لاصحاب المصالح والمستغلين
 

السلام عليكم ورحمة الله وبركاته ..




مرحبا باللي قرأ الموضوع ..

ويا مرحبا وسهلا باللي قرأ الموضوع ويبا يشاركني ..



المهم بدش فالموضوع ..

السالفه ما تعجب فئة كثيرة في مجتمعنا وفي كل مجتمع ..


تحدثنا كثير عن الواسطه ..


وتعمقنا فيها وفي مظاهرها ..


ولكن ..



هناك نقطه نابعه من الواسطه :




" تدخل مسئولين من دوائر ومؤسسات في دوائر ما

تعنيهم " .




في هذا الموضوع ما بتكلم عن اللي يتوسط وبس ..


بتحدث عن ضعف شخصيات بعض الموظفين وانصياعهم للأوامر حتى لو كان

هالشي يضر بسمعته ..




* اذكر فمرة من المرات كلمني واحد من المراهقين عن قصته :


" كنت فمركز من المراكز التجارية انتظر صديقي عازمني

عالعشا .. صارت مشاده بين بعض الشباب فالسنتر وانا كنت ابعد عنهم

امتار ..

وصل رجل الأمن وزخ كل الشباب .. وكذلك اخذني وياهم مع العلم اني كنت

بعيد وما كنت وياهم ..

ودونا مركز الشرطه الخاص هناك ..

فتشوا الشباب اصحاب المصيبه لقوا عندهم سيوف وسكاكين ( ناقص يركبون

خيول بعد ) ..


وكان الشرطي يبا يضربني عسب اعترف اني كنت وياهم انكرت ..

ومن وصل الدور على واحد ثاني قال له : خذ هالكرت واقرا اسمي ..

فالبدايه ما رضا الشرطي .. وعلى اصرار الشاب قرا الكرت ..

وطلع ولد فلان بن فلان ..

هني قاله الشرطي : تعال مني عنهم طال عمرك !!!!!!!

( مع العلم ان هذا الشاب كان ويا العصابة ولقوا عنده سكاكين !!! ) "


هذا نموذج ..

والشاب اللي خبرني بالسالفه وايد تضايق ما كان يتصور ان عندنا شي من

هالسوالف .. تدرون ان الشرطي ما خلا هالشاب يتصل باهله لمده ( 5 )

ساعات ..

وصادر من الشاب ( خاتم فضي .. حلاوة .. وعلك " لبان " ) ..


( صدق انه فاضي ) .


اخوكم " شبــــــــــــــــــــــــــــــــــح الحـــــــــــــــــــــــــــــــــب "

*واحد خبرني بحرقه :


" فالبداية سألني : ليش نحن المواطنين اذا نسير دايره او

وزارة اذا ما عندنا واسطه .. نرد ونجر أذيال الخيبه .. وعقب ننسى

السالفه ..

ولكن اللي عايشين على ارضنا لهم مليون باب وباب ..

اذا موظف رد معاملته .. يسير ويرد عقب ساعه او يوم ثاني وتمشي

معاملته ...!!!!

من وراهم هالناس ..؟؟؟؟؟

لدرجة ان احد الآسيويين فيوم قال لي : بابا معامله مافي خلاص .. انا في

خلاص بس يبي ( 1000 ) درهم ..

قلت له بعطيك اللي تباه بس فكني منها ..

سار الريال ساعتين ورد لي يضحك ..

ويوم شفت المعامله لقيتها خالصه ..


فداخلي تحسرت قلت : ليش ؟؟ واشمعنى ؟؟ "

( يا حسره علينا ) .





من هالقصص اشوف ان الحياة كلها مصالح في مصالح ..

اللي يبا يستقيم ما يعيش بين هالقوم ..

لانهم مسيطرين فكل مكان ..

فالدوام .. فالتجارة .. فالمستشفيات .. فالأنديه .. فالكليات .....................

الخ .


عندي الكثير من القصص ..

واكيد انتوا عندكم الكثير ..



البلاد محتاجه لناس تحترم القوانين ..

وتحترم مركزها ..

وتحترم وظيفتها ..

وتحترم موظفينها المخلصين ..



لازم نقوي قلوبنا ونقول : ( لا ) ..



لكل من يبانا نقوم بالخطأ ..

نحن محاسبين على كل عمل وكلمه وحرف ..


تحيتي لكل مخلص .. ولكل صاحب حق .. ولكل مظلوم ..

اليوم مالك صاحب .. لكن لك رب ما يظلم عباده المخلصين ..




هذي رساله اوجا للجميع ..



عساها توصل ..

°ˆ~*¤®§(*§*)§®¤*~ˆ° السلام عليكم ورحمة الله وبركاته

لو سمحتوو ابغي ردودكم وهذا كله صج موجود واكيييييييد استووت لحد منكم

بس ما عليه شو نسووي هذي الدنيا فيها الظالم والظلووم °ˆ~*¤®§(*§*)§®¤*~ˆ°

مشكوور اخوي على طرح هذا الموضوع للنقاش...اكيد تطلب منك شجاعه كبيره
بس كل هذا اكيد بسبب ابتعادنا عن الدين والركض ورا الفلوس...الله يهدي النفوس

اختك الحلوه مره...تقبل مروري

°ˆ~*¤®§(*§*)§®¤*~ˆ° السلام عليكم ورحمة الله وبركااته


مشكوووووووووووره اختي الحلوه مره ولاهنتي

والله لا يحرمنا من مرورج °ˆ~*¤®§(*§*)§®¤*~ˆ°

الواسطه
اكثر مرض يعاني منه العالم العربي ومن اخطر اعراضه التوسط للشخص غير المناسب لوضعه في وظيفه لا تناسبه
اذكر هنا ان ديغول حين حكم فرنسا تم اكتشاف احد الوزراء بانه يعمل لحساب المانيا ولكن لم يكن هذا الشخص يرسل اية رسائل او يتجسس ولكن من خلال السجلات في الاستخبرات الالمانيه اسم الشخص مذكور على انه عميل فتم عرضه على شارل ديغول ومن الرهبه الموجوده في وجه هذا الرجل اعترف الوزير بانه خدم المانيا بان كان يضع الرجل غير المناسب في وظيفه مهمه وبهذا يتسبب باكبر ضرر لفرنسا
فانظروا كم عميل بيننا يتوسط لقريبه او نسيبه او صديقه ليضعه في وظيفة لا تناسبه فيتسبب باكبر الضرر لوطنه وشعبه فهم حقا بمثابة اعداء الوطن
الموضوع مثير جدا واتمنى مناقشته من الاعضاء على نطاق واسع ربما خرجنا ببعض العلاجات لمرض الواسطه
مشكور على الطرح وتقبل مروري