يعيش الحب شي عادي ... يموت الحب وش يعني

وانشاء الله تعجبكمــ..


>>>وداعــــــــــــية<<<

يعيش الحب شي عادي..يموت الحب وش يعني ؟!!
مدام قلوبنا ماتت مشاعرها وهي حيّه

أحسب الحب لاجيته على كيفه يطاوعني
... مغفل من يعيش بهالزمان أحلام ورديّه

من أول ماعرفتك تعطي إحساسك وتمنعني
...وأقول تمون يانبع الحلا والحب حنيّه

كثر ماكنت تكذب في كلامك كنت تقنعني
...دليل إني على كثر الجفا سلمتك إيديّه

عشاني قلتلك مابدخل بهالجو طلعني
... تروح وتاخذ الدنيا معاك وتقطع الجيّه

مع إني قلت اذا ماطاعك الوقت الردي طعني
... إذا ماجيتني كلك تعال شويّه .. شويّه

لك الله يوم أجي مشتاق لك والشوق يدفعني
... كأني رايحن للموت بإيديني ورجليّه

وأعرف إن مر في بالك تولعني.. تولعني
... مدامه شي في بالك تجيبه ميّه في الميّه

وصلت لمرحله .. حتى الشعور العذب يخدعني !
... وأحس إني على النيه وأنا فعلا على النيّه

بكمل لك كلامي بس تكفى لاتقاطعني
... بقى جمر الكلام ودمعة في العين مخفيهّ

أمانه قبل أروح و ينتهي كل شي طالعني
... عشان تعرف وش معنى العطا قبل الأنانيّه

أبرحل والطريق اللي يودي ما يرجعني
... يبي يغنيني الله عن هوى حبك و طاريّه

خذ الباب بطريقك والعذر ماعاد ينفعني
... ترى ماعاد لك قيمه ولا للحب أهميّه

ومثل ماتسمع لعبدالكريم أبيك تسمع لي
... وداعيّه يا آخر ليله تجمعنا وداعيّه

قصيدة راااائعة من إبداع الشاعر عطاالله الفرحان
منقول

الموضوع الاصلي  من روعة الكون