صبّحكم/مسّاكم الله بالخير

سمعنا كلنا عن التمثيلية الرمضانية على قناة mbc
واللي تتكلم عن شخص اسمه : نمر بن عدوان

يمكن سمعتوا عنه أو سمعتوا عن مقوله له شهيرة وصارت مثل شعبي متعارف عليه ...
مالكم بطول الكلام : خلوني أقول لكم نبذة عنه,,طبعاً كلام في كلام من الشيبان , ولافيه شي ثابت
عندي مثل كتاب موثق.. ولكنها معلومه حبيت تشاركوني فيها.
المهم:

هو فارس من قبائل الأردن وهي قبيلة "عدوان" يشهد له بالفروسية ولكن الشي اللي شهره
هو حبه لزوجته "وضحى" ومواصفاتها هي:قوام معتدل مائل إلى الطول , عينان سوداوان
شعر اسود طويل تكاد جدائله تلامس التراب هدب عينها طويل , جميلة المحيا , باسمة الثغر ..

وبما أن نمر بن عدوان كان فارس والزمان اللي كان فيه
مثل ماانتم عارفين زمن مغازي وحروب لأجل لقمة العيش
وكان متعود انه يخلي زوجته تسرج فرسه قبل لايجي الليل
علشان يكون مستعد إذا غزوهم ناس, ومرة قال لزوجته
تسرج الفرس بالعصر,, ونست ولما جا الليل تذكرت
ويوم جت للفرس ..سمع نمر صوت "صهيل الفرس" وحس
بالحركة , وحسب انه حرامي بيسرق الفرس .
قام ورمى "طخ" زوجته بالغلط !!! وماتت ووقتها قال قصيدته
اللي يغنيها (راشد الماجد -بالدعاية-) يرثي فيها زوجته.

البارحة يوم الخـلايق نيامـــا ** بيحت من كثر البكا كل مكنــــون
ولي ونةٍ من سمعها مايناما ** كني صويبٍ بين الأضلاع مطعون

وتزوج بعدها على مايقولون أربعين مرة ?
وكل ماتزوج ماتكون مثل زوجته فيطلقها ويقول قصيدة يرثي
فيها زوجته .. تخيلوا كم مرة رثاها ,, من شدة حبه لها
ومن ندمه على الخطا اللي أخطاه يوم ذبحها.

ويقولون كمان: انه في مرة من المرات كان ولده "عقاب"
يلعب مع زوجة أبوه ويرمي ("الحدج" ويمكن تعرفوه باسم "الحنظلة")
-اللي هو مثل البطيخولكنه صغير نلقاه بالبر ولكنه ماينوكل- المهم انه
راح لأبوهوقاله ان هذي ماهي مثل امه <كان إذا رمى على أمه وهي
متكيةيجي الحدج من تحتها -من نحف خصرها- وأما زوجة أبوه
فكانت تضرب الحدجه في بطنها>.
فقاله أبوه القول الشهير : (( هذا بلى أبوك ياعقاب ))
يعني هذا السبب اللي يخليه يرثي زوجته ومايقدر ينساها مهما تزوج من نساء..

إن شاء الله ما أكون طولت عليكم وإن شاء الله مايكون بالقصة
أخطاء لأني مثل ماقلت كل هذا من سواليف الشيبان , وأتمنى
منكم إذا تعرفوا شي ماذكرته انكم تقولوه أو تصححوه إذا أخطيت.