس اطلب منك انك ماتطري امي.. مايخصك فيها.. هزاع تقرب منها وكان موايا.. وهذا كله كان في حوي بيت شما طبعا.. لأن من فتحت باب الكاراج وهو كان واقف ورا ودخل الحوي.. كان هزاع فهاللحظة جريب من شما ويحس برجفتها قعد يطالع عيونها ومايدري شو يستوي به.. كان يسرح فيهن بشكل غير طبيعي.. : مشكلتج يوم ان امج هنديه تحملي.. شما: يشرفني اصلها شو ماكان.. يكفي انها يابتني وربتني احسن تربية.. وماخلتني احتاج لكم .. هزاع وهو يضحك بإستهزاء: هنديه تروم تدبر أمورها .. معلوم.. وماقدر يكمل ضحكته الا واتييه صفعه من شما..: قلت لك لا تطري امي .. وراحت ركبت موترها وهزاع واقف مكانه مصدوم.. كأن هالصفعة صحته... ركبت الموتر وتحركت وطلع هزاع من البيت وصكت باب الكاراج بالريموت وراحت.. وركب هزاع موتره وهو بعده على نفس الحاله مصدوم.. تصفعيني يالـ... المشكلة حتى سب ماروم اسبها.. بس انا اراويج بخليج اتيين عندي تترجيني يا بنت الهنديه .. وضرب على سكان الموتر بالقور وهو مغيض.. وحرك الموتر. وصيح ويل فالفريج.. اذى الجيران كلهم سعيد: وذى هالريال.. عنبو لا مذهب ولا أدب ولا أخلاق.. ام سعيد: شو تبابه خله يزول... مأذي الخلق.. ومب مخلي عيال عمه في حالهم الله يعينهم بس.. اركب خل نروح .. سعيد ولد جيران شما.. .. .. وصلت شما الدوام وكانت ربيعتها تترياها... أميره: انتي ايه وينج؟ شما: ليش تأخرت.. أميره: لا مو وايد.. بس وين كنتي؟ شما: يختي ولد عمي الأذيه ياني فالويه أميره: لايكون عرف انج بتشتغلين.. وبيخرب عليج شما: لا مايعرف .. شو يعرفه.. وليش يخرب علي.. ولي امري ولا وصي علي؟؟ الحمد لله كبرت واقدر اشل مسؤوليتي بنفسي.. الوصاية تنازل عنها عمي من زمان.. أميره: يالله الحمد لله.. خل نسير عند المدير عشان يقولج اي قسم حاطينج.. شما: يلا .. تصدقين مرتبكه بس في نفس الوقت متشجعه للشغل ومتحمسة.. أميره: ربي يوفقج صعدت أميره من الدري الكهربائي وتوجهوا صوب مكتب المودير .. وخلال هالمسافه خطفت على عدة مكاتب.. ومعظم الموظفين المتواجدين كانو رياييل.. ابراهيم: اخبرك بوسعود.. منو هاي الي ويا أميره؟ بوسعود: والله علمي علمك.. بس ظني هاي الموظفة اليديدة الي توظفت عنا فالقسم.. ابراهيم: هيه .. الي بتحل مكان عليه .. بوسعود: اظني مب متأكد.. عليه موظفة قدمت استقالتها.. وشما توظفت بدالها.. بوسعود: ابراهيم .. ابراهيموووووو خل عنك هالسوالف وغض البصر عيب عليك.. طفرت عليه لين ما البنت طفرت وطلعت من الدوام.. والدور على بنت الناس.. يوز يا ريال ابراهيم: لاحووووول دومك سيئ الظن فيه.. انا شوي سويت بس اشوف وين سارت.. وبعدين عليه روحها كانت عليها حركات وكل شباب القسم يشهدون بهالشي.. احين موظفة اتييك كل يوم كنها سايره عرس.. والعطر فواح والصوت اعلى منه ماشي.. تتريا الحركة عاد ماتصدق هيه.. بوسعود: ياريال الله يهديها بس انت بعد ماقصرت فيها.. ابراهيم وهو يشغل عمره بالأوراق عشان يتهرب من رمسة بوسعود.. ويغير الموضوع: اخبرك الا معاملة سيف الفلاني.. عندك؟؟ بوسعود يطالعه ويضحك يدريبه يتهرب من الموضوع.. : لا مب عندي.. عند أسامة.. إبراهيم: خلاص بسير اييبه من عنده عيل.. نش ابراهيم من على مكتبه وسار عند اسامه وخذا من عنده الأوراق : ياريال خل عنك هالسوالف.. وتوه بيصد عسب يروح صوب مكتبه حس عمره دعم شي.. أميره يودت شما عن اتطيح يوم دعمت ابراهيم: بسم الله عليج.. (من شافت اميره الي الي دعمها ابراهيم تنهدت لأنها تدري بسوالفه).. برهوم ماتشوف.. بالعادة احيدك تركب عيون ورا غير عيونك .. ابراهيم صد وراه شاف شما تيبس تم يطالعها وهي منزله راسها مستحيه.. فيها جمال غريب هالبنت.. العربي والــ .. اممم مادري بس جمالها حلو.. غير.. : ها شو.. اسف ماشفت.. الا منو الي وياج ماعرفتينا عليها صدت شما وتمت تتطالع بنص عين.. أميره وهي تتنهد: اعرفكم على بعض.. هذا ابراهيم.. وهاي شما.. الي راح تحل مكان عليه.. ابراهيم: توقعت سبحان الله.. يالله عيل بتكون فالمكتب الي عندي انتي سيري كملي شغلج وانا بوصلها مكتبها.. اسامه تم يطالع ابراهيم ويقول في خاطره.. والله انك مو سهل يا ابراهيم.. لك بتعرف كيف تدبر أمورك يازلمه.. وينك يا نور لك انا بتمنى شوفك بس مابقدر.. (الأخ سوري ) اميره تتطالعه بعصبيه: مايحتاي.. تعالي شما.. ومشت شما ورا اميره وابراهيم يلس عالكرسي الي عند اسامه: شفت شو سوت.. انا اقول هاي الي اسمها اميره ماحبها.. اسامه: ياخي انت الي بديت وتحمل.. كل باب الو جواب.. ابراهيم يطالعه بنقمه: سير انت الثاني بعد.. بس بذمتك مو حلوة.. اسامه: بتعرفني مابتكلم في اعراض الناس ابراهيم: هذا الي بيجلطني وانا شو قلت.. خلفان: ياريال خلك منه هاي نور مسويه له ازمه.. ابراهيم وهو مهتم: منو نور .. حلوة.. اتداوم عنا؟؟ في اي قسم؟؟ اسامه بدأ يعصب شوي: يا زلمه حل عنا ياااااااه.. شو هاد.. وانت شو دخلك تعرف من نور.. ابراهيم: الشر مب عليك.. علي انا الي معطنك ويه.. اسامه: روح كمل شغلك ياه.. مشى عنه ابراهيم وتم يطالع اميره وهي واقفه عند شما وتشرح لها .. يترياها تروح عشان يروح لمكتبه.. الأخ يباله يخلا له الجو.. .. |
أميره: شوفي شموو.. لا تعطينه ويه ها ماينعطى ويه.. من يشوف بنت يختبص حاله فوق تحت..
شما: لا ماعليج خويتج تروم اتدبر أمورها.. أميره: ادريبج.. يالله عيل شرحت لج شو تسوين وشو شغلتج.. وعند اي سؤال .. للأسف بتنجبرين تسألين ابراهيم لأنه بنفس شغلتج بس طبعا للكستمر الرياييل شما: مب مشكلة لا تحاتين .. وراحت اميره وهي تتطالع شما وتبتسم لها .. غمزت لها وسارت.. وابراهيم ماصدق بسرعه راح صوب شما.. ويلس على مكتبه الي حذال شما بينهم بس حاجز زجاجي عشان يفصل بينهم..وكان الحاجز هذا على طول الطاوله الخاصه فيهم.. يعني تقدر تشوفه ويشوفها لو خوزو الكرسي على ورا شوي.. تعمد ابراهيم يمشي من صوبها عشان يوصل لمكتبه.. ويلس وحرك كرسيه على ورا عشان يكون مجابلها.. : ماتبين اساعدج بما انج يديده؟ شما وهي منهمكه فالأوراق الي يدامها.. : لا شكرا اميره شرحت لي.. ابراهيم: بس اميره ماتعرف كثري .. انا صار لي 3 سنين ونص اداوم فهالقسم فأعرف الشغل عدل.. صدت شما وتعطيه ابتسامه عبيطه..: مشكور.. اذا احتجت شي بسألك ابراهيم: الا شما شو من شهايد عندج.. شما: دبلوم عالي .. ابراهيم: هيه وين درستي شما: التقنية.. ابراهيم: معظم خريجات التقنية يداومن عندنا.. شما: هيه ادري.. ابراهيم: عندج حد من رباعتج هني.. شما: اميره ربيعتي.. ابراهيم: بل.. رئيسة قسمنا عاد.. شما: اخوي انت تداوم هني من قبلي صح.. يعني اكيد عندك شغلات تخلصها للمراجعين.. ابراهيم وي انصبغ من الفشلة ورد لمكتبه بهدوء.. قوية هالبنت الظاهر بياخذ مني وقت.. وحس بهمس وراه صد شاف بوسعود: خرعتني ياريال شو عندك.. بوسعود: مبين عن البنت رزينه لاتلعوزها ابراهيم: انتوا منو مشيشنكم علي.. ولا شكلها امي داعيه علي.. ياريال مالعوزتها .. بس عرضت عليها مساعدتي بوسعود: شوف انا قبل لا اكون زميل عمل ترا انا ربيعك واعرفك عدل.. حياتك وموتك بنات وطاريهن.. ضحك ابراهيم وسكت وتم يعابل بالأوراق بوسعود: هذا انت من تسمع الصدق تقفط وتتهرب. .. وبدت شما تتأقلم وتحاول كثر ماتقدر تتعلم الشغل بروحها عشان ماتلجأ لإبراهيم.. وكانت شغلتها بسيطه وهي ذكية تتعلم بسرعه.. .. .. .. .. .. .. . دخل المكتب وحالته يرثى لها.. وتعبان من خاطره .. فيه ضيجة الدنيا كلها.. حط الورقه على مكتب المدير... ورفع راسه المدير يطالعه مستغرب اول مره مايبتسم هالريال.. المدير: دكتور محمد شفيك.. الدكتور: ياحضرة المدير دخيلك لا ترفض لي الإجازة.. صدق متضايق ومنسدة الدنيا فويهي .. محتاج لإجازة. المدير: خير شو صاير قولي؟؟ حد ضايقك فالمستشفى.. الدكتور: لا والله.. عندي سالفه فالبيت ابا احلها.. المدير: الله يعينك ان شاء الله.. بس كم يوم.. الدكتور: خلها اسبوعين المدير: اسبوعين وايد دكتور محمد.. الدكتور: دخيلك هذا اذا ماكان شوي.. المدير: الله يعينك .. خلاص وهاي الإجازة وقعت عليها وطمنا عليك .. الدكتور: تسلم ماتقصر.. مع السلامه المدير وهي ينزل راسه ويهزه: مع السلامه.. وتنهد.. الله يعينك.. طلع الدكتور وهو حاس بضيجة غير طبيعيه.. رن تليفونه ..كان عبيد الي متصل فيه.. رد وهو صدق حاس انه محتاج شخص ثقة يرمسه..: هلا والله بوفهد عبيد: ياريال اسمي بومنصور كم مره اقول لك.. الدكتور (محمد): شدراني عنك كل يوم لك راي.. وتعودنا على بوفهد.. عبيد: لا خلاص تعود على بومنصور.. محمد: ماعلينا كله واحد.. اشحالك؟ عبيد: بخير عساك بخير.. محمد: وين اشوف الخير .. ياخي من يوم ماتوفت يدتي الله يرحمها وانا مب مترقع.. عبيد: خير ان شاء الله شو مستوي.. محمد: الدنيا تغيرت يا عبيد.. الدنيا تخوف عبيد: ياخي فهمني شو صاير خليتني استهم.. محمد: متضايق ياخوي.. عبيد: اخبرك انت وين؟ محمد: ليش؟؟ عبيد: بييك .. محمد: توني طالع من الدوام ماخذ اجازة.. عبيد: خلاص عيل خلك فالكوفي الي دوم نيلس فيه وانا ياينك احين.. محمد: ياريال انت فالدوام عبيد: باخذ اذن ماعليك.. ياينك يلا خل عنك هالسوالف.. مع السلامه محمد: مع السلامه (بند عن عبيد) والله فيه الخير من بين كل ربعي هالإنسان غير.. بقوله مشكلتي يمكن يلقى لي حل.. راح عبيد صوب حور عشان يخبرها انه بيظهر كانت الساعه وقتها 10.. حور: وين بتسير؟ عبيد: واحد من ربعي طالع من الدوام ومتضايق مادري شبلاه.. الدكتور جان تذكرينه حور: هيييييه.. زين تسوي روح له.. عبيد: يلا عيل برجع ان شاء الله نهاية الدوام امر عليج.. (يتصدد وراه اذا في حد وبصوت واطي ) احبج حور ابتسمت له: روح ربي يحفظك.. وطلع عبيد وسار خذ الإذن من عند المدير وخلال ربع ساعه وصل الكوفي.. عبيد: ها بوجاسم تأخرت عليك؟ محمد صد صوبه يضحك من وراه خاطره: لا ياريال ماتأخرت.. بس والله طالع من دوامك .. قاطعه عبيد: ياريال خل عنك هالرمسه وقولي انطق شو فيك.. سكت محمد وتنهد عشان يبدأ يقول الموضوع .. صعب عليه يرمس عن هالموضوع الحساس بالنسبة له.. : اسمعني وانت احكم لو مكاني شو بتسوي.. انا خاطب وحده وعساس بعد ماتخلص هالسنه نملج.. هيه عمرها 23 بس متأخرة فالدراسه واحين تكمل باقي لها سنة ونص تقريبا.. المهم البنت اختي تعرف اهلها اكثر منها.. اختي تيلس ويا اختها الي اصغر وهاي ساعات تيلس وياهم فعيبتها بنت طيبه وزينه وماشافت عليها اي شي.. وقالت لي اخطبها وراوتني صورتها ووافقت (رن تليفونه حطه على الصامت وجلب التليفون) عبيد: رد بلاك محمد: مابا.. المهم.. ورمسنا اهل البنت ووافقوا وكل شي وحددوا يوم الملجة.. المهم انا طلبت من اختي اني ابا ايلس ويا البنت لو ساعه بس اشوفها اذا موافقه ومقتنعه فيه.. يوم الجمعه طلعت ويا اختي والبنت واختها سرنا مطعم تعشينا ويلست وياها .. والأمور كانت تمام وكل شي.. رديت البيت صليت استخاره ياريال من عقبها وانا احس بضيج فضيع في صدري ماعرفت سببه.. لغايه ماصار الي صار يدام عيني عبيد كان مندمج ويسمعه ..: شو الي صار.. ليش سكت.. محمد تنهد: امس دق لي واحد من الربع قالي موتره خربان ويبا حد يوصله مكان دوامه (واحد يداوم فالأمن ومكان دوامه عباره عن بنايه ومافي عليها اي علامه اتدل ان هذا هو أمن الدوله) وعاد انت تدري الأمن وين يداومون.. المهم سرت اوصله وكان شي على بعد بنايتين كافتريا قلت باخذ لي عصير اشربه وانا ساير الدوام .. وعاد سلمك الله كان مسكر وانا تدريبي اذا شي في راسي لازم اسويه.. سرت صوب الكافتريا الي على درب المستشفى.. وقفت اتريا طلبيتي انتبه للسياره الي حذالي تركبها وحده متغشيه وقبل لا تركب الله راد وغشوتها طارت من على ويا وانا ماكان قصدي اطالع الا كنت صاد ذاك الصوب.. اشوف لك البنت الي كنت ناوي املج عليها .. انصدمت يا عبيد . اشوف الريال لا هو اخوها ولا حد من اهلها مارمت ايود عمري نزلت من الموتر وفتحت باب الموتر عليها لأن السايق نزل سار اييب شي من البنايه الي طلع منها ومن شافتني البنت تصنمت.. قلت لها شو تسوين هني سكتت واسألها عن الي وياها صاخة ولا ترد.. عبيد طلع الريال لا هو من اهلها ولا شي.. و من وقتها احس راسي بينفجر وتوه يوم رن تليفوني تراه هيه الي متصله.. اثق في منو قولي.. يوم ان البنت معروفه بين الي تعرفهم بأخلاقها واخرتها اشوفها طالعه من شقة واحد غريب .. يعني طول الليل كانت عنده فهمني شو معناته ان حرمه تكون عند ريال غريب طول الليل. سكت عبيد ونزل راسه تم يطالع كوب الكابتشينو الي يدامه مب عارف شو يقول لمحمد.. فعلا الموقف صعب.. انسانه كان بيرتبط فيها بس طلعت جيه.. صعب جدا.. : الله يستر بس من هالزمان.. ياريال ربك كشفها قبل لا ترتبط فيها زين سويت يوم استخرت.. محمد: ماعلي من هذا كله احين شو اسوي.. انا مابا افضح سر البنت الله يستر عليها وعلى اهلها.. بس كيف ارجع في كلمتي واطلع انا الغلطان عبيد: ياريال انت انسان لك حق وكلم البنت قولها خل تقول لأهلها انها هيه الي ماتباك وخلاص ينتهي كل شي وقول لإختك تبعد عن اختها يوم الكبيره طلعت جي.. محمد: هيه والله عفان الله.. تهقى هذا الحل.. عبيد:هيه واذا حاولت البنت تماطل وياك تدريبهن البنات كيف.. قولها اي كلمة ثانيه بتقول لأهلها وهي بتجبر تسوي الي انت تباه وخلاص دور لك بنت الحلال الثانيه هاي الله يحبك فكك منها محمد: شو اعرس.. لا لا لا دخيلك.. يوم خطبت اول مره اهلها ردوني (فهم عبيد انه يطري مجد) وهاي الثانيه.. شكله الله مب رايد اعرس عبيد: وليش ماتقول الله رايد لك الأحسن.. عسى ان تكرهوا شيئا وهو خير لكم محمد: والنعم بالله بس تخيل موقفي .. فقدت ثقتي بالبنات يا عبيد والله ماقدر اوثق في اي وحده يوم هاي سمعتها زينه وتطلع هاي سواتها شو تم عبيد: تباني ارمس لك الحرمه تدور لك وحده.. اختك بنت صغيره جاهله ماتقدر تعرف طينة الناس.. خلني اقول للحرمه تدور لك محمد نزل راسه: ياعبيد انا مابا اعرس حاليا شال الفكرة من بالي.. عبيد: خل عنك هالرمسه ياخوي انت مب ياهل .. لاتنسى ان عمرك 26.. ياخي ابا عيالي يتربون ويا عيالك.. وخل عنك .. انت امك الله يرحمها ويدتك متوفيه .. وماعندك حد غير اختك واخوك .. وانا اخوك افا عليك بس.. بخلي امي ولا الحرمه يدورن لك وبلاها هالرمسه الي ماحبها .. ابتسم محمد حس بتفائل شوي: والله ماتدري اشكثر ارتحت.. تدري كنت افكر اخذ البنت واستر عليها عبيد: ياريال اشلك بالمصايب.. البنت الي تقريبا صارت على ذمتك دامك خاطبنها ماحشمتك هذا وانت يالس وياها يعني عرفت انك جاد.. كيف تباها تفتح بيت واتديره.. محمد: هيه والله.. ورن تليفونه مره ثانيه ورد عليها وماعطاها مجال ترمس.. : سمعي يا بنت الناس.. انتي فدرب وانا فدرب.. لا انتي من ثوبي ولا انا من ثوبج.. والي شفته يسدني اني اعرف عنج الي يكفيني... واليوم ترمسين هلج تقولين لهم ماتبيني مابا اطلع انا الغلطان .. ولا ترا والله اعلم هلج.. خليني ساتر عليج .. واختج ماترمس اختيه فاهمه.. يلعن هالأشكال.. وبند الخط في ويا.. ونزل راسه حاس بهم على قلبه تذكر مجد لحظتها.. ربي يوفقج ويرزقج بولد الحلال الي يقدرج... طبطب عبيد على جتفه: ياريال ماتستاهل انك تزعل عمرك عشانها واحمد الله ان مافات الفوت ولا صار ملجة.. وبس خطوبة.. وعادي ياما ناس خطبو وفسخوا.. هز راسه محمد وهدا شوي.. ونشوا سوا تم يتمشون شوي.. عبيد: ياريال انا اليوم بعتمد على ذوقك محمد: عبيد صدقني بتكرهك الحرمه انا موول ماعرف فهالسوالف.. عبيد: خل عنك يالله عاد.. نسيت يوم كنا في استراليا ماخليت شي ماخذته لإختك وكل الأشيا كانت غاويه.. محمد: ه ماتنسى شي.. عبيد: يالله خل ندخل. دخلوا سوا عند داماس وتم يطالع محمد فالأطقم.. هو طبعه يحب الديزانات الكلاسيكيه البسيطة.. وشاف طقم بسيط وحلو.. : شو رايك في ها.. صد عبيد صوب الطقم وفج عيونه: ايا اللوتي وتقول ماعرف.. وماسوا سالفه على طول طلب الطقم وخذاه.. كان رووووعه بالفعل.. .. . . __________________ |
..
