ليلة الدخله على طريقة شاب سعودي!!!

You Started it · #1 (**permalink**) 01-07-2007, 11:06

البدايه

ليلة الدخلة .. ياهي ليلة عيد من جد

طبعا ً الناس تختلف عاداتهم .. من ديره لـ ديره

اللي يلبسون كرفتات .. واللي يلبسون طرابيش .. واللي يلبسون ( ثياب )

انا ابي اسولف عن اهل الخليج .. وبتحديد السعودية ..

اقصد منطقتنا

طبعا ً قبل العرس لازم تنسق مع اهل العروس سعر المهر.

وعندنا المهر مو ثابت .. يعني على حسب البنت

إذا هي شق ( صاروخ ) يطلبون 70000 الف ..

وإذا لم تكن كذلك يطلبون من الثلاثين الى 50000 الف

واذا هي مشلوله ب15000 الف

وفي مجتمعنا المحافظ .. يقهرونك قهر ورب الكعبة .. تروح اختك وامك يتفحصون البنت

<< مادري شارين لي موتر مو بنيه .. مو ناقص إلا يطقون فيها فره يجربونها

الزبده ..

و ترا المسألة على حسب ذوق اختك ..

( وبيني وبينك .. اذا تبي تعرف ذوق اختك افتح دفترها حق المدرسة ..

إذا هو مزخرف وحركتات وورد .. يعني ذوقها تمام

وإذا تلقى ذكريات ام صيته + ام مزنه + ام ليالي .. وقلب حب مدري شلون هو جاي ..

إعرف ان ذوقها خيطي بيطي وبتروح فيها )

واختاروا لك بنت .. المفروض بالعقل انك تشوفها .. لأنها شريكت حياتك

( الشرع يقول كذا )

اما حنا لا .. بس يوصفونها لك

شعرها كذا .. طولها كذا .. عليها اير باق

يعني شي خيالي .. وانت تفكر وتقول بنفسك

( يا الله .. يلعن ام الجمال يا شيخ ) .<<< راح فيها

وامك ترفع .. واختك تكبس خخخ .. وعلى هالوصف هذا تقول بس هاذي من الفتيات اللي تشوفهم بأغلفه المجلات مو بنت ام فلان

وتقعد لك ثلاث شهور .. وانت بس تفكر في البنت .. لين ينتفخ راسك

ويجي اليوم اللي تمنيته طول حياتك .. ليلة العمر

تلقاك لابس البشت وابوك على يمينك وعمك الكبير على يسارك

وخوانك وعيال عمك وعيال خوالك وعيال جيرانكم .. حتى عيال خدامتكم

كلهم متجمعين .. واللي يعرض بالسيف ( مسوي لي فيها الزير سالم )

واللي ماسك الرشاش والسما حمرا من الطلق .. تقول جالس بفيتنام

الزبده ..

وتخش على صالة الأفراح حقت الحريم ..

بصراحة العزوبي ما يخاف الا من حاجتين

1 لمبات العرس إذا ركبوها على البيت ( تحس خلاص ما فيه رجعة )

2 إذا دخلت على الحريم في صالة الأفراح

هنا ماعنك وعن ( مغص في البطن .. )

ولما تخش الصالة .. الله لا يوريك ..

ما تشوف إلا العيون .. اللي حاطه ( شادوا مدري روج بالعيون ) << حلوه روج بالعيون

واللي مغطية الوجه ومطلعه القذله .. والأجسام ( ياربي ربااه بس ) << والله اللي توقفت العضوية

ولما تخش تمشي في الصالة تبي الكوشة .. تسند جسمك على ابوك على شان ما تطيح من هول ما ترى
وتجلس على الكرسي تلتقط انفاسك .. وانت من داخل ميت تبي تشوف العروس

ولما يطلعون اللي زفوك .. ابوك وعمك والخمه اللي معهم << قوية الخمه

يجي عاد الكلام اللي مال امه داعي

امك تطب في الملعب ( والمقصود بالملعب هنا " ساحة الرقص " البست يعني )

وتخش خالتك تراقصها .. وشوي تطب مرة عمك ..
حتى خدامتكم تخش وتشكشك بالهندي لها ربع ساعة

طبعا ً العالم اللي عندك منت صوبهم .. تبي تشوف اللي بجنبك جالسة ..

تبي تشوف بسكال مشعلاني <<< ومن هناك تمدح رضا تكر .

وفي هذه الأثناء انت مفهي على الحضور .. وعينك كبر قوطي جبن كرفت تشخل شخل في البنات

اللي قاعدين عاد البنات الله يرجهم ماعندهم فأحد

اللي تطيح الطرحه متعمده ..

