الجزء الثاني
>في بيت ابو خالد <
قال خالد لامه :-هاه يمه شرايك بالي قلته
ابتسمت امه :-مايبيلها راي ونعم الاختيار يمه
تردد خالد ولاحظت امه هالشي وسالته :-يمه علامك
قرر خالد يعلمها لانه يعرف ان امه بير عميق والسر ما يطلع من عندها
خالد :-ابوي وعمي ناوين يخطبونها لفهد
انصدمت امه وعصبت :- ماتوقعتها منك يا خالد تخطب بنت ولد عمك يبيها والمشكله مو اي واحد صديقك واقرب عيال عمك فهد
كان خالد مبتسم وانقهرت امه :-الشر على الي يجلس معك ويسمعك
مسكها خالد مع يدها وجلسها وهو يضحك لانها انفعلت وماعطته فرصه يتكلم :-اجلسي يالغاليه
نفضت يدها منه وجلست :-نعم
خالد :-يمه وش شايفتني.. فهد ما يبيها بس انتي تعرفين ابوي وعمي يحبون يحشرون انفسهم في الي مالهم فيه
ارتاحت امه وبان هالشي على وجا :-انا اعرفك يمه زين ولما سمعت هالكلام عرفت انك مو على طبيعتك بعدين انت الله يهديك ماتعرف تختار كلماتك
خالد :-ه طيب العذر والسموحه
وكمل...."وش الدبره يمه الشياب مصرين يزوجونه رنا "
هزت امه راسها وقالت له :-خلها على امك
تردد خالد وقالت امه تبي تريحه :-ترى ابوك حنون بطبعه مو مثل عمك ابو سعود جلف وقاسي ويقرر قبل مايفكر
قاطعها خالد :-انا عارف وهذا البلى عمي سعود!
امه :-الله يهداك خلني اكمل كلامي
ابتسم خالد :-تفضلي يمه
امه :-ايه البلى عمك سعود وهو يسمع لابوك طبعا ويقتنع بوجهة نظره
حرك خالد حواجبه :-والله وطلعي مو سهله يا ام خويلد
امه :-ه لاتشيل هم
قال خالد :-طيب متى بتقولين له
امه :-عن العجله الزايده
خالد :- طيب طيب اهم شي عندنا راحتك يالغاليه
امه :- يازين المصالح
خالد :-ه
الا وبدخله ابوه..
وقف خالد وباس راس ابوه ..وجلس معه شوي ووقف بيطلع
قال ابوه :-على وين
خالد :-مواعد اخوياي وبطلع انا وياهم
هز ابوه راسه وطلع خالد من البيت..
التفت ابو خالد لزوجته وسألها :-وش اخبار البنات
تغير لون وجه ام خالد من الحزن وقالت :-والله يابو خالد الماس حالتها تتدهور وصايره جلد على عظم وكلما قلت باخذها معي البيت واهتم فيها قب علي سعود وقال وانا وش فايدتي اذا ما اعتنيت فيها (وعشان ماتطق في راس ابو خالد ويجيبها غصب عنها وعن زوجها قالت) وهي حتى ماتبي الجيه عندنا
ابو خالد :-الله يهدي سرهم ..بس ليش مايسفرها برى
ام خالد :-ارسل تقاريرها برى قبل كم اسبوع والنتيجه يمكن يرسلونها اليوم او بكره
ابو خالد :-علميني اذا ناقصه فلوس انا اتكفل بكل شي
ناظرته زوجته ولولا العشره ومعرفتها بطيبة زوجها كان قالت له تقتلون القتيل وتمشون في جنازته الحين توكم تفكرون في سعود وفي احواله وانتم السبب في استقالته من الشركه وفي تعاسته الشهور الي فاتت
لكنها قالت :-سعود احواله ممتازه مايحتاج معونتكم
طبعا الشياب كالعاده معتبرين هم الصح وغيرهم لا وقال بعناد :-انا بتفاهم معه من يدري كم بيكلف علاجها هذي لوكيميا مو شي هين
عصبت ام خالد :-والي يرحم والدينك يا فهد اتركوهم بحالهم
ناظرها بتعجب لانها اول مره تطلع من طورها :-نعم
ام خالد كانت شايطه ومنقهره وماراح يوقفها شي .:_قلت اتركوهم بحالهم من يوم ماتزوجوا وانتم تحشرون انفسكم في الي مالكم فيه حرام عليكم فرقتوهم شهور وفي النهايه الماس صابها المرض وانطرد سعود من الشركه الي استمرت من ورى جهده وتعبه انكرتوا عليه حقه لانه ماتزوج بنت اخوك المصون
عصب ابو خالد :-لاتغلطين
ام خالد كانت بايعتها:-انت تعرفني زين ما اغلط على احد بس الحق حق وش جاب لجاب اصلا الماس مافيه مثلها ثنتين
تاثر ابو خالد بكلامها وقال :-انا واخواني عارفين هالشي وما حنا بمنكرينه بس العمر يركض وسعود ماعاد هو بصغير
انقهرت ام خالد وقالت :-عمره32 سنه الحياه قدامه حرام عليكم
بس ابو خالد كان له تفكيره :-الي عمارهم 22 -23 متزوجين وعندهم عيال من لحمهم ودمهم
ام خالد :-انت قلت انه مو بصغير اجل اكيد انه يعرف مصلحته وما يحتاج لتدخلاتكم
حشرته ام خالد بزاويه ومالقى له مخرج من كلامها المفروض انه ياخذ احتياطه لان ام خالد في النقاش محدن يغلبها
هز كتوفه وقال :- بسبب مرض الماس اظن ان الموضوع بيتاجل
ارتفع الضغط عند ام خالد ياربي ذولي جبلات ماعندهم دم..البنت فيها مرض خطير وهم بيأجلون الموضوع وش هالحنيه الزايده
لكنها فضلت ماترد لانهم في هالسالفه من كم شهر ومالقوا لهم مخرج ولا حل وسط..
قال ابو خالد :-وش اخبار دانه
ابتسمت ام خالد على الرغم من فيها الصيحه :-احسن شي في هالعايله دانه وراكان
ابتسم زوجها :-الله لا يغير عليهم راكان رجال من رياجيل مأصلين طيبهم ومرجلتهم على كل لسان
تذكرت ام خالد الهديه الي جابها لها من لندن وذكرت الكرم زود على صفات كثيره ما تنوجد بالعاده كلها في شخص..
