تــنــحط على الجـرح يبرى <<< قصة رووووعة

--------------------------------------------------------------------------------




فيصل:الي تقوله مقدر عليه
خالد:يافيصل ماودي اخسرك انت اخوي اكثر من انك صديقي
فيصل:بس الصراحه شاريها وابيها
خالد:والله حاولت معها ياخوي وهي مارضت البنت معنده وبصراحه قالت لي كلام احسه طالع من قلبها
فيصل(وهو عاقد حواجبه):وش قالت
خالد(نزل راسه):تقول كانت مغصوبه وماحبت تكسر بخاطري وترفضك
فيصل(منصدم):ليه انت غصبتها
خالد:لالالا وانا اخوك مستحيل
فيصل:اجل وش هالكلام
خالد:من الاخر هي ماتبيك ومافي حل غير الانفصال وخلاص ماعندي كلام غيره
فيصل:حاول مرة ثانيه
خالد:حاولت بشتى الطرق لكن البنت عنيده وانا مقدر اغصب اختي على شي
فيصل(عصب):مستحيل اطلقها
خالد(بهدوء):فيصل طلقها بهدوء وبدون فضايح
فيصل:قلت لك مستحيل
خالد:لاتخليني يافيصل استخدم اسلوب ثاني معك خلاص الانفصال هو الحل
فيصل(بسخريه):وشو الحل الي بتستخدمه معاي
خالد(وهو قايم):انت ادرى وورقتها توصلها باقرب وقت
فيصل(قام معاه):بس انت ماترضى الفضايح لاختك
خالد:وانت بتطلقها بدون فضايح
فيصل:بس كذا تحمل اسم مطلقه وانت ماترضاه لها وغير كذا انا صديقك ومايعيبني شي وتعرفني ليش تبي تحطمني مو تقول اني اخوك
خالد:والله يافيصل ان حاولت معها وغير كذا اكيد مااتمنى لك الشر واحبك وبتم علاقتنا وبنتم اخوان وانا كان بودي اعرف السبب بس ماعرفت وانا كل شي ولااغصب خواتي انا اعتبر ابوهم ومسؤول عنهم من بعد وفاة الوالد الله يرحمه
فيصل:الله يرحمه بس
خالد:فيصل انا اكثر واحد اعرف ريم وقرارها مابتتنازل عنه مهما كان خلاص لاتحاول وقلتلك خواتي عندي بالدنيا وابوي الله يرحمه وصاني عليهم وخلاص انهي هالسالفه وطلق
فيصل:شلون يهون عليك اختك تتطلق
خالد(وهو منزل راسه):وانت على بالك مستانس الا ماقدرت انام الليل كله وانا افكر بمستقبلها ومصيرها وافكر بقرارها الي طلع فجاءه لكن مستحيل اغصبها
فيصل:خلاص فهمت وانشالله خلال هالايام بتوصل الورقه
وطلع فيصل وتنهد خالد ماكان يبي يكون بهالقسوة معاه وبنفس الوقت ذيك اخته بس قال بنفسه ان من يرجع البيت بيكلمها يمكن تعدل عن قرارها وبجرب حظه التفت لفيصل صديق عمره الي كان واقف يكلم واحد شكله يعرفه طالعه بنظرات حزن وحس ان لازم يكلم ريم خصوصا ان ماعندها عذر حتى تنفصل عن فيصل
.................................................. ............
عبدالله(بابتسامه):ياهلا والله شخبارك رنا
رنا(وهي منزله راسها):تمام انت شخبارك
عبدالله:من شفتك صرت بخير
رنا(تذكرت اللي صار لها منه وحست بغصه بحلقها هو انتبه لها وكأنه عرف بشنو هي تفكر قرب منها وجلس جنبها وقال):زعلانه للحين يالغاليه
رنا:لو زعلانه ماكان طلعت لك بس
عبدالله(ابتسم):بس شنو
رنا(نزلت راسها وحاولت ماتبكي):مابيك تتزوج
عبدالله(حس بالدنيا تدور فيه ومو عارف شيقول):اذا تبين من بكرة اكنسل كل شي
رنا:وعمي لا مستحيل
عبدالله:بس ولازعلك يالغلا
رنا:مقدر اشوفك مع غيري
عبدالله:بس انا مابكون غير لك ياعمري
رنا:وشلون وانت بتتزوج
عبدالله:بس بتبقين غير
رنا:شلون وانت بتكون (وبغصه):بحضنها
عبدالله:انا مابتزوجها الا عشان امي يعني اعرفي مابينا علاقه بس الاهم انتي تحبيني
رنا(ابتسمت):لو مااحبك كان ماشفتني الحين قدامك
عبدالله:وانا كذا ابيك
.................................................. .............
ريم:يافيصل قلت لك مستحييييييل
خالد:بس انتي تطلبين الطلاق عشان شي سخيف
ريم:اني ابي اشتغل هذا شي سخيف هذا حلمي ومني متنازله عنه بسهوله
خالد:وفيصل
ريم(نزلت راسها وحاربت دموعها عشان لانزل):الي بينا انتهى
(وطلعت تركض ودموعها سبقتها اما خالد هز راسه بأسى ومستحيل يوقف بوجه اخته وطلع يقول لفيصل القرار الي ممكن يدمره)
.................................................. ...............
هديل(وهي تصارخ):ريم مستحيل انتي تحبين فيصل لاتقعدين تتغلين زياده خلاص ارجعي له
ريم:لاتصارخين علي ومو انتي الي تأمريني انا خلاص خذت قراري ومني متنازله عنه
هديل(قربت وجلست جنبها وبصوت حنون):بس هذا فيصل
