بنت العم .. و لقلب مهتم.. للكاتب: أحيابك

السلام عليكم



بنت العم .. و لقلب مهتم.. للكاتب: أحيابك

عبيد و فاطمه عيال عم.. عاشو بعاد عن بعض في مرحلة الطفوله.. بس يوم صار عمر عبيد 15 سنه وعمر فطيم 13 سنه انتقلو للسكن بجنب بعض.. ولكن بس في الاجازات لان فاطمه تدرس في بوظبي وعبيد يدرس في العين
كان عبيد يموت في فطيم.. بس فطيم ما كانت تسويله سالفه.. كان ما يردلها طلب وأي شي تباه ينفذه.. لدرجة ان خواته اذا بغو منه شي يخلون فطيم تطلبه لانهم يعرفون انه ما بيردها
مرت السنين و هم على هذي الحاله..
يوم عن يوم فطيم تكبر في عين عبيد.. كان يحسها كل شي في حياته
فطيم كانت العكس.. كانت تكره عبيد.. لانها كانت فاهمتنه غلط.. كانت تتصور ان شخصية عبيد شديده
وانه ما يتفاهم.. وكل شي عنده لا
بعد سنين تغير الحال.. بدا عبيد يلمح حق فطيم اكثر.. كان دايم يسمعها الكلام الحلو.. بس فطيم تمت تتغلى عليه.
في يوم من الايام.. بعد ما صار عمر فطيم 16 وعبيد 18.. قرروا اهلهم ان يطلعون في رحله عائليه
وبالفعل.. حجزوا شاليهات عالبحر للعايله
في هذي الفتره كان عبيد يمر بظروف صعبه.. كانت عنده حالة اكتئاب وشعور بالكبت.. كان يحس انه يبا شخص يتكلم وياه.. يبا شخص يفهمه.. بس ما في فايده.. كان دايم يمشي بروحه.. ولا يكلم حد
يوم كانوا في الشاليهات.. اول يوم.. الساعه 2 في الليل.. طلع عبيد من حجرته وسار يلس على البحر يطالع النجوم.. كان طايح على الرمل ويطالع السما
فجأة.. سمع خطوات تقترب منه.. حس بشعور غريب
يوم سمع عبيد الخطوات تقترب.. على طول رفع راسه يطالع منو اللي ياي.. ولا يشوف فطيم يايه صوبه.. استغرب من هذا التصرف بس ما علق.. يت فطيم ووقفت بمسافة 5 امتار من عبيد وعبيد يا بيوقف
قالتله :خلك يالس عبيد واسمحلي اني خوفتك
عبيد : لا افا عليج عادي بس شو اللي مطلعنج الحين
فاطمه : الصراحه انا ما ياني النوم وكنت يالسه اطالع من الدريشه وشفتك.. قلت ايي ارمسك لاني من الاصل اباك في سالفه
عبيد : خير .!
فاطمه : مب عارفه كيف اقولك.. بس.. انا حاسه ان فيك شي متغير.. حاسه انك متضايق.. وهذا الشعور شاغل بالي
عبيد : الصراحه يا فطيم .. انا متضايق ومحتاج شخص يسمعني
فاطمه : وانا حاضره
تقترب فاطمه وتيلس على بعد 3 امتار من عبيد
عبيد : فطامي طالعي النجوم .. شو تعنيلج؟؟
فاطمه : مممممممم.. الغموض والمستقبل المجهول
عبيد : والبحر؟؟
فاطمه : البحر يعنيلي الخوف وفي نفس الوقت الغموض
عبيد: فاطمه انا عندي كلام ابا اقوللج اياه بس خايف تفهميني غلط
فاطمه : قول ..
عبيد: الصراحه (ويطالع عيون فاطمه).. فطيم انا يوم اشوفج احس براحه
فطامي : (ويا احمر وتنزل راسها) خل عنك هذا الكلام
عبيد : انا ما اسولف
فاطمه : انزين ..
عبيد : فاطمه انا احبج ..
فاطمه: (تقوم من مكانها) تصبح على خير
عبيد : صبري .. لا تفهميني غلط.. فطيم.. فطيم
فطيم تسير حجرتها وتسكر الباب ويتم عبيد عالبحر
تيلس فطيم تطالع عمرها في المنظره وتفكر في كلمة عبيد.. بعدين تسكر الليت وتسير ترقد
يا ترا شو بيصير.. فطيم شو بتسوي ..وشو رد فعلها.. وعبيد شو اخباره..
