،،،،يابحر فيني من الحزن كثر مافيك،،،
 

يابحر .. فيني من الحزن .. كثر مافيك ..

من حزن .. وأوجاع .. وغياب .. وغرايب !!


لاتلومني إليا شفتني .. دايم أجيك ..

ولاشفتني دايم .. على الشط .. ذايب !!


حزني كبير .. أكبر من حدود .. شاطيك ..

وأقسى من جروح الزمان .. العطايب !!


وإن كان تنشدني فأنا .. مقدر أخفيك ..

دايم أظن .. ويطلع الظن .. خايب !!


في هالزمن .. أقرب حبايبك .. يشقيك ..

إلين تدفع في غلاه .. الضرايب !!


من بعد هذا .. يبتعد عنك .. ويجفيك ..


ماكنه .. بجنبك .. قضى الوقت .. طايب !!


وإلا .. الخوي اللي توقعت .. يفديك ..

يفديك بعمره .. لاغدت بك .. نشايب !!


صـد .. وتصـدد .. مايبي سامع .. طاريك ..

وياما .. أنت دونه .. أتعبتك .. الطلايب !!


لاتقول لي .. بدري .. وتوك .. ويمديك ..

وتعال .. وأسمع باقي الهرج .. صايب !!


خلك بحالك .. وأطـلب الرب .. يهديك ..

ولاتنشد اللي غاب .. وين أنت .. غايب !!



وإن شفتني غايب .. عن حدود .. شاطيك ..

أعرف تراني .. تحت ذيك .. النصايب !!



وأعرف تراني .. دايم إن ضقت .. بآجيك ..

لأني .. أنا والموج .. صرنا حبايب !!

صح لسانك أختي وسلمت أناملك في ماخطته من أبيات جميلة

ننتظر جديدك القادم

وكل عام وأنت بألف خير

الله الله الله
تسلم يمناك على
ألبيات الجميلة
يعطيك العاااااااااااااااافيه
لاخلا ولا عدم من روووعه تميزك

روعه ياعايشه بعز اهلها


صح قلبك


ولاهنتي على الاختيار الجميل والذوق الاجمل



تحيتي لك

يسلمكم ربي على الردود الحلوه لاهنتووو والله