محمد: مبين عليك وايد تحب مرتك.. عبيد: هيه والله يا محمد.. الحمد لله الله عطاني على قد نيتي وخذت الإنسانه الي كنت اتمناها.. يوم اقولك عسى ان تكرهوا شيئا وهو خير لكم.. تحيد حالتي وانا متضايج بسبب هالزواج الغريب... لكن شوف الصدف الإنسانه الي حبيتها طلعت بنت عمي الي مادريت عنها الا يوم عرسي.. محمد ابتسم له: تستاهل يابوفهد.. عبيد وهو عاقد حياته: انا شوقلت لك.. بومنصووور ياخي افهم.. محمد: اوه اسمحلنا نسينا ياخي لا تلومنا.. عبيد: ه.. رن تليفون محمد فهالوقت وكانت الساعه 1:00 الظهر.. عبيد: خل نسير نصلي فالمسيد قبل لا تفوتنا الصلاة وخلاف بسير ارد الحرمة من الدوام.. محمد يأشر له اوكي ويرد على التليفون كانت اخته دانه.. دانه: محمد.. شو هالخبر الي اسمعه.. صدق.. معقولة؟ محمد: لحظة لحظة شو السالفه؟؟ اي خبر؟ دانه: توها متصلة فيه جواهر وتقولي انها ماتباك صدق هالكلام؟ محمد: هيه تفاهمت وياي اليوم وقالت لي.. وانا ريال ماجبر البنت علي.. برايها الله يوفقها دانه: بس كانت وايد تمدحك عقب ماشفتوا بعض ورمستوا بعض.. محمد: يابنت الحلال يمكن غيرت رايها تصير.. دانه: اي تصير يا محمد.. شو هالرمسه اقولك البنت كانت تمدح فيك تعرف يعني شو تمدح فيك محمد: سمعيني.. البنت ماتباني شفيج.. خلاص كيفها.. دانه: لاحول ولا قوة الا بالله.. حتى توها امها رمستني قالت لي يابنتي ماشي نصيب بنتي من الصبح تصيح وتقول ماتبا اخوج وتعتذر وحالتها حاله.. محمد: الله يوفقها.. وسمعيني تنسين علاقتج بإختها دانه: شووووو.. احين البنت ماتباك شو ذنبها لطووف اودرها؟؟ محمد: دانه سمعي كلامي وبس لا تناقشين قلت لج هالبنت ماتماشينها ولا ترمسينها خلاص.. الي مايبانا مره مانباه ألف.. واذا نفس اخوج رخيصه عندج رمسيها وفضليها علي.. دانه: محشوم.. تعرف ان مالي غيرك فالدنيا من بعد وفاة امي ويدتي.. محمد: الله يطول بعمر ابويه بعده عايش لنا.. دانه: امين يارب.. خلاص عيل ترد البيت بنتفاهم محمد: هاي الي يبيلها ضرب شو نتفاهم عليه انتهى كل شي.. دانه: اوكي اوكي.. المهم الغدا بيجهز تأخرت باكل عنك محمد: ترومين انتي بس .. دانه: انا وابوي وحمد يوعانين مافينا نتريا وايد.. محمد: انزين انزين حشرتينا.. ياي فالدرب.. وبند سار المسيد يلحق على عبيد عشان يصلي الا عبيد كان مخلص صلاته.. عبيد: تو الناس.. محمد: شو اسوي اختيه وصل لها خبر الخطيبه ومحتشره.. عبيد: الله يعينك المهم انا بسير عن اتأخر على الحرمة.. وين الجيس.. محمد يمد له بإيده الجيس: .. يالله مع السلامه واسمحلنا عطلناك عبيد: لا افا عليك من زمان ماقعدنا هالقعدة ولا تحوطنا.. استانست بالعكس.. محمد: تسلم والله فيك الخير.. ونعم الأخو والله.. وسار عنه عبيد عشان يمر على حور ويردها البيت.. من وصل الوزاره نزلت له حور وركبت الموتر.. حور: السلام عليكم .. عبيد: وعليكم السلام.. اشحالج حبي؟ حور: بخير دامك بخير.. عبيد وهو يحط ايده على بطنها: والبيبي.؟ حور: بخير فديتك.. صدت تحت عند ريولها شافت كيس داماس.. شو ها عبيد؟ عبيد يبا يسوي فيها مقلب.. ويسوي عمره مرتبك: ها.. لا هذا مال.. مال ربيعي.. وشله بسرعه وفره ورا.. تمت تتطالعه حور بنص عين وهي عاقدة حياتها ..: انزين ليش تقولها بهالطريقة جنك خايف من شي.. عبيد: ها.. خايف.. من شو يعني بخاف مثلا.. حور: متأكد.. انزين خلني اشوف لأن البكس مب مغلف.. عبيد: عيب الريال ناسيه فموتري تبين تشوفينه عيب عليج .. حور وهي معنده: مايخصني ابا اشوف.. وعبيد مامنعها شلت الجيس وطلعت البكس .. البكس لونه اسود مغطى بالمخمل الأسود من الداخل.. لازم تشيل القطعه المخمل عشان تشوف تحته الطقم.. وكان فوق هالقطعه بطاقة من شافتها حور تمت تتطالع عبيد من طرف عينها اذا هو يطالعها بس عبيد تعمد يسوي عمره مايطالعها وقف شيشة بترول وتعمد انه ينزل على اساس انه بيشتري شي.. وهي استغلت الفرصة.. .. وفتحت البطاقة بسرعه عشان تقرا إلي فيها.. ومن فتحته قرت الكلام الي فيه فجت عيونها متفاجئة وتصد صوب الماركت الي فالشيشه وهي تشوف عبيد والدموع ماليه عيونها.. وهو يبتسم للريال الي يشتغل داخل ويعطيه بيزات .. .. طلع عبيد وهو يضحك في خاطره يتخيل موقف حور .. ركب الموتر وصد صوبها شافها منزله راسها وهي تتطالع البطاقة وتنزل دمعه منها على البطاقة وشافها.. مسك ويا وصده صوبه: ليش هالدموع حبي.. حور: ندمانه.. عبيد فج عيونه مصدوم.. لا يكون مافهمت ان البطاقة لها وطلعت غبيه؟؟ : ندمااااانه!!!.. على شو؟؟ حور: اني في لحظة حسيت بالغيره وشكيت فيك.. حب عبيد ايده وحطه على خدها.. فديتها انا الي تصيح.. : انا كنت ابا هالشي اصلا.. شوية تغيير لازم كله حب مايستوي.. حور ضحكت غصبن عنها.. وصدت صوبه وبعيون محمره وكلها حب..: والله اني احبك.. والله.. ومشكور الطقم واااااااااااايد روعه عبيد: تعرفين متى بيستوي روعه؟ حور: متى؟ عبيد: يوم تلبسه أحلى وردة بهالكون.. والي هي انتي.. نزلت راسها وردت البكس فالجيس ويا البطاقة.. .. .. .. . لطيفه: مجـــــــــــــــــــد.. مجووووووود مجد كانت فغرفتها فوق وماتسمع صوت امها.. عبدالعزيز: شفيج ياحرمة تزعقين.. صوتج وصل عند الييران لطيفه: بنتك ماتيي بحط الغدا عبدالعزيز: يحليلها اميه كانت دوم تزقرها .. لطيفه: هيه والله محد يروم عليها غير أميه عبدالعزيز: بسير ازقرها.. صعد عبدالعزيز فوق وسار صوب غرفه مجد.. وكانت ترمس فالتليفون.. : يا هند افهميني ماتحمل هالبنت.. هند: انزين انتي طنشيها مجد: الله يستر ولو اني مب مرتاحة.. هند: متى بتبدين.. مجد: ورا باجر.. ترا باجر اليوم المفتوح للكلية.. ان شاء الله.. هند: هيه ويانا يعني.. وفهاللحظة دق ابوها الباب.. : مجد حبيبتي مجد : اقول هندوو اخليج احين اهلي يبوني هند: خلاص اوكي. باي.. مجد: مع السلامه .. شو باي بعد.. هند: ه ان شاء الله يدوو.. وبندت الخط وفتحت الباب لأبوها وحبت راسه..: فديتك ابويه ياي لهني ومتعني جان قلت لي بنزل لك.. عبدالعزيز: ليش ياي لغريب.. انتي بنتي قطعه مني.. ماعلي من هذا كله.. نزلي غدا.. امج من متى وهي تزقرج.. مجد: والله ماسمعتها.. عبدالعزيز: تراج تهذربين فالتليفون لازم مابتسمعينها.. مجد: اقول انا بعد.. وطلع ابوها قبلها .. وهي سارت صوب المنظرة ترتب كشتها .. ااقصد شعرها.. وتوها بتظهر سمعت صوت المسج .. راحت تشوف المسج.. كان أحمد مطرشه لها ليتك تمر اليوم عنديواحاكيــكـواقولك من كثر شوقيعلومــيحتى القمر لو تطلبه قاللبيــــكـيخضع وتخضع من وراهالنجومــيماسرق قلبي غير حبكوطاريـــكـاشتاق لك حتى وانا فيحلومــي .. عاد مجد مايحتاي استانست من المسج وايد.. ردت عليه بمسج (( اليوم بنيي بيتكم )) .. استانس احمد من الخاطر يوم قرا المسج.. واتصل في ربيعه الي كان متفق يروح وياه السينما.. أحمد: اخبرك بوعابد.. اسمح لي عاد اليوم ماروم اخاويك.. بوعابد: خير ان شاء الله شو المانع؟ أحمد: ماشي شوي الأهل يبوني فشغلة ضروريه .. فماقدر.. بوعابد: ماعليك.. السينما موجودة مابطير.. خلاص نأجلها ليوم ثاني.. أحمد: اسمحلنا ياخوي عاد بوعابد: افا عليك بس.. .. نزل احمد من غرفته وسار عند امه.. يحاول يسحب منها الرمسه ويتأكد من الخبر.. أحمد: حد بيينا اليوم؟ ميثا: ليش اميييه هالسؤال؟ أحمد: ماشي بس اسأل.. اشوفج تعابلين فالمطبخ.. ميثا: هيه عمك ومرت عمك بيونا.. أحمد: هيه حياهم الله.. زين انا ساير حجرتي شي تامريني.. ميثا: سلامتك اميه بس لا وصل عمك انزل.. أحمد: اكيد ان شاء الله.. وصعد احمد غرفته وهو مستانس حده.. وتم يرتب لحيته بنفسه ويكشخ تقول معرس..ماصدق صفا له الجو ويا مجد شوي.. ورن تليفونه فهالوقت كان جاسم متصل فيه.. جاسم: اشحالك بوشهاب؟ أحمد: بخير يعلك بخير.. شو هالإتصال الغريب... جاسم: ياخي جي تستقبل ضيوفك.. انف عليك.. صار لي ربع ساعه وانا فبيتكم ولا تنزل تسلم علي.. أحمد: صدق.. والله ياريال محد قالي.. جاسم: يالله اندوك عرفت احين.. أحمد: خلاص نازل احين ان شاء الله.. بند عن جاسم وتم يطالع عمره فالمنظرة.. تذكر مجد.. ليش ماخطبها وتصير خطيبتي رسمي.. بس انا بعدني ادرس.. مابا اكون صغير في عينها.. وهي دامها تباني بتصبر اكيد.. لا لا مابستعيل تو الناس علي.. الا هاي اخر سنه بخلصها وبشتغل وقتها بخطبها.. وبسرعه شل تليفونه وتعطر وظهر من الغرفه ونزل الميلس.. كان ريل عمته شيخه موجود وجاسم.. وسلم عليهم.. وخلاف سار الصاله عشان يسلم على عمته لأنه من نزل شاف حريم مادقق منو الي موجود استحى وطلع على طول.. احمد: السلام عليج عموو.. شيخه: خوز عني .. مسود الويه تخطف من يدامنا ولا تسلم.. أحمد: حقج علي عموو والله ماكنت منتبه منو بالضبط خفت لا يكونن الحريم الي يعرفن امي .. شيخه: عنلاتك ماروم ازعل عليك.. اشحالك؟؟ أحمد: بخير يسرج حالي عمتيه.. اشحالج عموو ام جاسم.. ام جاسم: بخير يعلك بخير.. أحمد: تسلمين.. ها العروس اشحالج.. ؟؟ ( يقصد خلود) .. خلود: انا عروس؟.. بعده يدامي شهرين.. أحمد: بتغدين عروس تراج.. حور: احم احم... نسيتني .. أحمد: اوه مرت اخوي هني اسمحي لي مانتبهت.. حور: معلوم ابويه مابتشوفنا خلاص صرنا مال اول.. أحمد: افا .. افا والله افا.. انتي نور المكان كله كيف ماشوفج.. ميثا وهي تضربه على جتفه: استح عويهك تغازل الحريم .. يالله سر عند الرياييل وخل عنك الرمسه الماصخه هاي.. |
الكل ضحك على احمد ومشى صوب الباب واول مافتحه الا مجد بوي نزلت راسها.. وهو تم مبهت يطالعها.. يعلني افدا هالويه لا خليت منه يارب.. احبج يابنت الناس..
لطيفه: يعني مابتخلينا نخطف ولا شو؟؟ ميثا: ادخلي ام حور ادخلي.. هالولد مادري بلاه من الصبح وهو حالته مب طبيعيه.. لطيفه: هاييل هم شباب هالأيام.. أحمد: اشحالج عموو؟؟ لطيفه: بخير ربي يعافيك.. أحمد: ماعليه زعلان منكم ماتحبوني ادري.. من اول مادخلت عليكم وقابضيني بشراع وميداف.. مجد: من شطانتك اكيد.. أحمد من سمع صوتها تم يدور على مصدر الصوت ويطالعها بإبتسامه: مب اقل عن بعض الناس.. لطيفه: هيه والله مطلعتلي قرون هالبنت.. أحمد وهو طالع: ويييييييو حطو عليها.. يالله استلموها بدالي انا بروح.. وطلع قبل لا يسمع تعليق اي احد.. والكل تم يضحك.. ومجد صح تغضيت بس ماتقدر تنكر انها تحبه.. وسارت قعدت عند خلود.. : انتي جب.. ماترمسين.. خلود فاجة عيونها تتطالعها: انا نطقت اصلا عشان تقولين هالرمسه.. ولا لا يكون ترمسين السكنيين الي وياج.. مجد: هي هي هي.. سخيفه.. ماحبج.. اتصل فيج ماتردين ويا هالويه.. خلود وهي تتدلع: ارمس ريلي مب فاضيه .. مجد وهي تسوي لها حركة بإيدها: مالت عليج مصدقة عمرج.. خلود: الا تعالي.. (تيودها من اذنها ومجد تتعور وتصكر عين من العوار).. شو هالنظرات الي بينج وبين احمدوو؟؟ شو صاير.. مجد وهي تضحك .. : طاعوو هاي الشيطانه تدقق مايفوتها شي.. خلود: لا فديتج مايفوتني لأني اعرف نظراتج قبل كيف واحين كيف.. فرق 180 درجة.. مجد قعدت تقول لها سالفة المكالمة .. واستانست خلود لها من الخاطر.. وطلعوا تموا يتمشون فالحوي ويسولفون.. ومن عقب دخلو بيت حور قعدوا يطالعون الصاله وجي عشان ياخذون راحتهم فالرمسه والسوالف.. وشافت مزهريه محطوط فيها ورود طبيعيه.. سارت صوبهم.. ويودت ليها وردة تحاول اتطلعها من المزهرية . .. .وطلعت الوردة.. خلود: انتي ايه جنج ماشايفه ورد في حياتج شو تبين فيها الوردة.. مجد وهي تتطالع الورده وتحايس بثمها: بعطيها عرب .. خلود وهي تهز راسها: هيييييييييييه احين عرفت.. وكيف بتعطينهم ان شاء الله.. مجد: انتي بتساعديني طبعا.. خلود: وكيف ان شاء الله لاتقولين ازقره واعطيه اقوله هاي من طرف مجد.. شرات مرسول الغرام مجد: لا لا افا عليج مب لهالدرجة.. خلود: ها عيل لأي درجة؟؟ مجد وهي تضحك وتتطالعها: جاسم.. خلود: نعــــــــــــــم.. شو قلتي .. عيدي ماسمعت.. مجد: جاسم ريلج.. خلود: لا لا لادخيلج مايحب هالسوالف .. تبينه يحرج علي.. لا دخيلج.. سيري روحج وعطيه مجد: اففففففف بنت عمه مامنها فايدة.. خلود: وانتي بنت خال ماوراج الا المشاكل.. مجد: دبه.. خلود: دبه انتي.. مجد: انتي.. خلود: قلت انتي وجب.. مجد: ان شاء الله .. ويلست تفكر وتفكر.. لغايه ماقررت انها تغامر وتحطها فغرفته.. خشت الوردة في مخباتها.. ودخلت البيت وشافت الكل يالس فالصالة ومنشغل فالسوالف.. صعدت الدري بروحها لأن خلود ماطاعت تروح وياها.. وتمت تتطالع الحجر.. شافت وايد بيبان.. احتارت ايهن غرفة أحمد.. شافت ممر يوصل لغرفة.. قررت تروح له.. ومشت وفتحت الباب شوي شوي.. وشافت صورة كبيره معلقة على اليدار لأحمد.. وكتب واغراض على المكتب واللابتوب.. عرفت انها غرفته.. سبحان الله قلبي دليلي دليت غرفته بالضبط.. ومشت صوب المكتب وطلعت الوردة وحطتها له.. وتمت تتطالع خطه واوراقه.. حليله الله يعينه.. وشافت تليفونه.. فهاللحظة الشيطان لعب براسها.. وماشي تبا تشوف التليفون.. ويلست على كرسي المكتب وناسيه ان في أي لحظة احمد ممكن يدخل.. وفتحت صفحة المسجات وقعدت تقرا وتشوف كلهن مسجات شبابيه نكت.. على سوالف.. على رمسة هن كاتبينها.. وتمت تتطالع الأرقام.. وكلهن ارقام مسجلة بأسامي رياييل.. ودورت على رقمها لقته مخزن بإسم.. عديل الروح.. ابتسمت وهي تقرا الإسم الي مخزن رقمها به.. وعقب دشت على الإستديو تشوف الصور.. شافت صورة فجت عيونها.. واحمرت من العصبية.. وغيضت من الخاطر.. وشوي الا تسمع صوت باب وراها ينفتح (باب الحمام اكرمكم الله) من الزيغه طاح التليفون من ايدها.. وصدت وراها شافت احمد الي تم مبهت .. معقوله هاي هيه ولا انا يتراوالي (يتهيأ لي).. : شو تسوين هني.. مجد رفعت حياتها وتتطالعه بغيض: ممكن اعرف متى مصورني هالصورة؟؟ احمد كان معصب كيف تدخل غرفته وتفتش فتليفونه بصفتها منو؟؟ لو بنت عمه.. لو يحبها بس بعد مالها حق.. : اولا مالج حق تمسكين تليفوني .. بصفتج منو ؟؟ تمت مجد فاجة عيونها مستغربه من اسلوبه: وانت بأي حق تصورني وانا ماعرف.. أحمد: عاد منو قالج انا مصورنج انتي.. كنت اصور علوو ولد عمو شيخه وانتي كنتي وراه ويوم وقفت الصورة كنتي مسويه هالحركة بويهج.. مجد وهي رافعه حياتها: يعني مدقق فالصورة بعد.. أحمد يود التليفون وسحبه من ايدها: تبين التليفون ماعندي مانع اعطيج اياه بس استئذني.. لكن هاي الحركة ماحبها.. مجد عرفت انها غلطانه فعلا مالي حق انا اشلي اصلا داشه احط الوردة بعد شو هالحركة البايخة.. : انا اسفه بس ياني فضول.. سامحني ممكن أحمد يطالعها ووده يضحك: مسموحه.. وطلعت مجد على طول دون لا تنطق.. سخيف .. بس احبه..بندت الباب وراها.. أحمد صد صوب الطاوله ولاحظ الوردة.. عرف ان من صوبها استانس وايد.. بسرعه ياب كوب وعباه ماي وحط الوردة فيه.. وصور الوردة وطرشها لمجد وكتب تحتها (( عشان ماتذبل الوردة )) استانست وااااااايد مجد من شافت الصورة.. ربي لا يحرمني منك .. .. أم جواهر: أميه انتي مقتنعه من الرمسة الي تقولينها؟؟ جواهر وهي حاسه بغصه: هيه مقتنعه امييه.. مارتحت له ماباه .. لا تغصبوني دخيلكم أم جواهر: عراحتج امييه نحن مخلينج عراحتج ومحد بيغصبج.. بس أميه الريال ماينعاب دكتور ماشاء الله عليه جواهر: يعني لو دكتور لازم اخذه.. ماباه امييييييييييه ماباااااااااااااااااااااااه ام جواهر تمت تتطالعها مستغربه.. شو بلاها هالبنت.. : خلاص اميه هدي عمرج.. ونشي كلي لج لقمة من رديتي من الكلية وانتي ماتبين تاكلين.. جواهر: مب يوعانه اميه دخيلج خليني روحي.. وترا من يوم الثلاث ببدأ تدريب العملي ام جواهر: ربي يوفقج يابنتي ويرزقج بولد الحلال الي يستاهلج.. ابتسمت جواهر لأمها .. وطلعت من غرفتها .. تمت ساكته وهي قاعده على سريرها.. افففففف يقهر يعني احين مايباني لأنه شافني طلعت ويا واحد شو مسويه جي.. تحريت عقله متفتح.. اووووووه وانا الغبيه ليش ماتغشيت عدل.. خله يزول شو ابابه.. يحكرني في بيت شرات ماحاكر الهبله دانوو.. خلني اعيش حياتي .. مجد وأحمد بيستمرون على هالحال.. دوم يتضاربون ويتصالحون؟؟ ولا الحب سيد الموقف؟ جواهر عرفتوا سالفتها.. كيف بتأثر على مجد؟؟ عبيد وحور كناري القصة؟؟ شما وشغلها اليديد.. وتصرفات هزاع؟؟ محمد كيف تتوقعون تكون حياته .. هل موقف جواهر بيأثر عليه؟؟ .. تحياتي |
حوراااااااااااااء ..
مبدعه .. ولا اقدر ازيد على هالكلمة كلاام .. لانه مهما قلت ما بيوفي حقك .. الله يعطيك العااافيه .. كملي لا عدمناااك .. |
اقتباس:
ومشكوووره على ردك |
الجزء الثامن
الفصل الأول =-=-=-=-=-=-=-=-= مجد: .. هندووو خوزي عني والله اني بموت من سوالفج.. هند: جي انا شو قلت.. انتي على الدقة ضحكتج.. مجد: شو اسويبج.. هند: اقول ونحن هالبازار مسوينه لمنو ان شاء الله؟؟ مجد: انا قلت لكم فكرتنا بايخه .. شو رسم على الأيادي ومادري شو العنود: هاتي ايدج برسم عليها. مجد: ماحصلتي حد غيري يعني.. وليش ماقلتي العنود.. العنود: مادري جي خاطري ارسم على ايدج هاتي.. مجد وهي تمد بوزها أونها تتدلع : مابا تسحب موزه ايدها بالغصب واتييبه صوب العنود.. : انتي ماتيين الا جي مجد: موزووو شوي شوي على ايدي.. هند: عدال مادري عاد ايدين منو مجد: يكفي انها ايدين مجد.. العنود: شو تبيني ارسم.. مجد سكتت يلست تفكر وتفكر.... ابتسمت وتتطالع عنود : اكتبي حرف A هني (تأشر على ظهر إيدها) .. وهني حرف .M فهاللحظة تموا مواز وهند يحيون : اوووووووووووووووووه.. شو السالفه منو A مجد تمت تضحك وهي ساكته.. هند: اونج تستحين.. مجد: اصصص خل عنودوو تركز عن تخرب ايدي.. موزه: لا الا تقولين لنا منووو مجد: بعد ربكم .. ربيعتكم عاشقة.. ه هند وموزه يببون ويصفقون :عاشوووووووو.. العنود: ماعليكم اكيد ولد عمها .. مجد وهي رافعه حياتها وانتي شو دراج العنود: يختي انا اعرف قوانين بيتكم البنت لولد عمها .. بعد مايبالها.. مجد وهي تضحك: يعني انتوا ماروم اخش عنكم شي.. كلهم مره وحده: لااااااااا مجد: بل بل كلتوني.. العنود: ها خلصت شو رايج.. مجد حطت ايدها على الفايل: ها بنات شو رايكم حلو صح.. . . هند: رووووووووعه موزه: انا ماحب هالسوالف.. بس حلوو . وطرشت الصورة بإم إم اس لخلود.. الي من استلمتها اتصلت.. خلود: طلعتي مب هينه .. مسرع ماحبيتوا بعض.. مجد: لا ماحبه بس جي اسوي اكشن يدام رباعتي خلود: هاي الي ترفع الضغط.. حوووووووه.. انتي... ترا انا خلوووووود مجد: مصييييييبه ماروم اخش عنها شي هالبنت خلود: مفضوحة يدامي انا بالذات مجد: مشكلة.. انزين خلودوو انا صدق صدق متملله من الخاطر شو رايج نظهر اليوم.. لا تقولين بظهر ويا ريلي بدوسج فبطنج.. خلود: بل بل دفشه عفان الله.. لا ريلي اليوم معزوم على عرس ربيعه.. خلاص بستأذن منه وبنظهر مجد وهي تضحك: اوب اوب .. بتستأذن بعد.. انزين المهم الساعه 5 تجهزين فاهمه.. خلود: ان شاء الله عمووو.. يالله خل الحق بسير الكلاس مجد: ويييييو نحن عندنا يوم مفتوح خلود: اسمع الحشرة .. انتوا ناس بلا هدف عايشين مجد: عدااااااال يا أم الأهداف انتي خلود: هيه باقي لي سنه وبخلص ان شاء الله.. وبوصل لهدفي مجد: اخبرج ترا انا بعد باقي لي سنه .. خلود: ه افف ياربي ماروم اغايض هالبنت الا والرد زاهب مجد: ه يالله مع السلامه خلود: مع السلامه. .. بندت مجد عن خلود وخشت التليفون عن يشوفها واحد من المدرسين ويسحبونه عنها.. واندمجت بالسوالف ويا البنات سمعت صوت وراها يزقرها.. توها بتصد .. قبضت العنود ايدها: خشي ايدج ماباها تشوف مجد رافعه حياتها: ليش منو؟ العنود: جواهر مجد:وععععع.. مابصد جواهر: ماتسمعيني شو.. العنود: مشغوله تبا ترسم على ايدي.. ماتشوفين الإعلان الي معلق.. نرسم على الأيادي.. جواهر: ماشي شغل اشوه ايدي الحلوة.. ماعليه باجر بنتلاقى فالتدريب اوكيك.. يلا بااااااااي مجد وهي تصد وتشوفها وهي تمشي : مالت عليج.. (تقلدها) باجر بنتلاقى فالتدريب اوكيك.. موزه: ماعليج منها تولي.. مجد: ماعندي سالفة اهتم فيها.. خلني استانس.. اقول اسحبوا من ازابيل .. خخخ ابا العوزها شوي وقعدوا البنات يستانسون في يومهم الحلو فالكلية.. .... .. . خوله: اخبرج حور انا عندي موعد فالمستشفى عشان الحمل.. بسير وبرجع اذا حد سأل عني قولي له سايره وبترجع حور وهي تبتسم لها: ان شاء الله.. خوله توها بتطلع جان تذكر شي وتصد صوب حور: قبل لا انسى.. بنت عمي ميرووو عازمتنج على عرس اخوها وليد.. حور: متى العرس؟ خوله: اعتقد الخميس الياي.. حور: يصير خير للخميس.. يلا سيري عن تتأخرين. طلعت خوله ودخل وراها خليفه المكتب ومعاه اوراق..: السلام عليج حور وهي منزله راسها: وعليكم السلام.. خليفه: اشحالج؟؟ وشو الشغل اليوم وياج؟ حور وهي تصد تتطالعه بإبتسامه خفيفه: انا بخير الحمد لله.. وشكلك تبا تعطيني شغل.. هات لأن ماعندي وايد اوراق خليفه: لا ترا لازم اراعيكن انتي والحرمه.. بعد حوامل مافينا.. حور تضحك: عاد حامل بس مب اني ماروم اشتغل.. عطني وماعليك.. خليفه: حور بغيت ارمسج في موضوع اذا ممكن.. حور: تفضل اقعد وقول خير ان شاء الله ... خليفه: والله مادري كيف ارمس فالموضوع بس صار لي فتره وانا متضايق من هالسالفة.. وماعرفت ارمس ويا منو.. تدرين ماعندي اخت ولا اخو.. وحيد امي وابوي.. حور: هيه نعم.. بس خير اشغلت بالي ارمس.. خليفه: امي.. حور: بلاها خالوو عشبه؟ خليفه منزل راسه ويتنهد كأنه هم كبير مب قادر يطلعه بسهولة.. : امي تباني اخذ حرمه على خوله.. حور تفج عيونها عالآخر.. : شوووووووو.. وليش بلاها خوله ضايقت خالو بشي؟ خليفه: لا حشى وانتي تدرين كيف خوله ويا امي.. وحتى امي تحبها وايد.. بس تباني اخذ بنت عمي لأن ريلها متوفي في حادث وماعندها حد لا ابو ولا اخو.. فتباني اخذها.. حور: وانت شو رايك.. خليفه: انا بين نارين يا حور.. نار رضا امي علي.. ونار خوله ومشاعرها.. مب عارف كيف اتصرف فهاللحظة دخل عبيد .. شاف خليفه قاعد مجابل حور وهي منزله راسها وتسمعه وهو يطالع يدامه وهو يرمس.. الله يزيد من امثالك يا خليفه .. ويزيد من امثالج يا احلى وردة في حياتي.. : هااا شو السالفه بتفنش حرمتي؟ صد خليفه صوبه منصدم لوجوده .. ولوهله سكت بعدها ابتسم: خرعتني ياريال.. ماشي كنت ارمس ويا حور فالموضوع الي قلت لك عنه.. قلت هيه حرمه ويمكن يكون عندها حل.. عبيد: يا ريال سو الي قلت لك عليه.. انت علاقتك ويا خوله مش زوج وزوجته بس.. انتوا اقرب من الإخوان لبعض.. ودومكم على تفاهم ماشاء الله.. وشوف هي شو بتشور عليك.. لأن هالأمور لا انا ولا حور ولا اي انسان ثاني يقدر يقولك شو تسوي فيه.. ابتسمت حور: كنت بقولك نفس الرمسه ياخوي.. شرات ماقالك بوعيالي.. شاور خوله .. وهي انسانه عاجل وفاهمه.. خليفه: بس خايف من ردة فعلها.. حور: قلت لك انسانه عاجل وفاهمه.. يعني مب ياهل بتقبض شنطتها وبترد بيت ابوها من تسمع السالفة.. ابتسم خليفه: الله يريح قلبكم شرات ماريحتوا قلبي.. استئذن ومابعطلج زود عن شغلج حور: لا افا عليك.. طلع خليفه من مكتب حور وتقرب عبيد وقت مجابلها: اشحالها ام عيالي.. حور وهي تبتسم له وتمسك القلم وتتطالعه: بخير يا بوعيالي.. عبيد: يوم اسمع كلمه بوعيالي احس عمري 40 ولا 50 حور: .. ربي يخلينا لهاليوم ونشوف عيال عيالنا ان شاء الله.. عبيد: آمين يارب.. يالله عيل بخليج قلت اطل على مرتي وغناتي وارجع مكتبي.. حور: انا خاطري اتصل يدوو اتطمن عليها.. عبيد: اتصلي في سلطان .. حور: ماعرف رقمه.. عبيد: بطرش لج اياه بمسج واتصلي.. حور ابتسمت له : مشكور.. عبيد: كله ولا يكون شي في خاطر قلبي.. وطلع عبيد وثواني الا المسج واصل عند حور الي على طول اتصلت على رقم سلطان.. وقالت بتلعوزه شوي.. رن اول مره محد رد.. اتصلت مره ثانيه رد عليها.. |
سلطان: ألووو..