ريم(وقفت):وانا ريم
هديل:ريم والله انه يحبك وشاريك ومشكلتك تنحل بسهوله وغير كذا الصراحه احسها تاف
ريم(بألم):لاياهديل لما تكونين تبين تحققين حلم من صغرك ويوم كبرتي وتقدرين تحققينه ويجي احد يخربه عليك مو شي تافه ولما تنهان كرامتك هذا شي مهو تافه
هديل:بس انتي قلتي انك تنازلتي
ريم:أي تنازلت اني اشتغل واكون مديرة لمعرض بعد مارحت لدكتورة بالجامعه واعتذرت ان مابي اشتغل بس الحين معنده وابي اشتغل تدرين ليش
هديل:ليش
ريم(وهي تدمع عيونها):لان فيصل قهرني حاولت اراضيه بشتى الطرق ولانفع معاه واهان كرامتي كل مااتصل قفل بوجهي وارجع اتصل وبعدين يمل مني ويقفل الجوال اسكت واقول عادي انا احبه ولما ارسل له رسايل اترجاه فيها يسامحني وماكنت القى غير الجفا من ناحيته وانا ماعدت اتحمل ومااقدر اكمل خلاص
هديل(بمزح):طيب اضغطي ستارت وبعدين كملي
ريم(ماقدرت ماتضحك وبعدين طالعت هديل وقالت):انا اكلمك بجد وانتي تقلبينها مزح
هديل:والله مو قصدي بس ابيك ترجعين لفيصل تكفين
ريم(بعناد):لاء والف لاء
هديل(بتوسل):ريم عنادك بيوديك بداهيه والله مو كل مرة تعاندين
ريم:لا هالمرة واثقه
هديل:سوي الي يريحك الكلام انتي معاك ضايع
بعد ماطلعت هديل ريم حست بشوقها لفيصل ودها تكلمه تشوفه بس قاومت هالرغبه بس المشكله تحبه وماتقدر تتخلى عنه بس خلاص طفح كيلها وتبي توريه من ريم .................................................. ..............
امل(بصدمه):طلقتها
فيصل(بحزن واضح):أي
امل:مستحيل كان انتظرت
فيصل:ياامل خلاص يهون عليك اخوك هانتني كم مرة ودخلت اخوها وخلاص انا ماانكر اني احبها بس هي تبي هالشي ولاني احبها سويت الي يريحها
امل(وهي تبكي):بس يافيصل كان انتظرت عليها لو شافتك انك متمسك فيها كان بتلين بس ليه استعجلت
فيصل:خلاص ماظنتي بتلين والي بينا انتهى (وبتردد وغصه):والله يوفقها مع غيري
امل(وهي تشهق من الصياح):مستحيل ريم لغيرك مستحيل
(ضمها فيصل وهو يفكر شلون بتكون حياته مع غير ريم ... ريم الورده الي عطرت حياته بوجودها ريم الي من يسمع صوتها يحس بسعاده مالها مثيل ريم الي صدى ضحكتها للحين يتردد بأذانه ريم وريم وريم مابيوقف وهو يتكلم عن ريم بس خلاص كل شي انتهى وهذا الي تبيه وهو مايقدر مايحقق طلب او امنيه لريم)
.................................................. .............
ريم(وهي تشهق من الصياح وتصرخ وتبكي بقوة):ابي فيصل ابيه مابي غيره (وتمت تصيح على هالحاله وماكانت تبي احد يشوفها او يكلمها كانت تبي تبين لهم انه مو هامها خصوصا ان هي الي طلبت الطلاق)
.................................................. ...............
هديل(وهي تكلم نفسها):كنت داريه ياريم انك تبينه بس الله يهديك ويفك عنك هالعناد الي مابيجيب لك نتيجه
.................................................. .............
عبدالله:شفيك رنا زعلانه
رنا(وهي تحس انها بتموت):اليوم ملكتك عليها وتبيني افرح
عبدالله(انصدم):اليوم
رنا:أي لايكون نسيت
عبدالله(بألم):تصدقين نسيت احد يكون مع رنا وماينسى بس الله يصبرني على هاليوم
رنا(وشوي وتبكي):عبدالله مقدر اشوفك مع غيري
عبدالله:انا لك ومابكون لغيرك لاتخافين
رنا(ودموعها نزلت):لابتكون لغيري بتكون لي ولمها وانا مابيك لغيري ابيك لي انا وبس
عبدالله(وهو يمزح):وش هالانانيه
رنا(وهي تبكي):انانيه اني احبك
عبدالله:لا يالغلا امزح بس حبيبتي قلتلك علاقه بينا مستحيل بتكونين دوم بالقلب ومابتتغير مكانتك يالغلا
رنا:مابتتغير بس بيكون لمها نصيب
عبدالله:مها مابتكون اكثر من انها بنت خالتي اما انتي حبي وعمري وحياتي كلها
رنا(ضمته وهو خذها بحضنه بقوة وتمت تبكي لعل دموعها تنسيها شوي من الامها اما عبدالله حاس بهم ثقيل على قلبه اليوم ملكته مو مصدق الله يسامحك يايمه الله يسامحك على الي سويتيه فيني وانا مو ذابحني غير دموع رنا مقدر اشوف دموعها ومااسوي شي مقدر)
رنا(وهي تصيح):عبدالله مقدر اشوفك تنزف لغيري مستحيل
عبدالله(بحزن):خلاص يالغلا دموعك غاليه علي وكل دمعه من دموعك تجرحني مليون مرة شوفي انتي كم مرة جرحتيني

الموضوع الاصلي  من روعة الكون