ام خالد :-وانا اشهد الله يحفظه لدانه من كل مكروه
ابو خالد :- اللهم امين..
جت ام خالد تفتح سالفة خالد لكن ابو خالد سبقها وقال :-وش رايك نخطب لخالد
تهلل وجه ام خالد :-ه
عقد ابو خالد حواجبه :-وراك تضحكين انهبلتي
ام خالد :- لا ما انهبلت بس خالد قبل شوي كلمني ويبيني اخطب له
هنا جلس ابو خالد يضحك
وقال:-في باله احد معين..؟
ام خالد :-ايه
ابو خالد :- من......؟
ام خالد :-رنا بنت نايف
قال ابو خالد وهو يحرك يده في الهوى كانه يقول ينسى ..:خليه يشوف غيرها ولا اخطبيله انتي بمعرفتك
قالت ام خالد بهدوء :هو مايبي غير رنا
عند ابو خالد :-وانا قلت لا
ام خالد :-ليه لا
ابو خالد تعود يصارح زوجته بعض الاحيان بخططه هو ويا اخوانه
فقال لها :-ناصر يبي يخطبها لفهد ولده يعني مايصير يخطب بنت ولد عمه يبيها
قالت ام خالد :-واذا قلت لك ان فهد مايبيها
ناظرها ابو خالد بقوه :-كيف مايبيها ناصر قايل لي انه طلب منه يخطبها له
هزت ام خالد راسها :-خالد قايل له فهد انه مايبي يتزوج بنت الا باختياره
عصب ابو خالد :- مو على كيفه
طللعت عيون ام خالد :- بتفرضون سيطرتكم غصب
وقف ابو خالد لان المسجد بيقيم لصلاة العشاء :-ايه غصب
وقفت زوجته وقالت والدموع بعيونها :-هذي فرحة ولدك كيف تسرقها منه
لاحظت ان الكلام اثر عليه وقال بصوت متغير :-لا تحسبين قلبي قاسي بس تخيلي موقف ناصر يحير بنات نايف وفي النهايه ما يتزوجون عياله البنات
وطلع من قبل ماترد عليه..
طلعت ام خالد غرفتها وصلت..وجلست تفكر وهي على سجادتها ..وش العمل ناصر هو السبب في الموقف الصعب قدام اخوانه ليش يحير نوف ورنا وهو مو مالي يده من عياله
قالت وهي تناجي ربها.."الله يعينك يا وليدي "
*
*
*
*
*
*
قابلت دانه الشغاله وهي نازله تقابل ضيوفها الغير مرغوبين وجلست الشغاله تبحلق في دانه باعجاب ..صريح ابتسمت لها دانه لانها مدحتها ومدحت جمالها
وهي تقول في نفسها "هذي الشغاله الي عايشه معها في بيت واحد وانبهرت من شكلي اجل بعض الناس وش بيسوون "
ونزلت بثقه مالها حدود ..ظهرها مستقيم وعلى شفايفها ابتسامه حلوه
>في وقت<
كاانت ساره جايه تشوف كيف حياة راكان مع زوجته ..
كلما تذكرت هالكلمه تحس انها بتموت من الحسد وكان على قلبها شي ثقيل يبي يتفجر..صار لهم الحين ساعه من يوم ما جو والاخت ما بينت حتى هو مابين ..
قالت ساره بود مصطنع :-اقول ام راكان (ماتعترف بالالقاب مثل خاله وعمه) وين زوجة ولدك مو من عادات الكرام يهملو ضيوفهم
في هاللحظه دخلت دانه ..وقالت بنفس لهجتها :-ومو من عادة الناس يجون فجأه بدون موعد ولا حتى تلفون وهم بالطريق
انقهرت ساره لان دانه سكتتها..
تجاهلتها دانه وراحت تسلم على امها
دانه :-كيفك ياخاله
انحرجت ام ساره من رقة دانه وقربها من القلب آه ياليت بنتها تشوف الفرق الي بينهن وتغسل يدها من راكان
ام ساره وباين عليها انها منحرجه موت :-بخير يا بنيتي كيفك انتي
ابتسمت دانه ابتسامه اخذت قلب ام ساره ورمت ساره بسهم ما يخيب :-بخير عساك بخير
التفتت دانه وقالت وهي تسوي نفسها ما تتذكر :-وش اخبارك يا............ (قالت بدلع) سوري نسيت اسمك
عصبت ساره واوشكت تفقد اعصابها :-ساره (وقالت تبي تقهر دانه ) اسمي ما ينسى ابد
هزت دانه كتوفها وقالت وهي تجلس مقابلة لهم وتحط رجل على رجل بحركه خطيره :-بعض الناس ذكراهم تكون مثل الغبار الي اذا نفخه الواحد يطير ويتلاشى لان مايجي من وراه خير وبعض الناس ذكراهم من دهن العود يبقى سنين وسنين حتى لو غاب شخصه ريحته تبقى
ابتسمت ام راكان غصب عنها والله ولقت ساره ند لها وطلعت دانه مو هينه اما الخاله مريم لولا الحياء والحشيمه كان قمت ورقصت من فرحتها لانها لقت انسانه تعرف توقف هالاشكال عند حدها
ارتفع ضغط ساره وكانت بترد بحده وتخرب الدنيا لولا ان الشغاله جت ونادت دانه
وقفت دانه وقال باستهزاء وهي تناظر ساره الي وجا شوي ويزرق من التعصيب:-بالاذن مطلوبه على التلفون
ومشت دانه قدام عشان تروح لطاولة التلفون غريبه من بيطلبني الحين وجوالي بالعاده الي يبيني يتصل عليه ...وقفت عند التلفون الي لقته مسكر ..
من ذا الي يستخف دمه عليها
الا وصرخه
"بووووووووووووووووووووووووووووووووووووووو"
صرخت دانه ويدها على قلبها..
ضحك راكان :-توني ادري انك خوااااااااااااااااافه
عصبت دانه عليه :-لا والله بغيت اموت
كشر راكان :-بسم الله عليك
مشت دانه يقال انها معصبه :-يالله بس لا تكلمني
وقف في وجا وهز راسه ..:-مافيه روحه وش بتسوين
فيها الضحكه بس مسكت نفسها :-اقول وخر لا يجيك بوكس محترم
راكان:- انتي بوكساتك بالنسبة لي مسجات
عضت دانه شفايفها لاتفطس من الضحك ومرت من جنبه لكنه رفعها بين يدينها وشالها ..