000000000
عبيد يعده يالس عالبحر يفكر.. يقول يا ليتني ما قلتلها هالكلام
الساعه 4 .. فطيم بعدها مب قادره ترقد.. تقوم وتشرب ماي وتطالع من البلكونه.. تحصل عبيد بعده يالس عالبحر.. يغمضها.. ترجع تسير له وتيلس عداله
فاطمه: اسفه اني خليتك وسرت بس انت احرجتني
عبيد : انا اللي اسف
فاطمه : عبيد اسمعني.. انا وانت عيال عم.. والصراحه انا ما كنت فاهمتنك.. ما كنت عارفه شخصيتك
بس من شهر وانا اراقبك.. الصراحه انت انسان ما عليك كلام
عبيد : بسج بسج ولا بصدق عمري
فاطمه : المهم يا عبيد انا بس حبيت ايي اعتذرلك واقولك تسير ترقد
عبيد : انشالله من عيوني
اليوم الثاني.. الصبح الساعه 10 .. كل العايله سايرين المطعم يتريقون.. بس فطامي ما يت.. عبيد ما تريق
شرب قهوه وطلع من المطعم بحجة انه يحس بصداع.. سار الحجره على طول واتصل في حجرة فطيم
عبيد: الو
فطيم : نعم
عبيد : صباح الخير
فطيم : صباح النور
عبيد: وينج ما ييتي المطعم
فطيم : مب مشتهيه وفيني رقاد
عبيد: عشان خاطري قومي سيري تريقي
فطيم : من عيوني
تسير فطين تتريق ويسر عبيد يتمشى عالبحر
يمر اليوم بدون ما يرمسون
في الليل.. عبيد يالس عالبحر.. مرت فطيم من عداله بس ما سلمت.. على طول سارت الحجره.. عبيد قال في نفسه يمكن بتسير وبترد.. تم يتريا للساعه 3.. ما يت.. قام وقال هالقصيده
عالبحر جلوسي طال سارح فكري في القمر
ما اقصده ذاك اللي عال قمري يمشي عالبر
عاطنه ربي جمال ساحر فيه النظر
لي مشى جنه غزال ولي نظر عينه جمر
مر بي مثل الخيال في ثواني هو عبر
ورحل ..عني ما سال قطع قلبي من القهر
ابغي ابعثله مرسال ابغيه يفهم هالخبر
لو نوا عني ترحال يبقى قلبي له مقر
وسار عبيد وحط هالابيات تحت باب حجرت فطيم
الصبح
يوم قام عبيد الصبح.. حصل الورقه تحت الباب.. خاف يفتحها.. لانه عرف انها رد على قصيدته.. مسك الورقه وحطها في جيبه وطلع سار يتريق..
في المطعم شاف فطيم.. بس ما حط عينه في عينها.. كل لقمتين عالسريع وسار يلس في البلكونه
وتم يفكر شو اللي غير فطيم عليه.. وشو اللي بيكون مكتوب في الرساله.. بس ما كان عنده الشجاعه انه يقراها..
سار عبيد قبل المغرب يمشي عالبحر.. هناك تراقا ويا بنت عمه.. مريم (اخت فطيم الصغيره)
سلم عليها وتمو يتمشون
سالها: شحالج
مريم : بخير و عافيه .. انت شحالك
عبيد: تمام الحمد لله
مريم: دوم انشالله .......تعال عبيد بسألك
عبيد : هلا
مريم : شو سالفتك ويا اختي
عبيد : اختج .. أي سالفه؟؟؟
مريم : عبيد لا تيلس تلف وتدور .. انت وفطيم بينكم شي.. انا اول مره احس ان فطيم ترمس عن ولد بالطريقه اللي ترمس فيها عنك..
عبيد : كيف يعني
مريم : يعني احس ان مكانتك عند فطيم غير
عبيد : ممكن تشرحيلي اكثر
مريم : يعني احس ان ..........
في هاللحظه تي ام مريم وتسلم
ام مريم : شحالك عبيد
عبيد : الحمد لله خالتي بخير و عافيه
ام مريم : عبيد ...... انت شو فيك هالكم يوم متغير
عبيد : كيف خالوه
ام مريم : يعني انت طول عمرك راعي سوالف وتنكت وايد بس هالايام على طول بروحك
عبيد: ما في شي خالوه بس انا احس بعمري شوي مب صاحي
وتمر السالفه
سار عبيد وتعشى ويلس يفكر في الرساله.. قرر انه يفتحها ويقراها.. سار ويلس عالبحر وطلع الرساله.. قبل ما يفتحها سمع صوت حد ياي.. ويوم صد شاف فطيم يايه
فاطمه : السلام عليكم
عبيد : وعليكم السلام و الرحمه
فاطمه : شحالك عبيد
عبيد : بخير دامج بخير
فاطمه : عبيد انت ليش زعلان علي؟؟
عبيد: انا؟؟!!
فاطمه : هيه انته .. يعني انا امس في الليل ما رمت ايي عالبحر.. واول ما سرت الحجره طرشتلك رساله ويا اخوي الصغير
عبيد : (طلع الرساله من جيبه ) هذي الرساله!!
فاطمه : هيه
عبيد : تعرفين اني بعدني ما فتحتها لاني تحريتها رسالة عتاب
فاطمه : لا والله لا عتاب ولا شي .. بس اعتذار لاني ما رمت ايي
عبيد: اها
ويلسوا عبيد وفطامي يسولفون لين الفجر.. والفجر كل واحد سار حجرته على وعد انهم بيتلاقون الصبح في الاستقبال لانه كان اخر يوم.. بس الصبح اضطر عبيد انه يروح من وقت وما شا فطيم هاك اليوم
من بعد هذا اليوم.. فطيم وعبيد زادت سوالفهم وزاد قربهم من بعض
وفي يوم من الايام
عبيد : فطيم ابا اقوللج شي بس مب عارف كيف ابدا
فاطمه : قول يا عبيد و انا كلي آذان صاغيه
عبيد : فطيم ابا اخطبج
عبيد : فطيم ,,,, فطيم ,,,, شفيج ما تردين علي
فاطمه : عبيد هذي احلى كلمه سمعتها في حياتي بس
عبيد : بس شو؟
فاطمه : بس انا بعدني ما خلصت دراستي
عبيد : انزين انا بخطبج والملجه والعرس عقب
فاطمه : الصراحه ما اعرف شو اقوللك بس ...........
,,,,,,,,,,,,,,,,,,,,
يا ترا شو بتقول فاطمه.. و شو الكلام اللي كان في خاطرها
00000000
عبيد : قولي ......
