الذكـــــرى.

على ذكر المواجع و السفر والحل والترحال=طويت آخر ورق عندي سكن في دفتر احزاني
طويته وانكسر قلبي وصوتي بالمواجع سال=ودريت ان الظلام اللي تحت كف السهر جاني
جلست اجمع مسافاتي واغني للسفر موال=على صفحة من الماضي بها حلمي وعنواني
بها كم سافرت عيني ليالي والظلام اهوال=وبها كم سافرت روحي وانا بالليل وحداني
حبيبي ليلة البارح مشيت من الغرام أميال=وأناظر رحلة الذكرى هدب عينه يغطيني
حبيبي كل ما اشوفك تجي بالذاكره تختال=نهر من فايض الذكرى يجي من داخل أشجاني
تخيل يوم عانقني خيالك خاطري وش قال=تخيل قبل اسولف لك نشدني عنك وجداني
نشدني لين خلاني مدينه هزها زلزال=تخيل ماهدى حتى لقاك بوسط شرياني
حبيبي لا.لا تنشدني عن اوضاعي وكيف الحال=أنا بعدك سحاب ابيض اضم الريح باحضاني
غلاك بدلّة الذكرى بهار وهاجسي فنجال=تقهوته الجروح اللي بها ذكراك تنصاني
تسافر بي وأحسب اني وصلت آخر وطن بالبال=واثرني ماوصلت الا بداية درب حرماني
وتبقى سيرة الذكرى قصيدة تكتب الترحال=سوالف للعيون اللي صداها دمعة احزاني

امانه لا توادعني حبيبي لا نويت تروح=دخيلك خلني كذا وارحل من دون ما ادري
دخيلك لا تعلمني كفى صدر الغرام جروح=وانا اللي من عرفتك وانت متربع على صدري
بنيتك بالحشا قصر رفيع وشامخ بصروح=وقلت اسكن هنا ياللي عيونك سودها قصري
رخصت اغلى القصيد وكل ماينزف صدوق البوح=وجيتك والغلا طفل ربى بالجوف من صغري
تحملت من العذاب وصرت انا من سبتك مذبوح=صبرت وطال الصبر لين مل الصبر صبري
ابي بس اظفر بقلبك مدام الشوق لك مفضوح=ومدامك بالعروق اللي تحبك دايم تجري
ابي عطر الهوى منك حبيبي كل يوم يفوح=ويعلنها على الدنيا(احبك)يا بعد عمري
حبيبي وانت ماغيرك حبيب قد سكن بالروح=ومن فكر يجي بعدك ترى با اقول له بدري
كفايه باب خافقي عشقك وصار لك مفتوح=وكفايه لو تغيب شوي اضيق وينشغل فكري[/size]