صرخت دانه وهي تضحك :-انهبلت انت نزلني
*
*
قالت ساره بلقافه وانتقاد لام راكان :-وش فيها زوجة ولدك تصارخ
ام راكان :-انا جالسه معك وش يدريني
قالت الخاله مريم وهي تبتسم بشماته :-اكيد عندها احد ومسويلها مفاجات كالعاده
انقهرت ساره ووقفت ..
قالت امها والفشله مقطعتها :-وين
لكن ساره راحت تمشي وسفهت بالكل ..
خطت خمس خطوات الا وتشوف راكان شايل دانه وهي تضحك وتقول له كلام حب عشان ينزلها..
خنقتها العبره وانقهرت زووووووود ..ياليتني اموت ..ياليتني مت يوم فكرت اتركه ...
حس راكان بشي موش ولابد بالجو ..ورفع نظره وطاح بعيون ساره المدمعه ..
غض طرفه لانها لابسه لبس قصير وعاري بالحيل من فوق..انتبهت دانه لتغير مزاجه وعرفت ان الاخت اكيد شرفت..ابتسمت بينها وبين نفسها لانها لو تنوي تنتقم منها وتخطط لها الشي ماراح يكون بقوة هالموقف العفوي..
قالت ساره بقهر :-اظن ان عندك ضيوف ببيتك ياولد العم (شددت على كلمة بيتك حتى تستثني دانه)
قال راكان بحمية عيال العم وعيال الحمايل :-استري عمرك يا مره وبعدين تكلمي
طاح وجه ساره طيحه من ورى تهزيئته .. ورجعت بسرعه للصاله واخذت عبايتها
قالت وهي تبي تبكي :-مشينا يالله
طلعت حتى بدون ما تنتظر امها..
قال راكان وهو معصب :- من متى وذي هنا
دانه :- من ساعه ونص تقريبا
ناظرها وفعيونه اعتذار :-عسى ما ضايقتك
ابتسمت دانه :-تخسي هي واشكالها
ضحك راكان من كلمتها..
وقالت برقه وهي تهمس في وج :-وبعدين مدام معاي القمر..مالي ومال النجوم
صاح راكان :-ياويل حالي ارحمينييييييييييييييييييييييييييييييييي
وضمها..
الا وصوت احد وراهم يتنحنح..
قالت الخاله مريم وهي تمسك راكان وتبعده عن دانه بالغصب :-لاحول ماغير لازق بالبنت اربع وعشرين ساعه خلنا نحسسها بحبنا شوي
راكان ودانه :-ه
وضمت دانه وهي تهمس في اذنها :-عز الله انك شقرديه ووقفتي الي ما تتسمى عند حدها
دانه :-ه اعجبك
قال راكان بلقافه :-وش عندكم تتهامسون
قالت الخاله مريم :-مالك دخل
هز راكان كتوفه وقال :-خساره لو قايلة لي كان عطيتك كاسيت فنانك الاسمر الي تحبينه لانه معي في جيب ثوبي
وضرب على جيبه بيده وطلع صوت الكاسيت
انهبلت الخاله مريم وقالت :-جبت الكاسيت ومن اليوم ساكت اهم شي يكون الاخير
قال راكان مسوي فيها غبي :-ايه اخر شي وش قالولك غبي ..البوم بعترف لك اني بحبك
ضحكت دانه..من ملامح الخاله مريم ..
الي كشت على راكان بيدينها وقالت :-مالت عليك يالمغبر..جايبيلي البوم من عهد جدي لا وفرحان بعد
راكان :- طيب طيب لاتزعلين جبتلك بحبك انا كتير اخر شي هو صح
استانست الخاله مريم وقالت :-غربل الله ابليسك ايه هو جبه يالله بشوف الغلاف
عطاها راكان الكاسيت ومشا هو ودانه وهم يضحكون من كلام الخاله مريم..
ياقلبي...ياربي..يازينه..ياملحه....
قالت دانه وهي تاخذ عبايتها :- ياحليل امي من جدها تحب وائل كفوري
راكان :-ه اي والله تحبه
مو قادره دانه توقف من الضحك..الخاله ذي مليانه مفاجات ومتناقضات..روحها شباب روعه الجلسه معها ماتحسس الواحد بفرق السن الكبير
دانه :- مو قادره اوقف من الضحك..ياحبنيلها
قال راكان:- وانا طيب ماتحبيني
ابتسمت دانه :-مالك شغل
قال يمزح :- مافيه عزيمه اجل
عاندته دانه وردت له الصاع صاعين :-اجل مافيه نوم الليله هنا
سوى راكان نفسه مصدوم وقال :-لا يامعوده توبه .. كل شي ولا المنفى
دانه :- بدينا حركات الدوافير ياخي انت معك ماجستير وانا وبالعله انجح لا وباقيلي ترم واتخرج
راكان :- يمه من عينك يالله مشينا ترى لو تكنسلين الروحه احسن
حمرت خدودها وقالت وهي تمسكه مع يده وتسحبه للباب :- اقول يالله مشينا لنا شهر وزود متزوجين وماطلعنا الا مرات قليله..
راكان :-طيب ياقاتلتي مشينا
دانه :- كاظم الغفله يالله مشينا
قال راكان يستهبل وكانه يكلم نفسه :-لابسه ذا اللبس وحاطه ذا الروج الي يلمع وتبيني اطلع بعد
ولعت خدود دانه لسببين من كلامه ولان امهاته كانن جالسات بصالة الرسبشن الي فوق ةسمعن كلامه وجلسن يضحكن
قالت الخاله مريم تزودها على دانه :-خف على البنت احترقت غربل الله ابليسه انا لو رجلي يقول لي هالكلام توطيت ببطنه
راكان :- زواج مافيه زواج لا تلمحين وبعدين هذي مرتي وانا حر
شبت دانه ضو من كلامهم
قالت ام راكان :-هيه استحوا عاد طبعا غريبه عليكم تقابلون شخص يستحي مو وج مغسول بمرق
راكان دانه الخاله مريم :-ه
سحب راكان دانه وقال :-يالله يا عجيزاتي سلام
قالن يهاوشنه :-عجيزات بعينك يالي ماتستحي
راكان ودانه :-
قالت دانه وهم بالسياره :-الله لايغير علينا ويحفظلنا هالعجوزتين نورات هالبيت
بدون مايعبر راكان عن الي بقلبه حس بها تكبر وتكبر وتكبر حتى ملكت كل شي فيه..
