خانتني عناويني*
(( صرخت بعد سبع سنين في غربتي هنااااااا.............. فكانت خانتني عناويني* ))
ألا يالغالية وينك .. وش أخبارك و كيف الحــال ؟
يــَأمي كيف نبْــض الدار .. خانتني عنــاويني
يــأمي لوْ طغى همّــي و ضاق الصدر و الآمال
مـن اللي يحضن الدمعة قبل ما تحتضن عــيني ؟
يــأمي لو صرخ صبري (سكنت المر و الترحـال )
من اللي يقول يا غالي (فدتك الروح و سنـيني ) ؟
من اللي يقول يا غايب : ( تحمل و اهزم الأهـوال ) ؟
من اللي يهمس بْـــإذني (صلاتك تربطك فيني ) ؟!
بكتك الروح (ف) الغربة .. نعم أبكي و أنا رجّـــال
تذكّــر حضنــك الدافي .. دخيلك بس ضمــيني
عجاف(ن) سبْع ياااا يمّــه و أنا أتْبع سراب الـلال
و لا أشـرب سـوى غربةْ عطش تسقي شـراييني
أشوف الناس غير الناس و الغربـة تهّــد جْبــال
يأمــي جـاوبي شوق(ن) مـعَ الأيام يطــويني
هجير(ن) لو حرَق بعضي .. دفا صدرك (بَرد) و ظْلال
يأمــي وشْ يصبّـرني و لا غيرك يواســـيني
نعم مشتاق شباك الموانـي و ضحكــة الأطفــال
نعم مشتـاق حارتنـــا القديمة... لا تخلــيني
أبي قمحك (خبز يدّك ) أبي قهــوةْ وطــن و دْلال
يأمــي (آاااااااه) في حلقي طعم طبخك يناديـني
يأمي قد شهق شوقي و لا عنـدي أبــد مرســال
لجِل يكسـر عقوق(ن) بي .. زرعته بينك و بيني
نعم ودّي أطفّي الشوق ياااا يمّه و نجمــك جــال
على صــدر الحنين اللـي يقول إنك فقدتــيني
نعم نفسي تغني لي .. نغم صوتك طرب .. مــوّال
نعم ودّي أغني لك و تزهــر بــكْ بساتــيني
دخيل الشوق و اللهفة .. ترا طيفـك غيابه طــال
و أنا ( الياثوم) أرهقني .. دخيل اللّـــه احميني
يأمي لو لهَث وجدي .. مطـر حبّك سقانــي زْلال
هماج الحب (أوطانك) و طوفانــه بيــرويني
يأمي لو نزَف قلبي رعاف التيــه و الغربـــال
ضياعه يطرق أبوابي ( أنا ويني .. أنا ويني ؟!)
يأمي لو هزمني البرد و الحمّـى تخـون الشــال
يأمــي لو رجف قلبـي.. فلا غيرك يداويـني
يأمي قد نِحَت قلبي على شكلك حجـر .. تمثــال
سمعته من كثر شوقـي .. يناديـني و يبكـيني
تعالي يا ضفاف الكون بس مـرّة و خـوني الفـال
تعالي بس (ف) احْـلامي .. رجاءً لا تجافــيني
نعم ذا الشوق في صدري .. تحت ظهري زرَع أغلال
و تقصيري يأنبــني .. يعذبـني و يكــويني
نعم قصّرت في حقك : (معي زحمة.. معي أشغــال)
قبيـح العذر يا يمه : ( دخيل الله تعذريــني )
نهِج ديني يوصّيني أشيـل الحمــل و الأثقـــال
قضى ربي بإحسانك .. نعم واضح نهِج ديــني
يأمي لو بكت روحي : (سكنت الضيق و الترحــال)
من اللي يْقول : ( يايمّه .. فداك العمر و سنيني)
يأمي لو كبَر همّي و ضـاق الصــدر و الآمــال
دخيلك احضني الدمعة قبل مـا تحتضن عــيني
تعالي و اسألي قلبي : (وش أخبارك و كيف الحال ؟)
و أنا بصرخ : ( بخير(ن) بس.. خانتني عناويني !)
:icon_mn:
الموضوع الاصلي
من روعة الكون
آخر 10 مشاركات
23-06-2007, 06:24
خانتني عناويني*قصيده مؤثرة
العرض الشجري
