منتديات روعة الكون - **و الله يا عالم أحبهم**

~] و الله يا عالم أحبهم ** حب من خالص غلاهم [~

مســ ــاء الطاعه ..

من فتره كنت أتسكع على أرصفة المواقع و من موقع لي موقع ثاني و بحوستي المعتاده بعد منتصف الليل وصلت لملف صوتي كنت أدوره و بوصولي له وصلت لملف صوتي ثاني وكان يحمل هالكلمات :

يا ما دعيت في صلاتي
للي ماخذ كل غلاتي
و الغلا لأمي و أبوي
و هم كل شي بحياتي
يا حلو طلة وجيهم
و يا حلو نبرة حجيهم
يا بشر ما ادري شواصف
الله يا عمري عليهم
يا كبر حظي معاهم
و يا كثر فيني عطاهم
و الله يا عالم أحبهم
حب من خالص غلاهم
يا هلا بإلي عطوني
يا هلا بإلي كرموني
يا هلا بقلبي و روحي
و إن بغيتو في عيوني

بصراحه ظليت أعيد هالنشيده مليون مره لأن جد الكلمات جذبتني و حسيت هالكلمات طالعه من القلب و أكيد موجوده بقلب كل واحد منا

لأحلى اثنين بحياته الي ما لها معنى بدونهم إلي هم

امه و ابوه

ما اعتقد ان في احد ما يحب امه و ابوه و ان كان فأكيد لأسباب تسببو فيها له خلته يكرهم و هالشي بيكون نادر بالنسبه حق الي يحبون أمهم و أبوهم ..

لي رجعنا لورى لأيام الطفوله أكيد بنتذكر لحظات تأففنا فيها من أوامر الوالد و الوالده

" يعني كلا انا ماكو أحد غيري قاعده ما عندها شي
كلا تطرشوني أففففففففف "

و نقوم واحنا كلش مو من خاطرنا نسوي الشغله

بصراحه ليمن اتذكر اضحك على عمري صحيح ما حسينا بقدر الام و الابو الا يوم كبرنا و عرفا انا ما نقدر نتحمل بعدهم و فراقهم و هالشي شفته فيني

يوم ابتعدت عن امي اسبوع و يوم رجعت البيت قلت حق امي
" تصدقين يما ولهت على كلمة يما "

ومحد يوله على الشي الا لي كان يحبه و يعزه

و يوم سافر أبوي لمدة شهر جد كانت ايام الله لا يذوقكم اياها كانت مأساة بالنسبه لي

و صح لسان الشاعر الي قال :

تبي تحس بقيمة الي تحبه *** خله يغيب ايام و تحس بالموت

و دينا الحبيب ما قصر بهالشي يوم يوضح قدرهم بقوله تعالى :

وَقَضَى رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَاناً إِمَّا يَبْلُغَنَّ عِنْدَكَ الْكِبَرَ أَحَدُهُمَا أَوْ كِلاهُمَا فَلا تَقُلْ لَهُمَا أُفٍّ وَلا تَنْهَرْهُمَا وَقُلْ لَهُمَا قَوْلاً كَرِيماً * وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُلْ رَبِّ ارْحَمْهُمَا كَمَا رَبَّيَانِي صَغِيراً[الإسراء:23-24].

و بحديث الرسول صلى الله عليه و سلم
(( حين سأل رجل الرسول صلى الله عليه وسلم : يا رسول الله من أحق الناس بحسن صحابتي ؟
قال : أمك قال : ثم من ؟ قال: أمك قال : ثم من ؟ قال : أمك قال : ثم من ؟ قال : أبوك ))

و إن رضى الله من رضى الوالدين طبعا بما يرضي الله تعالى

و قصة الرجل الذي استأذن الرسول للجهاد وحين سأله عن والديه قال بأن لديه أم فقال له ففيها فجاهد ..

مافي احلى من ان الواحد لي غلط على امه و ابوه حب راسهم و تأسف لهم
و اعترف بغلطه لأنه أبد ماله غنى عنهم و صدقوني مهما غلطنا عليهم دوم يسامحون و يتجاوزون لان قلوبهم كبيره و ما أعتقد إنا ممكن نلقى أحد مستعد يضمنا بقلبه و يتجاوز عن غلطاتنا مثل أمنا و أبونا ..

أتمنى كل واحد يراجع نفسه و يفكر ان كانوا امه و ابوه راضين عنه

و اللى غلط عليهم واذاهم , اتمنى يعاهد نفسه انه يرضيهم و يفتح صفحه جديده
ما يشوفون فيها منه الا كل شي يرضيهم

و صدقوني ان عصبوا علينا و دعوا علينا تراها مو من قلبهم واكبر دليل انهم يتضايقون لي دعوا علينا خاصه ان دعوة الام مستجابه و يتعوذون من ابليس ..

يلا اشوف كل واحد يروح يحب راس امه و ابوه
و يطلب رضاهم و يشتري لهم هديه يونسهم فيها
على فكره لا تشتري حق امك بس او ابوك
اشتري للأثنين لأنهم يغارون من بعض ..

والله يسعدكم دنيا وأخرة

منقوووول

و ان شاء الله يعجبكم موضوعي البسيط
و بانتظار رايكم ..

تحيـــــتــي مع حيـــــاتــي ..

دلـــDala3ـــع