₪₪₪₪₪يازين وقتن نشب نار بالشتاء متدفين ₪₪₪₪₪

مساكم / صباحكم ريحة حطب

لي مده مانزل قصايد واعتذر بسبب ظروف

واتمنى تنال ربع رضاكم,,, وكل عام وغوالي روووعه بالف صحه وسلامه

وهالقصيده من حلاها ماشفت مثلها نقول بسم الله:




يازين وقتن فات ماهوب هاللحين

يوم النوايا كلهن صافياتي

والحقد مايوجد ودايم سعيدين

ونفوسنا سمحة وسكر نباتي

وبيوتنا ونسه ولابه شياطين

مايدخله صوره ولامنكراتـــي

ويطرد ظلام الليل عنا سراجين

واحيان يقضي قازهن طافياتي

مشروبنا صافي من الزير ولبين

ماهوب مستورد سريع الفواتي

ماصنعوه الغرب يافالهم شين

مابه مواد الحفظ ومسرطناتي

وعيشنا مرقوق بين العشاوين

تحطه امي قبل وقت الصلاتي

لقمه هنيه طيبه طعمها زيـــن

تحوفها بيدينها الطاهراتــي

ثمن ننام الى قضينا مصليـــن

بعد العشاء كلن يريد المباتي

وامي تنومنا بزين السباحيـــن

سوالفن من عنـــدها طيباتـــي

ننام من بدري ونصحى نشيطين

بعد الشروق اشغالنا جاهزاتي

مابه كسل لاشغالنا مستعدين

ماعندنا سايــق ولا خادماتــي

نلبس بيوم العيد ثوب السباهين

وام تحنينا نمــــاري البناتـــي

مقيـــالنا بمجببــــن بيـن بابيــن

فيه الهواء يطرق جميع الجهاتي

نشب نارن بالشتاء ومتدفيـــن

مافيه دفايات ومكيــفاتــــــي

يجي المطر وثيابنا تبتلي طين

ونلعب جميع عيالنا والبناتـــي

يصب مثعبنا ونملى المواعيــن

ياحلو ذاك الماء وذيك الحياتي

ماهي حياة الحين ياشين هالحين

كله غثاء وهمومنا كاثراتـــــي

وصلاة ربي عد ماترفع يديـــن

على محمد صاحب المعجزاتي


فديت ايام اول

وسلامتكم

مشاعل***

الموضوع الاصلي  من روعة الكون