يا زينك بالحرام ويا شينك بالحلال ..!

السلام عليكم ورحمة الله وبركاته

هذي قصه صارت في قديم الزمان,,



كان فيه رجال تاجر وكانت تجارته في بيع الاقمشه

بس كان بخيـل لابعد الحدود لدرجة انه مايصرف على زوجته ولا يهتم فيها ومو مقدرها كازوجه

الزوجه طبعـا ملت من تصرفات زوجها وبدت تطلع الدهاء والحنكه " إن كيدهن عظيـم " راحت عند


جارتها ام سليمان وطلبتها تعطيها ملابس حلوه وبعض من الذهب والاساور اللي عندها فوافقت الجاره

انها تعطيها
تشكرتها ام سعيد ورجعت لبيتها عشان تبدا في مخططها

كشخت ولبست الملابس والذهب وحطت الكحل ودقت الزين العمه وراحت عند زوجها في المحل

"طبعا زوجها عينه زايغه شوي " وتدخل عليه مطلعه العيون وهاليدين اللي تشق القلب من زينها

دخلت ام سعيد المحل وزوجها ما يعرف انها زوجته على باله وحده ثانيه " من قل الاهتمام "

ام سعيد " السلام عليكم

ابو سعيد " وعليكم السلام يا هلا وغـلا اسفرت وانورت تو مانور المحل

ام سعيد " بوجودك ( على بالي مستحيه )

ابو سعيد " امري وش بغيتي تدللي بس ( يطالع في عيون ام سعيد وضايع )

ام سعيد " ابي تقطعلي من القماش هذا وهذا وهذا . واختارت احـلا واغـلا الاقمشه اللي في المحل

ابو سعيد طبعا قص لها كل الاقمشه اللي هي تبيها وحطها لها في كيس مد الكيس للحرمه وقالت

يوووه نسيت فلوسي في البيت بترك الكيس عندك وبكره اجي اخذه قال الرجال,لالا تاخذين الكيس

وبكره تعالي وجيبي الفلوس قالت لا عيب قال والله ان تاخذين الكيس وبكره تردين الفلوس ( مسوي نشمي )

طبعـا ام سعيد هذا من ضمن تخطيطها واخذت الكيس وراحت لبيتها ورجعت الملابس والذهب لجارتها

وخبت الكيس عندها . بعد المغرب رجع ابو سعيد من المحل وحطت له زوجته الاكل وتعشا ونااام

صحى بكره وراح للمحل كا العاده ,ام سعيد راحت لجارتها ام سليمان قالت ابي اتسلف منك مثل امس

ذهب واساور وملابس زينه عاد ام سليمان ما شاء الله ماتقصر قامت بالواجب وعطتها

تكشخت ام سعيد ولبست الذهب والاساور وحطت الكحل ودقت الزيـن ونزلت للمحل عند زوجها

دخلت ويبقبق عيونه عليها يا هـلا وغـلا تأخرتي ماجيتي قالت معليش اشغال

قالت قبل ما اعطيك الفلوس ابيك تقطعلي من القماش هذا وهذا وهذاك الزين وابي الغالي مو الرخيص

قال مالك الا اللي تبين وقص لها من كل الاقمشه اللي هي تبيها وحطها في كيس يوم مد الكيـس

قالت يوووه نسيت اجيب الفلوس معي بترك الكيس عندك وبكره اجي اخذه ابو سعيد ماصدق تجيه فرصه انه يشوفها

وحلف عليها انها تاخذ الكيس ومن بكره تجي وتجيب الفلوس معها قالت الله يعافيك ماقصرت معي وانا تعبتك ومن هالخرابيط ...

طلعت ام سعيد وراح لبيتها ورجعت كل شي لجارتها وخبت الاقمشه عندها , جا المغرب ورجع الزوج لبيته

مو طايق وجه زوجته يهاوشها حطي الاكل انتي بلوه علي انا مو متزوج حرمه انتي رجال وينك وين النعومه

( مايدري ان اللي تجيه كل يوم زوجته ). صلحت ام سعيد العشا وتعشا زوجها وراح ينام بعد يوم شاق من العمل

صحى الصبح وراح للمحل واللي يجي يشتري واللي يجي يتفرج ويطلع وهو كل تفكيره متى تجي الزينـه بس ,,

راحت ام سعيد عند جارتها ام سليمان تتسلف منها ملابس وذهب وام سليمان ساعدها واعطتها احتياجاتها

تكشخت ام سعيد ولبست احسن لبس وحطت الكحل ولبست الاساور والثوب المزركش وكشخت عـ الاخر

دخلت المحل واهي تطالع في ابو سعيد وابو سعيد فرحته ماتوصف يوم شافها قالت ابي تقص لي من القماش


هذا وهذاك الزين واهي تتدلع وتتغنج وتطلع يدينها وتميلها يمين ويسار لين الرجال فقد عقله وانجن عليها

وقص لها من كل قماش يحبه قلبها يوم مد الكيس قالت ياربيــه نسيت فلوسي قال خلاص خذي الكيس وروحي بيتك

وجيبي الفلوس وتعالي بعد المغرب تلقيني مسكر المحل وواقف عند الشجره ويأشر عليها ( الشجره في مكان بعيد عن الناس ومظلم )

قال استناك هناك قالت خلاص اجل بجيب العشا معي ووافق ابو سعيد .

جا المغرب وسكر ابو سعيد المحل وراح عند الشجره البعيده ينتظر الحرمه اللي عاجبته وميت عليها

وصلت الحرمه للشجره والدنيا ظلام الواحد مايشوف نفسه من الظلام وحطت العشا طبعا ابو سعيد عاجبته

فقال نغتنم الفرصه وقرب عندها وقرب اكثر واكثر واكثر لين صار اللي صار ..

تأخر الوقت وقالت الحرمه انا برجع لبيتي وقال ابو سعيد وانا برجع عند زوجتي اكيد تنتظرني

رجعت ام سعيد للبيت بسسرعه ,,,

دخل ابو سعيد " السلام عليكم , وانصـدم من اللي شافه ......؟؟

كانت زوجته حاطه الاكياس والاقمشه عند مقدمة الباب وكانت جالسه بكشختها وجمالها

انصـدم بقووه ابو سعيد وعرف انها هي الحرمه اللي تجي كل يوم للمحل وكيف انها عجبتـه وانهبل عليها

قال ابو سعيد لزوجته " يــازيـنك بالحـرام ويـاشيـنك بالحـلااال "

فعرف بعدها ان عنده زوجـه ولا احلى من كل الزوجات بس ما كان مقدرها ولا يحاول يتعرف عليها اكثر

باس راس زوجته واعتذر لها عن شدة بخله واعتذر بشده لانه ماكان يصرف عليها الفلس الواحد واعتذر عن كلامه القاسي عليها

والزوجه تقبلت اسف زوجها واعتذاره الشديد ورجعو من احـلا الازواج يجمعهم الحب والموده والعطف والحنان واهـم شي الراحـه . . .





ان شاء الله تعجبكم القصه

تحــياتي


ولـــــــــد المملكه

الموضوع الاصلي  من روعة الكون