لما درى ان بدريه وصلت طلع حتى قبل يسلم عليهم لانه عارف ان امل ورهف اكيد بيطلعون لبسمه واللي كانت زعلانه لما نزل من عندها حب ينبها انهم وصلوا...اول مادخل الصاله ماكانت موجوده عرف انها داخل...قعد وهو مستغرب من نفسه شعوره ناحية بسمه غريب ماكانت تعني له في حياته أي شي.... واللحين صار يفكر فيها اكثر بكثير مما يفكر في عبير.... صحيح انها غالبا تنرفزه وهو يرد لها الصاع صاعين بس مايمنع انه يحس ناحيتها احساس غريب كل ماله يكبر في داخله...
تسأل في نفسه ممكن يكون حب...طيب اللي كان ولازل يحسه ناحية عبير اش يسمى وهل ممكن الشخص يحب شخصين في وقت واحد...
-":ها...اكلمك يالحبيب"
خالد:"كيف دخلتي انتي ووجهك..."
امل:"دخلت عادي مثل ماالناس يدخلون ...طقيت الباب مااحد رد فتحته شفتك سرحان في عالم ثاني كلمتك مارديت...قلت ادخل اشوف لايكون جاك فقدان للذاكره"
خالد:"اولا مادام مااحد رد المفروض ما تدخلين..."
امل:"اقول وين حرمتك بدل هالمحاضره اللي مارح تنتهي قريب"
خالد:"لازم افهمك بكره بتتزوجين ولازم تعرفين الاصول"
امل وهي تصارخ:"بسمه تعالي انقذيني "
سمعت بسمه امل وضحكت في نفسها من طريقة كلامها وفتحت الباب...
امل اول ماشافتها:"تعالي شوفي حبيب القلب اش مسوي فيني"
بسمه ببرود:"قلت لك ياامل مااااالي حبيب قلب عشان انقذك منه"
امل:"وهالمزيون وش محله من الاعراب"
بسمه:"ماله محل من الاعرلب..."
خالد:"اذا انا مالي محل من الاعراب اش تصيرين انتي"
بسمه:"تقدر تقول انا ولااااا شي"
عارف خالد انها تقصد كلمته لها..:"شئ طيب ان الواحد يعرف قدر نفسه"
بسمه:"انا عارفه قدري ياخالد.... وحتى لو نسيت فيه ناس مارح يقصرون ويذكروني بقدري"
امل حست ان الجو مكهرب بينهم وشكلها بينهم غلط...
امل وهي طالعه:"اذا خلصتوا حديثكم الودي احنا تحت ننتظركم..."
خالد بعد ماطلعت امل:"البنت على وجه زواج صدقيني من تسمع كلامك تتعقد.."
بسمه:"قصدك من تسمع كلامك انت..."
خالد:"بسمه لا تخليني لك خصم لانك والله انتي الخسرانه"
بسمه:"اش بخسر اكثر مماخسرت ياخالد"
خالد وهو طالع:"الايام بتبين لك اش ممكن تخسرين زود يابسمه"
اول ماطلع جلست على الكنبه وهي تفكر في كلامه ماتدري ليش من بعد ماشافت رسايل عبير وهي تحاول تبعده عنها اكثر واكثر وتحاول تكر فيها...لمصلحة من لو خالد تبدل تقبله لها اللي كان واضح الى كره.......تنهدت وهي فخاطرها متأكده ان المستفيده الوحيده هي عبير استغربت ليش تساعدها بكل سهوله.......المفروض تكون هي اللي تتمسك في خالد لانها لوخسرته رح ترجع للحياه اللي تكرا...خالد رغم كل مساوئه لكن يكفيها انها معه ماتحس بشعورالخوف اللي تحس به مع كل نبضه من نبضات قلبها من تسمع صوت عمها....
^^^^^^^^^^
كان جالس مع امه وابوه هو يسولف وامه بس تضحك اما ابوه بس يكتفي بالابتسام...