حور وهي ترقق صوتها: ألووو.. سلطان رفع حياته ونش من عالكرسي عن تسمع يدته شي وتهزبه.. صد فيصل صوبه مستغرب.. واطالع ناصر الي كان راقد عالكنبة.. سلطان: نعم اختي بغيتي منو.. حور: اونك جدي .. اباك انت.. سلطان: استحي على ويهج متصله على تليفون ريال غريب وتقولين هالرمسه.. حور: وليش ماقول هالرمسه.. تراني اباك انت.. وانت مب غريب.. سلطان: اخبرج اذا انتي فاضيه وما وراج اهل ولا عندج مذهب فإسمحي لي.. قاطعته حور بضحكتها: انا حور بنت خالك ه.. سلطان وهو قافط.. : اويه اسمحي لي بنت خالي ماعرفتج.. حور: ه والله ضحكتني .. ومعصب بعد.. سلطان: قلت يمكن وحده من الفاضيات.. حور: افا عليك انت بس.. اشحالك ربك بخير ان شاء الله؟ سلطان: بخير ربي يعافيج .. اشحال خالي ومرت خالي؟؟ وعبيد؟ حور: كلهم بخير يسلمون عليك.. سلطان: الله يسلمهم.. حور: ها متى الردة ان شاء الله.. سلطان: ان شاء الله الجمعة فليل.. حور: عيل بتكملون اسبوع مب 10 أيام.. سلطان: هيه ان شاء الله ترا متصلين فيه من الدوام طالبيني والحمد لله حصلت حجزت وجدمت كم يوم.. << طبعا سلطان جذب عليها .. هم جدموا الرحلة عشان يدتهم ماتتعب زود.. حور: يالله بالسلامه ان شاء الله.. الا وين يدوو متصله اسلم عليها .. سلطان: خلاص عيل بلغي سلامي للأهل حايه اماره من هني؟ حور: هيه دخيلك ودي في ماي زمزم.. سلطان: تامرين افا عليج.. واختج ماتبا شي حور: بقولها تتصل روحها سلطان: لا دخيلج .. ه .. حور: وافضيحتاه الكل يعرف شطانتها.. سلطان: ه مع السلامه حور: مع السلامه مد سلطان إيده بالتليفون ليدته.. جلثم: منو امي؟ سلطان: حور.. جلثم: ويه عطني عطني ارمسها.. علني افداها اشتقت لها ولإختها حور: السلام عليج أمايه.. جلثم: وعليج السلام.. هلا والله مرحبا بهالصوت.. ربي لا خلاني منه يارب.. حور: فديييييييتج والله اسميني ولهانه عليج جلثم: انا اكثر والله.. حور: أمايه دعيتي لي؟؟ جلثم: دعيت لج وللكل .. ربي لا يخليني منكم كلكم.. حور: الله يخليج لنا ويعطيج طولة العمر يارب.. وتموا يرمسون شوي ومن عقب بندوا الخط.. فيصل حس إنه مشتاق لها.. وده يدق بس الساعه كانت 12 الظهر .. يعني فطوم بعدها مارجعت من المدرسة.. مشتاق لها هالبنت.. طرش لها مسج ماهو بخل لو ماجاك مكتوب وماهو ثقل لو الصوت ماجاك ولوتاه الشوق لا تقول ملعوب صدقني كلي انا فدى رضاك لكن وقتي غالب وأنا المغلوب وأنا ظرفي على حبك تحداك ومنى وعد من عشقك ما أتوب ومستحيل قلبي في لحظة ينساك .. بس ماوصل له التقرير لأن تليفونها كان مغلق.. . .. ------------ شما: بوسعود لو سمحت عندك قلم لأن قلمي كان عالطاوله مادري وين سار.. ابراهيم رز وي: انا عندي.. بوسعود عطى ابراهيم نظره سكته .. بوز ورد مكتبه.. : هيه عندي تفضلي.. ومد ايده بالقلم وخذته شما.. : مشكور. ابراهيم يبا يدور سالفه يفتحها مع شما بس مب لاقي.. يخاف تقفطه وعاد الي حواليه يتريون هالمواقف عشان يضحكون على إبراهيم.. كانت شما منهمكة ومنزله راسها.. سمعت صوت من صوب ابراهيم مب غريب عليها.. صدت شافت هزاع .. فجت عيونها .. : ياربي هذا شو يايبنه هني.. بوسعود كان وراها سمعها ترمس..: خير شما بغيتي شي.. شما وهي تصد صوبه بسرعه خايفه ان يكون هزاع سمعها بعد..: ها لا ماشي.. استغرب بوسعود بس سكت ورد مكتبه.. . هزاع: ياخي مذله انتوا كل ها عشان رقم مرتب.. ابراهيم: انا قائمه الأرقام الي عندي هذي.. تبا ارقام مميزه ادخل عند المدير وايد احسن.. هزاع: يعني لازم شغل مذله ادخل عند المدير وغيره.. ابراهيم وهو طفران وماله خلق يرمسه .. يحس به دمه ثجيل هالإنسان .. : شو نسوي مابيدنا شي.. هزاع: احسن لي بسير عند الي حذالك اكيد الحريم مستعدات يساعدن اكثر عنكم .. هني غيض ابراهيم بس يود عمره لأن مافيه ع حشرة الدوام بيطلع هو الغلطان لأنه اساء المعاملة مع المعاملين.. واما شما من سمعت رمسته شلت لها اي ورقة وكانت مساكتهم بالجلب ونشت من عالطاوله وسارت صوب مكتب أميره بسرعه من الزيغه.. مافيها عالفضايح فالدوام وتوه صار لها ثاني يوم.. هزاع: صد صوب ابراهيم وهو يطالع ظهر شما الي تمشي بسرعه: وين سارت هاي.. ابراهيم استانس يوم شما نشت .. حس بها تشردت.. بس استانس يوم انها قفطت هزاع.. : ماتشوفها سايره صوب مكتب المسؤوله.. اكيد عندها شغل وبعدين هاي يديده ثاني يوم لها ماتعرف للشغل هني وايد.. هزاع: اصلا الحريم شو يعرفن عشان يعرفن هالشغلات.. لو يقعدن فالبيت ابرك.. يلا عيل مشكور ماقصرت.. ابراهيم وهو يطالع شاشة الكمبيوتر الي حذاله: حياك الله.. أسامه صد صوب ابراهيم: شو هاد خيوو.. لك بيحكي كتير هالزلمة.. ابراهيم: صخ عني زين يوم نش والله اني شوي وبتهازب وياه اسامه : ولو يا زلمه روق أعصابك مابيسوى هيك.. ابراهيم: تكفى لا تلومني .. هالنوع من المتعاملين مادانيهم.. وفي هالوقت صد صوب مكتب أميره شاف شما وهي اتطل من المكتب كأنها تجيك اذا في حد او لا.. وخايفه من شي.. هالبنت شو وراها.. ليش من قال هالريال يبا يروح صوبها شردت.. ه مسويه عمرها شريفة مكه ومن ذاك الصوب تعرف الريال تخاف تنفضح يدامنا.. هاي هيه السالفه اكيد.. يلست شما عالمكتب تتنهد.. وصدت صوب بوسعود: بوسعود ياخوي هالريال الي توه كان عند ابراهيم روح ولا بعده.. بوسعود: اظني لمحته روح.. ليش في شي؟؟ شما: ها ماشي.. بس اخاف منه.. بوسعود عقد حياته: وليش ضايقج بشي؟؟ شما بصوت واطي وكأنها خايفه انه يكون موجود ويسمعها: ها ولد عمي وعلاقتنا وياهم مب طيبه ان شافني هني مابيمشي السالفة ع خير.. بوسعود: لاحول ولا قوة إلا بالله.. ماعليج ان ياج مابيروم يسوي شي .. اطلبي السيكيوريتي وماعليج.. شما ارتاحت لبو سعود.. مبين عليه ريال عود وعاقل وحشيم.. من جي كانت مرتاحه شوي وهي ترمس وياه.. : تسلم .. ابراهيم كان وده يسمع شي بس ماقدر لأن شما كانت مخفضة صوتها.. .. هزاع نزل وهو كان يمشي صوب موتره مر صوب مواتر الموظفين .. لمح موتر مب غريب عليه.. تم يدقق عليه وعالرقم عرف راعي السياره.. فارت اعصابه.. حس كأنه دمه يفور وده يدخل الإتصالات ويجلبها فوق تحت ويطلعها بس يود عمره وسار صوب موتره وقرر العصر يروح لها البيت ويشوف شو الموضوع.. ركب الموتر بس حس نفسه مو قادر يتحرك من المكان دون مايشوفها.. صد صوب الساعه وشافها الساعه 2:30.. قرر انه يتم يترياها تطلع مهما كان الثمن.. وهي الساعه 3 تخلص من الشغل وترد البيت.. ومرن هالنص ساعه كنهم دهر على هزاع.. اتصل فيه اخوه حمدان.. × حمدان اخو هزاع الكبير.. عمره 32 سنه.. انسان طيب ومسالم ومايخصه في اي شي .. ماخذ من طبع عمه بو شما.. وكان يحب عمه وايد ودوم يروح بيتهم يوم صغير من ورا ابوه .. لأن مرت عمه كانت وايد ادلعه.. اسلوبه غير عن ابوه وهزاع انسان دين وقمة فالأخلاق.. ويحترم الكل وعمره مانظر لمرت عمه انها اقل عنهم او شي.. دوم يوم يشوفها يحبها على راسها ويحترمها× حمدان: هلا والله بالقاطع.. هزاع: اهلين.. حمدان: شوفيك ترد بهالطريقه مب من عادتك.. هزاع: اسكت عني مفوّل حدي.. حمدان: خير بعد شو من مشكلة صايرة لك؟ هزاع: مب الا لي.. لنا كلنا.. حمدان: لا احين بديت احاتي.. شو السالفه فهمني؟ هزاع: بنت عمك المصون.. حمدان: اي بنت عم؟ هزاع: ياربي .. كم عم عندك عشان تسأل.. شما بنت الهندية.. حمدان: عيب عليك هالرمسه .. بنت عمك هاي هزاع: ماعلي المهم.. سودت ويهنا.. حمدان بدا ياخذ الموضوع جد: كيف فهمني؟ هزاع: اتداوم في اتصالات.. حمدان: انزين وشو سوت هناك؟ هزاع: هذا الي بيرفع ضغطي.. مايفهم.. ياخي اقولك اتداوم .. يعني تشتغل ونحن ماعنا بنات يشتغلن.. حمدان: لا انت ولي امرها ولا وصي عليها البنت بالغه وراشدة مالك شور عليها.. وخير لو اشتغلت ترا وايدات يشتغلن مابلاهن شي هزاع: ماعلي من الباقي .. المهم هاي بنت عمنا يعني اسم عايلتنا فهمت.. حمدان: يا هزاع مالك شغل فالبنت .. انت تدري ان ابوي تنازل عن وصيته عليهن.. ولا نحن لنا علاقة وياهن ذاك الزود عسب نتحكم فيهم خلها هزاع: انت اصلا دومك جي بارد مايهمك الا نفسك.. ماعلي منك .. الشر علي انا الي اخبرك اتحرا قلبك يحترق على اسم عايلتنا شراتي حمدان: حشرتنا ترا.. البنت ماسوت شي غلط انت مكبر الموضوع.. وانا حرمتي تشتغل مافيها شي هزاع: اه اه .. وقف هني .. حرمتك شو تشتغل؟؟ مدرسة يعني وسط حريم.. مب في وسط رياييل في شركة مثل اتصالات.. حمدان: اخبرك الكلام ضايع وياك.. بس نصيحة لا تسوي لعمرك مشاكل انت مالك حق عليهن عشان تمنعهن.. هزاع: اخبرك بند هذي يت بأدبها وبند الخط قبل لا يسمع رمسة اخوه.. ونزل من موتره بسرعه مشى صوبها .. وقبضها من ايدها قبل لا تفتح باب السياره.. : تعالي هني وين سايره.. شما من شافته بهتت.. وكان ابراهيم توه طالع من باب مبنى الإتصالات وصد صوب الباركنات شاف شما وهي ترمس هزاع.. وهزاع قابضنها من ايدها ويسحبها.. وهي ترمس بصوت عالي شوي.. شما: ودر ايدي .. مالك شغل فيني .. ايييي ايدي.. هزاع ماسوالها سالفه وغصبها تدخل سيارته.. وكان ابراهيم يطالع الموقف ويضحك.. والله البنات حركات مسويات اعمارهن شريفات مكة بس الله يفضحهن.. ولع الصلب وسار صوب موتره وهو يضحك.. .. |
فالسياره عند هزاع: والله ان تحركتي من مكانج ولا طلعتي من هالباب ادعمج بسيارتي ولا يهمني شي..
خافت شما ويلست وهي تمسح دموعها ومنزله راسها.. وخطر على بالها سلطان.. المره الأولى فالمزرعه هو الي حماها منه .. بس هالمره مب موجود.. حاسه نفسها وحيدة.. ولازم تحاربه بروحها.. شما وهي تمسح دمعتها.. : ممكن اعرف شو فيك تسحبني جي؟؟ شو مستوي؟ هزاع: منو سمح لج تشتغلين؟؟ شما من سمعت هالرمسه حست بحرارة جسمها ترتفع.. وغيضت ولا اراديا علا صوتها: ليش اشتغل؟؟ ترا من كثر ما انتوا ماشاء الله مب مقصرين علينا.. كافي خذتوا نصيبنا من الشركة الي كنا بنسترزق من وراها.. والبيت الشعبي الجديم الي يدي وصاه لأبويه كنا ناكل من ورا اجاره.. لكن احين شو عنا؟؟ امي ليل ونهار تسهر تسوي هالبخور وهالعطور وتبيعهم عشان تقدر تعيشنا بدون لا نحتاج لحد.. خذت لي هالسياره بالكم فلس الي ابوي ورثهم امي.. وتقولي ليش اشتغل؟؟ لا اخو كبير ولا عم ولا عيال عمومه ينشد الظهر فيهم.. عرفت انا ليش اشتغل احين؟؟ هزاع ماعرف ليش هو سوى كل هذا .. هو نفسه مب لاقي تفسير لتصرفه.. الكلام الي قاله لـ حمدان روحه مب مقتنع فيه.. وهالشي الي خلاه يسمع رمسة شما كلها.. : وانتي تهقين انه مسموح لعايلتنا ان البنت تشتغل وسط الرياييل.. منقود يا بنت الناس.. منقووووووووووود.. شما صدت صوب هزاع الي كان موقف صوب الإشاره الحمرا.. ويطالعها وهي رافعه حياتها: لا والله؟؟ والي انتوا سويتوه مب منقود؟؟ اونك مهتم ومسوي عمرك فيها شهم .. جان يبت حقنا من ابوك .. هزاع : لو سمحتي لا تيبين طاري ابوي على لسانج بهالطريقة.. تراه عمج يعني لو ناسية اذكرج شما: مانسيت .. بس هو نسى ان له بنت اخو.. بس لأنه مايحب امي.. شو سوت بكم امي.. الله الشاهد تحبكم واتداريكم وتحترمكم من كبيركم لصغيركم.. هزاع كان يطالع عيونها المحمره من الدموع .. والحزن العميق والتعب الي فيهن.. وماوعى الا على صوت هرن السياره الي وراه لأن الإشارة اخضرت ومشى السياره.. شما: رجاء هزاع ابتعد عن حياتنا.. نحن نسينا ان لنا عم وعيال عم.. انا وامي وعمار عايشين لنفسنا وبس.. امي ماعندها اهل هني.. نحن كل مالها فهالدنيا.. واحب امي لأنها يابتني.. أرجوك (صدت يدامها وهي منزله راسها وتتنهد وبصوت مبحوح وعيون تدمع) ابتعد عنا كافينا الي يينا منك.. ابوك شل ايده من علينا وتخلا عن كل شي.. وانت الي ييت من عقبه كل يوم صوب بيتنا وانت.. سكتت بهاللحظة ماحبت تقول له كلمة سكران .. هزاع مهما يكون فيه خصلة طيبه .. ويمكن الي سواه نابع من غيرته .. هو نفسه مب لاقي تفسير لهالشي.. ويمكن الكره الي ابوه وامه زرعوه في قلبه.. حس نفسه دنيه وايد يدامها.. بكل كلمة رمست فيها ماغلطت عليه رغم انه فضحها يدام مقر شغلها.. شما: هزاع ردني عند سيارتي.. امي بدت تتصل وتحاتيني... وقتها هزاع حس بنغزه في قلبه.. عمره امه ماتصلت فيه اذا تأخر ولا سألت انت وين .. كل الي تسويه تعطيه بيزات واتدلعه .. لكن عمرها ماحسسته بوجودها... ويمكن هالشي الي كان يخليه يروح صوب بيت عمه .. يحس بشي موجود في هالبيت يفقده في بيتهم.. حراره البيت والأسرة.. رغم انهم عايشين بلا ابو.. بس عمرها شما ما غلطت بشي ولا حتى عامر.. وهو الي عايش تحت كنف امه وابوه.. ماتم شي ماسواه.. مشى صوب اتصالات ونزلها وهو ساكت دون مايرمس ولا ينطق بأي كلمة.. نزلت من سيارته وقبل لا تبند الباب صدت صوبه واطالعته: ابتعد عن حياتنا وانسانا ارجوووك.. هزاع تم ساكت وماتكلم.. حس راسه مفتر من الأفكار المتضاربه فيه.. ومن بندت باب السياره مشى السياره وراح والا يرن تليفونه كانت الي متصله امه.. هزاع استغرب اول مره امه تتصل فيه.. : الووو ام حمدان: امييييييه هزاع وينك اميه الحق علينا.. هزاع خاف من سمع صوت امه تصيح.. هزاع: خير امي شو صاير؟ ام حمدان: ابوك يا هزاع ابوووووك.. طايح فالمستشفى.. تعال ودني له ماعندي حد.. هزاع: ها.. شو بلاه ابويه.. ام حمدان: مادري اتصلوا فيه توه بلغوني انه نقلوه المستشفى.. شي صابه وهو فالشغل.. هزاع ماعرف كيف يوصل عمره المستشفى وبسرعه سار صوب الحوادث كان توه ابوه مطلعينه من غرفه الطوارئ ينقلونه لقسم العناية المركزة.. ربع صوب سرير ابوه وتم يطالع ابوه الي كانو حاطين عليه اكسجين وموصلين له وايرات وايد مايعرف هزاع شو سالفتها.. كان وده يصيح وهو يشوف شكل ابوه بهالحاله.. هزاع: ابويه انا هزاع ولدك شو فيك؟؟ ابويه رد علي.. فتح بوحمدان عيونه شوي شوي من شاف هزاع انفعل بطريقة غير طبيعيه.. واستائت حالته.. اضطروا الممرضين يبعدون عنه هزاع ويسرعون به صوب غرفه العناية المركزة.. وتم هزاع يتريا برع وصل له ربيع ابوه .. زايد.. وحمدان اخوه.. حمدان: ها وينه ابوي؟ هزاع: توه ودوه العناية المركزة .. منو الي ياب ابويه المستشفى؟ زايد ربيع ابوهم من زمان ويداوم وياه: انا الي يبته .. طاح علينا فالدوام زين مامات ( وكان يوجه نظراته لهزاع بغضب كأنه يقول له انت السبب).. هزاع: حمدان مادري بلاه ابويه من شافني حسيت بنظراته مادري شي غريب اول مره اشوفه.. زايد اطالع هزاع بطرف عينه .. وروح بعيد عنهم كأن متنفر منه.. حمدان: والله.. مادري.. بس انت ادعي له احين.. يقوم بالسلامه ان شاء الله هزاع استغرب من نظرات ربيع ابوه له بعد.. حس ان الموضوع متعلق فيه بس كيف مب عارف؟؟ .. جاسم: ويا منو بتسيرون؟ خلود: مادري والله.. تصدق ماسألتها.. جاسم: ه .. ماعليه وين ماتسيرون حطي بالج على عمرج .. لا تنسين ان في ناس يخافون عليج خلود: وايد؟ جاسم: وايد وايد بعد.. خلود: .. فديت هالناس عيل.. جاسم : ماتستحين تتفدينهم يدامي.. خلود: اوه اسفه نسيت انك وياي عالخط جاسم: ه سخيفة.. خلود: جاسم ماتحس وايد بسرعه زواجنا فالصيف جاسم: ليش ان شاء الله متى تبينه يكون؟ خلود: اممم يعني الصيف الياي او الي بعده .. بكون تخرجت وخلصت جاسم: اتهبين.. ما أجله يوم واحد.. ماتصورين ياعمري اشكثر مشتاق وانتي تقولين نأجل.. خلود: ه أحب ألعوزك وارفع ضغطك جاسم: ادريبج ماتحبيني تبين تغايضيني وبس خلود: الله يسامحك.. انا من يومي احبك بس انت ماكنت حاس جاسم: كنت عمي ماشوف خلود: ه واحين نورت يعني جاسم: نورج الي نورني.. خلود: لا خليت منك.. .. . __________________ |
نزلت مجد من عالدري بسرعه تربع ورا ابوها قبل لا يظهر..
