منتديات روعة الكون - وشسمه..تعالوا..من زمان عنكم بسولف معكم شوي..

يالله إن تحييهم .. وبهاالمسا الطيب ترضيهم .. وعلى طاعتك تبقيهم ..

وش رايكم بهاالسجع... :biggrin:

خلاص .. ترى كثر السلام يقل المعرفة ..:hah: المهم بقول لكم سالفة صارت لي اليوم يعني فرش طازه .. كنت قاعدتن بصالة بيتنا على الكنب ومربعة وقاعدتن أتصفح جريدة الرياض .. عاد أنا اللهم لك الحمد طبعي غريب .. ومافيه أحد مثلي لأن هاالطبع خاص بالموهوبين اللي كششهم طايرة تسنهم آينشتاين .. ماطول عليكم بوصف مظهري الخارجي ..

وين وصلت ؟؟ ............... إيه طبعي .. أتصفح الجريدة من الأخير والمجلات من الأخير ..<<<والله صدق .. ياكثر ما أقطع سواليفي ..

عاد أنا أستفتح بكاريكاتير الهليل .. :biggrin: وعاد هاالمرة ضحكت ضحك من قلب :sm179: :biggrin:

يوم شفته ماتمالكت نفسي .. وأنا أروح لأمي .. عاد أمي لاشافتني أضحك تبدا تحمد .. قلت يوه أبقرا لتس كلام الهليل وقولي لي وش يذكرتس به .. ويوم قريته .. وتناظرن بنص عين .. وقالت : ورى ماتعقلين وتتركين عنتس الطنزة .. وشوله تعيرين ؟؟ عاد أنا كني بديت أثب إلى رشدي شوي وقلت لها : لا والله ياامي بس عشان أوريت إن فيه مثله مرضى يبيلهم علاج ..

تسني أشوف بعيونكم نظرات استغراب تبون تعرفون من أقصد بالسالفة ..:hah: <<<<ماعلينا من اقصد

اصبروا خلوني احتسي قليلا من الكابتشينو:sm162: قصدي ببسي

إيه .. أكمل سالفتي .. مرة من المرات وحنا جالسين عقب المغرب نتقهوى .. رن جرس الهاتف الثابت .. وكان على الطرف الآخر إمرأة تدعى خطابة ومهنتها ( أم سعد ) .. ودي أفهم شي يؤرطق مضجعي .. ليه فيه تشابه بين أسماء الطقاقات والخطابات .. ماعلينا منهن .. المهم كلمت أمي الخطابة .. ويوم سكرت .. اسحبتن بغمزة :wink: يعني قوه للغرفة الثانية أبيك بسالفة << شفتوا شلون هاالمقطع الطويل اختصرته الوالده الله يحفظها بنظرة معبرة :wink:

قمت ورحت انا وياها للغرفة .. قالت لي .. شوفي signora هذي وحدتن مكلمة تبيتس لولد أجواد .. ماعليه رجل ولاهوب راعي دخان .. وكل فرض بالمسيد << المسجد لغير الناطقين باللهجة :eh_s: .. بس ترى يقول .. ( ماأبي البنت اللي معها جوال .. وماأبي البنت راعية القصات اللي تسنه ولد أبي وحدتن شعره يتطوى تحتها .. وماأبي راعية الانترنت ) .. هنا تمغطت من الضحك .. تبي تقومني أمي عجزت .. بس يوم ناظرتني نظرة أليمة :mad: تعدلت من نفسي ..

قالت أمي : هاه وش أقول .. ناظرت أمي ووجهي بينفجر من قوة ماأنا كاتمتن الضحكة .. يوه بسالتس .. انا متوفرة بي الصفات اللي يبي .. يعني ممكن تتخيلين signora من غير إنترنت وروعة الكون .. ممكن تتخيلينsignora من غير جوال .. ممكن تتخيلينsignora من غير ماتروح لمشغل تقص شعره .. أفكورس امبيسبل << طبعًا مستحيل .. :sm14: تدرين بخير .. قولي له تقول بنتي الموقرة signora طلبكم مهوب عندنا .. خليه يروح يدور بالفلايح والقرى يمكن يلقاه .. وماأظن بيلقاه ..
ياشباب يابنات .. هل من الممكن أن يجد أمثال هذا الشاب فتاة تتوفر فيها جميع هذه الصفات في هذا الزمن بالتحديد .. أعتقد أنه بات من الصعب توفر هذه الصفات ..
في زمن أصبح كل شيء فيه مفتوح ..
لنكن أكثر وضوحًا وصراحة .. عينكم بعيني .. أكثر الشباب اللي يكونون على مستوى عال من الثقافة والتفكير يبون وحدة مثقفة وتفهم من إشارة .. مهيب وحدتن يقعد يفهم بها سنة ويالله تفهم وش يقصد .. :confused:

المهم .. طولت السالفة وهي قصيرة .. لكن حبيت أقول كل البنات signora .. وهذا مايضر البنت .. مايقدح بأخلاقها إذا هي تدخل منتديات وتشارك بروعة الكون :biggrin:ومايقدح بأخلاقياتها أيضًا إذا لها جوال خاص بها يعني مهوب جوال عائلة :biggrin: ومايضر بأخلاقياتها إذا تروح المشاغل وتقص شعرها وتغير من ستايله بحيث لاتنافي التعاليم الإسلامية وتغضب الرب جل في علاه ..

خلاص .. توته توته خلصت الحدوته .. بس حبيت أقول لكم شي .. تراي تسذبت :hah: .. السالفة صايرتن لبنت خالتي ونسبتها لنفسي :hah: وحطيت عليه شوي كمون :biggrin: .. سامحوني ..

تحياتي ..
signora