قصتي مع إضافة جديده على الماسنجر ... حقيقه وقعت لي أنا محدثكم أبوتميم

أبوتميم · #1 (**permalink**) 17-09-2007, 10:51

قصتي مع إضافة جديده على الماسنجر ...

يقولون عش كثير تشوف كثير هذه القصة وقعت لي .. أنا .. محدثكم أبوتميم وأحبب أن أضعها لكم .. للفائدة فقط .. ولا أبغى منها شهره ولا شيء .. والقصه وقعت قبل شهر تقريباً

السالفه يا طولين العمر ..

كنت كالعادة فاتح الماسنجر وجالس أصمم على برنامجي إلي أحبه الفوتوشوب

ما دريت إلا بإضافة غريبة وكان إسم صاحبها ( Look for a friend )

أضن معناها

( أبحث عن صديق ) تراني ما أعرف أنقليزي بس ترجمتها بقوقل :

المهم وافقت كالعادة .. يمكن أحد عنده إستفسار عن شيء معين ؟
بعد مرور دقيقتين تقريباً أرسل يطلب محادثة وكان هذا هو الحوار

ملاحظه ( أي شيء بين قوسين فهذا من عندي للشرح نقطه معينه )

Look for a friend : السلام عليكم

أبوتميم : وعليكم السلام

Look for a friend : كيف حال

أبوتميم : تمام ولله الحمد

Look for a friend : من معي ؟

أبوتميم : المفروض تعرف بنفسك لأنك أنت من طلب الاضافه ؟

Look for a friend : معك وحده

أبوتميم : ؟؟ حياك الله يا الوحده ؟ أمري ؟

Look for a friend : ما قلت لي من أنت ؟

أبوتميم : أبوتميم

Look for a friend : حياك الله أبوتميم

أبوتميم : الله يحيك .. آمري

Look for a friend : حابه أتعرف بس

أبوتميم : ما عندي بطاقات شحن جوال :mo13::mo13:

:Look for a friend ه

Look for a friend : لا تخاف .. ماني طالبتها منك ..

Look for a friend : شكلك مشغول

أبوتميم : تقدرين تقولين كذا

Look for a friend : وش مشغول فيه

أبوتميم : أصمم

أبوتميم : سؤال ؟؟ كيف جبت أميلي ؟

Look for a friend : لقيته في أحد تصاميمك وخذته .

أبوتميم : أها ..

Look for a friend : وش تصمم

أبوتميم : بطاقة تهنئة رمضانية

Look for a friend : ماشاء الله عليك .

توقفت المحادثة خمس دقائق تقريباً

Look for a friend : من وين أنت

أبوتميم : من الأرض

Look for a friend : ه

Look for a friend : لا عن جد

أبوتميم : من السعودية

Look for a friend : ونعم

أبوتميم : الله ينعم عليك

أبوتميم : أقدر أخدمك بشيء ؟ لأني بطلع بعد شوي

Look for a friend : لا قلت لك حابه أتعرف بس

أبوتميم : وش الفايدة تتعرفين ؟ دوري بنات أزين لك

Look for a friend : عندي بنات بالماسنجر .. بس سواليف الحريم ممله

أبوتميم : وسواليف الرجال بعض الأحيان ممله

Look for a friend : والله على حسب من تكلم فيه ناس عندهم روح الضحك وناس مللين

أبوتميم : متزوجه أنتِ

Look for a friend : أمممم مدري

Look for a friend : ليه ؟

أبوتميم : لا بس .. حاجه في نفس يعقوب

Look for a friend : أيه متزوجه وعندي ولد وبنت

أبوتميم : ماشاء الله ؟ يتربون في عزك .. زوجك موجود

Look for a friend : موجود ولاهو موجود

أبوتميم : شلون تجي هذي ؟

Look for a friend : زوجي راعي سفريات وروحات وجيات .. ما يجلس في البيت إلا في اليوم ساعه تقريباً بس وبعض الاحيان يغيب أيام

أبوتميم : طيب عندك أولاد وعند زوج ليه تدورين أصدقاء !!!!
Look for a friend : حطيت يدك على الجرح ... لما يكون زوجك ما يدري عن مشاعرك ولا يقدرك يكون هذا الحل