مجد: باباتي.. ابويه.. بوحور. صد عبدالعزيز صوب بنته وهو يضحك: تم شي مازقرتيني فيه.. خير مجد: ابويه ابا اظهر ويا خلود نسير إمارات مول.. منها اتحوط ومنها اتشرى لي لبس للكلية.. تم يطالعها عبدالعزيز متلوم: بس انا اليوم مواعد رياييل فالميلس ماروم.. مجد وهي مبوزه وتيلس على الكنبة الي وراها وترفع ريولها على الكنبة وتربعهم.. : ومنو بيودينا عيل؟ عبدالعزيز: جاسم ريل خلود.. مجد: بس هو معزوم على عرس ربيعه.. عبدالعزيز: ولد عمج أحمد شوفيه اذا فاضي يوديكم.. دامج مب بروحج ماعليه برايه يوديكم.. مجد وهي تتطالع وتحايس بثمها يوم سمعت طاري أحمد.. تحس مابتقدر تاخذ راحتها ويا خلود عدل.. بس المهم عندها تطلع.. : ابويه لو كانت حور ولد جان احين بلا مذلة حد.. عبدالعزيز: الله عوضني بأحلى بنتين ربيتهن وكبرتهن ورافعات راسي الحمد لله.. وترا احمد اخوكن مجد وهي تحب راس ابوها: ربي لا يخليني منك يابوي.. عبدالعزيز: ويخليكم يارب.. المهم خبريني وطمنيني عليكم من توصلون وتكونون ويا احمد.. مجد: حاضر سي دي (وهي ترسل له تحية عسكرية) ضحك لها ابوها وطلع من البيت مستعيل.. وصعدت مجد الدري شوي شوي .. خطوة خطوة وهي تفكر كيف تطلب من أحمد.. و دخلت غرفتها وشلت التليفون وكتبت له مسج (( السلام عليكم.. اذا طلبت منك شي بتردني؟)) أحمد كان توه راد البيت من الكلية.. وسمع صوت المسج.. افففففف احين اكيد واحد من الربع يبا شي مالي بارض والله.. فتح المسج يقراه ومن شاف اسم مجد عليه .. استانس.. نسى التعب كله ورد عليها (( حي المسج وراعيه.. افا عليج.. تم بس شو الطلب)) قرت المسج مجد وقالت بتلعوزه.. (( امسح رقمي ولا تعود تذكرني ابد)) انصدم أحمد من قرى الكلام.. وانسدح على الفراش تم يطالع الشاشه ورد التليفون حطه ع صدره.. هاي البنت شو تحت راسها.. اشك ان هالبنت مستلبسه.. طرش لها مسج (( ممكن اعرف السبب)) تمت تتطالع مجوود المسج وهي تضحك.. وردت عليه (( لأني لو طلبت منك اتودينا امارات مول اليوم بتقول لا)) اسميه ضحك أحمد يوم قرا هالرمسه.. والله ان هالبنت شيطانه.. واتصل فيها.. مجد: نعم مو قلت لك تمسح رقمي ولا تذكرني أحمد: انا قلتي لي متى؟؟ مجد: لا تستهبل توني طرشت لك مسج .. أحمد: ماشفت شي.. مجد: لا والله وتليفونك روحه ماشاء الله يرد علي أحمد: تليفوني رد عليج؟؟ متى.. أحمد وده ينقع من الضحك يحس بها متغاااااايضه.. مجد: احمدووو عن الإستهبال انزين.. أحمد حس ان الجو تكهرب عند مجد وهو عاد كله ولا زعلها.. : اسولف وياج.. ومنو قالج اني مابوديكم لو طلبتي مني؟ مجد: الكتاب مبين من عنوانه أحمد: وشو عنوان كتابي؟ مجد هني توهقت ماعرفت شو ترد عليه.. فغيرت الموضوع: انزين ممكن الساعه 5 تمر بيتنا وتاخذني انا وخلود .. اذا انت بتودينا شرات ماتقول أحمد ضحك لأنها غيرت الموضوع: خلاص اوكي.. الساعه 4:55 بكون عند الباب اذا تأخرتو بروح روحي.. مجد: لا لا لا لابنكون عند الباب أحمد: ه خلاص ان شاء الله .. مجد: مشكور.. مع السلامه أحمد: مع السلامه.. .. .. .. كانت الساعه 4:30 تجهز أحمد وقعد يطالع عمره فالمرايه.. لبس نظارته وكشخ.. ولبس الكاب .. حب يكون رياضي الأخ اونه.. وطلع وطرش مسج لمجد يقولها انه فالدرب .. خلود: يلا انا جاهزه مجد: انا بعد بس بلبس عباتي وبتصل في ابوي يوم بركب السياره.. بعض الناس لازم اقولج شي.. خلود: شي مثل شو؟ مجد: ترا بعد كم يوم.. تقاطعها خلود. عرفنا .. يوم ميلادج.. مايسوى علي يوم ميلاد الي بتذليني عليه.. عيل بنشوف شو بتسوين يوم ميلادي مجد: حفلة لا صارت ولا استوت.. خلود: احين مر يوم ميلادي.. باقي له 10 شهور.. بعده يعني وقت.. مجد: بجهز لج كل شهر شي اونه خخخ خلود: مابقول لا مجد: عيب عيب الطمع مب زين وايد.. خلود: اخبرج عن الهذرة الزايدة.. ترا احمد بيوصل .. مجد: انزين بسير غرفه امي شوي وبيي.. طلعت مجد فهالوقت وخلود شلت تليفون مجد وسجلت رقم احمد فتليفونها.. وكلها دقايق وصل احمد ونزلوا كلهم تحت بسرعه وركبوا الموتر.. مجد +خلود: السلام عليكم أحمد : وعليكم السلام ورحمه الله.. خلود: اشحالك أحمد؟؟ احمد: بخير الحمد لله.. مجد: شخبار عموو وعمي وحور فديتها الي ماشوفها الا فالإسبوع مره.. احمد: اشوفج سألتي عن الكل الا عني.. مجد: لا ترا خلود سألت عنك ..وانا دوري اسأل عن الباقي.. مايستوي نكرر السؤال أحمد: لا يستوي يستوي.. مجد: خلاص انزين.. اشحالك احمد.. احمد يبتسم : الحمد لله بخير.. مجد: انزين لا تنسى امارات مول مب مكان ثاني احمد يصد وراه ويطالعهم: اخبركم لا يكون تحرون اعماركم راكبين ويا راجو راعي التاكسي.. مجد وخلود تموا يضحكون.. خلود: افا ولد خالي.. ياسين نسولف وياك.. أحمد: هيه اقول انا بعد.. وتموا ساكتين فالدرب شوي وكانت مجد تساسر خلود وتضحك وياها.. واحمد يراقبها من الجامه .. يعلني افدى هالضحكة .. احبها ياربي وفي لحظة التقت العيون.. .. استحت مجد.. ونزلت راسها.. دقايق الا هم واصلين المول.. نزلوا سوا.. مجد وخلود كانن يمشن يدام احمد وهو وراهن.. وماخلت محل مادخلته.. وياريت لو يعيبها شي.. أحمد: انتي يايه بس تتفرجين عالبضاعة هني.. مجد: ليش تعبت؟ أحمد: لا ماتعبت.. بس ماشوف شي يعيبكن.. خلود: ترا الشي الحلو مايتحصل بسرعه.. أحمد: اهااا اقول انا بعد.. ترا الحلو حصلته بعد تعب.. قرصت خلود مجد من سمعت هالرمسه.. وضربت خلود عالخفيف: سخيفه انزين.. خلود: ه مايخصني هو الي قالها.. ودخلت عقب باريس جاليري (حسب معلوماتي ماشي باريس جاليري في مول الإمارات..بس في ناس قالو لي شي.. فسامحوني ان كانت المعلومة غلط )... وتمت تتطالع الساعات .. وأحمد كان يطالع صوب السوع الرجاليه بس يصد كل شوي صوب مجد ويشوف شو بتختار.. وشلت لها ساعه وايد حلوة .. وجربتها .. مجد: شو رايج.. ايدي الأحلى ولا الساعه؟؟ خلود: ه... الساعه مجد: ماحبج.. وحطت الساعه.. خلود: ماتبينها.. مجد: نو حاليا ماباها.. بفكر عقب اخذها يوم باخذ لبس يليق عليها خلود: اهااا.. وعقب ظهروا من المحل وقعدوا يدورون فالسنتر لين ماهلكت ريول أحمد المسكين.. يغمض.. ومن خلصوا كل شي.. نزل احمد وحط الأجياس فالسياره وقال انه بيدخلهم القسم الثلجي في المول.. استانسوا.. وتريوا فالدور نص ساعه ودخلوا .. استانسوا ثلاثتهم من الخاطر وقعدوا يتصورون.. ويحاولون يسوون رجل الثلج ثلاثتهم.. وأحمد كان حاس بفرحة ماتوصف.. يحس عمره عايش بحلم ويا الإنسانه الي يحبها.. مجد: ياليت حور والكل موجود.. والله وناسه أحمد: المره اليايه يبانا دخله جماعيه خلود: هيه والله لو اليوم جاسم ماسار العرس بس.. مجد: يالله ماعليه اليايات اكثر .. . . .. ومن بعدها تعشوا كلهم في جيليز.. ومن عقبها ردوا البيت.. كان الوقت متأخر وقتها .. الساعه 11 فليل.. كانو ميهودين صدق.. خلود قالت انها بتبات عند مجد لأن اليوم الثاني ماعندها جامعه.. ومجد بتبدأ التدريب العملي .. نزل احمد وسلم على عمه ومرت عمه وعقبها رد البيت وهو حاس براحة نفسيه وكأنه سوى شي كان وده يسويه من زمان.. حتى مجد .. حست بإحساس ثاني بالمره.. الدنيا كلها ضحكت في ويا.. استانست في كل لحظة كانت وياه.. وحست بوناسته .. مايسكت من كثر مايسولف.. .. وتمنت ان الله لا يغير عليهم ويجعله من نصيبها هزاع بيترك شما في حالها؟؟ ابراهيم بعد الموقف الي شافه شو بيسوي؟؟ ليش انفعل ابو هزاع من شاف هزاع وسائت حالته؟؟ ياترى شو تبا خلود في رقم أحمد؟؟ خليفه شو بيسوي مع خوله.. شو موقفها لا عرفت بسالفة ام خليفه؟؟ |
الجزء الثامن
الفصل الثاني =-=-=-=-= اليوم الثاني الصبح.. فالمستشفى هزاع: ها دكتور بشر نقدر ندخل عنده أحين؟؟ الدكتور: هيه الحمدلله حالته استقرت.. ولله الحمد انه وصل بسرعه لأن النكسة ماكانت قوية عليه.. حمدان: الحمد لله.. مشكور دكتور وماقصرت.. الدكتور: العفو واجبنا.. حمدان: امي وين.. هزاع: محتشره تبا اتيي ماخليتها .. عيب ياريال حريم يتيمعون هني فالمرر.. خل ابوي يستقر ويروح الجناح فوق خلاف بنييبهم.. حمدان: الا وين عمي زايد (ربيع ابوهم).. هزاع: مادريبه كان واقف هناك.. حمدان: سير ازقره.. هزاع: اوكي.. حمدان سار دخل عند ابوه.. وهزاع راح صوب الباب الي يودي لبرع القسم وشاف زايد يالس عالكراسي الي برع يتريا.. : عمي .. عمي.. زايد مسح ايده على وي كأنه كان يدعي ولا يقرا شي قبلها.. ورفع راسه شاف هزاع عقد حياته: نعم؟؟ هزاع: الدكتور طلع من عند ابوي ويقول انه بخير احين.. تعال حياك خل ندخل عنده.. فيضص: وانت ان شاء الله تبا تدخل عند ابوك؟؟ هزاع استغرب..: هيه .. شي أكيد.. زايد: انت مايسدك الي سويته والي يبته لأبوك من تحت راسك ياي تذبحه مول وتخلص عليه؟ هزاع: اسمعني تراني من الصبح سكت عنك وانت تغلط علي لأن نحن في مستشفى.. شو مسوي انا فهمني.. زايد: والله عيال هالزمن ويهم لوح وعينهم قوية.. هزاع: لا حول ولا قوة إلا بالله.. فهالوقت سمع زايد صوت من الصوب الثاني كان عدنان ولده.. عدنان: ها ابويه بشر شحاله عمي بوحمدان.. (عدنان هذا خاطب إخت هزاع .. مها.. << بعض الناس يبت اسمج فالقصه .. شو رايج خخخخ) زايد: اقولك عدنان دخيلك خل هزاع يشوف سواد وي الي سواه والي بسبته ابوه صابه الي صابه.. خله يعرف شو السبب مسوي عمره بهيمه مب فاهم شي.. هزاع كان طول الوقت ساكت وميود عمره عن يغلط ويقول شي يندم عليه.. صد عدنان صوب هزاع وهو يهز راسه كأنه يقوله يا حسافه انك اخو حرمتي.. هزاع: شو السالفه ؟؟ طلع عدنان تليفونه.. وهو يتنهد .. وزايد وقف شوي.. وراح عنهم يطمن على بوحمدان (الي هو بوهزاع).. عدنان تم يتعبث فالتليفون وطلع الفيديو ومد ايده لهزاع وربع ايده وقف يدامه يترياه يرمس..: شوف وعطني تفسير.. هزاع سحب التليفون بقوة وكأنه واثق انه ماسوى شي في حياته.. بس من شاف اللقطه... فج ثمه متفاجئ.. وشوي يشوف الكاميرا تتقرب صوبه وهو في وضع مخجل مع البنت فالحوض.. وسكران .. حس بحراره تسري في كل عرج من عروجه.. حس كأن الدنيا تدور فيه.. كأنه في هاللحظة فقط ادرك انه طووووول هالمدة كان يسوي شي غلط.. كان يسوي ولا همه انه في غلط.. كأنه شي عادي.. لكن هالفيديو ياه مثل الصفعه.. صد صوب عدنان وعيونه محمره..: من وين يايبنه؟ عدنان: شرات ماوصلني وصل عشره غيري.. شرات اي فيديو تتبادله ويا ربعك وانت يالس فالكوفي.. فشلتنا الله يفشلك دنيا وآخره.. وين اودي ويهي من ربعي .. ومن اهلي.. ومن الي فالدوام وياي.. اقولهم هذا نسيبي الي اتشرف فيه؟؟ يكفي انك لا شغلة ولا مشغله وهايت.. وهالدور ايينا هالفيديو الـ... (سكت).. استغفر الله العظيم.. لو امك درت بتموت وبتندم على اليوم الي يابتك فيه شرات ما ابوك درا والله ستر ماراح فيها .. خوز من يدامي اجابل ابوك واشوف حالته وايد احسن.. ودزه عدنان بإيده من الحره الي فيه .. ودعم هزاع اليدار الي وراه وهو على حاله مصدوم.. ومشى عنه عدنان وراح.. وهو تم يطالع حواليه شاف عايله يايه كأنهم يايين يزورون حد.. صد وي صوب اليدار لا يكون شايفين الفيديو.. بيعرفوني وبيأشرون علي.. ومشى بسرعه صوب الباب عشان يطلع.. تم يمشي وكل مايشوف شخص يطالع صوبه ولا يصد عليه وهو يمشي .. ينزل راسه زود... كأنه يتهرب من الناس.. مايباهم يشوفونه لا بيعرفوني.. بيقولون هو الي .. لا .. وين اودي عمري.. وين اروح.. في اي ارض انخش.. أمي.. أمي شو بيستوي بها.. ياربي يكفي الي صاب ابويه .. هالدور على امي لا يارب .. وفي لحظة طرت شما على باله .. وتذكر الي كانت تقوله له.. .. شما: أرجوك ابتعد عنا كافينا الي يينا منك.. ابوك شل ايده من علينا وتخلا عن كل شي.. وانت الي ييت من عقبه كل يوم صوب بيتنا وانت.. .. آآآآآآآآآآه.. يعني شافتني وانا بهالحاله.. ركب موتره وتم يمشي فيه مايدري وين ساير.. كل مايشوف موتر يمر حذاله واذا شاف السايق صاد صوب موتره يشك.. اكيد يعرفني من موتري .. وين اودي بعمري.. وين ماروح يعرفوني .. ااااااه ياربي ليش سويت فيني جييييه.. لييييييش؟؟؟ ومنو الي سوى هذا فيني؟؟ .. منوووو.. في لحظة تذكر الموقف كله.. وتذكر يوم شاف طارق وهو واقف برع معارض انه يسبح وياهم.. طارق.. هيه اكيد هو..محد غيره الخسيس مصورنا .. ليييييش انا شو سويت له؟؟ يكفيه اني يبته عندي وعززته وكرمته ويبت له البنات الي يباهن على حسابي.. جي يرد الحركة فيني الخسيس بس انا أراويه.. ... أحمد: ياريال خل عنك هالكلام.. المهم متى رديت بالسلامه سيف( تذكير.. سيف كان اسمه سابقا هزاع لكن غيرت الإسم عشان ماتستوي لخبطة اسامي.. هو صديق احمد الروح بالروح.. ساعد احمد مع زوجته أسما انه يترك سوالف البنات.. زوجته حملت بعد سنتين زواج) سيف: والله صار لي اسبوع من رديت.. أحمد: ايا الخاين من اسبوع وتوك بس ذكرت ربيع الطفولة.. سيف: ه شونسوي مشاغل البيت خذتنا.. وغير تعرف الحرمه حامل من بعد فتره طويلة.. أحمد: هيه والله ياني فرحت لك يوم قلت.. ربي يكتب لك الذرية الصالحة.. اتخبرك سيف عندي خط رقم غريب برد بشوف منو وخلاف راح ادق لك سيف: على خير ان شاء الله .. في امان الله أحمد: في امان الله .. رد على الخط الثاني: ألووو خلود: السلام عليكم.. أحمد مستغرب: وعليكم السلام.. منو معاي؟ خلود: وياك خلود بنت عمتك.. أحمد: هييييه هلا والله خلود اشحالج؟؟ عساج بخير؟؟ خلود: بخير يسرك حالي انت اشحالك؟ أحمد: بخير.. اسمحي لي والله ماعرفتج.. رقمج كان غريب علي.. خلود: لا افا عليك .. شحالها مرت خالي ومروه .. والحور.. أحمد: كلهم بخير يسرج حالهم.. شو هالإتصال الغريب.. شي صاير؟؟ الصراحه يالس ارمسج وانا احاتي.. خلود: لا مب مستوي شي.. بس متصله اخبرك شي.. مادري جان محتاج تعرف هالشي او لا.. أحمد: شو هالشي؟ خلود: اليوم الإثنين صح.. أحمد: هيه صح.. خلود: يوم الأربعا ان شاء الله يوم ميلاد مجد.. بتكمل الـ 20 وبتدخل 21.. (( خطأ مطبعي فالقصه فالبداية كنت كاتبه ان عمرها 18 .. كنت ذكية بزياده يعني خخخ)) .. أحمد: والله.. زين يوم خبرتيني.. خلود: بس عن تقول لها اني قلت لك بتجتلني .. أحمد: لا ماعليج .. خلود: اباك تفاجئها.. أحمد: ه لاتوصين بهالسوالف .. انتي وين اسمع حشرة عندج خلود: فالجامعه وين بكون هالحزة.. أحمد: الله يوفقج شخبار جاسم ؟ خلود: بخير الحمد لله أحمد: وسلطان متى ناوي يرجع؟ خلود: يقول بالجمعه لأن الدوام طالبينه شي جي أحمد: يوصلون بالسلامه ان شاء الله خلود: ان شاءالله .. يلا عيل احمد اخليك بس حبيت ابلغك هالشي والسموحه أحمد: مسموحه اختيه.. في امان الله وبند عنها ويلس احمد يطالع الأوراق الي يدامه ويبتسم.. عيل عيد ميلادها.. شو اسوي؟؟ امممم يبالي افكر قطع افكاره صوت ربيعه سعيد يزقره عشان يلحقون على الكلاس.. ونش بسرعه شل اوراقه وسار وياه.. .. . فالشركة .. كانت ياسه عالكرسي الي مجابل مكتب المدير وهي حاطه ريل على ريل وتتطالع مجد الي قاعدها على الكرسي الي مجابلنها بنظره متعاليه ووتحايس بثمها.. ومن سمعت صوت الباب عدلت شيلتها ووقفت.. ومجد طول الوقت تراقب حركاتها وساكته.. وفي خاطرها تقول.. انا شو فرني ويا هاي مادري.. ونشت بهدوء وقفت وهي منزله راسها بعكس جواهر الي كانت تتطالع المسؤول عنهم وهو داخل في عينه وتعلج اللبان يدامه.. سلمان: السلام عليكم.. مجد وجواهر : وعليكم السلام.. سلمان: يلسوا ارتاحو.. يلست مجد الا جواهر تمت واقفه صدت مجد تتطالعها مستغربه.. جواهر: لا مايستوي انت مديرنا وتبانا نيلس.. __________________ |
سلمان ماعيبته جواهر من الوهله الأولى الي شافها فيها.. في خاطره يقول.. شو هالوقاحه والجرأة.. : انا مدير مؤقت لمدة 3 أسابيع.. وقلت لكم استريحو وقعدوا .. يعني مافيها شي لو قعدتي الا جان تحبين اتمين واقفه ع كيفج..
مجد استانست على رمسة المدير ودها تضحك بس ميودة عمرها.. سلمان صد صوب مجد الي كانت منزله راسها وماتتطالعه بالمره... تم يطالع الورقه الي يدامه وصد صوبهم: منو فيكم مجد عبدالعزيز ومنو جواهر محمد؟ جواهر وهي تحط كوع ايدها على الطاولة وكف ايدها تحت خدها وتتطالع المدير وترقق صوتها: انا جواهر.. ومجد تتطالعها ورافعه حياتها.. هاي الي بصفعها بالنعال احيييين سلمان ماحب تصرفها .. وماحب يسكت عنها وتتمادى..: يعني مديرج تحطين ايدج على طاولته بهالطريقة.. نزلت جواهر ايدها بهدوء .. وتنعمت: اسفه ماكنت منتب سلمان: طبعا مكاتبكم راح تكون متفرقه .. كل وحده راح تنحط قسم.. مجد عبدالعزيز .. انتي مسؤولج الي بيعطيج الشغل اسمه كمال.. وانتي يا جواهر مسؤولتج الي بتعطيج الشغل اسمها لارا.. جواهر تمت تحايس ببوزها لأن كان يرمس ويطالع صوب مجد وهي منزله راسها ولا تسمعه شو يقول.. احين هالشيفه يطالعها وانا الي كاشخه يدامه ولا كأنه يشوفني.. عفاني الله .. صدق ماعنده ذوق.. سلمان: تعالو وياي أوديكم لأقسامكم.. مشى سلمان يدام وجواهر وراه.. والمسكينه مجد تمشي وراهم شوي بعيده لأنها مستحيه..وصل جواهر لقسمها ووصى المسؤوله تعطيها شغل وهي تتطالع سلمان وهي تبتسم .. بس هو مطنشها.. ومشى صد وراه شاف مجد تتطالع اللوحات الي فالممر.. يته ضحكه وهو يشوف شكلها كيف مندمجه.. تقرب شوي صوبها سلمان: الإخت مجد .. ماتبين تروحين قسمج؟ مجد: ها .. انتبهت لعمرها ونزلت راسها وهي تضحك على شكلها وهي قافطه.. بلا بلا بروح.. سلمان مشى وكان لازم ينزلون الطابق الأول وهم كانو فالثاني.. سلمان: انتي انزلي بالمصعد للطابق الأول.. وانا بنزل بالدري.. مجد استانست .. الله يكثر من امثاله والله انه ريال والنعم فيه لو واحد غيره بيرز وي وياي فاللفت.. دخلت مجد اللفت ونزلت.. وسلمان نزل بالمصعد وصلوا تقريبا في نفس الوقت.. لأن سلمان سريع بحركته.. سلمان توه من فتح باب الدري.. شاف في وي كمال مسؤول مجد.. يوده: كمال.. كمال: نعم استاذ.. سلمان: ياريال كم مره قلت لك ازقرني بإسمي.. وعن هالرسميات.. كمال: تسلم والله دوم رايتك بيضا.. سلمان: الله يسلمك.. المهم هاي مجد (يأشر عليها) الي بتتدرب عندكم فالقسم وانت المسؤول عن حضورها وغيابها وشغلها.. كمال: حياج اخت مجد .. بنهلكها من الشغل عيل.. رفعت مجد حياتها وهي ساكته .. سلمان: ماعليج يسولف وياج.. بيعطيج شغل بحيث يكفي لتقييمج.. مجد تهز راسها وساكته.. كمال استغرب هالبنت بلاها ماتنطق شو بلما.. ابتسم لها سلمان واستأذن وراح.. كمال: تعالي وياي اراويج مكتبج.. عاد اسمحي لنا كل شي فالقسم هني مختبص تدرين الديزاينز وهالسوالف دوم حشره.. مجد: لا ماعليه.. كمال من سمعها ترمس ضحك ولاحظت مجد ضحكته.. مجد اطالعت وراها تحرت شي وراها وهو يضحك شافت مافي شي... : في شي يضحك.. كمال: لا لأني شفتج من اول ماييتي ساكته واحين فجأة رمستي .. والعادة المتدربات متعودين عليهم لسانهم طويل.. مجد وهي تتطالعه بنص عين: اهااا .. كمال: اتفضلي هذا مكتبج.. واي شي بغيتيه حاضرين.. مجد هزت راسها وسكتت.. وسلم لها كمال الشغل الي عليها تسويه وبدا يشرح لها وهي مركز على كل كلمة يقولها عشان تفهم .. كانت متشجعه للشغل وايد.. ... ... .. نرجع لأول ما وصلت شما دوامها.. استغربت يوم شافت الباركن الي دوم توقف فيه هالمره سياره ابراهيم واقفه .. راحت ودورت لها مكان ثاني وقفت فيه.. ونزلت من السياره وبندت الباب وصدت تفاجئت بإبراهيم واقف في ويا.. شما: السلام عليكم.. ابراهيم وهو يطالعها بخبث: وعليكم السلام.. زين تعلمتي تسلمين؟؟ علموج البارحة الظاهر.. شما استغربت.. بس طنشته.. ومشت.. ابراهيم مشى وراها: اخبرج يوم ارمس وياج توقفين وتسمعين.. مب وحده شرواج اطنشت رمستيه.. شما صدت صوبه وكانت الشمس بويا فكانت مغمضه عين وفاتحه الثانيه وهي تشوفه: انت شو فيك من صباح الله.. شي بلاك.. ابراهيم: سلامتج.. بس اعلمج كيف ترمسين شما سوت له حركه براسها كأنها تستهزأ فيه ومشت ولا عليها منه.. ودخلت الشركة وسجلت حضورها ومشت صوب مكتبها.. وابراهيم مغيض منها.. ويلست شما على مكتبها وصبحت على بوسعود.. ويلس ابراهيم على مكتبه وياب كرسيه صوبها.. بس هالمره قربه منها وايد .. كان شوي وبيلصق فيها.. بوسعود تم يطالعه مستغرب من حركاته.. ونفس الشي شما.. شما: لو سمحت رد مكتبك.. وين تتحرى عمرك.. إبراهيم: ما اتحرى عمري مكان.. حرام يعني اجرب منج ابا ارمسج.. شما: عندك شي قوله وانت على مكتبك لو سمحت.. ابراهيم: واذا قلت لا.. شو بتسوين؟ وماحس الا في بوسعود ايي صوبه ويسحب كرسيه صوب مكتب ابراهيم ويوقف مجابلنه: انت شبلاك تخبلت.. ابراهيم: روح زين.. شو سويت انا الحين.. بوسعود: مايخصك في بنت الناس عيب عليك.. لا تحرى كل البنات شرات بعض.. ابراهيم وهو يطالع بوسعود نظرة المسكين الي مايعرف شي: طلعت شاطرة تقص عليك وعلى الي فالدوام وتسوي عمرها شريفه مكة.. قالها بصوت عالي بحيث سمعت شما الرمسه وغيضت من الخاطر وقفت له ولا حست بعمرها ان صوتها شوي عالي: اخبرك .. انا اشرف منك .. فاهم.. ابراهيم: واااااااضح انج اشرف واااااضح.. ردي مكانج بالزين وخليني ساكت.. بوسعود عصب..: ابراهييييييم.. شو هالرمسه بعد.. ابراهيم: ياريال هدي وايلس وبقولك كل شي.. تم بوسعود واقف لإبراهيم يطالعه بغضب.. وشما من الصوب الثاني واقفه تطالعه.. وشوي الا أميره طالعه من مكتبها يوم زقرها واحد من الموظفين وقالها عن الي صار.. اميره: شو الي صاير يا جماعه.. ابراهيم: اميره .. شو هالأشكال الي توظفينهم عنا؟؟ رجاء ييبي ناس محترمين وخليهم وسطنا.. مب.. (هز راسه) استغفر الله.. شما: انت بتسكت وتحترم نفسك ولا شو.. ابراهيم : شو بتسوين راويني.. قمتي تستقوين اشوفج.. اميره: تعالو المكتب عندي بلا فضايح.. ومشى كل من ابراهيم وشما وبوسعود صوب مكتب اميره ودخلو المكتب وصكوا الباب .. اميره: ممكن افهم السالفه بكل هدوء.. ابراهيم: خل ست الحسن والدلال تقولج عن سواد ويا ... انا ماعندي شي.. شما تنهدت ونزلت راسها: لحوووووول شو هاليوم الي مابيمر على خير.. ابراهيم: اي خير نشوفه من ورا اشكالج.. استغفر الله.. بوسعود: ابراهيم.. شو هالرمسه الي تقولها.. البنت ماشفنا عليها شي غلط.. وليش هالرمسه.. اميره: بوسعود اظني انت وانا.. وكل الموظفين عارفين ابراهيم زين ومن اي نوعيه.. ومب هو بيي يعلمني اوظف منو ولا وين.. وانا شما اعرفها شرات ماعرف نفسي.. ابراهيم ضحك بإستهزاء: شووو.. تعرفينها شرات ماتعرفين نفسج.. ه عيل على الدنيا السلام.. اميره عصبت وقفت وضربت بإيديها على المكتب: بس.. يكفي لهالحد.. قول الي عندك ولا التفاهم مع المدير العام.. ابراهيم: اييييييييه انتي..مب انتي ولا عشرة من اشكالج ويا ربيعتج هاي تهددوني وتخوفوني فاهمه.. وانا اذا برمس برمس بمزااااااجي.. شما: ارمس وشو الي مانعنك يوم تقول ماتخاف.. ابراهيم: اسكتي اسكتي.. شايفنج بعيني هاي ولج ويه تنطقين .. عفان الله بس.. شما: شو شايف قول.. ابراهيم: لا عيب استر على الناس احسن.. شما: لا قول.. واذا عن بوسعود.. مب مشكلة شرات اخويه العود .. قول يدامه انا واثقه من نفسي.. ابراهيم: اصلا مايشرفه يكون له اخت شرواج يوم بيدري.. شرات اخويه اونه.. انتي اتعرفين اخو.. قاطعه بوسعود: بس يا ابراهيم احشمني انا على الأقل.. وعندك شي ارمس بلا مقدمات.. ابراهيم وهو يطالع بوسعود بنص عين.. : برمس.. لا تحاتي.. ممكن تسألون الإخت الشريييييفه العفيفه.. منو هذا الي كان يسحبها وايرها صوب السياره وركبها سيارته ؟؟ تذكرت شما هزاع.. ضحكت من خاطرها.. الكل استغرب من ضحكتها.. ابراهيم: تضحكين على سواد ويهج صدق انج وقحة و.. ماقدر يكمل رمسته الا يته صفعه من شما.. وماحس بعمره ابراهيم الا وهو ماسك ايد شما.. ويمشي بوسعود صوبه بسرعه ويسحبه: انتو ايييه.. نسيتوا اعماركم وين انتوا؟؟ هذا مكان عمل.. ؟ اميره ساكته ومصدومه.. تحس عمرها ضايعه.. شما صدت صوب بوسعود وهي ميته قهر ومغيضه .. ومتغصصه وتبا تصيح من القهر وتدعي على هزاع في خاطرها.. : تذكر يوم قلت لك عن المراجع الي كان عند ابراهيم امس وقلت لك انه ولد عمي.. بوسعود يهز راسه: هيه.. بلاه؟ شما صدت تتطالع ابراهيم بثقه: هذا ولد عمي هزاع الفلاني.. في خلافات بين عوايلنا.. وهو معارض اني اشتغل فهالمكان وهذا الي خلاه اييني ويسحبني يوم عرف اني اداوم هني.. عرفت احين يا اخ ابراهيم.. ابراهيم سكت.. حس بحراره في جسمه.. نسى الصفعه والغضب الي هو فيه.. حس نفسه عايش موقف ماينحسد عليه ابد.. بوسعود دز ابراهيم صوب اليدار: اعوذ بالله منك ومن شرك.. وطلع من المكتب ولحقته شما وشلت اغراضها .. بوسعود: وين سايره.. شما كانت تصيح فهاللحظة ومتضايقه من الخاطر.. : بس يكفيني عالصبح اشوف الي شفته ارد البيت اشرف لي.. صدقه ولد عمي يوم قالي ماعنا بنات يشتغلون.. الله يلعن الحاجه.. بوسعود لحقها ماهانت عليه تروح بهالحاله.. : هدي عمرج الي لازم يطلع هوه مب انتي.. وبعدين انتي في بداية شغلج وخروج هذا مب لصالحج.. شما وقفت مكانها وتصيح بحرقه وتشهق: الله لا يسامحك يا هزاع على اللي سويته فيني.. لا سلمت منك ومن شرك وانا فالبيت ولا بسلم منك وانا هني فالدوام .. بوسعود: سيري تغسلي وصلي ركعتين الضحى يمكن تهدين شوي .. بس لا تروحين البيت وانتي بهالحاله شما تنهدت :ان شاء الله وراحت صوب الحمامات .. ورد بوسعود صوب مكتبه .. وهو مقهور من ابراهيم.. وشاف ابراهيم توه طالع من مكتب اميره.. شل سويج موتره من على طاولته بدون لا يرمس ويقول اي كلمة لبوسعود ونزل يطلع من الدوام.. وعقبها بخمس دقايق ردت شما الي من شافت مكتب ابراهيم فاضي ارتاحت وقال لها بوسعود انه طلع... يلست على مكتبها وتنهدت وبدت تشغل عمرها بالأوراق والمعاملات عشان تنسى الي صار .. .. مجد بصوت واطي: الله ياخذ ابليسج ماتذكرتيني الا اليوم.. انا فالدوام ماروم ارمس حور: ه شو اسوي اشتقت لج يا اختي .. الي ماتسألين عني مجد: جب امسات شفتج بس كم مره اسأل .. حور: انا اراويج يالدبه.. مجد: ماعليه راضيه دبه متينه .. كل شي.. بس بندي والله انا فالدوام.. حور: ه بعد اشعليها دوام كبرت البنت مجد: من يومي كبيره بس انتي ماتصدقين.. حور: انزين احبج.. مجد: انتي حبج مانزل الا هالوقت عالصبح.. حور: شو اسوي حسيت بشوق غير طبيعي .. قلت لازم اطلعه ماقدر احبسه تدرين بعد حامل.. مجد: هيه اوكي اوكي.. يالله عاااااد حور: كشخه وانتي مغيضه.. مجد: سخيفه ماحبج اكرهج.. حور: ماعليه راضيه المهم انا احبج.. مجد غيضت من الخاطر: ببند في ويهج حور: خلاص خلاص.. يالله عيل مع السلامه.. مجد: مع السلامه .. __________________ |
وما وحى لها بندت الا رن تليفونها مره ثانيه كانت مروه بنت عمها..