واللي ترفع الغطوه يعني تشرب ماء

( الله يرجهم زاحفين )

وبعد نصف ساعة كأنه الدهر بحالوه ==> قلب زلمه

تنطلق انت وهالغزال للعشة الزوجية

ويدخلونكم الغرفة .. واللي يلولش منا واللي يزغرت هناك .. واللي يلعب يوقا عند الباب

المهم .. تخش الغرفة وانت لابس البشت << ==يعني شرايك .. تبيه لابس سليب

وتقول للعروس السلام عليكم

وهي اشكل .. ما ترد

وتنزل البشت .. وتجي تقعد جنبها على السرير

ويوم جلست .. وانا المح طرف كوعها .. ويوم شفت الكوع

تقولون شكمان سياره توها ماسكه خط أشب

بصراحه .. قلبي قام يوجعني .. وقلت بنفسي ( لازم نتأكد إن بعض الظن إثم )

واقول لها يا فلانه ..

ولا ترد علي !!؟

يافلانه تعوذي من ابليس .. وقومي

وهي تسوي مستحية .. ما تدري انها لو تقول لي ( بععععع ) انحشت مع الباب

الزبده .. وانا اسولف معها ما ترد علي .. أنووواع الطناش

قلت بيني وبين نفسي .. ( يا ولد وش السالفة .. لا يكون البنت مغصوبة علي )

عاد انا شهم لأبعد الحدود <<== والله انك نصاب لأبعد الحدود

وقلت لها .. يا بنت الناس .. حنا الحين متزوجين .. يعني انتي مرتي على سنه الله ورسوله

ما ردت علي , كأني اسولف على جدار

وقلت بيني وبين نفسي << يا كثر ما تسولف بينك وبين نفسك

( تدري شلون .. خلني اضحكها .. انكت استعبط ..اللطف الجو )

والله واجي واقعد جنبها .. واقول فيها بيت شعر .. اتغزل فيها

وهي شطف .. ولا كأني موجود بالغرفة !

واقوم واخذ القلم واسجل رقم جوالي .. وارميه عليها وقلت لها هذا رقمي

ارقمها .. " بكيفي مرتي وبكيفي .. ان شاء الله ارقم ابوها بعد "

وهي تبتسم بس ما تكلمت .. ويوم تبسمت جيت وجلست بجنبها ( لزيت فيها شوي )

وقلت لها .. ( معك مباحس امن دولة ) =>>يعني انكت انا وراسي

هنا البنت قالت بقلبها .. ( يا الله المستعان .. زوجي طلع خبل )

واخذ لي ربع ساعة وانا مفهي على زولها .. اطالعها من فوق لتحت

<< تحسون عمره ما شاف خير

واقول بنفسي .. ( يا ولد الجسم مسكت ما يحتاج .. بس الوجه .. ابي اشوف الوجه )

والله وانا امسك ايدها .. انا من مسكت اليد وقلبي قام يقول طربق طربق..

.. والبنت قامت تنزل ايدها الثانية شوي شوي

وانا استانس بصراحة .. وقلت العن ام الفله

وبلمح البصر ! .. تسحب الكعب اللي لابسته .. وترفع اليد ..

وتنزل الكعب على راسي مثل الـ B52 يوم تنزل على بغداد ..

وانا لي صياح << سجن ابو غريب مو العشة الزوجية

.. واروح واوقف عند الباب .. واقعد اطالعها .. مدري وش اسوي

إن طلعت برا شافوني اهلي .. ويقولون وش فيه ولدنا لا يكون فضحنا مع البنت

وإن جلست في الغرفة .. هذي ما تعطي وج .. وقمت افكر و افكر لين طرت على بالي خطة

واشوف سويتش اللمبه ( Off .. On ) .. وانا اطفي اللمبه .. واولع اللمبه الحمرا

ألمح لها .. والله وتقوم بنت الحلال وتتوجه صوبي

انا يوم شفتها نصتني .. خفت والله .. قلت الحين شكله بيقوم البقس بيني وبينها

وتجيك المعزبه .. وتطفي اللمبه الحمرا .. وتولع اللمبه العاديه

وانا ماسك يد الباب ابي انحاش إذا قربت لي <<== امحق رجال

وقلت لها .. اقوول ( خلاص بلا عرس وبلا بطيخ .. الحين انا ابي انام .. شلون !؟ )

والله والبنت ساكته .. وانا اقرب شوي شوي .. واسحب المخده ببطء شديد << العن ام الخوف

واروح لزاوية الغرفة .. واحط المخده .. واحط راسي عليها .. وألقيها ظهري

وحسيت في البنت قامت وتحركت .. ( تغير ملابس الفرح )

وانا صاد اطالع الجدار << ما قلت لكم شهم >> أي هين تجيكم السالفة

ويوم خلصت .. ألتفت عليها .. وعلى طول تغشى البنت مستحيه مني

والله وانا اقوم واروح لثلاجة اللي بنفس الغرفة .. وفتحتها

وأشوف انواع الحلاو .. وانواع العصيرات .. ( يا بعد قلبي يا يمه .. هي اللي شاريتها )

واسحب الكتكات .. واقعد اكل من الحلويات لين ارتفع السكر اللي عندي

والبنت تطالعني مستغربة .. انا إذا شفت الحلويات والعصيرات .. افقد الوعي على طول

وحسيت فيها انها تناظر لي .. وانا اكل من الحلويات ..

