عهدي بهـا قـدّام تلبـس عبايـه

قصيده اعجبتني ونقلتها لكم عسى ان ترتقي الى اعجابكم




عهدي بهـا قـدّام تلبـس عبايـه

وأنا بعد قبل البس شماغ وعقـال


طفلين نتهجّـى حـروف البدايـه

الله ياماأجمل سواليـف الاطفـال


كانت لنا في كل شـارع حكايـه

وكنّا نقول علوم ماهيـب تنقـال


وكنت اتقاسـم مامعاهـا معايـه

من(عسكريم) التوت,للعلك ابوريال


وكانت بعكسي شاطره في القرايه

تقرأ جزء عـمّ وطـه والانفـال


وكانت لابويه تشتكي من شقايـه

وتعلّمه كيف اربط الباب بحبـال


ياما على ظهري كسر من عصايه

يقول لي:خلّك وأنا ابـوك رجّـال


وامي تقول:ادع لولـدك الهدايـه

خوفي تصيبه كثرة الضرب بهبال


لاشفتها مـع اول الـدرب جايـه

مدري أنا اللي ملت ولاّ الوطا مال


احسّ قلبي يرتجف فـي حشايـه

ماكنّه الاّ الضيف لاهـزّ فنجـال


تقول:خلّـك يـا سهيـم معـايـه

واسّتأنس العب عندها دور الابطال


وآغار حتّى من عيون اصدقايـه

لاطالعوها قلت:تكفـون ياعيـال!

الموضوع الاصلي  من روعة الكون