منتديات روعة الكون

لا الصبر ينفع ولا ذا الليل له آخر
وماعدت انا اقوى على حملي وآلامي
ياليتني مشتكي من حظى العاثر
وياليتني مشتكي من زلة اقدامي
يا أسعد اليوم انا في دنيتي حاير
ما جيتك الا وهي قد جفت احلامي
الصمت يصرخ وجمر الحزن بي ثاير
وريحان عمري ذبل من عدة اعوامي
البارحة يالخوي مر الألم زاير
واسقاني الهم من كأس العنا الدامي
مدري وش اللي جرى وبحالتي صاير
لكن تركني وما زلت الهث وظامي
رمح الليالي بصدر شموسها غاير
والموت دم جرى بعروق أيامي
ولا شفت جفنى معا بدر الدجى ساهر
لا تحسب ان الهوى بسبابه اسقامي
لاني عشيق ولا مسحور او ساحر
ولا طريت المها في معجم الهامي
لكن طرى هاجس مثل البحر هادر
يحمل شعوري على موج كالاعلامي
وسرب المعاني هجم مثل الوحش كاسر
وجات القصايد على الموعد مع اقلامي
يا أسعد افهم ترى وجه الألم سافر
والدمع يوم انتثر ماهو من اوهامي
بي ضاق وسع الفضا وبالغدر انا شاعر
خلفي ضياع وندم والويل قدامي
والفرح في دنيتي مثل الوفا نادر
واصبحت عقب الأمل عايش بالاوهامي
ماهو انا اللي جنى مير الزمن جاير
ويا ويل حالي وانا مذبوح بسهامي
بيدي بريت السهم واعطيته الغادر
كنت احتمي به واثره لقلبي الرامي
ودي يعود الذي عن دنيتي سافر
واسأله عن دمعتي وأسباب آلامي
منهو بدى.. وانتهى.. من بالخطا جاهر
منهو بري ومن في فعله اجرامي
منهو كسب جنته وفي ناره الخاسر
ومنهو بناها وعلا ومن كان هدامي
مليت انا يالخوي ولزوم انا اهاجر
عل وعساه الهنا داري وهندامي