حقيقة التماااااااااااااااااسيح

هذا الموضوع رد على موضوع مجرم كلام و كواضيع كل التماسيح


نوعيه من التماسيح تشوفهم فى البيت غير وعند الناس غير .....؟ <<< هذا مجرم كلام

أبسط مثال:

1- يافلان قم ود أختك المستشفى تراها تعبانه . يقول هااه وش فيها مافيها الا العافيه واذا واحد من ربعه تعبان يقوم يطير طيران يوديه المستشفى لا ويرافق معه...


والا يافلان نبى خبز واللى يعافيك جب لنا يقول ماعلى منكم عمركم ما آكلتوا سوو رجيم ...
وعند ربعه يطبخ لهم لاا ويغسل المواعين بعد...


2- الملابس... دولاب الملابس يشتكى من كثرها وماتشوفه الا بقميص واحد واتحداه يغيره ينام فيه ويقوم فيه ويصلى فيه ولايخلى احد يغسله وإذا جاء يطلع السوق تشوفه قدام المرايه ساعه يتميلح....


3- العجازين .... وياكثرهم كثراه زى الرز ما أشوف شاب يشيل عن أخته أو زوجته أو أمه بعض الأغراض بسوق الاتلاقيه مطير عيونه بالبنات والضعيفه وراه تسحب أكياسها. والوحده تشوف المصريه أو اللبنانيه تحسدها على الذوق اللى عند رجالهم مايخلونهم يشيلون شئ ... وهى تمشى قدام وهو ورا..


4- اذا تبون تعرفون التمساح فوضوى والا مرتب ..! هذى بسيطه شوفوا سيارته.

تجيك السياره وصخه كلها غبار من يوم ماشراها لا ويقول هذى غبار الوكاله امحق وكاله لا وكاله ولاشئ الاعاجز يغسلها ( وياكثر الهنود)
لا والاااذا شفتها من الداخل ماتدرى وين تحط رجولك من هذى فروهطايحه تحت رجولك وقراطيس وفصفص ومناديل وثلاجات الشاهى لها سنه بالسياره وعلب البايسن.. وبلاوى كل وصاخه الدنيا بسياره والارايحه الدخان اللى تدوخ الراس..


لكن الشاب المرتب وهم قله للأسف سيارته تبرق من النظافه وتدخلها كأنك داخل محل عطور كلها نظافه وترتيب..


5- راعى الحق والواجب ... مايخالف الواجب لكن بحدود المعقول الواحد يجيب لزوجته كل يوم ذبيحه ويالله اطبخى كل يوم طبخ ونفخ يعنى الوحده ودها تطلع مع زوجها وعيالها يتمشون وينبسطون وحتى اذا ماطلعوا يجلسون مع بعض يتناقشون ويتفاهمون مو كل يوم عزيمه ..

والا الاسترحات رايح الاستراحه وجاى من الاستراحه وبس هذى شغلتهم وياويلها اذا دقت على جواله وتقطع عليه سوالفه هذى مصيبه ....


6- الدلع.... بنت تدلع معقوله تنبلع بس تمساح يتدلع وووووووووووه قهر..
تشوف راسه ماتدرى هو راس بنت والا ولد تسريحات ما ادرى من وين جايبها اللى فالق راسه من النص تقل ثور اسبانى واللى مسوى تسريحه بطل التيتانيك

المهم ماعلينا .. تطالع شكله تقول هندى مايدرون أن الشماغ والغتره أستر لهم والله ان وسامتهم وحلاتهم بهالشماغ ياعينى عليه اللى يستر بلاويهم...


7- التماسيح النصابين.... هذولا عد واغلط ياكثرهم يجيك الواحد يقول: يوووه سيارتى ( الفرارى) اللى طالبها من برى تأخرت والله ماجت الى الحين اخاف طاحت عليها عمارات نييويورك طاحت عليها.... وهو زين معه ددسن..

