ودي اكتب لي قصيده في العنودي_-_شخص أحبـــه وانا حالفٍ ماأخونه ........

أخواني واخواتي الاعزاء
مساء/صباح الخير
كيفكم جميعآ ؟؟
أخواني هذه قصيده في شخص غالي علي مرهـ وبالعربي هي بنت مستوره والله يستر عليها عالعموم حبي لها حب اخوي ومعزه وتقدير لايروح تفكيركم بعيد
وكنت البارح بالليل اللي هو يوم الخميس 3/8/1428 هجري و16/8/2007ميلادي طالع من الرياض الى الدمام!!
بكون معكم صريح مرهـ , لأني في مثل هالموقف لازم اكون صريح بالمرهـ!!
وكان معي ورقه من ضمن اوراق كانت معي في الديكور او درج السياره وفجأه وانا مسرع بالمره وماحسيت في الخط وقفني تفتيش امن الطرق << بعد تبغوني اقول لكم ويني فيه خخخخخخخخ
المهم وطلب الرخصه والاستماره واعطيته طلباته والله يعيني على القسيمه
المهم وانا ارجع الاوراق فالسياره لقيت ورقه من اوراقي ومكتوب فيها اسم << تبون اسمها بعد ترى عادي اسمها مؤسسة للدعايه والاعلام بالربوه شارع احمد بن حنبل << انتبهوا تتعاملون معها<< قاهرتني وماأبغى اسوي لها دعايه اعلاميه ترى هذا اللي موجود بالكرت لاتفكرون انها اللي انا غنيت او قصدت فيها خخخخخخخخخخخخخخخخخخخخخخخخخخخخ مؤسسه مايسددون خخخخخخخخخخخ
عالعموم <<< قام يطلع عن النص بالكلام اللي ماله فيه فايده اااي
الزبده ان هالورقه ذكرتني هالبنت لأن اسمها العنود وانا ابغى اغني ماسك خط ومبسوط ويالله..,
فقلت هذه القصيد وعلى الله انها تعجبكم وماتزعل واذا زعلت ترى ماراح اكتب ولاحرف ولامشاركه لين ترضى ...
عالعموم قبل اكتب القصيده انا كتبتها بلهجه غريبه يمكن على بعض الاخوان اللي ماهم من نجد او ماهم من السعوديه فأنا بوضّح بعض الكلمات طبعآ بعد اذنكم!!
1- مبددة الحشودي===>>مفرقه الجموع بالحرب
2-النقودي==>> الذي يشيل النقد ويبحث عن اتفه الاسباب ليكون نقاد له
3-غونه===>> يعني عقده وهي تأتي بالحبل الملتوي
4-رجوا===>> يعني اصدروا اوامركم
5-بأزهم==>>طبعآ انخا
6-الابدودي===>> يعني افخاذ القبائل او عشائر متعدده صغيره
7-المعونه===>> الفزعه والنخوه والمساعده
8-معرّبة===>>اصيلين , وكل فيه حقه وترى ماني قحطاني لاأحد يفهم غلط
9-انصى==>>اتجه الى
10- حلالة===>> فكاكه
11-عودي==>>شايب كبيرفي السن
12-بونه==>> يعني خله او مشكله اوعذروب
13-أجنب===>> اصد واترك
14-ياوجودي==>>اتمنى
15-الأودي==>>سياره
16-بالشونه==>> راتب سنوي يصرف للعجزه
17-اشطونه==>>يعني بلاويه وحسراته وهمومه
18-الاجوررود==>>شارع بلندن
19-الاكسفررود==>>نفس الشي شارع بلندن وهوقريب بالمره من اجوررود
20-بتشطفونه===>> يعني تمرون عليه مر الكرام بسرعه على قولتهم
لاأكون مللتكم من الشرح وعلى فكره ترى سبب شرحي لبعض الكلمات لأني القى في بعض تعليقات بعض الاخوان والاخوات كلمات تعني انه لم يفهم بعض كلماتي فحبيت اوضح لهم وآسف على الإطاله,,
عاد ماأبغى بعضكم يتفلسف ويلقط لي كلمه ويقول وش معنى كذا خخخخخخخخ
المهم القصيده هي :