من كل بستان زهرة على ما قالوا واجي واحطهم عندها .. واطالعها وابتسم

( طبعا ً الكلام هذا وأنا ما شفت وجا للحين )

ومدت ايدها شوي شوي .. وأخذت الكتكات .. عاد انا احلا شي عندي الكتكات ><"

والله وانا اطالعها بعيوني.. ( ابيها ترجعه وتاخذ شي ثاني )

وهي تسحب علي السيفون .. وتفتح الحلاو و تدخل يدها تحت الطرحة وتاكل

وقلت لها .. ادفع نص عمري بس اشوف وجهك

قالت بصوت خافت ومبحوح ( صوتها يدوخ ياجماعة الخير )

قالت .. ابي بطاقة سوا

انا يوم سمعت البطاقه .. كنك صافقني مخمس على خشتي

وقلت في نفسي .. هلا هلا .. من اولها بطاقه سوا .. شكلها راعية تلفونات المعزبه ><"

وقلت .. اجيب لك الثريا .. بس اكشفي هالخشه .. ابي اكحل عيوني واشوف

" ابي اوصف لكم الحدث .. كأنكم معي "

وتضع يدها على النقاب ..

( وتبدء الكاميرا بالدوران من خلف راسها .. مثل تصوير فلم ماتريكس )

وانا انظر ..

اقصد و يبدأ التصوير بالبطيء .. وانا انظر لها بتلهف وفاتح فمي وحين كشفت لي عن وجا ..

قلت ( .............................. ............... )

وهي تبسم وتحرك راسها يمين شمال .. والشعر يثناثر على وجا

وبحركه خطافيه .. اسحب الطفايه اللي جنب السرير

واحذفها عليها بسرعة 85 ميل في الساعة لكنها تحاشت الطلقه

انا انقهرت .. وقلت .. والله يقلع عمر اختي الي جمعتني فيك

والله وانا اطالعها منقهر .. ومتحسف على المهر ( 70000 ألف )

ويليته على شي يستاهل

واقوم .. واروح واجيب لي خيشه .. واغطي راسها خخخ ..

وفتحت في الخيشه فتحه على شان تقدر تتفس

واربط الخيشه براسها .. والف عليها سيم ( علاق ملابس )

عاد انا بغيت احلل المهر .. بس تراجعت في للحظه الاخيرة

ومن بكره .. وانا ماخذها لبيت اهلها .. وقلت لهم

مزوجيني مسخ الله لا يبارك فيكم

بالله هذي بنت .. لو اني ماخذ لي سرلنكيه استر لي من نمسس اللي انتوا مزوجيني اياه

طلعوا باقي المهر لا اجيب لكم الشرطة الحين

وتقولون هيفاء وهبي بعد .. زكيه زكريا اطلق منها الف مره

الزبده .. وانا ارمي البنت على اهلها .. وارسل لهم ورقه الطلاق .

**************

فوائد الموضوع

1-تموت الأسود في الغابات جوعا ً .. ولحم الظأن يرمى للكلاب ُ

<< قلنا ما يستفاد من الموضوع مو ديوان المقفع

2- نعيب زماننا والعيب فينا .. وما لزمان عيب ٌ سوانا << هذا وش يبي !

3- لا تثق في ذوق احد .. بل اختر انت بنفسك .. الدعوه فيها شريكة حياتك مو قطعة قماش

4- خلك ذيب .. وخش في عين البنت من اول لحظه .. لا تسوي سواتي .. ترا تاكل تبن

5- عاملوهن بالمعروف ولا تغصبوهن على ما حرم الله فإن الـ .. << اقول لا يكثر

6- اتمنى تكونون استفدتوا من الموضوع << افلقني إذا ما وقفوك على هالموضوع

الموضوع الاصلي من روعة الكون

•●￡نوسا الننوسه￡●• · 01-07-2007, 11:27

خالد العمري · 02-07-2007, 12:44

احســ عابث ـــاس · 02-07-2007, 01:35

You Started it · 02-07-2007, 10:46

You Started it · 02-07-2007, 10:57

الملاك الحزين · 02-07-2007, 11:25

المجروحة · 02-07-2007, 11:30

You Started it · 02-07-2007, 12:49

You Started it · 02-07-2007, 12:52

ليلة الدخله على طريقة شاب سعودي!!!

مــنــتــدى الــفــرفــشــة والــدجــة