مجلة الشعر النبطي ...... ادخل وشوف

،؛، .. يا قـــو قلــــبـــك .. ،؛،

ياقو قلبك على الصّـده ويـا صُــــــبـرك
وياوسع صدري على صدك ويا صُبري

وياطول عمـرك بذاكـــــــرتـي وياكُبـرك
وياشيب عيني بشيّب عــــاد ذا كــــُبـري

والله لون حمل صبري فوقـك..ان تبرك
والله ولو تعتذر منـت بعلـى خــــــــبـري

ان ما جبرك الغلا ما اقدر على جـــبـرك
ياللي على ارض الوفـا ما شبرك بشبري

تـــزعل وترجع وتـلقانـي عــــلـى خبـرك
وانا انكسر لك واجـــــيـك ادوّر لــجبـري

طـــيفك وذكــــراك طـيلـة غيبتـــك سبـرك
وشـــــوقي لشوفتك طيلة غيبتـك سبـري

امـــــحق وليف ومحبه والا اقــول ابـرك
حسبي عليك اعشقك وانت اتحفر قــبري
ــــــــــــــــــــــــــــــــــــــــــــــــــ ــــــــــــــــــــــــــ

،؛، .. لا ضاقت الدنيـــا .. ،؛،

لا ضاقت الدنيا عليك وتشاويت ..
.. خلق الله اللي فالرخا كان واجد

ومن العرب والصوت والثوب مليت ..
.. وقامت عليك هموم بأقعا تراجد

فارفع يديك لخالقك لا توضيت ..
.. وادعو تراك أقرب إليا صرت ساجد

ووقت من أوقاتك للأوقات توقيت ..
.. وسجل لنفسك في المساجد تواجد

وأبشر بفزعة حامي الدين والبيت ..
.. إليا هجدك من الهواجيس هاجد

اللي يميت الحي ثم يحيي الميت ..
.. لرضاه شف كثر البشر بالمساجد
ــــــــــــــــــــــــــــــــــــــــــــــــــ ـــــــ

،؛،.. في كــــفـــها خــــاتــــــم ..،؛،

في كفها خاتم وفي خدها خال ..
.. وفي عينها غيم وعمارات وبيوت

الخال شفته واضحٍ من ورى الشال ..
.. والخاتم الماس مرصع بياقوت

والعمر في العشرين كني مانيب زال ..
.. والجسم كنه من جبل ثلج منحوت

جبل ولكن لا طرقه الهوى مال ..
.. وخطواتها ماهي بالأمتار بالفوت

ماهي تشوف الشمس من ظل الاظلال ..
.. ومصيافها ما بين لندن وبيروت

الشمس لو تشرق على جسمها سال ..
.. كنها مجسم محلبيه وبسكوت

ومن صغر مبسمها شقى حالها الحال ..
.. ما تاكل الا اللوز والخوخ والتوت

ماهي تشوف الناس تمشي وتختال ..
.. ومرٍ على جاكور ومرٍ على حوت

وخدامتين وهي بلا زوج وعيال ..
.. وسمعتها تدعي الدريول يياقوت

وثلاث جوالات ماهو جوال ..
.. ومن يوم خلقت كل شيٍ بريموت

لكن قلبي مالها فيه مثقال ..
.. وش قرب البشت الحساوي من الكوت

ياجعلها للي خذت قلبي نعال ..
.. اللي غلاها عندي الشرب والقوت

حوريةٍ من فوقها الليل شلال ..
.. كنها صبحٍ فوقها الليل مكتوت

قلبي لها من كثرة الشوق مشخال ..
.. وللسر عن كل المخاليق تابوت

تنحت لي من الحب في القلب تمثال ..
.. وحبي لها ينحت على الساحه بيوت

في عينها ماكل رجال رجال ..
.. وأقصى حدود الوصل في سلمها الصوت

زودٍ على القلب وعلى الحسن من آل ..
.. روسٍ لهم روسٍ على متونها بشووت

الى رضت موتوا يا أهل روس الأموال ..
.. وإلى زعلت جربت وش سكرة الموت

من دونها رجلي وراكب وخيال ..
.. والسيف والأمواج والبحر والحوت
ــــــــــــــــــــــــــــــــــــــــــــــــــ ـــــــــــــــ
*&^$ حكمة الشاعر محمد بن فطيس المري$^&*

لموت تالي العمر والدنيا مقيل ..
.. والآخره هي منتهانا لا محال


وديني وحب الناس والخلق النبيل ..
.. ثلاث هي دربي الى حسن المئال


الله يقدرني على رد الجميل ..
.. واللي يجملني الا جالي مجال
ــــــــــــــــــــــــــــــــــــــــــــــــــ ـــ

(يقاف ...... تسجيل خروج ...... كلمة مرور)



