مجموعة قصائد للأمير المبدع // البدر بن عبد المحسن

بسم الله الرحمن الرحيم


السلام عليكم و رحمة الله و بركاته


أسعد الله أوقاتكم بالخير و المسرات


أقدم لكم اليوم مجموعة من قصائد الأمير المبدع (( مهندس الكلمة )) بدر بن عبد المحسن ... و أتمنى أن تنال على إعجابكم ...


إليكم القصائد :.


...............


خطأ..

تبخل .. وأنا كلي عطا..
خطأ ..
ضاعت على الدرب الخطى ..
خطأ ابتدينا ..
وان نهيناها .. خطا !!
تزرع طريقي .. بالألم..
يا خوفي .. لا توطاه القدم ..
تجرح ظلايل.. فيتك ..
وتدمي ..أماني جيتك ..
لو فرحت.. بجيتك !!
بعد الظما.. وبعد الهجير ..
تخفي حنانك .. بالضمير ..
لو ما جنت ..
عينك علي بنظرةٍٍ .. لو ما جنت
ولو ما رضيت .. تحدني ..
روح الشقاوي .. ما عنت ..
واستهونت درب الهوى ..
ولو ما غدى جرحي دوا ..
ليته غدا..
عودتني منك الحنان .. عودتني
وطال النوى وجار الزمان .. صبرتني ..
وإثر الهوى .. مثلك غريب ..
ماله .. على نفسه حبيب ..


............

الخل العنيد

تل قلبي .. تل طيرٍ على طلعٍ وكيد
جود المقرود سبقه وعيا يطلقه

يوم فاع اركى جناحه على قاسي الحديد
وانكسر ريش النداوي ولا الله وفقه


يكفخ القلب المشقي على الخل العنيد
ما وفا بالعهد لا شك قلبي صدقه


واهني اللي على الحول ينبت له جديد
وش سواة اللي جناحين قلبه محرقه


يا لطيف الروح وبحق خلاق العبيد
اكرم المملوك بالوصل والا فاعتقه

..................

سألتنـي


قالوا سألتي .. عني سألتي ..
وأنا ما ادري ويني .. ضايع ياعيني ..
ما ادرى وش اللي ذكرك ..
مقطع شعر في دفترك ..
والا الكلام عن صاحبك ..
وانت عقدتي حاجبك ..
قلتي كلام كله كذب ..
وليه اتصلتي .. عنى سألتي؟
آخر لقانا في الخريف
تذكري الثوب الخفيف
والبرد .. يوم خفتى علي من البرد..
وامطار الخريف..
ومرت سنة يمكن سنين
ويني أنا ووين السنين؟
قلتي كلام كله كذب
ليه اتصلتي.. عني سألتي ..
صوتك طيور مهاجره ..
مرت في قلبي مسافره ..
والحب .. لو طال الغياب اول مداك وآخره ..
غيبي سنه والا سنين ..
بااجيك انا .. والا تجين ..


.........................


العطش


آه ..يا العطش
جفت اشفاهي
وصوتي الواهي ارتعش
لو حبيبي ما .. ما سقاني الما
لو شربت أظما لحبيبي .. وللعطش

يا سموم القيظ ..جفت عروقي
تحتي الرمضا..واللهب فوقي
والعطش شوقي .. وشوقي للعطش
اسقني عيونكحبيبي .. أو أموت
ما ابي رمشك نعش

يا وسامي الحب ..امطري في القلب
الزهر والعشب ..قلبي يا مطر
الظما .. والجوع .. بعدك .. والدهر
لو حبيبي ما .. ما سقاني الما
لو شربت أظما لحبيبي .. وللعطش

........................


طيـف

نامت الشمس .. واستيقظ عناي
حال دون الكرى طيفٍ ضوى

ساعة أقبل نطحته من عماي
وصحت يا سيدي .. طال النوى


أحسب إنك معي ليتك معاي
يوم ضميت بيديني الهوى


يا بعيدٍ عليه انزف دماي
لاقضى الصبر .. ولا الشوق ارتوى


نبتة الدم .. تورق في حشاي
من سببها ترى حالي ذوى


وين أنادي ومين يسمع نداي
صرختي فيك .. وسكوتي سوى

...............................

