الله يرحم الرجاله }
...............سمعت هذه الجمله وأنا نازل ع السلم الصبح رايح المستشفى
.........قلت ف سرى ......الصوت ده مش غريب عليا.........أيوه دا صوت البت صبحيه.....مرات محمد بواب العماره.............وليه حشريه ورغايه...........قولت لها وأنا بفتح باب العربيه........مالك ياصبحيه...
صوتك طالع ليه ع الصبح............بصت لى وقالت لى وهى بتتنهد....هيييه الله يرحمك يابويا
كان راجل صح يادكتور.....ماكانش مخلى أمى محتاجه حاجه.....مش زى البيه اللى نايم جوه.......
عايز ياكل ويشرب وينام وبس.............الله يجازى اللى كان السبب ف الجوازه دى..........
هوه مش كان سهران طول الليل يحرس العربيات قدام العماره ياصبحيه.........
فأبتسمت ابتسامه خبيثه وقالت.......أيوه........عينيه ماداقتش النوم........؟؟؟
فتحت بابا العربيه عشان أتوكل ع الله......مش فاضى للهبل ده ع الصبح.....
أنا عندى أكتفاء ذاتى من الهبل فى البيت والشغل..........
بصيت لقيت مدام روحيه جارتنا............39 سنه...............مأموره الضرايب بالمنصوره بتركب عربيتها اللى راكنه جنب عربيتى....
صباح الخير يادكتور....
صباح النور يافندم
أزى مدام مرفت....... محدش بيشوفها ليه....
والله مشاغل يافندم......... أنتى عارفه الأولاد
برضه الأولاد........والله يادكتور عاطف أنا عايزاك تكتب لى
على أى حاجه مهدئه عشان أعرف اشوف شغلى....الأعصاب اليومين دول
بايظه خالص.......
والله يامدام روحيه فعلا أنا ملاحظ اليومين دول أن حضرتك على
طول مشرشره.......ومزرزره.......وصوتك طالع على طول من المنور
راحت نافخه فى وشى......وقالت لى يقطع العيال ع اللى عايز عيال
البيه عمل عملته وهرب ع السعوديه....خمس سنين ورا بعض
مانزلش أسبوع زى مانت عارف يادوب بنروح له أنا والاولاد شهر كل صيف
ولا يعرف حاجه عن مشاكل عياله ولا قرفهم....يافرحتى بالفلوس والعربيات....عارف حضرتك أنا آخر مره شفته أنا والعيال فى العيد الصغير اللى فات......ومقضينها تليفونات ورسايل قصيره........وساعات رنات بس....
يظهر يادكتور.....أن الرجاله اللى ليها دور فى بيوتها أنقرضت ولا أيه.....
يكونش الأكل بتاع الزمن ده فيه حاجه بتخلى الرجاله يهربوا.......أو يبلطوا ف الخط.....ولا يكونش الهوا
مثلا فيه ملوثات بتأثر ع الرجاله......
أوعى تكون بتزعل يادكتوووور...؟؟؟؟؟
أزعل ليه.......؟؟وأنا مالى يامدام.......؟؟؟
أن جيت للحق أحنا السبب.....أيوه الستات هوما السبب
هوما اللى حملو نفسهم فوق طاقتها.....وعملوا فيها جدعان...بيشتغلوا ويجيبوا فلوس....وبيصرفوا ويوصلو العيال للمدارس والدروس وعايشين متجوزين ع الورق بس....دا غير شغل البيت وهم العيال
قلت لها.......طيب تفتكرى يامدام .....طالما أن الرجاله بقوا كده......مش قلتهم أحسن وبلاش الستات يتجوزا أحسن......
فردت على الفور.......لأ يادكتور مش للدرجه دى.....
دا برضه ضل راجل ولا ضل حيطه.......
أحنا ف مجتمع شرقى....وأهم حاجه فيه المظاهر.....البرستيج....وبرستيج أى ست وجود راجل لها....
برستيج ......برستيج يامدام.....الأستاذ { لمعى} جوزك مجرد بريستيج....
أوعى تكون بتزعل يادكتور أنا بفضفض معاك م العشم والجيره.... والنعمه أنا بعتبر حضرتك أخويا.....الكبير طبعا......
قلت فى سرى...........{ الله يخيبك يالمعى.......الوليه ضربت...}
أبتسمت أبتسامه خفيفه وركبت العربيه وقلت لها.....ربنا يعينك يامدام
عشان أنهى الحوار اللى شكله هايفضل للمغرب لو أستمريت معاها فى الكلام .............
برستيج......الله يخيبك يالمعى.....دا ضل الحيطه أشيك من البرستيج
وصلت للمستشفى......وقابلنى السيد سيد كالعاده..........
