منتديات روعة الكون - ! .. ح ـب أطفـآل .. !

عهدي بها قدام تلبس عبايه
وأنا بعد قبل ألبس شماغ وعقال

طفلين نتهجأ حروف الكتابه
الله يامجمل سواليف الأطفال

كانت لنا في كل شارع حكايه
وكنا نقول علوم ماهيب تنقال

وكنت أتقاسم مامعاها معايه
من عسكريم التوت لعلك أبوريال

وكانت بعكسي شاطره بالقرايه
تقرأ جزء عم وطه والأنفال

وأنا لك الله من مواري غبايه
مدري أبو نقطه هو الذال أو الدال

وكانت لأبويه تشتكي من شقايه
وتعلمه كيف أربط الباب بحبال

ياما على ظهري كسر من عصايه
يقول لي : خلك وأنا أبوك رجال

وأمي تقول : إدع لولدك بالهدايه
خوفي يصيبه كثرة الضرب بهبال

لا شفتها مع أول الدرب جايه
مدري أنا اللي ملت وإلا الوطا مال

أحس قلبي يرتجف في حشايه
ماكنه إلا الضيف لا هز فنجال

ياما عن (السعلي) تخبت ورايه
لاخوفوها فيه ثم شافت ظلال

تقول خلك يا( ؟؟؟؟؟ ) معايه
وأستانس ألعب عندها دور الأبطال

وأغاااااار حتى من عيون اصدقايه
لا طالعوها قلت : تكفوووون يا عيال