ملك ممكلة الجمال

يا أجمل الشعر يا فتنة قوافيه
اضحك لجل افرح شوي
يا عيون أتعبها الجمال
اقبلني عاشق مستهام
اكذب غرامه صدق
وآخر حدود إحساسه انت ايه انت
من غيرك ياللي صوتك
انقسم حوله الجمال
واختلف فيه الزمان
واتفق معه الفرح
امهلني لجل املى عيوني بشوفك
لجل اعطر نفسي بوجودك
يا عطر ما شميت مثله
يا رقة تذبح الشاعر
توديه المهالك
تخليه يضحك على جرحه
ويبكي على فرحه
يا أشبه بالمستحيل
عطني كلمة ود منك
افرح فيها دهر
وأكيد فيها الصبر
وانسى شوي القهر
ادفع العمر لعيونك
وانت العمر
انت اول وانت آخر حد فاصل
بين الجمال والجنون
وانت فن يختلف عن كل الفنون
فن راقي
ما كل قلب يفهمه
لو تدري بغلاك تستغرب
كل هذا الحب لي
لا وأكثر
بس عطني بس فرصه
لجل اعلم معنى حبي
للعيون الناعسه
للضحكه الحالمه
للشفايف
يا نور يستحي منه الظلام
يحتار فيه الصبح
يا صبح عمري وابتسامة عذابي
لحنك اللي اسمعه ما قد سمعته
مختلف جذاب
ويريح الاحساس
لو كنت دكتور
لاوصفك لكل القلوب
وصفة شفا
وصفة حلا
والدوى المر ماله داعي
ابتسم ينشرح صدر العليل
وجودك يعطي نك للمكان
وللزمان
وطيبتك ميزه غريبه
كل طيب الناس فيك
وأي طيب
يا صاحب السحر الخفي
سحرك سكن قلبي
علمني انك ما تشابه لغيرك
يا مميز
ارفق بقلبي شوي
حبك اكبر من احتمالي
ارفق شوي
يا سيد العشق
من اول حس في قلبي
إلى آخر بحر إحساس غمرني
وانا أقول
ليتني ما شفتك
ولا عرفتك
بس أظن وصدق أظن
كل من شافك يحبك
أو هو عنده مشكله
في النظر أو له قلب ميت
يا اكبر من النسيان
يا فتنة هذا الزمان
اهمس
أنا اشهد انه ما همس غيرك
ولو همس
انت اخترعت الهمس
يا رقة استعصت على غيرك
بيني وبينك خيوط العنكبوت
واهنه مابي اقطعها
ولا اقدر أشدها واوصل إليك
احترت فيك وتعبت مشاويري
يللي أفارقك أضعاف ما اشوفك
واتخيلك أضعاف ما أشوفك
أحب كل شي فيه مسحه منك
وكل شي فيه ذكرى لك
هذي قصة حبي
قصه انت فيها كل شي
كل روعه تسكن العالم انت
ومستغرب إني احبك
كل حسن يسكن العالم فيه منك
انت ملكت الجمال
والبقية يدعون الجمال
وانا عشقتك يا ملك
وما غرني أية مدعي
يا فلسفة ما فهمتها بس احاول
إني افهم هالجمال
هالبراءة والصدق
مثلك يامر القلوب وينهيها
ويبتدي جروحها وينهيها
كلمة احبك كيف أقولها
من حلاوتها زادت صعوبه
ومن حلاك صارت مستحيلة
ساعدني حتى أقولها
لجل انتشي
يا أحلى نشوة ما عشتها
تصدق انك تصلح تكون
للغريب ادفى وطن
وللمسافر سكن
وللمحتار وجهة فرح
يا سكر الوقت يا ملحه
وش اقول
أتعبتني الأحلام فيك
والأوهام
أفتش عنك
في عيون السهارى
في عذاب الحيارى
في الليل في الصبح
ولا ألقاك
مالك شبيه ولا نظير
يا بريء في زمن غدر
يا نقي والبحر مالح
كيف ألقاك
يا العيون السود
يا طلعة كلها نور
يا دوى الجرح يا سبته
يا ربيع الحب
يا ورد حب ما يذبل ابد
انت الفرح والبقية هم
انت الأمل
لجلك أحارب الياس
ولا استسلم
احبك مليون احبك
تريليون احبك
احبك
حتى حب العالم نقص
لجل يكمل باقي حبي
احبك حتى اشتكى مني التفكير والخيال
قصتي وياك حزن
ولجلك كل شي يهون
حتى الألم والحزن
أحييك يا اطهر قلب
يا أحلى ابتسامه
يا أطيب روح
يا أحلى همس
واحبك يا المستحيل

الموضوع الاصلي  من روعة الكون