فاطمه : عبيد انت انسان محترم وما شالله عليك.. العايله كلها تحبك وتحترمك وتقدرك.. وانا والله اتمنى ان شاب مثلك يخطبني بس..
عبيد : بس شو خوفتيني..
فاطمه : عبيد انا ما اصلحلك
عبيد : ليييش!!!!
فاطمه : عبيد انا طباعي ما بتعيبك.. انا احس بعمري غلط.. انت ماشالله عليك موقع ثقه عند العايله كلها
لكن انا غير.. انا اهلي كله يشكون فيي وما يثقون فيي.. وفهموني اني ما اصلح اكون زوجه
عبيد : فطيم لو سمحتي ما ابا اسمع هالكلام مره ثانيه.. وبالنسبه للثقه انا بقوللج شو تسوين
فاطمه : قوللي
عبيد : شوفي فطيم.. انا بعطيج نقاط و اباج تلتزمين فيها
فطيم : انت تأمر امر (وتستحي وتنزل راسها (
عبيد : سمعيني..
اولا, امج اباج تحطينها على راسج وما ترديلها أي طلب ولا ترفعين صوتج عليها
ثانيا, خواتج اباج تتعاملين و ياهم مثل ربيعاتج
وبعدين يا فطيم انتي منو اللي قاللج ان اهلج ما يثقون فيج؟؟؟.. بالعكس.. اللي يصير مش لانهم ما يثقون فيج.. لا.. هذا كله لانهم يخافون عليج
فطيم : بس........
عبيد : ما ابا بس.. اباج توعديني انج تكونين دايما طموحه للافضل.. اباج ترفعين الراس
فطيم : اوعدك
ومن هذاك اليوم و شخصية فطيم تتغير شوي شوي..
ومره.. عبيد يالس ويا خواته يشربون شاي عقب العصر ودار الحوار التالي
ميثا (اخته الكبيره 23 سنه): تعرفون شي .. احس ان فطامي وايد متغيره هالايام
نوره (اخته الصغيره 16 سنه ) : صح .. وبعد زايد اهتمامها ببعض الناس
عبيد يسوي عمره يقرا الجريده وما يسمع
ميثا : شو قصدج؟؟
نوره : تحيدين البارحه يوم كنا في القريه العالميه
ميثا : هيه
نوره : كانت عينها دايم عليه .. واذا سار بعيد تتم تتلفت.. ويوم يرد تبتسم.. و مب هذا بس.. ترا هو بعد مب هين
عبيد : حووووووو.. بسكم عاد قطعتوا البنيه
ميثا : شو تغار عليها
نوره : عبيد بسالك سؤال
عبيد : قولي افففففففففففف
نوره : فطيم شو بالنسبه لك
عبيد : (منصدم من السؤال) فطيم بنت عمي.. وانا اعتبرها بحسبة اختي الصغيره.. افااااااااا.. انا مواعد الشباب بنسير الصناعيه نركب مخفي.. يالله شي في الخاطر
نوره : سلامتك ........ لازم يوم نييب طاريها يطلع الشغل
ميثا : في داعت الله
بعد ما طلع عبيد
ميثا : نوره مب عيب عليج تحرجينه
نوره : خليه ,,,,, انا متأكده انه يحبها و بذله على هالشي
ميثا: الله يعينه على لسانج
عبيد يطلع من البيت ويسير الممزر اييلس عالبحر
في هالوقت فطيم يالسه ويا اختها يسولفون
مريم : فطيييييم
فاطمه : عيونها
مريم : تسلملي عيونج ..... بتخبرج.. عبيد مب جنه عنده محل تيلفونات
فاطمه: هيه
مريم : عيل دام جيه انا ابا اغير تيلفوني.. قوليله خله اييبلي تيلفون بوكيمره من اليداد
فاطمه : و حضرتج لسانج وين؟
مريم : بس اذا انا قلتله بيقولي انزين ذكريني بعدين.. لكن اذا انتي قلتيله بييبه طياره
فاطمه : انتي تتوهمين
مريم : تتحدين
فاطمه: هيه
مريم : عيل سمعي .. انا باتصلبه و بطلب منه اييب التيلفون وبنشوف شو بيقول
فاطمه: اوكي
مريم : كم رقمه
فاطمه : 050 – 00000000
مريم : رقم يديد ؟؟
فاطمه : لا بس هذا الرقم مخلنه سري .. حق اشخاص معينين بس
مريم : اهااااااااااا وانتي منهم (وتغمز (
فاطمه : (ويا احمر) بسج اسكتي واتصلي
ترن ترن
عبيد : الو
مريم : مرحبا عبيد
عبيد : هلا و غلا ... منو معاي
مريم : معجبه وتبا تتعرف
عبيد : لو سمحتي احترمي نفسج
مريم : ليش عاد يا حلو
عبيد : رجاءا لا تخليني اسكر في ويهج
مريم : اهون عليك
عبيد : باي ....... طراخ ,,,, يسكر السماعه
فاطمه : هاااااااااااااااااااااااااااااي ما عطوها ويه
مريم (معصبه ): هذا عبيد حيوان
فاطمه : مريوم احترمي نفسج
مريم : برد باتصل
ترن ترن
عبيد : لا حووووووووووول الو
مريم : عبيد انا مريم بنت عمك
عبيد : مريوم ( ومعصب) شو هالحركات البايخه هذي
