اسفة شوف لك غيري

* فلونة * · #1 (**permalink**) 13-07-2007, 12:46

السلام عليكم ورحمة الله وبركاتة
هذي اول مرة انقل قصة اتمنى تنال اعجابكم
:icon_mn::sm213

نبدا القصة

الجزء الاول
~~)(~~ ابنســحب في صمــت ما ستحمــل اوجاع .. وقطع حبال الوصــل بينك وبيني .. اكيد قصة حبنا كانت اخداع ... كل المشاعر كاذبه صدقيني ~~)(~~

عاليـة: حرام عليك هذي آخرتها تبغي تهدني عسب بنت خالتك وانا شو ؟؟ وانا شو محلي في الأعراب ولا شي كل شي صار ولاشي .. الحين انا صرت وحده غريبه في حياتك ( يقاطعها راشد في عسب يبرر موقفه (
راشد: حبيبتي الله يخليج فهميني انا احبج واموت فيج انتي كل شي في حياتي الله يخليج انتي تعرفيني مب هذا حب ثلاث سنين ليش تنهينه في دقيقه خافي ربج تبغين تذبحيني
عاليه: شو .. شو قلت انا اذبحك خاف ربك فيني جان تبغي تجتلني جيه انا اللي ابغي انهي حبنا انته اللي تبغي تذبحه قبل لا ينولد.. تقول ثلاث سنين انته اللي تبغي تقطع هالعلاقه .. مب تبغي تزوج تزوج يالشيخ راشد انا ما يهمني ..
راشد: يعني صرت ما همج الحين خلاص يا عاليه صرت ولا شي في حياتج ..
عاليه وهي تصيح: انته شو انته ما تحس ما تفهم ..
راشد بمكر: افا ياحبي تزعلين مني يعني انتي ما تعرفين الوالده ماتعرفين امي جيف متسلطه علينا تبغينا ناخذ من الاهل تخاف على ورث العايله
عاليه: يعني انا اللي ملحت البحر ..
راشد ويبغي الفكه منها : حبي خلاص عاد .. هدي روحج
عاليه: شو اهدي انته ما تحس فيني انا احترق بداخلي حاسه اني بموت بعد ثلاث سنين تهدني في لحظه ولا تعزمني على عرسك خوش والله تسوي خير تتحسبني بحظر عرسك يعني ؟!!
راشد: حبيبتي انا اباج انتي بس الظروف والله الظروف اللي مانعتني .. ابغي اشوفج بس في ليلة عرسي .. عسب تكون ليله حلوه في حياتي لو هي مره ..
عاليه: مب يايه مب يايه يعني مب يايه خلاص اعتبرني ميته .. اعتبرني غلطه وتصلحت خلاص اسمحلي يا راشد كنت اظن اني من نصيبك ولكن صرت ذكرى مثل أي تذكار في البومك .. ( وتسكر في وي قبل لايكمل كلامه (

----------------------------------------------

راشــد بن سيف.. ولد تاجر معروف في دبي شاب مغازلجي درجة اولى يلعب على بنات الناس وطبعاً عاليه كانت مجرد وحده يرمسها واليوم انهى علاقته فيها عسب يلعب على وحده غيرها.. وراشد عمره (26 سنه) وهو دلوع امه وابوه متوفــى
وعنده اخو اسمه (سعيد) مزوج وعمره (30سنه) وماخذ بنت عمه اسمها( شيخه(.. وعنده ولدين وبنت (سيف وعبدالله وغلا)
وراشد يشتغل في شركه ابوه مع سعيد
وسعيد هو اللي يديــر الشركه وراشد النائــب.. وراشد حليو وطيب ولكن اللي مخرب عليه سوالفه والمغازل .. وهو طويل وحنطي وعريض صح انه مب حلو وايد ولكن ماهو بشين يدخل القلب يعني يجبر اللي يمر حذاله انه يطالعه لهيبته وخقته..

----------------------------------------------

راشــد : اففففف منها ما بغيت افتك.. استحمليتها ثلاث سنين بل مب قلب عليه هالكثر استحملت وحده مثلها.. خيبه خيبه زين راحت في طريجها فقتها ..
)تدق عليه امه (
ام راشـد : غناتي يمه وينك تعال تغدا وشو بلاك عيوني يالس بروحك تعال ايلس معانا
راشد: يمه فيني رقاااااااااد واصل حدي .. مب قادر لا اتغدا ولا آكل ماعرف احس فيني ضيجه ..
ام راشد: فديتك شو بلاك من شو هالضيجه ..
راشد: يمه بعد سالفه صارت وانتهت بس ضايجتبي ..
ام راشد : يعل هالضيجه في اهلها مش فيك يا الغالي..
راشد: فديتج امي بس خليني ارقد تعبان من السالفه ومن الشغل
ام راشد: ارتاح .. ارقد وعسى نوم العوافـــي (وسارت عنه(
وحط راسه راشد ورقد ولا جنه شي صار.. ولا حتى اعتبر لحياة هالفقيره عاليه أي اهميه لانها على حسب قوله مب مهمه ..

