عجيبه

تشب ناري من اشوفك خاطرك مكسور
وافزع بالجروح وياك هادوده
ومن اسمع ونينك تون كل اعضاي
وادك صدري عليك وروحي ممروده
من رجفت شفافك اعرف شبيك
فاض الغيض بيه وطكت سدوده
لن شفت اليهود تدوس ضلع الكاع
وهي الغيرة كطرة وهسه مريوده
شفت نار اليهود التحرك ابغداد
بجفوف الارهاب وهاي مشهوده
رسمت الغيرة جف ومشرعه وعباس
ويبس حلك الفرات وشرب من جوده
حشمت التفك ما يرضه ليش يثور
وبس جدحه التفك ويثور باروده
وحشمت الرميثة وما طلع شعلان
وطلع بس النخل ويمعش خدوده
انتهك ستر الشمس شكو عبات الجود
وبيبان البعض لساه مسدوده
انزرع خوف ورعب وأنجرح خد بغداد
وين أهل الحمية أنجان موجوده
ليش التفرقة والدين نفس الدين
ويظل واحد وطنه بشعبه وحدوده
عراق ولا تون خل خاطرك مجبور
واحسبهن حساب أيام معدوده
طوفان الزلم بركان من أيثور
وأصابعنه لسراكي الموت مشدوده

الموضوع الاصلي  من روعة الكون