منتديات روعة الكون - (ظمى قلبي)^^^^^^^^

بسم الله الرحمن الرحيم

أسعد الله أوقاتكم جميعا بالخير والمسرات 00

يطيب لي أن أقدم لكم ( ظمى قلبي ) 00

كلي أمل ان ترضي ذائقتكم الشعريه 00وتفضلوا بقبول كل تقديري واحترامي00

يا ظمى قلبي ظماته .. وانت والله يـا ظمـاك
يا بعد عمري وروحي يا عسانـي مـا عدمـك
قالوا أعطيتك حياتي .. قلت انا ربـي عطـاك
قلـت هوجانـي وقالـوا انـت جيتـه بقدمـك
والنظـر 6 علـى 6 وغافـل عـن خـطـاك
ما عظمك يا قلبي العاشق بحبك ..ما عظمـك !
وارفضك واقول انا لك .. واتركك وامشي معاك
كيف في نفس المكان أعطيك حبي واحرمـك !
وين تهرب من هنا والشوق سـدرة منتهـاك ؟!
يا ولد نوح.. الجبل من موج حبك ما عصمك !
يمشي بكل الخلايا وكـل عـرق ٍ بـي غـلاك
والله اني كل ماجيـت ارسـم الـورد أرسمـك
يسعد الله لي صباحك .. يسعد الله لـي مسـاك
كيف وانت اللـي تعذبنـي أحبـك وارحمـك !
ما كتبت اجمل قصيدة حـب تستاهـل هـواك
والله ان الشعـر كلـه لـو نظمتـه يظلـمـك
خايف أكتب لك قصيـده مـا تليـق مستـواك
والقصايد يـا غباهـا !! مـا تحـاول تفهمـك
ودي اكتب لك قصيدة حب مـن جنـة سنـاك
واعزم نجوم السماء وسهيـل معهـا واعزمـك
وادري اني في خيالك نجم ساطع فـي سمـاك
وادري انـي أمنياتـك كلهـا ..وكـل ْ ندمـك
واسألك وتقول مدري !! يا عسى ربـي يهـداك
كيف تقـدر تنكـر وحبـي بدمـك ولحمـك ؟
كيف أبنهي شوق قلبي وتونـي فـي مبتـداك ؟
كيف أبرحل والمشاعر تحتفـل فـي مقدمـك ؟
كل مافيني تولـع فيـك.. وضمـك واحتـواك
بين روحي وبيـن قلبـي والله انـي لاقسمـك
لعنبو من قال ما حبك00 وحاشك00 واشتـراك
آه يا محـلا أحبـك يـوم تطلـع مـن فمـك
وضحكتك سحر ٍ حقيقـي ماهـي بهـذي وذاك
يا عسى ضحكة سنونك مـا تفـارق مبسمـك
يا هلا بالبرد كـان البـرد يدفـأ مـن دفـاك
يا هلا بالصمت دامـه يـوم أضمـك يلجمـك
يا هلا بالجـرح دام الجـرح يبـرأ مـن دواك
يا هلا بالمسك أحـب المسـك كانـه يختمـك
يا هلا بالساعه اللي جابتـك يـا جمـل مـلاك
يا هلا في عطرك الغالـي وساعـة معصمـك