مجد وهي مغيضه: انتي ومرت اخوج متفقين علي ولا شو السالفه؟ مروه: بل بل .. كلتيني سلمي بالأول.. مجد : وعليكم السلام .. مروه: ه انزين انا ماسلمت .. وبعدين نسيتي ان مرت اخوي هيه اختج.. مجد: هيه نسيت كل شي.. انا فالدواااااااااام مروه: اي دوام؟ مجد: لحوووول اداوم وورك بليسمنت للكلية.. مروه: اهااا .. انزين انا متصله بس اقولج اليوم نوره وخلود وحور بنتيمع في بيت عمتي شيخه.. تعالي.. منها نستانس ومنها نرمس عن مشروعج انتي وخلود مجد: اوكي اوكي.. يالله باي.. مروه: باي.. بندت الخط وصل لها مسج وهي كانت ترمس ويا مروه.. تمت تتحرطم من الخاطر .. شو ياهم مب متذكريني الا عالصبح واليوم.. مسج من أحمد (( صباح الشوق متجمع وباقه ورد ماتذبل صباح من قلب يدعيلك براحة بال ماترحل)) مجد من غيضها ماردت عليه.. متفيج وايد الصراحة .. خخخ البنت معصبه لحد يرمسها .. . .. مر الوقت عليه وهو يدور فهالشوارع بلا هدف وفي لحظة شاف نفسه قريب من منطقة بيت شما.. استغرب شو الي يابه هني انا كيف ييت .. ومنو الي يابني.. والله اني فاقد كل حاسيتي.. انتبه لضرابه شباب صايره على طرف الشارع.. وانتبه لـ عمّار ولد عمه ( أخو شما).. وقف موتره يشوف شو الي صاير ونزل من السياره ومشى صوبهم.. تم يسمع عمار وهو يفاتن (يصرخ بأعلى صوته).. عمّار: اخبرك انت اييييييييه .. والله ان يبت طاري ولد عمي على لساني اقصه لك فاهم.. اشرف منك ومن انك تقول عنه هالرمسه... وهالفيديو خلني اشوفه في تليفون واحد منكم والله اني اجلب الدنيا ع راسكم.. واحد من الشباب... : عمّار صدق ماعندك سالفة تدافع عن ولد عمك.. انا اكثر واحد اعرف عن سواياه فيكم.. الله يهديك بس (وهو يحاول يسحب قبضة إيد عمار من على كندورة الولد الي قاعد يضربه)... اتعوذ من ابليس.. ولد عمك فاضحنكم وانت تسبه.. عمّار: لو فاضحنا.. انتو تساعدون في نشر الفضيحة.. انا مب مهتم لأنه ولد عمي.. مهتم عشان عمي ومرته .. ولدهم خسيس هم شو ذنبهم.. انسى ان ولد عمي فالفيديو.. ترا بنات الناس فالفيديو.. هن برايهن بايعات اعمارهن.. بس امهاتهن .. واهاليهن شو ذنبهم ؟؟ .. عيب عليك ياي تتفاخر بين الشباب وتوزع.. ... : ياريال استهدي بالله .. ياهل تراه.. عاد اليهال ياحبهم يحصلون من هالسوالف.. مب كل شي بالضرب الله يهديك.. .. : اقولك انا مب ياهل انزين.. والله لا أبلغ عليك الشرطه .. تضربني انا اراويك.. عمّار: والله بلغت الشرطة انت الي بتتوهق.. تنشر فيديو.. سكت الولد .. عمره 16 سنه.. ومراهق.. وبكلمة يخاف.. ويعرف فعلا انه بيتوهق.. لكن الأخ حب يتفاخر ان عنده فيديو حصري ماعرف انه بينضرب من ورا هالفيديو.. هزاع من سمع عمّار كيف يدافع عنه بهالطريقة رغم كل الي يسويه بهم والي سواه ابوه.. تضايق.. كان قريب من الشلة وايد.. بس يوم حس ان محد شافه فضل انه يبتعد ويرد لسيارته.. عمار وربعه كانو معطين هزاع ظهرهم من جي ماحسو بوجوده.. الا واحد كان واقف بعيد وشاف هزاع وتم يراقب الي بيستوي ومن شافه رد سيارته تقرب.. .. : عمار عمار.. ولد عمك كان وراك .. مشى شوي صوبكم وعقب رد موتره.. صد عمار وراه بسرعه وفعلا شاف موتر هزاع يتحرك بسرعه صوب الشارع.. سكت وسحب ايد ربيعه الي كان ميودنه .. وسار صوب الولد الثاني.. عمار: هالمره كسرت تليفونك.. والشباب انقذوك من قبضة إيدي .. المره اليايه اكسرك انت قبل التليفون.. ومشى عنهم راد صوب بيته.. عمار بين ربعه فالفريج معروف بطيبته وهدوئه.. وهم مازعلوا منه لأنهم مدركين ان سببه قوي ومن حقه.. وصل اخو الولد الي انضرب يعرف شو السالفه .. ويوم فهموه الشباب السالفه.. وعرف ان الي ضاربنه عمار مازعل.. لأنه يدري عمار واخلاقياته كيف.. ولام اخوه على سواته .. وسحبه البيت.. .. هزاع من الي حاس فيه كان وقتها المغرب.. سمع الأذان وكأنه لأول مره في حياته يسمع اذان.. ماحس بنفسه الا وهو واقف عند المسيد ونزل وسار يتوضأ.. بس توهق لأنه ناسي كيف يتوضأ.. تم واقف يطالع الجماعه الي يتوضون.. ماحس الا بإيد تضربه على جتفه .. صد شاف ريال ملتحي ومبين عليه فالأربعين من عمره.. جمعه: اشبلاك واقف هني.. ليش ماتروح تتوضا.. هزاع توهق استحى يقوله ماعرف اتوضا.. ابتسم له: لا انت روح قبلي انا بطول فالوضوء.. جمعه وهو كان يسمع هزاع وهو يرمس كان يطالع ملامح وي وكأنه مشبه عليه.. سكت.. : قول الصدق.. بطول فالوضوء؟؟ مادري حاس ان في شي ثاني.. هزاع حس بدمعه حاره في عينه مايقدر يمنعها .. نزلت منه غصبن عنه.. والي دهش الريال تم مستغرب: شبلاك ياخوي.. هزاع: تبا الصراحة ماعرف كيف يتوضون.. اندهش يمعه (تنقال لإسم جمعه بالعاميه).. ريال بعمر هزاع وطوله .. مايعرف يتوضأ.. سكت ماحب يفشله وقاله بصوت واطي: افا عليك.. تعال وياي وانوي نيه الوضوء واتبع الي انا اسويه وبتتعلم.. وفعلا راح وياه هزاع وقفوا حذال بعض وتم يراقب هزاع يمعه وهو يتوضا وتعلم منه.. هزاع: يزاك الله خير.. يمعه: تعرف تصلي؟ هزاع سكت شوي كأنه يحاول يتذكر متى اخر مره صلى فيها.. : اعرف بس يمكن اغلط.. يمعه تم يشرح لها الأساسيات الي لازم يعرفها فالصلاة وهو ماشي وياه صوب باب المسيد لأن الإمام كان يقيم الصلاة.. وبسرعه دخلوا واعتدلوا في وقفتهم في وسط الصفوف.. ورفع ايده هزاع يكبر بإسم الله عشان يصلي.. مجرد هالحركة حسسته بإحساس ثاااااااني.. نسى العالم باللي فيه.. نسى الدنيا ومافيها نسى ان له ابو طايح فالمستشفى.. نسى ان له فيديو في تليفونات الخلق.. ويمكن الي معاه في هالحرم الي يصلون فيه يملكون هالفيديو وشافوه.. وخلص 3 ركعات الفريضه وحس ان وده يصلي للصبح ومايوقف صلاة.. وصلا ركعتين وسلم وصد صوب يمعه الي كان واقف شوي بعيد يرمس الإمام يسأله عن شي.. ومن عقبها رد صوب هزاع .. هزاع: يزاك الله خير.. ماقصرت.. يمعه: افا عليك .. نحن اخوان وهذا واجبي.. الا ماقلت لي شسمك؟ هزاع: وياك هزاع الفلاني.. يمعه وهو يمد له إيده يسلم: والنعم والله وياك يمعه الفلاني.. هزاع: ياحي الله يمعه.. يمعه: تسمح لي اعزمك اليوم بيتي عالعشا.. ترا بيتي مره حذال المسيد.. هزاع: لا تسلم مانبي نتعبك.. يمعه: عيب يا ريال ترد عزيمتي.. لزمت عليك الا انك اتيي.. افتشل هزاع وماقدر يرد الريال وراح وياه ومشوا صوب بيت يمعه الي كان على بعد خطوات من المسيد.. .. .. . فيصل: انتي وينج من يومين ؟؟ مغلق تليفونج عنبوو فطوم: آسفه والله بس انشغلت بالدراسه واييني استاذ فالبيت يدرسني وعقبها اذاكر روحي وارقد فيصل تم ساكت وكأنه مب مصدقنها: اهااا فطوم: شخبارك انت وشخبار يدوو.. والكل؟ فيصل: وانتي اشلج تسألين عن الباقي.. عليج مني ومن يدتج فطوم مستغربه من اسلوبه تحسه قاسي شوي.. : اسفه .. اشحالها يدوو؟ فيصل: بخير.. نحن الجمعه رادين فطوم وهي مستانسه: صدق.. والله؟؟.. يااااااي وناسه.. تردون بالسلامه فيصل: اونج مستانسه احين؟ فطوم مستغربه من اسلوبه.. : هيه ليش يعني ماتباني استانس؟ فيصل: بلا بس اقول يعني.. المهم سمعيني .. ماتغلقين تليفونج بعد خير شر.. فطوم: ان شاء الله اسفه.. فيصل: شوفي لا ترمسيني بهالأسلوب اونج تاخذيني على قد عقلي.. ارمسي عدل .. فطوم تمت صاخه ودها تصيح.. ليش يرمسها بهالطريقة: ان شاء الله.. فيصل: يلا سلمي على الكل.. مع السلامه فطوم: مع السلامه بندت عنه وهي متضايقه مب من عادته يرمسني بهالطريقة.. ليش جي وياي؟؟ انا شو سويت ؟؟ كل ها عشان غلقت تليفوني... مايسوى علي.. لا مابغلق تليفوني بعد مافيني.. .. .. في بيت خلود نوره: .. بس ذبحتوني والله .. مهاري تعالي يلسي هني ماما .. لا تروحين صوب الكهربا مب زين.. خلود: ويييييه مشكلة المعرسات .. ماما.. وبابا.. مجد: عدااااااال الي يسمعج يقول عانس عمرها 30 .. ولا جنج بعد كم شهر بتستوين حرمه.. مروه: هيه ومحد بيتم عانس غيرج يا مجووود.. مجد: اصلا انا ألف من يتمناني بس انا مابا اعرس .. خلود: هيه والدليل الخطاطيب الي صافين عند باب بيتكم.. مجد: اسكتي امسات يايينا الدورية من كثر الشكاوي.. يقولون الشارع الي يدام بيتنا مسدود والسبه انا الكل: خلود: مروه .. إيمان كم كملت احين؟ مروه: فديتها سنتين وشوي.. خلود: ربي يحفظها.. نوره: اقول انا بسير اشوف العنود بلاها تصيح.. ونشت نوره روحت عنهم وقعدت مروه ترمسهم عن سالفه المشروع الي يبون يفتحونه مجد وخلود.. مروه : انتوا احين تبون تفتحون المشروع بدون راس مال مايستوي؟ خلود: لا عندنا راس مال.. انا ابوي قال بيعطيني 20 ألف.. ومجد بعد نفس المبلغ ابوها قال بيعطيها.. ومشروعنا صغير هالمبلغ يكفيه.. مجد: اللي بنسويه نحن عباره عن ديزاينات كموديل يعني.. عشان الناس ياخذون فكرة عن شغلنا.. والغرفة الخارجيه الي في بيتنا مب مستفيدين منها.. فقلت لأبوي بسويه معمل المشروع ووافق خلود: وعاد شوفي الغرفه الصغيره هاي بنجلبها كيف.. بنخليها تطلع شي راهي.. عشان الي يدخل المعمل ينغر بشكل المكان اكثر من البضاعه مروه: طلعتوا داهيه وانا مادري.. خلود ومجد : ه مجد: واللي نباه منج تساعدينا أو تشاركينا لو بغيتي.. دشت نوره وهي شاله العنود في حضنها: شو السالفه؟؟ ابا اعرف؟ مروه تمت تشرح لنوره السالفه.. نوره: ماعليه خلودوو انا اختج ماتقولين لي.. خلود: قلت لج من فتره بس انتي عيالج مايخلونج تسمعين عدل وتفهمين السالفة. نوره: ه صدقج.. انزين انا عندي ديزاينات سويتهم ايام ماكنا في فرنسا.. تحيدين خلود؟ خلود: هيه والله صدق.. انا نسيت ان عندج خلفيه بهالسوالف وكنتي تسوين قبل.. مجد: تمام عيل شاركينا.. مروه: وانا بعد بشارككم.. عشان نبدأ صح لازم يكون الشغل مرتب .. خلود: ياي تحمست.. وقعدوا البنات يرمسون ويتفقون شو يسوون للمشروع .. مروه خذت شغلة تزيين شغلات الأعراس وتغليف الهدايا وهالسوالف لأنها تحبهم.. ونوره وخلود .. خذوا شغلة تصميم الشنط بأنواعها المختلفه من جلد وقماش واشكال مختلفه.. ومجد خذت تصميم العبايات والشيل.. اسميهم البنات متحمسات.. .. .. |
فالحرم..
