مغامرات مواسرجي (ج4) في البارطي

--------------------------------------------------------------------------------

--------------------------------------------------------------------------------

عشان تفهم القصه والشخصيه لازم تقرأ الاجزاء اللي قبل ومحدش يقوللي عيد كلمه

طلعنا من دار ابو اسحق بسرعه انا وصاحبي وركبنا بسيارته وقاللي اسمع انا صارلي يومين

بترجى فيك وببوس ايدك عشان تروح عالحفله وانت متيسه معك وانا كمان تيست معي يعني

اذا ما بتروح عالحفله راح احكي لابوها وافضحك واخليهم يحبسوك فاهم وله؟؟

بصراحه انا متت من الخوف وقلت بعقلي والله هدا بسويها شكله مستقتل يروح عالحفله

ابصر ليش؟؟وخليني اسايره احسن يفضحني قلتله انا موافق بس بشرط انك تكون الشفير

والخدام تبعي ومترجعنيش شو بعمل فيك هناك

قاللي وهو مبسوط ولك انت تؤمر امر يللا نروح نحلقلك اول اشي بعدين بفرجها الله

والله نزلنا على سقف السيل عند ابو العبد الحلاق وشريكه ابو سليم

ابو العبد عمره بيجي 100 سنه وابو سليم متله يعني بجوز حلقوا لفرعون

ابو العبد طبعا مش قادر يقوم راح قال لابو سليم قوم خدلك هالراس

ابو سليم قام طبعا ايديه برجوا معاه مرض الرجوجه وراح طال ماكينه الحلاقه من سطل الكاز

لانه كان ناقعها فيه وبلش يكرت بهالشعر انا حسيت راسي كانه تحت كمبريصه من كتر الرج

وفتحلي شوارع في راسي من الشمال واليمين وفوق وطبعا هو مش قادر يوقف راح قاللي خلص

نعيما هي الحلاقه ولا بلاش مش زي حلاقين اليوم قلتله الله لا يعطيك العافيه يا ابو سليم ولك

هاي حلاقه قاللي ولك انا بحلق للناس ايام ما كانوا يعطوني عالحلقه كبشه زتون وانت بدك

تفهمني شغلي؟؟ قلتله والله انت لازم تشتغل بامانه العاصمه بتخطيط الشوارع مش حلاق

المهم صاحبي عجبتوا الحلقه وراح اعطى ابو سليم ربع ليره وسيجارتين

ورحنا على دارهم عشان نلبس للحفله راح لبسني بنطلون كسم ساحل وبلوزه مليانه كتابه

وكندره الها بوز طوله شبرين قلتله ولك هدا لبس طنطات قاللي هو زابط معط لبس طنطات انت بدك

لبس جنطات بس هدول الناس لازم تلبسلهم هيك

قلتله والله انا لو تيجي العفاريت الزرق ما بطلع بالشارع هيك شو بدك يحكوا عني العالم

روح جيبلي اشي استر حالي في عبال ما نطلع من واد الحداده

راح جابلي عبايه زي تبعه العرايس ولفيت حالي فيها وطلعنا وانا مستحي عالاخر

المهم الا هي سوسو بترن علي وبتقولي حياتي انا بستنى فيك عشان ادلك على مكان الحفله

لاني سويتها بمزرعتنا بره عمان

انا قلت بعقلي بره عمان احسن من جوه عمان لاني مش ناقصني فضايح

قلتلها طيب يا سوسو انا هيني جاي انا وال.........شفير تبعي استنيني

قالتلي حاضر يا روحي

المهم وصلنا سوسو كانت راكبه سياره روفر زي تبعه سفريات عمان بغداد عمان

بس شكلها جديده وفحص واول ما شافتني سوسو قالتلي يااااااااااااااااااي شو هالنيو لوك

اللي بجنن مين هالكوافير الشاطر اللي حلئلك هيك طبعا انا مفهمتش غير كلمه اللي حلئلك

ويااي ففهمت انها عاجباها الحلقه قلتلها والله انا هدا الحلاق تبعي ياباني وهاي الحلقه اخر

