وسع صدرك مع مشاري( جريند ايزر)

قبل فتره طويله مره

يوم كان وقتها اللي يبي خط ثابت ينتظرسنه حتى يوصل له الخط بعد مايجون وزارة البرق والبريد

والهاتف ويحفرون

الشارع ويمدون اسلاكهم ويدفنونها بالتراب . كانت تحدث مشاكل عديده في التلفون ومن ضمن

هالمشاكل تشابك الخطوط مع بعض


رفعت سماعة التلفون بكلم في يوم من الايام...

وقبل مااكلم سمعت وحده كبيره تكلم صديقاتها فقعدت اتسمع وأنا ساكت:Copy (2) of Copy of

كانت البنت تكلم صديقتها عن مشاكلها وتشتكي لها وتطلب من صديقتها حل؟

والصديقه ماقدرت تحل مشكلة صاحبت القضيه..

بصراحه لأطلاعي الكامل على القضيه ولقافتي حبيت اتدخل واقول وجهة نظري(هاي)

دخلت عليهم وقلت ماعليش ترى المشكله سهله وحلها سهل..

قالت وحده وجع من هذا !؟

ردت عليها الثانيه يمه انا ماعندي الا تلفون واحد ...وقالت الأولى وأنا بعد

قلت انا عادي لاتخافون انا قريند أيزر :mo13: وسمعت كلامكم كله وهذي وجهة نظري.

وبما ان الديره الي انا ساكن فيها مشهورين بالدعاء

قالت وحده منهم ( قريدر يتوطاك ياللي ماتستحي على وجهك)

خفت وسكرت السماعه

بعد شوي رفعت السماعه وسمعت رجال يكلم وحده اظنها زوجته ويقول لها

ياسبدي عازم لي رجال وابيك تسوين لنا مرقوق وجريش.
:a059:
وهي تقول له والله تعبانه وتعرف الحمل وظهري يوجعني

تدخلت انا كالعاده وقلت ياآخي عيب عليك زوجتك مريضه وانت مسوي فيها حاتم الطائي.

رد هو وقال اخوك عندك انا كم مره قايل لك هالداشر لايدخل بيتي.

وصارت هوشه بينهم ومافهمت شي .:sm201:

خفت وسكرت السماعه

للمره الثالثه وفي الصباح الباكر مع زقزقة العاصفير رفعت السماعه اتفقد احوال الرعيه

سمعت هالمره عجوز تكلم عجوز ثانيه فاحبيت سواليفهم وقعدت اتسمع الحوار التالي واتمنى تفهمونه .

ام راشد : ياوجد عيني ....شعره قلبي راح من غير شر للمدينه
ام علي: الله خير حافظ .. راحت حرمته معه ولا نكست لهلها.
ام راشد:راح معه ربه ولا قليلة الفود تقول ماتحمل السفر
ام علي: الله يخلف على بنات هالوقت .اذا حملت بواحد صارت ماتحمل ولا تدخل المطبخ.
ام راشد: ماحلفتيني يوم اني حامله بسعد وبالثامن وانا اطلع واخرف من النخل واروس بالمزرعه واحلب البقر،
ام علي: هوو و وووووووووووو.... ام راشد يوم انك حامله بسعد كنتي بتبوك وين تخرفين وتحلبين معه هي هي هي تكذبين علي
ام راشد: اقول اها بس تباخصيني بنفسي ..
وتهاوشو شوي بس تواعدو العصر علشان يحنون شعورهم عند جارتهم
اي

اخر مره رفعت السماعه بعدها

سمعت جارنا اللي عرفت صوته يكلم واحد ثاني وكان يقوله ان ابو مشاري يبي يتزوج فلانه علشان يستر عليها بعد

ماتوفى زوجها.

قلت بلا يستر بلا كلام فاضي وعلمت امي بالموضوع .

وبعدين اكتشفت ان ابو مشاري المقصود مو ابوي بس عقب ماجبت العيد.

كثره شكاوي الناس من تداخل الخطوط حتى اخترعوا تلفون الاسقاط .

وحرموني من تفقد احوال الرعيه...

الله يتوب علي من التجسس لأني ماكنت اعرف انه حرام وقتها وكنت صغير.

تحياتي لكم

الموضوع الاصلي  من روعة الكون