جلثم: وهاي سالفتنا كلها انا ويدك الله يرحمه.. سلطان: الله يرحمه.. حليله يدي طلع زقرت ايام شبابه ونحن ماندري.. جلثم والدمعه تنزل من على خدها: عشره عمر .. على الحلوة والمره.. كان يعامل عمك عبدالعزيز شرا واحد من عياله ويعزه اكثر من حميد وشيخه.. سلطان وهو يلوي على يدته: ترحمي عليه أميييه.. كان ودي اشوفه بس الله ماكتب.. جلثم: توفى قبل عرس امك وابوك بسنه .. صد وراه سلطان شاف فيصل يزقره. فيصل: هاا مابتخاوينا ناوين نروح نحب الحجر الأسود.. سلطان: ياريال الصبح ساير.. مافيه شده .. يهلكونك الأفارقه الي هناك.. فيصل: كنت بقول شي بس بسكت انا فالحرم ومايوز هالكلام.. عيل تروح روحك ولا تقول.. سلطان: انتوا كل واحد حصل له زاويه ورقد .. ناصر: مب انا .. ها فيصل الي رقد وانا من شفته يناخر مارمت ايود عمري عن الرقده الي يتني.. جلثم وهي تضحك عليهم.. : عنلاتكم هب ويه تيون العمره.. سلطان: هيه امييه زيدي عليهم يستاهلون.. .. .. .. . يمعه: ياريال شو هالرمسه.. افا عليك بس.. البيت بيتك.. هزاع: تسلم.. يمعه: الا ماقلت لي شو يابك هالصوب.. مار صوب أحد تعرفه فهالحاره.. هزاع: لا والله ماعرف حد هني.. بس كنت مار سمعت الأذان قلت انزل اصلي.. تم يطالعه ساكت وده يسأله اسأله وايده بس في خاطره يقول .. اتريا شوي احسن.. : زين سويت.. الا في سؤال يقرقع في راسي من شفتك وتلاقيت وياك.. استغربت يوم انك ماتعرف توضأ وناسي صلاتك وانت بهالعمر؟؟ هزاع: تعرف بشو احس.. كأني انسان توني أسلمت ولا اعرف شي فديني.. لا تضحك والله ان هالإحساس الي يراودني فهاللحظة.. الي شفته من مشاكل خلتني اصحى وانش من الغفلة الي انا كنت فيها.. يمعه: الله يهديك ويهدي كل ضال ان شاء الله.. بس من شفتك تراوالي (تهيأ لي) إني شايفك من قبل بس مادري وين؟ وقتها تذكر هزاع الفيديو.. وده الأرض تنشق وتبلعه بس مب قادر من فشلته.. نزل راسه وتم ساكت.. دخل الخادم الي عندهم فالبيت وحط لهم الأكل عالسفره.. يمعه: اقرب .. حياك هزاع رفع راسه: الله يحييك تسلم.. ليش هالعباله كلها والله ان مايحتاي؟ يمعه: افا عليك يا هزاع.. انت ضيف .. والضيف حبيب الله.. ابتسم له هزاع وتوه بيقرب من السفره الا سمع الباب ينفتح بالقوة.. كان مبارك ولد يمعه.. عمره 17 سنه.. يرابع (يركض) ورا اخوه هادف عمره 10 سنين.. مبارك: تعال أقولك.. تعال.. والله ان مايبت التليفون.. هادف: مابا ابا اشوف.. تتحراني ياهل.. انا كبرت خلاص.. مبارك: ابويه شل عنه التليفون.. يمعه: لا حول ولا قوة إلا بالله.. انتوا وبعدين وياكم عيب عليكم فشلتوني يدام الريال الغريب.. كان فهالوقت هادف واقف مجابل هزاع ويطالع التليفون.. فجأة صرخ : ابويه ابويه.. هذا هو نفسه الي في تليفون هزاع.. شوف شوف.. هزاع من سمع رمسة هادف كان في هالوقت توه بيمد إيده على الأكل.. بس من فشلته ماعرف كيف يشل عمره وينش يطلع من المكان.. مبارك بحكم عمره ومراهقته وفضوله.. ربع بسرعه وسحب التليفون عن هادف اخوه وتم يطالع: هيه والله ابويه هو نفسه الي فالفيديو الي راويتك اياه.. ه .. اتييب هالأشكال بيتنا.. يمعه افتشل من عياله .. نش يلحق هزاع بس صد على عياله قبل لا يظهر: حسابي وياكم بعدين .. فشلتوني يدام الريال.. بسرعه لحق هزاع فالشارع لأنه ساير صوب سيارته الي وقفها عند المسيد.. : هزاع.. يا ريال ماعليك منهم يهال هاييل مايعرفون شو يقولون.. قدر يمعه يوصل لهزاع وقبضه من ايده وسحبه بس انصدم يوم شاف عيونه محمره ويصيح..: افا .. شو بلاك؟ هزاع: دخيلك خلني اروح .. انفضحت يدام خلق الله كلهم.. ماعرف وين اخش ويهي من الناس .. وصل هزاع صوب موتره وفتح الباب.. وسار يمعه الصوب الثاني وركب الموتر.. يمعه: انا من شفتك فالمسيد .. شكيت اني شايفنك.. مع اني والله مسحته من تليفون مبارك بس هالعيال ماينقدر عليهم رد ياب الفيديو.. هدي عمرك بس وفهمني شو الموضوع قعد هزاع يرمس ويقول ليمعه كل الي في خاطره.. كأنه كان يدور على شخص يقدر يقول له الي في خاطره.. يبا يفضفض بس مب قادر.. قاله عن ولد عمه الي دافع عنه رغم انه دوم يروح لهم ويغلط عليهم.. يمعه: ربك كريم يا هزاع.. وربك يسامح عبده ويعطيه فرص وايده.. ربك رحوم بعباده.. الي سويته يمكن وايد غيرك سووها وسوو الي اكبر منها.. بس تابو لله ولا ردوا لهالسوالف أبد وربكم وفقهم في حياتهم.. هذا كان درس لك.. شفت الضرر الي ياك انت..وابوك الله يشافيه ان شاء الله.. وكل من يرتبط إسمه بإسمك.. هزاع انسى الفيديو وكل اللي فيه.. وافتح صفحة يديده في حياتك .. انسى.. قاطعه هزاع: شو انسى.. شو تقول؟؟ .. شفت عيالك شافوني كيف ضحكو.. والناس الي فالشارع شو بيسكتهم؟؟ كل من بيشوفني شو بيقول.. انت مب مستوعب كيف الموقف صعب يمعه:والله يا اخوي حاس بالموقف كيف صعب وكبير على ان الواحد يتحمله.. بس احين انت فكر كيف تتسامح ويا ابوك.. كيف تصلح أمورك وياه.. هزاع حط راسه على السكان وكأنه يحس ان في ثجل كبير على ظهره مب قادر يشيله ولا مب عارف كيف يشيله.. بس الي طرى على باله طارق.. هو السبب في كل الي صاير .. والله اني مابسكت له .. بخليه يندم على اللحظة الي عرفني فيها.. يمعه حط ايده على جتف هزاع: تسمح لي اقولك شي؟؟ هزاع: تفضل قول.. يمعه: المكان الي فالفيديو.. بعده على حاله؟؟ ولمنو هالمكان؟؟ رفع راسه هزاع كأنه يفهم الي يبا يوصل له يمعه: هالمكان بإسم ابويه.. مزرعتنا هاي.. يمعه: من هني خطوتك الأولى.. تسد كل شي كان يستوي هناك وتقطع الشر من جذوره.. وعقب تصحح الفروع.. ابتسم له هزاع وربت على جتفه: يزاك الله خير ذكرتني.. يمعه: افا عليك اخوان نحن.. احين انزل وياي نروح نتعشى.. هزاع: لا اسمح لي مره يايه ان شاء الله انا دليت بيتك.. وان شاء الله اليايات اكثر.. بس خلني اسير المزرعه وألحق عليها قبل لا يبدأون سهرتهم.. يمعه: ماتباني أخاويك؟ هزاع: لا ماعليك.. بدبر أموري.. يمعه شل تليفون هزاع.. : بتصل على تليفوني عشان اخزن رقمك.. وانت خزن رقمي.. واي وقت بغيت شي امانه عليك تلجأ لي.. هزاع: ان شاء الله.. ونزل يمعه من موتر هزاع.. الي طلع من باركن المسيد بسرعه واتجه بأقصى سرعته صوب المزرعه.. الي تبعد عن المكان الي هو فيه ساعه ونص.. بس وصل للمكان خلال 45 دقيقه.. وهو يحس بالشراره تطلع من عيونه.. وده يكسر كل شي في ذاك المكان.. المكان الي دمره.. ووصل ابوه للمستشفى.. ابوه الي دلعه وعطاه الحابل بالنابل.. ولعب بالمزرعه ع كيفه.. وجلبه لمرقص ودار خرابه.. وقف موتره وكانو مواتر الباقي صافين فالمزرعه.. نزل من سيارته وهو معصب على الآخر.. ودخل الفيلا.. شاف الشباب قاعدين يطالعون تلفزيون.. والي يجهز للحفلة.. والي يرمس تليفون.. كانت عينه بالأول تدور على طارق بس للأسف ماشافه.. الشباب: هلاااااااااااااااااااااااا هزاع.. وينك ياريال نترياك من متى ؟؟ دومك تكون مبرز هني.. هزاع اطالعه والغضب مبين في عيونه: طارق وينه؟؟ خلفان: والله هذا صار له يومين مختفي مايينا.. هزاع وبصوت عالي وبكل غضب: اتصلو فيه هاتوووه.. واحد من الشباب اسمه فلاح كان فالمطبخ وهو يدري عن سالفه الفيديو ويوم سمع صوت هزاع جي عرف ان هزاع درا بسالفة الفيديو.. والي يعرفه ان طارق هو السبب.. خلفان: ياريال شو بلاك معصب.. هدي .. شو تبابه ؟؟ هزاع تقرب من خلفان ويطالعه بنظرة حاده: قلت لك اتصلو فيه وهاتووووووووووووووووه ماسمعتني... خلفان نش لهزاع معصب: ياخي لا تعلي صوتك علي.. لا خادمك ولا اصغر عيالك عشان ترمسني بهالطريقة.. هزاع: جــــــــــــــــــــــــــــب.. اطلع برع.. خلفان توه ياي يضرب هزاع .. الا ايوده واحد من الشباب ويسحبه برع الميلس: كلنا بنطلع .. مايسوى عليكم تتضاربون وتتذابحون.. هزاع: ولا ابا اشوفكم هني فاهمين.. وسوالف سهراتكم هااااي دورو لكم مكان ثاني تسوونها.. اما مزرعه ابويه تنسوووونها.. وتنسون ان لكم ربيع اسمه هزاع.. نش واحد من الشباب تم يتقرب من هزاع مستغرب: شو بلاك هدي عمرك.. شي صاير؟؟ هزاع وهو يدز ربيعه صوب اليدار: إطلع بررررررررررررع .. ماسمعتني؟؟ .. : عنلاتك.. علك الموت بعد.. ياي اسأل شو بلاك وانت ترد علي جي.. ماتستاهل حد يتنشد عن حالك.. الشر علي انا الي اسألك .. طلع فلاح وسحب ربيعهم وهمس له في اذنه يخبره السالفه.. وهو طلع ينفد بروحه لأنه يدري هزاع بهالحاله مايرحم حد.. كان يالس على الكنبه وحاط ايده على ريوله ويهزهم من الحاله العصبيه الي هو فيها.. تقرب ربيعه ضاعن منه .. ويلس حذاله: افا عليك بس.. انا ربيعك من أيام المدرسة وتبا تقنعني ان مافيك شي وانت داش ماخليت واحد ماغلطت عليه ولا بتمد ايدك عليه.. هزاع انهار فهاللحظة.. : شو اقولك.. اقولك ان ابويه بسبتيه طايح فالإسبيتار (مستشفى) مايندرابه حي ولا ميت؟؟ .. اقولك ان كل من يعرفني يفتشل لأنه يعرفني؟؟ .. أقولك ان هالمزرعه الي بإسم ابويه تشوه اسمها والسبة سواتي.. ااااااااااه خلني دخيلك.. عيب علي أصيح.. بس من الي انا فيه مب قادر ايود عمري خلاص.. ضاعن تم مصدوم وهو يسمع هزاع .. كأنه تخيل نفسه في موقف هزاع الي ماينحسد عليه.. وتحمد ربه ان فـ اليوم الي تصور فيه الفيديو ماكان متواجد .. ولا حالته بتكون شرات هزاع وألعن.. والباقي بعده ماوصل لهم الفيديو.. هزاع: ضاعن العمر كم بقى منه عشان نضمن ان نحن بنعيش وبنقدر انتوب على سواتنا.. هذا سلطان وفيصل وناصر .. كلن ربك هداه ودروا عنهم كل سوالفهم ولا عاد طبوا هالمكان من اليوم الي ودروا فيه سواتهم..لكن خويك الي هو انا لا اعتبرت منهم ولا تعلمت.. وتميت على سوالفي لين ماطاحت على راسي.. (صد صوبه وحط ايده على جتف ضاعن الي كان منزل راسه يسمع ويحس بحرقه في قلبه) تخيل نفسك تطلع من هالمكان وانت راد البيت سكران تدعم لك واحد ولا تدعم لك شي وتموت.. كيف نجابل ربنا ونحن سكارى؟؟ الواحد يحشر على الحاله الي كان فيها يوم مماته.. (تساند على الكنبه وتنهد) دخيلك انت ربيعي واحب لك الخير.. مابا الي صابني يصيبك في يوم من الأيام.. ودر عنك هالشله الخايسه الي خربتني وخربتك.. وخلنا نتوب ونعرس يمكن الله يهدينا ويرضى علينا.. ضاعن ابتسم له: طول عمري احس ان فيك ذرة خير.. بس انت الله يهديك ماتبا تبينها لنا.. ابتسم له هزاع: متفيج.. ضاعن: نش تغسل خل نصلي العشا.. هزاع: تعرف انت احسن عني بشي واحد.. رغم انك اتيينا وتسوي الي تسويه.. الا ان صلاتك عمري ماشفتك سهيت عنها.. ضاعن: يمكن عشان جي في مني أمل اني اهتدي.. وانت لأنك نسيت ربك فنساك وعلمك درس عشان تحس انه موجود.. هزاع: يلا عيل نش .. ونشوا سوا سارو يتوضون .. وصلو من عقبها سار يدور له شي ياكله لأنه يوعان.. ومن دش المطبخ شاف غراش الخمر.. ضاعن على رغم سوالفه بس ماكان يشرب.. ولا يدخن.. نش هزاع ويا ضاعن وشلو الغراش وكسروها صوب الرملة.. ومن عقبها قعدوا ينظفون المكان يرتبونه انشغل هزاع بالسوالف ويا ضاعن ونسى السالفه شوي وهدا.. حس ان راسه يعوره من يشوف الغراش.. حس ان وده في غرشة بس يود عمره .. لأنه عاهد نفسه يتوب لله .. ويودر عنه سوالفه.. لكن ماقدر ينسى شي واحد.. الي من يتذكره يغلي من داخله من الغضب.. طــــــــــــــــــارق.. .. .. .. |
الأربعا الصبح
رن تليفون شما الساعه 10 الصبح.. استغربت.. كانت وحده من رباعتها الي صار لها فتره طويله ما اتصلت فيها.. شما: ألووو.. عهود: هلا والله بهالصووووووت.. شما: ه اهلين.. اشحالج؟ عهود: بخير ربي يسلمج.. انتي اشحالج؟؟ شما: بخير .. ها القاطعه شو مذكرنج فيه من صباح الله خير.. اكيد في شي؟؟ عهود: مب قاطعه والله مشغوله تدرين على مشارف الزواج .. شما: ربي يبارك لج ان شاء الله .. عهود: تسلمين والله.. شما: الله يسلمج.. عهود: المهم متصله أسألج.. انتي عمج اسمه حمد فلان الفلاني.. ؟؟ شما فجت عيونها: هيه شوبلاه؟ عهود: هذا مرقد عندنا فالمستشفى .. من قريت اسمه تذكرتج .. قلت بسألج.. شما: احلفي من متى مرقد؟؟ عهود : لحظة بشوف ... اممم.. مرقد من يوم الإثنين.. شما: ليش شو بلاه؟؟ عهود: أزمه قلبيه.. شما وقفت في مكانها : شوووووووووو.. خلاص خلاص احين يايه.. وبندت الخط عن عهود .. صد صوبها بوسعود.. بوسعود: خير شما شو صاير؟ شما والدموع في عيونها: عمي فالمستشفى يته أزمه قلبيه.. بروح اشوفه بوسعود: مايشوف شر ان شاء الله.. شما: الشر ماييك.. وبسرعه خذت اغراضها.. وسارت تاخذ اذن من المدير بالخروج عشان تزور عمها.. طبعا فهاليوم إبراهيم ما داوم .. ولا حد اهتم ان كان موجود أو لا.. كانو معتبرين غيابه عيد.. خخخخ .. .. .. شو تتوقعون سر تغيير فيصل.. هل هو فعلا متغير ولا فقط كان معصب؟؟ أحمد ومجد إلى أين بهذا الحب؟؟ هزاع هذا التغيير راح يغير نظرة شما له؟؟ إبراهيم شو بيصير عليه؟؟ جواهر ومجد بدأوا شغلهم .. شو بيصييييير؟؟ هزاع بينتقم من طارق على اللي سواه؟؟ بعد الي سمعه من عمّار وهو يدافع عنه.. شو موقفه مع عيال عمه؟؟ شما من سمعت ان عمها فالمستشفى راحت له.. هل زيارة شما بتغير شي في نفس عمها؟؟ تحياتي الملخص: تغير فيصل.. توبه هزاع واكتشافه موضوع الفيديو.. ورغبته في الإنتقام.. بدء مجد العمل والتدريب.. ضرابه عمّار عشان ولد عمه.. موقف شما مع ابراهيم.. تخطيط أحمد لمفاجئة مجد... |
الجزء التاسع
الفصل الأول =-=-=-=-=-=-=-=-= أم عمّار: شو تقولين انتي؟؟ شما: امي ماشي وقت يلا بسرعه لبسي عباتج خلينا نروح.. أم عمّار: مسكين والله مايستاهل.. وبدت تذرف دموعها وهي سايره غرفتها عشان تشل عباتها وتروح مع شما المستشفى.. مهما يكون عم عيالها.. انسانه طيبه ماتعرف الحقد .. نست في لحظة ان هالإنسان المريض تعبها وعذبها وخلاها تشتغل وتكد عشان تعيش عيالها في خير ولا يحتاجون لحد.. وتوها بتظهر ويا شما.. إلا عمّار ينزل من الدري ويشوفهم.. : وين سايرين؟ شما: انت ماسرت المدرسة ؟ عمّار: لا تعبان شوي.. أم عمّار: هذا اخوش مادري شو بلاه.. من أمس وهو فالغرفه ماله مايكلم حد.. شما تصد صوبه مستغربه: وليش اخويه شو بلاك؟ عمّار: مابلاني شي بس تعبان شوي.. انزين وين سايرين؟ شما: اليوم وحده من رباعتي دقت لي وقالت لي ان عمي حمد فالمستشفى مريض.. عمّار من سمع بالسالفه .. حس ان فيديو هزاع له دخل فالموضوع.. سكت وهز راسه.. : الله يشافيه ان شاء الله شما: مابتيي ويانا عيب؟ عمّار رفع حياته يطالعها مستغرب: هيه تبيني اروح له عشان يروغني شرات ماراغني انا وياج من مكتبه.. الله وياكم سلمو عليه وقولو له اني فالمدرسة اي شي تعلثوا.. واذا راغكم عاد لموا ويهكم يدام الناس.. أم عمّار: شو هالكلام.. عيب عليك.. هذا عمك .. شما: خلج منه اميييييه ها عنيد .. خلنا نسير تأخرنا.. وطلعوا من البيت وركبت شما موترها وبسرعه سارت صوب المستشفى.. ومن وصلت سألت عن المريض ودلوها على رقم غرفته وقفت عند باب الغرفه.. وخايفه انها تدخل .. أم عمّار: يلا دقي الباب وادخل.. شما تبتسم لأمها: ادخلي اميييييه.. مب ادخل.. أم عمّار: انتي وايد فايقه.. يلا ادخلي شما: اماه شو رايج انتي تدخلين .. أم عمار وهي تتهرب: لا لا انتي .. ابتسمت شما وخذت لها نفس عميق توها بتدق الباب الا ينفتح الباب وتفز هي زايغه.. ترفع عينها تشوف مجابلها حمدان ولد عمها.. ابتسمت له.. ماعرفها بس عرف مرت عمه.. حمدان: هلا عموو اشحالج؟ بوحمدان يوم سمع حمدان يقول عموو تحراها وحده من خواته.. ام عمّار: الحمد لله.. حمدلله على سلامة أبوك.. مايشوف شر.. حمدان: الشر ماييج.. الا منو انتي شما؟ شما: هيه انا شما.. اشحالك ولد عمي.. عساك بخير وعافيه؟ حمدان: بخير ربي يعافيج.. الا كيف دريتوا؟ شما: وحده من رباعتيه اتداوم هني.. خبرتني وقلت اقوم بالواجب.. حمدان: ماتقصرين.. رايتج بيضا.. شما: تسمح لي اشوف عمي واسلم عليه.. حمدان: حياج.. دخلت شما وهي ترتعد من الخوف.. وراها امها الي خايفه اكثر منها.. ومن تقربت من سرير عمها الي صد صوبها وشافها انصدم.. : انتي شو يابج هني؟ شما: الحمد لله ع السلامه عمي.. (توها بتحب راسه جان يلف بوي يمنعها).. بوحمدان: مايحتاي تعبين عمرج.. مارمتي اتيين روحج بليا هالهنديه؟؟ قلتي تكملين الحفلة وتتشمتون فيه سوا.. ماتنلامين العرج دساس.. طالعه على الحية أمج.. أم عمّار ادمعت عينها وطلعت م الغرفه.. ونفس الشي شما.. الي تغصصت من الخاطر .. ماقدرت تنطق.. تحس العبره خانقتها.. طلعت من الغرفه ودموعها على خدها وهي ساكته.. حمدان تلوم من تصرف ابوه بس مايقدر يقوله شي او يجادله لأن حالة أبوه مب زينه لأي انفعالات.. بوحمدان: وانت يالهيس كيف سمحت لهم يدخلون عندي؟؟ حمدان: تراها بنت عمي اروغها.. بوحمدان: عمت عينك قول آمين.. اسمعني .. تنسى ان لك عيال عم.. انا تنازلت عنهم كوصي عليهم.. وانتوا تنسون ان لكم عيال عم.. الا وينه الهرم اخوك من امس مازارني.. ولا ربعه اهم من ابوه.. حمدان مايعرف بسالفة الفيديو للحين .. محد قاله عنه .. ولا يدري بسبب غياب هزاع.. يتصل فيه بس تليفونه مغلق.. أو مايرد.. : والله مادريبه يابوي.. اتصل فيه مغلق او مايرد.. حتى سألت ربعه يقولون مايدرون به.. بوحمدان: نفاد ينفده.. اصلا انا ماعندي ولد بإسم هزاع... متبري منه ليوم الدين.. حمدان فاج ثمه مستغرب..: افا يابوي ليش شو مستوي.. حتى عمي زايد (بوعدنان) كان يفاتن عليه ويهزبه مادري بلاه.. بوحمدان: ثرك ماتدري عن سواد ويه اخوك.. سير اسأل عدنان وبيخبرك.. حمدان: شو السالفه ابويه والله اني مب فاهم للحين.. بوحمدان: خلك غشيم ولا تعرف.. اخاف لا عرفت اييك اللي ياني.. حمدان: ابوي شو الي صاير.. دخيلك لا تخرعني .. من كلامك احس ان الموضوع كبير.. بوحمدان تنهد وغمض عيونه .. تم حمدان يطالع ابوه غامضنه حاله .. وطلع من الغرفه بهدوء تم واقف فالممر شوي سرحان يفكر.. قاطعته اخته مها.. مها: حمدان.. شو تسوي هني؟؟ حمدان: ماشي كنت عند ابوي وقلت اوقف برع شوي.. ضجت من الغرفة.. مها: اهااا.. اشحاله ابويه اليوم شو قال الدكتور عن حاله؟ حمدان: الحمد لله .. مستقره حالته.. (ونزل راسه ساكت) مها وتتقرب من اخوها اكثر: شو بلاك حمدان.. ليش جي ضايج.. تراني بديت اوسوس.. حمدان يتنهد.. : شو اقول لج يا مها.. لو شفتي الموقف الي صار يدامي .. موقف يعور القلب.. مها فاجه عيونها: شو مستوي.. ابوي شي بلاه.. حمدان: الله يهديك يابوي.. لا ابوي مافيه شي.. اليوم يتنا شما بنت عمي ومعاها امها.. ابوي راغهم وقالهم رمسة تعور القلب.. نزلت مها راسها.. طبعها نفس طبع اخوها.. ماتحب الظلم الي قاعدين عيال عمها ينظلمون من ورا ابوهم.. وخصوصا احين بعد الي صار فيه.. ابوهم مايحنن قلبه عليهم.. .. .. .. أحمد: انزين وكيف بوصله غرفتها يا أم الأفكار.. جاسم : بدأ يغلط الريال على حرمتي.. خلود: .. مايروم يغلط لأن الأمر كله بإيدي.. خخخخ هوالي بيضيع بخططه جاسم: صدقج.. ( كان احمد متصل في جاسم ويقوله عن سالفة مجد وانه يبا ياخذ لها هديه فإذا ممكن خلود اتيي وياه.. فقرر انه ياخذ اذن من الدوام ويمر على خلود الجامعه بعد ماخلصت حصصها.. وأحمد بعد كان مخلص حصصه وبيبدأ السبت تدريبه لنهاية الكورس.. الأخ خريج منو قده .. ) أحمد: تهقين بيعيبها.. خلود: الا مايعيبها .. اقولك ذاك اليوم بغت تتخبل من شافت الساعه.. أحمد: الساعه كم بترد من دوامها.. ؟ خلود: هيه بترد بتروح عند حور قالت لي.. لأن حور تعبانه شوي.. فأمها وهيه وخالي بيسيرون عند حور.. أحمد: هيه .. وانا ساكن ويا حور ولا ادريبها تعبانه حليلها.. بزورها.. خلود: لاااااااااااااا بتخرب كل شي.. أحمد: بل شو بلاج؟ جاسم: حسيت فيني يوم تصدمني ساعات جي .. خلود وهي تتطالع جاسم بطرف عينها وتبتسم.. وصدت صوب أحمد: ماعلينا .. ترا اذا انت سرت هناك يمكن تشوف مجد.. ونحن متفقين ان نخليها زعلانه لأنك ماتذكرت يوم ميلادها أحمد: ليش انا كنت اعرفه اصلا عشان ازعل؟ خلود: مجوود واعرفها.. بتقولك ليش ماسألت وليش وليش.. ه بتاكلك يعني بإختصار جاسم: هيه متى يوم ميلادج خلود؟؟ خلود: ه قول بعد ما قلت لك.. ؟ جاسم: بلا بلا.. ه بس استهبل أحمد: انزين .. يعني انتي بتسوين كل شي.. مايستوي انزين انا صاحب الفكرة.. جاسم: أهبل انت تبا عمي عبدالعزيز ينفدك ولا تحلم تاخذ بنته عقب.. ؟؟!!.. خلود بتسوي الفكرة عساس انها حابه تفاجأ ربيعتها الي هيه مجد.. بس بتقول لمجد الصدق انك انت راعي الفكرة وجي.. خلود: ه يدرس هندسه وفهمه بطئ.. لاحول ولا قوة إلا بالله.. وعقبها نشوا يركبون السياره وشالين وياهم الأغراض الهديه وكل شي.. عشان يوصلون خلود بيت مجد وتسوي الترتيبات كلها.. وأحمد اتفق مع Roches عشان يجهزون الكيك عالساعه 7 المغرب ويكون واصل عند باب بيتهم.. ومن وصلت خلود نزلت من الموتر وطلت على جاسم: شوي شوي سوق انزين؟؟ جاسم يبتسم لها.. ان شاء الله.. أحمد: اقول يلا فارجي .. تتوصى في ريلها ونست ولد خالها.. خلود: ه كيفي.. ودخلت عقبها خلود البيت وماكان فيه حد غير الخدامه سارت فوق صوب غرفة مجد وقفلت الباب عشان اذا وصلت ماتدخل.. رن تليفونها شافته كان رقم مجد.. خلود: عمرج طويل .. اشحالج فديتج؟؟ مجد: بخير.. شو السالفه أكيد تحشين فيني.. خلود: ه ... اشحالج مرت احمد؟؟ مجد: خخخ.. ويا ويهج.. اي ريل الي مايذكر يوم ميلاد مرته.. غيرج انتي فديت روحج وهلي تذكرتوني من امس الساعه 12.. خلود: ماعليه هونيها وتهون ولاحقة بيذكر لين ماتشبعين.. مجد: ماعلينا.. مابتيين تزورين حور؟؟ خلود: هيه شو بلاها حور؟؟ مجد: ماشي بس الحمل متعبنها شوي.. وحضرتها شوي منفعله فالدوام فأثر عليها.. خلود: الله يهيدها وين ريلها عنها فالدوام .. مجد: تقولج خلود وين ريلج عنج (وهي تتطالع عبيد بنص عين) فالدوام.. حور: حليله ريلي يلحق على شو ولا شو.. عبيد: انتي ايه يالسوسه.. لا تسوين الي تبينه ماترومين تخربين من بينا.. مجد وهي تحد بنظرتها: اوكي .. خل ابند يصير خير.. وكل الي اعرف عن سوابقك بقوله لإختي.. عبيد: عااااادي قولي لها مايهمني.. لأنها تعرف كل شي.. مجد: اصلا المفروض اطالبكم بحفلة عودة بمناسبة يوم ميلادي.. بس عفيت هالسنه عنكم هالحفلة عشان حالة حور.. حور: اسكتي والله متلومه كان ودي اسوي لج حفلة هالسنه.. مجد: السنه ايايه ويا عيالج حفلة جماعيه؟؟ خلود: جنج نقعتيني عالخط؟؟ مجد: فديتج سوري.. خلاص عيل بخليج برايج بكمل تفاهمي ويا هالإثنين.. خلود: شوي شوي عالجماعه .. مجد: لا توصين.. مع السلامه خلود: مع السلامه بندت مجد عن خلود وصدت صوب عبيد.. : انزين شو كنت اقول؟ عبيد: خرابيط.. مجد: حورو دافعي عن اختج شوفي ريلج كيف يحط علي احين كلامي خرابيط عبيد: هيه بعد شو.. عيل سويتيها عياااااالج.. وهم ياهل واحد.. مجد: لا يعني انا قصدي مب بس السنه اليايه.. حتى السنين الي بعدها.. ولا انتوا ناوين بس على ياهل واستوب.. عبيد: لا لا لا.. انا قايل لحور ابا 12.. حور: ه حرام عليك انا هالياهل وشوف كيف هاد حيلي.. عبيد: الله يقومج بالسلامه يا أم منصور حور: الله يسلمك.. فهالوقت حست مجد ان قعدتها فالغرفه وياهم مالها معنى.. طلعت من الغرفه قعدت تتمشى فالممر لين ماطلعت من صوب غرفتهم وكانت فالصالة الي فوق.. وكانت واقفه مجابلة غرفه احمد.. تذكرت موقفها وياه يوم كانت تتطالع في تليفونه.. وعقب تمت تتطالع شاشة تليفونها شافت ان مافي اي مسد كول ولا مسج.. قلبها عورها.. يعني حتى مافتكر يسأل .. يعني معقولة ماسمع ان اليوم يوم ميلادي.. طرت على بالها يدتها.. اتصلت على تليفون سلطان عشان ترمسها بس كان مغلق.. ردت اتصلت .. بعد كان مغلق.. تنهدت.. اففففف شو هالحظ.. .. .. .. هزاع نش من الرقاد.. ونش من بعد ماخذ له دوش بارد.. شرب له كوب جاهي وكل له خبزة.. دور على ضاعن بس ماكان موجود.. فتح تليفونه يا كثر المسجات من عند اخوه حمدان.. بس مارد عليهم.. واتصل في ضاعن.. قاله انه رد البيت لأن ملتزم وياهم .. تم هزاع يالس يتأمل فالحاله الي هو فيها نزل راسه وتنهد.. يفكر كيف يحل الموضوع.. شوي يشوف باب الصاله ينفتح بقوة.. كان حمدان اخوه العود داش.. بس شكله متغير ولا كأنه حمدان الطيب الي يعرفه.. عيونه تنصب منها نظرات الغضب.. : انت هني ونحن جالبين الدنيا برع؟؟ ماسدك سواد ويهك والي صار في ابوي بعد رديت لهالمكان.. انت شو من بشر فهمني.. رفع راسه هزاع يطالعه وهو ساكت مايرد عليه.. تقرب حمدان ويوده من كندورته ورفعه خلاه يوقف مجابلنه: ماتعرف الأدب يوم يرمسك اخوك الي اكبر منك توقف له.. هزاع طول الوقت ساكت يطالع عيون اخوه ولا يقدر ينطق بشي.. حمدان يود أخوه وفره على الكنبه ورفسه بريوله وعقبها صد عنه غطا وي بإيده .. مب متحمل الموقف.. حمدان الهادي الي عمره مايعلا صوته .. اليوم علا صوته ويضرب اخوه بهالطريقة.. هزاع كان مستغرب من اخوه وفي نفس الوقت عارف حجم غلطته وكبرها.. الي ماتغتفر.. حمدان ماقدر ايود عمره نزلت دمعته ويلس على الكنبة حذال هزاع.. : فضحتنا يا هزاع.. فضحتنا.. انا من شفت الفيديو انصكت الدنيا في ويهي.. راسي وقف ماعاد يفكر.. دخيلك قولي الي شفته جذب.. قولي اللي شفته ماله اساس.. دخيلك.. هزاع انهار صياح.. : دخيلك حمدان الي فيني يكفيني.. يكفييييييني.. والله يكفي.. حمدان: واللي سويته لعايلتنا مايكفي؟.. اختك وين تودي ويا من ريلها.. وانا وين اودي ريلي من كل ربع ابوي وربعي واللي وياي فالدوام .. هزاع صد صوب اخوه يطالعه في عيونه.. كانه يترجااااااه يسامحه على زلته.. : سامحني.. وربي ندمان وقررت اتغير.. اللي صار فادني اتكثر من انه ضرني.. لأنه صحاني على الي اسويه.. يوم شفت عمري فالفيديو تقززت من الي كنت اسويه.. رغم اني يوم كنت اسويه اتحسب عمري مستانس.. بس ظهر انها وناسه ماتدوم.. يكفي ان الله غاضب علي عشان الفرحة تنجلب هالجلبة كلها.. اللي اباه الكل يوثق ان هزاع بيتغير والله بتغير.. والشي الثاني الي اباه ابوي يسامحني .. ومستعد لأي عقاب.. وبيت عمي يسامحوني على اذيتي لهم.. حمدان: شو الي غير رايك عن بيت عمك.. تم يقوله هزاع سالفة عمار واللي سواه.. حمدان: معقولة.. هزاع: لو ماشفت الموضوع بعيني كان يمكن ما اصدق.. بس كل شي صار يدامي.. حمدان: طول عمري اعرف ان فيهم خير هالناس.. وقاله سالفه ابوه كيف عامل شما وامها اليوم.. هزاع: الله يهديه ابوي.. احس الي صار فيه من دعواتها علي.. يومها شو سويت فيها فضحتها بطريقتي الهمجية.. حمدان احس اني احب بنت عمي.. اغار عليها.. مادري احس اني اباها تكون ملكي.. يمكن هالشي الي خلاني اسوي الي سوته.. بس بعد الي طلع عني اكيد درت به من عمار... عمرها مابتغفر لي وبطيح من عينها زود.. |
حمدان: حتى لو انت بغيتها تعرف راي ابوي..
