|
طحت طيحه في هواكم ...........للكاتب السولعي
طحت طيحه في هواكم للكاتب: السولعي الجزء الأول مانع: والله ياانه هوا البر ما فيه حيله . سالم: هيه والله وعاد اللي يحليه اكثر هالحظيره والظو المورايه.. والله انها ما تتفوت.. سيف: وبتحلو أكثر جان بيتكرم علينا الشيخ حمد وبيشل علينا شله غاويه .. سالم: هيه والله .. يالله يعلني أفداك سمعنا شلة من هالشلات الفنانه.. حمد: حاظرين والله .. ما طلبتوا الساع.. ((جفني جفا نوم الليالي .. متصوب والقلب ممحون .. يظويني طيفه في خيالي .. وأسري مع الأشواق مطعون.. كل ما ظوى ليلي طرالي .. غر جميل وباهي اللون .. ياللي هدب عينه ظلالي .. ينزع فوادي بحد مسنون .. ناعم عوده وميالي .. هايف و أنا بالخصر مفتون .. دوم يتغلى وهو غالي .. وأرخص لعينه كل مزيون)) وسوالم مانع: من قال سالم سيف: صح لسانك الشاعر سالم: يعلني ما اخلا من طاريك يا بو شهاب.. حمد: الله يسلمكم والله سيف: صدقت عمرك تراك .. يالله شله وحده بس .. بل بل شو هالبخل اللي فيك.. مانع: هيه والله .. افاا والله افاا يا بو شهاب... ما أحيدك بخيل اللي احيده انك كريم.. سالم: صدقهم الشباب .. لا وراك شغله ولا مشغله.. حمد: لوالشور شوري جان سهرتكم لين فير الله باس شو نسوي ما باليد حيله.. مانع: خير ان شاء الله .. شو وراك بعدها الساعه 7 المغرب حمد:الله يسلمك اميه بتروح صوب عربان دبي لان عندهم عرس وتعرفون انتم الحريم ما يحتاي اخبركم عنهن .. سالم: الله يعينك بعدك بتظرب خط من العين لين دبي حمد: شو نسوي بعد ..تعرف انته الحريم بيحظرن العرس ولو في آخر الدنيا.. مانع: هيه والله صدقت .. بس الغريب ان اميه ما طرت سيره صوب دبي .. وشوي يصيح تلفون مانع .... مانع: مرحبا والله ام مانع: يا حي هالصوت مانع: الله يحييج العيوز ام مانع: يا مسود الويه انته.. مانع : كل شيء من الغالين مقبول ام مانع : اقول غناتي مانع : قولي لا خليت منج ان شاء الله ام مانع : ابغيك توديني دبي مانع : الله يهداج اميه هب لازم السيره ام مانع : لا لازم .. بتوديني انته ولا الشو؟؟ مانع : افا كله ولا اردج الشيخه .. منو بيسير فياج؟ ام مانع : والله ما ادري احيد خالتك موزه بسير فيا ولدها بو شهاب.. مانع :اقول ..أنا عندي لج راي .. شو رايج نخاويهم ام مانع : انا ما عندي خلاف والله .. مانع : يالله عيل تزهبي الحين بني صوبج ام مانع : يالله فمان الله مانع : مع السلامه سالم : مانع .. جنك الا بتخاوي حمد صوب دبي؟! مانع : هيه الغالي حمد : زين والله.. حصلتليه ونيس في السياره .. هب اميه الله يهداها الا هوش وبوش .. مانع : ((وهو يضحك)).. والله أنك سوالف .. حمد : يالله عيل نسترخص منكم الحين.. سيف : الله يحفظكم سالم : ردوا السلام على عربان دبي مانع : سلامن يبلغ.. ..::في بيت حمد::.. حمد : اميه ..يا ام حمد ام حمد: عونك غناتي حمد:اميه.. تراني بسير اتسبح وبتلبس وبيي .. خلصي شغلج ام حمد: أنا خالصه ما باجي غير اني اتدخن حمد : يالله عيل بخليج .. اوووه صح نسيت أخبرج..ترا خالتيه عوشه وولدها مانع بيسيرون فيانا.. ام حمد: حياهم الله .. ان ما شلهم الموتر تشيلهم عيونا حمد: يعلني ما أخلا منج الشيخه ام حمد: يالله الغالي سيرخلص مونتك وتعال حمد :على هالخشم ..::وفي دبي وبالتحديد في بيت عليا خالة حمد::.. مهره : ميروه ..ميروه وين انتي؟ ميره : انا هينا .. هينا هو.. شو تبغين؟؟ حشرتينا تراج مهره : الله ينطبج انتي هنيه وانا جالبه البيت فوق تحت ادورج ميره : احم احم .. لهالدرجه تحبوني مهره : سيري لا .. ما شيء شغل.. اقول ترا اميه تقولج سوي دخون ودخني صالة الحريم وميلس الرياييل .. ميره : منو بيي؟ مهره : قوم خالتيه موزه وعوشه بيوون ميره : الله يعني البنات بيون وياها مهره : لا تفرحين وايد .. بس بروحهم يايين.. وهم هب يايين عسب سواد عيونج غناتي هم يايين عسب العرس.. ميره : حرام والله اشتقت لبنات خالتيه يعلني افداهن مهره : خلي عنج هالهذره اللي ما منها فايده وسيري سوي دخون قبل لا ايوون ميره : وليش انا بالذات وشمعنى انتي ما تسوينه؟ مهره : يالله يا كثر ما تتشكين .. يا بنت الحلال انا ورايه شغل ميره : أي شغل ؟ مهره : بسير أسوي عصير وبحطلهم الفواله وبساعد اميه في المطبخ .. بتبادلين؟؟؟ ميره : لا غناتي اسوي دخون ابرك.. مهره : يالله عيل بسرعه قبل لا ايوون توهم مسوين تلفون ويقولون انهم في الدرب.. ميره : انزين.. ..:: في سيارة حمد ::.. حمد : ام بو شهاب ام حمد : عونك الغالي حمد : ترانا عقب ما نوطيج انتي وخالتيه عوشه عند قوم خالتيه عليا بنسير عنكن وبنرد لكن عقب ام حمد : لا تسير ولا الله قاله .. بتنزلون وبتسلمون على خالتكم وعلى عيال خالتكم وعقب سيروا وين ما تبون.. مانع : الله يهديج يا خالتيه .. ورانا حاية بنقظيها وبنرد لكم ام مانع : وشو هالحايه بعد؟؟ مانع : بنسير مركز من هالمراكزبنتحوط شوي .. وقبل لا يكمل جملته ام حمد : ومغازل البنات تسمونها حاية.. حمد : افاا والله الغاليه .. تعرفين اننا هب رواعي هالسوالف مانع : ((وهو يضحك ويغمز لحمد)) صدقه بو شهاب ام حمد : انا ما يخصنيه.. أبغيك يوم أقولك شيء تقولليه حاظر حمد : من عيوني الشيخه ... كله ولا زعل الغالين ام حمد : هيه جيه اباك .. ..:: في دبي وبالتحديد في المطبخ ::.. ام مهره : مهروه غناتي مهره: عونج ام مهره: قلتي حق ختج تسوي دخون مهره: هيه الغاليه ام مهره : سيري يعلني لا خليت منج .. شو فيها أخاف الا نست والعرب الحين بيعطنون مهره : من عيوني فديتج ويوم دخلت مهرة الفله وسارت صوب صالة الحريم حصلتها مدخنه بس ماحصلت ميره يالسه في الصاله كعادتها ويوم ركبت الطابق الثاني سارت صوب حجرتهم وقبل لا تفتح الباب سمعت ميره تتحرطم ميره : براويك يا مسود الويه... ويوم دخلت مهره عليها حصلت ميره يالسه تلقط شيء من على الارض مهره : ميرووه شو بلاج ؟؟ ميره : ما شيء بس في خاطريه اجتل حد.. مهره : منووه ؟ ميره : ميووود مهره : فديته انا ليش شو مسوي بعد؟ ميره : ما شيء بس يوم قلتيلي سوي دخون يبت ميوودي الحجره عسب ما يطلع برع وعطيته علبة الوان وورقه عااااد هو بدال ما يرسم لوحه فنيه على الورقه رسمها على اليدار مهره : (وهيه تضحك) حرام عليج الا هو ميوود ميره : ميووود ولا غيره براويه مهره : اللي يسمعج يقول ان امج بتخليج تظربينه ميره : قلنا اخر العنقود بس هب لدرجه انه ما ينظرب على الغلط مهره : وهو شو فهمه الصح من الغلط الا هو بو ثلاث سنين ميره : انا قلت بظربه يعني بظربه ان طال الزمن ولا قصر مهره : لا حوووول .. وين سار الحينه ميره : ما ادري هزبته وطلع من الحجره وهو يصيح مهره : حراااااااام عليج الحين بعدني بسير أدوره .. المهم الحين .. دخنتي ميلس الرياييل ؟؟ ميره : لا الحين بسير مهره :شو تترين يالله بسرعه قبل لا ايوون ميره انزين مهره : وعقب ما تخلصين تعالي المطبخ ميره : أوكيك عقب ما ظهرت مهره من عند ميره سارت صوب حجرة اخوها راشد عسب اتدور اخوها الصغير مايد وما حصلته ويوم يارت حجرة امها حصلت الباب مفتوح لاكن محد في الحجره وعقب دخلت داخل وشغلت الليت ويوم سارت الصوب الثاني من السرير حصلت مايد راقد والدموع على خده .. شلته مهره ومسحت دموعه وحطته فوق السرير وبندت الليت وطلعت وعقب سارت صوب امها في المطبخ ... ويوم سارت ميره صوب ميلس الرياييل دخنته ويوم وصلت آخر الصاله سمعت حد بيدخل داخل الميلس.. فسيده تغشت واول ما صدت وراها فز قلبها من مكانه ... كان مانع لابس كندوره كركميه وهوه ما شاء الله عليه حلو وغاوي وكان حمد لابس كندوره بيضا وبعد ما شاء الله عليه ..عليه وسامه لدرجه تلت الانظار حمد : هوود ميره : هدى ولد خالتيه .. اقرب مانع : افاا والله وانا ولد البطه السوده ميره : افاا عليك والله ... اقرب انته بعد حمد : ما تقصرين والله مانع : ممكن أسأل سؤال؟؟ ميره :آمر نغز حمد مانع على جتـفته مانع : بس من دون ما تتغيظين ميره : حاظرين مانع : انتي مهره ولا ميره؟ ميره : انته شو رايك؟ مانع : ما ادري والله أول كنت أفرق بينكم بالصوت بس شكلج ميهووده من الزجام .. ميره : هيه والله الزجام لا خلا لا صغير ولا كبير بس على كل حال انا ميره.. مانع : اسمحيلي يوم ما عرفتج ميره : بالحل الشيخ.. حمد : عيل وين بو سنيده ميره : واقع انه في العزبه حمد : وخالتيه ؟ ميره : في المطبخ حمد :ازقريها خلينا نسلم عليها قبل لا نروح ميره : شو عايلنكم .. يلسوا تقهويووا مانع : اسمحيلنا الشيخه ورانا حاية بنقضيها وبنرد ميره : عيل ثواني بسير ازقرها عقب ما طلعت ميره من الصاله حمد : انته ما تخيل على ويهك مانع : جيه شو سويتبك أنا؟ حمد : عنبو انته ما تيوز عن سوالفك مانع : أي سوالف ؟! تراك زيغتنيه حمد : عنبو كل ما تشوف وحده منهن تسألها (ويقلد جملة مانع بصوت يظحك) انتي مهره ولا ميره؟ مانع : الله يخس بليسك عبالي شيء يستاهل حمد : اقول .. قم بس قم خلنا نروح مانع : وخالتيه؟ حمد : بنتلقف لها عند الباب.. مانع : يالله عيل ويوم طلعوا برع الميلس تلاقفوا ويا خالتهم وسلموا عليها وكانت ميره ويا مهره يالسات يشوفونهم من دريشة المطبخ العاكس ميره : يا ويل حالي انا مهره : بسج عااد ميره : حرام عليج والله اني احبه بس هو عديم الاحساس... مهره : خليه عنج الحين والله ما شيء شغل ميره : لا واللي غيظ بي اكثر انه يسألني وبقواة عين أونه انتي مهره ولا ميره؟؟ والله انه يقهر مهره : ( وهيه تضحك ) لين الحين ما ياز عن سوالفه؟ ميره : يا ويل حالي عليه .. يا حلاة الكندوره الكركميه عليه .. يذبحني هالإنسان!! مهره : الله يهديج طلعوا حمد و مانع من بيت خالتهم عليا وركبوا السياره وعقب سارت خالتهم صوب خواتها.. ..:: في سيارة حمد ::.. حمد : مانع وين تبانا نيسر الحين؟؟ مانع : (( سرحان )) حمد : حووه ..شو عنده الحبيب سرحان؟ مانع : شو ؟؟ شو تقول؟ حمد : (وهو يضحك) سلامتك الغالي ... قلت وين تبانا نسير؟؟ مانع : شو رايك نسير الستي تراهم يمدحونه حمد : ( وهو يضحك ) يا اللوتي مانع : اووه .. زخيتني!! حمد : يالله عيل بنسيرله.. تراهم على قولتك يمدحونه ونحن بعد ما ورانا شيء مانع : صدقك والله ما ورانا شيء ( يقولها وهو يضحك ) حمد : اقول شو فخاطرك تسمع لميحد مانع : امممم طال ليلي من تعليلي من تجافي خلي الغالي حمد : ما طلبت الساع .. حط حمد غنية طال ليلي وطول على المسجل ويلسوا مرتبشين في السيارة.. ويوم وصلوا الستي سنتر وقفوا سيارتهم في الباركنات اللي تحت ونزلوا ودخلوا المركز.. يلس حمد يتحوط ويا مانع في الستي فخطفوا جدام محل العطور فدخلوا داخله .. مانع اشترى العطر اللي يبغيه بس حمد ما عرف شو يشتري فطاحت عينه على عطر فهرنهايت على الرف .. اشترى حمد العطر وعقب كملوا حواطتهم .. وعقب ما خلصوا من الحواطه ساروا صوب الكوفي شوب يلس مانع مجابل حمد وكان مجابل حمد يعني ورا مانع طاوله وكانن يالسات عليها بنتين وحده متنقبه والثانيه متغشية وكانت وياهن بنت صغيرة تقريبا عمرها 3 سنين وشوي .. وحمد من النوع اللي وايد يتعلق باليهال ويحب يلعب وهوه بعد وايد متعلق في مايد اخو مهره وميره .. وكانت البنت الصغيره تحوط في الكوفي شوب وتلعب بين الطاولات ويوم خطفت عدالهم اشر لها حمد فسارت البنت صوبه .. فيوم يت صوبه لف حمد الكرسي ويود ايدها .. شو تتوقعون بيقولها حمد؟؟ هل بتلعب هالبنت دور في حياته ؟؟ - إذا عــجبــتـكم القصه اكلمهاا وإذا ماعجبتكم اوقف ( يعني نزيع ولا مانزيع ) |
http://www.3z.cc/sml/3/b2c0592ca0230...53ed6c014e.gif وربي روعــة القصــه يانواااف ... انتظر بقية الاجزاء ( http://www.roo3.net/up/uploads/ac35ffd498.gif ) |
يعطيك العافية أخوي على القصة الجميلة
ننتظر جديدك القادم تقبل خالص التحية والاحترام |
مشكوورين على المرور
- بعثرة مشاعر .........المقاولون |