العذوبه
الرقه
المراعاة
الحنيه
التفهم
الاخلاق
صارت كل حياته ..نصفه الثاني..
النفس وهو النفس ما ياخذ له..نسمة هواء الا وتكون الثانيه لها
النبض .. يهذي باسمها
العين وما يملاها الا شوفها
قال وهو يبتسم لحبيبة عمره :-اللهم امين .. ويحفظك لي لانك انتي نوارة حياتي
ابتسمت له دانه ..بكل محبه وبكل ود موجود
كيف قدر يهدم حصونها ويملك مشاعرها واحاسيسها...هذا شي ماتعرف جوابه لكن الي هي اكيده منه
انه هو كل كل حياتها..!!
%%%%%%%
(الجزء الثالث)
وقفت سعاد..تناظر في شكلها بالمرايه..
فستان الزواج مثل ما حلمت..نافش وفيه احجار كريمه
..المكياج سموكي روعه الشعر شنيون كشخه
..والباقه من اجمل مايكون
حتى المعرس هو هو من تمنته عينها دايم..
طيب ليه ماتفرح..
مسكت نفسها لاتبكي..
لانها ان بكت جابت القديم والجديد..
راح تبكي على من حبته وخان...على قلبها الي ما يطيع ينسى ..وعلى حضها الي اجبرها ترتبط فيه وهو مايبي الا مذلتها..
قالت الماس .. الي كانت متالقه رغم مرضها في فستان ليموني رووووووعه :-سعاد لاتقطعين قلبي
هزت سعاد راسها وقالت بتاثر :-آه يا الماس...ثقل الجبال على قلبي..
بكت الماس غصبن عنها..اما سعاد فتماسكت لانها حلفت ما تبكي عليه بدمعه يكفي الدموع الي ذرفتها اول مره رفضته يوم كانت تدرس بالجامعه..
دخلت دانه وهنادي وكانن كل وحده احلى من الثانيه ..هنادي لابسه زهر وموف..ودانه لابسه كموني وزهر رووعه..ورافعه شعرها شنيون جاي على وجا الدائري فتنه
قالت دانه :-الماس خير ان شاء الله
مسحت الماس دموعها وقالت :-صايره حساسه زياده عن اللزوم..شكل الواحد لاقرب من الموت ينهبل
ناظرنها البنات بقسوه لانهن يكرهن انها تتكلم عن مرضها باستخفاف..
قالت هنادي وهي منقهره من كلام الماس :-الزفه بعد شوي سعاد ..يالله جهزي عمرك
حست سعاد برجفه عنيفه ..
وقالت بصوت مرتجف صدم البنات :-جاهزه
><في وقت><
ناظر احمد في ساعته..الساعه 12 بالليل والله ماصارت..
ناظر في سعود وقال :-ياخوي ماصارت بنمرح هنا بالقاعه بدخل خلاص
ضحك سعود :-اقول اركد لاتفشلنا تو بدري
انهبل احمد :-وش تو بدخل الحين يا تعلم الشيبان يا رحت بلحالي
سعود :- طيب
<>
على انغام اغنية ..صابر بتحدى العالم ..
انزفت سعاد لانها مو تقليديه وتحب التميز
والغريب انه على الرغم من انها مغصوبه على الزواج الاانها ما بخلت على تجهيزاتها ولا على نفسها بشي..
مشت خطوه..بخطوه..
كان جو القاعه رومنسي...انوار مافيه..كل طاوله عليها شمعه منوره بظلام المكان..
واخيرآ..
وصلت وجلست على الكرسي المخصص لها...
ما امداها تجلس عشر دقايق الا ورنا تكلمها برقه حتى ماتخوفها وتقول :-ترى احمد بيدخل
خافت سعاد وقالت :-الحين
ابتسمت رنا :-ايه ياقلبي الحين ابتسمي شكلك مخترعه تراه حبوب وما يخوف ولايغرك طوله وعرضه
ابتسمت سعاد غصب وقلبها بصدرها مسوي حفلة استنفار
ودقايق..الا وبدخلته ..
كانت سعاد تجبر نفسها تكون قويه لانها لو ضعفت ماراح يرحمها ..جاء وسلم عليها وجلس جنبها..
<>
حس احمد بالكون يهتز تحته..بالناس يتلاشون ..ومايبقى قدامه الاهي
حبيبته
حبيبته الي ذلته..وقست عليه
حبيبته الي تزوجها مخصوص..عشان يذلها مثل ماذلته ويعلمها كيف تحبه ثم يصد عنها حتى تعرف بقسوة الشعور بحب ماله قبول..
15 سنه
ضاعت من عمره..في رجاوي حبها
جلس..وهو يحمد ربه لانه لقى شي يسند نفسه عليه..لاحظ ملامح امه ونوف كن ميت لهم احد..لان بعد الي صار والحرق الي جاه.مارجع رنا للبيت بعذر انه يبيها تساعده .وابوه وافق ولو انه شك بالموضوع بس احمد فضل يأجل السالفه لبعد العرس لانه مو ناقص مشاكل
جته اخته تهاني وقالت له وشفايفها ترجف :-حمودي صدق انك بتترك البيت
ضمها احمد لصدره :-لا ياقلب حمودي..
بكت وقالت :-بس انت اخذت كل اغراضك
مسح دموعها وقال :-لاتبكين ترى بزعل..وبعدين تزعل عمتك سعاد
ناظرت تهاني سعاد وقالت ببراءة الاطفال :-انتي عمتي الحين
ابتسمت سعاد غصب (غص احمد بريقه من بسمتها الي كما نور القمر في وجه تبارك الي خلقه ) :-ايه حبيبتي
حبيبتي .......آآآآآآآآه محلاها من كلمه !!
جلست احمد يتحسر على عمره وهو يشوف سعاد تبوس تهاني
قالت تهاني :-عمتي لازعل احمد تزعلين
حمرت خدود سعاد وقالت :-هاه
وناظرت احمد المبتسم ..وقالت :-ا..ايه حبيبتي
وراحت تهاني ..عشان المصوره بتصور..
نست سعاد تحذر المصوره من انها تطلب اي تقارب بينها وبين احمد وتستاهل الي يجيها ..
كان هو مستناس وموسع صدره..اما سعاد فكانت متورطه ماتقدر تنفعل وتفضح عمرها قدام خلق الله ..ولاهي قادره تتحمل قربه منها,
عدت السالفه على خير وبقي الاصعب!!
لا بقوا مع بعض لحالهم وش بيصير...!!