ام فيصل:"ه حبسي الله على ابليسك...اسكت حتى الضحك من كثر ماضحكت كرهته"
فهد:"شوفي ابو فيصل اشلون مايحب يتعب نفسه اذا مره انبسط يالله وبالقوه تظهر الاسنان الاماميه"
ابو فيصل:"شكل ودك تشوف ضروس العقل"
فهد:"خاطري يبه...اشوفها...بس على فكره ظروسك للحين قويه في هالسن"
ابو فيصل:"قل ماشاء الله حسبي الله عليك من ولد"
فهد:"ماشاء الله الله يبارك لك في ضروسك قل امين"
ام فيصل:"آميييييييين"
فهد:"الله يمه طالعه من قلبك...ايه ماتنلامين حبيب القلب..."
ام فيصل:"فهد عيب هالكلام..."
فهد:"مافيها شي....(وهو يغمز لامه)اتذكر مره رفعت التلفون وانتي تكلمينه تقولين له احبك ياعبد الرحمن"
ام فيصل وهي تشهق وتحط يدها على وجا:"انا قلته ياللي ماتستحي على وجهك..."
فهد حس انه زودها مع امه قال يقلبها مع ابوه:"بصرااااااااحه انا مو متأكد من صوت الحرمه اللي كان يكلمها ابوي اخاف تكون بس وحده ثانيه"
ام فيصل:"وحده ثانيه منو يعني..."
فهد:"ماادري يمه بس لا يروح فكرك بعيد.... تدرين الشرع محلل اربع"
ام فيصل بعصبيه:"فهييييد تدري انت اش تقول"
التفتوا على ضحكت ابو فيصل واللي نادر مايضحكها....
فهد:"(وهو يقلد لهجة الصعايده)الحقر نطئ يارقاااااله..."
مادرى الابضربه على كتفه من ابوه...
ابو فيصل:"ايا اللي ماتستحي تشبه ابوك بالحجر..."
فهد وهو يضحك ويحب راس ابوه:"اعذرني ياابوي من فرحتي بضحكتك....قمت اخربط بالحكي"
ابو فيصل:"مهو منك ...من اللي معطيك وجه"
فهد:"لا تزعل احنا ماصدقنا هالضحكه طلعت"
ابو فيصل:"ماعلينا متى تبي نخطب لك بنت عمك..."
فهد وهو متفاجئ:"أي بنت عم"
ابو فيصل:"كم بنت عم عندك مهي متزوجه...ولا لايكون حاط عينك على وحده ثانيه"
فهد:"لا وحده ثانيه ولا وحده ثالثه...بس انا اقول هي تدرس في الجامعه نأجل الموضوع شوي وعقب يصير خير"
ام فيصل:"حتى لو تدرس مايمنع تتزوج..."
فهد:"ادري بس اش اللي معجلنا ننتظر شوي وعقب يصير خير"
فهد فخاطره ودي اخطبها اليوم قبل بكره بس اخاف من الرفض واللي ممكن يترتب على هالرفض...
^^^^^^^^^^
كانوا رغم اختلاف طباع كل وحد عن الثانيه الا انهم في نظر بسمه اسره متماسكه وسعيده يمكن لانها كانت محرومه من الاخوات...كانت بدريه اعقلهم.... وساره فيها طيبة امها مع ضعف شخصيتها.... وريم قمه في الدلع والغرور.... يختلفون على كل شي بذات بدريه وريم.... ساره تكون محايده واحيانا تميل مع اللي كفتها بترجح...
دخل خالد هو شايل عيال ساره...اول مادخل قامت امل وساره ياخذون عيال خالتهم...
بدريه:"ياهالبنات اللي قاهريني...."
خالد:"ه سلامتك من القهر يابدريه"
بدريه:"تلومني اخوهم ياعندي... ياعند الشغاله..ز وبس يشوفون عيال ساره قاموا تقول محرومين من العيال"
بسمه:"ماعليك منهم...انا احب محمد"
ساره:"اش قصدك عيالي ماينحبون..."
بسمه:"بالعكس ...بس عيالك سوقهم ماشي "
بدريه:"الله يهديك يابسمه بدل ماتكحلينها عميتيها..."
