امثال مكاوية
 

أمثال مكاوية ..


--------------------------------------------------------------------------------




كيف حالكم يا أحلى اعضاء .. ان شاء الله طيبين

الموضوع باين من عنوانو .. << حابدا معاكم من هنا ..

كل الحكاية اني ابغى اوريكم شي من الحكم المكاوية ..

طبعا يمكن في منكم مجموعة من مكة او جدة ...

و في ناس برة مكة و في ناس من خاااارج المملكة اصلا ..


و يا اهلا و سهلا بالكل ...


طبعا اللي ما يعرفوا مكة ما يعرفوا انو اهلها زمان كانو معروفين بأمثالهم المميزة ..


علشان كدا حبيت أعطيكم نبذة و بصمة خااااصة جدا لكم مني انا البنت المكاوية ...


حبيت اني انزلكم كل فترة و فترة مجموعة من الأمثال المكاوية و المناسبة اللي ممكن ينقال فيها دا المثل .. اتمنى تعجبكم فكرتي


و كل واحد فيكم عندو قدرة انو يضيف الله يحييه يحطلنا مثل مكاااوي و المناسبة اللي ينقال فيها دا المثل .. و طبعا اي احد عندو اي استفسار عن المعنى او اي شي تاني يسال و يتناقش معانا يعني لو مافهم المثل تمام يقولنا و يسالنا و نحنا حاضريين ..


اهم مافي الموضوع اننا نوصلكم معلومات عن الامثال المكاوية ... << فزعتكم يا اهل مكة ابغى موسوعة امثال هنا طيب ؟؟؟


يالله حابدا معاكم بكم مثل اليوم و ان شاء الله تعجبكم الفكرة


1- أبعد بعيد حبك يزيد .


يضرب هذا المثل في حالة حدوث شرخ في العلاقة بين صديقين بسبب الاقتراب الشديد و الاتصال المنتظم بينهم ..

يعني اصحاب مع بعض دايما مع بعض صار ظرف او صارت حركة ماهي حلوة كان ممكن تخليهم يكرهوا بعض فعشان لا تزيد الامور تعقيد واحد فيهم يقول للتاني .. ابعد بعيد حبك يزيد ( بالعربي لا تتلصق فيا كتير علشان لا اكرهك بعدين خلي بيننا مسافة احسن !! )



2- أبعد عن الشر و غنيلو .


يضرب هذا المثل في النصح بالابتعاد عن الشر ..

يعني مثلا صديقين واحد فيهم اتعرض لموقف مو حلو و زعل و يبغى ينتقم من الشخص اللي غلط بحقو .. يجي صاحبو يقولو يا شيخ ابعد عن الشر و غنيلو ( بالعربي طنش اللي زعلك و اخصروا كدا راح يتغاظ اكتر و تصير انتا احسن منو )



3- ابن الوز عوام .

يضرب هذا المثل عندما يكون الابن مثل أبيه في إجادة العمل الذي كان يقوم به أبوه ..

يعني مثلا واحد سباك عندو ولد مرض ابوه في يوم و ماقدر يسوي شغلو وولدو راح سوى دا الشغل بدال ابوه في هداك االيوم و طلع شغلوا تمام زي ابوه فالناس حيقولو ماشاء الله كانو الابو هوا اللي اشتغل صدق اللي قال .. ابن الوز عوام .. ( طبعا ممكن المثل ينقال للبنات كمان يعني بصفة عامة البنت او الولد سوو حاجة زي ابوهم او زي امهم و زبطوها كانو ابوهم و امهم هما اللي مسوينها .. نقدر نقول عنهم دا المثل )



4- أبو البنات مرزوق .


يضرب هذا المثل لمن اعطاه الله بنات فقط ..

يعني مثلا واحد ربنا ما اعطاه اولاد او اعطاه بس ولد واحد يسالوا ( اللقافة )يقلوا الله يعينك ماعندك غير بنات بس .. باستنكار كدا و انو حزنان عليه .. فيسكت فمو ابو البنات دا و يقولو ابو البنات مرزوق ( بالعربي ربنا موجود و حيرزقني و يرزق بناتي فانتا اقلب وجهك مالك شغل ه )



5- أتغدى بيه قبل ما يتعشى بيك .


يضرب هذا المثل للدعوه الى اتخاذ زمام المبادرة في مواجهة الخصوم ..

يعني زي المقولة اللي تقول الهجوم خير وسيلة للدفاع .



6- أتلم المتعوس على خايب الرجا .

يضرب هذا المثل اذا اجتمع شخصان فاشلان للقيام بعمل من الاعمال ..

يعني مثلا في الجامعة الاستاذة طلبت مننا نقسم نفسنا مجاميع و نسوي بحث او مشروع و بنتين مرررررة ما يعرفوا يسووا بحوث و ما عمرهم سوو بحث في حياتهم راحو مع بعض و سوو مجموعة و قالو نسوي بحث سوا من جد حنقول اتلم المتعوس على خايب الرجا



وووو بس دي امثال اليوم اتمنى تعجبكم و ياريت لو تعرفوا امثال مكاوية و معانيها تحطوها بنفس الاسلوب اللي سويتوا انا


ووو شكرا على مروركم مقدما


اتمنى فكرتي عجبتكم

حيااااااااك ياهمسة غرام

مشكوره على الموضوع وبارك الله فيك

بسم الله الرحمن الرحيم

السلام عليكم ورحمه الله وبركاته

همسه غرام الله يعطيك ألف عافية

وماكذب إلى أطلق المثل

( أهل مكه أدرى بشعابها )

وشكرا لك

مشكوووره يالغلا على الامثال النايس

ودمتي بود ^_^

ياسلام على الامثال الحلوة شكرا على الطرح الجميل

بسم الله الرحمن الرحيم


السلام عليكم ورحمة الله وبركاته

شكرا لك

يعطيك الف عافيه