مريم : اسفه بس كنت ابا اغايظ فطامي
عبيد : (سكت شوي ) شحالها فطامي
مريم : طالع .. يسال عنها قبل لا يسالني انا شحالي
عبيد : انا زعلان عليج بس ولا يهمج شحالج
مريم : بخير وعافية وفطيم بخير بعد.. اقول عبودي
فاطمه : شو عبودي بعد قوليله عبيد
عبيد : ه سلامي على الغيره بس صدقها قولي عبيد
مريم : المهم اقوللك عبيد ابا تيلفون يديد
عبيد : والله زين شو تبين من التيلفونات؟؟
مريم : ابا بوكيمره اليديد اللي يصور فيديو
عبيد : تطورت العزبه
مريم : شو قصدك
عبيد : لا سلامتج.. خلاص انا بشوف اذا فضيت اليوم بسير اييبلج اياه
مريم : تسلم عبيد.. يالله شي في الخاطر
عبيد : لا سلامت راسج
مريم : في امان الله
عبيد: مع السلامه
مريم : شفتي كيف اسلوبه معاي ما يهمه الا انتي و بس
فاطمه : حرام عليج هو كان يسولف وياج
مريم : المهم الحين انتي اتصلي فيه و قوليله ان التيلفون حقج و انج تبينه ا ليوم
فاطمه : ما يحتاج
مريم : لالا لازم نحن اتفقنا
فاطمه : افففففففففففففففف اوكي
ترن ترن
عبيد يطالع التيلفون ويشوف قلوب.. كان يالس مع ربيعه
قام و قال حق ربيعه : دقيقه بس الوالده عالتيلفون
عبيد : مرحبا وسهلا .. مرحبا مليووووووون ولا يسدن
فاطمه : (مستحيه لانها حاطه التيلفون سبيكر تسمع مريم (هلا عبيد
عبيد : هلا بالمهلي .. شحالها بنت العم
فاطمه : يسرك الحال ,,شحالك انته
عبيد : كنت بخير بس من سمعت صوتج استويت مينوووووون
مريم : هاااااااااااااااااااااااي ااااااااااااي احرجها
عبيد : شوووووو مريوم تسمع
فاطمه : (ويا صدق طماطه) هيه
عبيد : روغيها
مريم : لا حبيبي محد يروغني بس ما عليه بطلع بس عشان خاطرك
عبيد : تسلمين
فاطمه : اقوللك عبيد ممكن طلب
عبيد : لا
فاطمه :................
عبيد : انتي ما تطلبين انتي تامرين امر
فاطمه : بسك عبيد تراك وايد تخليني استحي
عبيد : شو نسوي عاد الغلا
فاطمه : المهم عبيد
عبيد : هلا
فاطمه : عبيد ترا التيلفون اللي قالتلك عنه مريم حقي مب حقها
عبيد : والله ......عيل خلاص هذا التيلفون هديه من عندي
فاطمه : لا عبيد مب هذا قصدي
عبيد : مب شغلي بس هذا التيلفون هديه والموضوع منتهي
فاطمه : تسلم عبيد ...... بخليك الحين لاني بسير عند خواتك
عبيد : اوكي يالله باي
فاطمه: باي
سارت فطيم ويا نوره عند خوات عبيد
من دخلت.. قاموا يسلمون عليها و يبوسونها و ينغزونها بالكلام و هي ميته من الخجل.. وتموا يسولفون لين الساعه 12 المسا.. عقب كل حد سار يرقد
بعدها ب 4 ايام كان العيد الكبير..
ليلة العيد اتصلت فطيم بعبيد وقالتله انها بتسير وياهم المصلى
بس صباح العيد.. تم عبيد يتريا لكن ما يت.. وساروا بدونها
الساعه 10 اتصلت فطيم بعبيد
فطيم : مرحبا
عبيد : هلا وغلا مرحبا ملايين
فطيم : مبارك عيدك
عبيد : عساج من عواده.. بس تعرفين.. انا ما اهنيج بالعيد انا اهني العيد بج
فطيم : تسلم
عبيد : وينج الصبح
فطيم : سووووري بس رقدت
عبيد : نوم العوافي ,,,,, متا بتون ؟؟
فطيم : وين ؟؟
عبيد : بيت يدوه ترا الغدا اليوم عندها
فطيم : هييييييييه سمعت ماما تقول.. سبحان الله.. اكيه ماما تزقرني عشان نسير.. يالله نشوفك هناك
عبيد: اوكي يالله باي
فطيم : باي
يوم وصلت فطيم بيت اليده كان عبيد يالس في الميلس ويا الريايل.. بس كان يبا يشوفها.. فمن سمع صوت السياره طلع برع وسوا عمره يرمس في التيلفون
طبعا السياره كانت بعدها عند الباب.. فيوم عبيد طلع.. كانت فطيم توها نازله من السياره
عبيد : (يغني) الله يا زين اللي حظرت.. قطت على كل الحضور.. طلت علينا وانورت.. ما عقب هذا النور نور
فطيم : (ويا احمر اكثر من الطماط) مبارك عيدك حب.....
عبيد : عساج من عواده (ويضحك (
عبيد ما انتبه ان اليده واقفه وراه
اليده : عبيد... بسك تطفر بالبنيه
عبيد : يدوه ما دريتي اني انا وفطيم بنتزوج
فطيم : ...........
