تخيلوا لو الحريم بيسوقن=ونلقى لهن في كل شارع طرايف
تلقى العجايزفي الشوارع يدورن=وسيارة الاسعاف تركب حتايف
وليا تأخرنا دقايق يصيحن=ثم اركبوا فوق المواتر ولايف
قامت تكبس لك بالانوار ياهن=بين اخوياك سرت محرج وخايف
وتخيلوا لوذات يوم يمرن=عليك دوريات والجمس طايف
ويوم اطرحوها يسير موقفك محزن=تلقى العجوز مكلبشه ياحسايف
وتلقى البني في كل جلسه يتكن=طقة بلوت ومعهن الكيف كايف
هذي تبى تحكم وهذي تبا صن=والبيت ضايع دون طبخ وغرايف
ياللي ذنوبك فوق راسك يحنن=اللي بقلبك طلغته الشفايف
انضارنا من فوق فكرك يشوحن=ونشوف شيئ ما تشوفه يا هايف
حق المره ياشيخ تلعب على من=خبلان حنا والا ويش انت شايف
وين انت عن صوت الارامل ينوحن=وين انت عن حق المره في الوظايف
وين انت عن جملة بنات يضيعن=وين انت يا راع العلوم النصايف
لو هي بديكم كان قلتوا يغنن=لكن صدمتوا بالجبال النوايف
من دونهن حنا وبقلوبنا هن=الطاهرات الساجدات العفايف
والمسأله لا صار لحقت شرفهن=يروح فيها يا آل زلفه طوايف
هذا كلامي واسمعه زين واذعن=قلته ولاني من تواليه خايف
قلته واباقف وارفع الصوت واعلن=ارادة الامه على لسان نايف
ماهو تخلف لا رفضنا يسوقن=راس التخلف لا تركناالعطايف
