عيدنا باقي صيامــــــــه ،

العيد قرب


وباقي ايام قليله



ابي انتهز الفرصه واقول كل عام وانتم بخـير
وعاده الله علينا بالخير والهناء والمسرات
قصيده ، تحكي شعور خاص ، بس الاكيد
تعبر عن احساس انسان ،


اترك لكم الحكم


والمتابعه

..


من يقول ، الجرح يبرى ، دامها جروحً تدامه
ـــــــــــ هذه جروحي ، تدامى لعنبــوها من جديــــد

والله اني قد كرهـتك ، ياعيــوني والسلامه
ــــــــــ جعل فالك للعمـــى ، مادامها دمـوعك تزيـد

وش بقـالي ، مابقالي ، غيـر ( اهً ) في كلامه
ــــــــــ راحـت سنينً ، جفتـني ، وعادت الدنيا تعيد

ادري والله ، من قراني يبصم العشره بهامه
ــــــــــ شاعرً واسع خياله ، يصخر احروفه تسيد

والله انه ، ماعرفني ، مير ياقلبــــــي علامــه
ـــــــــــ انحت حروفك لانه مابقى فيني سعيــــــــد


كلي احلام وتشتت ، أه يادنيا ،، اليتامـــــــه
ــــــــــ وطلفةً ، صاحت بجنبــي ، وادري والله وش تريد

صاحت ، بصوت اليتامي ، ماما ، يامامه يامامه
ــــــــــ وصارت عيوني سحابه ، وكني بالعالم وحيد

ياقوافي ، اسعفيني ، طال ليلك في ظلامـه
ــــــــــــ ابتدينا ، وانتهينا ، وابتدينا ، ومايفيــد

يامحمد ، كيف حالك ، والجمل عالي سنامه
ــــــــــ اترك اللي قد كتبته وعطني علوم الرصيد

خلها جروحي ، ولا لك بـ حزني الي صار هامه
ـــــــــــ ولايهمـك لو سرحت ، وصارت انفاسي شديد

وطالبك ، لاعاد تسئل من ملك قلبي وضامــــه
ــــــــــــ والله انها بنت شيخً والوفاء فيها شهيد

مير هالدنيا ظروف ، وظرفها قاسي ملامــه
ــــــــــــ والوعد بيني وبينـــه عن وفانا مانحيـــد

ايه احبــه ، ايه احبـه ، وعايش احساس بغرامه
ـــــــــــ نجمة سهيل اليماني ، وحولها نجومً عديد

الوعـد / من راس شيخً دام هالدنيا سلامــــه
ـــــــــ انك انتي ، ايه انتي عرش بلقيس الاكيـــد

وانك انتي ، من كتبها ، عصرنا عـشق بـ وسامه
ـــــــــ وفلسفة ( بيرون ) جت لك ، كنها ساعي بريد

ولو عرف مجنون ليلى ، صرتي ليلى في هيامه
ـــــــــــ وافلاطونً ، في كتابه ، من صفاتك يستفيد

مير انا جيتك ، مشاعر ، وبدويً في شهامه
ـــــــــ عاشقك ( عشق بدويً ) وسط دمي كالوريد

عشق ابن عدوان ، وضحى ، وعشق ابن عجلان دامه
ــــــــ فالبدو يذكر وفائهم ، باذكرك واكتب قصيد

والختامه ، جعل ربي يحفظك ياعين مامـــــه
ــــــــــ والهدايا ، توى باقي عيدنا وارجع اعيد

يارغد ، ياراس مالي ، عيدنا باقي صيامـــــه
ـــــــــــ وكل عامً ، في وجودك ايه انا ابقى سعيد

عاد عيدك ياحياتي ، دام هالدنيا ســــلامـــه
ــــــــــ واذكـري بنتً تحبــك ، شاريه فستان عيد

وسلامت عيونكم

الموضوع الاصلي  من روعة الكون