>> خسـرت السعوديـه بأمـر سيـاسـي ..!! <<

الســـلام عليكـــم ..


صحيح إن بطـولة آسيا انتهت .. وفاز فيها منتخب العراق على منتخبنا السعودي .. لكن بصراحه فوز العراق على منتخبنا مايدخل المخ ..

صدقوني لو دورنا مليون عذر لمنتخبنا ماراح نحصل .. وبصراحه أكثر .. مادخلت مزاجي سالفة رهبة النهائيات لأن حتى لاعبين العراق ماعمرهم لعبوا نهائي في حياتهم ..
وأكبر دليل مباراة العراق وكوريا شفنا كيف كانوا لاعبين العراق مرتبكين وبالعين العافيه .. ويحاولون يوصلون المباراة لركلات الترجيح لعل وعسى يفوزون على المنتخب الكوري ..
بعكس لاعبينا اللي يلعبون في دوري قوي وأغلبهم لعب نهائيات كبيره وبطولات قويه ..
وبرضه مادخلت مزاجي سالفة الإرهاق .. لأنه حتى لو لاعبينا مرهقين مو معنا هذا انهم يوقفون في الملعب ويتفرجون على العراقيين وهم يحرثون الملعب ..



وبعد هالمقدمه البسيطه باقول لكم اللي في بالي .. وعلى بلاطه وعلى المكشوف ..

فاز منتخب العراق على المنتخب السعودي بأمر سياسي ....!!!!!


وفي السطور القادمه راح أبين لكم كيف وليش قلت هالكلام ..



كلنا لاحظنا كيف كان لاعبين المنتخب السعودي داخلين المباراة وهم مقهورين ومعصبين .. ولو رجعتوا لشريط المباراة بتلاحظون كيف دخل لاعبينا للملعب وكل واحد منهم في وج كلام وألف علامة استفهام ..

أول مره يدخل لاعبينا للملعب وهم فيهم البكوه .. لا تقولون لي رهبه وخوف وكلام فاضي .. لأن لاعبينا كبار .. وحتى لو كان فيهم خوف من النهائي مايوصل إنه يخليهم شوي ويبكون ..

ولو كان خوف كان شفنا هالخوف في مباراتنا مع المنتخب الياباني اللي يعتبر أقوى ألف مره من المنتخب العراقي ..

ولا تقولون لي ثقه زايده لأن فيه فرق بين الثقه والقهر .. لو كان ثقه زايده كان شفناها في المباراة .. لو كان ثقه زايده كان على الأقل شفناه في تعامل لاعبينا مع الكوره ..

والمفروض ان الخوف والرهبه صارت مع المنتخب العراقي لأن هم اللي اوضاعهم صعبه .. لكن اللي شفناه العكس .. لاعبين المنتخب العراقي داخلين وكأنهم ضامنين الفوز ..!!!!!!!!!


أمر آخر .. لاحظتوا مدربنا أنجوس ..كل مباريات منتخبنا في البطوله الآسيويه كان متحمس وواقف ورايح جاي .. كان يتفاعل مع كل كوره .. كان مايجلس أبد .. إلا في مبارتنا مع المنتخب العراقي .. كان قمه في البرود وكأنه عارف النتيجه مسبقاً ..!!!!!!!!!!!



أمر آخر برضه .. شفتوا مباراة المنتخب العراقي والمنتخب الكوري .. وشفتوا مستوى العراق .. كان العراق يدافع بإيديه ورجليه .. ويحاول يوصل المباراة لركلات الترجيح اللي تعتمد على الحظ .. لأنهم عارفين امكانيات المنتخب الكوري وانها اكبر من امكانياتهم .. وفعلاً فاز المنتخب العراقي على الكوري بركلات الحظ .. لكن وش اللي صار للمنتخب العراقي قدام منتخبنا ..!!!!!!

طيب اتركونا من هالكلام وعلموني شفتوا بعد ماسجل المنتخب العراقي هدفه الوحيد .. شفتوا كيف بردت المباراة وكيف ان المنتخب العراقي صار يوصل للمرمى السعودي ويضيع الكوره بطريقه عجيبه .. شفتوا يوم انفرد يونس بالمرمى السعودي ووقف الكوره وتعامل معاها بطريقه غريبه وبلا مبالاة وضيعها مع إنه كلاعب كبير كان يقدر يضيف للمنتخب العراقي هدف ثاني ويريح منتخبه وجمهوره .. لكنه ضيعها باستهتار وكأن النتيجه متفق عليها مسبقاً .. هدف واحد بس ..!!!!!!!!