؛
؛
؛
؛
>في صاله الرجال<
قال خالد لفهد المكتئب :-ه هاه لسى على نيتك بالنحشه
ناظره فهد بضيق مو عارف وش يقول "آسف ياولد عمي ابوي بواسطاته وعلاقاته حلف انه..بيفصلني من شركة ارامكو اذا ماطعته وتزوجت رنا وانت تبيها"
حس خالد بشي ..متغير على فهد الايام الي فاتت مهموم وحزين وحالته زفت..
قال فهد :-لا تسالني وش فيني ياخالد..الي فيني ماراح يسرك
قال خالد بهدوء :-بيزوجونك غصب صح
انصدم فهد ورفع عيونه فعيون خالد :-انت عارف
هز كتوفه وقال :-لا خمنت تذكر اني قلت لك ان الشياب بيطينون عيشتك لين تتزوجها
قال فهد بقهر :-ياليتها تطيين عيشه كان هانت
(وتذكر قبل 3 ايام يوم قال له ابوه بعد مارجعو من صلاة العصر :-بعد عرس احمد جهز نفسك لانك بتملك على رنا بنت عمك
قال فهد بصدمه :-نعم
ابوه :-انعم الله عليك جاك العلم
قال فهد بهدوء تحته بركان ثاير من التعصيب :-اسمح لي يبه هذي مو صفقه من صفقاتكم هذي مسالة عمر وحياه
صارخ ابوه :-وش فيها رنا ست البنات
قال فهد بسرعه :-والنعم فيها يبه ،بس انا ما اخترتها بنفسي ابي اختار بقناعتي
ناظره ابوه وقال : الحمد لله والشكر ترانا بالسعوديه ياولد
فهد :عارف اننا بالسعوديه
ابوه :-اجل خل عنك هالخرابيط كيف بتختار بقناعتك وحنا بفضل الله ماعندنا اختلاط
انقهر فهد لانه ماله اعتراض على رنا ..لا الاعتراض على الاستبداد وعلى تحكمهم بحياة كل واحد في العايله وكانهم مو كفو حتى يختارون من يشاركونهم في الحياه
المساله كانت مساله عناد ..وهو مايبيهم يفرضون عليه رغباتهم
قال فهد وهو قابض يده لدرجة غرست اظافيره في لحمه :- انا ما ابيك تختارون لي .. انا قادر اختار بنفسي
ولاحياة لمن تنادي...!!
قال ابوه وهو يطلع الدرج لغرفته :-الملكه بعد زواج احمد
قال فهد بعناد :-ماني متزوج انا رجال مو بنت انغصب
عصب ابوه وقال بقسوه :-براحتك بس دور لك شغل غير شركة ارامكو
الصدمه افقدت فهد الكلام..ناظر في ابوه وكأنه يشوفه لاول مره
قال والصدمه واضحه بصوته :- اكيد تمزح
ابوه :-انا ما امزح وياليت لو تعتبر من اخوك وعقابي له يوم ماطاعني بس مصيره مسوي الي ابيه
مسك فهد راسه بيدينه وقال :-مستحيل مو قادر اصدق يبه..حنا عيالك
قاطعه ابوه :-وانا ابي مصلحتكم الي غافلين عنها..بنات الحمايل قليل وانا ابي امهات احفادي شقرديات
قال فهد وهو يكمد غيضه من ابوه عشان مايعصي ربه وعشانه متذكر فضل ابوه عليه :-يبه الماس بنت حمايل وهذاك بتزوج رجلها
حس فهد بلمحة الم مرت على وجه ابوه الي قال :-ياليت الكل مثل الماس..عطاها ربي من كل شي وجملها بس حرمها من الضنا..وهذا الي مخليني ابي ازوج سعود نوف
حس فهد انه ديناميت بينفجر في اي لحظه ..
وقال :-ماراح اتزوج رنا
قال ابوه بلامبالاة :-اجل ودع شغلك واتحداك تلقى وظيفه تعطيك هالثروه كل شهر
جا ابوه على الجرح...قال فهد :_يبه حرام عليك سنين من الغربه في الكد والشقا وتبي تحرمني من ثمرة مجهوداتي وتعبي
قال ابوه وهو يكمل طريقه لغرفته :-وافق تسلم ..
ناظره فهد..بتبلد
وقال يكمل :-انتظر قرارك بكره العصر ..ان مارديت من المغرب بكون فاصلك من شغلك وانت تعرفني زين واسال سعود عني.
جلس فهد بغرفته ومانام الليل يفكر وقلبه مليان من الكره على هالوضع وهالمذله..
اشين صفاته عزة نفسه الزايده والي منكده عليه..كيف ينجبر على شي مايبيه
دارت به الافكار يمين وشمال وكل الطرق تقفلت في وج ...
لكن عزة نفسه رفضت خضوعه لابوه و اذا يبي يفصله يفصله...
وفعلا هذا الي قاله لابوه..الي رد عليه وقال :- انت معك اجازه لين اليوم الثاني من زواج اختك بعطيك فرصه لين تنتهي اجازتك ان وافقت كان بها ورجعت ولقيت وظيفتك موجوده وان رفضت لا تتعب عمرك وترجع للوظيفه
وطلع وترك فهد يكويه القهر كوي!!))
رجعه للواقع ..يد خالد الي مسكت ذراعه
خالد :-توكل على الله ياخوي وكافي عناد
فهد :-وانت
ضحك خالد :-وانا وش فيني
عصب فهد :-انت تبيها كيف اتزوجها
قال خالد :-الي يسمعك يقول عاشقها..ياخي بنت كلن يتمناها اخلاق وادب وذوق
فهد :-مقدر
انقهر خالد وقال شي صدم وفاجا فهد في نفس الوقت :-شف قسم بالله لتحرم علي هالبنت ليوم الدين
صرخ فهد :-لا
قال خالد بعناد :-حلفت ياخالد وماني ناوي اكفر عن حلفي لاني جاد يا اتتزوجها وتحفظ مستقبلك يا ترفض وتضيع عمرك وفي التالي تضحيتك مالها معنى لاني ما راح اتزوجها
ضربه خالد بشويش وقال وهو يمزح حتى يخفف الجو :-لو ما تزوجتها وش بيسوون بك الشياب بيطردونك من شغلك
كان خالد يمزح ولما شاف نظرة فهد الي تأكد هالشي..ماتت الابتسامه على شفايفه
قال بهمس وعيونه بعمانه وابوه الي كاشخين بالبشوت وفالينها سوالف :-بيطردونك من وظيفتك
هز فهد راسه..