اليده : لولولولولولوي ... بالبركه عليكم حبايبي
فطيم : يدوه هذا يلعب عليج
اليده : عبيدوه... زول وسر الميلس عند الرياييل خل البنيه في حالها
عبيد : انشالله انشالله ,, لا تاكلوني
يسير عبيد الميلس وتسير فطيم عند الحريم
ويمر اليوم بعد ثلاث ايام
تخلص الاجازه.. فطيم بتسير بوظبي.. وعبيد بيسير العين
عبيد يطلع من دبي الصبح ويسير العين
الساعه 12 فطيم تقوم من النوم
مريم : فطاااااااااااااااااامي
فطيم : هلا
مريم : عبيد روح العين
فطيم : (دمعه في عينها ) شو يعني
مريم : لا تسوين عمرج ما بتشتاقيله
فطيم : بسج عن هالسوالف متى بنسير بوظبي؟؟
مريم : الساعه 2 بنطلع
تسير فطيم تجهز اغراضها وعقب تتصل في عبيد
ترن ترن.. ما يرد.. تحاول اكثر من مره بس ما يرد.. فطيم تحس بخوف.. تتصل في اخت عبيد
فطيم : مرحبا نوره
نوره : هلا فاطمه (بالعاده تقوللها فطامي(
فطيم : شو فيه صوتج
نوره : عبيد ............
فطيم : شووو..............
يا ترا شو صار.. وشو الخبر اللي خوف فطيم؟؟
00000000000
فطيم من سكرت عن نوره و هي مش طبيعيه.. يالسة تلف في البيت ومب رايمه تيلس في مكان.. امها لاحظت هذا الشي
ام فطيم : بلاج ....يالسه تلفين ,, فريتي روسنا شو عندج
فطيم : عبيد .. من طلع من العين الساعه 10 الصبح ولين الحين ما وصل وما يرد على تيلفونه
ام فطيم : لا حول ولا قوة الا بالله اللهم اجعله خير انزين الحين الساعه 1 يعني صارله 5 ساعات
فطيم : ماماااااااااااااااا خايفه يكون صارله شي
ام فطيم : لا تتفاولين
ترن ترن ( تيلفون فطيم (
ركضت فطيم وشلت التيلفون
فطيم : الو
عبيد : مرحبا
فطيم : هلا عبيد وينك؟ ليش تأخرت؟ ليش ما ترد؟ لا يكون صارلك شي؟ عبيد والله تميت احاتيك قوللي شو صار
عبيد : بسم الله الرحمن الرحيم بالعه راديو!!!!!! (وغنالها) طول علي بالك خلني ارتاح اول بعدين عاتب كان ودك تعاتب
فطيم : اوهووووووووو فايج تغني قوللي انت وين
عبيد : بس لا تعصبين انا الحين في السلع على حدود السعوديه
فطيم : بل بل بل شو مودنك هناك
عبيد : ساير اخطبلي وحده
فطيم : عن السخافه
عبيد : ربعي ياين من العمره و اختربت عليهم السياره ووياهم عايله فييت وعطيتهم سيارتي والحين انا راد ويا واحد من الشباب
فطيم : دومك صاحب واجب بس ليش ما كنت ترد علي وليش متصل من تيلفون ربيعك
عبيد : بكل بساطه ..لان تيلفوني في السياره الثانيه.. كنت حاطنه عالشارجر.. والسياره الحين في العين
فطيم : عبيد الله يخليك لا تعيدها تراني والله وايد خفت عليك
عبيد : من عيوني ترا والله مش قصدي بس مب في ايدي.. ما اكتشفت اني نسيت التييلفون الا يوم وصلت سيح الشعيب.. يالله المهم اتطمنتي.. تراني خسرت الريال.. يالله شي في الخاطر
فطيم : سلامتك بس طمني عليك يوم بتوصل العين
عبيد: انشالله.. سلمي عالاهل
فطيم : يوصل انشالله
عبيد : في امان الله
فطيم : الله يحفظك
وسكر عبيد الخط و رمس اهله وشرحلهم السالفه و عقم تم يسولف ويا ربيعه
عبيد : اسمحلي خسرتك
سعيد : وين يصرفونها هذي؟؟
عبيد : .. خلاص ولا يهمك بشتريلك بطاقه
سعيد : عيب هالكلام.. انا و تيلفوني نفدا راسك
عبيد : تسلم
وتموا يسولفون لين ما وصلوا العين
نزل سعيد عبيد في بيتهم وروح عنه
كانت الساعه 8 المسا.. سار عبيد وتسبح و تعشى وعقب سوا تيلفون حق فطيم
عبيد : مساء الفل والياسمين
فطيم : مساء العطور و البخور
عبيد : شحالج
فطيم : والله تمام
عبيد : دوم انشالله بس حبيت اخبرج اني وصلت العين
فطيم : الحمد لله على السلامه
عبيد : انتو وين ؟؟
فطيم : نحن في بوظبي
عبيد : عيل باجر مدارس الله يعينكم
فطيم : لا تذكرني
عبيد : ه المهم فطامي الحين بخليج لاني هلكان و ابا ارقد
فطيم : تصبح على خير
عبيد : و انتي من اهل الخير
بدت الدراسه وانقطعة الاتصالات بين عبيد و فطيم.. كانو يتلاقون اخر الاسبوع في دبي.. ويتفارقون طول ايام الاسبوع الباقيه..
ومرت الايام و يت الاجازه الصيفيه.. وقررت العايلتين السفر.. قوم فطيم بيسيرون امريكا.. وقوم عبيد بيسيرون استراليه
كان الوداع حار في المطار
عبيد : فطيم ..لا تنسينا عاد يوم تسيرين امريكا
نوره : لا تخاف عبيد فطامي عمرها ما راح تنساك
مريم : اكيد ,.ه
فطيم : (ويا احمر) ..............
