يضيق صدري كلما هبت علي من الجنوب
نسايم(ن) ما ملت اطعوني وقلبي ملها
وأرقى على مرقاب حزني واتحرى للغروب
وأمسك جدايل هالحياة المدبرة وأفلها
وأشوف وش لون الليالي تدور في الوقت اللعوب
وأجمع مسائل هالبشر في دفتري وأحلها
وألعن ابو الحظ الردي وأستغفر المولى واتوب
وأقول يالله انك تعين اللي صبر ثم شلها
ويا سعود قرب لي ما دام الوقت والعمر امحسوب
وأسمع يا خوك ابيات من جوفي نويت أتلها
لا صارت الدعوة ما بين ضلوع صدري والهبوب
بأقولها واللي عقد روس الحبال يحلها
وش عاد نرجي من زمان صارت به اكبر الذنوب
انك على الباطل سيوف الحق تنوي سلها
اسلامك اصبح متهم والنور غيب ومحجوب
ادروبهم يا كثرثها ودروبنا يا قلها
خوينا تصلاه نار الكفر ونشوفه يذوب
وحنا انترجى من عجوز الغرب ترهي ضلها
لاعاد به فزعة ولا غيرة وحيلتنا يا دوب
نشجب ونستنكر عساها تنسمع او علها
صار التنافس بالطرب من اولويات الشعوب
الغانية صفق لها والراقصة طبل لها
والموضة اتحاصر تقاليد العرب من كل صوب
اتبوح دلتنا زعل وأعوانهم اتزلها
والكل منا يشوف نفسه للتخاذل أمغصوب
حلوقنا ميتة عطش يالله طلبتك بلها
يالله سترك من علوم(ن)في خواطرنا تجوب
رحماك سهلها علينا دقها مع جلها
ويا سعود خذها من نمط حكي(ن) على لسان القلوب
اربع نصايح لحياتك يا عسى توصل لها
المرجلة هي البلد وافعال يمناك الدروب
والادمي يولد غريب واذا تسنع دلها
والكايدة تبغى ولد ماهوب طماع وكذوب
والرابح اللي نفسه لربه قدر يذلها
ترى الكرم عند العرب يغطي الاف العيوب
وانك بخيل تساوي اعيوب العرب ذي كلها
واحذر تحسب ان كل بير بدنيتك به ماء شروب
واذا تجاهلت العواذل ابتموت ابغلها
وأنا بودع راس مرقابي اذا حل الغروب
وبقول يالله انك تعين اللي صبر ثم شلها
__________________

تحيـــــــــــاتي

نـــــــوف