قال خالد وهو يقرب من الهستيريا :-مستحيل كيف ..
ضحك فهد بدون نفس :-وشهو الي كيف الي بروسهم بيسوونه ولو كان بالمريخ
كئب خالد وقال :-عز الله كبروا وخرفوا
ابتسم فهد :- وانا اشهد
ناظره خالد وشوي الا وهم فاطسين ضحك..
قال فهد وهو فيه الضحك :-حسبي الله على ابليس هبلو فينا
خالد :- ودك تغصب واحدن منهم على شي مايبيه ياترى بيضحك وبينسط مثله الحين
وناظروا في الشياب الي يضحكون ويسولفون
قال فهد يمزح :- ايه احترني تغصبهم عشم ابليس مو في الجنه الا عشمه في لمحة لها
خالد :- على رايك
كمل خالد بعد كم دقيقه :-وش نويت عليه
قال فهد بعناد :-ماراح يمشون علي رايهم وزواج ماني متزوج لو اموت من الجوع
عصب خالد وتمنى لو يمسك فهد ويخنقه لين يرجع لعقله ..بس مافيه امل عيال عمه روسهم يابسه ونفوسهم عزيزه بالحيل ، صحيح ان خالد نوى يتزوج وتمنى لو تكون من بنات عمه يا رنا يا هنادي..بس رنا وماراح تكون له وهنادي مايدري يبيها ولا لا ؟
×
:
؛
:
×
:
؛
:
×
>الساعه1 صباحا<
<في جناحهم بالفندق>
قال احمد لسعاد وهو يناظرها :-والله وكسبت الرهان يابنت العم
نست الخوف..والحزن .. ورجعت لعنادها وقوتها
قالت بغرور:- كسبت تسمي زواجي منك ربح..اعرف انك خسران ياولد العم لاني مابيك
انقهر احمد وتمنى لو يمسكها مع رقبتها ويخنقها.. ما تمل من العناد من القوه ..ومن مذلته
قال يبي يجرحها مثل ما جرحته :- ولا انا ابيك
يمكن تكون ملامحها من برى مثل بركة ماء راكده مليانه بالاسرار وغامضه لكن من جوى كانت مثل مدينه مدمره دمار شامل كلامه جرحها من الصميم للصميم ..
وعم المكان هدوء فضيع...كلن يناظر في غريمه بقوة عين وكبر وعناد
قال وهو يناظرها بعيون سود لحظها يذبح :- تركتيني بليلة الملكه تدرين شلون بتركك انا بليلة زواجنا
رفعت سعاد عيونها بعيونه وقالت بصدمه :-بتطلقني..
ضحك وقال :-لا ..
قالت بخوف :-اجل
قال بلا مبالاة :-انتي في حالك وانا فحالي
فهمت سعاد تعليقه وقصده..حمرت خدودها..وانقهرت لانها كانت بتسوي هالشي قبله..
ناظر احمد فيها وبعروقه تصطلي النيران..عارف ان بعدها عنه فوق طاقته لكن لا...مرجلته فوق كل شي
قال وهو ينزل شماغه ويفك ازارير ثوبه وسعاد عيونها طالعه من مكانها..:-الليله غصب بيجمعنا مكان واحد وسرير واحد
وبكره لارجعنا بيتنا ..انتي لك غرفه وانا غرفه
كانت تتمنى لو تبكي..لكن حتى الدمع قفا وتخلى عنها..فضلت السكوت لان كلمه..بس كلمه..بتفجر البركان الثاير بصدرها..
جلس يناظر بالتلفزيون..
ودخلت سعاد وبدلت ملابسها ..بملابس محتشمه وكانت هلكانه من التعب والتوتر النفسي والتفكير..وقفت قدام المرايه وفكت بنس شعرها حتى طاح على خصرها بتموجاته السوداء
اجبر احمد نفسه يناظر اي شي .. ولايناظرها هي مو داريه ولاعارفه وش تسوي به..
بعد حاله وتعب نامت سعاد...بينما طلع الصبح واحمد ماغمض له جفن
×
×
فتحت سعاد عيونها على همس ينادي باسمها ولقت احمد يصحيها ..رفعت نفسها وغطت جسمها بسرعه ابتسم لها
قال :-ماودك تتغدين
ناظرت في الساعه ولقتها 2 الظهر قامت بسرعة البرق وقالت وهي شكلها بتبكي :-يوه فاتتني الصلاه
ابتسم احمد من تعابيرها وقال :-حاولت اصحيك بس ما طعتي
انتبهت سعاد لوضعهم الجديد وقالت بهدوء :-صار خير الحين بصليهم
وراحت تاخذ شاور سريع ..
صلت ولبست وخلصت..
قال احمد وهو يشوفها ماذاقت الاكل :-تغدي
سعاد :-لا بس
احمد :- تبغين شي محدد
هزت راسها وهي تشرب العصير :-الاكل الثقيل بعد النوم مباشرة يأذى المعده
احمد :- كلام فاضي
هزت كتوفها :-براحتك انا مو متعوده اكل لاصحيت من النوم شي اشربه يقوم بالواجب
ومارد عليه وكمل اكله وطنشها..
حس احمد باتعدام في الشهيه ماله مثيل بس كان ياكل عناد حتى ماتقول انه ما اكل لعيونها يوم عافت الاكل لكن في الاخير ماقدر يتحمل ويجبر نفسه على الاكل اكثر..
ناظرته سعاد وتمنت لو تمسك كاس المويه الي بيدها وتصبه على راسه ..بس مسكت اعصابها وسكتت..
قال :-اذا كنتي جاهزه بنرجع بيتنا الحين وبالنسبه لشهر العسل.............
قاطعته وقالت :-مالها داعي الادعاءات
ناظرها وقال :-عادي عندك ماتسافرين
سعاد :-وضعنا مايساعد
قال يستهزء :-افهم من كذا ان الوضع مو معجبك
قالت بتحدي وقوه :- لاتفسر الكلام على هواك..
ووقفت وراحت تجمع اغراضها القليله..