الجزء الثاني حمد : هلا حبوبه .. شو اسمج؟ البنت : اتمي لودة حمد : حيالله روضه .. مانع : شو تبابها بنت العرب؟ حمد : وانته شو تبابي .. اهالها اللي هم اهلها ما اعترضوا انته بتعترض والله حاله .. مانع : خل عنك ..المهم بو شهاب احس اني اعرف هالبنت او اني شايفنها مكان بس ما اذكر وين.. حمد : الله يهداك انته بس .. محد عنا في العايلة ع سناها غير ميوود.. مانع : ما ادري والله.. بس تاخذ شوي من رفيعه ولا ما ادري شو اسمها.. وهيه بنت ولد عم بنات خالتيه عليا .. حمد : فديتها والله.. اعديبها يوم كانت ام سنه ومن سنين تقريبا انتقلوا بوظبي والحين تقوللية اميه انهم من شهرين في المانيا عسب علاج امها وبييون جريب .. وما ادلهم جان ردوا ولا بعدهم .. فديتها والله كانت وايد متعلقة فيه وانا بعد كنت متعلق فيها واتصدق حتى شكلها نسيته .. مانع : وتحيد عمتها والله حتى نسيت اسمها المهم .. تحيد قبل يو كنا دوم نتضارب وياها هيه ومهرة وميره وكنا مرة ما نتدانا .. حمد : وتذكر سالفتك يو ظربت ميره ما ادري مهرة ومطيت شعرها عسب ما كانت تلعب ويانا وهيه كانت تصيح وتسير صوب امها مانع :هي والله اذكر وحتى كان ويانا اخوك غيث .. حمد : صدقك والله( ويفتر صوب روضه) اقول حبوبة شو رايج نتحوط شوي ؟ مانع :حووه يا الخدية سير صوب هلها وتخرص منهم هب الا تاخذها منيه والدرب حمد : أكيد بسير .. وقام حمد وسار صوب طاولة البنات فسيدة ربعت روضه صوب امها اللي كانت لابسه نقاب .. حمد : السلام عليكم ام روضه وعمتها : وعليكم السلام والرحمه روضه قابظه عباة امها وتهزها روضه : ماماتي ابا الووح ويا أمد ام روضه : لا ما شيء سيره .. الحين بنروح حمد : لو سمحتي ختيه ممكن آخذ بنتكم عسب أحوطها شوي؟ وما شاء الله على حمد الله عاطنه وسامه وويه سمح واللي يشوفه يقول انه طيب ولو ما يعرفه .. ام روضه : صدقي اخويه بتتعبك .. ما شاء الله عليها ما تقر في مكان واحد .. حمد : ما عليج .. متعود .. ام روضه : على راحتك اخويه بس ياليت انك ما تتأخر علينا لاننا عقب شوي مروحين حمد : ان شاء الله الشيخه شل حمد روضه وسار ويا مانع عسب يحوطون روضه .. فساروا سيده صوب محل الألعاب فاشترى حمد لروضه دبدوب بني متوسط الحجم وكان في المحل زحمه شوي فلقوا صعوبه شوي يوم حاسبوا وعقب ما حاسبوا ساروا صوب باسكن روبنز واشترا كل واحد منهم اسكريم .. وعقب ردوا صوب الكوفي شوب فما لقوا اهلها هناك .. حمد : مانع .. شو الراي الحينه ؟ مانع : بنتريا شوي واذا ما يووا بنسير ندورهم.. حمد : واذا ما يووا ؟ مانع : لا ان الله راد بيوون .. وعقب فتره ..... حمد : والحين؟؟ مانع : والله علمي علمك؟ حمد : البنت تنود تبغي ترقد مانع : شو رايك نسير الموقف ندورهناك لأني يوم نزلنت لمحت ريال فيه شبه من روضه واتصدق ان فيه شوية شبه من خليفه ولد عم بنات خالتيه عليا .. حمد : يالله نسير .. الرقاد موصل حده عند البنت مانع : يالله عيل قوم .. عقب ما ظهروا من الكوفي شوب ساروا صوب موقف السيارات فحصلوا حرمه متنقبه عاطيه ظهرها لهم ويالسه ترمس بالتلفون .. أول ما صدت ام روضه صوبهم نزلت على مستوى روضه وفتحت ايدها من بعيد .. اول ما شافت روضه امها طار الرقاااد عنها وربعت صوبها ولوت عليها .. ساروا حمد ومانع صوبها .. حمد : السموحه منج ختيه .. كان في زحمة شوي في المحل .. ام روضه : بالحل اخويه .. شفتك اتأخرت فسرت أدور عليك وما حصلتك فقلت لابوها وعمتها يدورونها وانا يلست عند السيارة .. حمد : عيل طمني ابوها عليها ام روضه : ان شاء الله .. وعقب ما سوت تلفون حق ريلها استرخصوا حمد ومانع عنها وساروا صوب سيارتهم.. وقبل لا يركب مانع حط ايده على مخباه .. مانع : والقووووم ... نسيت تلفونيه في الكوفي شوب حمد : الله يهدااااك .. سير ييبه شو تتريا ؟؟ وسار مانع اييب تلفونه .. ويوم ركب حمد السياره شغلها وحط غنيه يا طارشي ويلس يسمعها وسدح السيت وغمض عينه .. ويوم فتح عينه مره ثانيه حصل ريال خاطف جدام سيارته وكان مثل ما قال مانع .. انه فيه شبه من روضه .. فسيده عرفه انها ابوها .. وكانن السيارتين في سيد واحد بس كانن بينهن 3 سيارات وركبوا كلهم السيارة ويلسوا يتريون عمة روضه .. وفي الوقت اللي كان حمد فيه يعدل السيت شاف وحدة متغشيه فسيده عرفها من شنطتها .. بس الغريب انها لفت صوب سيارته وكانت سيارة حمد مظلم شرات سيارة قوم روضه بالضبط يعني نيسان ابيض مظلم .. فتحت عمة روضه الباب وركبت بدون ما تشوف اللي يالس جدام بس الحمد لله انها نا عقت الغشوة .. عمة روضه : (( بعصبيه)) شو هالحالة .. لاعت جبدي وانا ادور رويض وآخر شيء اييبها الأخ لين عندكم .. والله حاله !! أول ما سمع حمد هالجمله ضحك ضحكه تلفت الأنظار .. وأول ما شافته عمة روضه عورها ويا فسيده نزلت وقالت السموحه وبندت الباب .. وعقب سارت صوب سيارتهم وأول ما ركبت سيارتهم .. أم روضه : شو أخرج؟ وروضه من كثر ما اثرت فيها الصدمه ما رامت تقول شيء.. أم روضه : حوووه وينج .. ارمسج انا عمة روضه : وياج أم روضه : باين غناتي وتمت عمة روضه تفكر طول الوقت في حمد وفي موقفها وياه .. ويوم رد مانع وركب السياره .. مانع : زين أن محد شله.. حمد سادح السيت وسرحان مانع : حمد حمد : شو بلاك مانع : شو وين وصلت؟ حمد : آآآآآآآآه مانع : اووووه شكلها السالفه فيها ان حمد : لا ان ولا لعل مانع : علينا هالسوالف يا بو شهاب حمد : اقول مانع : قول حمد : طحت طيحه في هواهم يا مانع مانع : اهااا ثرها جيه السالفه .. منو ؟ حمد : ما أعرف مانع :من متى؟ حمد : من سبع دقايق مانع : وشو استوى بالضبط حمد : سير لا .. هب جني عطيتك ويه زياده عن اللزوم حط حمد شريط مرحبا بطارش نباكم ويلس مرتبش.. ويوم وصلوا بيت خالتهم يلسوا يرمسون شوي في الحوي.. وبالصدفه كانت مهره توايج من الدريشه اللي فوق .. مهره : ميرووه .. الحقي ميره : شو بلاج؟ مهره : حبيب القلب وصل ميره : ها شو؟؟ قولي والله مهره : وحياااتج ميره : فز قلب مياري .. وسيده سارت صوب الدريشه ميره : أكرهك مهره : من قلبج؟ ميره : تبين الصراحه لا مهره : وليش تكرهينه؟ ميره : بس جيه .. بلا سبب مهره : خلي عنج هالسالفه وتعالي بنسير نيلس في الصاله اللي تحت لان قوم اميه الحين بيون ..ونزلت ميره ومهره في الصاله اللي تحت.. ميره : مهاري .. اميه ما سوت تلفون ؟ مهره : سوت ويوم رمستها كانن توهن طالعين من الفندق ميره : ومتى سوت مهره : من ربع ساعه تقريبا ميره : يعني الحين بيوون وفجأة يصيح التلفون وشلته ميره .. ميره : الو ..... : مرحبا ميره : (مرتبكه) مرحبا ملايين ظنكم من اللي متصل ؟؟ وهل بيستوي شيء في حياة حمد بيجلب حياته ؟؟ |
يسلمووووووووووووووووووووو
القصة رووووووووووووووووعة يعطيك العافية |
يعطيك الف عافيه
مشكوووووووووور |
(!! نوافـ الريـاض !!)
