ليتك رحلتي قبل تجرحيني

ليت لو عني رحلتي قبل تجرحني حروفك :: ليه ما رحتي عزيـزه واذكـر احلـى ذكرياتـك

يوم عزمتي رحيلك جيتي تسلي سيوفك :: ويـن قولـك انـت عمـري وانـي اول امنياتـك

لو رحلتي في سكاتك تعذرك عندي ظروفك :: كان اقول انها ظروفك لو رحلتي فـي سكاتـك

وشو عذرك دام حبك راضي ٍ به دون شوفك :: ما اشترط حبك بشوفك ماهومشـروط بلقاتـك

كنت اشيل الهم عنك يوم هو يثقل كتوفك :: كنـت الفـك بالسعـاده كنهـا صـارت عباتـك

كنت احبك حب صادق ماهو لحظه ثم اعوفك :: كنت لك سمعٍ وطاعه في يدك كنـي عصاتـك

كنت اشوف الحب تاجك كنت اشوف الصدق نوفك :: مانتي كفو اللي يحبك ميزه الغدر بصفاتك

كان يكفيني هواك وكنت عايش مع طيوفك :: كنت احبك حب صادق كنت اصونك من غلاتـك

للرديه ما سحبتك ما رضيت المس كفوفك :: كنتي تقولي تعـال ولا رضيـت المـس شفاتـك

كنتي غصب بتسحبيني قلتي لا يمنعك خوفك :: يوم فهمتك مرادي قلتـي مـا ألحـق جزاتـك

احسبك مثلي عشقتي والغلا يسكن بجوفك :: ابـدوي ٍ يـوم اعشـق اعشقـك لاخرحياتـك

واعشقك بعد الممات وكل ما أذكر وصوفك :: كل يوم يزيـد حبـك كـن مـا حلـت وفاتـك

كنتي بعيني ملاكٍ شعرك يلامس ردوفك :: والقمـر طلـت جبينـك كنتـي ورد بحـد ذاتـك

مهرة ٍ شقرا عصيه ما انوجد كفو لعسوفك :: كنتي آيه بالجمال وبالحسـن مـا شـي فاتـك

عاشق بقلبي اشوفك طامع بعطفك وروفك :: كنت احبك حب عاشـق ماطمـع يـوم بحلاتـك

كنتي شمس العمر كله ليش ابديتي كسوفك :: للأسف طعن الاحبـه كـان مـن ابرزسماتـك

لجل وجهك ما يقارب للثرى أرفض عكوفك :: قلت انا بجلس وانتي اوقفـي بجمـع شتاتـك

وارتكز رمحك بظهري استغليتي وقوفك :: وش شعورك لو جلستي ومنـي الطعنـات جاتـك

مانتي كفو اللي يحبك للغدر دقت دفوفك :: غامضٍ جرحـك وبانـت بالظهـر طعنـت قناتـك

قلت انا لقلبي تراني شفت خنجر مع ضيوفك :: انتبه من غدر ضيفك قـال أسكـت يارداتـك

واخر اللي قال قلبي الله يسامح كفوفك :: يوم تغدربي وانا اللي جالـس اجمـع فـي شتاتـك


وتحياتى لكم

الموضوع الاصلي  من روعة الكون