ودي اكتـــــــب لي قصــــيدهـ في العنـــودي
شخـــصٍ أحبــــــه وأنا حــــــــالفٍ ماأخونه
حــــالفٍ له بالـــــوفاء وكـونوا اشهـــــودي
شاركني بقلبي جعــــــــــــــــــله فدى عيونه
ربـــــــعي (..........) امبــــــــددة الحشـودي
بس من حـــــبه والله ماأســـــــــــوى بدونه
جعلني فـــــــــــدوه ويفـــــــــــــــداه النقودي
ويفـــــداه النـّـــــت ومـع اللـــــــــي يدخلونه
تكـــفون يااخـــــوان نــــــــوره يآل سعودي
أشكــــي حظي اللي غـــــاديٍ به غــــــــونه
رجّـــــــــــــوا لاجهزهـ ابغى غض النهودي
وابغى مـــــــــن يحــــــــضرهـ لازمٍ يصونه
طــــــــــال صبري او وصل عند الحــــدودي
ياهــــــــــلي والحال بعدهـ كيــــــــــف لونه
بأزهم العجـــــــــمان وشــــــــمر بالابدودي
وعنـــــــــزهـ مـــعا شــهران اهـل المعونه
وأزهـــــــــم قحــــــــــطـان معّربة الجدودي
وحـــــــــرب ومطــــــــــيرٍ بصوتٍ يسمعونه
وعتيـــــــــــبه اللي بالغابه هم ايســــــودي
والوادي كــــــــل الدواســــــــــــر يسكنونه
وانصى يـــــــــامٍ حــــــــــــلالة كل معقودي
وارســــــــــل للســـــــــــهول بدارٍ يدهلونه
وازهــم البقــــــــــــــوم من صغيرٍ وعودي
ياهل الفـــــــــــــــــــزعات وحظي فيه بونه
وازهــم العــــربان من حضــــــرٍ وبــــودي
وانخى بنـــــي خـــــــــــالد ابصوتٍ يوحونه
وأمـــــــــــر الســــــــواحل عجلٍ اونشودي
أزهم الطـــــــــــــيب وأجنـّــــــب هل التونه
ياوجودي أزهـــــــــــم وانخـــــى ياوجودي
ماعدا طـــــرش البحـــــــــــــــر لاتزهمونه
مســـــــتوى خلي رفيـــــــــعٍ غض العودي
للسبب هـــــذا لـــــــــــــــيش انكم تنشدونه
ودي ابجــــــــــوله على المـــــوتر الأودي
ماقصّـــــر من جـــــــــــابه اصـفار طبلونه
شـــــــايبٍ عســـــــــى عمرهـ دايمٍ يزودي
جـــــــــــــابها بـــــذراعه ماسجّــل أبشونه
من اليمــــن للشـــــام ومن لقى مقصودي
أزهــم وانـــشد واتحــــــــــــــرى يذكرونه
من يبشـــــــــرني به ويقــــــــول موجودي
ويكسب أجـــــــــر قلــــبٍ كاثرات اشطونه
صاحبي صـــــــيّـف ذا السنه باجـوررودي
والمغـــــــــــــني بالمســــــتشفى يزورونه
العفـــــــو ماشالله ويخســــــــى الحسودي
اللي حســــــودٍ أونظــــــــــــــــرته ملعونه
يانفــــــسي عوضك بشارع لكســـفررودي
ويالاقــــــدام الاجــــــوررود ابتشــــطفونه
العفــــــــــو والغلــــــــط يالغضي مردودي
ذكرتك وقلـــــــــبي هاضـــــت به اشجونه
ذكرتك وجــــــــأ وســــط الحشـى بارودي
بأنفــــــجر لــــــو مــــاغنيت من المهونه
والســبب كـــثرة جفـــــاكم والصـــــدودي
وشـــوقي والــــوله اجـــنونٍ وش جنونه


:::::::::::::::::::::::::::::::::::::::::::::::::: :::::::::::::::::::::::::::::::::::::::::::::::::: ::::::::::::::::::::::::::::::::::::::::::::

تحياتي

الموضوع الاصلي  من روعة الكون