شفتوا الفرصه الوحيد في الدقائق الأخيره يوم ضرب مالك معاذ الكوره براسه وكادت تدخل هدف سعودي .. شفتوا نظرات الاستغراب من لاعبي العراق لمالك معاذ .. وكأنهم يقولون له مو هذا اللي اتفقنا عليه ..!!
وبرضه يوم ضاعت نفس الفرصه مالاحظنا تفاعل لاعبي منتخبنا مع الهجمه .. والمفروض إن لاعبينا يعبرون عن غضبهم لضياع فرصه مؤكده للتعادل ...!!!!!!!!!!!



لاحظتوا إن أغلب اداء لاعبين المنتخب السعودي في مباراة العراق تحت الصفر ..
تخيلوا المنتخب السعودي ماله ولا هجمه طوال مجريات المباراة .. باستثناء تسديدة تيسير الجاسم ورأسيه مالك معاذ إذا اعتبرنا إنها تندرج تحت مسمى هجمه ..

ولاحظتوا كيف إن أغلب لاعبينا مايقاتلون على الكوره .. وانهم يسمحون للاعبي المنتخب العراقي بالمرور بكل سهوله .. واعتقد انك أغلبكم شاهد خالد عزيز كيف كان بعيد عن مستواه خصوصاً يوم وقف فجأه في احدى الهجمات المرتده وترك اللاعب العراقي يمر من قدامه بدون مضايقه ..!!!!!!!!!



لاحظتوا كيف كان لاعبين المنتخب السعودي معصبين ومقهورين .. عمركم شفتوا ياسر القحطاني بالعصبيه هذي .. حتى لو نرفزوه وخاشنوه .. عمر ياسر ماكان تعامله كذا .. لكن القهر اللي في قلب ياسر أكبر من هالكلام .. والقهر اللي كان في وجوه لاعبين المنتخب السعودي أكبر من مستوى المتخب العراقي .. لأنهم تعبوا في البطوله وقدموا أفضل المستويات .. وفجأه يسلب منهم كل شي بقرار سياسي ..!!!!!!!!!!!!!!!!!!!!




طيب اتركوا عنا هالكلام .. وخلونا نفكر لو فاز منتخبنا بالكاس الآسيويه من اللي كان بيفرح ..؟؟؟
أكيد كان بيفرح الجمهور السعودي فقط .. والجمهور السعودي ولله الحمد مو ناقصه شي .. أمن وأمان وحياة ولله الحمد مستقره .. يعني بصراحه الشعب السعودي ماكان محتاج الفوز بقدر مايحتاجه الشعب العراقي ..

وحتى لو فزنا بالكاس فهو اضافه لإنجازات الكره السعوديه وليس انجاز مستقل .. لأنه سبق لنا وفزنا بكأس آسيا ثلاث مرات .. فلو فزنا مره رابعه تعتبر اضافه لانجاز وليس انجاز مستقل ..

وحتى لو خسر منتخبنا فالكل راضي عن مستوى المنتخب الجديد .. وماراح نزعل لأن أغلب لاعبينا شباب ونعدهم للمستقبل .. عشان كذا ماراح تكون ردة فعل الجماهير السعوديه عنيفه .. وهذا ماساعد على منح الفوز للعراق ..


بالله عمركم شفتوا رؤساء دول يهنون بكأس كرويه إذا استثنينا كأس العالم .. عمركم شفتوا الرئيس الأمريكي يهنيء عشان كوره .. عمركم شفتوا بابا الفاتيكان بوليس الثاني مدري وش اسمه يهنيء في مؤتمر كبير عشان كوره .. عمركم شفتوا قنوات اخباريه عالميه مثل الـ CNN والـ BBC تفرد نشراتها الاخباريه عشان كوره ..!!!!!!!!!!!!!!!!!!!!




وفي الختام أنا لا اعترض ..<<< خـايف

وألف ألف مبروك للشعب العراقي كأس آسيا ..
وحتى لو كان الفوز لأغراض سياسيه ..
وحتى لو كانت فرحتكم على حسابنا ..
فنحن في الأخير اخوان ولم نقصر معكم سابقاً ولن نقصر لاحقاً ..
فكما دعمت المملكه العربيه السعوديه الشعب العراقي سياسياً واقتصادياً هانحن ندعمه رياضياً ..
وهذا ليس غريب على الحكومه والشعب السعودي ..
فنحن كنا ومازلنا نفعل كل شيء ليكون العرب والمسلمين صف واحد ويد واحده ولو كان بالكوره ..
فهل نجد بعد كل هذا من يثمن ويقدر الدور السعودي ..
أعتقــد .. لااااااااااااااااااا ...!!!!!!


وخيرها في غيرها يارجال المنتخب ..
والوعد قدام يا آسيا ..
بس بدون سياسه ..







.
.
.

الموضوع الاصلي  من روعة الكون