قصه حقيقيه بمستشفى راشد في دبي محزنه وتدل على عظمته سبحانه

--------------------------------------------------------------------------------

السلام عليكم ورحمة الله وبركاته

هذي قصه حقيقيه مؤثره قرائتها من منتدى
وحبيت انقلها لكم وان شاء الله تعجبكم..

والله انها اكثر من مؤثره


قصة حقيقية حصلت في مستشفى راشد (دبي)
في يوم الاثنين

الموافق 7-1-1986

الساعه 7:15 الصبح



المكان

مستشفى راشد في دبي



طلعت الممرضة من غرفة الولادة و شافت علي قاعد على الكرسي

ويدعي ربه أن الولادة تتم على خير

يت الممرضة قدامه

الممرضة : "..sir.. mabrook .. you got aboy .."

(مبروك ياك ولد)

علي من الفرحه شوي و بيطير من مكانه

اخيرا ربي رزقني بالولد

الحمد لله و الشكر

شاف علي ولده و استانس و فرح و سماه محمد

في الغرفة

علي : " الحمد لله على السلامة يا أم محمد"

ام محمد : "الله يسلمك .. أخيرا تحقق الحلم ويا محمد "

>

وتموا يرمسون (يتكلمون) عن احلامهم في المستقبل

محمد من يوم هو صغير

كان يجنن والممرضات متخبلات عليه



اليوم الثاني

الصبح الساعه 9

دخلت الممرضة تنظف الحجرة

محمد كان في المنز قدام امه

والام شبه راقده (نايمه)

الياهل مثل كل اليهال وهم صغار

توه راضع و زاع (استفرغ)

الممرضه يوم زاع (استفرغ)

شلته و حطت بطنه على ايدها و قامت تضربه على ظهره

ام محمد فزت من النوم و فتنت عليها و شلت الولد

ما مرت دقيقتين الا محمد يزوع (يستفرغ) مره ثانيه

بس هالمره الزواع لونه وردي

مش طبيعي

زقرت (نادت) ام محمد الدكتور و خبرته

شلو عنها محمد و راحوا

و عقب شوي جاها الدكتور و قال لها تطمني

بس قلب الام

ام محمد على طول اتصلت في علي وقالت له تعال المستشفى

علي كان رايح العين

لانه يداوم هناك

و كان على اساس ان ام حرمته (زوجته) بتسير تيلس عندها

قالت له ام محمد

الحين ترد

ما تسير

رجع علي باسرع ما يمكن

و صادة رادار في الطريق صورة

من وصل المستشفى خبرته ام محمد بالسالفه

سار يدور الياهل

ما لقاه في الحضانه

طلب الدكتور و يوم يا قال له وين ولدي

الدكتور : " ابنك موجود ..ما تخفش.. مافيش اي حاجه "

بو محمد رد الحجره و يلس ويا حرمته يتريا يجيبون الياهل

عقب شوي دخلت ممرضه تصيح

هالممرضه كانت الوحيده المسلمه في هالقسم

علي: " .. خير شو فيج ؟؟"

الممرضه : " بابا... مال انته بجا واجد تعبان... ممكن موت .. كلش دم يجي من هلج مال هو .."

ام محمد من سمعة هالرمسه (هالخبر) اظلمت الدنيا في عينها

و يتعافدن (يركضون) الممرضات ينعشنها

بومحمد سار عند الدكتور و قبضه من رقبته

وقال له الحين ابا اشوف ولدي و لا تراني باجتلك (بقتلك)

و عقب بو محمد عرف السالفه كلها

و الصدمه



محمد عنده نزيف داخلي--- ثقب في الحجاب الحاجز للقلب



علي : " ... دكتور .. ولدي بيموت وانتو مخبين علي.. شو ممكن نسويله الحين.."

الدكتور : " الصراحه ما اعرف شو اقول لك... نحنا ممكن نسويله عمليه نلحم فيها الحجاب الحاجز.. بس نسبة النجاح فيها 3% "

علي :" لا حول ولا قوة الا بالله العلي العظيم .. حسبي الله و نعم الوكيل "

مرت الايام

و علي مب عارف شو يسوي

شهر مر و محمد عايش على الاجهزه

ابو علي قال له خلنا نسفره برع

بس المشكله ان حالته ما تسمح بالسفر

الدكتور طلب يقابل علي



علي :" دكتور طلبتني ..."