سيـدي قـم


سيدي قم...
ما خبرت اللي يحب يشتهي النوم
سيدي قم...
لاتنام وفي السماء باقي نجوم
يا جريح البارحه
كيف طبت اليوم
سيدي .. يا سيدي قم

سيدي ...الليل للعاشق نهار
قم معي ... نجمع نجوم الظلام
سيدي ... لو عرفت الانتظار
ما غفا لك جفن .. .يا عذب الكلام
اه لو تدري الهوى والسهر مقسوم
يا جريح البارحه
كيف طبت اليوم
سيدي .. يا سيدي قم

سيدي ... لا تناظرني بغضب
ودي تحس مثلي بالغرام
سيدي ... ما وراك الاالتعب
ليت عيني مثل عينك تنام
اه لو تدري الهوى والسهر مقسوم
ويا جريح البارحة كيف طبت اليوم
سيدي .... يا سيدي قم


.............................

شـاعـر


أحبك ..آهـ انا ياليت قلبي .. شعلةٍ من نور
كريمٍ مثل شوق النظرة اللي تسكن أهدابك

أحبك وش بقى مني حطام العاشق المغرور
وما أظن الزمان اللي مضى يرجع من اسبابك


ولكن صدقيني الصدق في هذا الزمان شعور
يحبك من صدقلك مرةِ ما همه عتابك


أمانه لا تصبين العمر في كاسي المكسور
يضيع العمر ما يبقى سوى الإبهام وانيابك


ابد ما هو قصيده كتبهـا لك شاعرٍ مشهور
ٍولا هو وردةٍ يذبل ورقها في داخل كتابك


ولا هو بسمةٍ صفرا على شفاة موات بور
وملامح صورةٍ تخفينها حتى عن اصحابك


الا يا طفلتي ماهو الهوى هالشارع المهجور
ولا هو ريحة غبار الوعد في اسفل ثيابك


كذب من قال ورد العاطفه ينبت بظل السور
وجبان اللي يخاف الناس لو وقف على بابك


كتب لك كل مافي الحب من عذب الكلام سطور
و لكنه عجز يا طفلتي لا يكتب كتابك


..............................

السهر والخـوف


نبي .. نطفي قمرنا ..
لو يعذبنا السهر .. والخوف ..
نبي ننثر قهرنا .. يا حبايبنا ..
على مد النظر .. والشوف ..
نبي ننزع من أعماق الحشا سكين ..
نبي ننزف حنان العاشق المسكين ..
ونجرح في سواد العين .. صورنا ..
ونبي نطفي قمرنا ..
سامحينا يالمحبة .. لو جرحنا وانجرحنا ..
سامحينا لو نسينا .. في الهوى ضحكة فرحنا ..
وآه يالنصل الحرير ..
ياهوى القلب الضرير..
يالجروح اللي مضت .. واللي بتصير ..
نبي ننزع من أعماق الحشا سكين ..
نبي ننزف حنان العاشق المسكين ..
ونجرح في سواد العين .. صورنا ..
ونبي نطفي قمرنا ..


.....................................

السـراب


قال السراب وقلت ظامي لسـرابه
قال الهلاك وقلت لعيون الاحباب



يا لايمي في حب متـرف شـبابه

الموت حق ولاتبـرق بالاسباب



كانه ذبحني صـاحبي من عـذابه

ماابي لدمي يا هل اللـوم طلاب



الـجادل اللي فيه زيـن ومهابه

يفز له قلبٍ .. وتخضع له أرقاب



في حجر عينة لي غديـر وسحابه

وفي وسط قلبي له تناهيت وعتاب



إن قلت أحبه يكفي القلب مـابه

وان قلت أنا مابيه ..باصير كذاب

...........................

صعب السؤال


صعب السؤال ... ليه نفترق
صعب السؤال ... وين نلتقي
انتى الجنوب .. وانا الشمال ..
ومابيننا .. بحر ..ورمال
لكن نحب .. والله نحب .. وفوق الخيال
... صعب السؤال

ياللي اجمل من كلامي عنك واقرب من سكوتي
آه ياطول المسافه بين احساسي وصوتي
ماهو غريب ... انى اسألك
وانتى انا .. كيف اوصلك
لامستحيل .. هذا الرحيل
من يقطع الصمت الطويل
ويـــدلــنــي


قصيدتي .. وين الحروف .. جف القلم
ياضايعه .. ببرد الكفوف .. رعشه الم
قصيدتي ... الا الندم ...الاالندم
بتسافرين .. وانتى معي
قصيدتي ..لاتسمعي .. غيري قصيد
ياساكنه افـ ورق الحشا .. وحبر الوريد


..............................

يـا سـواد العيـن


ياسواد العين .. فـ عيوني سواد ..
النظر دخان.. وأنفاسي لهب

من نثر في مطلع الشمس الرماد
ومن جمع في موقد اللوعه حطب


كانها الفرقا .. فهي همٍ وكاد
مير اظن الياس ياخل السبب


ياالبعاد اللي ورى طولك بعاد
ماورى الدرب العسير الا الصعب


وش بقي لي من الرجا كود العناد
وش جنيت من الهوى غير التعب


لو يرد العشب لومي للجراد
كان لمت السحب في جرد الحدب


...............................

