[[ الحـــــــــــــــلم ]]

بسم الله الرحمن الرحيم..



الحلم الاول...



هزني شوق المعاني ماعلي من الملامه....... لهف نفسي للقوافي لهف خين جاه خيه

ان نسى يوقف بوج قال عز الله مقامه......وان وقفله حب راسه احترام ومقدريه

ماقصدي قول شاعر ويتفنن في كلامه...... موهبه من فضل ربي ساقها الرحمان ليه

ماتفاخر بالقصيد ولا ادعي فيه الزعامه.....مير جيت من الاخير للصفوف الاوليه

لي هيامي في الخيال وكل شاعر له هيامه..... والشعر مابه كبير ولا صغير ولا اقدميه

من بكم يحظر قصيده ياجماعه في منامه.... مااتحدى مير والله انها صارت عليه

زارني شيخ في منامي محرمن لابسن عمامه....دق صدري في عصاه قال جايبلك هديه

قلت وشي قال هذي قلت وشي قال خامه.....فلها واكتب عليها قلت مافيها اذيــه..؟

قال ابدن لا تخاف وقلتله مع السلامه.... قبل يمشي هز كتفي قال عندي لك وصيه

هالشعر احساس لكن له كيانه واحترامه........ لا تخلي هالمعاني لانفعالاتك ضحيه

واكتب اللي انت شفته ماعلييك من الملامه......راح تطلعلك قصيدة تستحق الافضليه

صد وج راح يمشي قمت افكر في كلامه.... كيف اخلي هالقصيده في منامي واقعيه

يوم فليت هالقماشه فرفحت منها حمامه.... وقمت اصفق من منامي للحلوم الشاعريه



الحلم الثاني...


تذكرون الشايب اللي زارني بذاك المنام....... في منامي كيف مدري رحت زرته في منامه

ليلة البارح لقيته فوق موج من الغمــــام.........قاعدن جنبه عصاه ونازعن ذيك العمامـــه

جيت بشويش وندهته اقعد اقعد ياعمام........... صك يديه وحك عينه قال وش هالغمامه

قلتله صحصح دخيلك جيتك عندي كلام......... قال منهو ماعرفتك قلت انا راعي الحمامه

قال طارت قلت طارت قال والله ماتلام...............قلت ليه قال طبعا راح تسمع للملامه

قلت والله ماسمعت لغير ربعي والسلام........... قال ربعك غير طبعك وانت غير وبك علامه

قلت وشي هالعلامه قال واضح بالعثام............ قلبك ابيض لايهمك من يخمك في كلامه

قلت ابيلي خامه اكبر ماتقطع في الزحام..........قال شمر ولاتذمر وانت شاعر دون خامه

قلت طيب وش اسوي قال خلك بالظلام........... هالزمن لو شفت نوره راح ترضا عن ظلامه

لكن اسمع ياوليدي ظل لك عندي كلام............ الجمل ماراح يصبر لو تخلا عن سنامه

اكتب اللي في مزاجك وابتكر واكرب حزام..... لا تخاف ولا تداري ولا تدور للزعامه

قالها ثم دار وج للغيوم ورد نام.............. وقمت فازع من منامي بس اتمتم في كلامه




وســــلأأمتكم..

الموضوع الاصلي  من روعة الكون