عبيد : انا بس ابا اعرف انتو شو حارنكم
مريم : لا ماشي بس نحب ويه فطيم و هو احمر
وضحكوا كلهم
هنيه اعلنوا انه على ركاب رحلة امريكا التوجه للبوابه.. ودعوا بعض.. وساروا قوم فطيم ..ونظرات عبيد ما تفارق فطيم
نوره : شو عبيد شو رايك تسير امريكا وياهم
عبيد : ياليت والله
نوره : الحبيب حالته تعبانه.. شو رايك تخطبها و تخلصنا
عبيد : والله اتمنى
نوره : وليش لا
عبيد : صدق!!
نوره : هيه .. يوم بنرد من السفر اخطبها وما اظن ان اهلها بيرفظون
عبيد شو و بيطير من الفرحه.. وهو ما يدري ان كل العايله يالسين يضحكون عليه
المهم.. ساروا استراليه واستانسوا هناك
ويوم ردوا البلاد.. كان عبيد ميت من الشوق.. يبغي يشوف فطيم.. وكان باقي اسبوع عن رجعت قوم فطيم
يوم عبيد كان يالس ويا اهله .. رن تيلفونه.. والا هم جهاز الطيران يبشرون عبيد بقبوله لبعثه للدراسه برع
وانه لازم يسافر خلال اسبوع.. كان هذا حلم عبيد من يوم هو صغير
بس.. فطيم ...و الخطبه... يعني لو سافر بتتأجل اقل شي سنه
تم عبيد محتار.. فطيم ولا الكليه.. الليل ما كان يرقد.. الكليه حلمه.. و فطيم حبه
يا ترا شو بيختار عبيد.. وبيضحي بشو.. عبيد تعب من التفكير.. وسار يشاور خواته.. قالوله فطيم بتتريا
لكن فرصة الكليه ما بتتكرر.. بس عبيد صمم وقال ما ابا.. انا بختار فطيم
و الصبح سار و سحب اوراقه من البعثه
كانت عنده شهاده جامعيه.. وضامن وظيفه زينه
وبعد كم يوم .. رجعوا قوم فطيم من السفر.. واستقبلوهم قوم عبيد بعزيمه..
وبعد ما رجعوا باسبوع.. قرر عبيد انه يتقدم و يطلب يد فطيم
وبالفعل .. سار وطلب ايدها.. وهنيه كانت المفاجأه اللي طيحت عبيد في المستشفى
يا ترا شو بيصير؟؟ وشو اللي بيمرض عبيد؟؟ هل اهل فطيم بيرفضون؟؟ ولا بيصير شي ثاني؟؟
00000000000
عبيد تقدم لخطبة فطيم.. ام فطيم وافقت.. وابو فطيم.. بعد وافق
بس الصدمه كانت ان فطيم ما وافقت..
عبيد ما صدق يوم قالوله.. قال مش معقوله.. وما رام يسال فطيم.. طرش اخته نوره تسألها.. قالتلها الصراحه ما اشوف عمري جاهزه.. احس بعمري صغيره.. قولي حق عبيد يتريا شوي
عبيد انصدم.. تم من عقبها ما يرمس حد
يوم من الايام اتصلتبه مريم اخت فاطمة
مريم : مرحبا عبيد
عبيد : هلا مريم
مريم : شحالك عبيد
عبيد :(ماله خاطر) الحمد لله على كل حال
مريم : عبيد انت شو فيك؟؟.. من يوم سالفة الخطبه وانت متغير.. وين بسمتك اللي ما كانت تفارقك.. وين سوالفك الحلوه.. وين تنكيتك.. تصدق حتى اشتقت حق التعليقات اللي كنت تعلقها علي.. صح كنت تفشلني.. بس كنت تنشر الابتسامه بين كل العايله.. عبيد هذي مب نهاية العالم.. وفطيم ما قالت ما تباك
بس قالت انها مب جاهزه الحين..
عبيد : مريم انتي مش فاهمه
مريم : عبيد اسمع.. انا احس انك تحتاج شخص يسمعك.. شو رايك تقوللي كل اللي في خاطرك..يمكن هذا يخفف عنك..
عبيد : (ياخذ نفس عميق ) مريم اسمعيني.. تعرفين فطيم شو كانت بالنسبه لي.. مب من امس ولا قبله..
انا من يوم عمري 12 سنه.. يوم كنا نشوفكم كل اربع شهور
مريم: هيه
عبيد : انا من هذاك الحين وانا ابا فطيم.. واظن ان الجرح اللي انجرحته مب بسيط.. 7 سنين وانا متعلق فيها.. وعقب تردني هالشكل.. انزين ليش ما قالتلي من قبل.. ما كنت بتقدم و بطلبها.. مريم انا احس بعمري........ ما اعرف شو اقول
مريم : قول كل اللي في خاطرك
عبيد : احس بعمري مثل ياهل مضيع لعبته.. او ياهل ماخذين عنه مصاصته
مريم : Cute
عبيد : مشكوره .. اعرف ان التعابير غبيه بس هذا الصدق
مريم : سوري عبيد .. مب قصدي.. بس التشبيه حلو.. عبيد اسمعني.. انا ما احيدك ضعيف ولا جبان.. اباك تواجه الموقف بشجاعه.. و انشالله ما يحصل الا الخير
عبيد : انزين ممكن اكلم فطيم
مريم : ممممممممممم.. صبر بشوفها..فاطمه ...فاطمه.. عبيد يبا يرمسج
فطيم : مالي ويه ارمسه
مريم : فطيم عشان خاطري رمسيه
فطيم : الو
عبيد: مرحبا
فطيم :.........
