] عيال القواطي
مكالمة بين ولدين في الأول الابتدائي على الموبايل يوم العيد
أحمد:السلام عليكم حمد
حمد:وعليكم السلام هلا
أحمد:عساك من عوادة
حمد:وأنت من العايدين والسالمين
أحمد:شحالك ... شخبارك؟
حمد:بخير وعافية.. وأنت شو علومك؟
أحمد:والله يسرك الحال .. قاعد أطالع التلفزيون..مافيه شي يسلي .. كله ممل.
حمد:إلا أقول أحمد؟
أحمد:نعم..آمر..
حمد:روح قول لأمك أبي عيديتي..
أحمد:إن شاء الله.. بدخلها ألحين في السكنر.. وبطرشها على أيميلك.. وسوي لها أنت print
حمد:أحيده النت مقطوع عندك من يومين ..! كيف بتطرشلي إياها؟؟!
أحمد:عادي بطرشها عالفاكس.
حمد:يا لله عاد انته طرشها مسج وفك عمرك..
أحمد:إلا أقول حمد؟..ليش ما تيا تشلها انته وتتقهوى ويانا من قهوة العيد؟؟
حمد:لا والله ما قدر .. أنت تدري الدنيا حر.. والشمس تصقع فوق روسنا .. والكندورة من يومين وأنا أرشها سبريه(مثبت ملابس) وميبسنها غصب.. ولو أفسخها ألحين بوقفها عدالي من كثر ما هي يابسة..وأنت تعرف إنها مالت أخوي عبدالله مفصلنها من ثلاث سنين وطويلة وعريضة علي.. ولو ظهرت تحت الشمس بتذوب وبيبان طولها وعرضها.
أحمد:ليش شو نوع القطعة اللي مفصلنها أخوك؟؟
حمد:عاد انته لا تسأل .. تعرف إنها من خياطة قوم بو عبود..وأنته تعرف شباب الخليج .. يحبون الفشخرة واااااااااااااااااااااااايد..مثل سلّوم ذيك اليوم في العيد اللي طاف.. لابس نعال مقطعة.. ويوم سألته قال: والله نعالي سرقوها من قدام باب المصلى.. والنعل اللي في البيت (يداد) أمي عقتهن من البطرة..وأونه بيروح يفصل وحدة يديدة ..ولين بطلت المدرسة وهو يلبس نفس النعال...
أحمد:والله حـــالة..انزين أنت شوناوي تسوي في العيد؟؟
حمد:تصدّق عاد.. أبوي مطرشني أروح أجمع قواطي من الحارة..
أحمد:هي والله فكرة..
حمد:بس إنت تعرف .. فضيحة لو شافني حد من الربع..
أحمد:والله ما علي من الربع..أنا ألحين بسير أجمع قواطي..اليوم عيد والناس وايد تشرب بيبسى وكوكولا وميرندا وهالسوالف.. وهذي فرصة ما تتعوض إلا مرتين في السنة..
حمد:انزين أنت الحين جمعهن وبنتقاسمهن النص بالنص عقب..والعيد الياي علي أجمعهن..
أحمد:لا والله .. تبا تجمع اظهر بوزار وفانيلة واشلح زنودك..والكندورة خلها في البيت..
حمد:ماهي هني الفضيحة..الوزار والفانيلة مقطعات والكندورة مغاورتنهن.. والغترة سودة من كثر ما يلبسها أخوي .. إلا قمت أرشها بحبر عشان تزرق..
أحمد:ومن وين يبته الحبر؟؟!!؟؟
حمد:كنت ألعب بقلم راعي الدكان وكسرته..وفره فويهي ..قلت عاد استفيد منه بشي..
أحمد:انزين شي بقى فيه حبر؟؟
حمد:ليش؟؟!!
أحمد:عشان أخيس ايديني وبروح العيادة وبقولهم مضروب وبيلفولي اياها .. وعقب ببطل اللفة وبلفبها الفوز اللي نسقي فيه الزراعة..منطرمن شهر..
حمد:صدق!..دريت شو استوى أمس؟؟
أحمد:لا والله ..شو استوى؟؟!!
حمد: كلمت خلّود في التلفون أمس وقلتله بيي أعيد وياكم .. قال : أصلا نحن مسافرين اليوم ماليزيا نتكشت..وبالمرة شار علينا أبوي نعيد هناك وبيمشينا هو في ماليزيا وعقب بنروح فرنسا نزور المتاحف هناك ونتمشى فيها..قلتله :يعني ما في أمل أزوركم هالاسبوع؟؟..قال:لا ويمكن نرد عقب ثلاث أسابيع.. وبالصدفة كان أبوي راد من الكبرة بايع القواطي..وقال لي إنه شاف أبو خلّود عند درج الكبرة يشحت..
أحمد:وهذا اللي أونه يتفشخر ..أبوي صاحب شركة كبيرة ..وأبوي يابلي وأبوي اشترالي وأبوي وداني ..وأبوي...وأبوي.. وهو مناك الله يعلم فيه..
حمد:صدق لا قالوا"من برى هالله هالله ومن داخل يعلم الله"..
أحمد:هي والله صدق..
حمد:وعلوم بعد أخبار... ماشي عندك شي ما شيات..
أحمد:كنت أبي أخبرك عن سالفـ............................................
تيت تيت تيت تيت تيت تيت تيت تيت تيت تيت تيت تيت تيت تيت تيت
ويرد أحمد يدق لحمد وحمد يدق لأحمد
ويرد عليهم الجهاز"عفوا لا يوجد رصيد في حسابك"
*وأثاريهم الأولاد ماخذين تلفونات وبطايق رصيد من بيع القواطي..
ويصيح أحمد من صوب وحمد من صوب... برب خــــــــالقنهم..
(((رااااااااااااااااااااااااااااااااااح الرصييييييييييييييييييييييييييييييد)))
(ولاد زطوط)
وهذا اللي شكله بيصير عقب كم سنة..محد يزور حد ولا حد يعايد بحد إلا بالتلفونات..لا .. ويمكن يتقهوون بالمسجات بعد...
مع خالص حبي وامتناني
سنفور مفكر
[/size]السلام عليكم ورحمة الله وبركاته[/size]
الموضوع الاصلي
من روعة الكون
آخر 10 مشاركات
01-07-2007, 09:28
أول كتابة لي بالعامية وأتمنى تعجبكم وتعطوني رايكم...
]
العرض العادي
