الحياه اسرار

الحياه اسرار وابن ادم ضعيف=نص ساعه تعجزه قدامها
كل ماشتى تمنّى الوقت صيف=ولا دفى يبغا براد انسامها
المهم السالفه ماهي مصيف=ولا براد الليله ولا عسامها
بادع البيتين الاولى في الخريف=ماني بصوب القصيد ايامها
ويوم شفت ان ثالث ابياتي خفيف=مارظيت الاّ بنفس احجامها
ويوم عوّد شعري ومعناي كيف=الاّ انا في عام ماهو عامها
لابرد زادي وهوّ الزاد اعيف=للطبيعه طبعها واحكامها
وسالفة عاما في عاما يامنيف=هاجسي غير الصحف واقلامها
اكثر الاقلام شغلتها تظيف=لين صرنا حافظين إعلامها
اعذروني يالنبيل ويالشريف=هم الاكثر رغم صغر اعظامها
الحقيقي واحد وعشرين زيف=حطو الخطين تحت ارقامها
وياجماعه ودي اعرف بس كيف=مابنا مسؤل واحد لامها
ولاّ يمكن كثرة الجنس اللطيف=حققت للعين بعض احلامها
لاتخاف وتقبل الوظع المخيف=التفت للملعنه وافلامها
مانبي تركب فرس وتشل سيف=لا بدون قصور فيك ودامها
شرذمه قل غيّروها للنظيف=كلمتك تكسر سيوف اخصامها
ماعليك امر انصر الدين الحنيف=قل عند المسلمين اسلامها
شف سواياهم في باريس وجنيف=وانت تصدر امر حكم عدامها
وان تباعدت الرصيف من الرصيف=فتّح وبتشوف نفس آثامها
الحيا في الاغلبيه مثل ظيف=لاحظر يترك معا خدّامها
يرحم الله حالة الراس العفيف=ليلة البارح سهر مانامها
يستظيفونه هموم ويستظيف=ماتحس الامّه من آلامها
وياهنيّك في عيونك يالكفيف=مابعد جربت جرح صيامها
والحياه اسرار وابن ادم ضعيف=بس ضعفي ماطلع قدّامها
في الشتى ببرد وابدفى كل صيف=كلمتن يالعنبووو من لامها