ماشفتوا جوالى هذا جايبه من دبى والله ........... وهو شاريه من الحراج.

ماتدرون اختارونى لاعب بالمنتخب بس اعتذرت لهم لانى مصاب والدكتور الزهرانى يقول لاتلعب لمده سته شهور والمشكله تلاقيه مايعرف يشوت كوره لا ويزيد النصب اذا كان الطرف الثانى بنت( الله يخلف)


8- المعصب..... وهذا مسوى فيها شخصيه يدخل ينفخ ويطلع ينفخ يدور المشاكل دواره يحسب ان اسلوبه هذا يخوف الناس مايدرى ان النوعيه هذىيكون بداخله انسان ضعيف.


9- الدلخ.....هذا كل من هب ودب يضحك عليه يجيك الشاب ويصير بالمدارس والأسواق واذا شاف بنت تلتفت وتدور أخوها أو أبوها وطاحت عينها بعينه صدفه خلااااااااااااااااااص حبتنى ..

لا والا اذا حكمت الظروف واضطرت تسأل أحد منهم سؤال عاد يبدا وج يتقلب الوان ويتلخبط وحالته حاله على باله ان البنت ( وقعت بدباديبه) على قولت المصاريه..



10- التمساح المغرور.... ما أدرى بعضهم شايف نفسه على ايش شين وقوى عين واغلب اللى كذا يحس بالنقص من زود احساسه بالنقص يحاول يرفع تفسه عن الناس مايدرى ( من تواضع لله رفعه)


11- الضعيف ...... الضعيف ... الضعييييف .. والا أقول مافى أحد منهم ضعيف ..


12- راعى التفحيط ..... هذا اذا فتحنا راسه تلاقى مخه تقل جريش من كثر مايفتر بها لشوارع لا يفهم ولا يدرى وين ربى حاطه ماعنده ماعند جدتى....


13- راعى الطرب .... وهذا مايجلس بدون مسجل فى غرفته الأستريوا شغال على أعلى صوت قمه الأزعاج واذا طلع بسيارته الله يعين المسجل لا ومركب سماعات اضافيه عشان الصوت يطلع صح واذا وقف عند الأشاره شوف ملامح وج متشقق من الفرحه كأنه مسوى أنجاز....


14- التمساح المغزلجى....هذولا ساكنين بسوق ما ادرى ماعندهم بيوت تضفهم 24 ساعه بسوق وطابعين أرقامهم ومعبين كراتين ويالله توزيع حتى بعضهم يذب الرقم على شغالات وهم مايدرون...


15- التمساح ابو راس يابس..... هذا ماتقدر عليه يموووووت بالعناد تجيه باللين يشوف نفسه عليك تجيه بالعين الحمرا كسر راسك وهذا ينفع معه المثل ( ابعد عن الشر وغنى له )


16- التمساح الحساس ..... وهذا واحد بالمليون وتحتاج ميكروسكوب عشان تدور عليه بس اذا لقيته لاتفرط فيه لانه ينشرا بالملايين ...


وااااااااااخر نوع من التماسيح ...


من برا هله هله ومن جوا يعلم الله .... هؤلاء هم اللى يجيك فياقرا ولابى ام دبليو والا من سيارات الجخ..

واذا وقفته يقول أنا فلان ولد فلان آل .....؟ وهو تلقاه ............؟؟؟؟؟؟؟؟ مايدرون وين الله حاطه والا اذا وقف عند لإشاره وانت جنبه رفع اكتافه ونفخ نفسه واذا اللى جنبه جمس وفيه بنات محترمات رقبته شوى وبتنكسروهو يناظر فيهم ويطلع المعروض ( الرقم بس يكون بالخط الكبير)

وحالته حاله والا تلقاه مأخذ سيارت خويه بطق العصى عشان المظهر وهو يدقها رجل من البيت لبيت خويه ...

الموضوع الاصلي  من روعة الكون