يا اخوي شلونك ؟

يا أخوي شلونك؟؟
مشتاقة لك يا أخوي..
مشتاقة لمبسمك وعيونك..
فراغ الكون بعدك..
يا هو كئيب البيت من دونك..
يا هو مشتاق لجنونك..
لا تسألنا عن الحال..
حالنا بعد ياعمر والله حال..
تبي تسمع أخبار؟؟ تبي تدري ش اللي صار..؟؟
أنا بعدك كرهت الكويت ومافيها.
حتى شوارعها ومبانيها..

*

رحلت يا أخوي لكن حسك مارحل....
تغني ..تضحك..وتسرح..
تعصب ..تتضايق ..وتفرح..
وإذا ياني الليل..
أصير أسمعك أوضح..
تناديني..نور..ياعيني..
نامي..
ذبحج السهر يابنت..
لا عاد هالأنترنت!!
خذا عقلك وتفكيرج..
هالمنتدى ماعندهم غيرج؟؟!!
تعالي نسولف شوي..
تعالي با أقول لج شي..
وأدري ماعندج شي..
بس من يومنا نحب السهر والحجي..
حتى يطلع الضي..
نتوضى ونصلي..وبعدها بشوي..
تييني..
تغمز بعينك لي..
"شرايج نخربها ونطلع؟؟!!"
"وين نطلع؟؟!"
"ناخذ لنا لفه..ساعة ونرجع"
"بس مانطّول؟!!"
"إيه إيه مانطول..بس لازم نقول لأمي أول"
"إيه بتستر علينا كالعادة..
بنرشيها ببيالة قهوة واحنا راجعين..
اهي تحبها سادة..
بس اسمع..ساعة ونرجع..
لو درى عنا عبدالله..
والله ثم والله..
إن يقلب الدنيا على راسك وراسي .."

*

أه يابعد ناسي..
فقدتك والله فقدتك..
من بيسألني و شسويتي اليوم..متى رجعتي؟؟..ووشلونج؟؟
من بيرد لي إذا ناديت..يالبيه ..سمي ..وياعونج..
ويوم أشكي لك من الدوام..
كنت تقول لي يابنت عديها..
تحت الخط الأحمر؟؟!! وشنو يعني ؟؟شفيها ؟!
عادي وأنا أخوج هونيها..
ويوم اشكي لك من اخوانك..
تقول أبشري بالحق والله..
أحوسهم حوس عشانج..

*
تدري ياعمر؟!!
ألعب على نفسي..
أقول يابنت أنسي..
بتمشي الأيام وتمر..وبيمشي العمر..
أجذب على نفسي أدري..
تونا بدري..
ماراح من السنة غير يومين..
الله يساعد..الله يعين..
تدري ياخوي و شبيدي الحين..
بيدي صورتين..
وحدة وحنا صغار..


يوم كنا صغار..
ما عدنا الاثنين الصغار..
مشى الزمن فينا والوقت دار..
وصرنا كبار..
وتغير كل شي..إلا..
حطة راسك على جتفي..
مسكة كفك لجتفّي..
تذكر يوم قالوا لك..لاعاد تمسك إيدها..
كبرتوا..خلاص يكفّي..
كنت تطالعني..تبتسم..تيرني..وتقفّي..
آه يامقفّي..كنت دايم واقف بصفي..

وثاني الصور ياأخوي..
صورتك يوم التخرج..
الله ياحلو ذاك اليوم..
كله كوم..واللي سويناه ذاك اليوم كوم ثاني..
ياحنا رقصنا رقص..
قلبنا بيتنا عرس..
عز.. وأفراح ..وتهاني..
أبوي اللي ما عمره رقص..شالها رقصه..
فرحتنا كانت بطول هالعالم وعرضه..
الكويت غنت بك طرب..
والشجر هز بأرضه..

*
تبي تسمع بعد أخبار؟؟
تبي تدري بعدك شاللي صار؟؟

أمك..
سيرتها من مشيت..
ياليتني ماخليته يروح..ياليت وياليت..
وينه حبيبي؟؟وينه شمعة البيت؟؟
من أبسأل وين أنت؟؟وشسويت؟؟
متى راجع؟؟..ولاتتأخر علي..ومن وين جيت؟؟!!
لا تسرع يا أمك..وشوي شوي إن مشيت..


وأبوك..
تصدق يا عمر..توقعته أقوى..
أثره على فراقاك مايقوى..
كل يوم يودي بسيرتك ويجيب..
ولدي عمر ريال..ما ينخاف عليه.
ولدي ذيب..

وأخوانك..
بقعدتهم خالي مكانك..
تعال وشوف حاله في بعدك..
ملوا كل شي بعدك..
لا طلعات..لامشوار..لاكره..
لا سهرات..لا نادي..حتى أبو نوره..
ما قمنا نسمع..
إن سمعنها تيي على البال..
والكل يدمع..
*

آآآآآآآه ولاسمعنا" الأماكن"..
ياهو يهتز فينا كل ساكن..
فيها مقاطع ودي أبو نوره مايقولها..
ودي أنها مايغنيها..
"الأماكن الي مريت إنت فيها..
عايشة بروحي وأبيها ..
بس لكن مالقيتك"
ليتك تشوف الحال ياخوي ليتك..
جنه أبو نوره مغنيها عشانك..
جنه داري إنه بيخلى مكانك..
وأحتريك..
أمر الاماكن.. لكن
مأآلاقيك..
"كل شي حولي يذكرني بشي..
حتى صوتي وضحكتي لك فيها شي..
لو تغيب الدنيا عمك ماتغيب..
شوف حالي آه من تطري علي.."
*

فقدنا قعدتك معانا..
كان السهر معك غير.
كان الليل يجمعنا..
ليش السهر الحين؟؟
ماللسهر طعم..ماللسهر معنى..
حتى قعدات العصر..
تذكر ياعمر؟؟
تذكر قهوتنا والأخبار..؟؟
باجر مباراة مدريد و برشلونه..
بس بشوفها بروحي
آووواه يابعد روحي..
وين انت يالغالي؟؟
يقولون أبالغ وأكبر الموضوع..
ماشافو حالك وحالي..
يوم ودعتك وعيونك تلمع دموع..
"أشوفكم على خير..لاتبجون..وأدعوا لي"
*

يلعن أبوج يالفرقا ذبحتيني..
بكل حملج هالمرة ييتيني..
الحين يعني ذكرتيني..؟؟
حطمتي قلبي..قتلتيني..
هديتي كل حيلي اللي فيني..
بقولج شي يافرقا..وطيعيني..
خذيني..ولأخوي ودّيني..
بعدين أنسيني..
يافرقا..تسمعيني؟؟!!!

الموضوع الاصلي  من روعة الكون