تسجيل دخول


سجلت في قلبي دخولك على طول
..... وغنت جروح القلب فيكم نشيده


كلمة المرور

وكلمة مرورك جابها منك مرسول
.... وبدلتها وارسلت كلمه جديده


ملف

واصبح ملفك داخل القلب معزول
... وحفظت به من دم قلبي قصيده


تحرير

وسويت لك تحرير عن كل مجهول
... متوسط ٍ بين الخفوق وّريده


عرض

وقدمت لك عرض ٍ من القلب منقول
... لأجل أثبت انك بالضماير وحيده


المفضله

وبمفضلة قلبي عن الغير محمول
... ما اضفت غيرك يالفتاه الفريده


الخلف .. الامام

وللخلف لو ترجع ترى الخلف مقفول
... رح للأمـام وفك صفحه جديده


عنوان


واكتب على العنوان للغير مشغول
.... حنـّا سكنـّا وارسلي في بريده



تسجيل الخروج


وأن كان ودك تترك القلب مشغول
... سجل خروج وشب فيني وقيده



ايقاف

وان شفتني هالك على الدرب لا حول
... أضغط على ايقاف وأقرا القصيده


تحديث

وأضغط على تحديث وتشوف مدلول
... وكل الكلام اللي قريته تعيده
ــــــــــــــــــــــــــــــــــــــــــــــــــ ــــ

(نفسك مادريت)

سـو نفسك مادريـت وبـوسني
وسوها ثاني على انـك تعتـذر !!

وقول أسـف مانتبهـت وضمنـي
والعذر مقبول ولـك منـي شكـر

وكـرر الغلطـه معـاي وخلنـي
أنتظر عذرك بكل فارغ صبـر!!

جيبنـي ثـم ودنـي ثـم جيبنـي
من حدود الشمس لحدود القمـر !!

ويـن ماتبغـى فديتـك ودنــي
خادمك ياسيدي تحـت الأمـر...

تكفـى بعثرنـي شظايـا ولمنـي
في كفوفك يابعـد كـل البشـر !!

راح أسوي كني دخـت وضمنـي
وراح أقول أمزح وأحبك وأعتذر!
__________________

(ما بقلبي)

يشهـد الله ما بقلبــي
غيـرك اشتـاقه واحبـه


انت حبـك في خفـوقي
داعي الاشـواق صبـه


ولو عـذارى الكـون تطلب
نصـف قلبــي ماتطبـه


ولو بكفـي كـاس غيـرك
من غـلاك اسمـح واكبـه


غافـل قلبـي وســالي
ليـن لا قـاك وتنبـه


وانتـفض عشـق ونشـوه
جـاه من نظـرتك نبـه


إن بغيــته نور نور
وان بغيـته ضـو شبـه


لو بقلبـي شـي قبـلك
حبـك الغـالي يجبـه


ولو تقـارن عـرش حبـك
مع كراسيـهم مسبـه
ــــــــــــــــــــــــــــــــــــــــــــــــــ ـــــــــــــــــــــ

(كيك وعسل)

بعض العرب حبه يوردك الجنون
ولا يوصف له غلاه حكاك له

مايقنعه وصف الغلا لو وش يكون
لو كل حرف بالحرير يحاك له

الموت جاك وهو تقلبه الظنون
ولا لك الا الصبر وش وداك له

ان قلت ضايق قال هونها تهون
يدري ان ضيقتك له وبكاك له

تقعد تحبه وانت ساكت ومغبون
كن بيوم يقال له مااوفاك له

وكانك مشكك هو يمون او ما يمون
تخيل ان عفت الصبر فرقاك له

غلاه وهو فوق الغلا ماهوب دون
وحكاه سمعك يجبرك بارخاك له

ودك تحطه في العيون من العيون
وتبسط على رمضا الثرى يمناك له

وتظله من الشمس في ظل الجفون
ولا يمر اذنه سوى لباك له

وتسج من غيره لو انهم يذكرون
ومنين ماسجت القدم ممشاك له

غرو يميله الترف ميل الغصون
غصن ليان ومكرمه باسقاك له

جديله الى اقفى ستر منه المتون
كني بريحه لاألتفت لأدعاك له

كيك وعسل لكن ماهو في صحون
ودعا ك من عين الحسود غطاك له

الله لايعطيه ناس ينضلون
ويستر علية من النحل لا ياكله

الوصف والتعبير في وصفه يخون
غير اطلب الله يستجيب دعاك له

وعذال قلبك في محبته يهبون
سكينهم عن قطع حبله حاكله

ناس عن اعراض العرب مايعرضون
ودايم على نفس الشكل والشاكله

اللي من لحوم الاوادم ياكلون
وحلوقهم دفع البلا متواكله

في سلمهم اولى بالاكل الاقربون
واطيبهم اللي صيدته شكواك له

عازمهم الشيطان للذنب ويجون
هذا يقطع له وذاك يواكله

ياجعلهم فدوة ثرا الغض الفتون
اللي على الدرب الطويل خطاك له

طيفه الى نام البشر زارك بهون
وطيفك الى نام البشر سراك له

حبه دفان ومقبرة خضر الطعون
بين العظام العوج كنك ناكله

اللي كذا.. حبه لو تموت مغبون
ولا لك الا الصبر وش وداك له

الموضوع الاصلي  من روعة الكون