أخوي تسلم على القصة الاحلى من الحلا.. وانا بانتظار التكملة عمة روضة هي بنت عم مهرة ومنيرة وبيلاقيها في بيتهم أن شاء الله ننتظر القصة أختكـ الهبــــــــــــايـب |
الجزء الثالث وفجأة يصيح التلفون وشلته ميره .. ميره : الو مانع : مرحبا ميره : (مرتبكه) مرحبا ملايين مانع :شحالج ؟ ميره : يسرك الحال والله مانع : ممكن أسأل سؤال بس بدون اي عصبيه ؟ ميره : ما في داعي تتعب عمرك .. أنا ميره مانع : ( وهو يضحك) كنت متعمد أغيظ بج ميره : ساكته وفي خاطرها تضحك مانع : عيل وين خالاتيه واميه؟ ميره : بعدهن ما ين حمد : عنبووو لين الحين .. انزين وما قالن لكن متى بيظون ؟ ميره : مهره تقول انها يوم رمستهم كانن ظاهرات من الفندق يعني أكيد انهن الحين واصلات حمد : زين عيل .. في وداعة الله ميره : الرب حافظ مهره : منو هذا ؟ ميره : فارس الأحلام وشوي ان امهن وخا لاتهن داخلات عليهن ام راشد وام حمد وام مانع : السلام عليكم؟ ميره ومهره : وعليكم السلام و الرحمه ميره : حي الله العيايز ام حمد : منو العيايز ؟ جان تتطرين امج برايج ام راشد : لا امها شباب مهره : خلاص كله ولا زعلكن .. كلكن غرشوبات والكل يتمناكن والكل ضحك على جملة مهاري ام مانع : بناتي .. ما يواا قوم مانع؟؟ ميره : يواا .. بتلقينهم يالسين في الميلس ام مانع : عيل انا بسير صوبهم ام حمد : صبري بعق عباتيه وبيي فياج ام مانع : يالله عيل .. وانا بعد بعق العباة ام راشد : تجدمني انتن .. وانا بسير المطبخ بييب دلة القهوه وبيي.. وسارن موزه وعوشه صوب عيالهن في الميلس وهن لابسات الشيل السود وعاقات العبي ودخلن الميلس .. حمد : هلا بالطش والرش .. أسفرت وأنورت .. مرحبا ملايين ولا يسدن في ذمتيه .. ام حمد : الله يحييك غناتي أم مانع : مانع مانع : لبيه فديتج أم مانع : يا الهرم مانع : افاا .. ليش؟ أم مانع : شعنه ما تغدي شرات بو شهاب؟ مانع : في الشو؟ أم مانع : في منطوقه يعلني افدااه مانع : حمد غير أم مانع : في الشو غير بعد ؟ مانع : بو شهاب شاعر وكلهم ظحكوا على هالجمله.. وشوي تدخل عليهم ام راشد ام راشد : حيا الله باللي لفانا حمد ومانع : الله يحييج ويلسوا يسولفون وعقب ساعه تقريبا .. أم حمد : يالله عيل بخليكم .. بسير أرقد أم مانع : وأنا بعد شليني فياج حمد : شو السالفه ؟!! أسمع طاري رقاد مانع : ان شاء الله ناويات ترقدن هنيه ؟؟ أم مانع : إلا معزمات أم حمد : تعرف اننا ولا جد مره يينا دبي ولا بتنا حمد : هذاك يوم نكون كلنا يايين بس الحين حصه وعلاوي في البيت منو بييلس عندهم هناك؟ ام حمد : ما عليك انته .. غيث اخوك غيث وياهم حمد : اميه تعرفين ان غيث ما يقر في البيت ام حمد : شو الراي الحين ؟؟ شو تباني اسوي؟ حمد : اليوم ما شيء بيات بنرد العين ام راشد : بس يا حمد الوقت متأخر.. ما تروم بعدك تظرب خط لين العين مانع : انا عندي لكن شور ام مانع : قول لا خليت منك مانع : شو رايكن الحين نرد العين وان الله راد الاسبوع الياي بنيكم بالاربعا ونرد باليمعه.. ام مانع : شور غاوي شو رايج ام حمد ؟ ام حمد : شوركم وهداية الله ام مانع : عيل صبروا علينا بنسير داخل بنييب قشارنا وبنييكم ام حمد : وانتوا ركبوا السياره لين ما نيكم حمد : ان شاء الله فديت روحج مانع : هب تتأخرن ورانا درب ام مانع : ان شاء الله وعقب ما يابن قشارهن ردوا العين ..:: في بيت روضه ::.. عمة روضه يالسه في الحجره وتفكر في حمد وكانت تتخيل شكله يوم هو يالس في السياره كان عاق سفرته وعاقنها على السيت وكان شعره طالع من تحت القحفية .. وكان يذبح وكانت تتمنى ان الدنيا توقف عند هاللقطه .. ..:: في بيت حمد ::. حمد يالس في حجرته وكان يالس جدام المنظره يسحي شعره لانه كان توه ظاهر من الحمام وكانت الساعه 2 فليل تقريبا .. كان حمد يغني طال ليلي بصوت خفيف وفجأة يسمع صوت دق على الباب حمد : منوه ؟ حصه : انا حصووه حمد : دخلي دخلت حصه وبندت الباب وراها حصه : علومك بو شهاب؟ حمد : ماا شيء علوم والله حصه : وشحال عربان دبي حمد : يسرج حالهم والله حصه : الحمد لله حمد : وانتي شو مسهرنج لين الحينه؟ حصه : إجازه وتباني ارقد من وقت .. لازم اتهنى في الاجازه حمد : اهااا ونعم الراحه عيل حصه : انزين بو شهاب ليش رديتوا أحيدكم بتباتون هناك؟ حمد : ما شاء الله ثرها العايله الكريمه كلها تدري وأنا آخر من يعلم حصه : وهاي يبالها قول يعني .. تعرف اميه ان سارت دبي لازم تبيت عندهم .. حمد : الله يسلمج هالمره ما باتنا لاني ما كنت متزهب للبيات .. وان الله راد الاسبوع الياي كلنا بنسير نبات هناك حصه : حتى أنا حمد : أكيد حتى انتي .. عيل بنخليج بروحج حصه : يعلني ما اخلا منك يا بو شهاب حمد : عيل وين غيث حصه : راقد حمد : من رقد ؟ حصه : قبل لا توون بساعه تقريبا حمد : يعني الساعه 12 ونص حصه : هيه حمد : وعلاوي حصه : فديته راقد حمد : انزين اقول حصه : قول حمد : شو الثنوية وياج؟ حصه : يمشي حالها حمد : ومنو غيرج في الثنويه هالسنه ؟ حصه : بنات خالتيه عليا حمد : ما شاء الله يعني عندنا ثلاث ..يالله يوفجكن حصه : آمين حمد : حصووه حصه : لبيه حمد : قبظي الباب حصه : افاا .. بس يالله مقبوله منك حمد : وبندي الباب وراج حصه : من عيوني لو تطلب اعيووني ويوم ورا يوم ياي يوم الأربعاء ..:: في بيت حمد ::.. حمد نازل من الدري ويزقر امه اللي كانت في المطبخ حمد : اميه .. أم حمد : عونك غناتي وسار صوب امه في المطبخ وحبها على جتفها حمد : اقول اميه ام حمد : قول يعلني لا خليت منك حمد : رد علاوي من المدرسه ولا بعده ؟ ام حمد : هيه فديته توه ياي .. حمد : وغيث؟؟ ام حمد: على قولته أول يوم بيخلص من الجامعه بيلحقنا هناك حمد : وحصه ؟؟ ام حمد : بعدها ما يت الساعه ثنتين بيرخصونها حمد : ومنو بيبها ام حمد : الدريول والبشكاره.. حمد : خلاص أنا بييبها ام حمد : زين سويت غناتي .. ابغي الدريول يقظي لي حايه حمد : يالله عيل بسيير اييبها عقب شوي بيرخصونها ام حمد : الله يحفظك سار حمد صوب مدرسة حصه وكان راكب سيارته النيسان وكان منزل الدريشه لان السياره كانت صكه شوي وكان حاط غنية هاذي القصيده مني ومطوول عليها شوي .. وكانت حصه تتأكد من السياره ويوم تأكدت انها سيارة اخوها جان تسير صوبه وتركب عداله .. حصه : مرحبا حمد : مرحبتين حصه : اوووه غريبه.. من وين طالعه الشمس؟؟ حمد ياي المدرسه عسب يردني البيت لا ما أصدق .. ابا اتأكد.. حمد :جان يصفعها طراق خفيف على سطارها .. ها تأكدتي ولا أزيدج؟؟ حصه : لا خلاص تأكدت حمد : حمدي ربج انتي.. وحبي ايدج من ورا وجدام بعد .. حصه : الحمد لله رب العالمين حمد : ((ساكت)) حصه : اتصدق حمد البنات كلهن تينن عليك حمد : احم احم .. اخجلتي تواضعي .. حصه : هب تصدق عمرك عاد حمد : يا ويلي على الغيرة حصه : على شو يحظي حمد : على هالاخو اللي الله انعم عليج به حصه : خل عنك الرمسه وشوف الدرب حمد : انزين حصوه .. ترانا عقب ما نصلي العصر سيده بنسير دبي I am ready for that حصه : اوكيه .. حمد : شو رديدات بعد؟ حصه : وهيه تضحك (( يعني انا جاهزه للسيره )) حمد : الله يعينا بس وعلى الساعه 4 العصر ظهروا قوم مانع وحد من البيت وطبعا كل واحد في سيارته مع هله.. و تقريباعلى الساعه 5 الا ربع وصلوا دبي .. ويوم نزلوا من السياره الحريم سارن داخل الفله واما بو مانع فما ياي وياهم لان عنده ركض في سويحان يوم الخميس ونزلزا حمد ومانع القشار من السيارات وزقروا البشاكير عسل يشلن القشار ويودنه داخل الفله .. ويوم شلنه وروحن لاحظ حمد ان هناك كيسه نسى ينزلها .. جان اييبها ويسير دام الباب الرئيسي وعقب حط الكيسه عند الباب ورد صوب سيارته عسب يقفلها ويود كان بيسر صوب السياره سمع حد يزقره من وراه وأول ما صد وراه شاف روضه طالعه من الباب الرئيسي وتزقره بصوووت عالي وعب ركضت صوبه نزا حمد على مستوها وفتح ايده وعقب شلها وحبها وكانت مهره توها ظاهره من المطبخ واول ما انتبهت ان حمد كان جدامها تغشت وطبعا حمد ما شافها لانه كان مشغول بروضه بس طبعا حمد ما عرفها اذا هيه ميره او مهره.. مهره : السلام عليك حمد حمد : وعليج السلام .. شحالج ؟ مهره : يسرك الحال والله .. انته شخبارك ؟ حمد : والله ما شيء أخبار مهره : اووه رواضي هنيه .. منو ياي وياج حبيبي روضه : عمووووه وهنيه فز قلب حمد مهره : ووينها الحين روضه : داخل بيت ويا ميلة مهره : يالله عيل بترخص عنك الحين .. يالله روضه تعالي روضه : ما أليد حمد : خليها ويايه وبعيدين بييبها صوبكم مهره : اوكيه عيل وسارت مهره عنهم ودخلت الفله وسار حمد صوب الميلس عند مانع وكان شال روضه وطبعا يلس حمد يفكر في الدرب وحس بالفضول لانه ما عرف اسم عمتها ويوم دخل حمد الميلس حصل مانع يرمس بالتلفون ومانع ما حس بهم لانه كان عاطي ظهره للباب .. ويلس حمد يلعب ويا روضه وأول ما انتبه مانع لهم سكر التلفون وهو مصدوم مانع : بو شهاب .. هب جنها هاي روضه حمد : اتصدق عاد مانع : شو يابها هنيه حمد: علمي علمك .. مانع : افا عليك انا بسأل ولا عليك انته بس وشوي ان ام راشد تدخل عليهم ويقومون يسلمون عليها حمد : شحالج خالتيه ام راشد : يسرح حالي غناتي مانع : وشو العلوم ؟ ام راشد : والله ما شيء من صوبنا جان الا من صوبكم انتوا حمد : ما شيء من صوبنا طال عمرج وانتبهت ام راشد ان روضه كانت تلعب وراهم ام راشد : فديت روضه انا .. منو يابج غناتي روضه : عمووووه ام راشد : ووينها الحين روضه : عند ميله داخل بيت ام راشد : يا حيكم والله مانع : اقول خالتيه من بنته روضه ام راشد : وااااايه يا مانعع ما عرفتها؟؟ مانع : لا والله ما عرفتها ام راشد : هاي روضه بنت خليفه ولد اخو بو راشد حمد : بس على أساس انهم مسافرين ام راشد الا من ثلاث ايام رادين مانع : اللي اذكره انهم عايشين في بوظبي ام راشد لا فديتك الحين ردوا بيتهم الاولي هذا اللي حذالنا حمد : اهاااا وبينما كانوا يرمسون كانت رووضه تشرب الماي جان تلعبه وتجبه على عمرها ويوم صدت ام راشد صوبها ام راشد : روضووه شعنه خيستي ثيابج ...يالله سيري صوب رفوع خليها تبدلج اياهن .. وربعت روضه صوب عمتها في الفله وهنيه ارتبش حمد واستانس لانه عرف اسمها ام راشد : يالله عيل بخليكم .. بسير أيلس عند خواتي وبخلي بو سنيده ايي صوبكم حمد ومانع : الرب حافظ واتصلت ام راشد براشد اللي كان ياي في الطريج وقالتله يسير صوب عيال خالته في الميلس وييلس وياهم وعقب فتره ظهر حمد من الميلس وكان يبغي يسير صوب سيارته عسب اييب تلفونه اللي نساه هناك ويوم كان يمشي في الحوي كانت رفيعه تشوف من دريشة المطبخ روضه وهيه تلعب بالسيكل في الحوي .. فأول ما انتبه حمد لروضه سار صوبها وشلها وحبها ويلس يكلمها شوي.. وطبعا حمد ما انتبه لرفيعه لان الدريشه كانت عاكس .. رفيعه : ( منصدمه وفي نفس الوقت كانت تبا تعرف اسمه) أقول مهاري منو هذا اللي شال روضه؟ مهره : وسارت صوب الدريشه ( هذا حمد ولد خالتيه موزه ) رفيعه : ( منصدمه ) هذا اللي كنا نلعب وياه يوم كنا صغار مهره : هيه رفيعه : قولي والله مهره : وحياتج ، ليش يعني رفيعه : ما شيء .. وتذكرت موقفها وياه جان تبتسم وشوي ان حصه وميره يدخلن عليهن حصه : اووووه اشوف رفوع عندكم رفيعه : هيه غناتي الا من العصر يايتنهم ويسلمن على بعض حصه : شحالج؟ رفيعه : بخير وسهاله حصه : عساه دوم .. وشحال بوظبي بعد رفيعه : الحمد لله حالها تمام حصه : من متى انتوا هنيه رفيعه : الا من ثلاث ايام حصه : ياحيكم والله رفيعه : الله يحييج حصه : شو شكلكم ودرتوا بوظبي رفيعه : هيه فديتج حصه : يا حظج على الأقل مهاري ومياري عدالج رفيعه : هيه والله يعلني افداهن ميره : ونرجع لمحور حديثنا .. ليش متفيزرات عند الدريشه ؟ مهره : ما شيء رفيعه: أقول بنات شو رايكن نرد الفله .. خلصنا شغلنا هنيه ميره : يالله عيل مهره : انتن سبقني وانا بيي عقب شوي وظهرن رفيعه وميره وحصه من المطبخ وهن متغشيات ما عدا حصه ويوم انتبهت حصه حق روضه حصه : يالله فديت رواضي .. من زمتن ما شفتها .. بسير صوبها منو بيسير فيايه رفيعه : لا الغلا انا هب سايره بترياكن هنيه ميره : انا بسير وياج بسلم على حمد وبييب رواضي وسارن حصه وميره صوب حمد وروضه .. أول ما وصلت حصه هناك شلت روضه ويلست تتفداها ميره : شحالك حمد ؟ حمد : تمام والله .. انتي شخبارج ؟ ميره : بخير الحمد لله حمد : عساه دوم وانتبه حمد لرفيعه اللي كانت واقفه عند المطبخ فابتسم لها واول ما شافته رفيعه تذكرت موقفها معاه ونزلت راسها حصه : اقول بو شهاب متى بيي غيث حمد : عقب ما يخلص دوامه بيي حصه : اهاا حمد : عيل وين علاوي عنكم حصه : أحيده يلعب ويا مايد بالسياير عند الزراعه حمد : توالفوا .. الله يعينا بعونته ميره : الله يعينا على حشرتهم فليل حصه : عادي الا هم مايد وعلي يعلني هب بلياهم حمد : الغاليه لو هم ييلسون عندكم ..المصيبه انهم ييلسون عندنا حصه : حتى رواضي تيلس عندنا حمد : س روضه فديتها هاديه ميره : عيل بعدك ما عرفتها عدل حمد : دام انها جيه السالفه .. مره ما ابغي اعرفها ميره : بتفتك من الصدعه حصه : يالله عيل بنسير الحين وسارن حصه وميه وروضه صوب رفيعه وعقب صدت روضه صوب حمد وتسوي بيباي له سار حمد صوب سيارته ويوم ركبها شل تلفونه وبعدين تنهد وحط راسه علىالكرسي.. شو ظنكم بيستوي ؟؟ |
مشكووورين على المرور
|
الجزء الرابع وبعدين نزل من السيارة وسار صوب الميلس وعقب صلاة العشا يلسوا قوم حمد ومانع وراشد وبو راشد في الحوي وكانوا مايد وعلاوي يلعبون بالسياكل وكانوا مسوين حشره ..وشوي انهم يسمعون صوت سيارة عند الباب .. وكانت هاذي السيارة سيارة غيث واول ما دخل البيت شافه مايد جان يربع صوبه وسلم عليه ، شل غيث مايد وساروا صوب الرياييل وقاموا وسلموا عليه ويلسوا يسولفون .. ..:: داخل الفلة ::.. مهرة وميره وحصة ورفيعه يالسات في الحجرة اللي فوق وامهاتهن يالسات في الصالة اللي تحت.. وكانت روضه يالسة ويان في الحجرة وكانت لابسة الشيلة السودة وشالة الشنطة في ايدها وكانت لابسة الكعب .. وتوها كانت بتظهر من الحجرة .. رفيعه : حوه .. رواضي ، على وين؟ روضه : بتيل اتلم على عموووه عليا رفيعه : اها ، سيري بس لا تظهرين برع ويوم ظهرت روضه ... ميره : بنات شو رايكن نقنع الأهل ؟ رفيعه : بشوو؟ ميره : اننا نسير المزرعه باجر ونبات هناك مهره : فكرة حلوة حصه : زين والله .. من زمان ما سرنا رباعه رفيعه : ذكرتيني بأيام قبل مهره : هيه والله ..الله يعودهن علينا ان شاء الله حصه : يالله عيل خلونا نسير صوب العيايز .. رفيعه : تعااالوا ، على طاري العيايز وين يدي؟ ميره : الله يسلمج من العصر وهوه في العزبه .. على قولته عنده شغله ، بتلقينه ياي الحين رفيعه : واااااااااايه فديته ما يصبر عن حلاله مهره : إلا تعيبج سوالفه يعلني أفدااااااه حصه : يالله عيل خلنا نلحق نرمسهم عسب يتزهبون وسارن مهره وميره وحصه ويوم وصلوا عند الباب انتبهوا ان رفيعه هب وياهم .. وردن يزقرنها ميره : رفوع جيه الغالي ؟؟ تترين عزيمه رفيعه : على شو؟ ميره : اونج ما تعرفين رفيعه : وانا شو يخصني ؟ مهره : ويدي ، جيه الشيخه ما تبين تروحين ويانا؟ رفيعه : والله ودي اليوم قبل باجر .. بس أخاف ان اميه وابويه ما يرضون ميره : ما عليج انتي خليهم علينا حصه : والحين يالله كلكن جدامي وعقب طلعة روح العيايز وافقن لان كل وحده منهن تعلثت بحلالها .. وعقب سوت ام راشد تلفون حق بو راشد عسب تتخبره .. ووافق بو راشد على السيرة .. ميره : حرمة عمي .. طلبناااااج قولي تم مهره : فديتج الشيخه لا تردينا ام رفيعه : انتن قولن بالاول وان الله راد ما بردكن ميره : نبغي رفوع تروح ويانا المزرعه رفيعه : دخيلج يا اميه ام رفيعه : والله يا بناتي الشور هب عندي .. شورها عند عمكن ولا انا مره ما بردها عنكن.. مهره : تسلمين غناتي .. ولا عمي خليه علينا وردن فوووق وأول ما دخلن الحجرة ظحكن من الخاطر.. كانت روضه يالسه جدام المنظره وقابظه في ايدها الجحال وكانت مشخطه ويا به .. رفيعه : غربلات عدووج ... رويض انتي متى غافلتينا وركبتي فوق؟؟ ويلسن البنات يظحكن عليها .. شلت رفيعه روضه وودتها الحمام وغسلت ويا ويوم كانت رفيعه تمش ويه روضه بالفوده .. حصه : رفووووع رفيعه : عونها حصه : شو رايج تباتين فيانا اليوم؟ رفيعه : اممممم بفكر ميره : ويا هالراااااس وهاي يبالها تفكير بعد مهره : صدقهن والله (( وتفر عليها كرتون الكلينكس )) رفيعه : اممم .. انا بمشي على شور روضه ان قالت هيه ببات وان قالت لا وكان الله غفورا رحيما حصه : رفوع .. ورواضي شو فهمها؟ مهره : ما عليه خليها على هواها .. يالله رفوع اسأليها رفيعه : رويض تبيني ارقد عندهم اليوم ولا لا؟ روضه : لا ميره : (( وهيه تضحك )) هب حولج حصه : خيرها فغيرها رفيعه : وعااااااااد انا اموووووت في شيء اسمه عناد .. وإلا اليوم أتم عله على قلوبكن وببات عندكم .. مهره : تعيش بنت سالم تعيش حصه : فالتحيااااااااا رفوع ميره : الحمد لله والشكر ولا الإنتخابات ..:: عند الشباب ::.. راشد : بو شهاب حمد : عونك بو سنيده راشد : طلبتك قول تم مانع : جني عرفت طلبك غيث : وأنا بعد عرفته بو راشد : بلاكم تتناغزون بالرمسه راشد : بلّول يقول بو شهاب تم حمد : تم راشد : ابغيك تشل علينا شله غيث : والله يا اني دريت ان هذا طلبك حمد : إلا هذا طلبك .. حاظرين بو سنيده .. وفي نفس الوقت كانت الدريشه مالت الحجرة اللي فوق مفتوحه حمد : (( ما لوم عيني تسهرعليك .. وأحلمك في غمظة عيوني.. طبعك حلو ميت أنا فيك.. واللي شراتك من يكوني .. محلاك لاكن من يساويك .. انت الذي ساكن عيوني .. أغليك يا المحبوب أغليك .. غصبن على ناس اعذلوني .. لو ذقت منك هجر بعطيك .. حب وغلا وأحلا شجوني .. لا تظن يالمحبوب ناسيك .. لا تظن حبك لي يهوني )) .. وفي نفس الوقت كانن البنات يسولفن وفجأة سكتن يوم سمعن صوت حمد.. حصه : واااااااااايه فديت بو شهاب مهره : ما شاء الله عليه صوته فنان ميره : الله يوفجه ورفيعه كانت سرحانه في شلة حمد ولا تدريبهم .. ..:: عند الشباب ::.. راشد : من قال سالم مانع : صح لسانك الشاعر غيث : تسلم يا بو شهاب حمد : الله يسلمكم بو راشد : ليت ابوك ما غاب .. جان افتخر ان عنده ولد شراتك يا بو شهاب حمد : الله يرحمه ويغمد روحه الينه غيث ومانع وراشد : آمين وفجأة يسمع حمد صوت روضه من وراه .. ويوم صد وراه شاف روضه تربع صوبه .. جان ييلسها عداله وكان يلعبها .. وكانت تضحك بصوت عالي رفيعه : غربلات العدو وين رويض؟ مهره : جني اسمعها برع في الحوي رفيعه : يالله مقوى هالبنت قايلتلها ما تظهر خاري .. حصه : ما عليها شر الا يالسه ويا عمها برع رفيعه : ما عليه ما بتكمل خمس دقايق والا بتشوفينها يايه تصيح ميره : وشو يصيحها رفيعه : ومنو غير ميوود مهره : عااد ها الشيء اظمنه لج رفيعه : الحين خلونا من سالفة رويضه .. والحين أي مزرعه قررتوا اتسيرون؟ مهره : شو رايكم نسير مزرعتنا اللي في الذيد .. ابويه يقول أن الجو فنان هناك ومن كمن يوم طايح فيها مطر.. حصه : الله يعينا على البرد عيل .. وخصة اننا في الشتا ، اسميه المرض بيضوي .. ميره : أحسن عسب أمرض وما اسير المدرسه رفيعه : هيه لازم تبيها من الله .. ويلسوا يظحكون .. ..:: عند الشباب ::.. حمد : رواضي حبيبي .. تعرفين تغنين طال ليلي ؟ روضه : ( هزت راسها على انها تعرف ) حمد : يالله عيل قوليلنا اياها روضه : سااااااكتة حمد : انا ما قلتيلي ما بوديج الدكان ولا بشتريلج حلاوة روضه : انا ابا حلاوة حمد : أول قولي وعقب بوديج انتي وعلاوي وميود الدكان.. غيث : لا انا بقول روضه : لا انا بقول حمد : يالله عيل روضه : ( تال ليلي من تأليلي من تدافي خلي الغالي ، باتوا ابوعي مداهيلي والخلي من ليأتي خالي ) حمد : فديتج انا ويحبها على راسها روضه : يالله نتيل الدكان حمد : يالله سيري ازقري علاوي وميود من الميلس والبسوا نعولكم و تعالوا .. وسارت روضه تزقرهم .. وشوي ان يد راشد يدخل البيت ، جان يسير صوبهم يد راشد : مرحبا الساع والله ويقومن حمد و غيث ومانع ويسلمون عليه ويحبوبه على راسه .. يد راشد : يا حيبه غيث ومانع وحمد : الله يحييك وشوي أن روضه وعلاوي وميود يايين حمد : يالله عيل اترخص عنكم الحين يد راشد : وين بتسير ؟ ما يلست حمد : بلووووف على الدكان وبرد يد راشد : هيه .. عيل مرخوص مانع : اقول بو شهاب ييبلي وياك ريد بول يد راشد : يخسي ويهبي اسميك ما شربته دام اني حي حمد : ليش ؟ يد راشد : ما سمعتوا عن الريال اللي مات بسبته .. الله يعدمه من بول مانع : خلاص بس هالمره يد راشد : والله ين يبته يا حمد يا اغسل شراعك انته وهالهرم منووع حمد : على هالخشم طال عمرك مانع : لا حوووول .. خلاص عصير برتقال يمشي حاله يد راشد : لا ما شيء .. عنبو تخسر بيزاتك على شيء ما يرزى يا مسود الويه.. مانع : عيل !! يد راشد : الحين بخليهم يسوولك واحد فرش .. غيث : اوووه .. اوووه ، علموه الشيبه فرش بعد .. من قدك راشد : هيه بعد ما نرومله اونه قد مورنق والله حاله يد راشد : بتسكتون ولا اغسلكم بهالعصا اللي عندي غيث : لا خلاص كله ولا عصاتك .. ذايقين المر منها.. حمد : (يضحك ) يالله عيل تامرون بشيء كلهم : سلامتك وسار حمد الدكان وشل وياه علاوي وروضه ومايد يد راشد : بو سنيده عيل وين ابوك؟ راشد : ما ادله والله الا قبل شوي ساير .. الحين بيرد ..:: عند البنات ::.. رفيعه : اقول بنات ظنكن ان قلت لليازيه اني اشل بنتها بتوافج؟؟ مهره : ان الله راد بتوافج ميره : فديت رواضي ما نروم نستغني عنها حصه : ما عليج ان شاء الله بتوافج وشوي يسكتن.. حصه : رفوع .. شحال الكليه وياج ؟؟ رفيعه : تمام الحمد لله .. نقلت من بوظبي لين كلية دبي مهره : زين والله وشوي أن البشكاره تدخل عليهن البشكاره : ( توجه كلامها لرفوع ) ما ما يريد انتي تحت رفيعه : اوكيه قوليلها الحين بيي.. وانتي ظاهره برع هاتي روضه وياج .. البشكاره : روضه ما في داخل بيت رفيعه : (( مستقطعه )) عيل وين سارت غرلات العدو أخاف انها طلعت برع البيت .. وشوي أن روضه تدخل عليهم وفي ايدها كيسه ممزوره حلاوه .. مهره : هاذي ما عليها شر رفيعه : رواضي وين روحتي ؟؟ روضه : سرت الدكان ويا ألاوي و ميود.. رفيعه : ومنو مودنكم؟؟ روضه : أمد حصه : ياحيكم والله .. رفيعه : يالله عيل بويه عنكم ..بسير البيت بقنع اليازيه وبقول حق اميه انني ببات عندكم .. ميره : في حفظ الله وسارت رفيعه ويا امها وروضه بيتهم وهيه في الطريج خبرت أمها انها بتبات عن قوم قمها فوافقت . وأول ما دخلت رفيعه حجرتها فتحت كبتها وجهزت ثيابها حق الكشته وفجأة خلت اللي في ايدها وتيلس على السرير لانها كانت شاكه ان ابوها ما بيوافج على سيرتهابروحها الكشته بدون اهلها وفجأه يصيح التلفون اللي في الصاله وسارت رفيعه تشله .. رفيعه : ألو ميره : مرحبا رفيعه : مرحبا ملايين ميره : عندي لج خبر مب حلو رفيعه : أكيد أبويه ما وافق ميره : يلسنا أنا ومهره نحايله لاكن مافي فايده .. رفيعه : اتصدقين كنت حاسه .. ميره : وشو الحل الحين ؟ رفيعه : اليلسه في البيت أحسن حل .. وخيرها فغيرها ميره :الصراااااااااااحه ما توقعت أن عمي عنيد لهالدرجه .. وأقول هالعناد اللي فيج من وين يايبتنه؟ رفيعه : يالله خليها على الله ميره : أوكيه عيل بخليج رفيعه : أوكيه وسلمي على البنات ميره : سلامن يبلغ رفيعه : مع السلامه ميره : اووه صبري .. نسيت أقولج شيء رفيعه : واللي هو؟؟ ميره : صادووه رفيعه : شو قصدج؟ ميره : يعني كل اللي قلته لج كان مجرد مقلب وان عمي اللي هوه ابوج وافق تروحين ويانا .. رفيعه : ويا ويهج ميره : ((وهي تضحك )) واحد.. صفر رفيعه : وعقب شوي بتستوي واحد .. واحد ميره : كيف يعني؟ رفيعه : ما شيء بس عقب شوي بتعرفين ميره : بنشوف رفيعه : اوكيه ميره : انزين بتخبرج .. رمستي اليازيه؟! رفيعه : لا الحين بسير ميره : أوكيه عيل بخليج رفيعه :الرب حافظ ميره : في وداعة الله أول ما بندت رفيعه التلفون كملت تزهيب ثيابها وعقب ما خلصت سارت عند ام روضه اليازيه .. ويوم دخلت الحجرة حصلتها تلبس روضه .. رفيعه : السلام عليكم اليازيه : وعليكم السلام والرحمه رفيعه : شو تسوين؟ اليازيه : مثل ما تشوفين يالسه ألبس روضه رفيعه : اها اليازيه : شو السالفه ؟ رفيعه : أي سالفه ؟ اليازيه : من ييتي دبي ما قمنا نشوفج رفيعه : الله يسلمج لأن في بوظبي محد كان عندي أما الحين بنات عمي عندي يعلني ما أخلا منهن اليازيه : ونحن ؟؟ رفيعه : وانتوا بعد الله لا يحرمني منكم اليازيه : تسلمين غناتي رفيعه : أقول اليازيه اليازيه : عونها رفيعه : ممكن أطلب طلب بس يا ليت ما ترديني اليازيه : ان الله راد ما بردج رفيعه : انزين سمعي السالفه .. إن الله راد باجر بسير ويا قوم عمي ثاني المزرعه .. اليازيه : يا حيكم .. رفيعه : والمطلووب انج توافجين على اني أشل رواضي ويايه اليازيه : لا غناتي ما تروميلها .. رويض روحها عباله رفيعه : لا عباله ولا شيء أقوولج رفيعه : أنا بيودها وبأكلها وكل شىء بس دخيلج وافقي .. اليازيه : والله لو ما اني واثقه فيج جان ما خليتها تسير .. بس الشيمه شوفيها عدل .. رفيعه : من عيوني الشيخه اليازيه : عيل ازقريلي البشكاره قبل لا ترقد عسب تزهب قشار روضه رفيعه : اوكيه .. الحين بروح عند قوم عمي ثاني وباجر الصبح بسويلج تلفون عسب اتطرشين رواضي وقشاري.. روضه : انا بتيل وياج رفيعه : لا حبيبي باجر الصبح تعالي اليازيه : وبتباتين عندهم اليوم رفيعه : هيه اليازيه : ووين حاطه قشارج؟ رفيعه : عدال الكبت في الكيسه العنابيه اليازيه : اوكيه رفيعه : يالله عيل تصبحين على خير اليازيه : وانتي من أهل وسارت رفيعه صوب بيت عمها .. وقبل لا تدخل شافت نيسان حمد موقفه على الباب .. خطفت عدالها ووقفت عندها ولمستها بإيدها وعقب كملت طريجها ويوم دخلت خافت انها تحصل الشباب يالسين في الحوي .. بس الحمد لله أن محد كان يالس .. وكانوا كلهم يالسين في الميلس ويوم وصلت رفيعه نص الحوي طلع حمد من الميلس وكان ساير صوب سيارته وانتبه حمد لرفيعه بس رفيعه ما عرفت انه حمد لانها ما صدت وراها .. وكمل حمد طريجه وكملت رفيعه طريجها .. دخلت رفيعه الفله وركبت فوق ودخلت حجرة البنات .. ويوم دخلت حصلت مهره وحصه طايحات على السرير يسولفن .. رفيعه : هلا بنات مهره : أهلين رفيعه : عيل وين العيايز مالهن شوف في الصاله التحتيه؟ مهره : اميه رقدت في حجرتها وخالاتيه رقدن في الحجرة النصفانيه.. رفيعه: وميرووووه ؟ حصه : تتسبح رفيعه : (( بنبرة مكر )) أهااا.. وشوي أن رفوع تظهر من الحجرة وترد عقب دقيقتين وفي ايدها كوب ماي بارد.. مهره : رفوع ترا الماي اللي في ايديد بييبلج العوق رفيعه : ومنو قالج اني بشربه؟؟ حصه : عيل رفيعه : بتعرفن عقب شوي مهره : الله يعينا رفيعه : ومتى بتظهر مياري؟ مهره : أكيد الحين لانها من فتره داشه سارت رفيعه ووقفت عدال باب الحمام .. وعقب 3 دقايق تقريبا فتحت ميره الباب فسيده رشت رفيعه عليها الماي .. وأول ما انرشت ميره شهقت من الخاطر وتمن البنات يظحكن عليها.. رفيعه : واحد واحد غناتي ميره : الله ينطبج .. قلنا انتقام بس مب جيه ويا راسج رفيعه : المهم اني رديت مقلبج ميره : اوكيه مردووده ان شاء الله رفيعه : بنشوف ويلسن كلهم يسولفن .. وعقب رقدن كلهن ما عدا رفيعه .. يلست تتذكر يوم تلمس سياره حمد وتتذكر سالفتها معاه .. وعقب رقدت |
| الساعة الآن 03:09. |
Powered by vBulletin® Version 3.8.7
Copyright ©2000 - 2025, vBulletin Solutions, Inc.
منتديات روعة الكون