أبوتميم : من يقول أن هذا الحل ؟
أبوتميم : تعرفين شيء .. أنتِ الآن .. تتوقعين أنك تعاقبين زوجك بالبحث عن أصدقاء . والحقيقة أنتِ تعاقبين نفسك .. وتعاقبين أولادك بعد

Look for a friend : أعاقب نفسي وهو معي بعد

أبوتميم : هو ما يدري أنك تكلمين أحد فلذلك هو ما يحس بهذا العقاب

Look for a friend : مصيره يوم يحس

أبوتميم : طيب أولادك ؟ مو حرام يطلعون على الدينا على أم تسوي كذا بيتها ؟

Look for a friend : معليش كتابتي بطيئه شوي عندك مايك

أبوتميم : لا ماعندي عندي سماعات بس ( أنا عندي بس ما أحب أتكلم بالمايك ... )

Look for a friend : طيب أنا أتكلم وأنت أكتب

أبوتميم : على راحتك

أرسلت طلب محادثة صوتية

Look for a friend : السلام عليكم

أبوتميم : وعليك السلام

Look for a friend : صوتي واضح

أبوتميم : يس

Look for a friend : طيب يا الغالي .. إذا كان عندك زوج ومطنشك ولا يعطيك وجه كأنه مأخذ وحده مسيار تتوقع أنا بنكون وفين له

أبوتميم : طيب سؤال ؟ أنت الآن تبحثين عن صديق لأجل تشبعين رغبتك العاطفيه ؟ أو لمعاقبة زوجك ؟

Look for a friend : كلهن

أبوتميم : طيب ليه ما حليت الموضوع معه عن هذي المشكله

Look for a friend : حاولت ما قدرت مايفهم

Look for a friend : تدري .. أول ما أخذني .. كانت حياتي قمه في الروعه وكنا رومنسين مع بعض .. وكان يضحك ويمزح ولكنت أقول يا حضي به .. لكن بعد مرور سنه .. تغير مره مره وأنقلب لواحد .. ما يعرف معنى الحياة الزوجية

أبوتميم : طيب أطلبي من أحد أخوانك أو أهلك يتفاهم معه

Look for a friend : أهلي بعيدين عني يمكن 400 كيلو .. مره كلمه أخوي وقال لأخوي بالعكس أنا دايم عندهم وووو ( وصار يكذب على أخوي )

Look for a friend : وفيه صفه أنه عصبي مره مره مره

أبوتميم : إذا كان هو كذا .. ناظري أولادك ؟؟ يوم من الأيام راح
يعزونك عنده .. فقط المسألة مجرد وقت لين يكبرون ..

( تغير صوتها إلى محزن .. فيه شوي بكاء )

Look for a friend : ما تدري كم حجم معاناتي ... وإذا نظرت لعيالي تخنقني العبره

( صارت تبكي أكثر )

أبوتميم : لكن .. هناك حلول كثيرة ..

Look for a friend : مع هذا الشخص مافيه حلول

أبوتميم : دامك تقول هذا فأعرف أنك ستستمر معاناتك .. لأنك تحط في طريقك عصاة ولا تبغى تفكر كيف تشيلها .. عن طريقك .. يعني راح تكونين في مكانك

أبوتميم : مافيه إنسان على وجه الأرض ما يتغير .. مهما كان قوته وجبروته وزوجك سهل تغيره .. لأني مثل مافهمت كانت أول سنه رائعه بالنسبه لك يعني الرجل يمكن يتغير .. لكن قد يكون هناك سبب على تغيره ولازم تدورينه ..

أبوتميم : ولازم تفهمين أن لكل إنسان مفتاح .. أكيد لزوجك مفتاح دوريه

Look for a friend : طيب أبغى حل .. لا تقولي أقنعيه ؟ أو أرسل أخوانك جربتها معه

أبوتميم : لازم تفهمين أن لكل مشكله لها حل .. بس الذكي وهو إلا يحلها والحلول كثيره جداً إذا الواحد جلس معه نفسه وصارحها وفكر بعقل وليس بعاطفه صدقيني راح تلقيت ألف حل قدامك ..