خالد:"في هذي صدقتي يابدريه"
بدريه ماحبت تعلق على كلام خالد:"يابناتي شجعوا الصناعه الوطنيه"
رهف:"سووووري ياماما بس الصناعه الاجنبيه دايم احلى"
بدريه:"غلطاااانه مايدوم الا الوطني"
ساره:"ايه...عيالي صناعه اسرائيليه ولازم تقاطعونهم"
بدريه:" لا مهو لهادرجه بس ممكن نعتبرها صناعه امريكيه وبعدلازم نقاطعها"
خالد كان جوال ريم بجنبه على الطاوله بحركه تلقائيه اخذه يقر الرسايل:"اما لو يسمعكم ناصر كان يحرم يدخل عياله بيتنا"
ريم واللي ملت من اللي تسمعه:"اقول امل بتشرفين السنه الجايه عندنا في الجامعه"
امل:"ايه...مانوصيكم عاد في حسن الضيافه"
ريم:"هذا ان شفتينا..."
امل:"الشره على اللي يسأل عنكم مادام معي بسمه مارح اسأل لا عنك ولا عن غيرك..."
انتبه خالد على اللي يقولون:"بسمه مارح تكمل في الجامعه..."
امل واللي ماصدقت اللي تسمعه:"من قال"
خالد وهو يناظر بسمه واللي كان تغيرت ملامح وجا وهذا اللي يبيه:"لاني بصراحه مااحب زوجتي تدرس احس الدراسه تعب عليها"
ريم:"بعد يكون احسن انها ماتدرس بصراحه الجامعه مهي لاي احد..."
مارد خالد عليها لان فيه رسايل شدته وماانتبه للي قالته ريم...
ماعلقت بدريه لانها حست ان خالد وبسمه ممكن متفقين على هالشي...
صدمت بسمه من اللي تسمعه كان حلم حياتها تكمل دراستها وخالد بلحظه بيحطم هالحلم
كانت تتمنى تروح غرفتها بس حست انها لازم ماتبين لاحد ولما تكون لوحدها مع خالد تحاول تغير رايه بأي طريقه...
خالد:"ريم اش هالرسايل في جوالك"
صدمت ريم لما شافت الجوال في يد خالد:"عادي من صديقاتي ..."
خالد:"بس فيه وحده اسمها ليلى بصرااااحه رسايله ما تدل على انها من بنت لبنت"
ريم وهي تحاول تبان طبيعيه:"اش قصدك..."
خالد:"ماقصدي شي بس اتمنى ياريم ماتصادقين هالاشكال...واللي يكون جرئ زياده عن اللزوم"
ريم:"رسايلها عاديه وما فيها شي..."
خالد وهو يتفحص وجه ريم:"لا ياريم مهي عاديه"
ساره:"ترى ياخالد البنات يرسلون هالايام أي كلام وما يهتمون اش مضمون الرساله"
سكت خالد وما رد وهو يناظر ريم ومايدري ليش قلبه مهو مطمن بس تعوذ من ابليس ريم بنت مؤدبه ومستحيل تغلط مع احد...
طلع خالد من عندهم وما درى انه فيه ثنتين بكلامه خلاهم ينفصلون عن اللي حولهم ويسبحون في عالمهم الخاص...ريم والرعب اللي في قلبها اللي حسته لما شافت نظرت خالد لها...وبسمه اللي حست خالد بيحطم حلمها في تكميل دراستها الحلم اللي ممكن يحسسها بالامان في المستقبل الامان اللي من ماتوا اهلها وهي محرووووومه منه....
^^^^^^^^^^
كانت في المطبخ وهي تحاول تخلص شغلها.... الشغاله لوحدها ماتقدر تسوي شي وبناتها كل وحده اكسل من الثانيه ...ومستحيل يساعدونها...تنهدت لما تذكرت بسمه لو موجوده كان هي مرتاحه اللحين...اكيد هي اللحين مرتاحه في بيت العز...
دخلت هند وهي مستعجله لانها تتابع فليم وما تبغى يفوتها...
هند:"يمه وحده على التلفون تبيك على التلفون .."
وطلعت بسرعه قبل ماترد عليها....
ام عبد العزيز:"حسبي الله عليك من بنت اللحين انا فاضيه حتى اكلم احد..."
تركت اللي في يدها وراحت الصاله ورفعت التلفون وهي تناظر هند نظرات كلها تهديد ...واللي ماهمها نظرات....
ام عبد العزيز:" الو"
-السلام عليكم..."
ام عبد العزيز وهي تحاول تتعرف على الصوت:"وعليكم السلام"
-"كيفك ياام عبد العزيز وكيف بناتك"
ام عبد العزيز:"الله يسلمك...اعذريني بس ماعرفت صوتك.."