انقهر احمد من ردة فعلها صحيح ان شهر العسل بيأزم الامور وبيصعبها عليه ..ويمكن يكون معها حق وضعهم مايساعد بس هو مايبي كلام الناس يجرحها ,,
ناظر في جواله الي بيده بعصبيه "تخبلت انا كيف افكر في شعورها وهي ما فكرت فيني يوم "
جمعت سعاد اغراضها القليله بيدين ترتجف..ماكانت متخيله ان اسعد ايام حياتها بتنقلب نكد كذا..والجاي اعظم بس الله يصبرها
،
،
،
×
،
،
،
<>في بيت ابو احمد <>
دق احمد على ناصر لانها فرصته عشان يتطمن على رنا لان قلبه ماكله عليها
ناصر :-هلا والله بالعريس
احمد :- هلا بك
قال ناصر بخبث :-غريبه متذكرنا للحين
ابتسم احمد من تعليقه وقال :-عن الحركات الي مالها داعي وبشرني على رنا
ناصر :-بخير انا مثل ما وصيتني ما افارقها ابدآ
هز احمد راسه وقال :-وش انطباعات امي طيب
كئب ناصر :-الله يجيرنا شايطه على اخر شي ومتحلفه في رنا وانا خايف ياخوي اجازتي تنتهي بكره
قال احمد :-خير ان شاء الله انا برجع بيتي اليوم
انصدم ناصر :-من جدك
احمد :-ايه
ناصر :ليش طيب
توهق احمد ولازم على الاقل يلقى عذر يبعده عن الشوشره والا تدخلوا الشياب وهم ان تدخلوا في شي قلبوه فوق تحت
قال بنبره لها معنى :-بيتنا اريح لنا والسفر ملحوق عليه انت عارف مامعي اجازه الا اسبوعين بتروح كلها في الروحه والجيه
ناصر :- ماعندك وقت
احمد :-انتبه عليها لا اوصيك والله قلبي مو متطمن
ناصر :-ياخي لاتوسوس انت توك متزوج عش حياتك وانسانا شوي
احمد :-طيب..كيف طلول
ناصر :-يشكي راسه بس بخير
احمد :-اذا زاد عليه الوجع خذه للطبيب وماعليك منه
ناصر :-صار ..يالله رح لزوجتك وعن الهذره
احمد :-يالله سلام
وسكر الجوال وسرح في هالمشكله ..تذكر الي صار ولمس جرحه الي ماطاب للحين لا وصابه شمم من بعد حفلة العرس البارح ومتورم وزايد وجعه لازم يروح للطبيب ويغير ضمادته .والايغيرها هو وتذكر ان الضمادات بالبيت,,ايه لارجه يضمده
جلس يفكر وراسه بين يدينه "كيف بيلقى عذر لابوه حتى تجي رنا وتسكن معه كيف.."
وقفت سعاد تفكر في الي سمعته..وش فيها رنا !!
وليه احمد مو متطمن..!!
كان احمد يكلمها
سعاد :-نعم
كان طفشان وقال :-انعم الله عليك اقول خلصتي
ارتبكت وقالت :-ايه
واخذ شماغه وطلعوا..
في نفس هالوقت ------>>
قالت رنا لناصر :-ياقلبي ياحمود شايلن همنا حتى وهو بعيد
ناصر :- اي والله الله يوفقه يارب في حياته
الا وطلال يدخل :-انتم هنا ياحلوين
رنا :-ه ايه هنا
سوى طلال نفسه خايف :-الحمد لله خفت حسبتني بلحالي مع الساحرات
ناصر :- سنايدي
عصبت رنا :-عن قلة الادب
قال طلال يبي يقهرها :-بدينا في المحاضرات
قال ناصر :-طفش صح
رنا وطلال :-اي والله
ناصر :- وش رايكم نطلع من البيت نسربت
قالت رنا بخوف حقيقي :-انهبلت انت عشان تحرقنا امي بالحيا
هز ناصر راسه :-علقه تفوت ومحدن يموت
تحمس طلال وقال تذكر يا ناصر المقهى الجديد الي مفتتحينه بشارع الملك عبدالله
تذكر ناصر المقهى الروعه الي توه له شهرين مفتتح :-ايه
طلال :-اجل خلنا نودي رنا بيت عمي سعود ونروح للمقهى ونواعد الشله
استانس ناصر :-والله وجبتها شرايك اخت رنا
سوت فيها معصبه وقالت :-تذكرتوا اني موجوده يالله اني احمدك واشكرك
ناصر وطلال :-ه
تذكرت رنا امها وقالت :-خايفه يا ناصر امي تتحلف فيني
ناصر :-دقي على ابوي وخذي منه الاذن وعقبها ماراح يكون لها كلمه
ترددت رنا وتحت الحاح اخوانها دقت على ابوها ووافق انها تروح لبنات عمها ولا وتتعشى بعد عندهم
قالت رنا :-بروح اجيب عبايتي
وطلعت بسرعه وقف ناصر بيلحقها وطاح جواله وانكسرت شاشته على الرخام ونزل يجمع قطعه
في هالوقت لقت ام احمد الفرصه حتى تشفي غليلها من رنا ..وماراح يبرد قلبها الا لما تحرقها بالنار وبما ان مافيه وقت قبل جيت ناصر مسكت سكين الخضار وحطتها على النار لانها كانت على الطاوله محطوطه وفي طلعة رنا من غرفتها ما درت الا وبامها توقف في وجا وكانت ناويه تحط السكين الحاميه على خدها لولا ان رنا حطت يدها بين السكين وبين وجا وجاء الحرق بيدها لا ومن قوته لزقت السكينه بجلدها
وعلى صرخة رنا ..جوا العيال يركضون
وقف ناصر مصدوم ووج كانه واحد ميت ..وصدمه طلال من ورى وجمد هو الثاني
سالت دموع ناصر غصب عليه وفوق طاقته قال وهو يصارخ :-حرام عليك يالظالمه
صرخت في وج :-استح انا امك
قال وهو شبه مهستر :- لا يكرمن الامهات عندك
الا ويجيه منها كف معتبر...وقف الزمن
مافيه شي حي..
الاعيون تتلاقى ..مو مصدقه مصدومه وعيون قاسيه متحجره
قالت نوف الي شهدت اخر شي من السالفه :-آه ياليتها جت على وجهك يالشينه
الا وناصر يفقد اعصابه ويرميها على الجدار وتفقد وعيها وامها تصارخ ..
