قالوا :عجيب الحب ؟ قلت : أنتم أغراب !
. . . . . . . .الحـب مـا يسكـن قـلـوبٍ خـرايـب

الحب ما جابـه مـع السـوق جـلاب ؟
. . . . . . . الحـب نعمـه مـن جزيـل الوهـايـب
الحـب مـا يفهمـه ياكـود الأحبـاب ؟
. . . . . . . الحـب يسمـو فـي قلـوب الحبـايـب
الحب ما هـو شوفـت العيـن والكـاب
. . . . . . . والا النـقـاب وزول راع الـغـرايـب
مره عبـاة الكتـف ويغضـي بالاهـداب
. . . . . . . ومره لبـس لـه جنـز وارخ الذوايـب
ومره مع السواق يركـب علـى البـاب
. . . . . . .ومـره يـدوج السـوق مـدور طلايـب
شفـه رعـاع النـاس تتليـه لسـبـاب
. . . . . . الكـل معـه الرقـم مـا هـوب هايـب
هـذاك والله مـا يشـوق أهـل الالبـاب
. . . . . . حيثـه خفيـف العقـل مابـه غـلايـب
والحب حـب الـروح للـروح جـذاب
. . . . . . . روحيـن يجذبهـن خـفـي السبـايـب
واللي يعرف الحـب مـا هـوب كـذاب
. . . . . . . منكـر لحـب الـذات مثـل السحايـب
تنثـر هماليـل المطـر وقـت الاجـداب
. . . . . . وتمـوت لجـل الغيـر بليـا كسـايـب
ولا غابت الشيمه عـن الحـب ينصـاب
. . . . . . يصـيـر نقـمـه والـبـلا فالعقـايـب
والحب ما هو شهـوت العقـل لا غـاب
. . . . . . . . يالعنبـو حــبٍ يجـيـب المصـايـب