-"ايه اكيد ماعرفتيه لاني اول مره اكلمك تليفون....انا ام محمد خالة خالد رجل بسمه"
ام عبد العزيز اول ماسمعت الاسم كانت واقفه وقعدت:"ياهلا والله بهالصوت"
ام محمد:"الله يحيك..."
ام عبد العزيز:"اشلونك واشلون العيال"
ام محمد:"بخير الله يسلمك...اشلون بسمه عسى تزوركم..."
ام عبد العزيز واللي كانت عارفه ان ام محمد ماتحب بسمه:"جات مره وحده ...اشلونها مع اختك"
ام محمد:"يعني للحين مو مبين شي "
ام عبد العزيز:"قولي لاختك تحذر منها ولا يغرها الطيبه الكذابه اللي تظهرها ترى مظهرها خداع"
ام محمد:"وانا حسيت كذا...عموما لازم تزوريني وما تقطعيني هذا انا اخذت منك الرقم واتصلت فيك"
ام عبد العزيز:"لازم ان شاء الله ازورك..."
ام محمد:"تامرين شي ياام عبد لعزيز"
سكرت التلفون ماانتبهت لابو عبد العزيز واللي سمع نص المكالمه...
ابو عبد العزيز:"مبين ان اللي كنتي تكلمينها مهمه "
ام عبد العزيز:"هذي ام محمد اللي قلت لك عليها"
ابوعبد العزيز:"خالة خالد"
ام عبد العزيز:"ايه "
ابو عبد العزيز:"اشلون عرفت الرقم"
ام عبد العزيز:"خذت رقمي يوم زواج بسمه بس انا مستغربه من اتصالها.."
ابو عبد العزيز:"بتعرفين مع الايام...الا بسمه مااتصلت"
ام عبد العزيز:"لا مااتصلت..."
ابو عبد العزيز وهو يتنهد :"انا قلت بستفيد من زواجها عزالله ان استمرت كذا ما استفدت من وراها شي.... لكن ماعليه ان ماادبتك يابسمه مااكون انا حمد"
^^^^^^^^^^
-"انا قررت قرار اتمنى مااحد يعارضني"
التفت عليه ابوه وعمامه وعيال عمه...كان يحاول يظهر الجديه...
ابو ناصر:"تفضل طال عمرك سمعنا قرارك..."
فهد:"قررت اتزوج ثلاث حريم..."
الكل ضحك من كلامه...وتنهد ابوه وهو فخاطر ماادري متى بيعقل هالفهد...
خالد:"طيب ياولد عمي اش سبب هالقرار الخطير...."
فهد:"للاسف انت السبب..."
خالدبااستغراب:"انا ...اش ذنبي انا..."
فهد:"يااخي عقدتني انت الوحيد اللي تدخل المزرعه على كيفك... حتى بيتنا اذا كانوا اهلك فيه تدخله وانا محروم منه"
ناصر:"تظلم بنات الناس معك حتى تخرب على خالد دخلته"
فهد:"اش اسوي انت متزوج اخته.... وفيصل مرته مطيحه في بيت اهلها قلت اتزوج ثلاث اذا راحت وحده لاهلها يبقى ثنتين يخربون عليه"
ابو خالد:"تزوج اربع احسن من ثلاث"
فهد:"لاااا انا افكر في المستقبل بيعجزون الثلاث وقتها ادور الرابعه"
فيصل:"تفكر في المستقبل بعد"
فهد:"ايه اكييييد...بس فيه حل ثاني اذا طعتوني"
ابو خالد:"تفضل طال عمرك سمعنا الحل الثاني"
فهد:"تلومني يوم اقول اب متفهم (لما شاف نظرة ابوه)بعد ابوي طبعا...المهم هذا منصور صديقي يقول انه عندهم
عادي يطلعون ويدخلون على كيفهم لان بنات عمهم لابسات براقعهم..."
خالد:"عاد انت تطيح الميانه على طول....متأكد لو يصير هالشي لالقى خواتي يلعبون معك كوره..."
فهد:"ايه مافيها شي بنات عمي واعلمهم كيف يلعبون كوره"
خالد:"يخسى الا انت..."