لليـل احبـك


لليل أحبك .. مابقى في السما نور
والى ضواني الليل .. للصبح أحبك

واللحظة اللي كلها صد وغرور
اشوف قبري بين عينك وقلبك


في صدري اسراجٍ حزين ومكسور
رغم المطر والريح ... شلته افدربك


والله مابه غير لوعاتي قصور
وخوفي عليك الله ربي ..وربك


إلى متى ببني على صمتك جسور
لاحيرتني اسباب سلمك وحربك


العمر احبك... مابقي فينى شعور
ومتى جفاني العمر ... وشلون أحبك


............................

جمرة غضى


جمرة غضى أضمها بكفي

أضمها حيل أبي الدفى لو تحترق كفي

وأبي سفر لليل يا لليل

بردان أنا تكفى ابحترق بدفى

لعيونك التحنان في عيونك المنفى

جيتك من الإعصار جفني المطر والنار

نار جمرة غضى

والله الجفا برد وقل الوفا برد

والموعد المهجور ما ينبت الورد

يا حبي يا حبي يا حبي المغرور

يالي دفاك شعور

رد القمر للنور

وباقي العمر في وعد

يا أول الحب شفتك أنا مره

ويا أعذب الحب عشتك أنا مره

وأهديت لك قلب

ورديت لي جمرة

جمرة غضى


و من يومها كان الرحيل

وليلي الشتاء القاسي الطويل

واه يا الحنين

لليل باب له حارسين

برد وسحاب


بردان أنا تكفى أبحترق بدفى

لعيونك التحنان في عيونك المنفى

جيتك من الإعصار جفني المطر والنار

نار جمرة غضى
.

..............................

صوتك يناديني


تذكٌر .. صوتك يناديني ...
تذكر ... تذكر ...
تذكر الحلم الصَغير ...
وجدار من طين وحصير ...
وقمَرا ورا الليل الضرير ...
على الغَدير ...
لاهَبٌت النسمَة تكسر ...
جيتي من النسيان ...
ومن كل الزمان ...
اللي مَضَى ... واللي تغٌير ...
صوتك يناديني تذكٌر ...
ناديتي ... خانتني السنين ... اللي مَضت راحت
ناديت ... ماكن السنين ... اللي مضت راحت
كنا افترقنا البارحة ...
البارحة .... صارت عمر ...
ليله ... أَبَدْ عيٌت تمرٌ ...
ياجمرة الشوق الخَفي ...
نسيت أنا وجرحك وفي ...
يتذَكر الحلم الصغير ...
ريانَة العُود ... نادي ...
نادي الليَالي تعُود ..
بشوق الهَوى ... بوعُود ...
بوجهي اللي ضيعته زَمَان ...
في عُيُونك السٌود ...
ياالضحكة العَذبة ...
عَنك الصٌبر ... كِذبه ...
وفيك العُمر موعود ...
اشتقت للحلم الصغير ...
واشتقت لجدار وحصير ...
وقمَرا ورا الليل الضرير ...
على الغدير ...
ان هبت النسمَة تكسر ...


......................................

(الفجر البعيد)

نامت عيونك .. وصحى الليل مضنونك أغاني
قصت جناح الثواني غيبتك .. وصارت الساعه أماني
وآه .. أنا حروفي في غيابك .. لاهي حكي ولاهي قصيد
اكتب الظلمه وأعيد .. وإنتي يالفجر البعيد
نامت عيونك

إسهر معي ليله .. حاول تحس بلوعتي ليله
عد النجوم إشكثرها .. ياللي بقلبي كثرها
ونام القمر في وسادتك .. ليتك تغير عادتك
خل القمر ليله .. يسهر معي ليله
وإنتي يالفجر البعيد ..
نامت عيونك

يا ساحر البسمه .. أساهرك نجمه
أبسمعك كلمه .. حتى ولو كلمه
قم نادني .. يالله عسى تحتاجني
إن زاد ظلمك ماعدلت .. وإن مر ليلي ماسألت
وآه .. أنا حروفي في غيابك .. لاهي حكي ولاهي قصيد
أكتب الظلمه وأعيد .. وإنتي يالفجر البعيد
نامت عيونك


.....................................



و صح الله لساني و لسان المبدع الأمير بدر بن عبد المحسن (( مهندس الكلمة )) ...

الموضوع الاصلي  من روعة الكون