عبيد : فطيم .....الله يسامحج.. تعرفين اني فقدت اغلى شيين في حياتي
فطيم : شيين؟؟؟؟؟
عبيد : تذكرين يوم كنت اخبرج عن الكليه الجويه.. وعن حلمي في اني احصل بعثه
فطيم : هيه
وخبرها عبيد عن اللي صار قبل ما ايوون من السفر وكيف انه ترك البعثه عشان يخطبها
فطيم: (مفتشله) عبيد ارجوك سامحني ..بس والله ما كنت اعرف هذا الشي
عبيد : انا خلاص كرهت الكليه وما ابا اسير.. سحبت اوراقي
فطيم : ليش!!!!!.. عبيد هذا كان حلمك من يوم انت صغير.. كيف تتخلى عنه بهذي السهوله
عبيد : فطيم ... انا ما احس بقيمه للدنيا بعد اللي صار.. انتي جرحتيني جرح الله بس يعلمبه
فطيم : (تصيح (عبيد والله ما كان قصدي اجرحك..عبيد اعرف انك تحبني.. بس اللي انت ما تعرفه اني احبك اكثر مما انت تحبني.. و مستعده اني اضحي بحياتي عشانك
عبيد : عقب شو
فطيم : (صوتها يتقطع من الصياح ) عبيد ارجوك افهمني.. انا بعدني صغيره , يعني ما اقدر على نضرات الناس اني حرمه مخطوبه.. انا بعدني عمري 17
عبيد : مب هذي المسأله.. انتي ليش ما قلتيلي هذا الكلام.. ليش خليتيني اتفشل جدام الاهل
فطيم : عبيد انا خفت اقوللك و تفهمني غلط
عبيد : اذا فات الفوت ما ينفع الصوت.. المهم.. عطيني مريم ابا اقوللها شي
فطيم : عبيد ارجوك سامحني.. و الله ما قصدت (وينبح صوتها من الصياح(
و تعطي مريم التيلفون
مريم : عبيد شو قلتلها
عبيد : خليها هي تخبرج.. المهم اسمعيني زين.. انا بسافر
مريم: وين بتسير
عبيد : ما اعرف بس ابا اطلع .. ابا اعتزل عن العالم.. مريم ابا اقوللج كلام بس بيني و بينج
مريم : قول يا عبيد
عبيد : انا احب فطيم و ما بتخلى عنها.. بس الجرح اللي انجرحته كبير.. انا بسكر ارقامي كلها وعندي رقم محد يعرفه.. بطرشلج اياه عالمسج.. اباج كل يوم ترمسيني و تطمنيني على فطيم
مريم : بس عبيد.........
عبيد : لا تقوليلي بس.. ولا ترا بختفي و ما بتعرفون عني شي
مريم : لا خلاص
عبيد : يالله برايج
مريم : باي
سكرت مريم عن عبيد و سارت عند فطيم.. لقتها تصيح
مريم : شو قاللج عبيد
فطيم : انا حماره.. ليش سويت جيه؟؟ ليييييييييييييييييش؟ (وتصيح(
مريم : فطيم هدي عمرج.. كل شي بينحل
فطيم : و عبيد
مريم : شو فيه
فطيم : تتوقعين بعد اللي سويته عبيد بعده يحبني
مريم : خلي الامور تهدا شوي و ما بيصير الا الخير (وتمت تهديها)
عبيد كان في بيتهم.. يالس في حجرته..دخلت عليه امه.. قام وسار و حبها على راسها.. يلست و قالتله سكر الباب ابا ارمسك في سالفه (سكر الباب ويلسوا)
ام عبيد : حبيبي ليش جيه مسوي في عمرك
عبيد : امي ما تتخيلين شكبر الجرح اللي صابني
ام عبيد : عبيد هذي مب نهاية العالم.. انت ماشالله عليك شاب ما عليك قصور..والف شخص يتمناك تطلب يد بنته.. واذا تبا اليوم بنسير بنخطبلك
عبيد : بس.........
يا ترا شو بيصير؟؟.. هل بيرضا عبيد بغير فطيم؟؟
00000000000
عبيد : امي خلي الخطبه الحين.. انا صابني جرح ما يبرا.. امي.. انا بسافر ويا ربعي
ام عبيد : وين بتسيرون؟؟
عبيد : ربعي بيسيرون لندن.. و بسير بيلس وياهم
ام عبيد : ولدي اخاف عليك من هالبلاد
عبيد : امي انا ريال و ما ينخاف علي
وبالفعل.. حجز عبيد التذاكر وسار المطار
وفي المطار.. اتصل بمريم
مريم : الو
عبيد : مرحيا
مريم : مرحبتين شحالك عبيد
عبيد : تمام .. المهم.. انا في المطار بسافر.. الطياره عقب نص ساعه.. بس متصل اودعكم
مريم : عبيد ليش السفر.. الله يخليك تم هنيه.. والله السالفه ما تستاهل
عبيد : مريم!!.. خلاص انا قررت.. يالله في امان الله.. سلمي على خواتج
مريم : الله يحفظك
سافر عبيد.. وفي لندن كان يبا ينسى السالفه.. وللاسف.. تعرف على رفاق سوء.. وطيحوا عبيد في شرب الخمر
عبيد من سار انقطعت اخباره.. مريم تتصل فيه ما يرد.. وتم على هذي الحاله شهور
وفي هذي الشهور.. فطيم مرضت ودخلت المستشفى.. بسبب انها تحس بالذنب على اللي سوته.. استوالها اكتأب.. مريم تحال تحصل عبيدد مب رايمه.. اخر شو سارت بيت قوم عبيد ودشت حجرته.. وبين اوراقه حصلت رقم واحد من ربعه هناك.. اتصلتبه
مريم : الو
خليفه : هلا
مريم : خليفه
خليفه : امر
مريم : انا بنت عم عبيد ال........