هزاع: لين متى الحقد ؟؟ والله مايفيد.. حمدان: انا بعد اقول نفس الكلام.. بس ماتتجرأ تفتحه على الوالد لأنه بيجلب الدنيا ع راسنا.. هزاع: انزين حمدان بغيت اشاورك انا اعرف منو الي نشر الفيديو.. شو رايك نشتكي عليه؟؟ حمدان: انت مينون تشتكي.. تبا تسويها فضيحة عالميه.. لا دخيلك يسد.. ترا لو اشتكيت انت واللي فالفيديو كلكم يمكن تنسحبون على عمايلكم وشي ثاني الفيديو ماتروم تمسحه من تليفون كل واحد.. بيتمون عليه لين مايلقون شي ايدد يتسلون به.. وشوي دخل عليهم الناطور (حارس المزرعة) مالك: أرباب في نفرات برع يقول يريد يشوف مزرعه.. هزاع مستغرب: يشوفون المزرعه شو يشوفون فيها؟؟ حمدان: نش خلنا نسير لهم نشوف.. هزاع: لا مابا حد يشوفني.. حمدان: انت واثق من توبتك؟ هزاع : أكيد.. حمدان: شرات ماربنا قدر يهديك.. بيقدر يحميك من لسان الناس وبيساعدك.. J هزاع استانس على كلام اخوه.. ونش وياه متشجع.. طلعوا شافو اثنين برع واقفين.. يايين من صوب زايد.. لأن بوحمدان طلب منه يدور على شرايين للمزرعه يبا يبيعها .. هزاع نزل راسه حس ان كل هذا صار بسببه .. هالمزرعه الي تعز على ابوه وايد.. او بالأحرى كانت حق من حقوق شما واخوها.. الجماعه الي شافو المزرعه عيبتهم وقعدوا يتفاهمون على السعر .. طلب منهم حمدان يكلمون زايد لأن هو ماعنده خبر عن هالموضوع.. حمدان: أول مره ابوي يقرر شي زين.. هزاع: بس حمدان.. ترا بيزات المزرعه مب كلها لنا؟ حمدان: كيف؟ هزاع: نسيت ان من حق شما وعمار فيه؟ حمدان: هيه صدق.. بس انت تعرف ابويه.. هزاع: الله كريم.. المهم انا ناوي اروح لطارق الي ناشر الفيديو.. حمدان: شو بتسوي له؟ هزاع: بضاربه.. فيه حره دخيلك ابا اطلعها .. لا تقولي لا.. حمدان: مابقولك لا.. لأني انا بعد بساعدك.. يكفي ان ابويه كان بيروح فيها بسببه.. هزاع: الأساس بسببي.. وهو ساعد .. حمدان: هو دوره اكبر.. وركبوا الموتر وبسرعه ساق هزاع صوب دبي عشان يقابلون طارق ويتفاهمون معاه بطريقتهم.. .. . .. أم خليفه: انزين يا خليفه شو سويت عن الموضوع الي كلمتك فيه؟؟ خليفه ارتبك من سمع رمسة امه .. تم يطالع مرته ومرتبك.. وهي مستغربه شو السالفه الي بين خليفه وأمه وهي ماتدري عنها.. : ها كل خير كل خير .. أم خليفه: عاد انا مستعيله وانت تحيرت علي .. خوله: شو السالفه ؟؟ .. أم خليفه: ليش انت مارمست مع مرتك فالسالفه؟؟ خوله زاد استغرابها: اي سالفه.. فهموني.. خليفه تم يطالع امه: ماعليه بقولها عقب ليش مستعيله.. أم خليفه: لا إله إلا الله وليش هالعباله كلها.. شوفي يا بنتي.. تعرفين سوسن بنت عم خليفه.. خوله وهيه تبستم لعمتها.. وخليفه يطالعها وهو خايف من ردة فعلها.. ومرتبك.. : هيه الي توفى ريلها من فتره الله يرحمه.. ام خليفه: هييييه عليج نور.. تدرين بها حرمه مكسورة مجاديفها .. لا ابو ولا اخو ولا ام ع راسها.. وعندها هالولد وهالبنت تربيهم.. وانا قلت اخطبها لخليفه يستر عليها وياخذها ويكون لها عون فالدنيا.. خولة من سمعت اسم خليفه كأنها مب مصدقه الي تسمعه .. والي مشوش افكارها .. تصدق اذنها ولا تجذب عمرها ... : عمتي اي خليفه؟ خليفه يود ايدها: نشي نسير الحجرة.. اطالعته خوله وكأنها تترجاه يفهمها شو الموضوع.. ويقولها انه مب هو المقصود.. ام خليفه: وين شو بلاك مستعيل.. خوله هب ياهل عشان تصيح ولا ترفض.. سمعيني يا خولة.. خليفه الي اطريه.. ولدي.. اللي هو ريلج.. خليفه انحبست الدمعه في عينها وتمت ساكته.. ام خليفه: شو رايج موافقه؟ خوله نشت وهي تحس بألم في ظهرها .. : بالبركه عليهم.. سوسن تستاهل كل خير.. وراحت لغرفتها.. ومشى خليفه يلحق مرته الا تزقره امه: تعال وين ساير.. هاي حركات دلع الحريم ماعليك منها.. وخلنا اليوم نسير عند سوسن ونرمسها.. خليفه: امييه تعرفين ان خولة حامل ومب زين لها هالرمسه .. اتعب اعصابها.. ام خليفه: شو هالكلام .. هب ياهل تراها.. حرمه عاجل وها حملها الثاني الحمد لله.. خليفه: لو ابوي كان يبا يتزوج عليج شو كنتي بتسوين؟.. اي حرمه ثانيه مابتسوي شرات خوله وبتقول بالبركة.. ام خليفه: لا بسوي جي.. الحرمه السنعه تسوي جي.. وانا ادري ان خولة والنعم فيها .. حرمه وكل السنع فيها.. خليفه تنهد ومشى صوب غرفته.. حاول يفتح الباب بس شافه مقفول.. دق الباب.. خوله: نعم منو؟ خليفه: انا .. فتحي الباب برمسج.. خوله: دخيلك خلني روحي شوي .. عقب تعال.. خليفه يطالع وراه عن تكون امه وراه وتسمع: والله يا خوله انا مب مقتنع ومابا اسوي هالشي حتى اسألي حور وعبيد يدرون .. قلت لهم اني مب قادر اسوي هالشي.. مابا شي يمس علاقتي وياج.. خوله وهي تصيح ورا الباب: ليش انت بالذات.. خليفه ليييييش انت.. مافي غيرك فالعايله.. ليش ريلي انا.. مالي احساس مب حرمة.. خليفه تم ساكت مب عارف شو يرد عليها.. ومشى ونزل من الدري طلع برع البيت وهو ضايج.. ويلس في موتره يفكر وين يروح.. .. .. .. نزل من موتره ودق الجرس يتريا حد يفتح الباب.. كان توه مأذن المغرب.. طلعت لهم ياهل صغيره.. عزّه: الثلام عليكم.. ابتسم لها هزاع وتذكر بنت اخته (سلامه) الكبيره.. عندها بنت في عمر عزّة اسمها نوف.. : شو اسمج انتي؟ عزّة: عيب منقود.. ماتثتحي.. ضحك هزاع على رمستها.. : انزين وين طارق؟ عزّة: كلهم ثارو يثلون (يصلون) .. انت ماتثلي (تصلي) ياي هني؟ حمدان تقرب منهم وسمع رمستها وضحك.. : حليلج والله.. صدقها نحن مانصلي؟ هزاع: انا اسف عموو بسير اصلي احين.. عزّة: هيه ذين.. وبندت الباب في ويهم ولا عطتهم مجال ترمس وسمعوا صوت نعالها (اكرمكم الله) وهي تركض.. حمدان: يحليلها والله .. تشبه نوف.. هزاع: هيه من شفتها تذكرت نوف.. (وسكت عقبها هزاع .. تذكر سواته.. لو كانت نوف احين كبيره وعاقله وشافت ان خالها هاي سواته بيشرفها ان لها خال جي؟؟ وشو بيكون ردة فعلها.. ووايد اشيا يت في باله).. وتموا واقفين عند باب سيارتهم يتريونهم يرجعون من المسيد.. وشوي الا يشوف طارق واخوه بدر وأبوه يايين من صوب المسيد.. تيبس هزاع في مكانه .. وهو يشوفهم وده ينقض عليهم ويضاربهم بس ميود عمره.. تقرب منهم شوي وياه اخوه حمدان.. طارق من شاف هزاع تخرع.. لأنه يدري ان الفيديو انتشر.. اما بدر ولا كأنه فالدنيا.. سلموا على ابو طارق ومن عقب مادخل هو البيت .. يود هزاع طارق من كندورته ودزه على اليدار وسانده عليه.. : ليش سويت فيه جي؟؟ في شو ضريتك عشان جي تسوي بي؟؟ طارق كان يحس بخنقه لأنه راص بقبضته على رقبته ... تم يكح وبدر تم يحاول يفج هزاع من اخوه بس ماقدر.. لآنه دزه بكل قوته على الصوب الثاني .. وضرب طارق بكس في وي كسر له خشمه ونزف.. وحاول بدر يضارب.. الا ايوده حمدان وايود ايده ويلفها.. طارق: مب انا الي سويت جي.. يوده هزاع مره ثانيه ودزه على السياره.. والناس بدوا يتيمعون.. ودقوا جرس بيت طارق وطلع ابو طارق وشاف الضرابه.. وكان يحاول يفج طارق من ايد هزاع.. المسكين اندز ويوده حمدان عن يطيح احترامه لكبر سنه.. بوطارق: يالخسيس ياي لعند باب بيتني عشان تضرب ولدي.. هزاع وهو يطالع بوطارق وعيونه محمره من الغضب وكندورته وايده متوصخة من الدم : بذبحه بعد.. لأنه كان بسواته بيتسبب في موت ابويه.. اللي سواه فيه طارق مب شوي.. مب شي يغتفر عليه.. بوطارق رغم حبه لعياله إلا انه مايحب يدافع عنهم لا عرف انهم غلطانين... انسان حقاني بمعنى الكلمة.. ومتفاهم: انزين خل عنكم الضرب والإنتقام .. وتعالو وياي الميلس وفهموني الي صاير دخلوا كلهم بيت بوطارق وقعدوا فالميلس وبدأ هزاع يرمس فالسالفه ويشرح كل الموضوع لبوطارق.. طارق كان منزل راسه ومفتشل.. وبدر عرف ان هو السبب لأنه حط الفيديو في الجات.. توه بيظهر من الميلس.. يوده طارق ورده طارق: وين ساير ساس البلا.. بدر: أأأأنا مايخصني.. انت الي عطيتني الفيديو .. بوطارق نش معصب: بس.. سودتوا ويهي الله يسود ويهكم دنيا وآخره.. هاي نهاية تربيتي؟؟ ريال حشيم اخاف الله .. وعمري مافضحت حد جي تسوون فيه.. وايد مشرفنكم الي سويتوه.. عنلاتكم.. يود قلبه ومب قادر يتحمل الصدمه.. تمت ايده ترجف وطاح.. الكل ربع صوبه.. وبسرعه سار طارق يزقر امه اتييب الحبه الي تنحط تحت اللسان تمنع تجلط الدم عشان يودونه المستشفى.. هزاع نزل راسه وتلوم زود.. تذكر ابوه انه دخل المستشفى بسببه واحين بسبب طارق ابوه يمكن يروح فيها.. ادرك وايقن ان الدرب الي كانو ماشين فيه اكبر غلط.. راح وياهم المستشفى عشان بالمره يمر على ابوه.. حمدان: شفت الي صار بسبب لعبكم الي مامنه اي فايدة.. هزاع: دخيلك.. لا تزيدني الي فيني يسدني.. حمدان: الله يقوم بوطارق بالسلامه.. شو بتسوي عن الفيديو احين؟ هزاع: انت شو بلاك مب صاحي.. توه ابوه داخل المستشفى .. كان بيموت علينا بعد الي سمعه.. يكفيه عذاب الضمير الي عايشنه احين إنه خذل ابوه وكان ابوه بيروح فيها.. هذا يكفيه طول عمره.. مافي درس اكبر من ها.. نحن ضربناه وهلكناه.. بس الضرب مابيغير شي.. سكت حمدان ومشى مع هزاع صوب غرفه ابوهم.. دق الباب.. ودخل.. كانت حالة بوحمدان مستقره ويالس عالكرسي.. شاف فالبداية حمدان.. بوحمدان: وينك من الصبح ظهرت ولا رديت.. حمدان سكت واطالع وراه شاف هزاع يمشي وهو متردد.. : تعال.. بوحمدان: منو الي وياك؟؟ هزاع: انا هزاع ابويه.. فج بوحمدان عيونه وعقد حياته وصد الصوب الثاني: اطلع من الغرفه مابا اشوف رقعه ويهك.. هزاع ربع صوب ابوه ونزل عالأرض ويود إيد أبوه: سامحني ابويه .. غلطت .. سامحني.. سحب بوحمدان ايده ودز هزاع: إطلع برع مابا اشوفك .. الله لا يسامحك اطلع.. هزاع توه كان بيبوس ريل ابوه.. الا يدزه ابوه بريله .. افتشل هزاع يدام زايد وعدنان.. وحمدان.. نش واطالع ابوه توه بيرمس.. سبقه ابوه ورمس: اسمعني.. من اليوم وساير تنسى ان لك ابو .. ولا عاد اشوفك فالبيت يوم برجع .. والله ان شفتك فالبيت لا احرق البيت باللي فيه.. روح غاضب عليك ليوم الدين.. لاانت ولدي ولا انا اعرفك.. هزاع وعيونه مليانه دموع: ابويه وين اسير.. مالي غنى عنك.. انت ابويه وتاج راسي .. ورضاك من رضا رب العالمين.. بوحمدان: جـــــــــــــــــــــــــــــــــــــــــــــــب. . مابا اسمع حسك.. قلت لك لا انت ولدي ولا اعرفك ولا ابا اسمعك تزقرني ابويه.. هزاع: دومك قاسي.. قسيت على عيال اخوك.. شي عادي تقسى على ولدك بعد.. الكل يغلط وانت بشبابك اكيد غلطت.. بس الله كريم ويسامح.. لكن انت طول عمرك جي ماتسامح.. مات عمي ولا سامحته.. قاطعه بوحمدان: حمدان طلع اخوك بسرعه قبل لا انش له.. يود حمدان ايد اخوه وسحبه وطلعه من الغرفه: انت شو بلاك مينون ترمس هالرمسات .. ماتدري ان ابوي يمكن يروح فيها بسبب هالكلام.. هزاع: انا الي عرفته واكتشفته ابوي مب زعلان لأن ولده سوى هالشي.. ابوي زعلان على سمعته وخايف على مصلحته ويا الناس الي يتعامل وياهم.. ولا هو ولا يحبني ولاشي.. تخلا عني لغلطه غلطتها.. قلبه اسود ابوك.. حمدان: تعال وين ساير.. هزاع: خلني اسير.. بسير اي جهنم بترغد فيه.. بس اكون بعيد عن هالظالم.. حمدان: انزين خلك على اتصال وياي وطمني عليك.. واحتجت اي شي كلمني.. هزاع طبطب على جتف اخوه وابتسم: رايتك بيضا ياخوي.. مع السلامه حمدان بحزن : مع السلامه ومشى هزاع ولا هو حاط في باله مكان معين يوصل له.. ولا اي هدف.. مب عارف وين بيوديه هالدرب الي يمشي فيه احين.. .. .. |
خلود رتبت كل شي فالغرفه شرات ما اتفقت ويا أحمد.. وحطت الهديه على الكرسي الي فالغرفه.. وشوي الا سمعت حد يحاول يفتح الباب..