أبوتميم : طيب عندك استعداد تنفذين إلى أقوله ؟

Look for a friend : عندي مليووووون أستعداد ( طالعه من قلبها من جد )

أبوتميم : أولاً .. الدعاء إلى الله وخاصة في أوقات الاجابه وآخر الليل

أبوتميم : ثانياً ... أبغاك تحطين أولادك بين عيونك وتخلينهم رمز لك أبغاهم يعتزون بك وتكونين أم قويه تعرف كيف تحل مشاكلها مو تزودها

أبوتميم : هذا رقم جوال الدكتور ( ميسره ) وهذا رقم الدكتور ( العنزي ) وهذا رقم الدكتور ( مصطفى أبوالسعد ) كلهم متخصصين في مثل هذي الأمور .. كلميهم .. وصدقيني راح يعطونك حل ..

Look for a friend : طيب بكره بكلم

أبوتميم : لا .. الآن .. الساعه الآن ثمان موجودين بعدين جوال مو عياده ..

( كأنها متردده )

أوتميم : ها أتصلت

Look for a friend : لا .. بتصل ألحين

( كنت أسمع المحادثة صوتها بس لكن الدكتور ما أسمعه )

بدت تشرح للدكتور وهي تصيح حوالي نصف ساعه

Look for a friend : كلمته

أبوتميم : بشري ..

Look for a friend : كلامه روعه وعطاني أشياء فعلاً كنت غافله عنها بس طلب رقم زوجي وقال بكلمه لك .. وعطيته ؟ وش رايك مدري خايفه

أبوتميم : أسمعي .. أكيد هو قد حل مشاكل كثيره مثل هذي ، ويعرف كيف يتفاهم مع زوجك .. لذلك أهل مكه أدرى بشعابها .. وحتى لو ما كلمه .. على الأقل أعطاك حلول ..

Look for a friend : مدري خايفه

أبوتميم : أولا روحي الآن صلي ركعتين وأدعي ربك وطبقي ماقاله لك الدكتور

Look for a friend : طيب .. بروح وأرجع

أبوتميم : الله يوفقك ولا تنسينا من الدعاء

( غابت حوالي نصف ساعه )

صارت ترسل لي إشارة تنبيه ورى بعض ؟؟ وينك موجود ؟؟؟ أنت موجود

Look for a friend : رد علي بسرعه

أبوتميم : شوي شوي ... سلامات ؟

Look for a friend : أتصل زوجي تو .. وقال أنا جايكم ؟ أخاف الدكتور كلمه ؟

أبوتميم : إن شاء الله خير .. أستعيني بالله .. وروحي الان تزيني له وزيني أولادك ولبسيهم أحلى شيء عندك .. وخليهم في إسقباله عند الباب

Look for a friend : طيب طيب بروح الله يستر

أبوتميم : قبل .. لا تروح بقول شيء ..

Look for a friend : تفضل بس بسرعه

أبوتميم : إلا بيصير مكتوب عند الله .. أستعيني بالله .. أبغاك تقول لنفسك أقدر أحل المشكله وأعرف كيف أتفاهم معه .. يعني وش بيصير أكثر من إلا صار ؟؟ جمعي كلامك ورتبيه وتحاوري معه بالكلام الزين بدون أن تستفزيه وحاولي ما ترفعين صوتك عليه .. وإذا شفتيه بدأ يهدى عطيه من الذكريات وإذا شفتيه غضبان ذكريه بعياله ..

Look for a friend : طيب إن شاء الله في آمان الله

أبوتميم علميني وش يصير معك .. الله يوفقك

Look for a friend : طيب أدعلي ..

أبوتميم : ربي يوفقك
بعدها .. أنقطعت الاخبار ؟؟ ما عاد شفتها ذيك الليله جاء بكره ولا دخلت ؟ أنتظرتها ثلاثة أيام .. والحقيقه كنت خايف قلت يمكن صار لها شيء .. بعد أسبوع تقريباً .. لقيت رساله على الايميل عنوانها أبوتميم أنا فلانه أدخل

