عزي لمن ضاعت حياته هواجيس
اعذروني تخمني اوقات واقوم اهذري
اجيب علومن تسر وعلومن امحقا
تدرون ليش ((كالعاده مواصل))
المهم
من وانا صغير مدرعم على وجهي ,,أكيد أسلمي مقرود
ادور درب القراده والقراده متعلقه فيني واتبعه ما يردني الا علمن كايد
كنت باموت كم مره لكن الله يكتب لي
بكل مره عمر جديد من طفولتي((أمحق من طفوله))
غرقان بمشاكل وحوادث وكانو هلي يشكون
اوقات بقواي العقليه واوقات يقلون ممسوس الولد
واحيان يقلون الولد منظول((ياربي لك الحمد من يبي ينظلني أنا وجهي)) لكن اللي مجننهم
اني بالدراسه غالبا من الاوائل,,((كثرلي منهاااا من الأوائل))
المهم
اذكر اني ((معنقز))ووجهي أمبقع بالأيدين الأزرق وشهر رمضان وصيف وبديره((أي القريه)) يالعن أمك حاله المهم شربت قاز بسرعه كان بكاس مدري
واش كانو يبون هلي فيه مادري لاكن أحسبه سفن أو مادري احسبه ماء
شربته والعنقز يلعب دوره والله لا تبلانا
وادخل في غيبوبه مدري وين الشرق من الغرب((قمت أصفق بالخانه السابع))
ووينك يا مستشفى والعرب يعزون هلي قالو انتهى وحريم العمام يقلن ولدكم تخلفو الله عليه ((الوكاد)) أسف قصدي المهم راحبي ابوي
المستشفى قالو لابوي تبي تطلعه طلعه ترى ما عاد له علاج
البلاوي اللي داخل تضررت بقوه وتلفت المعده وملحقاتها,,أحس حتى العنقز قام ينبض
المهم يعني الي شربته مو سف قــــاز؟؟؟ نرجع نكمل السالفه وين رحت هاه المهم
الله لاتبلا حتى الإثني عشر صارن سبع وأربعين مصران
المهم ابوي خذاني وانا مفهي ,,وأفاغر وأتارغ مدري ويني فيه
ووداني لم عجيز الله يسكنها الجنه وتكويني ببطني
وبظهري وبراسي بصيخ ,,لا والله مو صيخ إلى وتد بيت شعر بس الي أذكره أنها نهاية الوتد الي هي ماسكته بطاطسه,,,وعقبها ماشفت الا العافيه
والله ما عاد جاني عقب القاز ضيم ببطني
عشان كذا اللي بطنه يمغصه او يوجعه قصدي ((يعوره)) مو يروح يكومله كومه وينبطح عليها يمر ياخذ له قاز
ويسف له اشوي ملا الغطى حق موية الصحه لا يكثر لان هو
بالبدايه يخليك ترفع ثم اذا زاد عن حده
ياخذ عمرك((بس فاتح أفمك وتفاغر)) فانتبه يعني خلها وزنية معلم
لا تسوي سواتي وأنصح شربه سك بدون ثلج
خبره ,,,,
المهم
مره قلبت بسيكل مقاس 26 حق هندي سباك كان وراء صندوق خضر مليان عده
سرقته من عند بيت جارنا وانا عمري ما تعدى
حداعشر سنه تقلبت به لين قلت بس
لا ما تقلبت به الا طرت به من فوق جرف
مسوي نفسي بطران وهبدبي على وجهي وتنومت بالمستشفى
يومين ما بقى فيني شي مهوب مكسور
وغيرها وغيرها دون عن الطيحات وغير الهوشات
وغير مطارد البساسه وما خفي اعظم
الوكــــــاد
اتذكر طفولتي اللي كلها شقاوه في شقاوه
أذكر أني غرقت بخزان فيلا تبنااا بجنبنا ولولا الله ثم المذن حق الحاره كان الله يخلف رحت أنا وسروالي السنه((شهيد)).. حلوه
ولا اضن احد منكم قد تصارع
مع كلاب ينهش برجوله وايديه وهو وغد مقرود <<
يا ويلي ويلاه يالذكريات ما احلاها
ابوي جعل عمره طويل
يقول اني خذيت من عمره
كثير جعل موتي قبل موته من كثر
المصايب اللي سويتها بصغري وببداية شبابي
كل هذي مقدمه لذكرى تذكرتها
وطار النوم من عيني وابي اشارككم الذكريات
وابيكم تضحكون ترى ماازين من الماضي يالربع,,وياربعات,,, ((تقل في مسلسل أردني))
والله ثم والله ما قلت لكم شي مهوب صدق
يوم اتذكر علومن مرت علي
وانا وغد ووانا شاب ان تهولون لكن سبحانه
اللي يقسم الاعمار
الحين خذو السالفه الخبال من جد
الذكرى اللي باقولها الله يجزى قواف بالخير هذااا ولد عمي أسمه نواف بس أندلعه قواف
أذكر اني اذكر وانا بصف سادس
رحت انا وقواف ولد عمي
الله يذكره بالخير لم ((جفره وراء البيت)) للتوضيح الجفره هي حفره تكون غالباً خلف البيت لمكب النفايات,,,ولا توجد إلى بالقرى لأن مافيه بلديه يعني يجمعون البلاوي ثم يحرقوناه ,,وكانت الحمير((أعزكم الله )) دائماً تجي الجفره تدور على شي تاكله أجل تلعب المهم ولد العم قوااااف شكالي
من الحمار اللي دايم يركب عليه كان الحمار عرج واطي له قوطي صلصه أبوديك أو مادري قوطي زيتون أسباني,, المهم
يقول ((قواف)) ان عدته كبيره وانها تصافق بسيقانه
هو يبي فكره((أو وسيله)) كيف يتخلص من البلاوي.. بحيث أني ولد المدينه ومتعلم((ومقرود)) وهو بالقريه يعني قروي ,,ول يأنا تقل ماتربيت بكديره)) المهم يبي حل يفتك من هالبلاوي المتدليه ,,
عشان يعرف يسوق الحمار وهو مريح ,,حشى مو حمار سياره,,
بس أنا كنت عارف ولد عمي خواف وخايف أن الحمار يختلي فيه ويراوده عن نفسه))
ه...