موديل اسمها فتحه بالسقف

قالتلي بتجنن بتهوس ياااااااااااااي انا مش مسدئه حالي انك معي يللا الحئوني بسرعه لانه

المعازيم كلهم بستنوا فيك

والله لحقناها بسيارتنا اللي قربت تفتق وهي تمشي ومش ملحقه لولا انها سوسو كانت تخفف

سرعه المهم وصلنا لبوابه كبيره وفتحولنا الباب ودخلنا وهون بلشت المصايب

سوسو كانت واقفه عالباب مع خمس بنات وكلهم ببحلقوا فيي وبفركوا بايديهم كانه عمرهم

مهمو شايفين واحد متلي مع انه البلد مليانه

سوسو قالتلي بعرفك على نانا صاحبتي......... ولالا......... و فوفو.............ورورو وسكتت عشان اسلم عليهم

رحت قلتلها معرفتيناش عالاخت الخامسه قالتلي لاااا هدا مش بنت هدا ابن عمي خلف

انا صار وجهي احمر ....الله لا يوفقك يا خلف على هاللبسه وحاطط حومره كمان يا خلف

المهم انا قلت اذا خلف هيك معناته انا ارجل واحد بالحفله

والبنات يحكوا يااي بعئد قلت بعقلي انا صاير اعئد زي العئيده وليلتنا شكلها طويييييييييله

سوسو مسكتني من ايدي وقالتلي تعال اعرفك بباقي المعازيم ودخلنا ولحقنا الشفير (صاحبي)

واول ما دخلنا شفت شوفات عجب نسوان لابسين فساطين وجه واحد يعني من قدام في قماش

ومن ورا زي قناه زووم ول عليكم بهاللبس اكيد مسترخصين تدفعوا حق الوجه التاني يا بخلا

واشي مشقوق واشي ممزوع واشي فش اشي المهم انا انعمى ضوي وصابني توهان

في تلت زلام واقفين لابسين بدلات رحت بدي اسلم عليهم الا هم اجو بسرعه وانحنوا قدامي

وسلموا باحترام كبير الا هي سوسو بتقولي يا الله شو جبيتها منك هاي انك تسلم على الخدامين

عاد انا لا عارف خدامين ولا غيرو واجا واحد حامل صينيه مليانه كاسات عصير رحت مسكت كاسه

وكربعتها بسرعه بس حسيت روحي بدها تطلع ولك شو هدا طعمه زي الزفت

قالتلي سوسو هدا براندي قلتلها انا بعرف البرندي عبردقان مش زي هدا على .......لمون

وصاحبي نازل كبس بهالكاسات الله لا يوفقه والل ماني عارف كيف بشرب هيك عصير

المهم رحنا سلمنا عالوزير وصار يجاملني ويحكي حكي حلو انا جيت بدي اقوله وين ال20 ليره

بس قلت لبعدين راح قاللي انا محضرلك مفاجاه راح تعجبك احنا عزمنا السفير الياباني والحقيقه

محدش فينا بفهم ياباني الا انت فبدنا تجامله شوي

انا قلبي سحل لتحت اجريي شو بدي احكي معه هدا رحت شديت صاحبي ووشوشته : ولك

شو اساوي معاه هدا راح قالي مش انت الدكتووووووووور دبر حااااااللك قلتله مالك لسانك صار

على ج شكلك زي السكرانين ولك

المهم رحنا عند السفير وطبعا كلهم حواليي بدهم يعرفوا شو بدي احكي معه

السفير قاللي كلمه متذكرها هي سيونارا فرحت انا قلتله ميتسوبيشي هوندا تويوتا

ابتسم السفير وصار يبرطم بحكي لو انه بالعربي بفهموش

فرحت قلتله نيسان سوزوكي اسوزو

طبعا الكل مبحلق فيي وببتسم ومكيفيين اني بحكي مع السفير

السفير بلش يكشر ويبرطم بحكي وانا نازل عد بهالسيارات

اخر اشي قلتله سيوناره تويوتا راح انحني وانا انحنيت وخبط راسنا ببعض

وصار يضحك والناس مكيفين الا هو الوزير قاللي شو حكالك؟

قلتله بحكي انه انتوا ناس كويسين وانه البلد على راسي عاد هو بده يشد شعره

راحت سوسو قالت يا جماعه في كلمه لازم نحكيها كلنا للسفير وهي انت على راسي

بس بالياباني وهي كلمه احيييييييييييه

وكلهم بصوت واحد صاروا يحكوا احييييييييييه احييييييييييييييه احيييييييييييييييه

الوزير قاللي والله لو انت مش موجود كان ما عرفنا ندبر حالنا بصراحه انا فخور كتير فيك