صباحه.....أخضر ياباشا........داحنا مستنيين حضرتك
م الساعه تمانيه......
أيه اللى حصل ياوش السعد......؟؟؟؟؟.يا فالى الحلو.........عاوزنى آجى الساعه تمانيه مع بتوع اللبن ياروح قلبى.....أنت أتهبلت ياااله....
أبدا ياباشا.......المدام سميحه السكرتيره بتاعه القسم جت الصبح منهاره
ومن ساعه ماجت ونازله عياط ونهن.....ومش عارفين مالها....دى حته أوغمن عليها مرتين والبت حفيظه بتفوقها
كل مره ببخاخه الاتير بتاعه البنج الموضعى اللى هابشاها م الأستقبال...
أتير...؟؟؟؟ أنتوا عايزين تعموا البت.......أنجر هاتهالى المكتب ووقعتك طين أنت واللى متتسماش اللى عينت نفسها دكتوره .......صبركو عليا أنتو الاتنين..........
ودخلت الست سميحه سكرتيره الأسم 28 سنه متزوجه وعندها ثلاثه أولاد......
تعالى ياسميحه.......اقعدى........أنجر ياواد ياسيد.... خلى الهانم بتاعتك تعمل لها لمون......
حاضر ياباشا.....
أيه يابنتى مالك أنتى طول عمرك عاقله وشايفه شغلك كويس....فيه أيه حد ضايقك من أداره المستشفى......
أبدا يادكتور....
أومال مالك......عندك مشاكل فى البيت....
وطبعا أنفجرت فى نوبه بكاء مع نهن طويله المفعول مع شحتفه ونهجان............
معلش ياسميحه فهمينى يابنتى يمكن أقدر أساعدك.....
جوزى يادكتور عاطف......عشر سنين جواز دلوقتى خلاص تعبت.......كل همه يرجع من الورشه....
يقعد قدام الدش....يشرب فى الشيشه....ويطلب فى طلبات لحد الساعه أتنين وتلاته صباحا....وطبعا هوه بيروح ورشته الضهر لكن أنا لازم اقوم مع آدان الفجر أصحى العيال للمدارس أفطرهم وبعدين البس وأحضر له فطاره وأسيبه على الترابيزه وأجرى عشان ألحق أمضى فى الدفتر قبل الساعه تمانيه ونص..............
طب مانتى أكيد طول عمرك من يوم ما أتجوزتيه وأنت كده....أيه اللى أستجد عليكى ياسميحه.......؟؟؟؟
تعبت يادكتور.....تعبت....خلاص فقت لقيت نفسى زى الجاموسه اللى مربوطه ف ساقيه خلاص لازم أفك الرباط ده.......
بس أستهدى بالله يابنتى....الأمور ماتتاخدش كده.......
{ فى دخله الست حفيظه هانم }...
مش كده ياباشا.....والله من الصبح عاماله أعقل فيها
وأقول لها.....يابنتى دا...ضل راجل ولا ضل حيطه........
وأنفجرت سميحه مره أخرى........لأ...لأ.....
مين اللى قال المثل ده......طبعا ضل الحيطه أهون.......
الراجل طول ماهو قاعد له طلبات مابتفرغش...هاتيلى كذا...أعملى ....سوى.....ناولينى.....
أنما الحيطه مالهاش أى طلبات.......غير لو أفتكرتها كل كام سنه بوش بياض..... يبقى كتر خيرك........
الراجل لازم يزعق....فى مراته وعياله ويسمع الجيران
أما الحيطه فقاعده ساكته ف وسط أخواتها الحيطان الأمامير.......
الراجل ممكن يتجوز على مراته فى أى وقت ويرمى عياله.....أو يكون مؤذى أو شرانى.....يعنى بالعربى يفضح مايسترش....أنما الحيطه بتستر على ولايانا جميعا
الراجل بيفضل طول عمره.....من بعد شهر العسل لون واحد مابيتغيرش.....أنما الحيطه ممكن أغير لونها كل شهر لو حبيت.....
الحيطه بتستحملنى لو خبطت راسى فيها م الزهق لكن الراجل لو خبطته روسيه هايدشدش عضمى.........
يبقى بذمتك يادكتور مش اللى قال المثل ده ظلمنا
سميحه.......ومن شويه مدام روحيه......وقبلهم البت صبحيه...........
هوه اليوم بيبان من أوله.......
وأقطع دراعى أن مارجعت البيت لقيت مراتى عامله أضراب هى روخره.....وقاعده جنب الحيطه.......
منقول
الموضوع الاصلي
من روعة الكون
آخر 10 مشاركات
07-11-2007, 04:40
العرض العادي