الدكتور : " هي نعم ... يا علي حالة ولدك صعبه و نسبة نجاح العمليه تكاد تكون معدومه .... شو رايك تتبرع بولدك لخدمة الانسانيه و نحن عندنا خبير الالماني يبا يجرب علاج جديد للقلب.. فشو رايك تتبرع لنا بولدك"

علي شو وكان بيقتل الدكتور

بس الدكاتره الباقين قبظوه

اليوم الثاني سائت حالت محمد

الساعه 2 في الليل اتصلوا المستشفى و قالوا ان النزيف اشتد و لازم نسوى العمليه خلال 6 ساعات ولا الولد بيموت

بو محمد يالس على نار

اتصل به ابوه و قال له لا تسوي العمليه

بنحجز طياره طبيه خاصه و بنطرشه برع يعالج

علي قاله لا

انا بستخير و بشوف

بو محمد استخار ربه و قرر يسوي العمليه

الساعه 6:15 الصبح محمد داخل غرفت العمليات

و امه يالسه عند الباب تصيح و تذكر ربها

الساعه 7 ..... ماشي خبر

الساعه 8 ... ماشي خبر

الساعه 9 ... طلع الدكتور و قال الحمد لله لحمنا الحجاب الحاجز و القلب بعده يدق بس باقي نسكر مكان العمليه

ام محمد الله سجدت لربها شكر في الممر و تمت تصيح

رجع الدكتور غرفت العمليات

الساعه 12:30 طلع و وي كله عرق

و نظراته حزينه

قال حق بومحمد : " للاسف اخ علي ... من عقب ما سكرنا الجرح و قف القلب..."

بو محمد : " لاحول ولا قوة الا بالله .. اللهم اجرني في مصيبتي و اخلفلي خيرا منها..انا لله وانا اليه راجعون "

الدكتور تعجب من ردت فعل علي و توقع انه يصيح و يولول

ام محمد : " لا حول ولا قوة الا بالله.. بس لا ... ولدي ما مات.. انا متأكده "

الدكتور : " انا اقول لج قلبه و قف تقوليلي ما مات "

ام محمد : " انت ما تعرف شي.. انا في داخلي شعور يقول لي و لدج حي .. و انا مؤمنه بربي و متأكده انه ما بيخذلني"

ما لحقت ام محمد تخلص كلامها الا النيرس طالعه تصارخ

"his heart is beating again... i cant believe it"

(ما اقدر اصدق ... قلب الولد رجع يدق)

الدكتور ما عرف شو يقول

تم يطالع ام محمد اللي كانت متغطيه من راسها لين ريلها

و يقول في خاطره : " من وين لها كل هالقوه و الصبر"

( عقب بتعرفون كيف عرفت اللي في خاطره )

رجع الدكتور غرفة العمليات

و تم فيها 3 ساعات

قلب محمد يدق و عقب يرجه يوقف

عقب ما خلصت العمليه و استقر قلب محمد

نقلوه غرفة العنايه المركزه

الحين عمر محمد شهر و نص

بعد 3 ايام فتح محمد عينه

طبعا من عقب العمليه كان ممنوع حد يدخل عنده

حتى امه



يوم فتح محمد عينه فرحت امه

و بطلت شنطتها و ما خلت فيها شي

فلوس و ذهب

كل شي وزعته

و تمت تشكر ربها على ان ولدها فتح عينه من اول و جديد

بس الفرحه ما تكتمل

اليوم الثاني ياها الخبر

و الله محمد عنده تسمم بكتيري في الدم

بسب تلوث شي من المعدات اللي استخدمت في العمليه

بس تمت صامده

وكان محمد كل يوم يغيروله دم 3 مرات

ذبل و شحب

و امه صابره

بعد 3 اسابيع شفي من المرض

وبعد ما طلعوه من العنايه المركزه

ام محمد يالسه في الحجره تطالعه و تقرا عليه

و تطالع آثار العمليه اللي في بطنه

دخل الدكتور الالماني

يلس الدكتور وقال حق ام محمد ممكن اكلمج في موضوع خارج شغلي

ام محمد تمت ساكته

قال لها : " انا ابا اعرف انتي شو اللي كان مثبتنج و مخلنج تصبرين كل هالمده "

ام محمد : " و هي ماسكه المصحف في يدها .. ربي و هذا.. وانا كنت واثقه ان ربي ما بيخذلني و قرءة له الآيه اللي تقول : "وقال ربكم ادعوني استجب لك " و قالت له ان اللي يتوكل على الله خلاص ما يهمه شي"



الدكتور ما علق و طلع من الحجره

اول ما وصل علي يا الدكتور وقاله ابا ارمسك في شي خصوصي شوي

علي طلع وياه الممر و قاله تفضل



الدكتور : " ممكن اعرف ليش حرمتك جيه متغطيه ... حتى شو لونها ما يبين "

بو محمد : " انا بقوللك ليش ... نحن عدنا الحرمه مثل الجوهره الثمينه .. لازم نغطيها و نحفضها من عيون الناس و تكون حق صاحبها و بس "



الدكتور : " والله ان هذا هو اكرام الحرمه ... بو عبدالله انا قررت شي .. و ابا اقول لك اياه"



بو محمد : "قول"



الدكتور : " أشهد ان لا اله الا الله و ان محمد رسول الله "



بو محمد : " الله اكبر .. الله اكبر"

و اسلم الدكتور من ورا قصة عبدالله و امه



هذه قصة حقيقيه

محمد الحين عمره 18 سنه

وهوطالب في جامعة الامارات

يدرس في كلية الاداره

مع ارق واعذب تحيه معطره للجميع ..

الموضوع الاصلي  من روعة الكون