مجد: أمييييييييييييييه.. منو قافل غرفتي.. خلود وقفت عند الباب وهي تضحك: يالدبه انا فغرفتج.. مجد: بسم الله الرحمن الرحيم.. شو وصلج غرفتي انتي؟ خلود: بعد ربج.. اتريي شوي وبفتح الباب.. مجد: شو تسوين انزين؟ خلود: لا تستعيلين بتعرفين كل شي .. اتريي انتي بس.. مجد: افففففف يلا مافيني صبر.. خلود: ه زين زين عشان تتعلمين الصبر.. بندت خلود الليت.. وفتحت الأبجورات اليديدة الي كان شارنها أحمد.. والشموع اشعلتهم.. ورتبت السرير على الفرش اليديد الي كان ماخذنه أحمد بعد.. فتحت شوي من الباب خلود: غمضي عينج .. مجد: شو السالفه تراني مب فاهمه شي.. خلود: احسن .. انتي بس غمضي عيونج.. مجد وهي تغمض: يلا غمضت.. سحبتها خلود للغرفه وقفت وراها: يلا فتحي. فتحت مجد عيونها وصرخت.. .. .. مجد: خلوووووووووود شو ها.. خلود وهي تبتسم لها: مفاجئة صح.. عيبج؟؟ مجد: فديتج والله مشكورة.. واااااااايد حلو .. الا روعه.. لا لا لا .. فانتاستك.. اووووووه ماعرف شو اقول والله.. خلود: احم احم .. لا تشكريني انا .. انا بس نسقت لكن الي ماخذنه شخص ثاني.. مجد وهي رافعه حياتها: ماخذنه!!!!!!!.. يعني مب ماخذتنه!!! .. اكيد ابوي.. فديته وينه.. ؟؟ خلود وهي تيود بوزها: اصصصصص.. لا مب ابوج.. انا قايله لأمج اني انا مسويه كل ها.. هاتي اذنج بقولج منو.. قربت مجد اذنها وتقربت خلود لها وقالت لها اسم احمد في اذنها.. فجت مجد عيونها: لا لا لا لامستحيييييييييل.. خلود: والله حتى هديتج هناك شوفي.. مجد صدت صوب المكان الي أشرت عليه خلود.. شافت كيس باريس جاليري.. بسرعه سارت صوبه وطلعت الهديه الي فيه.. .. .. .. .. وبسرعه مافيها صبر البنت .. شلت الغلاف عشان تشوف الهديه.. تفاجئت من الخاطر.. مجد: أويييييييه خلود.. هاي الساعه الي بغيتها.. خلود وهي تتطالعها مستانسه لأن مجد فرحت لهالمفاجئة.. وماندمت لأنها اتصلت في احمد وقالت له عن موعد ميلاد مجد.. : هيه تراه يوم عرف انها عايبتنج خذاها.. مجد: انزين وليش كلف على عمره على هدايا الغرفه هاي.. خلود: بعد.. الحب ومايسوي.. ابتسمت مجد بخجل ويلست تتطالع الساعه وتلمس كل طرف فيها.. .. .. .. .. خلود: انزين .. وماتبين تشوفين هديتي.. ؟؟ مجد ابتسمت: فديتج والله ماقصرتي.. ليش متعبه عمرج.. خلود: افا عليج انتي بس.. انتي مجد مب اي حد.. مجد استانست وراحت صوب البكس.. .. .. مجد ربعت صوب خلود وحضنتها: فديتج والله .. غصبن عنها ادمعت عينها.. خلود: شوفييييييييج؟ مجد: مستانسه .. والله في عمري محد اهتم فيه بهالطريقه .. صح ان حور ماكانت تقصر في يوم ميلادي .. هالمره بس عطتني بيزات.. وابوي بعد.. بس هالمره غير مميز.. خلود: أحم احم لازم ترا انا موجوده.. واهم شي.. أحمد.. مجد وهي تتطالع وراها وتأشر بصبعها: اصصصصصص.. خلود: ه.. وسمعت صوت الجرس فهالوقت.. ربعت صوب الدريشه تشوف منو الي ياي.. شافت سياره غريبه كأنها من مطعم او شي جي.. وابوها يتفاهم ويا الريال.. وعقب استلم من عند الريال بكس كبير كأنه علبه كيك او شي جي.. ويدخل البيت. تربع مجد تحت تشوف شو السالفه وخلود وراها.. مجد: شو ها بابا؟ عبدالعزيز: استحي ع ويهج لو يدتج هني هزبتج.. قولي ابويه.. مجد: كيفي ادلع ابويه .. فيها شي.. عبدالعزيز يضحك لها ويهز راسه: ها كيك من عند خلود.. مجد صدت صوب خلود وفاجة عيونها: خلودووووووو والله مفتشله منج.. جان تغمز لها خلود وتأشر لها على ان الكيك مب منها.. بسرعه سارت مجد شلت الكيك من عند ابوها وحطته على طاوله الطعام وطلعته.. شافت الكيك كان شكله رووووووووووووعه .. الكل تقرب منها وبارك لها بيوم ميلادها .. وتلموا حواليها.. ويابو لها السكين عشان تقطعه جان تهمس في إذن خلود.. مجد: كيف اقطع الكيك وراعيه مب موجود.. خلود ضحكت وقرصتها: لا اتيي لأنه بيي قال.. مجد استانست: احلفي.. خلود هزت راسها.. مجد: ابويه حرام قلبي يعورني اقطع الكيك.. شكله وايد رووووعه.. عبدالعزيز: لا يكون ناويه بس تتطالعينه؟ مجد: اقول شو رايك اسير البس لبس حلو جي .. واتكشخ عشان اتصور.. عاد الكيك شكله مايتوفت للتصوير.. لطيفه: يحليلج.. سيري بسرعه لأن امج يوعانه ربعت مجد وراها خلود .. ودخلت الغرفه طلعت لها 3 مغربيات عندها.. مجد: اي البس.. الفوشي.. ولا الأخضر.. ولا الأسود والفضي.. خلود يلست مجابلتنها تتأملها: اول مره اشوفج بهالوناسه.. مجد يودت المغربيه الي في ايدها ولمتها وقعدت على السرير.. : تدرين يا خلود.. اول مره احس اني مهمه لإنسان في هالدنيا.. هالشي الي مفرحني.. (يودت ايد خلود وترص عليها) دخيلج ادعي الله ان يجمعني فيه ولا يحرمني منه.. خلود: امين يارب.. بعد لحظة صمت.. مجد: اقووووووووول شقايل عرف عن يوم ميلادي.. خلود وهي تحاول ماتكشف عمرها: مادري يمكن سأل .. او سمع من اختج.. مجد: هيه يجوز.. مب مهم المهم اهتمامه بيوم ميلادي الواضح.. دخلت عليهم لطيفه: امييه مجد البسي شي ساتر وانزلي بشيلتج.. مجد: ليش اميييه؟ لطيفه: أحمد ولد عمج يايب اوراق لأبوج ويالس فالصاله تحت.. وابوج ماخلاه ينزل الا ويتذوق من الكيك.. مجد صدت صوب خلود رفعت حياتها وغمزت لها..: خلاص ان شاء الله امي.. وطلعت لطيفه ولا هي فاهمه شي من حركاتهم.. مجد: بسرعه شو البس.. خلود: الفوشي وايد حلو.. مجد اوكي.. وبسرعه تلبست وجحلت بجحال كحلي.. وحطت لها جلوز وردي فاتح.... لفت شعرها الطويل بمقبض وردي.. ولبست شيلتها.. وعدلت المغربيه بحيث ماتكون ضيجة وايد وترص على جسمها.. وشلت الكاميرا من كبتها ونزلت مع خلود.. مجد: لحظه تعالي.. خلود: وين سايره مابتنزلين؟ مجد: بلا بس خلني اشوفه شوي من فوق.. تدرين مابقدر اشوفه تحت.. خلود: شيطانه.. استرقت النظر مجد ع السريع وابتسمت.. ونزلت .. عبدالعزيز: يلا يابنت الحلال .. يعنا ونحن نشوف الكيك يدامنا.. مجد: هالكثر شكله لذيذ.. ؟ عبدالعزيز: هيه والله .. مجد: امممممم.. لازم ترا صاحبته (وهي تتطالع صوب احمد وتنزل من اخر 3 دريات) حلوة.. نزل احمد راسه.. وتقربت احمد من صوبهم شوي: اشحالك ولد عمي؟ أحمد: بخير يسرج حالي.. مجد: حياك احضر ويانا حفل قطع الكيك أحمد: لا ماعليه بستأذن انا.. عبدالعزيز ايود ايد احمد: لا والله ماتروح الا وانت ماكل من الكيك افا بس.. ابتسم احمد.. وسارو كلهم صوب الطاوله وقفوا حوالينها.. وخلود واقفه مجابلتنهم عشان تصور.. كانت مجد مابين امها وابوها.. وأحمد حذال ابوها.. وفاللحظة الي صورت فيها خلود كان احمد صاد يستغل الفرصه ويطالع مجد وناسي ان خلود تصور.. وقطعوا الكيك وزعوه على الكل وكلو منه.. ومجد ماطاعت تاكل الا قبل ما تأكل امها وابوها.. ومن ثم كلت لقمه من عند امها والثانيه من ابوها.. كانت طول الوقت البسمة مب مفارقها شفتها.. استانس احمد لفرحتها ووناستها.. فهالوقت رن تليفون عبدالعزيز واستأذن منهم لأنه مواعد ربيعه فالمطار.. وطلع من البيت.. ولطيفه سارت المطبخ تزهب العشا.. كانت الصاله فاضيه ومافيها غير خلود ومجد قاعدين على كراسي طاوله الطعام.. واحمد صوب الجلسة أونه يقرا المجلة الي كانت طايحه بس هو يطالع مجد.. مجد وهي تتطالع خلود: تدرين خلود ذوقج وايد حلو .. الكيك طلع حلوو وايد... عيبني.. جان زين كل يوم عيد ميلادي.. __________________ |
ابتسمت خلود : لازم ترا الحلو للحلو..
مجد صدت صوب احمد شافته اونه مندمج فالمجلة ويقراها.. همست لخلود: شوفي الأهبل شو مسوي.. ضحكت خلود واشرت لها مجد انها تسكت.. نشت مجد من على الكرسي وتقربت صوب أحمد: إحم إحم.. أحمد وهو يطالع المجله: نعم.. مجد مسكت المجلة وعدلتها لأنها كانت مجلوبه: مايقرون المجلة جي.. وراحت عنه وصعدت فوق.. افتشل احمد وضحك.. وهز راسه.. ولحقت خلود مجد .. ودخلوا الغرفه وهم يضحكون على شكل احمد وهو قافط.. .. .. عمّار: قلت لكم ماصدقتوني.. شما: دخيلك عمار لا تزيدني الي فيه يكفيني.. أم عمّار: ماعليه هذا عمش ولازم تتحملينه.. شما: الله يقومه بالسلامه .. هذا كل الي اقدر اقوله.. عمّار: المهم غيري السالفه .. وقولي لي.. شو الدوام وياج.. شما من سمعت طاري الدوام تذكرت ابراهيم انعفس ويها : الحمد لله.. عمّار: ليش تقولينها من ورا خاطر؟؟ شو مستوي؟ شما: ماشي.. بس تدري اول ايام تعب لين ماتعلم الشغل.. أم عمّار: الله يوفقج يا بنتي يارب.. شما: هيه يمي كثري من هالدعوات.. كانت الساعه 11 فليل.. رن جرس البيت.. الكل استغرب.. شما: منو ياينا هالحزة؟ عمّار: مادري يمكن حد من ربعي.. أم عمّار: لا ماعتقد.. انت ربيعاتك مايون هالحزة.. ضحكت شما: اميييييه .. شو ربيعاتك.. هاي تنقال للبنت.. ربعك.. أم عمّار: اووووووه.. ونشت عنها وهي تحرطم وشما تضحك.. وسارت غرفتها.. عمّار سار يفتح الباب.. منو الي ياي هالوقت .. من فتح الباب انصدم من الي شافه.. وتم يطالعه من طرف خشمه.. : خير بعد شو عندك؟ هزاع وعيونه ورمانه من الصياح.. وحالته حاله.. ماحس الا عمره دايخ ويطيح على الأرض.. شهقت شما الي كانت واقفه عند باب الصاله تراقب منو الي ياي.. وربعت صوب الباب ناسيه انها مب مغطيه شعرها.. عمّار: هبله انتي طالعه جي.. انتبهت شما لعمرها: اوووووه .. ساعدني انت احين خل اندخله البيت.. عمّار: اكيد سكران وياينا.. شما وهي تهزب اخوها: عمّار.. شل ولد عمك.. عمّار يساعد شما وهو يتحرطم: اي عم الي راغكم اليوم.. واي ولد عم.. الي فاضحنا عند الي يسوى والي مايسوى.. سحبوه ودخلوه الصاله.. وسارت شما قالت لأمها ان هزاع مغمى عليه وفالميلس وهي سارت اتييب شيلتها.. ربعت ام عمّار بسرعه صوب الميلس وسارت عند هزاع وصبت على وي ماي ويابت له ثوم وبصل عند خشمه.. ومن شمهم بدا ينش شوي شوي.. وهي تقرا عليه وتمسح على راسه.. وعمّار واقف على راسه يطالعه بحقد كأنه يتمنى موته.. وعقب طنش وسار صوب غرفته ولا هو مهتم.. ولا كأنه كان يدافع عنه اليوم الي قبله.. ام عمّار: شما امي ييبي ماي.. بسرعه يابت شما الماي وسارت عند امها.. وشربوا هزاع الي نش ويلس : انا اسف اذا زيارتي ازعجتكم.. ام عمّار: شو هالكلام يا عمّار.. البيت بيتك.. بس شو مستوي فيك؟؟ ليش جي؟ هزاع ماقدر ايود عمره .. صاح وقال لهم عن سالفته مع ابوه .. وسالفه الفيديو.. كأنه كان محتاج يفضفض الي في خاطره لأي شخص يفهمه.. ام عمّار: ماعليه ابوك معصب احين .. كلها يومين وبيهدأ.. محد يفر ولده برع.. هزاع: بس ابوي راغني وداسني يدام الكل.. شما: لا تنسى انت غلطان.. يعني لازم تعذره.. هزاع: انا مادري شو الي يابني هني.. بس حسيت ماعندي مكان ثاني.. شما: افا عليك.. البيت بيتك.. طلع عمّار من الغرفه: لا .. مب بيته.. يهبي واحد شراته يبات في بيتنا يوم واحد.. نشت له شما تصرخ عليه: عمّار.. شو هالرمسه..؟ عمّار: يا مسرع مانسيتوا اذيته لنا.. واذيه أبوه.. ماقدر انسى شكل امي وهي تسهر للصبح تشتغل وتكد عشان تصرف علينا.. لغايه مااعتدل حالنا شوي.. هزاع تم منزل راسه ومفتشل.. ماقدر يتحمل اكثر.. نش بيطلع من البيت.. يودته مرت عمه: على وين.. هزاع: انا ما استاهل اتم اي مكان.. شما وهي تتطالع اخوها ومعصبه سارت غرفتها.. لحقها عمّار..: شوفيج؟ شما: عمري ماتوقعت انك حقود بهالطريقه.. نزل عمار راسه: غصبن عني يا شما.. الي سواه مب شوي.. شما: بس هذا مايثبت انه مب من لحمنا ودمنا.. انت وانا وغيرنا معرض للغلط.. وهو اتدلع وعطوه الحريه .. ولا خلوه يكد ويغدي ريال عشان يحس بالمسؤولية.. تم هايت وهذا مصير كل واحد شراته.. احين يوم يانا يطلب العون انت توقف بوي.. عمار نزل راسه .. يعرف ان رمسة اخته صح.. بس قهره اكبر..: ادري.. وانا مارضيت عليه رمسة يوم ان ربعي رمسوا عليه يوم شافو الفيديو.. تدافنت وياهم عشانه.. بس يوم شفته ماقدرت ايود عمري.. تقربت شما من اخوه تتطالعه: انت اخوي الي مالي غناة عنك.. عمّار خلنا نكون الأحسن.. اذا هوه وابوه ماكانو غير عون لنا في حايتنا لهم.. خلنا نكون نحن العون له في حايته.. ابتسم عمّار لإخته وسار الصاله شاف امه قاعده حذال هزاع.. ويلس حذال هزاع عمّار: البيت بيتك ياخوي.. من سمع هالرمسه هزاع استانس : سامحوني.. عمّار: بلا هالرمسه.. وتراك بتشاركني الغرفه .. لأن ماعندنا فرش فالغرفه الثانيه.. هزاع: تسلم والله ماتقصر.. ومابا اكون ثقيل عليكم.. ام عمار: شو هالكلام.. انت مثل ولدي.. والبيت بيتك استعد هزاع ثقته شوي باللي حواليه وإن الدنيا لازال فيها الخير.. .. . خليفه وحاله مع خوله..؟؟ سكن هزاع في بيت شما.. هل له تأثير في حياة شما؟؟ اذا عرف بو حمدان (اللي هو بو هزاع) بإن هزاع راح يسكن بيت عمه .. شو موقفه؟؟ مجد وفرحتها بعيد ميلادها.. وعلاقتها مع احمد؟ هل هذا العقاب يكفي لطارق وبدر.. تتوقعون هزاع يرجع ينتقم ولا كلامه مع اخوه يعني نهاية الموضوع؟؟ تحياتي |
الجزء التاسع
الفصل الثاني =========== الملخص = (( معرفة خوله بسالفه خليفه وبنت عمه.. لجوء هزاع لعيال عمه بعد طرد أبوه له.. فرحة مجد بيوم ميلادها.. ودخول ابو طارق المستشفى بعد صدمته من موقف ولده طارق مع هزاع.. )) =-=-=-=-=-=-=-= نش من الساعه 10 الصبح وحاس بنشاط غير طبيعي.. لأول مره يحس نفسه رقد وباله مرتاح..صح انه مصدع لأنه من زمان ماشرب السم الي ادمن عليه.. بس ع قولته الله يخلي المسكنات.. صد حوالين الغرفه شافها فاضيه.. سار الحمام سبح وتغسل.. وطلع من الغرفه .. شاف الصالة فاضيه مافيها غير أم عمّار.. هزاع: صباح الخير عموو.. ام عمّار وهي تحط كوب الجاهي على الصينيه: صباح النور.. عساك رقدت زين.. هزاع: هيه الحمد لله.. وينهم محد فالبيت؟ أم عمّار: شما راقدة.. تعرف بعد خميس.. وعمّار راح يزور قبر أبوه .. كل خميس يروح هناك.. هزاع سكت شوي وهو يتذكر عمه المتوفي.. وتنهد: انزين تسمحين لي اصب لي شاهي.. أم عمّار: عيب عليك.. انا بصب لك.. هزاع ابتسم وصبت له مرت عمه الشاهي وشرب له شاي وكلا له شي.. هزاع: عموو ماشي جريدة؟ أم عمّار: عمّار وهو راد بييب وياه.. هزاع: ليش عمّار يسوق؟ أم عمّار: لا ماعنده ليسن وين يسوق.. يروح مع ولد جيرانهم .. ذاك يزور قبر يده.. وعمّار يزور قبر عمّك.. مره ثانيه سرح هزاع.. كان لفتره ناسي ان له عم .. بس هم الي مانسوه في حاجته لهم.. وماصار الا وشوي يسمعون صوت صريخ شما.. شما: لحقووووووووو علي.. لحقو علي بموووووت .. لحقو عليييييي.. أمااااه.. عمّار.. تعالو بسرعه .. ربع هزاع ماعرف كيف يوصل عمره للطابق الثاني يشوف شو الي صاير.. شاف باب غرفه شما مفتوحة وهي واقفه فالصاله ولابسه وقايه الصلاة .. وصلت أم عمّار وقفت عند الدري تشوف شو الي صاير. هزاع: شوفيج.. شما وهي قافطه وفي نفس الوقت خايفه: طيــطار في غرفتي ( سحليه ).. هزاع وهو يضحك عليها: وينه خل اذبحه.. كل هالصريخ قلت البنت داش عليها حرامي.. شما: تطنز علي.. والله مب حاس فيه اشكثر اكره هالحيوان.. هزاع: انزين تعالي راويني وينه خل اذبحه.. شما: مابا ادخل روحك دور عليه .. كان صوب التسريحة.. هزاع: بسير.. مشكله انتو البنات.. دخل هزاع وقعد يطالع حوالين الغرفه شافه فوق باب الغرفه.. أم عمّار: والله انا حسيت السالفه فيها حشرة.. شما: يخوف ماما والله يخوف.. عمّار وهو يصعد الدري: منو الي يخوف؟ شما: الطيطار.. عمّار: هبله الحمد لله والشكر.. قلت اسد .. ولا تمساح.. تقول طيطار هزاع وهو يصد صوب الباب من داخل غرفه شما يشوف عمّار: تعال دخيلك هالطيطار خبل بي.. اييه من صوب يشرد الصوب الثاني.. عمّار وهو يطالع شما بنقمة: بنات اخر زمن.. وايد مدلعة بنتج ترا أم عمّار وهي تلوي على شما.. : فديتها بنتي الوحيدة.. عمّار وهو داخل غرفه شما: وانا بعد ولدج الوحيد ولا نسيتي.. هزاع: لا لا غلطان.. الكل صد صوبه مستغرب: نسيت ييت وشاركتك الأخوة.. يعني ماعدت الوحيد.. عمّار: لحوووووول .. راح الدلع عيل.. تمت تضحك شما وتتطالعهم.. وهزاع وعمّار يحاولون المستحيل لغايه ماذبحوا الطيطار.. بس بعد ما خربوا كل شي في غرفه شما.. اغراض التسريحة كلهن على الأرض.. والتسريحة حركوها شوي عشان يقدرون يوصلون وراها.. هزاع: وأخيرا ذبحنا..تقدرين تدخلين الغرفه.. شما وهي تمشي صوب غرفتها: تسلم ماتقصر.. عمّار وهو خاطف حذال شما وهي صادة صوب هزاع.. ياها من وراها.. عشان يخوفها: اووووووه هذو ع جتفج.. فزت شما وصرخت.. والكل ضحك عليها.. شما: براويك ماعليه.. وراحت غرفتها عشان تصلي الضحى وتنزل .. .. .. . جلثم: عنلاتج ولا تقولين يدتي وينها وشخبارها.. خلني ارد البلاد .. براويج نيوم القايله.. مجود: ادري كل ها من الشوق بس مستحيه تقولين.. جلثم: ه عنلاتج والله انج عسل لو شو ماتسوين.. مجود: يدوو اسمع حشرة وين انتي.. جلثم: فالسوق ويا ولد عمتج وربعه مجود وهي توطي صوتها عن تسمعها امها: يدوو حلوين ربعه .. جلثم وهي تضحك: هيه غاويه ماشاء الله عليهم.. خصوصا ها اللي اسمه نصوور.. غاوي.. مجود: خلاص اخطبي لي اياه.. جلثم: عنلاتج صدق ماتستحين .. يبالج هالعصا اصلخ يلدج به .. مجود: افا اهون عليج.. جلثم: ماتهونين والله.. اشحالها الحور.. شو علومها.. شو حملها؟. مجود: اجاوب على اي سؤال.. انتي سألتي 3 اسأله..اشحالها.. وشو علومها.. شو حملها.. اي واحد فيهم اجاوب.. جلثم: عنلاتج ه.. صدق ولهت عليج وع سوالفج مجود: قلت لكم تريو اخلص ونروح سوا.. الا انتي عييتي تروحين الا ويا سلطان وربعه .. ادريبج تبين ترافقين العرب الغاوين.. جلثم: ويديييه.. لطيفه: بسج عاد خلني ارمس امي .. ولهت عليها.. مجود: تقول فالسوق تتشرى لي هدايا.. انتو لا.. لطيفه: هيه انتي هذا الي تفكرين فيه.. هاتي التليفون يلا.. وعطت التليفون امها عشان ترمس يدتها وهي سارت غرفتها وهي تضحك على سوالف يدتها.. صدق البيت من غير يدوو مب شي.. فديتها بترجع باجر ان شاء الله .. ربي يردها بالسلامه.. ...... ... .. حمدان: أبوي والله ان هزاع ندمان . وانت خلاص بعت المزرعه .. والفيديو تراه مانتشر وايد .. أكثر شي وصل للي نعرفهم وغطينا على السالفه.. وهزاع تراه ولدك بتتخلى عنه.. بو حمدان: لا حول ولا قوة إلا بالله.. انت ماتفهم الرمسة.. ولا شكلك تبا تلحق أخوك .. قلت له يدامك لا هو ولدي ولا انا اعرفه.. ماباه ولا لي حاية فيه .. ولا تعود تييب طاريه لأني اتنرفز.. حمدان: بس أبويه.. قاطعه ابوه: جب.. واطلع برع خلني اتريق وانا مرتاح شوي بدون ما اسمع طاري هالخام.. تضايق حمدان وطلع وجابل اخته سلامه وريلها سلامه: شو بلاك حمدان؟ حمدان: ابويه مايبا يسامح هزاع.. سلامه وهي ترفع حياتها بتكبر: يزول.. بعد الي سواه يستاهل.. سود ويهنا.. وانت مزعل عمرك عشانه صدق ماعندك سالفه حمدان: سلامه شو هالرمسه تراه اخونا.. سلامه: نسيت ان لي اخو بإسم هزاع.. وخر خل ادخل عند ابويه.. حد عنده؟ حمدان: لا محد عنده.. دخلت سلامه مع ريلها وبنتها نوف.. شل حمدان تليفونه قعد يتصل في هزاع بس مغلق.. طرش له مسج يطلب منه يطمنه عليه.. وسار صوب الباركات عشان يرد البيت.. .. .. . نزل من سيارته وتنهد وهو يطالع المستشفى.. ومشى صوبها وهو يحس بقلبه شوي وبيوقف من النبض والتعب.. وتوه بيدخل المستشفى.. دعم بجتف واحد صد صوبه تفاجأ انه حمدان اخوه.. تقرب وتوايه وياه وسلم عليه.. حمدان: وينك ياريال اتصل فيك مغلق.. هزاع: شو ابابه هالتليفون.. كل الي يعرفون رقمه مابا ارجع لهم ودمروني.. حمدان ابتسم له ابتسامه خفيفه: زين تسوي.. خطوة جيدة.. انزين اذا ابا اكلمك كيف؟ هزاع: ماشي السبت بقول لشما اتظهر لي رقم من اتصالات.. حمدان: شمـــا.. على ماعتقد ماتقصد شما بنت عمنا؟ هزاع ابتسم له: بلا اقصد بنت عمي.. حمدان: على اساس انك مب راضي بشغلها؟ هزاع: لا مايخصني دام البنت حاشمه عمرها تشتغل وين ماتبا.. حمدان زين يوم انك فكرت واخيرا.. هزاع: وعلى فكرة .. (ابتسم له) تراني ساكن عندهم حاليا لفتره لغايه ما اعتمد على نفسي.. حمدان فج عيونه مب مصدق.. هزاع: تامرني على شي؟بسير ازور بوطارق واطمن عليه... ويمكن امر على ابويه واسلم عليه.. حمدان: لحظه وين ساير.. فهمني بالأول شو السالفه.. هزاع: السالفه.. اني كنت غبي.. وتافه.. وبإيدي ضيعت بنت عمي من ايدي.. لو تنطبق السما ع الأرض ماظني بترضا إنها ترتبط فيني بعد سواتي.. لكن يكفي انهم ضموني في بيتهم في عز حاجتي لهم.. حمدان طبطب على جتف اخوه: قلت لك انهم طيبين.. دوم اقولك.. بس ماكنت تصدقني.. هزاع: لا صدقت وايقنت بعد.. حمدان: خلاص عيل بيي وياك اسلم على بوطارق.. ومشوا سوا داخل المستشفى سايرين صوب غرفه بوطارق يسلمون عليه ويطمنون على صحته.. ومن عقبها قرر انه يروح عند ابوه الغرفه.. بوطارق استقبل هزاع بكل رحابه صدر.. رغم الي صار لكنه يقدر ان هزاع قرر يرجع عن كل اعماله.. طلب من هزاع شي واحد.. وهزاع ماقدر يرفضه له.. ومن عقبها طلع من عنده .. حمدان: شو لك تبلش عمرك في طارق وغيره .. ماعليك منهم وخلك في نفسك يكفيك.. هزاع: حمدان عطيت الريال كلمة.. إني ماودر ولده وأخليه يودر عنه هالسوالف ويرجع يكمل دراسته.. الي بسبتيه وبسبب الشلة الفاشلة خليناه يودر.. حمدان: كيفك.. وانت احين مصر تدخل عند ابوي؟ هزاع: بأدي الواجب وبيتم ابويه لو يدوس علي.. حمدان: انا بتم برع مافيه على لسان ابوي.. هزاع وهو يطالع حمدان بنص عين: دومك جبان.. حمدان: ادخل يالجرئ خل اشوف كيف بتطلع .. هزاع: دخيلك قول للممرضين يجهزون ترولي يودوني فيه الحوادث ماظنتي اطلع صاحي ضحك حمدان غصبن عنه وقف برع يتريا هزاع يطلع.. وماصارت خمس دقايق الا هزاع طالع من الغرفه وعقاله في ايده .. وهو يعدل فالغتره.. حمدان: ها ماتبا ترولي.. هزاع وهو مغيض: اسكت الله يخليك اكرمني بسكوتك.. حمدان: .. شوف شكلك يغمض الواحد الصراحة.. هزاع: من شاف رقعه ويهي ما اشوف الا صحن الحلاو ينفر علي.. زين مسكته ولا كنت رايح فيها.. حمدان: ه .. ولا يكون قلت له انك ساكن بيت عمي.. هزاع: لا خليت هالمهمه السهله عليك.. حمدان يوقف فجأة ويسحب هزاع: نعم نعم.. سهله هاا.. هزاع: ه وايد سهله مابيسوي شي.. يمكن بس ينكسر راسك ولا خشمك.. (تقرب منه يشوف) هو خشمك يحتاج تعديل لو انكسر قولهم يسوون عمليه تجميل وبيطلع كشخه.. حمدان وهو رافع حياته: تدري انك سخيف.. هزاع: ه .. احاول اطري الجو شو بلاك.. حمدان: عنلاتك.. ومشو صوب السيارات وهم يرمسون ويتفقون كيف يوصلون لأبوهم خبر ان هزاع في بيت عمه.. .. .. .. .. .. .. . |
| الساعة الآن 11:07. |
Powered by vBulletin® Version 3.8.7
Copyright ©2000 - 2025, vBulletin Solutions, Inc.
منتديات روعة الكون