خليفه : مرحبابج
مريم : عبيد وين
خبرها خليفه عن حالت عبيد و شو صار فيه
مريم : لا حول ولا قوة الا بالله.. انزين تروم تسير عنده وتتصلبي.. لازم ارمسه
خليفه: خير انشالله .. بسيرله و انتي اتصليبي عقب نص ساعه
تمت مريم على اعصابها تتريا.. وبعد نص ساعه اتصلت ورد عليها خليفه
خليفه : مريم انا عند عبيد بس مب طايع يرمس.. يقول ما يبا يرمس حد
مريم : الله يخليك حاول فيه
وبعد محاولات طاع عبيد يرمسها
مريم : عبيد حرام عليك اللي تسويه في نفسك
عبيد : ومب حرام اللي سويتوه فيي..
مريم : عبيد مهما كان.. ما تضيع نفسك.. عبيد كل اللي صار ينحل.. بس مب بهالطريقه.. فطيم تحبك.. وهي والله نادمه على اللي صار.. الليل ما ترقد من سافرت.. والنهار صياح.. الحين هي في المستشفى ..
عبيد : مب شغلي (كان سكران (
مريم : شو مب شغلك نحن اهلك اذا ما يخصنا فيك منو اللي بيهتم بك.. عبيد ارجوك فكر.. ارجوك اترك هالسوالف.. خاف ربك في عمرك (وتمت تصيح(
قام عبيد وفر التيلفون و انقطع الخط
مريم ما قدرت تقول عن أي حد عن حالت عبيد.. بس تمت تدعيله انه يودر هالسوالف
عبيد كان هذي الساعه يالس بروحه.. فجأه حس بشي داخله ينازعه.. يقوله انت مكانك مب هنيه.. انت اللي تسويه كله غلط.. كلام مريم تم يتردد في راسه.. فجأه صرخ.. لااااااااااا لااااااااااااااااااااااااا.. لااااااااااااا
و طاح على الارض يصيح
خليفه دخل عليه و شافه على حالته
خليفه : عبيد ارحم نفسك
عبيد : انا غلطت غلطه كبيره.. كان مستقبلي بايدي و ضيعته
خليفه : بعدها الامور تتصلح الحين اباك تدش تتسبح وتصلي ركعتين و عقب جهز اغراضك و بوصلك المطار
انت مكانك مش هنيه بنت عمك تحتاجلك
و بالفعل سار عبيد يتسبح و اتصل خليفه بالطيران و حجز تذكره
في الامارات
اليوم الثاني
وفي المستشفى الامريكي في دبي.. كل الاهل يالسين ويا فطيم
فطيم : (شاحبه وصوتها يالله يطلع ) ما عرفتوا شي عن عبيد
ام فطيم : عبيد بخير و عافيه
فطيم : كلمتوه
اك فطيم : مريم كلمته
فطيم : سال عني.. اكيد لا.. انا ما استاهل انه يسأل عني(وتصيح )
مريم : فطيم حبيبتي لا تصيحي.. والله قطعتي قلوبنا.. عبيد مشغول و ما يروم ايي
(تنزل دمعه من عينا يوم تتذكر عبيد)
فطيم : انا السبب انا السبب
فجأه يسمعون صوت دق على الباب .. تسير مريم تفتح الباب.. يوم شافت عبيد .. وكان وي منور
بدون ما تحس حضنته.. وعقب استحت و ردت الحجرا وعبيد يمشي وراها
فطيم كانت عاطيه الباب ضهرها.. يعني ما تشف اللي يدخل.. يوم عبيد استوا عدالها بالضبط.. التفتت.. و ما رامت ترمس.. بس تمت تصيح.. و عبيد ما رام ييود عمره.. هو بعد قامت عينه تدمع.. مسك ايد فطامي وقاللها: ارجوج سامحيني
فطيم : انت اللي سامحني
والتفت عبيد لابو فطيم
وقال : عمي .......على سنة الله و رسوله اطلب يد بنتك فطيم
الجميع التفتوا لفطيم.. بس ملامح فطيم كانت حزينه
فطيم : عبيد اسمعني.. انت تقدمتلي مره و رديتك.. وتوقعتك ما ترد تخطبني.. لكنك رديت
بس شو .. اسوي..لازم اعطيك الرد (ملامحها حزينه( عبيد انا لا يمكن اني
عبيد : لا يمكن شو
فطيم : عبيد انا لا يمكن اني اتزوج ..........
عبيد شوي وبيدوخ.. والاهل بعد على اعصابها
فطيم: عبيد انا لا يمكن اتزوج انسان غيرك ( وابتسمت(
عبيد من الفرحه ما قدر يمسك عمره وصرخ بصوت سمع المستشفى كله
وبالفعل.. اليوم اللي عقبه طلعت فطيم من المستشفى.. وبعد شهر سوو الملجه.. ويوم خلصت فطيم المدرسه .. اتزوجوا.. وكان زواجهم فرحه لكل اللي يعرفهم..
والحين نشوفهم.. عبيد وفطيم وعيالهم مريم (6 سنوات) وراشد(4 سنوات) و منصور(3سنوات) و سلامه(سنتين( وماشالله عليهم عبيد على طول يتضارب ويا عياله وكله يصفعونه.. يقوللهم انتو 4 وانا واحد
النهاية

مــــــــــــــنــــــــــــقــــــــــــولـــــــ ـــه !!



أخـــــوكــ ــــمـــــ

(((>> ReVeR <<)))

الموضوع الاصلي  من روعة الكون