لانك رفعت راسنا وبما انك دكتور تعال اعرفك على اكبر مستورد للادوات الطبيه بالشرق الاوسط

فرحنا سلمنا على هالزلمه الجديد قاللي اهلا يا دكتور توتي انا سمعت عنك وحابب اتعرف عليك

قلتله اهلا وسهلا
قاللي والله انا حابب اجيب اجهزه لغسيل الكلى للبلد وبما انك دكتور ودارس باليابان فاكيد عندك

كل المعلومات عن الموضوع

انا بصراحه كيفت قلت بعقلي اجا واحد يحكي باشي بفهم فيه فرحت طاعج تمي على ج

وقلتله في الواقع اهم اشي بمغاسل الكلى ...السيفون....يعني احنا ركبنا مغاسل للكلى

بالمسلخ وبغسلوا عليهم مش بس الكلى بغسلوا القلب والمعده والمعلاق كله

قاللي رائع جدا ووين مستشفى المسلخ هدا؟؟

قلت ماله الاهبل هدا عن انو مستشفى بحكي بس بلاش اكون خبصت فرحت حكيتله باليابان

قاللي اليابان فيها قمه التكنولوجيا واكيد عندهم اخر ما توصل اليه العلم في غسيل الكلى

قلتله طبعا اصلا هلأ ما في غسيل كلى لانه كله حولوه دراي كلين

راح حط ايده على كتفي وقاللي اسمع انا حابب اعمل معك بسنز شو رايك؟

انا مسكت ايده وزحتها وقلت هدا الزلمه مريض نفسيا ولك شو بتفكرني يا ابن اللزين

قلتله هسا ما شفت غيري تعمل معاه بسبس الا انا ولك هي خلف متحومر وجاهز

قاللي خلف ما بنفع مش تبع بسنز بس انت شكلك فاهم كل اشي بعدين اذا على الفلوس

ولا يهمك ما بنختلف

قلتله ابعد عني طنيب على عرضك

والله واحنا بنحكي ولا في صوت بصرخ وبقول دكتوووووووور يا جماعه بدنا دكتووور

اتطلعت هيك ولا هو الوزير مرمي عالارض وبشاهق وبفاهق وروحه بدها تطلع

انا ركضت عنده وصرت اصرخ بسرعه يا جماعه بدنا دكتوور حرام راح يموت

صاحبي السكران نخزني وقاللي مششش انت دكتووووور يللا عالجه

انا اتطلعت في الناس هيك ما لقيت حد مقرب عليه والكل عينه علي عشان انقذه

فقلت احسن ما يموت الزلمه خليني احمله لاقرب مستشفى وطز بلا دكتور بلا حكي فاضي

المهم الزلمه يضله طيب بس شكله صار عاطل ووج صار ازرق

فرحت مسكته من تحت كتافه ورفعته لفوق بس كان تقيل كتير هلكني هلك

وحطيت ايدي على صدره وبدي اشده عشان اخده عالسياره ولا انا متزلحق

وواقع والوزير وقع فوقي وانطج طج علي جيت بدي اموت انا كمان

ولا هو الوزير قح قحه قويه وطلعت من تمه شغله كنه بالع عجمه زتون ولا اشي

وصار يتنفس وردتله الروح بس انا بقت بدها تروح الروح مني وهو فوقي

وزحته هيك عني ووقفت ولا كل اللي بالحفله بزقفولي تزقيف قوي

طبعا انا مش عارف ليش صاروا يزقفوا كانه وقت تزقيف ؟؟

واجت سوسو علي بتبكي وبتقوللي انت انقذت حياه بابا يا حبيبي

بكملكم الباقي السبوع الجاي

الموضوع الاصلي  من روعة الكون