اتمنى من اعضاء المنتدى الاعزاء قرأتها من الاول للاخير مع انها طويله شوي ورغم اني حاولت ان اختصرها جدا فقد حذفت احادث كثيره لم اذكره واتمنى فقط ان م يدخل عليها يقراها كامله
.
بسم الله الرحمن قافي بديته
_____________ وبقافي المربوع خلي عنيته
بالمختصر من شان عينه بنيته
_______________يوم ان سوق الحب بايع وشراي
من يوم ماجيته وانا شاري ارضاه
_____________ واقول محبوبي عسى الخلق تفداه
ماني مصدق كيف انا مثله القاه
_____________ عزالله ان الحظ ممشاه ممشاي
جيته واشوف الخوف يملا عيونه
_____________ قلت استلم قلبي ماغيرك زبونه
ابيك عن غدر الليالي تصونه
_____________قال ابشر ابشر يافهد داي ودواي
قلبي وقلبه فالمحبه تلاقو
_____________ على الوفا والحب قاموا تواصو
والكل منهم للغلا مشعل الضو
_____________نبقى سوا في مقبل ايامنا الجاي
قالت فهد لن كان تبغا الصراحه
_____________ان كان قلبك للغنادير ساحه
الكل منٌا سهٌل الله مراحه
_____________ابعد ترا ماودي ازيد بلواي
قلت الصراحه جيت مغرم وولهان
_____________واللــــه ماغيرك ملا عيني انسان
انته سمعت ان الوفا فيك عنوان
_____________وجيتك تسابقني على وصلك خطاي
قالت فهد لن كان قلبك صناعي
_____________ اطوي شراعك واطوي انا شراعي
فالوقت هذا الحب فن وخداعي
_____________ ايذوب مثل السكر ايذوب فالشاي
قلت الحقيقه عندي القلب غالي
_____________ ماهو شقق تاطاه كل النعالي
والله ماحبك لو ماكان خالي
_____________ ولااجيك اقول القلب يبغاك وياي
قالت تركت الناس تبغى فؤادي
_____________ والا لك من الحب قصد ومرادي
لاتحسبنك يافهد فالبرادي
_____________ كم واحدن قبلك عجز يكسب رضاي
الشاهد الله مالفيتك طماعه
_____________ جيتك وانا احبك وكلي قناعه
ماقوللك ياكود سمعا وطاعه
_____________ابيك تسندني ليا طاح مركاي
قالت وش اللي معجبك حيل فيني
_____________ من شان قلبك يافهد يهتويني
تترك جميع الناس من شان عيني
_____________ وترسي بك امواج الغلا فوق مرساي
قلت الوفا وانتي اظنك وفيه
_____________ ماتخلفين الظن في كل نيه
اما من الباقي فانا ماعليه
_____________دام الوفا مبداك فالحب مبداي
قالت احبك يافهد ياحياتي
_____________ وابقا على عهد الوفا للمماتي
لكن تكفا لاتسبب شقاتي
_____________ هذي ثلاث شهور منهاره قواي
قلت اسمعي يامهجة القلب والروح
_____________ماجيت ادور من ورا الحب مصلوح
ابيك جنبي وين ماحل واروح
_____________ولاتذكري صيفي ولاتنسي شتاي
دار النقاش ومن بعضنا زعلنا
_____________ثم اختلفنا ثم قالت وقلنا
اوفالنهايه للحقيقه وصلنا
_____________ الود يبقى لو اخالفك فالراي
قالت فهد عطني عن ايام ماضيك
_____________ عن حبك اللي فرقنه لياليك
ياليش تترك يافهد قلب مغليك
_____________ شكلك كذا بالحيل نساي نساي
قلت الحقيقه رحت ماودي اروح
_____________اقفيت وانا الطم على الخد وانوح
قالت توكل يافهد روح مسموح
_____________ وهلت مدامعها من اسباب فرقاي
نزحت عن هاك الديار المسماه
_____________واقفيت صدري يتبع الاه بالاه
ياشينها بالحيل بعده وفرقاه
_____________ اقفيت وانقل سم فرقاه برداي
قالت فهد قلبت فيك المواجع
_____________ وايقظت همن داخل القلب هاجع
بلاش نرجع يافهد للمراجع
_____________تشكي وانا لو قلت ياكبر شكواي
قالت فهد حبيت واحد من الناس
_____________ واقفت به الايام واستمكن الياس
وهلت دموع عيونها فوق قرطاس
_____________ابكيه انا لو كان ماينفع ابكاي
قلت القدر لاحل ماعنه مجناب
_____________ياتيك لو اوصدت من دونه الباب
مكتوب عمر الادمي داخل كتاب
_____________الموت حق وكلنا بحكم مولاي
قالت تعال نعيش قصه جديده
_____________ بانسا زمانن فات مابغا اعيده
خلك بقربي والليالي مديده
_____________مابغا عيونك تنظر لشخصن سواي
قلت الوعد نبقا على طول خلان
_____________ مانفترق مهما يطولن الازمان
ولانستمع في هرجة فلان وفلان
_____________ ناسن تعكر دايما صافي الماي
جاني خبر من عقب مده طويله
_____________قالوا خليلك لاتحسبك خليله
غيرك غلاه بجوف قلبه يشيله
_____________ خيبت ظني فيك يانور دنياي
واخذت عنه اسبوع وانا اتألم
_____________ واقول خان القلب والا اتحلم
مادري جراح القلب ياكيف تنلم
