قصيده لمن تزوج ثنـــــــــــين

بن هاشم يقول في العشقة
ماشفت رحمة ولا شفقة
والكذب ما يفيد والسرقة
قالولي الناس خذ ثنتين


لنته تبى راحة الدنيا
والنقش باتشوف والحنا
في اليد اليسرى واليمنى
شفهن في البيت يتمارين


واحسبت ذا الشور ينفعني
ولعاد فكرت في عقلي
ما حسبت ذه باتعذبني
ورجعت مبهوت في امرين


الأوله منهن حنقت
لاجيت حصلتها تزنت
وإن كان كلمتها تسكت
ولعاد ترفع دفوف العين


ظلت في البيت مسنوده
تكحب وتعطس وماروده
لابد من الشرك مكبوده
والدمع يسكب من الخدين


وقلت مالش كذا مالش
وايش الذي كان في بالش
او شي كدر زاد في حالش
قالت سبب انته بو وجهين


هبيت دوّرة لك حرمة
تعصد بنا في وسط برمة
ولعاد عبرت لنا اللقمة
والنوم جنب دفوف العين

وقلت بالله خلينا
لاجيت في البيت تأذينا
وانتي من اول تحبينا
واليوم قد جبت لش ثوبين

قالت ثيابك مسكهن لك
ما زال هذك معك عادك
ما بغيت جودك ولا احسانك
يكفي قضيت السلف والدين

يابو علي ما يجي منك
من هو على الشور ذا دلك
جبت التعب انت من نفسك
هذا جزا من لقى ثنتين

وقلت هذه معي قدها
ولعاد اقدر نطلقها
كلين تجلس بحشمتها
والجبر لش والكلام الزين ( مع الاوله)

جات الجديدة تعاتبنا
قالت بعد لا تقاربنا
يومك تحب ذي وتاخذنا
والله ماصبر على قهرين

الا على شرط عاهدنا
لاجيت في البيت سامرنا
ونزور سيؤن والغنا
ونعود لمجمع البحرين

وان باتقسم عدل القسمة
والدين سلمه والذمه
لانته تبي توفي الكلمه
ليله لها واعطني ليلتين

قدها معك دوب شبعانه
تظلي تجود وفرحانه
ذلا من الكذب حنقانه
تبغى النكد بيننا لابين

وقلت ماهو سواء منش
صح ما تخافين من ربش
تبغين زايد على اختش
احسن لكن يوم تتراضين

وانتم سواء زهرة عيوني
ما بغيت في البيت تأذوني
لا نتم بنيّة تحبوني
ما كان في البيت تتخازين

محروق قلبي لكن حرقه
وايش الزعل وايش ذي الحنقة
بيّت مقولط على السلقة
والفرش بينكن لابين

لابد هذه علي نقمه
من بعد ماكنت في نعمه
والمسألة بيننا كلمه
لي با تفرق مابيننا لابين

با سكن وبارجع على العاده
با كون سيد من الساده
ما بغيت ناقص ولا زياده
والعفو نطلب من الجانبين

والختم صلوا على الهادي
المصطفي خير الاجواد
عداد ما ترنم الحادي
تغشى محمد حبيب العين
وسلامتكم

الموضوع الاصلي  من روعة الكون