المهم
قمت شرت عليه اننا نقطع عدة الحمار
جبت السكين ورحنا لم الحمار ومسك ابو الشباب
العضو المقصود بالقطع وقمت انا اسن السكين على
صفاه ولا وعيت الا بذاك الكف براسي
يوم اراد الله ينجي الحمار ويفكه منا
الا وهو ابوي وعرف نيتنا انا وولد العم
وطقنا طق امحق وخذانا ثنينا وربطنا
مع الغنم من الصبح لليل
ويوم جا الليل فكـ, ولد عمي وخذاني للبيت
وتولاني الله يطول عمره وسوت بالعقال حتى الكرب((لتوضيح (الكربه) هيا التي من خلالها تتسلق النخله)) المهم لله درك يأبي ماسلمت منها زرقت الي أنتم خابرينها ضربني لين وااااا وهو يقول وين اللي يوجعك,,لعن أبو الطيب من أهلي,,
وليخن ليييين تفلت العافيه,,!!!
وراح رقد يوم رقد وانا افتح الباب واهج
من البيت بنص الليل واضربها وديان وشعاب
ما شرقت الشمس الا وانا بلي (ريع) الريع هوااا مصك الجبل يسمى ريع يالعن أم المسميات((الريع يعني المضيق)) المهم إلى أنا بلي شعيب مدري وين أنا فيه
وانقطع مغير معي الله وامشي لين
قال الموت وينك من الضما ومن القيض
المصيبه اني كنت ماخذ على نفسي عهد
اني ما ارجع البيت وبنفسي نفوس
وضامني الضرب وحسيت بالاهانه
ولا عاد ادري وين انا من ارض الله
ويوم الله اراد يفرجها علي
وانا بين الحياه والموت يجيني راعي ذاك
القلابي ويشلني ويحطني عند
رجال الله يرحمه ويغمد روحه الجنه
ويسقيني وياكلني الحين الوقت عصير قبل المغرب
هلي قالبين الدنيا ما يدرون ويني فيه
ويوم سألني الرجال من انت ومن ابوك
عطيته اسم غلط وقلت له ودني المحل الفلاني
انا هلي نسوني هنا قام المسيكين ووداني وحنا بليل
وحطني بذاك المكان وراح وقمت ادور وين اروح
اي والله زي ما اقول لكم ولقيت شيول
فيه بطانيه مغطيه المكينه مليانه شحم مكينه وزيت
خذيتها وتلحفت بها ونومه للصبح الحين كملت اربعه
وعشرين ساعه بالخلا قمت وانا افكر
وين اروح الا وذاك الرجال مجودني من عند غاربي(( قصدي أرقبتي)) من انت
علمته الصدق لان والله عيونه بها شر
شالني ووداني المركز وهم أرسلووو للوالد وبشروه
انهم لقوني ويوم جا وخذاني سألني ليه هجيت
قلت عشانك ((ظربتني)) قال اجل دواك عندي
قلت في نفسي اجل ناويني اليوم بعد
يوم رحت البيت الا وهو
مقوم ذيك العزيمه بمناسبة رجعتي وقال يا ولدي
ارحم حال ابوك جننتني وانت ورع
واش بتسوي وانت رجال
المهم
اللي طرا السالفه اني دقيت عالوالد بالتلفون من اشوي
وقمنا نسولف وزي العاده يبي يزوجني
قلت له يبه علو قلبي الصخال والسحالي خوفي أطيح بلي وحده تغث
قال ان ما زانت خذ غيرها
قلت يا يبه خوفي يجيني ولد يسوي فيني
مثل ما سويت فيك قام يضحك !!!!
ياقليبي أبوي يبي يشوف عيالي
ابوي يشوفني كل شي عنده وحبي بقلبه
ماله حدود من بد اخواني أكيد انا الكبير
وأنا والله
ان ودي اقسم من عمري اكثره واعطيه
يا جماعه ليه الولد المقرود الشقي يحبونه
اهله اكثر؟؟
تهقون؟؟
انا احس كذا ولا كلكم؟!
المهم هالصفحه للذكريات كل واحد
يعطينا علومه وهو صغير
وسلامتكم
الموضوع الاصلي
من روعة الكون
آخر 10 مشاركات
24-07-2007, 03:26
العرض العادي
