اصبر على ميلات وقتك

أوصيك ياللي كل موضوع يشغلك

صبرك على ميلات وقتك شجاعه

اضحك وجامل وانس هم يزعلك

دنياك ما تسوى الزعل منك ساعه

رد الجزى للي بقلبه يواصلك

قبل ايتبين من طرفك انقطاعه

رد الثنا للي بطيبه يجاملك

الطيب ما بين النشاما بضاعه

افعل جميل وبالتواضع تعاملك

ترى التواضع منزلك بالرفاعه

والكبر عند اقرب قريباً يخذلك

دخان صلفات الهبايب ضياعه

العلم لبلوغ المعالي يوهلك

والحلم خير كفيت شر الجزاعه

ليل الجهل داجي وحذرا يعرقلك

يثنيك بعقال الجمل في ذراعه

كثير بالدنيا اموراً تمللك

تيار غيظك لا يزود اندفاعه

حكم ضميرك لا تضيع دلايلك

خل الثقه بالنفس ستر ومناعه

لا تبدي اسرارك لشخص يغافلك

يزرع صعيبات المشاكل زراعه

لا تجادل اللي بالجهاله يجادلك

لو كان عندك بالكلام استطاعه

ان ضعت ميزان التجارب يعدلك

التجربه مثل النهار وشعاعه

حسد الفقارى لأهل الصيت والملك

فيهم زرع فقر النفوس ابشاعه

اللي خلقك بوافر الرزق كافلك

لا تنزعج ساس الغناه القناعه

ان اقبلت دنياك يجرها السلك

تجيك من عقب العصايه بطاعه

وان أدبرت بسيوف بقعا تذللك

تسقيك كاسات الشقاء والشناعه

ان جاد حظك بالرفاعه ينزلك

كلن يبي قربك يجيك بوقاعه

وإن بار بك شفت الاهانه من أهلك

بك يشمتون المجتمع والجماعه

مهما جرالك لا تضيع مراجلك

اليسر عقب العسر يبني شراعه




منقول




مع تمنياتي لكم بالتوفيق

الموضوع الاصلي  من روعة الكون