نايــــــــــــــــــــــــــــف

نايف ترى حزني سما..والصبر ما ظنه جميل = اسمع شاقول بقصتي.. ترى المعاني جارحة
عطني عيونك ينتهي بردي وذا الليل الطويل = وأعطيك روحي والعمر...و إقرا علي الفاتحة
راحـت حياتي كلـها ..مابين غـربه أو رحـيـل = كيف أغترب في موطني..هذي الهزيمة فادحة
كم قالوا إن الموت حقّ .. لكن أنا مثل النخيل = أموت واقف كالنخل .. وسيول جنبي طافحة
مخدوع من قال الفرح طعمه كطعم السلسبيل = الحزن يجري بالعروق .. مثل الخيول الجامحة
استسلمت كل الدروب .. في كفي الغضّ الهزيل = وانتحرت دموعي حزن .. ليلة لقانا البارحة
خذّ مهجتي لجلك دفا .. واشرب حناني زنجبيل = ثلج المسافة نبعده .. وأشوف بسمه واضحة
يمكن تعيش الحب جنه .. أو ليالي من عويل = لكن تحـذر تخضع براسك لعذرى نايحــة
زلزل طموحك .. لا تكون القاتل أو حتى القتيل = هذي السعادة تعشقك مره .. ومره رايحـة
نايف ترى دنياك صعبة .. ما يعيش ابها الذليل = اهمس لوقتك بالحقيقة .. وان رفضها صارحه
لا تكتئب .. لا تنجرح .. وآصل صحاري المستحيل = الحزن لو ما صافحك .. لازم عليك تصافحه
الوقت لو صدّك تأكد .. انك انت انت الأصيل = يبقى شموخك مرتفع مثل الطيور الجارحــة
كون الجبل .. كون بحياتك كلها عابر سبيل = وان ضامك الدهر بكفوفه وبجروحه سامحـه
هذا الزمن دايم كذا .. إن مال و الاّ له نميل = الريح لو ما ننحني .. تجعل جثثنا طايحـــة