قالت بهستيريا :-عند ابوك انا ماخليته يحرقك بالحيا ويطردك انت واخوانك المتخلفين ويزوج اختك ذي شايب من ربعه ماكون بنت ابوي
كانت رنا تتالم بالمره ..ويدها تحرقها
طلال ..مصدوم
ناصر منفعل لحد الاجرام
قالا ناصر يتوعد :-قولي له اني انا السبب وشوفي انا وش بقوله
صرخت :- وش بتقول
قال ناصر يستهزء :-بجيب القديم والجديد واعطيك مثال حي ..حادث طلال انتي السبب في عماه حرق يدي وحرق صدر احمد وكسر ضلعه واخرتها حرق رنا انتي انسانه مريضه
انصدمت امه من كلامه ومن تهديده الا تبصم بالعشره انه قاصده وخافت مره لان لو شم نايف خبر بفعايلها هو بيطلقها لكن قبل الطلاق بياخذ حق عياله منها والعين يالعين
شاف ناصر رجفتها وقال وهو يناظر في نوف الي مغمى عليها :-عساها تموت والا انتي يمه مقدر ادعي عليك بس حسبي الله ونعم الوكيل
واخذ اخوانه وطلع..
بعدها بربع ساعه ..قال ناصر لرنا وهم بالسياره :-كيفك الحين
قالت رنا وهي ترجف :-نص نص بس الحمد لله المراهم مسكنه الوجع
قال طلال باكتئاب :-والحين ياناصر
سوى ناصر الوضع ايزي ..عشان اخوانه ولا بقلبه النار قايده :-عادي خطتنا ماشيه ومدام رنا بخير بنوديها بيت عمي ناصر تغير جو
قالت رنا :-احسن شي تسويه
طلال :-براحتكم على الاقل مانشيل همك وانتي في بيت هالاجاويد
وفعلا نزلت رنا في بيت عمها وراحوا العيال مشوارهم..
قالت هنادي وهي تصارخ :-ياهلاااااااااااااااااا وش هالزياره الحلوه
ابتسمت رنا من قلب :-ماعليش ما امداني اكلمك واعلمك عسى مايكون عندك روحه ولاشي
هنادي :-جتني المسج الي ارسلتيه ولو عندي طلعه لعيونك ااجلها
ابتسمت رنا من قلب وقالت :- وين خالتي
هنادي :-مو هنا طالعه
وفجاه انتبهت هنادي ليد رنا المضمده وقالت بخوف :-رنو شفيك سلامات
تورطت رنا وقالت :-يسلم عمرك يالغلا هذا انا من زود الذرابه حرقت نفسي وانا اطبخ
هنادي :-اح يوجع ..رحتي مستشفى
رنا :- توني جايه
الا وبجية منال :- هلا والله برنو احلى زياره والله
رنا :- كبر راسي من كثر الترحيب
هنادي ومنال :-
وبعدين راحن البنات وجلسن بالغرفه ..وراح الوقت بين السوالف والوناسه ..حست رنا ببهجه فقدتها طول عمرها وفي قلبها تمنت لو نوف مثل منال الحين مع هنادي طيوبه وحبوبه وضحك ووناسه لا تنافسولاكره ..
دق جوال رنا..وطلعته من الشنطه لينه احمد ..
قالت وهي توقف :-بالاذن بنات بطلع اكلم فيه احد من العيال
منال :-لا كلهم طالعين وفهد نايم بغرفته من بعد صلاة العصر
تطمنت رنا وطلعت...
اذن لصلاة المغرب وصحى فهد على صوت الماذن وقام ووضا ولبس عشان يجلس بالمسجد حتى يقيم..الا ويلقى بوج بنت شعرها احمر غامق طويل معطيته ظهرها وجالسه على الصوفا الي بالرسبشن ومو وحده من خواته متاكد..
قرب منها ..ووقف عند الزاويه عشان لا التفتت ماتشوفه ويقدر يتخبى ..الا ويسمعها تبكي
"هلا احمد...ايه ...
صارخ احمد :-اكيد انتي بخير وش صار
قالت رنا وهي تحس بالم يدها ينبض وانهارت قوتها لما سمعت صوت اخوها الحنون الي شايل همها حتى باحلى ايام عمره
قالت رنا لان احمد لو ماقالت له جاها وهي ماتبي تزعل سعاد :-كنت رايحه باخذ عبايتي عشان اطلع مع ناصر وطلال ومدري كيف الا وهي حارقتني بسكين
انصدم احمد :-سكين
بكت رنا زود :-ايه سكين كانت تبي تحرق وجهي بس الله ستر
ضاقت باحمد الوسيعه وطبق عليه صدره من الضيق:-آآآآآآآآآآآآآآآآآه ياربي
رنا وهي تمسح دموعها :-سليمه يا خوي هذي امي وهذي طبايعها والدليل الي سوته فيك وفي ناصر مو انا الوحيده الا احرقتني
عصب احمد :-مالك معقد معها
رنا :-اعقل يا احمد .. ابوي ماراح يرضى يخليني اسكن معك يفرجها الله بمعرفته ياخوي انا الحين بروح تاخرت على البنات
احمد :-زين اكلمك شوي
رنا :-اوكي
سكرت رنا الجوال ومسحت دموعها..ووقفت اما فهد خاف تشوفه وهج لغرفته بسرعه..
سكر الباب وجلس مو مستوعب الصدمه الي سمعها..صدمة حياته فيه ام تحرق عيالها بالنار..
هو لاحظ يد رنا المضمد كفها كله ..وماتوقع تكون امها السبب ..من جد زوجة عمه مريضه وماهي صاحيه..
حس الدنيا تضيق عليه ..وش العمل
خالد وحرم يتزوجها حتى لو هو ماتزوجها..هو
لا الوظيفه كانت هامته..ولا شي همه..
لكن الحين..حياة رنا التعيسه بيدينه ان وافق يتزوجها بيطلعها من النار الي عايشه فيها لان مستحيل ابوها يوافق يخليها تسكن مع اخوها وهو موجود وان عرف السبب يمكن توصل للطلاق والفضايح وان مادرى بتذوق رنا الويل..
وبتصميم ..طلع بسرعه للمسجد وبراسه بعد الصلاه موال!!
:
،
:
قال ابو سعود لولده :-وش قرارك مازلت معند
تذكر فهد قراره الجديد ورنا..:-موافق يبه
انصدم ابوه توقع فهد راسه ناشف وبيتعبه
وكمل فهد كلامه وزادت حيرة ابوه :-وابي العرس باسرع وقت ممكن
استانس ابوه وقال :-يامغير القلوب
ناظره فهد وسكت..ماله داعي يعرف احد بالسبب الحقيقي ورى زواجه من رنا .
&&&&&&&
|
آخر 10 مشاركات
14-12-2007, 11:59
العرض العادي