-------------------------------------

عاليـه بنت حميد.. عمرها (19 سنه) تدرس وهي بنت ناس وعايله محترمه بس المشكله ان ابوها مطلق امها من سنين وما يسأل وايد عنها وهي عايشه عند امها وامها اهم شي في حياتها الحفلات والسوق والأستقبالات و.......الخ ..
وهي وحيدة امها وابوها.. وهي حلوه وعيونها كبار وعسليات.. ورموشها ذباحه.. على قولة محمد عبده.. فاتناتٍ ناعساتٍ ساحراتي ..وشعرها طويــل واسود وهي من النوع اللي تحب تقص قصتها وتنزلها على يبهتها اللي يشوفها يتحسبها ياهل خشمها طويل وعليها جمال رباني.. وتحب الكشخه.. وهي شاعره ..

-----------------------------------------

عالية وهي تصيح من الخاطر: عمري ما توقعت اني بهدك يا راشد.. كنت كل شي في حياتي وصرت اليوم انسان غريب في حياتي.. انا ادري ان محد يحبني كلهم يكرهوني انا ولا شي في هالدنيا ليش ياربي ماعندي حد اشكيله همي احس اني وسط ليلٍ طويل ناسين فجره.. اووووووووه شو هذا.. ياربي ابغي اعيش مثل ربيعاتي عندهم اخوان اذا صار فيهم شي يخافون عليهم عندهم خوات اذا عندهم هموم يشتكونه عند خواتهم.. ابغي ام تحس فيني تيلس معاي اشكي لها همي.. ابغي ابو يحس فيني ايي ويسأل عني.. انا ليش عايشه حتى انسان حبيته من كل كل قلبي هدني.. انسان كنت اعتبره ابوي وامي واخوي واختي وحبيبي وكل حياتي وكل ناسي يهدني ..
ليش انا عايشه انا شو حياتي ..

)تمت عاليه تصيح .. وتشكي همها لنفسها وتصيح في لحظات .. ماعندها حد تشكي له همها ماعندها حد تقوله شو في خاطرها .. لا ام ولا اخت ولا اخو ..(

لحظات مرت عليها مثل السنين انسانه كان كل شي في حياتها انها تعيش مثل باجي البنات كانت عايشه احلى قصة حب في نظرها تشوف الدنيا بلون الوردي تقول في خاطرها ان قصتها هي وراشد احلى قصه محد يقدر يحب شراتها ..حبها له غير عن الباجين ماتدري انه كان يقص عليها.. وكل يوم وكل دقيقه يزيد حبها لراشد.. والحين تبقى حياتها في ذكرى البوماتها.. وتخطت وكتبت على دموعها ألم وحزن ..
دموع مابعدها دموع تمحي كل لحظه عاشتها مع راشد كل لحظه كانت حلوه.. لحظه كانت كل لحظه تعيشها تحس بأمل في هالحياة تحس بروعتها مع راشد ..
تحس انها ملكة الدنيا ومافيها عيشها حب مابعده حب.. اما هو فكان راقد ولا حاس باللي تحس فيه ..عايش حياته مبسوط ومستانس يحلم ويحلم ويحلم احلام تخليه يعيش في سعاده ولكن احلامه كانت بيضه ما يشوف فيها شي غير نفسه وانانيته وحياته المبعثره.. ويشوف مستقبله مع هذي وهذيج واللي بتي عقبهم ..

واذا لقيت انه في ردود انشا الله اكملها

الموضوع الاصلي من روعة الكون

الراحل الصامت · 13-07-2007, 12:57

السهم · 13-07-2007, 01:27

الحلا مابتليني · 13-07-2007, 01:27

الطيــــــر · 13-07-2007, 02:06

لالـــي · 13-07-2007, 02:20

* فلونة * · 14-07-2007, 12:58

* فلونة * · 14-07-2007, 01:02

* فلونة * · 14-07-2007, 01:05

* فلونة * · 14-07-2007, 01:07

اسفة شوف لك غيري

مــنــتــدى الــحــكــم والــقــصــص