::][روحـ (ن) عشقته وقلبـ (ن) فقدته][:: قصة مميزه

شما: والله انج اطيب ام فهالدنيا ماتفكرين في نفسج كثر ماتفكرين فينا
أم عمّار: من لي غيركم خبريني..
شما: وشو من مواتر تبين تاخذينه له؟
أم عمار: انا عندي فالبنك 80 ألف تقريبا وميمعه تقريبا بعد 10 آلاف الي ياسه اصرف منهم لا احتجنا شوي.. تدرين الراشن وبيزات الكهربا والتليفون .. اشكثر يروح كل شهر.. وغير سيارتج والبترول..
شما: يالله الحمد لله ان حالتنا أستر عن غيرنا بألف مره .. على الأقل عندنا بيت نسكن فيه وغيرنا مب لاقي بيت
أم عمّار: الحمد لله.. ويالله عن الهذرة وكملي شغلج لأن اخوج بيوصل
وفهالوقت رن تليفون البيت .. كانت الي متصله عفرا..
أم عمّار: يا مرحبا ام نوف.. اشحالج عساج بخير.. شو اخبار نوف..
عفرا: الحمد لله بخير ربي يعافيج انتي اشحالج وشحال عيالج؟؟ وشخبار بنتي شما فديتها..
أم عمّار : بخير هذي توها يايه بترمسينها؟
عفرا: هيه لأني بغيت اسألها عن شي يخص نوف..
أم عمّار: ماعليه مع السلامه
وعطت السماعه لشما الي كان قلبها يدق بقو وخايفه مب عارفه تنطق بشي.. امها راحت المطبخ ودرتها ترمس تليفون..
عفرا: سمعي ايه انتي شمووو لا تحرين الي صار البارحه اخر يوم لج مسويه حشره.. اليوم بعد لازم تروحين..
شما: ماقدر..
عفرا: شوفي مايمشي عندي اقدر ماقدر.. ترا سلطان صورج وشي فيديو عنج فكيفج يا اطيعيني ... يا انه بيستوي شي ماتتوقعينه
شما كان ودها تضحك في ويه عفرا وتقول لها انها كيف جذابه بس ماتبا تكشف السالفه الي صارت بينها وبين سلطان.. عرفت وقتها كيف عفرا اتقص على البنات وتوهمهم بشي ماله اساس .. : انزين يصير خير ..
عفرا: سمعيني الساعه 10 تكونين عندي ولا ترا والله..
شما: انزين انزين حشرتينا.. مع السلامه
من بندت عن عفرا ربعت غرفتها والود ودها تنفجر وتصرخ من الصياح... ليش انا ؟؟ ليش يت صوبي انا .. يالله تفكني منها يارب ارجوووك ارجووووووك
شلت تليفونها وكانت متردده وايد انها تتصل على رقم سلطان.. بس حست نفسها مجبورة.. ماعندها حل غيره.. واتصلت على رقم سلطان..
كان في هالوقت يالس عالنت.. من رن تليفون ماحس بعمره الا هو فار اللابتوب على ينب ويعتدل في يلسته ويرد بهدوء: السلام عليكم
شما وبصوت فيه بحه وخوف: وعليكم السلام
سلطان: اهلا شما اشحالج؟
شما: بخير... السموحه على المغثة
سلطان: لا افا عليج عن هالرمسه..
شما: اخوي بغيت اقول لك ان عفرا متصله فيه ..
وقالت له كل الي دار بينها وبين عفرا... تم سلطان مبهت ومنصدم كيف ان هالإنسانه تقص على البنات.. وهو لا صور البنت ولا سوابها شي تألف من عندها بس عشان تسحب البنات.. اخ عليج ..
شما: انت وياي؟
سلطان: هيه وياج.. المهم سمعيني طنشي ولا تروحين وانا بتصرف وكأنه شي ماصار لا تحاتين
شما وبترجي: أكيييد؟
سلطان: قلت لج تطمني.. رمسة ريال
شما: مشكور.. ويزاك الله ألف خير..
وبندت الخط عن سلطان وهي مرتاحه شوي.. فهالوقت سمعت صوت امها تزقرها للغدا وسارت لهم بسرعه..
.. ..
توها رادة من المدرسه فتحت تليفونها وشافت مسجات ال missed call كله من نفس الرقم.. ورقم غريب أول مره تشوفه.. وصل لها مسج من نفس الرقم.. (اتصلي فيه ضروري)
وما وحى لها تتصل الا والتليفون يرن من نفس الرقم.. قفلت باب غرفتها وردت
فطوم: ألووو..
ناصر: مرحبا فاطمه؟
فطوم: هيه فاطمه.. منو وياي؟
ناصر: انا ناصر ربيع فيصل..
فطوم: خير ان شاء الله
ناصر: كل خير.. بغيت اقول لج لا تتصلين على تليفون فيصل هالفتره لأن عند أخوه..
فطوم وهي فيها ضحكة وفي خاطرها.. ليش جكوه يرمسني مثلا: ليش يعني؟
ناصر: ليش ماتدرين؟
فطوم : أعرف بشو؟