فتحت الرساله لقيت مكتوب في الرساله

( أبوتميم السلام عليكم ورحمة الله وبركاته ..
ما أدري وش أقول لك .. تراني أدعي لك في كل صلاتي ..
وأنا أكتب لك هذي الرساله وأنا أبكي .. فقد كلم الدكتور زوجي وتكلم معه حوالي نصف ساعه ثم أتصل
علي الزوجي وقال لي الآن في الطريق .. بعد ما أغقلت المحادثة معك أتصل علي الدكتور .. وعلمني
وش قال لزوجي وعلمني وش أسوي .. الحقيقه .. دخل مثل الاسد ... بجبروته وغضبه .. قلت في نفسي
وش بيسوي يعني مافيه أكثر من إلا صار .. أول ما دخل قالي من سمح لك تكملين دكتور .. قالت له
أنت .. شف حياتي .. وشف حياة أولادك .. كأنهم أيتام .. مالهم أب .. أخذتك عن قناعة .. بيت مافيه رجال
مثل الخيمة بلا عمود ... بعدها .. هدأ شوي .. وأخذنا نتناقش وذكرته بأيام شهر العسل حتى وصلنا لحل ..
أنه ما يطلع من البيت واجد وأنه يجلس مع أولاده ويطلع بنا نتمشى مثل الناس .. وأنا أتزين له وألبس له
أفضل شيء وأخدمه .. وأسولف معه وأشوف وش محتاج وأشاركه همومه .. وأهتم بعياله ..عشت
الأسبوع هذا أحلى من أيام شهر العسل صدقيني كان حلي أني أبحث عن صديق أكبر خطأ مر علي في
حياتي ..
أبوتميم ... إذا أنت متزوج أو ناوي تتزوج .. تكفى لا تخلي زوجتك يصر لها مثل ماصر لي .. أعطف عليها ..
وأشبع رغباتها العاطفيه .. تذكر أن لك أخت ولا تبغى زوجها يهينها .. عز أولادك وزوجتك .. لا تترك عندهم
فراغ .. وقل لزوجتك .. تزيني لزوجك .. وأهتمي بمضهرك وخلي كلامك معه نعومي وأهتمي بمضهر
أولادك .. خليهم يشوفون أبوهم أنه أفضل أب في الكون .. وأمهم أفضل أم في الكون ...
أتمنى أنك تحذف إيملي من الماسنجر .. وتذكر أنك لك أخت أسمها أم فهد تكفى .. أدع الله يثبت الامور على كذا .. ولا تنساني من الدعاء
أختك أم فهد ... )
أنتهت الرساله ..

( هذه القصه من نسج خيالي .. كتبتها لكم بأسلوب بسيط حتى تعيشون واقعية القصه وأوصل رساله للمعنين بها ... )

( قد يكون هناك حلول كثيره .. ولكننا لا نبحث عنها .. بل نستخدم عاطفتنا قبل عقولنا .. )
أخوكم أبوتميم

الموضوع الاصلي من روعة الكون

king-ropen · 17-09-2007, 11:21

هـــــدى · 17-09-2007, 11:47

عابر بلا أثر · 17-09-2007, 12:47

حالة وله · 17-09-2007, 01:30

سارة الحزن · 17-09-2007, 01:51

أبوتميم · 17-09-2007, 02:06

امبراطور جدة · 17-09-2007, 04:23

هـايـين · 17-09-2007, 04:41

ProfessionaL · 17-09-2007, 04:51

المواضيع المشاب
الموضوع	الكاتب	المنتدى	مشاركات	آخر مشاركة
معرفت الماسنجر.	ليلة وداع	مــنــتــدى الماسنجر والايميل	0	10-12-2007 10:06
بعض خفايا وأسرار الماسنجر	بحر الاحلام_	مــنــتــدى الماسنجر والايميل	9	21-11-2007 09:23
تعلم الماسنجر .. من الألف إلى الياء	بنت عز ما تنهز	مــنــتــدى الماسنجر والايميل	11	12-11-2007 06:01
الماسنجر واسراره وخفاياه	شفـ ـ ــاوه	مــنــتــدى الماسنجر والايميل	12	11-08-2007 11:36
خفايا الماسنجر	#الفجر البعيد#	مــنــتــدى الماسنجر والايميل	6	10-08-2007 01:30

قصتي مع إضافة جديده على الماسنجر ... حقيقه وقعت لي أنا محدثكم أبوتميم

الــمــنــتــدى الــعــام