_____________كل البشر تقرا الحزن في محياي
قالت فهد لن كان تبغا الحقيقه
_____________رحت بطريق وذاك راح بطريقه
بس اتصل حق الصديق لصديقه
_____________ولاعاد باقي داخله كود ذكراي
اخلصت له بالحب راح وجفاني
_____________ مثٌل علي الحب حتى عماني
والوقت بين لي بأنه اناني
_____________قلت ابتعد ماينفعك كثر رجواي
قلت الحقيقه واضحه دون تزييف
_____________ اخلصت لك بالحب لكن ياحيف
ابغاك تنساني من الصيف للصيف
_____________سعيت لك لكن خيبت مسعاي
قالت احبك والدموع اربع اربع
_____________ تكفى فهد ابغى من اوصالك اشبع
ثم حلفت بالله مع رزة اصبع
_____________ماغيرك انته يافهد نازل حماي
حاولت عنك ابعد وقلبي عصاني
_____________ لانه بقربك كان يلقا الاماني
رجعت لك والحزن يملا كياني
_____________احس سيفك كنه يقٌطع اعضاي
قالت فهد امر وش اللي تحبه
_____________تبغاني اطب البحر غير اطبه
لكن قلبي طالبك لاتكبه
_____________ عطني يمينك حطها جوف يمناي
قالت تمنا قلت عيني تشوفك
_____________واحضنك واتلامس كفوفي كفوفك
بكحٌل اعيوني بزاهي وصوفك
_____________ متى على الله اقدر احقق امناي
قالت تعال ارجوك لاحدن يهمك
_____________ ودي بحضني ياحياتي اضمك
تعال انا احٌلفك بابوك وامك
_____________قالت تعال وقلت انا يالغظي جاي
تالي شهر واحد وصلته وجيته
_____________ جيته وانا مشتاق له وسط بيته
دقيت باب البيت ثمن لقيته
_____________ بغيت اطيح وثبت الرب رجلاي
قالت تفضل يافهد داخل البيت
_____________ اهلا هلابك ياحبيبي وحييت
الحي نوٌر يوم بالحي مريت
_____________ قالت تفضل دوك ياعمري اهداي
قالت علامك قلت وشبي علامي
_____________ ماهي غريبه لو تبرد عظامي
معقول هذا الزين واقف امامي
_____________ قلت اقربيني حطي ايداك فيداي
حضنت اغلا من حضنته بعمري
_____________ قربتٌها ضميتها فوق صدري
قلت اه الا ياليتني كنت ادري
_____________ هذا جمالن صعب يقواه شرواي
لو كان ماشفته فما كان صدقت
_____________جيته وانا بردان لكن عرقت
ياليت معها كان طوٌل بي الوقت
_____________ مير البخت عجل عليه بمسراي
قالت فهد وش شفت في ليلة اليوم
_____________ قلت الحقيقه شفت مايطرد النوم
انته لحالك والبشر كلها كوم
_____________ قالت تبالغ فالبشر فيه حلياي
قلت الصر احه شفت ماشفت حلياك
_____________انته فريده ياحبيبي مزاياك
ترخص حياتي دون ضحكت ثناياك
_____________لو اني اوصٌفك ماتم معناي
من بعد مده اتصل في حبيبه
_____________ يشكي عليه ظروف ازمه صعيبه
اتقول ماغيرك ولافيك ريبه
_____________ مافيه غيرك شخصن يحل دعاوي
جاني خبر بالسالفه والقضيه
_____________ تكالبن اهموم قلبي عليه
اثرك يارحال صاير ضحيه
_____________ اشكي على اللي عالمن سر نجواي
قلت السبب قالت انا خفت الاحراج
_____________ مابغى اسببلك على شاني ازعاج
انته غرامك فوق راسي كما التاج
_____________ طيفك يراودني بصبحي وممساي
قلت الجروح الغايره صعب تبرا
_____________ لاصار من يجرحك بجروحك ادرا
تعال وانظر في عيوني وتقرا
_____________شمٌت فيني يالغظي جملة اعداي
نسيتها من شان حبك علشان
_____________باقي غرامك داخل القلب له شان
الصدر احسه صار للهم ميدان
_____________اليا بنيت الحب هديت مبناي
من عقبها تبغا تدور معاذير
_____________ وتقول الاياشين حكم المقادير
اتبٌدل الحاله من الغير للغير
_____________يعني كذا اقوللك يافهد باي
ضحيت انا والا انته بويش ضحيت
_____________ليتك تمر بمثل مافيه مريت
في ذمتي مالومك ان كان جنيت
_____________وصلت هموم القلب لاغاية الهاي
كتبتها والدمع من فوق خدي
_____________ من عقب مابيحت للناس سدي
كني انا والهم نلعب تحدي
_____________للي يبي فرقاي يبشر بفرقاي
ميتين شطرن صغتها في غرامك
_____________ من عقب ماكثرت عليه سهامك
عساك في دنياك تبلغ مرامك
_____________ابقا على ذكراك وابقا بذكراي
واختامها اعداد ماشعشع النور
_____________صلاة ربي عد ماتنبت ازهور
على نبين اخرج الناس للنور
_____________ روٌح عسا الله يسعد اخطاك وخطاي
.
بقلم رحاال ( فهد المطيري)
الموضوع الاصلي
من روعة الكون
آخر 10 مشاركات
23-07-2007, 05:12
العرض العادي