ام عبد الرحمن:"اقوووووول خل عنك الحكي اللي مامنه فايده...متى ناوي ان شاء الله تخطب بنت عمك"
انحرج فهد من عمه ومن خالد ماحب احد يتكلم في الموضوع قدامهم حتى مايفهمون سبب تاجيله رفض لريم من طرفه...
فهد:"قريب ان شاء الله بس انتي مارديتي على خالد في الشايب المزيون"
ام عبد الرحمن:"ايا اللي ماتستحي على وجهك انا في هالسن اتزوج"
فهد:"في ريعان الشباب مافيها شي..."
ابو فيصل:"فهد..."
فهد:"سم طال عمرك..."
ابو فيصل:"اقول يازينك ساكت..."
ضحك خالد بصوت عالي حتى يقهر فهد...
فهد:"ايه اضحك اش عليك ابوك حبيب..."
ابو فيصل:"اش تقصد ..."
فهد:"ابد يبه سلامتك بس انت الله يهديك شووووي شديد..."
ابو فيصل:"هذا وانا شديد طلعت كذا ..."
ابو ناصر:"لا كل شي ولا فهد ماتحلى القعده الابه..."
قام فهد وحب راس عمه :"الحمد لله اخيرا فيه احد عرف قيمتي"
ام عبد الرحمن:"اشلونها مرتك ياخالد"
خالد:"طيبه وتسلم عليك"
ام عبد الرحمن:"الله يسلمك كان ودي اروح اليوم اسلم عليها وعلى اهلك بس حسيت اني شوي تعبانه"
خالد:"سلامتك والله.... اجيبها تزورك ان شاء الله..."
ام عبد الرحمن:ما وصيك عليها..."
خالد:"كل ماشفتيني وانت مااوصيك عليها"
ام عبد الرحمن:"لا تلومني ياخالد مشاء الله عليها والله انها تنحب عقل وجمال وادب..."
قام فهد وجلس قدام جدته كانه هامه الموضوع حتى يقهر خالد...
خالد:"اقول ياجده نقفل على الموضوع احسن اشوف فيه ناس يحبون يتدخلون في اللي مالهم فيه..."
فهد بكل برائه:"لا يكون تقصدني..."
خالد:"لا انت لك في كل شي..."
فهد وهو يعدل جلسته:"تدري ياخالد انت قاهرني"
خالد:"يشرفني ويسعدني اني اكون سبب في قهرك بس ياليت تقولي السبب"
فهد:"لا ماني بقايل موت بحسرتك..."
^^^^^^^^^^
كانت في غرفتها بعد ماراحوا خواتها وهي مالها خلق تكلم احد حتى وليد...كانت خايفه انها تنكشف قدام اهلها وكان خوفها الاكبر من الله اللي يشوفها ويستر عليها تتمنى تكون عندها القوه حتى تتوقف عن المكالمات اللي ماتدري وين ممكن توصلها...
رن تلفون غرفتها وكان المتصله مشاعل...
ريم :"الو"
مشاعل:"هلا ريم ...اشفيه صوتك..."
ريم:"مافيه شي.."
مشاعل:"علي انا..."
ريم:"ماادري احس اني متضايقه..."
مشاعل:"اكيد ماكلمتي وليد..."
ريم:"مالي خلق..."
مشاعل:"غريبه..."
ريم:"لا غريبه ولا شي..."
مشاعل:"ريم احس فيه شي..."
ريم وهي تتنهد:"ماادري اش اقولك بس اليوم خالد كان يلعب في جوالي وشاف رسايل وليد للي نسيت امسحها واستغرب ان فيه بنت ترسل هالرسايل..."
مشاعل:"لا يكون شاك يوم مسك جوالك.."
ريم:"لا مهو شاك بس نظراته لي عقب تذبح..."
مشاعل:"احرصي مره ثانيه"
ريم:"افكر جديا اني اقطع هالعلاقه وارتاااح من العذاب اللي احسه كل يوم"
مشاعل:"كيفك بس ترى اللي تسوينه مايتعدى مكالمات ومايضرك بااي حال من الاحوال"
ريم:"ياخوفي المكالمات تجر لشي ثاني....اللحين وليد يلح يبي يشوفني"
مشاعل:"ماادري بس اذا كان في مكان عام مافيها شي..."
ريم بعصبيه:"الظاهر مانتي بصاحيه ....مستحيييييل اخليه يشوفني لو اش ما صار"
مشاعل:"طيب هدي نفسك...لا تعصبين"
^^^^^^^^^^
في مكان قريب منها كانت بسمه تنتظر خالد واللي كل مامسحت دموعها تجددت ...
تحاول لما يدخل تكون هاديه جدا...بس انفعالاتها تغلب على الهدوء المصطنع اللي تحاول تظهر به...من يوم هي صغيره وهي تتمنى تكمل دراستها مهو حب في الدراسه قد ماهو حب في تأمين مستقبل ماكان مطمئن لا مع عمها...ولا مع خالد...
سمعت الباب لما فتح وشافت خالد داخل بقامته الطويله...ناظرها حس انها نايمه لانها كانت منسدحه على الكنبه وفي الظلام واتجه للغرفه...
بسمه:"خالد"
التفت عليهاوهو متفاجأ انها صاحيه:"غريبه صاحيه في هالوقت.."
بسمه:"بغيت اكلمك اذا امكن..."
اتجه لها وشغل الابجوره وحطت يدها على وجا لانها حست النور كان قوي على عيونها اللي كانت في الظلام...عدلت جلستها وجلس بجنبها...
خالد ببرود:"خير ...اش عنك"
حست من نبرة صوتها انها بنرفزها قد مايقدر...بس حاولت تضيع عليه هالفرصه
بسمه :"خالد ليش تقول اني مارح اكمل دراستي.."
خالد:"لانك ببساطه مارح تكملين..."
بسمه:"ممكن اعرف الاسباب..."
خالد:"قلت الاسباب لان الدراسه تعب عليك ياحيااااتي"
بسمه:"لا مهي تعب..."
خالد:"حتى لو مهي تعب منتي دارسه يابسمه"
بسمه:"ليش انت كذا...بس تدور اللي يتعسني وتسويه"
خالد:"اسألي نفسك"
وقام بيروح عنها...وحس بيدها تمسك يده التفت عليها ولاقاها منزله راسها واضح من مسكة يده انها في قمة توترها...رجع جلس بجنبها يحتريها تتكلم ...
بسمه وهي تحاول تتحكم في دموعها اللي نزلت غصب عنها :"خالد الله يخليك امنعني من أي شي الا الدراسه"
حس خالد ان الدراسه لها اهميه خاصه عند بسمه ماتوقعه...
رفعت راسها... :" اذا اللي تبيه ياخالد تذلني واني اترجاك...انا اللحين اترجاك ماتحرمني من حلم حياتي..."
خالد:"لا يابسمه ماابيك تترجيني ولا ارضى لك المذله..."
بسمه:"اطلب اللي تبي ياخالد بس لا تحرمني من دراستي."
مسح دموعها ورفع وجا بيدينه :"طلبي الوحيد انا ننسى كل اللي صار...انسي عبير...وانسي كلامي الجارح لك ...وبنسى انا كلامك اللي يسم البدن...ونبدى حياه جديد مثل أي اثنين توهم متزوجين...يابسمه انا مستغرب منك كل ماقربت منك خطوه بعدتي عني مية خطوه... "
بسمه:"اخاف ياخالد...."
خالد:"من ايش تخافين..."
بسمه:"اخاف اطيعك وتتخلى عني.."
خالد:"يابسمه تأكدي اني مستحيل اتخلى عنك...غصب عني صار لك عندي مكانه كل مالها تزيد..."
بسمه:"ماادري ياخالد عطني وقت حتى احاول انسى....واكون مرتاحه اكثر"
خالد:"خذي كل وقتك(وهو يتنهد)وبصبر ان الله مع الصابرين..."
قرب منها وباسها اول مره يسويها وهالحركه وترت بسمه اكثر ماهي متوتره من لمسة يدينه...
خالدوهو قايم:"تصبحين على خير..."
من توترها ماقدرت حتى ترد عليه....التفت عليها لما وصل الغرفه
خالد:"ودراستك بتكملينها في كل الحالات..."
اول مادخل حطت يدينها على وجا...مهي عارفه هي سعيده ولا خايفه ولا متردده حست مشاعر وانفعالات كثيره في داخلها....الطاغي عليها الخووووف من المستقبل....
يتبع.....
|
آخر 10 مشاركات
08-11-2007, 08:03
العرض الشجري
